[41,0] XLI.  DE PULCHRITUDINE.

[41,1] Virtus, instar gemmae pretiosae, optima est sine ornamentis inserta. Atque profecto eadem praestat in corpore decoro, licet non delicato, quodque aspectus dignitatem potius prae se ferat quam pulchritudinem. Neque fere repieries eximie formosas uirtutibus pollere, ac si natura in hoc magis incubuisset ut non turpiter erraret quam ut aliquid excellens produceret. Itaque conuersationibus apti sunt, at excelsos spiritus non gerunt, et urbanitati potius student quam uirtuti. Sed hoc in omnibus non tenet. Siquidem Augustus Caesar, Titus Vespasianus, Philippus Pulcher rex Galliae, Edouardus Quartus rex Angliae, Alcibiades Atheniensis, Ismael Persa uiri prorsus magni fuerunt et nihilominus perpulchri. 

[41,2] In pulchritudine praefertur uenustas colori, et decorus ac gratiosus oris et corporis motus ipsi uenustati. Ea praecipua pulchritudinis portio quam pictura repraesentare non potest, imo nec effigies ipsa uiua primo aspectu. Non reperitur pulchritudo aliqua excellens cui non insit aliquid minus conforme in compagine. Haud facile quis dixerit utrum Apelles aut Albertus Durerus nugator maior fuerit, quorum alter hominem secundum proportiones geometricas effingere uoluit, alter ex compluribus faciebus optimas quasque partes desumendo unam satagebat depingere excellentem. 

[41,3] Tales (crede) effigies uix ulli placebunt praeterquam pictori ipsi. Non quin existimem elegantiorem faciem depingi a pictore posse quam unquam in uiuis fuit. Sed hoc contingere oportet ex felicitate quadem et casu (ueluti musicis sui cantus), non autem ex regulis artis. Videre est facies nonnullas quarum partes singulae examini si subiiciantur uix unam reperies quam separatim probes, quae tamen in consortio satis placent. Quod si uerum sit pulchritudinem praecipuam sitam esse in moto decoro, mirum sane non est si prouectiores aetate aliquando uideantur iunioribus amabiliores. Secundum illud Euripidis, pulchrorum autumnus pulcher. Etenim fieri non potest ut iuuenis per omnia decus tueatur, nisi forte iuuentutem ipsam ad supplementum decoris assumas. Pulchritudo est instar fructus hortarii qui facile corrumpitur, nec diu durat, atque saepe iuuentutem inducit dissolutam, senectutem auto sero poenitentem. Attamen si bene collocetur, uirtutes splendere facit, uitia erubescere.