[1,0]  DE DEFORMITATE CORPORIS.

[1,1] (Dolor)
Egisse mecum nimis illiberaliter naturam queror, que deformem genuit. 
(Ratio)
O quot faces extinxit! Quot occurrit incendiis! 
(Dolor)
Deformem genuit natura. 
(Ratio)
Non dedit quod delectet? Si quod prosit dedit, satis est: mitte querelas. 
(Dolor)
Non dedit forme gratiam natura. 
(Ratio)
Dare noluit quod egritudo corrumperet, quod senectus eriperet: dedit forte quod nec mors ipsa contingere audeat. 
(Dolor)
Formam corporis natura negauit. 
(Ratio)
Si formam animi largita est, maximi debitor; exigui repulsam alta mente despicito, et offensam speculi conscientia solare. 

[1,2] (Dolor)
Inuidit natura formam corporis. 
(Ratio)
Non inuidit, sed erubuit dare quod quotidie minuatur et pereat. Vera liberalitas mansuro munere noscitur: putria et caduca auari etiam donant. Forma fugax et fragile nature donum: paucis ad utilitatem, multis ad perniciem, nulli ad salutem ueramque gloriam data est. 
(Dolor)
Forma michi corporis negata est. 
(Ratio)
Raro admodum forma insignis honestasque uno sub lare habitant. Bene tibi accidit si, peiori exclusa, hospes melior tecum est. 
(Dolor)
Nullum forme decus obtigit. 
(Ratio)
Quid hinc doles, aut quid penitus sanctum piumque animo uoluis? in quod tibi necessariam, aut omnino usui, et non potius impedimento esse corporis formam putes? multos forma fecit adulteros, castum nullum; multos per lubrica uoluptatum duxit ad infamem mortem, qui, deformes, sine dedecore periculoque uixissent. Et quid multos dixi? Innumerabiles in discrimen, fere omnes in crimen trahit. 

[1,3] (Dolor)
Cur me deformem genuit natura? 
(Ratio)
Ut ipse te ornares, ac formosum faceres, ea forma que tecum esset in senio, in grabatulo, in feretro, in sepulcro, essetque tua non nature laus aut parentum. Pulchrius est pulchrum fieri quam nasci. Illud enim casus, hoc studii est. 
(Dolor)
Corporis multa deformitas me premit. 
(Ratio)
Deformitas quidem hec, apud quosdam infelicitatis quedam portio est; tu crede dicentibus “non deformitate corporis fedari animum, sed pulchritudine animi corpus ornari”. Non te hoc igitur inhonestat aut premit, sed honestandi animi materiam assurgendique aditum per uirtutes aperit. 
(Dolor)
Deformem natura parens genuit. 
(Ratio)
Si deformem Helenam genuisset, uel, ut uiros loquar, si deformem Paridem, fortasse Ylion adhuc staret. 
(Dolor)
Deformis in lucem editus queror. 
(Ratio)
Pauci boni formam corporis amarunt, nullus optauit, quidam etiam proiecerunt. 

[1,4] Quod fecisse laudatur ille Tuscus adolescens, qui preclari uultus eximiam speciem, quam suspectam multis aduersamque fame sue senserat et pudicitie aliene, illatis sibi sponte uulneribus deformauit; quam tibi dissimilis qui id optes quod ille sibi abstulit, et quo rari unquam innocue usi sint. 
(Dolor)
Forma careo. 
(Ratio)
Tutius est caruisse quo in experimentum tui anceps ac laboriosum sepe uenturus sis. Multis forma nocuit, cunctos exercuit, quosdam post insultus uarios molliuit, et uinci faciles dedit, atque ab honestate transuersos in culpam trudi. 


[1,5] (Dolor)
Deformis et breuis nimium statura est. 
(Ratio)
Non est ut reris prosequendum querelis incommodum: longa conspectior est statura, breuis expeditior agiliorque. 
(Dolor)
Statura perbreuis est. 
(Ratio)
Quid uetat, ut in parua domo magnum uirum, sic in paruo corpore magnum animum habitare? 
(Dolor)
Corpus exiguum est. 
(Ratio)
Id scilicet lamentaris, quod te ipso non es oneratus sed leuis et facilis et ad cuncta uersatilis. 
(Dolor)
Perexiguum est corpus. 
(Ratio)
Quis unquam de exigua conquestus est sarcina? iusta hercle dolendi causa, quod non pressus mole corporea sed indutus, neque ipse tibi tedio sed usui sis? 

[1,6] (Dolor)
Contemptibili sum statura. 
(Ratio)
Ut gloriosum nichil nisi uirtus, sic contemptibile nichil nisi uitium. Nullam uirtus respuit staturam. 
(Dolor)
Exigua corporis statura est. 
(Ratio)
Non staturam corporis uirtus exigit sed animi. Hec, si longa, si recta, si ampla, si magnifica, si decora est, sit illa altera qualiscunque: nichil ad rem, non solum domi, sed ne militie quidem, ubi magis obesse uideretur. Nosti ut Marius summus dux, non longos, sed torosos et ualidos milites eligebat. Id quam feliciter, quam consulto faceret, crebre et ingentes indicant uictorie. Habet corporum proceritas maiestatis plusculum, non uigoris. 
(Dolor)
Breuis est statura. 
(Ratio)
Hec non impedit quin uir bonus et magnus esse possis, insuper et rex, si sors tulerit, et imperator. Etsi enim Africanus Scipio celsus corpore, Iulius Cesar statura fuerit excelsa, breui tamen Alexander Macedo et Augustus Cesar, nec eorum magnitudini breuitas obfuit, nec detraxit fame. 

[1,7] (Dolor)
Vellem esse altior et maior. 
(Ratio)
Assurge animo, cresce uirtutibus: maior eris atque altior. Hoc utilius, hoc facilius incrementum. 
(Dolor)
Cuperem esse formosus 
(Ratio)
Disce amare atque optare meliora. Stultum est amare periculum suum, stultum optare quod nullo studio queri potest. Nempe si contra naturam formosus fieri studeas, nil ultra proficies quam ut deformior uideare. 
(Dolor)
Formosus esse nequicquam nitor. 
(Ratio)
Nitere autem bonus esse. Id non frustra enim facies. Hoc inter multa precipuum uirtus habet: queri potest, eripi non potest. Cum reliqua in arbitrio sint fortune, nec obstante illa queri ualeant, nec seruari, sola uirtus fortune legibus libera est, atque illa obluctante clarius nitet.