[47,0] XLVII. g-AGAMOS g-GAMOS SIVE CONIVGIVM IMPAR.
 PETRONIVS, GABRIEL.
 
 [47,1] (PETRONIVS) Vnde nobis Gabriel tam tetrica fronte? Num ex antro Trophonii? 
 [47,2] (GABRIEL) Imo a nuptiis.
 [47,3] (PETRONIVS) Nunquam uidi uultum minus nuptialem. Nam qui nuptiis interfuerunt, 
 totos postea sex dies solent hilariores amoenioresque uideri, senes 
 etiam reiuuenescere ad annos decem. Quas igitur tu mihi nuptias narras? Mortis, 
 opinor, cum Marte?
 [47,4] (GABRIEL) Imo iuuenis generosi cum. puella sedecim annos nata, in qua nihil 
 desideres, siue formam spectes, siue mores, siue genus, siue fortunam. Quid 
 multis? loue marito digna uideri poterat.
 [47,5] (PETRONIVS) Hui, tam teneram puellam tam uetulo ? 
 [47,6] (GABRIEL) Reges non senescunt.
 [47,7] (PETRONIVS) Vnde igitur isthaec tristitia? Fortasse sponso inuides, qui tibi 
 captatam praedam uictor praeripuit.
 [47,8] (GABRIEL) Phy, nihil minus.
 [47,9] (PETRONIVS) Num tale quid accidit, quale memorant de conuiuio Lapitharum? 
 [47,10] (GABRIEL) Nequaquam.
 [47,11] (PETRONIVS) Quid, an defuit Bacchi liquor? 
 [47,12] (GABRIEL) Imo supererat.
 [47,13] (PETRONIVS) Non aderant tibicines?
 [47,14] (GABRIEL) Et fidicines et lyricines et tubicines et utricines. 
 [47,15] (PETRONIVS) Quid igitur? Non aderat hymenaeus?
 [47,16] (GABRIEL) Frustra tot uocibus ciebatur. 
 [47,17] (PETRONIVS) Nec Charites?
 [47,18] (GABRIEL) Ne musca quidem Charis. Nec pronuba Iuno, nec aurea Venus, nec 
 Iupiter Gamelius.
 [47,19] (PETRONIVS) Nae tu mihi nuptias loqueris prorsus inauspicatas et g-atheous, seu 
 potius g-agamon g-gamon.
 [47,20] (GABRIEL) Magis dicas, si uidisses. 
 [47,21] (PETRONIVS) Non igitur saltatum est? 
 [47,22] (GABRIEL) Imo misere claudicatum. 
 [47,23] (PETRONIVS) Nullum ergo numen prosperius istas hilarabat nuptias?
 [47,24] (GABRIEL) Nullum omnino illic aderat praeter unam deam, quae Graecis 
 dicitur Psora.
 [47,25] (PETRONIVS) Pruriginosas, opinor, nuptias dicis. 
 [47,26] (GABRIEL) Imo rubiginosas et purulentas. 
 [47,27] (PETRONIVS) Sed quid est, mi Gabriel, quod haec commemoratio tibi lachrymas 
 etiam excutit?
 [47,28] (GABRIEL) Haec res, Petroni, uel silici possit extundere lachrymas. 
 [47,29] (PETRONIVS) Credo, si silex uidisset. Sed obsecro te, quodnam est hoc tantum 
 mali? Ne cela, nec meum animum diutius suspendito.
 [47,30] (GABRIEL) Nosti Lampridium Eubulum?
 [47,31] (PETRONIVS) Quo non alius in hac urbe uir melior aut beatior. 
 [47,32] (GABRIEL) Quid? Eius filiam Iphigeniam?
 [47,33] (PETRONIVS) Florem huius aetatis nominasti. 
 [47,34] (GABRIEL) Sic est. At scis cui nupserit? 
 [47,35] (PETRONIVS) Sciam, si dixeris.
 [47,36] (GABRIEL) Nupsit Pompilio Bleno.
 [47,37] (PETRONIVS) Eine Thrasoni, qui neminem non solet occidere suis gloriosis 
 fabulis ?
 [47,38] (GABRIEL) Huic ipsi.
 [47,39] (PETRONIVS) At is iam olim celebris est in hac urbe duabus potissimum rebus, 
 mendaciis ac scabie, quae nondum suum habet nomen, quum ipsa tam multorum 
 habeat nomina.
