Praefatio.
<1> Cum disertorum gratiam aut communibus fabulis aut gratuitis beneficiis,
nullis tamen ueris meritis collegissem, dicta mea, quae in honoribus saepe
positus
pro explicanda negotiorum qualitate profuderam, in unum corpus redigere
suadebant, ut uentura posteritas et laborum meorum molestias, quas pro
generalitatis commodo sustinebam, et sinceris conscientiae inemptam dinosceret
actionem. <2> Dicebam dilectionem ipsorum mihi potius fore contrariam, ut, quod
modo propter desideria supplicantium putabatur acceptum, postea legentibus
uideretur insubidum. addebam debere illos Flacci dicta recolere, qui monet, quid
periculi uox praecipitata possit incurrere. <3> Respondendi celeritatem cunctos
uidetis exigere, et creditis me impaenitenda proferre? dictio semper agrestis
est, quae aut sensibus electis per moram non comitur aut uerborum minime
proprietatibus explicatur. loqui nobis communiter datum est: solus ornatus est,
qui discernit indoctos. <4> Nonus annus ad scribendum relaxatur auctoribus: mihi
nec horarum momenta praestantur: mox ut coepero, clamoribus imminetur et
festinatione nimia geritur, ne cautius coepta peragantur. alter nos frequentia
inuidiosae interpellationis exaggerat: alter miseriarum mole castigat: alii
furiosa contentionum seditione circumdant. <5> Inter haec cur requiritis
dictationis eloquium, ubi copiam uix possumus habere sermonum? ipsas quoque
noctes inexplicabilis cura circumuolat, ne desint alimonia ciuitatibus, quae
supra omnia populi plus requirunt, studentes uentri, non auribus. hinc est quod
cogimur animo per cunctas ire prouincias et iniuncta semper inquirere, quia non
sufficit agenda militibus imperare, nisi haec iudicis assiduitas uideatur
exigere. nolite, quaeso, noxie nos amare. declinanda est suasio quae plus habet
periculi quam decoris. <6> Sed illi me potius tali disceptatione fatigabant:
ëpraefectum te praetorianae sedis omnes nouerunt, cui dignitati occupationes
publicae uelut pedisequae semper assistunt. ab hac enim exercituales flagitantur
expensae: ab hac uictus quaeritur sine temporis consideratione populorum: huic
etiam uel solum graue iudiciorum pondus adiectum est. cui ideo leges uisae sunt
inmensum
onus imponere, dum ad ipsam honoris gratia maluerunt paene omnia
pertinere.
quod enim spatium possis publico labori subripere, quando in unum
pectus
confluit, quicquid utilitas generalitatis exposcit? <7> Addimus etiam,
quod
frequenter quaesturae uicibus ingrauato otii tempus adimit crebra
cogitatio, et uelut mediocribus fascibus insudanti illa tibi de aliis honoribus
principes uidentur imponere, quae proprii iudices nequeunt explicare. haec autem
facis nulla uendendo, sed exemplo proprii genitoris ab sperantibus accipis solos
labores: sic petentibus praestando gratis sub continentiae munere cuncta
mercaris. <8> Regum quin etiam gloriosa colloquia pro magna diei parte in bonum
publicum te occupare nouerunt, ut fastidium sit otiosis expectare, quae tu
continuo labore cognosceris sustinere. uerum hoc magis tibi ad suffragium laudis
potest proficere, si inter tanta et talia ualueris legenda proferre: deinde quod
rudes uiros et ad rem publicam conscia facundia praeparatos labor tuus sine
aliqua offensione poterit edocere, et usum, quem tu inter altercantium pericula
iactatus exerces, illos, qui sunt in tranquillitate positi, contingit felicius
adipisci. <9> Proinde, quod salua fide, qua frueris, dissimulare non poteris,
tanta regum beneficia, si pateris ignorari, frustra maluisti benigna
festinatione concedi. noli, quaesumus, in obscurum silentii reuocare, qui te
dicente meruerunt illustres dignitates accipere. tu enim illos assumpsisti uera
laude describere et quodam modo historico colore depingere. quos si celebrandos
posteris tradas, abstulisti, consuetudine maiorum, morientibus decenter
interitum. <10 Deinde mores prauos regis auctoritate recorrigis, excedentis
audaciam frangis, timorem legibus reddis. et adhuc dubitas edere quod tantis
utilitatibus probas posse congruere? celas etiam ut ita dixerim, speculum mentis
tuae, ubi te omnis aetas uentura possit inspicere. contingit enim dissimilem
filium plerumque generari: oratio dispar moribus uix potest inueniri. est ergo
ista ualde certior arbitrii proles: nam quod de arcano pectoris gignitur,
auctoris sui posteritas ueracius aestimatur. <11> Dixisti etiam ad
commendationem uniuersitatis frequenter reginis ac regibus laudes: duodecim
libris Gothorum historiam defloratis prosperitatibus condidisti. cum tibi in
illis fuerit secundus euentus, quid ambigis et haec publico dare, qui iam
cognosceris dicendi tirocinia posuisse?í <12> Victus sum, fateor, in uerecundiam
meam: nec obsistere tantis prudentibus potui, cum me uiderem ex affectione
culpari. nunc ignoscite, legentes, et si qua est incauta praesumptio,
suadentibus potius imputate, quia mea iudicia cum illo uidentur facere, qui me
decreuerit accusare. <13> Et ideo quod in quaesturae, magisterii ac praefecturae
dignitatibus a me dictatum in diuersis publicis actibus potui reperire, bis sena
librorum ordinatione composui, ut, quamquam diuersitate causarum legentis
intentio concitetur, efficacius tamen rapiatur animus, cum tendit ad terminum.
