ADAGIA 2 (21). I,1, 2 (21). 
Hirundines sub eodem tecto ne habeas.
g-Homohrophious g-chelidonas g-meh g-echein, hoc est Hirundines ne habeas sub eodem
tecto. Diuus Hieronymus Aristotelis auctoritatem secutus interpretatur abstinendum
a commercio garrulorum et susurronum. Verum hoc interpretamentum refellitur
apud Plutarchum Symposiacôn decade octaua. Nam haud aequum uideri, ut auem
domesticam et humani conuictus citra noxam amantem perinde ut sanguinariam et
rapacem propellamus. Quod enim de garrulitate causantur, id esse friuolum, cum
gallos, graculos, perdices, picas cumque hos alias complureis multo magis
obstreperas non arceamus a domestico contubernio, imo nihil pene minus in
10 hirundinem conuenire quam garrulitatem. Ne id quidem accipiendum uidetur, quod
quidam pythagoricum symbolum ad tragoediam, quae de hirundine fertur, referunt,
quasi triste omen secum adferat. Nam hac ratione philomenam item eiici oportere, ut
quae ad eandem pertineat tragoediam. Itaque uero propius uidetur ob id
improbatam hirundinem, quod eidem malo uideatur obnoxia, quo infames habentur
aues aduncis unguibus. Siquidem carnibus uictitat et cicadas, animal maxime uocale
ac Musis sacrum, uenatur, praeterea humi uolans minutis animantibus insidiatur,
deinde sola auium in tectis uersatur nullam adferens utilitatem. Nam ciconia cum ne
tecto quidem utatur nostro, tamen haudquaquam mediocrem contubernii gratiam
refert bufones, serpentes, hostes hominum, e medio tollens. Contra hirundo, postea
20 quam sub nostro tecto suos exucauit pullos, abit nulla relata gratia communicati
hospitii. Denique (quod est omnium grauissimum) duo duntaxat animalia domestica
sunt, quae nunquam humano conuictu mansuescunt neque tactum admittunt neque
consuetudinem neque ullius rei aut disciplinae communionem. Musca semper
pauitat ne quid mali patiatur, et ob hanc causam indocilis ac semifera. Hirundo item
natura uidetur hominem exosum habere, proinde nec cicuratur, utpote diffidens
semper semperque suspicans mali quippiam. His de rebus recte Pythagoras
conuictorem ingratum parumque firmum hirundinis symbolo monuit ablegandum.
Huiusmodi ferme Plutarchus eo quem ostendi loco. Quibus illud unum uidetur addendum 
Ciceronem, seu quisquis is fuit, in Rheroricis ad Herennium infidae amicitiae similitudinem 
ab hirundinibus mutuari, quae uere ineunte praesto sint, hyeme instante deuolent.