147. Clytemnestra et Orestes, filius eius.
Clytemnestra fuit uxor Agamemnonis. Qui quum reuersus 
esset de bello Troiano, interfectus est per Aegisthum 
adulterum. Nam quum ingressus fuisset domum suam, obtulit 
ei Clytemnestra uestem sine capicio. Quam quum uellet 
induere et capicium inuenire non posset, ab Aegistho adultero 
occisus est; quem postea simul cum matre Orestes interfecit; 
unde in amentiam uersus est. Hic namque Orestes, Agamemnonis 
et Clytemnestrae filius, quia optimus tragoedus
fuit, in scenis celebratus, quum matrem et Aegisthum occidisset, 
insaniuit. Qui socii Pyladis admonitu, ad euitandas 
Furias templum Apollinis ingressus, quum uellet exire, inuaserunt 
eum Furiae. Hinc est: Ultricesque sedent in limine Dirae.
	
148. Europa et Iuppiter.
Europa fuit filia regis Graecorum Agenoris. Quae dum 
colligeret flores in pratis secundum consuetudinem puellarum, 
Iuppiter, in formam speciosi tauri conuersus, ei uim intulit 
hoc modo. Qum Mercurius iussu patris in Phoenicem 
transgressus esset, ut armenta illius regionis ad litus compelleret, 
Iuppiter in taurum conuersus est; quumque se iumentis 
Agenoris regis immiscuisset, et in amorem sui spatiantes 
in arena uirgines coëgisset, ac paulatim singulis alludens, 
nouissime Agenoris filiam, cuius in amorem compulsus 
auerterat figuram, insidentem sibi tergo in insulam Cretam 
detulit, ibique nuptiis eius fruitus est.