COLLOQUIUM L : G-Aprosdionusa, siue absurda.
Personae :  Annius, Leucius. 
{ANNIUS}
Audio te interfuisse nuptiis Pancratii et Albinae.
{LEUCIUS}
Nunquam antehac infelicius nauigaui, quam hoc tempore.
{ANNIUS}
Quid ais? tantam fuisse hominum frequentiam?
{LEUCIUS}
Nec unquam mihi uilior fuit uita, quam id temporis.
{ANNIUS}
Vide quid faciant opes. Ad meas nuptias pauci conuenirent, idque tenues.
{LEUCIUS}
Vix fueramus ingressi pelagus, ortus est ingens turbo.
{ANNIUS}
Narras deorum coetum. Totne aderant uiri principes, tot matronae nobiles?
{LEUCIUS}
Boreas dissecuit uelum, dissectumque dissipauit.
{ANNIUS}
Desponsam noui. Nihil fingi potest uenustius.
{LEUCIUS}
Mox fluctus reuulsit clauum.
{ANNIUS}
Idem uidetur omnibus. Nec sponsus admodum illi cedit, ut aiunt, formae gratia.
{LEUCIUS}
Quid animi censes nobis illic fuisse?
{ANNIUS}
Sane rarum nunc est uirgines nubere.
{LEUCIUS}
Remigandum nobis erat.
{ANNIUS}
Dotem uix credibilem narras.
{LEUCIUS}
Ecce mox aliud malum.
{ANNIUS}
Cur puellam nubilem commiserunt tam feroci?
{LEUCIUS}
Apparuit piratarum nauis.
{ANNIUS}
Profecto sic est: in multis nequitia supplet aetatem.
{LEUCIUS}
Ibi nobis geminum fuit bellum, alterum cum mari, alterum cum praedonibus.
{ANNIUS}
Hui tantum donariorum? Interim pauperibus nemo dat festucam.
{LEUCIUS}
Quid? cederemus? Imo desperatio uitae addebat animos.
{ANNIUS}
Vereor ne sint steriles nuptiae, si uera praedicas.
{LEUCIUS}
Imo iniecimus harpagones.
{ANNIUS}
O rem nouam! ante nuptias grauida?
{LEUCIUS}
Si spectasses eum conflictum, fatereris, me non esse foeminam.
{ANNIUS}
Ut audio, coniugium hoc non solum ratum est, sed etiam consummatum.
{LEUCIUS}
Insiluimus in nauim piraticam.
{ANNIUS}
At demiror, te uocatum alienum, me praeterito, qui tertio propinquitatis gradu sponsae patrem contingo.
{LEUCIUS}
Ipsos in mare praecipites dedimus.
{ANNIUS}
Vera praedicas; infelicium nulli sunt affines.
{LEUCIUS}
Quidquid erat praeda, inter nos partiti sumus.
{ANNIUS}
Expostulabo cum puella primo quoque tempore.
{LEUCIUS}
Mox exorta est subita tranquillitas: dixisses esse Alcedonia.
{ANNIUS}
Si illi res est, mihi est animus. Nihil moror illius beneuolentiam.
{LEUCIUS}
Ita pro una duas naues in portum deduximus.
{ANNIUS}
Indignetur, qui alit.
{LEUCIUS}
Quo eam rogas? In templum, ueli partem dicaturus diuo Nicolao.
{ANNIUS}
Hodie non est liberum mihi: nam ipse domi conuiuas exspecto; alias non excusabo.