[1,13] Caput XIII : Medicinae contra pituitam. 
Si aduersus exundantem pituitam acrius pugnandum fuerit, pilulas aurora 
ex hierapicra Galieni, uel quas Mesues elephanginas nominat, dabimus, 
scilicet quot et quotiens oportuerit; uel etiam in robustiore natura pilulas ex 
hiera atque trochiscis agarici pari portione compositas, semper uero cum 
melle rosaceo liquido atque oxymelle aquaque marathri, id est feniculi. Qui 
certe syrupus in pituita digerenda etiam ante pilulas atque post eas maxime 
prodest. Si una cum pituita ceteri quoque humores turbent, pilulis ex reubar 
baro Mesues, uel pilulis quae Sine quibus a posterioribus nuncupantur, opportune 
purgabimus. Omnem uero uehementem repentinamque deiectionem 
purgationemque penitus detestamur, nam stomachum corque debilitat, spiri 
tus multos exhaurit, confundit humores, spiritus fumis humorum fuscis obtenebrat.  

[1,14] Caput XIV : Destillatio. 
Ubi caput propter pituitam destillationibus fluctuat, quandoque hora 
somni aliquot ex pilulis quas modo descripsimus dabimus. Iubebimus 
praeterea ea hora et aliis thus saepe mandere, nam mirifice destillationibus 
et sensibus omnibus memoriaeque succurrit. Rursus muscata nux et theriaca 
ore retenta probatur; maiorana quoque, quam amaracum nominant, uel 
eius aqua admota naribus uel infusa. Post cibum uero alimentorum fumos 
coriandro cydoneisque coercebimus. 

[1,15] Caput XV : Dolor capitis. 
Si caput saepe doleat humore grauatum frigido, praeter illa quae narrauimus, 
confectionem illam quam diambram nominant uel diacori uel 
plisarchoticon tenere ore iubebimus. Quinetiam masticem saepe mandere. 
Praeterea linire frontem, tempora, ceruicem maioranae, feniculi, rutae foliis 
una cum oleo rosaceo tunsis, similiter aloe, aceto, oleo aquaque rosaceis 
perfecte diluta. 

[1,16] Caput XVI : De cura uisus. 
Ubi oculi caligant neque rubent, tamen neque aliud praebent ullum caloris 
indicium, tunc sane collyrium ex aqua feniculi, maioranae, chelidoniae, 
rutae, adhibito croco et antimonio, confert; sed aqua eiusmodi prius 
densior panno est exprimenda. Nihil tamen admoueas oculis, nisi antea 
pilulis lucis saepe purgaueris. At si caligantes oculi rubeant, subito pilulis ex  
fumo terrae compositis purga. Mox collyrium ex aqua rosacea et saccharo 
prodest, nonnunquam uero albumine oui, tutia, lacte adiectis quam primum 
opitulatur. Omnino autem quotidianus usus marathri uisum seruat et acuit. 
Semen quidem eius frequenter ore tenere oportet, folia uero comedere. 
Triphera minor a Mesue descripta optima est. Optimum quotidie uacuo 
stomacho myrobalanum chebulam conditam sumere, atque cum ea nonnihil 
panis ex saccharo marathroque in puluerem ducto compositi, quod insuper 
ingenio mirum in modum ac producendae uitae prodest. Eufrasiae quinetiam 
usus oculis est singulare praesidium. In omni uel dolore capitis uel caligine 
oculorum diuertendi sunt retro uapores frictionibus cucurbitulisque. Ac si 
calor in causa sit sanguisque abundet, hirudines ceruici et humeris adhibebimus.