[0] DE SEPTEM MUNDI MIRACULIS, MANU HOMINUM FACTIS.

[1] Quod primum est, Capitolium Romæ, saluatio ciuium, maior quam ciuitas, ibique fuerunt gentium a Romanis captarum statuæ, uel deorum imagines, et in statuarum pectoribus nomina gentium scripta, quæ a Romanis capta fuerant, et tintinnabula in collibus eorum appensa. Sacerdotes aut peruigiles diebus et noctibus per uices ad harum custodiam curam habentes intendebant: si quælibet earum moueretur, sonum mox faciente tintinnabulo, ut scirent quæ gens Romanis rebellaret. Hoc autem cognito, Romanis principibus uerbo uel scripto nunciabant, ut scirent ad quam gentem reprimendam exercitum mox destinare deberent.
SECUNDUM, Pharus Alexandrina super quatuor cancros uitreos per passus uiginti sub mari fundata est. Hoc namque mirum quomodo tam magni cancri fieri possent, uel quomodo deportari et non frangi ualerent, qualiter fundamenta cementitia desuper hærere potuerint, uel quomodo sub aqua cementum stare ualeat, et quare cancri non franguntur, et quare non lubricant desuper iacta fundamenta.
Tertium, in Rhodo insula Colossi imago ærea centum triginta sex pedum fusilis facta: hoc mirum, qualiter tam immensa moles fundi potuisset, uel erigi et stare.
Quartum miraculum, simulacrum Bellerophontis ferreum cum equo suo in summa ciuitate suspensum, in aëre sistere, nec catenis penditur, nec desuper ullo stipite sustentatur, sed magni lapides magnetum in archiuolis habentur, et hinc et inde in assumptionibus trahitur, et in mensura æquiparata consistit: est autem estimatio ponderis circa quinque millia librarum ferri.
Quintum miraculum, Theatrum in Heraclea, de uno marmore ita sculptum est, ut omnes cellulæ et mansiones muri et antra bestiarum, ex uno solidoque lapide factum sit: super septem cancros de ipso lapide sculptos appendens sustinetur; et nemo in gyro ipso tam secrete aut solus aut cum aliquo loqui potest, quod ipsum non audiant qui in gyro ædificii sistunt.
Sextum miraculum, balneum quod Apollotaneus cum una candela consecrationis incendit, Thermas perpetuo igne sine ulla administratione calentes facit.
Septimum miraculum, templum Dianæ, super quatuor columnas. Prima fundamenta percussa sunt arcuum, deinde paulatim succrescens super quatuor arcus eminentiores lapides arcubus prioribus suppositi. Super quatuor, octo columnæ et octo arcus positi: inde tertio ordine æqua ponderatione per quatuor partes succrescens, super eminentiores lapides positi. Super octo, sexdecim fundati sunt; super sexdecim, triginta duo: iste quartus est in quinto ordine: sexaginta quatuor columnæ finem faciunt tam mirabilis edificii.