<14> Illud autem sustinere alios passi non sumus quod nos frequenter incurrimus
in honoribus dandis, impolitas et praecipites dictiones, quae sic poscuntur ad
subitum, ut uix uel scribi posse uideantur. cunctarum itaque dignitatum sexto et
septimo libris formulas comprehendi, ut et mihi quamuis sero prospicerem et
sequentibus in angusto tempore subuenirem: ita quae dixi de praeteritis
conueniunt et futuris, quia non de personis, sed de ipsis locis quae apta
uidebantur explicui. <15> Librorum uero titulum, operis indicem, causarum
praeconem, totius orationis breuissimam uocem, uariarum nomine praenotaui, quia
necesse nobis fuit stilum non unum sumere, qui personas uarias suscepimus
ammonere. aliter enim multa lectione satiatis, aliter mediocri gustatione
suspensis, aliter a litterarum sapore ieiunis persuasionis causa loquendum est,
ut interdum genus sit peritiae uitare quod doctis placeat. <16> Proinde maiorum
pulchra definitio est sic apte dicere, ut audientibus possis concepta uota
suadere. neque enim tria genera dicendi in cassum prudens definiuit antiquitas:
humile, quod communione ipsa serpere uideatur: medium, quod nec magnitudine
tumescit nec paruitate tenuatur, sed inter utrumque positum, propria uenustate
ditatum suis finibus continetur: tertium genus, quod ad summum apicem
disputationis exquisitis sensibus eleuatur: uidelicet, ut uarietas personarum
congruum sortiretur eloquium et, licet ab uno pectore proflueret, diuersis tamen
alueis emanaret, quando nullus eloquentis obtinet nomen, nisi qui trina ista
uirtute succinctus causis emergentibus uiriliter est paratus. <17> Huc accedit,
quod modo regibus, modo potestatibus aulicis, modo loqui uideamur humillimis,
quibus alia contigit sub festinatione profundere, alia uero licuit cogitata
proferre, ut merito uariarum dicatur, quod tanta diuersitate conficitur. sed
utinam, sicut ista regulis accepisse probamur antiquis, ita eadem promissae
resignent merita dictionis. <18> Quapropter humile de nobis uerecunde
promittimus: mediocre non improbe pollicemur: summum uero, quod propter
nobiltatem sui est in editiore constitutum, nos attigisse non credimus. uerum
tamen sileant praesumptiones illicitae, qui legendi sumus. incongruo namque
nostras de nobis disputationes ingerimus, qui uestra potius iudicia sustinemus.
VARIARUM LIBRI DUODECIM - LIBER PRIMUS.
I. ANASTASIO IMPERATORI THEODERICUS REX.
<1> Oportet nos, clementissime imperator, pacem quaerere, qui causas iracundiae
cognoscimur non habere: quando ille moribus iam tenetur obnoxius, qui ad iusta
deprehenditur imparatus. omni quippe regno desiderabilis debet esse
tranquillitas, in qua et populi proficiunt et utilitas gentium custoditur. haec
est enim bonarum artium decora mater, haec mortalium genus reparabili
successione multiplicans facultates protendit, mores excolit: et tantarum rerum
ignarus agnoscitur qui eam minime quaesisse sentitur. <2> Et ideo, piissime
principum, potentiae uestrae conuenit et honori, ut concordiam uestram quaerere
debeamus, cuius adhuc amore proficimus. uos enim estis regnorum omnium
pulcherrimum decus, uos totius orbis salutare praesidium, quos ceteri dominantes
iure suspiciunt, quia in uobis singulare aliquid inesse cognoscunt, nos maxime,
qui diuino auxilio in re publica uestra didicimus, quemadmodum Romanis
aequabiliter imperare possimus. <3> Regnum nostrum imitatio uestra est, forma
boni propositi, unici exemplar imperii: qui quantum uos sequimur, tantum gentes
alias anteimus. hortamini me frequenter, ut diligam senatum, leges principum
gratanter amplectar, ut cuncta Italiae membra componam. quomodo potestis ab
Augusta pace diuidere, quem non optatis a uestris moribus discrepare? additur
etiam ueneranda Romanae urbis affectio, a qua segregari nequeunt quae se nominis
unitate iunxerunt. <4> Proinde illum et illum legationis officio ad serenissimam
pietatem uestram credidimus destinandos, ut sinceritas pacis, quae causis
emergentibus cognoscitur fuisse uitiata, detersis contentionibus in sua deinceps
firmitate restituta permaneat: quia pati uos non credimus inter utrasque res
publicas, quarum semper unum corpus sub antiquis principibus fuisse declaratur,
aliquid discordiae permanere. <5> Quas non solum oportet inter se otiosa
dilectione coniungi, uerum etiam decet mutuis uiribus adiuuari. Romani regni
unum uelle, una semper opinio sit. quicquid et nos possumus, uestris praeconiis
applicetur. <6> Quapropter salutationis honorificentiam praeferentes prona mente
deposcimus, ne suspendatis mansuetudinis uestrae gloriosissimam caritatem, quam
ego sperare debui, etiamsi aliis non uideretur posse concedi. cetera uero per
praesentium latores pietati uestrae uerbo suggerenda commisimus, ut nec
epistularis sermo redderetur extensior nec aliquid pro utilitatibus nostris
praetermisisse uideremur.
II. THEONI V. S. THEODERICUS REX.
<1> Comitis Stephani insinuatione comperimus sacrae uestis operam, quam nos
uoluimus necessaria festinatione compleri, disrupto magis labore pendere: cui
usum subtrahendo sollemnem abominandam potius inferre cognosceris tarditatem.
