Ver erat.

Ver erat, et morbo Romae languebat inerti
Orbilius: dira tacuerunt tela magistri
Plagarumque sonus non iam ueniebat ad aures
Nec ferula assiduo cruciabat membra dolore.
Arripui tempus: ridentia rura petiui
Immemor: a studo moti curisque soluti
Blanda fatigatam recrearunt gaudia mentem.
Nescio qua laeta captum dulcedine pectus
Taedia iam ludi, iam tristia uerba magistri

Oblitum, campos late spectare iuuabat
Laetaque uernantis miracula cernere terrae.
Nec ruris tantum puer otia uana petebam:
Maiores paruo capiebam pectore sensus:
Nescio lymphatis quae mens diuinior alas
Sensibus addebat: tacito spectacula uisu
Attonitus contemplabar: pectusque calentis
Insinuabat amor ruris: ceu ferreus olim
Annulus, arcana quem ui Magnesia cautes
Attrabit, et caecis tacitum sibi colligat hamis.

Interea longis fessos erroribus artus
Deponens, iacui uiridanti in fluminis ora
Murmure languidulo sopitus, et otia duxi
Permulsus uolucrum concentu auraque Fauoni.
Ecce per aetheream uallem incessere columbae
Alba manus, rostro florentia serta gerentes
Quae Venus in Cypriis redolentia carpserat hortis.
Gramen, ubi fusus recreabar turba petiuit
Molli remigio: circum plaudentibus alis
Inde meum cinxere caput, uincloque uirenti
Deuinxere manus, et olenti tempora myrto
Nostra coronantes, pondus per inane tenellum
Erexere... Cohors per nubila celsa uehebat
Languidulum rosea sub fronde: cubilia uentus
Ore remulcebat molli nutantia motu.

Vt patrias tetigere domos, rapidoque uolatu
Monte sub aerio pendentia tecta columbae
Intrauere, breue positum uigilemque reliquunt.
O dulcem uolucrum nidum! ... Lux candida puri.
Circumfusa humeros radiis mea corpora uestit:
Nec uero obscurae lux illa simillima luci,
Quae nostros hebebat mixta caligine uisus:
Terrenae nil lucis habet caelestis origo!
Nescio quid caeleste mihi per pectora semper
Insinuat, pleno currens ceu flumine, numen.

Interea redeunt uolucres, rostroque coronam
Laurea serta gerunt, quali redimitus Apollo
Argutas gaudet compellere pollice chordas.
Ast ubi laurifera frontem cinxere corona
Ecce mihi patuit caelum, uisuque repente
Attonito, uolitans super aurea nubila, Phoebus
Diuina uocale manu praetendere plectrum.
Tum capiti inscripsit caelesti haec nomina flamma:
TV VATES ERIS... In nostros se subiicit artus
Tum calor insolitus, ceu, puro splendida uitro,
Solis inardescit radiis uis limpida fontis.
Tunc etiam priscam speciem liquere columbae:
Musarum chorus apparet, modulamina dulci
Ore sonans, blandisque exceptum sustulit ulnis,
Omina ter fundens, ter lauro tempore cingens.