[1,8] Caput VIII. Quae sit hora inchoandis studiis opportunior, 
quisue continuandi modus. 
Ex iis quae in superioribus disputata sunt, ferme iam satis constat oppor-
tune nostra nos studia exordiri uel statim oriente sole, uel hora una saltem 
uel duabus ad summum ante solis exortum. Sed antequam e lecto surgas,  
perfrica parumper suauiterque palmis corpus totum primo, deinde caput 
unguibus, sed id paulo leuius. Hac in re te Hippocrates admoneat. Nam 
frictione, inquit, si uehemens sit, durari corpus; si leuis, molliri; si multa, minui; 
si modica, impleri. Cum e lecto surrexeris, noli subitae lectioni meditationique 
prorsus incumbere, sed saltem horae dimidium cuilibet expurgationi 
concedito; mox meditationi accingere diligenter, quam ad horam circiter 
unam pro uiribus prorogabis. Deinde remittes parumper mentis intentionem, 
atque interim eburneo pectine diligenter et moderate pectes caput a fronte 
ceruicem uersus quadragies pectine ducto; tum ceruicem panno asperiori 
perfrica. Demum reuersus ad meditandum, duas insuper horas aut saltem 
horam unam studio dedicato. Produci uero nonnunquam studia possunt, sed 
aliquanta interdum intermissione facta ad horam usque meridianam; quinetiam interdum, quamuis raro, nisi cibum interim cogamur assumere, post 
meridiem circiter horas duas. Sol enim circa ortum potens est, potens et in 
medio coelo; in plaga quoque illa coeli quae medium proxime sequitur, quam 
nonam astronomi uocant et sapientiae domum, Sol maxime gaudet. Quoniam 
uero poetae omnes Phoebum Musarum scientiarumque ducem esse uolunt, 
merito si quid altius excogitandum est, his horis potissimum cogitent. Si 
Musae quaerendae, horis eisdem Phoebo duce quaerantur. Reliquae enim horae 
ueteribus alienisque legendis potius quam nouis propriisque excogitandis 
accommodatae uidentur. Semper autem meminisse debemus qualibet hora 
semel saltem paulisper remittendam esse mentis intentionem. Cum enim ob 
intentionem eiusmodi spiritus resoluantur, merito si nunquam cesses tendere, 
lentus eris. Dum laboras animo, interim corpore conquiesce. Mala est 
defatigatio corporis, peior animi, utriusque simul pessima, oppositis hominem 
motibus simul distrahens, uitamque disperdens. Denique haud ulterius 
meditatio procedat quam uoluptas, potius uero citra.