credimus enim aliquem prouenisse neglectum, ut aut crines illi lactei, carneo
poculo bis terque satiati, pulcherrima minus ebrietate rubuerint aut lanae non
hauserint adorandi muricis pretiosissimam qualitatem. <2> Quapropter si
perscrutator Hydrontini maris intusa conchylia sollemniter condidisset apto
tempore, aceruus ille Neptunius, generator florentis semper purpurae, ornator
solii, aquarum copia resolutus imbrem aulicum flammeo liquore laxauerat. color
nimio lepore uernans, obscuritas rubens, nigredo sanguinea regnantem discernit,
dominum conspicuum facit et praestat humano generi, ne de aspectu principis
possit errari. <3> Mirum est substantiam illam morte confectam cruorem de se
post spatia tam longi temporis exudare quod solet uiuis corporibus uulnere
sauciatis effluere. nam cum sex paene mensibus marinae deliciae a uitali fuerint
uigore separatae, sagacibus naribus nesciunt esse grauissimae, scilicet ne
sanguis ille nobilis aliquid spiraret horroris. haec cum infecta semel
substantia perseuerat, nescit ante subtrahi quam uestis possit absumi. <4> Quod
si conchyliorum qualitas non mutatur, si torcularis illius una uindemia est,
culpa nimirum artificis erit, cui se copia nulla subtraxit. in illis autem
rubicundis fontibus cum albentis comas serici doctus moderator intinxerit,
habere debet corporis purissimam castitatem, quia talium rerum secreta refugere
dicuntur immunda. <5> Haec si omnia constiterint, si in nulla parte praetermissa
uidetur esse sollemnitas, miramur tua te pericula minime cogitasse, dum
sacrilegus sit reatus neglegentiae in tali ueste peccare. quid enim agunt tot
artifices, tot nautarum cateruae, tot familiae rusticorum? tu quoque comitiua
subuectus tantis iubes, tanta te istius nominis praesumptione defendis, ut, cum
regale opus crederis agere, in multis uidearis tibi ciuibus imperare. <6> Hoc
ergo remissio tua neglegit, quod te et in prouincia subuexerat et ad conspectum
principis honorabilem uenire faciebat. quod si te facultatis tuae adhuc cura non
deserit, si salutis propriae tangit affectus, intra illum diem, imminente tibi
harum portitore, cum blatta, quam nostro cubiculo dare annis singulis consuesti,
uenire festina: quia iam non compulsorem ad te mittimus, sed ultorem, si aliqua
credideris ludificatione tardandum. <7> Verum talis tantaque res quam facili
legitur inuenta compendio! cum fame canis auida in Tyrio litore proiecta
conchylia impressis mandibulis contudisset, illa naturaliter umorem sanguineum
defluentia ore eius mirabili colore tinxerunt. et ut est hominibus occasiones
repentinas ad artes ducere, talia exempla meditantes fecerunt principibus decus
nobile dare rem, quae substantiam noscitur habere mediocrem. Eoa Tyros est
Hydron Italica, aulicum profecto uestiarium, non antiqua custodiens, sed iugiter
nouella transmittens. uide ergo, si quis te patiatur minus implere, quod nos tam
necessarie cognoscis expetere.
III. CASSIODORO V. I. ATQUE PATRICIO THEODERICUS REX.
<1> Quamuis proprio fruatur honore quod est natura laudabile, nec desint
probatae conscientiae fasces, cum generat animo dignitates—omnia siquidem bona
suis sunt iuncta cum fructibus, nec credi potest uirtus quae sequestratur a
praemio—tamen iudicii nostri culmen excelsum est: quoniam qui a nobis
prouehitur, praecipuis plenus meritis aestimatur. <2> Nam si aequabilis
credendus est quem iustus elegerit, si temperantia praeditus quem moderatus
asciuit, omnium profecto capax potest esse meritorum, qui iudicem cunctarum
meruit habere uirtutum. quid enim maius quaeritur quam ibi inuenisse laudum
testimonia, ubi gratificatio non potest esse suspecta? regnantis quippe
sententia iudicium de solis actibus sumit, nec blandiri dignatur animus domini
potestate munitus. <3> Repetantur certe quae te nostris sensibus infuderunt, ut
laboris tui fructum capias, cum nostris animis singula suauiter inhaesisse
cognoscas. in ipso quippe imperii nostri deuotus exordio, cum adhuc
fluctuantibus rebus prouinciarum corda uagarentur et neglegi rudem dominum
nouitas ipsa pateretur, Siculorum suspicacium mentes ab obstinatione praecipiti
deuiasti, culpam remouens illis, nobis necessitatem subtrahens ultionis. <4>
Egit salubris persuasio, quod uehemens poterat emendare districtio. lucratus es
damna prouinciae, quae meruit sub deuotione nescire: ubi sub praecinctu Martio
ciuilia iura custodiens publica priuataque commoda inauarus arbiter aestimabas
et proprio censu neglecto sine inuidia lucri morum diuitias retulisti, excludens
uel querelis aditum uel derogationibus locum: et unde uix solet reportari
patientiae silentium, uoces tibi militauere laudantium. nouimus enim testante
Tullio, Siculorum natura quam sit facilis ad querelas, ut solita consuetudine
possint iudices etiam de suspicionibus accusare. <5> Sed non eo praeconiorum
fine contenti Bruttiorum et Lucaniae tibi dedimus mores regendos, ne bonum, quod
peregrina prouincia meruisset, genitalis soli fortune nesciret. at tu
consuetudinem deuotionis impendens eo nos obligasti munere, quo tibi nos putamus
omnia reddidisse: inde amplificando debitum, unde credi poterat absolutum.
egisti per cuncta iudicem totius erroris expertem, nec inuidia quempiam
deprimens nec gratia blandiente sublimans. quod cum ubique sit arduum, tum fit
in patria gloriosum: ubi necesse est aut gratiam parentela prouocet aut odium
longae contentiones exasperent. <6> Oblectat igitur nos actus praefecturae
recolere, totius Italiae notissimum bonum, ubi cuncta prouida ordinatione
disponens ostendisti, quam leue sit stipendia sub iudicis integritate dependere.
nullus grauanter obtulit quod sub aequitate persoluit, quia quicquid ex ordine
tribuitur, dispendium non putatur. <7> Fruere nunc bonis tuis et utilitatem
propriam, quam respectu publico contempsisti, recipe duplicatam. haec est enim
uitae gloriosa commoditas dominos esse testes, ciues habere laudantes. <8> His
igitur tot amplissimis laudibus incitati patriciatus tibi apicem iusta
remuneratione conferimus, ut quod aliis est praemium, tibi sit retributio
meritorum. macte, summe uir, felicitate laudabili, qui ad hanc uocem dominantis
animos impulisti, ut bonorum tuorum potius fateamur esse quod cedimus. sint haec
diuina perpetua, ut, cum haec pro remuneratione tribuimus, meliora iterum tuis
meritis exigamur.
