101. Sirenes.
Sirenes, Melpomenes Musae et Acheloi fluminis filiae, 
quum Proserpinam, a Plutone raptam, inquirerent, et eam 
minime inuenissent, a diis nouissime impetrarunt, ut uersae 
in uolucres, non tantum in terris, sed etiam in mari requisitam 
consequi possent. Quo concesso, diu quaerentes, 
nouissime ad petram Martis, quae proxime imminebat pelago, 
deuenerunt, ibique habitare coeperunt. His concessum 
quoque fuit, ut tamdiu manerent incolumes, quamdiu earum 
uox audiretur. Fuerunt autem parte uolucres, parte uirgines,
pedes gallinaceos habentes. Harem una uoce, alia tibiis, 
tertia lyra canebat. Quarum cantihus illecti nautae quum 
ad saxa accederent, in quibus illae residentes canebant, 
illisis in scopulis nauibus, in naufragia ducebantur, et ab illis 
comedebantur. Has Ulixes contemnendo deduxit ad mortem.
Nam quum illas praeternauigaret, omnium sociorum suorum
aures, ne eas audirent, cera obturans, se iussit ad arborem
nauis religari. Ita et dulcedinem cantus illarum percepit, 
et periculum euasit. At illae adeo se uictas doluerunt, ut 
se in fluctus praecipitarent, sicque mortem gustarent. Secundum 
ueritatem autem meretrices fuerunt, quae quoniam 
transeuntes ducebant ad egestatem, his fictae sunt inferre 
naufragia. g-Seirehnes igitur Graece, Latine trahitoriae 
dicuntur. Tribus enim modis illecebra trahitur, aut cantu, 
eut uisu, aut consuetudine. Eaedem igitur uolatiles dicuntur, 
quia amantium mentes celeriter mutantur. Inde gallinaceis
pedibus finguntur, quia libidinis affectu quaeque habita sparguntur.
Per Ulixem autem, qui quasi g-holohn g-xenos, id est 
omnium peregrinus dicitur, ad mortem deductae dicuntur, 
quia sapientia ab omnibus mundi illecebris peregrinatur.

102. Tantalus.
Tantalus, rea Corinthiorum, amicus numinibus fuit. 
Quae quum frequenter susciperet, et quodam tempore defuissent 
epulae, uolens diuinitatem eorum tentare, inuitatis 
filium suum Pelopem occidens epulandum apposuit. Tunc 
abstinentibus cunctis, Ceres humerum eius exedit. Quem 
quum dii per Mercurium reuocare ad superos uellent, eburneus 
ei est humerus restitutus. Ideo autem sola Ceres dicitur 
comedisse, quia ipsa est terra, quae corpus soluit, 
ossa tamen reseruans. Per Mercurium autem fingitur ob 
hoc reuocatus, quod ipse est deus prudentiae. Tantalus 
autem hac lege apud inferos dicitur esse damnatus, ut in 
Eridano inferorum stans, nec undis praesentibus, nec uicinis 
eius pomariis, fame deficiens, perfruatur. Aliquis igitur 
auarus fingitur; ut Horatius : Quid rides? fabula narratur, 
mutato nomine, de te.