 [47,40] (GABRIEL) Superbissima scabies est, quae nec leprae nec elephantiasi nec 
 lichenibus nec podagrae nec mentagrae cedat, si res ueniat in certamen. 
 [47,41] (PETRONIVS) Ita praedicant medicorum filii.
 [47,42] (GABRIEL) Quid ego nunc, Petroni, depingam puellam tibi non incognitam, 
 quanquam plurimum gratiae addidit ornatus natiuo decori. Mi Petroni, dixisses 
 deam quampiam esse. Nihil illam non decebat. Interim prodiit nobis beatus ille 
 sponsus, trunco naso, alteram trahens tibiam, sed minus féliciter quam solent 
 Suiseri: manibus scabris, halitu graui, oculis languidis, capite obuincto, sanies 
 et e naribus et ex auribus fluebat. Alii digitos habent anulatos, ille etiam in 
 foemore gestat anulos.
 [47,43] (PETRONIVS) Quid parentibus accidit ut talem filiam tali portento committerent?
 [47,44] (GABRIEL) Nescio, nisi quod hodie plerisque uideur adempta mens. 
 [47,45] (PETRONIVS) Fortasse praediues est.
 [47,46] (GABRIEL) Est affatim, sed aere alieno.
 [47,47] (PETRONIVS) Si puella ueneno sustulisset ambos auos et auias, quod grauius 
 supplicium de illa sumi poterat?
 [47,48] (GABRIEL) Si minxisset in patrios cineres, satis poenarum datura fuerat tali 
 monstro uel osculum date coacta.
 [47,49] (PETRONIVS) Accedo.
 [47,50] (GABRIEL) Mihi sane factum hoc crudelius esse uidetur, quam si illam nudam 
 obiecissent ursis aut leonibus aut crocodiles. Nam aut ferae pepercissent tam 
 insigni formae aut subita mors finisset cruciatum.
 [47,51] (PETRONIVS) Vera praedicas. Mihi plane uidetur hoc factum Moezentio dignum, 
 qui mortua, ut enquit Maro, iungebat corpora uiuis, componens manibusque 
 manus atque oribus ora. Quanquam nec Moezentius, ni fallor, tam immanis erat, 
 ut tam amabilem puellam cadaueri iungeret; nec ullum cadauer est, cui non 
 iungi malis quam tam putido cadaueri. Si quidem hoc ipsum quod spirat, merum 
 est uenenum; quod loquitur, pestis est; quod contingit, mors est.
 [47,52] (GABRIEL) Iam tu mihi cogita, Petroni, quid uoluptatis habitura sint illa suauia, 
 illi complexus, illi nocturni lusus ac blanditiae?
 [47,53] (PETRONIVS) Theologos nonnunquam audiui loquentes de impari coniugio. 
 Isthuc demum optimo iure dici potest impar coniugium, quasi gemmam inseras 
 plumbo. Sed interim demiror tenerae uirginis audaciam. Solent enim tales 
 puellae ad muris aut laruae conspectum tantum non exanimari. An haec audebit 
 tale cadauer amplecti noctu?
 [47,54] (GABRIEL) Habet puella quod excuset: autoritatem parentum, importunitatem 
 amicorum, aetatis simplicitatem; ego parentum uesaniam satis mirari non possum. 
 Quis enim filiam habet tam infelici forma, quam collocare uelit homini 
 leproso?
 [47,55] (PETRONIVS) Nullus, opinor, si modo uel unciolam habeat sanae mentis. Mihi 
 si lusca esset eademque clauda, nec minus deformis quam fuit Thersites Homericus, 
 postremo indotata, recusarem istiusmodi generum.
 [47,56] (GABRIEL) At haec lues est omni lepra tum tetrior, tum nocentior. Nam citius 
 serpit et subinde recurrit ac frequenter occidit, quum nonnunquam lepra sinat 
 hominem ad extremam usque senectutem uiuere.
 [47,57] (PETRONIVS) Fortasse latebat parentes sponsi morbus. 
 [47,58] (GABRIEL) Imo pulchre nouerant.
 [47,59] (PETRONIVS) Si tam male uolebant filiae, quin potius insutam culleo proiecerunt 
 in Scaldam.
 [47,60] (GABRIEL) Profecto leuior fuisset insania.