IV. SENATUI URBIS ROMAE THEODERICUS REX.
<1> Optamus quidem, patres conscripti, coronam uestram diuersorum fascium flore
depingi: optamus, ut Libertatis genius gratam uideat turbam senatus. conuentus
siquidem talium est dignitas imperantum, et quicquid in uobis festiua
gratulatione respicitur, nostris uere laudibus applicatur. <2> Illud tamen
maxime desideranter appetimus, ut collegium uestrum ornent lumina dignitatum,
quando decenter augmenta patriae reddunt, qui aulica potestate creuerunt. hos
uiros nostra perscrutatur intentio: his morum thesauris gaudemus inuentis, in
quibus uelut figuratis honorum uultibus clementia nostrae serenitatis
exprimitur. <3> Hinc est quod Cassiodoro illustri et magnifico uiro praecipua in
re publica claritate notissimo, patriciatus dedimus pro remuneratione suggestum:
ut honore magni nominis declararentur merita seruientis. qui non fragili
felicitate prouectus fortunae ludo ad apicem fascium repentinis successionibus
euolauit, sed, ut crescere uirtutes solent, ad praeconii fastigium conscendit
gradibus dignitatum. <4> Primus enim, ut scitis, amministrationis introitus
comitiuae priuatarum mole fundatus est, ubi non tirociniorum infirmitate
titubans nouitatis uitio uel innocenter errauit, sed abstinentiae firmato
uestigio imitando uixit exemplo. qui mox deinde sacrarum largitionum honore
suscepto creuit conuersationis laude, quantum profecerat dignitate. <5> Quid
prouinciis redditam disciplinam, quid diuerso generi hominum monimenta iustitiae
infusa referamus? uixit tanta continentia, ut aequitatem et institueret monitis
et doceret exemplis. facilis enim recti persuasor est innocens iudex, sub cuius
praedicabili conuersatione pudet mores probabiles non habere. quis enim uereatur
scelus, cuius in suggestu gremii complicem uidet? in cassum personam fictae
seueritatis inducit, cum auarus pecuniae ambitum dissuadet, cum legibus parendum
censet iniustus. non habet distributionis genium, cui auctoritatem libera
conscientia non ministrat, quoniam excessus tunc sunt in formidine, cum
creduntur iudicibus displicere. <6> His itaque sub praecedenti roge gymnasiis
exercitatus emeritis laudibus ad palatia nostra peruenit. meministis enim, et
adhuc uobis recentium rerum memoria ministratur, qua moderatione praetoriano
culmini locatus incederit et euectus in celsum inde magis despexerit uitia
prosperorum. <7> Nullo quippe, ut plerisque moris est, elatus fauore fortunae in
cothurnum se magnae potestatis erexit, sed aequitate cuncta moderatus gratiam
nostram in se non reddidit odiosam. maiora sibi fecit optari, dum intra
modestiae terminos magna cohibuit. hinc est enim probatae conscientiae
gratissimus fructus, ut, quamuis summa potuerit adipisci, iudicetur tamen ab
omnibus plus mereri. iunxit bene cum uniuersorum gaudiis nostra compendia,
aerario munificus et iuste soluentibus gratiosus. <8> Sensit tunc res publica ex
illo coetu Romuleo innocentiae uirum, qui licet se moderando gloriosum fecerit,
hoc tamen maius contulit, quod bonae actionis exemplum sequentibus dereliquit.
pudet enim eum peccare, qui laudatis uidetur potuisse succedere. fuit itaque, ut
scitis, militibus uerendus, prouincialibus mitis, dandi auidus, accipiendi
fastidiosus, detestator criminis, amator aequitatis. quod non fuit illi
custodire difficile, qui se a rebus alienis decreuerat abstinere. est enim
inuicti animi signum famae diligere commodum et lucra potius odisse causarum.
<9> Verum haec in illo iure mirentur, qui patris atque aui mores nobilissimos
nesciuerunt. Cassiodoros siquidem praecedentes fama concelebrat. quod uocabulum
etsi per alios uideatur currere, proprium tamen eius constat esse familiae.
antique proles, laudata prosapies, cum togatis clari, inter uiros fortes eximii,
quando et ualitudine membrorum et corporis proceritate floruerunt. <10> Pater
enim candidati sub Valentiniano principe gessit tribuni et notarii laudabiliter
dignitatem: honor qui tunc dabatur egregiis; dum ad imperiale secretum tales
constet eligi, in quibus reprehensionis uitium nequeat inueniri. <11> Sed ut se
pares animi solent semper eligere, patricio Aetio pro iuuanda re publica magna
fuit caritate sociatus: quem tunc rerum dominus propter sapientiam sui et
gloriosos in re publica labores in omni consilii parte sequebatur. ad Attilam
igitur armorum potentem cum supra dicti filio Carpilione legationis est officio
non irrite destinatus. uidit intrepidus quem timebat imperium; facies illas
terribiles et minaces fretus ueritate despexit nec dubitauit eius
altercationibus obuiare, qui furore nescio quo raptatus mundi dominatum
uidebatur expetere. <12> Inuenit regem superbum, sed reliquit placatum et
calumniosas eius allegationes tanta ueritate destruxit, ut uoluisset gratiam
quaerere, cui expediebat pacem cum regno ditissimo non habere. erigebat
constantia sua partes timentes, nec inbelles sunt crediti, qui legatis talibus
uidebantur armari. pacem retulit desperatam. cuius legatio quid profecerit,
datur intellegi, quae tantum est gratanter excepta, quantum et uidebatur optata.
<13> Mox honorem illustratus, mox redituum dona aequus arbiter offerebat. sed
ille potius natiua moderatione ditissimus dignitatem suscipiens otiosam in
remunerationis locum expetiit amoenissima Bruttiorum. negare illi non potuit
optatam quietem, qui eum reddiderat ab inmani hoste securum: tristis ab obsequio
suo reliquit, quem sibi necessarium fuisse cognouit. <14> Auus enim Cassiodorus
inlustratus honore praecinctus, qui eius generi non poterat abnegari, a
VVandalorum incursione Bruttios Siciliamque armorum defensione liberauit, ut
merito primatum in illis prouinciis haberet, quas a tam saeuo et repentino hoste
defendit. debuit itaque uirtutibus eius res publica, quod illas prouincias tam
uicinas Gensiricus non inuasit, quem postea truculentum Roma sustinuit. <15> Hi
autem et in partibus Orientis parentum laude uiguerunt. Heliodorus enim, qui in
illa re publica nobis uidentibus praefecturam bis nouenis annis gessit eximie,
eorum consanguinitati probabatur adiungi. genus in utroque orbe praeclarum, quod
gemino senatui decenter aptatum tamquam duobus luminibus oculatum purissima
claritate radiauit. quo enim se quaeuis nobilitas ultra distendit quam haec,
quae in utroque orbe clara esse promeruit? <16> Vixit et ipse in prouincia
honore iudicis et securitate priuati: cunctis illis nobilitate potior omnium ad
se animos adtrahebat, ut qui libertatis iure non poterant subdi, uiderentur
magis continuis beneficiis suauiter obligari. <17> Tanta quin etiam patrimonii
sui ubertate gloriatus est, ut inter reliqua bona equinis gregibus principes
uinceret et donando saepius inuidiam non haberet. hinc est, quod candidatus
noster Gothorum semper armat exercitus et, bono instituto melior, quod a
parentibus accepit hereditaria largitate custodit. <18> Quae ideo per ordinem
nostra dignatio percucurrit, ut unusquisque intellegat et parentum suorum apud
nos laudes posse reparare qui uiuere praeclaris elegerit institutis. et ideo,
patres conscripti, quia uobis est commodus honor bonorum et iudicium nostrum
uester comitatur assensus, prospero auspicio suscipiator eius prouectus, qui
sibi fecit gratiam patere cunctorum. est enim potius uicissitudo quam praemium,
ut qui uos probabili actione coluerunt, reciproco fauore gratulentur.
