< Chorus Corinthiorum in orchestra choream dans >

 

CHORVS

 

        Audax nimium qui freta primus

        rate tam fragili perfida rupit

        terrasque suas post terga uidens

        animam leuibus credidit auris,

305   dubioque secans aequora cursu

306   potuit tenui fidere ligno

        inter uitae mortisque uias

        nimium gracili limite ducto.

        Nondum quisquam sidera norat,

310   stellisque, quibus pingitur aether

        non erat usus, nondum pluuias

        Hyadas poterat uitare ratis,

        non Oleniae lumina Caprae,

        nec quae sequitur flectitque senex

315   Arctica (uel Attica E Chau.) tardus plaustra Bootes :

        nondum Boreas, nondum Zephyrus

        nomen habebant.

        Ausus Tiphys pandere uasto

        carbasa ponto

320   legesque nouas scribere uentis :

321   nunc lina sinu tendere toto,

        nunc prolato pede transuersos

        captare notos, nunc antemnas

        medio tutas ponere malo,

325   nunc in summo religare loco,

        cum iam totos auidus nimium

        nauita flatus optat et alto

328   rubicunda tremunt sipara uelo.

329   Candida nostri saecula patres

330   uidere procul fraude remota.

        Sua quisque piger litora tangens

        patrioque senex factus in aruo,

        paruo diues, nisi quas tulerat

334   natale solum, non norat opes.

335   Bene dissaepti foedera mundi

        traxit in unum Thessala pinus

        iussitque pati uerbera pontum,

        partemque metus fieri nostri

        mare sepositum. Dedit illa graues

340   improba poenas per tam longos

341   ducta timores, cum duo montes,

        claustra profundi, hinc atque illinc

        subito impulsu uelut aetherio

344   gemerent sonitu, spargeret aethram

345   nubesque ipsas mare deprensum.

        Palluit audax Tiphys et omnes

        labente manu misit habenas,

        Orpheus tacuit torpente lyra

        ipsaque uocem perdidit Argo.

350   Quid cum Siculi uirgo Pelori,

        rabidos utero succincta canes,

        omnis pariter soluit hiatus ?

        Quis non totos horruit artus

        totiens uno latrante malo ?

355   Quid cum Ausonium dirae pestes

        uoce canora mare mulcerent,

        cum Pieria resonans cithara

        Thracius Orpheus solitam cantu

        retinere rates paene coegit

360   Sirena sequi ? Quod fuit huius

        pretium cursus ? Aurea pellis

362   maiusque mari Medea malum,

363   merces prima digna carina.

        Nunc iam cessit pontus et omnes

365   patitur leges : non Palladia

        compacta manu regum referens

        inclita remos quaeritur Argo ;

        quaelibet altum cumba pererrat ;

369   terminus omnis motus et urbes

370   muros terra posuere noua,

        nil qua fuerat sede reliquit

        peruius orbis : Indus gelidum

        potat Araxen, Albin Persae

        Rhenumque bibunt. Venient annis

375   saecula seris quibus Oceanus

        uincula rerum laxet et ingens

        pateat tellus Tethysque nouos

        detegat orbes nec sit terris

        ultima Thule.

 

Responsable académique : Paul-Augustin Deproost Analyse : Jean Schumacher Design & réalisation inf. : Boris Maroutaeff Dernière mise à jour : 4 décembre 2018