 [47,61] (PETRONIVS) Quae dos commendabat illis sponsum? Praecellit arte quapiam? 
 [47,62] (GABRIEL) Permultis. Strenuus est aleator, potator inuictus, scortator improbus, 
 nugandi mentiendique artifex maximus, praedator non segnis, decoctor 
 eximius, comessator perditus. Quid multis? quum scholae non profiteantur 
 nisi septem artes liberales, hic habet plus quam decem illiberales.
 [47,63] (PETRONIVS) Aliquid tamen fuerit oportet, quod illum commendarit parentibus.
 [47,64] (GABRIEL) Nihil aliud quam gloriosum equitis nomen.
 [47,65] (PETRONIVS) Qualis eques, cui per scabiem uix in sella sedere licet? Sed fortassis 
 habet luculentas possessiones.
 [47,66] (GABRIEL) Habuit mediocres ; sed ex proteruia, quam fecit, nihil superest praeter 
 unam turriculam, unde excurrere solet ad praedam, eamque tam belle instructam, 
 ut nolis illic porcos tuos ali. Sed interim nunquam non habet arces 
 in ore et feuda aliaque magnifica nomina, nusquam non affigit sua insignia. 
 [47,67] (PETRONIVS) Clypeus quod habet symbolum?
 [47,68] (GABRIEL) Tres elephantos aureos in spacio phoeniceo.
 [47,69] (PETRONIVS) Scilicet. Elephas elephanti congruit. Oportet autem hominem 
 esse sanguinarium.
 [47,70] (GABRIEL) Imo uinarium. Nam rubro uino mirum in modum delectatur, sic 
 tibi sanguinolentus est.
 [47,71] (PETRONIVS) Ad hauriendum igitur utilis est illi proboscis. 
 [47,72] (GABRIEL) Maxime.
 [47,73] (PETRONIVS) Itaque insignia declarant magnum ac stolidum nebulonem, uini 
 gurgitem. Neque enim ille color sanguinis est, sed meri, et aureus elephas indicat, 
 quicquid auri nactus est, uino absumi.
 [47,74] (GABRIEL) Sic est.
 [47,75] (PETRONIVS) Quid igitur dotis hic Thraso conferet ad sponsam? 
 [47,76] (GABRIEL) Quid ? maximam.
 [47,77] (PETRONIVS) Qui maximam, decoctor?
 [47,78] (GABRIEL) Sine me loqui : maximam, inquam, pessimamque scabiem.
 [47,79] (PETRONIVS) Emoriar, ni malim filiam meam equo nuptam, quam tali equiti. 
 [47,80] (GABRIEL) At ego uel monacho nuptam malim. Imo hoc non est homini nubere, 
 sed hominis cadaueri. Hoc spectaculum si uidisses, dic mihi, tenuissesne 
 lachrymas ?
 [47,81] (PETRONIVS) Qui potuissem, qui uix ista sine lachrymis audio? Adeon' parentes 
 ad omnem naturalis pietatis affectum obsurduisse, ut filiam unicam, puellam 
 tali forma, tali indole, tam amabilibus moribus tali monstro in seruitutem 
 traderent propter mendacem clypeum?
 [47,82] (GABRIEL) Atqui facinus hoc, quo nihil inuenias nec immanius nec crudelius 
 nec magis impium, hodie magnatum etiam ludus est, quum expediat eos, qui 
 reipublicae tractandae nascuntur, esse quam prosperrima ualetudine. Corporis 
 enim habitus animi uim affigit. Certe hic morbus quicquid est homini cerebri 
 solet exhaurire. Ita fit, ut reipublicae praesideant, qui nec animo bene ualeant 
 nec corpore.
 [47,83] (PETRONIVS) Non solum integrae mentis ac prospera ualetudine conuenit esse 
 qui reipublicae gubernaculis assident, uerum etiam forma dignitateque corporis 
 praecellentes. Quanquam enim prima principum commendatio sint sapientia 
 et integritas, tamen nonnihil refert, qua specie corporis sit qui caeteris imperat. 
 Nam si saeuus est, multum inuidiae addit corporis deformitas. Sin probus 
 et pius, "Gratior est pulchro ueniens e corpore uirtus".
 [47,84] (GABRIEL) Recte.
 [47,85] (PETRONIVS) Nonne deplorant earum infelicitatem, quarum coniuges post 
 peractas nuptias in lepram aut morbum incidunt comitialem?