V. FLORIANO V. S. THEODERICUS REX.
<1> In inmensuns trahi non decet finita litigia. quae enim dabitur
discordantibus pax, si nec legitimis sententiis adquiescant? unus enim inter
procellas humanas portus instructes est, quem si homines feruida uoluntate
praetereunt, in undosis iurgiis semper errabunt. <2> Et ideo spectabilitati tuae
praesentibus effamur oraculis, quatenus, si ita res se habet, ut a praesentibus
supplicatur, et in comitis Annae iudicio Mazenis fundi controuersia statutis
legitimis est decisa nec aliqua probatur appellatione suspensa, quae sunt
decreta seruentur. <3> Quia sicut nolumus oppressis negare iudicium, ita
irrationabilibus querelis non praebamus assensum. cogi enim debet, ut sit
quietus, qui suo uitio renuit esse pacificus. nam et medendi peritus inuitum
frequenter saluat aegrotum, dum uoluntas recta in grauibus passionibus non est,
sed potius illud appetitur quod a salutis iudice grauare posse sentitur.
VI. AGAPITO V. I. P. U. THEODERICUS REX.
<1> Decet principem cura quae ad rem publicam spectat augendam, et uere dignum
est regem aedificiis palatia decorare. absit enim ut ornatui cedamus ueterum,
qui inpares non sumus beatitudine saeculorum. <2> Quapropter in Rauennati urbe
basilicae Herculis amplum opus aggressi, cuius nomini antiquitas congrue
tribuit, quicquid in aula praedicabili ammiratione fundauit, magnitudini tuae
studiosissime delegamus, ut secundum breuem subter annexum de urbe nobis
marmorarios peritissimos destinetis, qui eximie diuisa coniungant, ut uenis
colludentibus illigata naturalem faciem laudabiliter mentiantur. de arte ueniat
quod uincat naturam: discolorea crusta marmorum gratissima picturarum uarietate
texantur, quia illud est semper in pretium, quod ad decorem fuerit exquisitum.
<4> His sumptus subuectionesque praestabis: ne quemquam nostrum grauet imperium,
quod ad utilitatem uolumus respicere singulorum.
VII. FELICI V. C. THEODERICUS REX.
<1> Venantii tutoris Plutiani aditione cognouimus in ea te, qua non decuerat,
actione uersatum, ut eum, quem sumptu proprio iuuare debuisses, dispendio
proprietatis affligeres. affinitatem quippe tuam solacia debuerant impensa
testari. quale ergo uidetur sanguine coniunctis, quod criminosum probaretur
extraneis? <2> Atque ideo praesenti iussione censemus, ut, quicquid a Neoterio
prodiga uoluntate lasciuo te non tam comparasse quam subripuisse cognoscis,
incorporanda militi nostro sine aliqua dilatione restituas, ne nos huius modi
factum cogas legibus uindicare, qui nunc uidemur omnia mansuetudine temperasse.
perire enim pupillo non patimur quod parentibus sub nostra laude dederamus.
grauissimum est enim per calumniam subtrahi, quod collatum est munificentia
principali. <3> Reliqua uero, quae pro iugalis tuae assereris portione contempto
iustitiae tramito diuisisse—si tamen appellanda diuisio est, quam sub unius
celebratam constat arbitrio ñ, ad nostrum comitatum festinus occurre, ut inter
uos ea quae iustitiae conueniunt ordinemus. iniquum est enim, ut de una
substantia, quibus competit aequa successio, alii abundanter affluant, alii
paupertatis incommodis ingemiscant.
VIII. AMABILI EXECUTORI THEODERICUS REX.
<1> Cordi nobis est cunctos in commune protegere, sed eos maxime quos sibi
nouimus defuisse. sic enim aequitatis libra seruabitur, si auxilium largiamur
imparibus et metum nostri pro paruulis insolentibus opponamus. fortuna minor
principem quaerit, quia in uituperationem nostram corruunt quibus se publica
uota subducunt. <2> Venantii itaque tutoris Plutiani lacrimabili suggestione
comperimus Neoterium fratrem suum, affectum germanitatis oblitum, bona paruuli
hostili furore lacerasse. quod nos pro rerum suarum acerbitate commouit, ut
largitas nostra, quam uelut titulum uolumus stare pietatis, usurpata
praesumptionibus uideatur illicitis. et quia dubium non est in repetitione
minoris maxime submoueri dispendia tarditatis, ideoque deuotio tua, nostra
iussione firmata, si nihil est quod rationabiliter a pulsato possit opponi,
postulatas res praedicto tutori faciat sine dilatione restitui. <3> Aut si quid
est quod pro suis partibus intentio retentatoris obiciat, legali sponsione
praecedente, ad nostrum deproperet uenire comitatum: ut allegationibus cognitis
pro consuetudine nostrae iudicemus aequitatis.
