119. Certamen Neptuni et Mineruae.
Quum in acropoli, Athenarum arce, Neptunus et Minerua 
de nomine Athenarum contenderent, placuit diis, ut illius ex 
nomine ciuitas diceretur, qui munus melius mortalibus obtulisset.
Tunc Neptunus percusso cum tridente litore equum, 
animal bellis aptum, produxit. Minerua iactata hasta oliuam 
creauit; quae res est melior comprobata, et pacis insigne 
habita. Mox ciuitas Athenae quasi g-athanateh, id est immortalis. 
Hinc, quia Mineruae munus praelatum est dono 
Neptuni, ramus oliuae cui offertur, offerente melior esse iudicatur. 
Hinc est prouerbium illud "herbam do", id est cedo 
uictoriam. Nam quum in agonibus aliquis herbam in modum 
palmae dat ei, cum quo non conatur contendere, eum fatetur 
meliorem esse. Vittis autem ramus oliuae alligatur, ut 
inertia aut imbecillitas offerentis ostendatur. Scimus enim 
oues alieno semper egere auxilio. Equum autem, a Neptuno 
progenitum, alii Scitium, alii Chironem, alii Arionem (quem 
Adrastus in Thebano proelio habuit) dicunt fuisse nominatum. 
Ideo autem Neptunus dicitur equum inuenisse, quia uelox 
est eius numen et mobile, sicut mare. Unde et Castor et 
Pollux, quia eorum uelocissimae stellae sunt, equos in tutela 
habere dicuntur.

120. Minos.
Minos, Iouis et Europae filius, quum sacrificaturus ad 
aras patris accederet, orauit potentiam numinis, ut dignam  
aris suis hostiam ipse praeberet. Itaque subito taurus apparuit 
nimio candore perfusus. Quem quum admiraretur Minos, 
religionis oblitus, armenti sui maluit esse ductorem; cuius 
etiam ardore Pasiphaë, filia Solis, uxor Minois, dicitur arsisse. 
Igitur contemtus Iuppiter a filio furorem tauro immisit, 
ut Cretensium non solum agros, sed uniuersa etiam 
moenia uastaret. Hunc Hercules, missus Eurysthei imperio, 
superauit uictumque Argos usque perduxit. Quem quum 
Eurystheus Iunoni consecrare uellet, Iuno exosa munus, 
quod ad Herculis gloriam pertinebat, taurum in Atticam regionem
expulit, ubi a monte eius Marathone Marathonius est 
appellatus; quem postea Theseus, Aegei filius, interemit. 
Sed de Pasiphaë et eodem tauro plenius dicatur.