 [47,86] (GABRIEL) Merito sane.
 [47,87] (PETRONIVS) Quae igitur dementia est ultro filiam plus quam leproso tradere?
 [47,88] (GABRIEL) Plus quam dementia est. Si satrapas paret tollere catulos, quaeso 
 num ad generosam foeminam admittet scabiosum et ignauum canem?
 [47,89] (PETRONIVS) Imo magna cura dispiceret, ut undiquaque generosum adiungeret, 
 ne nascantur hybridae.
 [47,90] (GABRIEL) Et si dux augere uelit equitatum, num ad eximiam equam admitteret 
 morbidum aut degenerem?
 [47,91] (PETRONIVS) Ne in commune quidem stabulum reciperet morbidum, ne qua 
 serpat malum ad alios.
 [47,92] (GABRIEL) Nec interim referre putant quem admittant ad filiam, et unde nascantur 
 liberi, non tantum in haereditatem omnium facultatum successuri, 
 uerum etiam rempublicam moderaturi?
 [47,93] (PETRONIVS) Ne rusticus quidem quemuis taurum admittit ad iuuencam nec 
 quemuis equum iungit equae nec quemuis porcum scrophae, quum taurus gignatur 
 aratro, equus rhedae, porcus culinae.
 [47,94] (GABRIEL) Vide quam peruersa sint hominum iudicia. Si quis plebeius patriciae 
 puellae osculum obtrudat, iniuriam putant bello uindicandam. 
 [47,95] (PETRONIVS) Acerrimo.
 [47,96] (GABRIEL) Et ipsi uolentes, scientes, prudentes, id quo nihil habent charius, 
 dedunt abominando portento, et priuatim impii in suam gentem et publice in 
 ciuitatem.
 [47,97] (PETRONIVS) Si sponsus subclaudicat, alioqui sanus, quam abhorretur a coniugio! 
 Hoc tantum malum non imputatur in sponsalibus.
 [47,98] (GABRIEL) Si quis filiam elocauit Franciscano, quanta abominatio, quanta 
 deploratio male collocatae uirginis! At illa ueste detracta uirum habet membris 
 ualidis. Ista totam aetatem transigit cum semiuiuo cadauere. Si qua nubit sacerdoti, 
 ludunt in unctum, at haec peius uncto nupsit.
 [47,99] (PETRONIVS) Vix hoc faciunt hostes puellis bello captis; uix piratae faciunt 
 scelere abductis; et hoc faciunt parentes unicae filiae, nec illis datur a magistratu 
 curator?
 [47,100] (GABRIEL) Quomodo medicus succurret phrenetico, si ipsum habeat phrenesis ?
 [47,101] (PETRONIVS) Atqui mirum est a principibus, quorum munus est prospicere 
 reipublicae, duntaxat in his, quae ad corpus pertinent, quum in hoc genere
 nihil prius ac potius sit bona ualetudine, hic nullum excogitari remedium. Tanta 
 pestis bonam orbis partem occupauit, et illi interim stertunt, quasi nihil ad 
 rem pertineat.
 [47,102] (GABRIEL) De principibus, Petroni, religiose loquendum est. Sed admoue 
 aurem, insusurrabo tria uerba.
 [47,103] (PETRONIVS) O miseriam, utinam falsa praedicares.
 [47,104] (GABRIEL) Quot morborum genera nasci putas ex uinis corruptis ac mille modis 
 infectis?
 [47,105] (PETRONIVS) Innumera, si qua medicis fides. 
 [47,106] (GABRIEL) Num hic uigilant aediles?
 [47,107] (PETRONIVS) Plane uigilant in exigendis uectigalibus.
 [47,108] (GABRIEL) Quae sciens nubit morbido, fortasse digna est suo malo, quod asciuit 
 ipsa sibi; quanquam si principatum gererem, utrumque semouerem ab 
 urbano commercio. Caeterum si qua nupsisset huic obnoxio lui, qui se sanum 
 mentitus esset, si quis mihi summum pontificium deleget, dirimerem hoc coniugium, 
 etiamsi sexcentis tabulis sponsalibus contractum esset.
 [47,109] (PETRONIVS) Quo colore? Nam coniugium rite contractura ab homine non 
 potest dirimi.