VIIII. EUSTORGIO VIRO VENERABILI MEDIOLANENSI EPISCOPO THEODERICUS REX.
<1> Tuta est condicio subiectorum, ubi uiuitur sub aequitate regnantium: nec
dubio decet rumore trahi, a quo debent non mutanda constitui. fidem siquidem
rerum a ratione colligimus, quae numquam desiderantibus absconditur, si suis
uestigiis perquiratur. <2> Atque ideo, quod beatitudini uestrae gratissimum esse
confidimus, praesenti tenore declaramus Augustanae ciuitatis episcopum
proditionis patriae falsis criminationibus accusatum: qui a uobis honori
pristino restitutus ius habeat episcopatus omne quod habuit. nihil enim in tali
honore temeraria cogitatione praesumendum est, ubi, si proposito creditor, etiam
tacitus ab excessibus excusatur. manifesta proinde crimina in talibus uix
capiunt fidem: quicquid autem ex inuidia dicitur, ueritas non putatur. <3>
Volumus enim inpugnatores eius legitima poena percellere: sed quoniam et ipsi
clericatus nomine fungebantur, ad sanctitatis uestrae iudicium cuncta
transmisimus ordinanda, cuius est et probitatem moribus talibus imponere et
districtionem ecclesiasticam custodire.
X. BOETHIO V. I. ATQUE PATRICIO THEODERICUS REX.
<1> Licet uniuersis populis generalis sit impendenda iustitia, quae sic nominis
sui obtinet dignitatem, si aequabili moderatione per potiores currat et humiles,
confidentius tamen illam expetunt, qui a palatii militia non recedunt. otioso
enim gratuite praestatur aliquid munificentia principali; consuetudo autem
quodam debito redditur fideliter obsequenti. <2> Domestici partis equitum et
peditum, qui nostrae aulae uidentur iugiter excubare, quod ex magnis fieri
doloribus solet, adunata nobis supplicatione conquesti sunt ab illo arcario
praefectorum pro emolumentis sollemnibus nec integri ponderis solidos percipere
et in numero grauia se dispendia sustinere. Quapropter prudentia uestra
lectionibus erudita dogmaticis scelestam falsitatem a consortio ueritatis
eiciat, ne cui sit appetibile aliquid de illa integritate subducere. <3> Haec
enim quae appellatur arithmetica inter ambigua mundi certissima ratione
consistit, quam cum caelestibus aequaliter nouimus: euidens ordo, pulchra
dispositio, cognitio simplex, immobilis scientia, quae et superna continet et
terrena custodit. quid est enim quod aut mensuram non habeat aut pondus excedat?
omnia complectitur, cuncta moderatur et uniuersa hinc pulchritudinem capiunt,
quia sub modo ipsius esse noscuntur. <4> Iuuat inspicere, quemadmodum denarius
numerus more caeli et in se reuoluitur et numquam deficiens inuenitur. crescit
noua condicione per se redeundo addita sibi semper ipsa calculatio et, cum
denarius non uideatur excedi, ex modicis praeualet maiora complecti. hoc saepe
repetitum inflexis manualibus digitis et erectis redditur semper extensum, et
quanto ad principium suum supputatio reducitur, tanto amplius indubitanter
augetur. quantitate numerabili harena maris, guttae pluuiarum, stellae lucidae
concluduntur. auctori quippe suo omnis creatura sub numero est et quicquid ad
existentiam peruenit, a tali non potest condicione dimoueri. <5> Et quoniam
delectat nos secretiora huius disciplinae cum scientibus loqui, pecuniae ipsae
quamuis usu celeberrimo uiles esse uideantur, animaduertendum est quanta tamen a
ueteribus ratione collectae sunt. sex milia denariorum solidum esse uoluerunt,
scilicet ut radiantis metalli formata rotunditas aetatem mundi, quasi sol
aureus, conuenienter includeret. senarium uero, quem non inmerito perfectum
antiquitas docta definit, unciae, qui mensurae primus gradus est, appellatione
signauit, quam duodecies similitudine mensium computatam in librae plenitudinem
ad anni curricula collegerunt. <6> O inuenta prudentium! o prouisa rnaiorum!
exquisita res est, quae et usui humano necessaria distingueret et tot arcana
naturae figuraliter contineret. merito ergo dicitur libra, quae tanta rerum est
consideratione trutinata. talia igitur secreta uiolare, sic certissima uelle
confundere, nonne ueritatis ipsius uidetur crudelis ac foeda laceratio?
exerceantur negotiationes in mercibus: emantur late, quae uendantur angustius:
constet populis pondus ac mensura probabilis, quia cuncta turbantur, si
integritas cum fraudibus misceatur. <7> Mutilari certe non debet, quod
laborantibus datur: sed a quo actus fidelis exigitur, compensatio imminuta
praestetur. da certe solidum et aufer inde, si praeuales: trade libram, at
aliquid, si potes, imminue. contra ista nominibus ipsis constat esse prouisum:
aut integra tribuis aut non ipsa quae dicuntur exsoluis. non potestis omnimodo,
non potestis nomina integritatum dare et scelestas imminutiones efficere.
prouidete itaque, ut et arbiter arcae habeat iustas consuetudines suas, et quod
bene meritis impendimus, incorrupto munere consequantur.
XI. SERVATO DUCI RAETIARUM THEODERICUS REX.
<1> Decet te honorem, quem geris nomine, moribus exhibere, ut per prouinciam,
cui praesides, nulla fieri uiolenta patiaris, sed totum cogatur ad iustum, unde
nostrum floret imperium. <2> Quapropter Moniarii supplicatione commoti
praesentibus te affamur oraculis, ut, si re uera mancipia eius Breones
irrationabiliter cognoueris abstulisse, qui militaribus officiis assueti
ciuilitatem premere dicuntur armati et ob hoc iustitiae parere despiciunt,
quoniam ad bella Martia semper intendunt, dum nescio quo pacto assidue
dimicantibus difficile est morum custodire mensuram. <3> Quapropter omni
proteruia remota, quae de praesumptione potest uirtutis assumi, postulata facies
sine intermissione restitui: ne per dilationis incommoda eorum uideatur supplex
odisse uictoriam.
