[1,12] Caput XII.  De his quae fouent membra praecipua, uires, spiritus. 

Sed iam praestare uidetur ut nonnulla ex medicorum officina in medium 
producamus, quae stomachi, cordis, cerebri, spirituum, ingenii uires uel 
seruent integras uel restituant; ac si uel pituita uel atra bilis excrescat uel 
immineat nausea, longe propellant. Omnes sine controuersia medici 
consenserunt, nihil esse salutarius theriaca fouendis confirmandisque tum singulis 
membris et uiribus, tum spiritibus atque ingenio. Huius igitur imprimis utemur 
drachma dimidia aut saltem drachmae tertia parte bis qualibet hebdomada 
hieme atque autumno, sed aestate atque uere semel, uel sola uel, si 
placet, frigidis humidisque temporibus cum pauculo mero claro, suaui; 
temporibus uero calidis siccisque, praesertim si natura uel aetas sit calidior, cum 
aquae rosaceae duabus unciis aut tribus stomacho scilicet uacuo sex aut septem 
horis ante cibum. Si theriaca desit, dabimus mithridatum. Sed ubi theriacam mithridatumue sumimus, eo die ab omni re calida penitus abstinendum; 
ac si aestas aut uer fuerit, frigidis est utendum. 
Secundo uero loco eadem in causa probatur ab omnibus aloe rite electa 
atque lota. Sume myrobalanorum chebularum drachmas duas, rosarum 
purpurearum, sandali rubei, emblicarum, cinnamomi, croci, corticis pomi citri, 
been, melissae, id est citrariae, singulorum drachmam unam, aloes electae 
riteque ablutae drachmas duodecim. Ex his confice pilulas optimo mero, quibus hebdomada qualibet semel utaris diluculo, eo scilicet pondere quod naturae 
tuae conueniat; aestate quidem cum aqua rosacea, alias uero cum uino. 
Quibus autem diebus neque theriacam neque pilulas assumes, utere confectione eiusmodi mane atque uespere duabus aut tribus ante cibum horis. Sume 
cinnami electissimi drachmas quattuor, chebularum myrobalanorum duas 
et totidem emblicarum, croci, rosarum purpurearum drachmam dimidiam, 
sandalorum rubrorum drachmas duas, corallorumque similium drachmam 
unam, sacchari albissimi quantum satis est. Funde saccharum aqua rosacea 
atque succo citri uel limonum, aequalibus uidelicet portionibus; coque suauiter. 
Deinde adde musci tertiam drachmae partem atque ambrae tantundem. 
Demum confice bolos solidos, quos morsulos uulgo nominant, auroque 
inuolue. 
Tria haec ipsi eo usu quo praescripsimus experti sumus, theriacam et aloem 
ita (ut diximus) temperatam confectionemque illam singulis conferre membris 
et uiribus et spiritibus, acuere sensus atque ingenium, memoriam confirmare; 
pituitam quoque et bilem atque atram bilem illis pilulis facile uel educi uel 
emendari. Praeterea aetati cuilibet et naturae tria quae diximus familiarissima 
iudicantur.