 [47,110] (GABRIEL) Quid? tibi uidetur rite contractum, quod dolo malo contractum 
 est? Non ualet contractus, si puella decepta seruo nupsit, quem putabat liberum. 
 Hic cui nupsit seruus est miserrimae dominae psorae atque hoc infelicior 
 est seruitus, quod illa neminem manumittit, ut seruitutis miseriam aliqua libertatis 
 spes consolari possit.
 [47,111] (PETRONIVS) Sane colorem reperisti.
 [47,112] (GABRIEL) Ad haec: Non est coniugium, nisi inter uiuos. Hic mortuo nubitur.
 [47,113] (PETRONIVS) Repertus est alter color. Sed sineres, opinor, scabiosas scabiosis 
 nubere, iuxta uetus illud adagium: g-homoion g-pros g-homoion.
 [47,114] (GABRIEL) Si hoc mihi liceret, quod expediret reipublicae, sinerem quidem 
 iungi, sed iunctos exurerem.
 [47,115] (PETRONIVS) Tum tu quidem Phalaridem ageres, non principem.
 [47,116] (GABRIEL) An tibi Phalaris uidetur medicus, qui secat digitos aliquot aut inurit 
 corporis partem, ne totum pereat?
 Mihi non uidetur ista crudelitas, sed misericordia. Quod utinam initio nascentis 
 mali fuisset factum. Tum enim paucorum exitio totius orbis saluti 
 consuli poterat. Et huius facti reperimus exemplum in Gallorum annalibus. 
 [47,117] (PETRONIVS) At mitius erat illos castrari ac summoueri.
 [47,118] (GABRIEL) Foeminis porro quid faceres? 
 [47,119] (PETRONIVS) Adderem fibulas.
 [47,120] (GABRIEL) Ita quidem prospectum esset, ne ex malis coruis nascantur mala 
 oua; sed fatebor hoc esse mitius, si tu fatearis illud esse tutius. Nam pruriunt et 
 execti, nec uno modo transilit malum, sed osculo, sed colloquio, sed contactu, 
 sed compotatiuncula serpit ad alios. Et uidemus huic malo fatalem quandam 
 maliciam adiunctam. Vt quisquis eo tenetur, uel nullo suo commodo, gaudeat 
 quam plurimis suam affricare scabiem. Iam submoti possunt fugere, possunt uel 
 noctu uel ignotis imponere; a mortuis uero nihil est periculi.
 [47,121] (PETRONIVS) Tutius fateor, sed haud scio an conueniat Christianae mansuetudini.
 [47,122] (GABRIEL) Dic age mihi, unde plus periculi, a simplicibus furibus, an ab istis? 
 [47,123] (PETRONIVS) Fateor pecuniam multo uiliorem bona ualetudine.
 [47,124] (GABRIEL) Et tamen hos Christiani suffigimus in crucem, nec appellatur crudelitas, 
 sed iustitia; et si rempublicam spectes, pietas est.
 [47,125] (PETRONIVS) Verum ibi plectitur qui damnum dedit.
 [47,126] (GABRIEL) Hi scilicet lucrum adferunt. Sed demus hoc malum multis nulla sua 
 culpa contractum, quum tamen paucos reperias, quibus eam luem non conciliarit 
 nequitia: iureconsulti docent interdum innoxios recte occidi, si id magnopere 
 intersit reipublicae. Quemadmodum Graeci post euersam Troiam occiderunt 
 Astyanactem, Hectoris filium, ne per illum bellum instauraretur. Nec 
 putant impium post extinctum tyrannum et liberos innoxios trucidari. Quid 
 quod nunquam non bellamus Christiani, neque tamen nescimus in bellis maximam 
 malorum partem ad eos redire, qui nihil commeruerunt? Idem usu uenit 
 in represalibus, quae uocant. Qui laesit in tuto est, et spoliatur negociator, qui 
 ne factum quidem audiuit, tantum abest ut in culpa fuerit. Quod si talibus remediis 
 utimur in rebus non ita magni momenti, quid censes faciendum in re 
 omnium atrocissima?
 [47,127] (PETRONIVS) Vincor ueris.
 [47,128] (GABRIEL) Tum illud mihi perpende. Apud Italos ut primum scintillare coepit
 pestilentia, occluduntur aedes; qui laboranti inseruiunt, submouentur a publico. 