XII. EUGENITI V. I. MAGISTRO OFFICIORUM THEODERICUS REX.
<1> Pompa meritorum est regale iudicium, quia nescimus ista nisi dignis
impendere. et quamquam potestati nostrae deo fauente subiaceat omne quod
uolumus, uoluntatem tamen nostram de ratione metimur, ut illud magis aestimemur
elegisse, quod cunctos dignum est approbare. <2> Hinc est quod te litterati
dogmatis studia laudabiliter exsequentem pridem ad quaesturae culmen elegimus,
ut honesti laboris tui fieret praemium dignitas litterarum. quid enim
aduocationis officio, si pure impendatur, ornatius, quod peregrinum negotium ad
suas molestias trahit, ut laboribus subueniat alienis? in hoc campo exercitatus
cursu meritorum ad palmam nostri iudicii peruenisti. <3> Nec tamen benignitas
nostra una remuneratione contenta honorem geminat, augmenta procurat et eo
studio dona reparat, quasi debeat omne quod praestat. sume igitur magisteriae
infulas dignitatis, usurus omnibus priuilegiis quae tuos habuisse constiterit
decessores. atque ideo tanto iudicio laetare suscepto, qui pro labore honoris
tui honorem alterum accipere meruisti. quid enim de priore senserimus praemio,
secundae dignitatis declaramus augmento. nati sunt fasces ex fascibus et naturam
retinentes fetus arborei pullulauerunt iterum decenter abscisi. <4> Verum te
haec remuneratio satietate non expleat nec det laboribus tuis ferias nostri laus
inuenta iudicii. desiderabilior quin immo sit honestas, cum peruenit ad
praemium, et tunc fiat gratius labores anxios fuisse perpessum, cum te fructum
eorum intellegis inuenisse. honores ergo quos sumis ex chartis, redde de
meritis. nosti bene, quo nobis studio placeatur, qui ab ipsius consilii
penetralibus uenis. meministi, quotiens apud nos laudati sint innocentes,
quotiens bonis actibus reddidimus uicem. ore tuo iudicia nostra loquebamur:
exemplis talibus incitare. esto innocentiae templum, temperantiae sacrum, ara
iustitiae. absit a iudiciariis mentibus aliquid profanum. pio principi sub
quodam sacerdotio seruiatur.
XIII. SENATUI URBIS ROMAE THEODERICUS REX.
<1> Dignitas, patres conscripti, dum ad incognitum uenit, donum est, cum ad
expertum, compensatio meritorum. quorum alter debitor iudicii, alter obnoxius
est fauori. hos enim aestimatione subuehimus, alios gratia promouemus et ad
omnes indulgentiae uias nostra se relaxat humanitas. sed amoris uestri intuitu
commonemur, quotiens in coetum uestrum ducitur, qui de gloriosis uirtutibus
aestimatur. quicquid enim humani generis floris est, habere curiam decet: quae
sicut arx decus urbium, ita illa ornamentum est ordinum ceterorum. <2> Atque
ideo Eugenitem illustrem uirum litterati dogmatis opinione fulgentem magisterii
honore subueximus, ut gereret nomine quam possidebat meritis dignitatem. quis
enim tot eius officiosos labores ignoret, quos non uilitate mentis exercuit, sed
patrocinii honore seruauit? dedimus itaque personam tantis honoribus parem, ut
alterutro decore fulgentes mutua se gratia qualitatis ornarent. hic est, qui
pridem nostro lateri iuridicus quaestor adhaesit, quem liuoris nebula nulla
fuscauit, nec maliuolentiae studio nocendi artes fellitis sensibus exquisiuit:
sincero pectoris arcano puritati nostrae paruit et ad pietatem iussionum
innocentiam suam praebuit. animus enim dolosus non arbitrium sequitur
imperantis, sed suas potius explicat uoluntates. <3> Habetis certe euidens
nostrum in hac parte iudicium, ut post illius apicis culmen ad alteram
conscenderet dignitatem. nec passi sumus otiosum, quem merita non sinebant esse
priuatum: sereni solis consuetudinibus aestimandus, qui licet susceptum diem
peragat, alterum tamen eadem gratia claritatis illuminat. hunc ergo, patres
conscripti, tot meritis absolute relucentem fauor uester excipiat. debetis enim
bene gerentibus, ut eos laudis uestrae comitetur assensus. nam si equorum cursus
hominum clamoribus incitatur et insonantium manibus agitur, ut a mutis
animalibus uelocitas appetatur, quantum inde homines stimulari posse credimus,
quos ad laudis auiditatem natos singulariter inuenimus!
XIIII. FAUSTO PPO THEODERICUS REX.
<1> Libentes omnimodis praebemus assensum, quotiens uox est iusta poscentium,
quia nec decet esse difficile beneficium, quod non patitur largitate
detrimentum. <2> Et ideo praecelsa magnificentia tua, quod a Cataliensibus
inferebatur genere tertiarum, faciat annis singulis in tributaria summa
persolui, nec post super hac parte patiantur supplices aliquam quaestionem. quid
enim interest, quo nomine possessor inferat, dummodo sine imminutione quod
debetur exsoluat? ita et illis suspectum tertiarum nomen auferimus et a nostra
mansuetudine importunitates competentium summouemus.
XV. FESTO V. I. ATQUE PATRICIO THEODERICUS REX.
<1> Gratum nobis est, quotiens de magnitudinis tuae meritis aestimatio talis
procedit, ut et infirmorum auxilium et absentium credaris esse tuitio. nam ideo
senatus prior esse meruisti, ut sequentibus pro iustitiae contemplatione
praestares. unde fit, ut bona uobis crescat opinio gloriosae actionis exemplo.
nulli enim propria res a discedente committitur, nisi de cuius bene conscientia
iudicatur. <2> Idcirco praesenti iussione decernimus, ut domus patricii Agnelli
ad Africam discedentis, qui regnum petens alterius nostris est utilitatibus
seruiturus, saluis legibus tua tuitione ualletur, ne uiolentos cuiusquam impetus
subtracta domini defensione patiatur. peruiae sunt enim semper iniuriis
facultates absentium et quodam mode uidetur occasio in delictum trahere, quae
non potest animum peruadentis de resultatione terrere. <3> Ideoque celsitudo
uestra, quam uotum est habere uicinam, erigat humiles, eripiat opprimendos et,
quod potestatibus rarum est, proficiat cunctis, quad uniuersis celsior
inueniris.
