< Medea, nutrix pro domo >

MEDEA (= M)

        Occidimus : aures pepulit hymenaeus meas.

117   Vix ipsa tantum, uix adhuc credo malum.

        Hoc facere Iason potuit, erepto patre

        patria atque regno sedibus solam exteris

120   deserere durus ? Merita contempsit mea

121   qui scelere flammas uiderat uinci et mare ?

        Adeone credit omne consumptum nefas ?

123   Incerta, uaecors, mente uaesana feror

        partes in omnes ; unde me ulcisci queam ?

125   Vtinam esset illi frater ! Est coniunx : in hanc

        ferrum exigatur. Hoc meis satis est malis ?

        Si quod Pelasgae, si quod urbes barbarae

        nouere facinus quod tuae ignorent manus,

        nunc est parandum. Scelera te hortentur tua

130   et cuncta redeant : inclitum regni decus

131   raptum et nefandae uirginis paruus comes

132   diuisus ense, funus ingestum patri

        sparsumque ponto corpus et Peliae senis

        decocta aeno membra ; funestum impie

135   quam saepe fudi sanguinem et nullum scelus

        irata feci : saeuit infelix amor.

137   Quid tamen Iason potuit, alieni arbitri

        iurisque factus ? Debuit ferro obuium

        offerre pectus : – melius, a melius, dolor

140   furiose, loquere. Si potest, uiuat meus,

        ut fuit Iason ; si minus, uiuat tamen

142   memorque nostri muneri parcat meo.

143   Culpa est Creontis tota, qui sceptro impotens

        coniugia soluit quique genetricem abstrahit

145   (g)natis et arto pignore astrictam fidem

        dirimit : petatur solus hic, poenas luat

147   quas debet. Alto cinere cumulabo domum ;

        uidebit atrum uerticem flammis agi

        Malea longas nauibus flectens moras.

 

NVTRIX (= N)

150   Sile, obsecro, questusque secreto abditos

        manda dolori. Grauia quisquis uulnera

        patiente et aequo mutus animo pertulit,

        referre potuit : ira quae tegitur nocet ;

        professa perdunt odia uindictae locum.

 

M

155   Leuis est dolor qui capere consilium potest

        et clepere sese : magna non latitant mala.

157   Libet ire contra.

 

N

                         Siste furialem impetum,

        alumna : uix te tacita defendit quies.

 

M     Fortuna fortes metuit, ignauos premit.

N160Tunc est probanda, si locum uirtus habet.

M     Numquam potest non esse uirtuti locus.

N     Spes nulla rebus monstrat adflictis uiam.

M     Qui nil potest sperare, desperet nihil.

N     Abiere Colchi, coniugis nulla est fides

165   nihilque superest opibus e tantis tibi.

M166Medea superest, hic mare et terras uides

        ferrumque et ignes et deos et fulmina.

N     Rex est timendus.

M                            Rex meus fuerat pater.

N     Non metuis arma ?

M                              Sint licet terra edita.

N170Moriere.

M                 Cupio.

N                              Profuge.

M                                         Paenituit fugae.

N171Medea…

M                  Fiam.

N                              Mater es.

M                                          Cui sim uides.

N172Profugere dubitas ?

M                              Fugiam, at ulciscar prius.

N173 Vindex sequetur.

M                              Forsan inueniam moras.

N     Compesce uerba, parce iam, demens, minis

175   animosque minue : tempori aptari decet.

 

MEDEA

176   Fortuna opes auferre, non animum potest ;

        sed cuius ictu regius cardo strepit ?

        Ipse est Pelasgo tumidus imperio Creo.