[1,9] Tardius tamen parebant oculi, nec amoliri poteram 
constantiam sereni placidique luminis. Est enim in vagis
et cursim errantibus oculis irrequietae indicium mentis: nec 
ulla pars est in homine, quae magis cum arcanis affectibus 
consentiat. Amplam et quodammodo uegetam aciem non 
nisi magni et uiuidi spiritus alunt. Blandior ac ueluti 
illecebrosa, faciles, nec omnium hostes uoluptatum, notat. 
Sic angustus oculus, et in imum carcerem defugiens, animum 
nunquarn assurgentem sublimibus consiliis, et cogitationum 
magnitudine, prodit. At uero cum aliqua perturbatio 
attonitos capitis spiritus confudit, ut iam omnium 
membrorum nexus et uincula aegre sustineant, tum nerui 
praecipue, qui ex altissimo capite transuersim in oculos descendunt, 
uiciniore malo laborant, et crebrius micantibus oculis 
occultum animi morbum liuido ac truci aspectu 
pingunt. Quis crederet ? etiam interdum prudentibus 
uerbis alebam amentiae famam : quoniam nihil est 
tam fatuum, quod ubiquc desipiat. Piscem natura uocalem 
esse noluit, et tamen in Ladone non est mutus.

{VI} Sed pigebat tamdiu rationem in uinculis habere, et 
artis tam contumeliosae nausea quotidie magis afficiebat 
indignantem stomachum. Iamquc instar uulpeculae Laconis 
uitalia aperientis festinabat prodi tranquillior animi status, 
et reiiciebat dementiae uestem, cum ea se occasio dedit, 
ut crederes ipsos deos ad remedium inuitare. Notaueram 
in domini sacrario reponi medicamentum multo Agarico 
imbutum : praeterea Betonicae, credo, et Eufragii 
succo abundans, et temperata herba qua Chrysippus ter 
mentem repurgauit. Recentioris Casiae et sīnceri Balsami 
suauitas leniebat Terebinthinum saporem, et seuerioribus 
plantis obstabat ad ignem durata Indicae cannae medulla. 
Huic tam multiplici remedio accedebat unionum Iiquor; 
dilutumque singulari artificio smaragdum puto non tam ad 
ualetudinem fecisse quam ad pompam.

Hoc medicamenti genus, quod Callion a fratre acceptum 
propria uanitate auxerat, religiose seruabatur, tanquam 
indubitatum deficienti naturae auxilium, etiam uetustate 
potentiores uires trahens, et ipsius temporis, a quo 
caetera destruuntur, alumnum. Nec aliud ultra Callionem 
delectabat, quam de preciosissimo poculo uel audire, uel 
loqui;  illud Menecrates si haberet, supra Iouem iturum:
illud inuidi coeli flammam prouocare, ultra quam uitalcs 
AEsculapii manus : hoc sanguinem sistere, hoc restituere 
pulmonibus libertatem, afflarc iecoris ignem, uenasque 
ipsas et nobiles cordis motus salubri temperamento mulcere. 
Dii boni quam est ingeniosa et solers necessitas; mihi 
Callionis quaesiui gratiam ab effuso tam charo praestantique 
remedio; utique cum asseruatam negligentius arcam furtim 
iniissem, uiuidum liquorem sparsim in terram deturbo, 
multoque puluere obducens intercipio suauitatem odoris, 
et excludo ab aduenientium sensu. Deinde tanquam 
direptum auide medicamentum exhausissem, languidus in 
terram procumbo ; si cogitata fraus non procederet, certus 
profecto laturam impune amentiam tam audax et grande 
facinus. Quaerebatur interim Euphormio, et destituta 
assuetis salibus domini mensa uidebatur marcescere, cum 
ille meus Percas, cuius etiam conscientiam in hoc consilio 
exhorrueram, animaduertit procumbentem, et extinctum 
ratus omni celeritate familiam aduocat. Ac Callion uatuam 
in mea manu pateram conspicatus, non potuit in 
tanto dispendio risum tenere ; et, O miseram, inquit, 
simplicitatem ! existimauit deliciarum, non salubritatis pocuIum 
commendari.