 Hoc quidam appellant inhumanitatem, quum summa sit humanitas. Siquidem 
 hac uigilantia fit, ut paucis funeribus sopiatur malum. At quanta est humanitas 
 tot millium uitae consuli? Sunt qui parum hospitale putant, quod Itali 
 in rumore pestilentiae tempore uespertino hospitem portis submouent coguntque 
 sub dio noctem agere; at pietas est paucorum incommodo maximo reipublicae 
 bono prospicere. Quidam sibi ualde fortes uidentur et officiosi, quod 
 ausint ad quemuis pestilentia laborantem accedere, etiam si nihil illic habeant 
 negocii. At dum reuersi domum inficiunt uxores, liberos ac totam familiam, 
 quid ea fortitudine stultius, quid officio inofficiosius, ut salutes alienum, tibi 
 charissimos in praesens uitae discrimen adducere? Hic tamen quanto minus est 
 periculi a pestilentia, quam ab hac scabie. Rarius afllat propinquos nec fere 
 senes attingit; et quos attigit, aut cito liberat aut restituit sanitati, puriores 
 etiam quam antea fuerant. Haec, quid aliud quam perpetua mors est, uel, ut 
 uerius dicam, sepultura. Obuoluuntur linteis et unguentis more cadauerum. 
 [47,129] (PETRONIVS) Verissime narras. Saltem idem curae dandam crut huic tam exitiali 
 malo, quod detur leprosis. Aut si hoc quoque nimium est, nemo barbae 
 syluam patiatur sibi demeti aut sibi quisque tonsorem praestet.
 [47,130] (GABRIEL) Quid si uterque claudat os? 
 [47,131] (PETRONIVS) Afflant naribus malum. 
 [47,132] (GABRIEL) Est et isti malo remedium. 
 [47,133] (PETRONIVS) Quodnam?
 [47,134] (GABRIEL) Vt quod solent alcumici, addunt personam, quae per uitreas fenestellas 
 praebeat lumen oculis, ori naribusque respirationem, cornu a persona per 
 axillas in tergo porrecto.
 [47,135] (PETRONIVS) Belle, si nihil metuendum est a contactu digitorum, linteorum, 
 pectinis et forpicis.
 [47,136] (GABRIEL) Optimum igitur barbam usque ad genua demittere.
 [47,137] (PETRONIVS) Ita uidetur. Deinde fiat edictum, ne quis idem sit tonsor et chirurgus.
 [47,138] (GABRIEL) Ad famem relegas tonsores.
 [47,139] (PETRONIVS) Minuant sumptus et aliquanto pluris radant. 
 [47,140] (GABRIEL) Esto.
 [47,141] (PETRONIVS) Tum feratur lex, ne quis cum alio poculum habeat commune. 
 [47,142] (GABRIEL) Istam uix recipiat Anglia.
 [47,143] (PETRONIVS) Neue duo misceantur eodem lecto praeter uxorem et maritum. 
 [47,144] (GABRIEL) Placet.
 [47,145] (PETRONIVS) Ad haec, in diuersoriis ne quis hospes indormiat linteis, in quibus 
 alius indormiit.
 [47,146] (GABRIEL) Quid facies Germanis, qui uix lauant bis in anno?
 [47,147] (PETRONIVS) Extimulent lotrices, praeterea tollatur mos quamuis uetustus salutandi 
 osculo.
 [47,148] (GABRIEL) Etiamne in templis ?
 [47,149] (PETRONIVS) Tabellae suam quisque opponat manum. 
 [47,150] (GABRIEL) Quid de colloquio?
 [47,151] (PETRONIVS) Vitetur illud Homericum: "g-Agchi g-schohn g-kephalehn; 
 et uicissim qui auscultat, comprimat labra.
 [47,152] (GABRIEL) Vix istis legibus suffecerint duodecim tabulae. 
 [47,153] (PETRONIVS) Sed quid consulas interim infelici puellae ? 
 [47,154] (GABRIEL) Quid? nisi ut libenter sit misera, quo sit minus misera, et suauio 
 coniugis opponat manum, tum armata cum illo dormiat.
 [47,155] (PETRONIVS) Quo nam hinc properas? 
 [47,156] (GABRIEL) Recta in museum. 
 [47,157] (PETRONIVS) Quid facturus?
 [47,158] (GABRIEL) Pro epithalamio, quod postulant, scripturus epitaphium.