XVI. IULIANO COMITI PATRIMONII THEODERICUS REX.
<1> Illud amplius nostris utilitatibus applicamus, quod misericordi humanitate
concedimus. regnantis enim facultas tunc fit ditior, cum remittit, et adquirit
nobiles thesauros famae neglecta uilitate pecuniae. hinc est quod consuetudinis
nostrae humanitate commoniti opem fessis, manum porrigimus oneratis, ut pietatis
nostrae remedio surgant qui fortunae suae acerbitate corruerant. <2> Dudum
siquidem conductores Apuli deplorata nobis aditione conquesti sunt frumenta sibi
inimicorum subreptionibus concremata, postulantes, ne cogantur ad integram
praestationem, quibus commerciorum sunt commoda deminuta. quod nos pro ingenita
humanitate considerandum esse iudicamus, ut, quorum non possumus accusare
desidiam, releuandam aestimemus esse fortunam. inde enim constitutas pensiones
inferri uolumus, unde constat subiectos commoda consecutos. <3> Et ideo hanc
causam sublimitatem tuam iubemus diligenter inquirere, ut, quantum eos minus
uendidisse constiterit, de reliquis primae indictionis habita moderatione
detrahatis: ita tamen ut nulla fraus nostris beneficiis inseratur, ne aliqua
neglegentia reddaris obnoxius, qui semper nobis prouida intentione placuisti,
quia sicut nos tangunt supplicum damna, ita nobis eorum fructuosa debent esse
compendia.
XVII. UNIVERSIS GOTHIS ET ROMANIS DERTONA CONSISTENTIBUS THEODERICUS REX.
<1> Publicae utilitatis ratione commoniti, quae nos cura semper libenter
onerauit, castrum iuxta uos positum praecipimus communiri, quia res proeliorum
bene disponitur, quotiens in pace tractatur. munitio quippe tunc efficitur
praeualida, si diutina fuerit excogitatione roborata. omnia subita probantur
incauta et male constructio loci tunc quaeritur, quando iam pericula
formidantur. <2> Adde quod animus ipse in audaciam non potest esse pronus, qui
diuersa cura fuerit sollicitus. hanc merito expeditionem nominauere maiores,
quia mens deuota proeliis non debet aliis cogitationibus occupari. quapropter
amplectenda res est, quae generalitatis consideratione praecipitur, nec moram
fas est incurrere iussionem, quae deuotos maxime noscitur adiuuare. <3> Et ideo
praesenti auctoritate decernimus, ut domos uobis in praedicto castello alacriter
construatis, reddentes animo nostro uicissitudinem rerum, ut, sicut nos uestris
utilitatibus profutura censemus, ita tempora nostra ornare uos pulcherrimis
fabricis sentianius. tunc enim accidit, ut et sumptus competentes uestris iam
penatibus congregare uelitis et habitatio uobis non sit ingrata, quam propria
potest commendare constructio. <4> Quale est, rogo, in laribus propriis esse,
cum durissimas mansiones hostis cogitur sustinere? ille imbribus pateat, uos
tecta defendant: illum inedia consumat, uos copia prouisa reficiat. sic uobis
tutissime constitutis hostis uester ante euentum certaminis fata patiebitur
perditoris. constat enim tempore necessitatis illum probari fortissimum uirum,
qui se per multa non distrahit. nam quis eum habuisse prudentiam putet, si tunc
coeperit fabricis operam dare aut penum condere, cum oporteat bella tractare?
XVIII. DOMITIANO ET VVILIAE THEODERICUS REX.
<1> Oportet uos colere et obseruare iustitiam, qui aequitatem populi dicere
suscepistis, quando non licet delinquere, qui alios creditur sub aequitatis
regula continere, ne fiat exemplum prauum qui electus ad laudabile cognoscitur
institutum. et ideo ad interrogationem uestram curauimus praebere responsum, ne
per dubitationem possitis errare, nisi, quod absit, uelitis excedere. <2> Si
Romani praedium, ex quo deo propitio Sonti fluenta transmisimus, ubi primum
Italiae nos suscepit imperium, sine delegatoris cuiusquam pittacio praesumptor
barbarus occupauit, eum priori domino summota dilatione restituat. quod si ante
designatum tempus rem uidetur ingressus, quoniam praescriptio probatur obuiare
tricennii, petitionem iubemus quiescere pulsatoris. <3> Illa enim reduci in
medium uolumus, quae, nostris temporibus praesumpta, damnamus, quia locus
calumniandi non relinquitur, cum longi temporis obscuritas praeteritur. <4> De
percussore tantummodo, non etiam peremptore fratris, quamquam omnium communi
lege damnatur solumque sit parricidium quod totius tragoediam reatus exsuperet,
tamen humanitas nostra, quae sibi etiam in sceleratis locum pietatis inquirit,
praesenti auctoritate definit, ut huius modi portenta prouinciae finibus
abigantur. nam quibus fuit exosa societas parentum, ciuium non merentur habere
consortium, ne puri corporis iucunda serenitas nebulosis maculis polluatur.
XVIIII. SATURNINO ET VMBISVO VV. SS. THEODERICUS REX.
<1> Fisci uolumus legale custodire compendium, quia nostra clementia rebus
propriis uidetur esse contenta, et sicut nullum grauare cupimus, ita nobis
debita perdere non debemus. indigentiam iuste fugimus, quae suadet excessus, dum
perniciosa res est in imperante tenuitas. modus ubique laudandus est. nam cur
aut uituperabilis neglegentia in propriis defluat aut aliena cupiditas turpis
abradat? <2> Et ideo praesenti uobis iussione praecipimus, ut Adrianae ciuitatis
curialium insinuatione suscepta, quicumque Gothorum fiscum detrectat implere,
eum ad aequitatem redhibitionis artetis, ne tenuis de proprio cogatur exsoluere,
quod constat idoneos indebite detinere: hac scilicet ratione seruata, ut si quis
contumaciae uitio maluerit nostra iussa tardare, cum multa reddat quod debuit
etiam non compulsus offerre, quatenus proteruo spiritu indecenter erecta
inpunita iustis saeculis non relinquatur audacia.
XX. ALBINO ET AVIENO VV. II. ATQUE PATRICIIS THEODERICUS REX.
<1> Licet inter gloriosas rei publicae curas et regalium sollicitudinum
salutiferos fluctus pars minima uideatur principem de spectaculis loqui, tamen
pro amore rei publicae Romanae non pigebit has quoque cogitationes intrare, quia
undecumque praestare possumus, dignum nostris sensibus aestimamus, praesertim
cum beatitudo sit temporum laetitia populorum. illud enim propitiante deo
labores nostros asserit, quod se otiosam generalitas esse cognoscit. <2> Partis
itaque prasini insinuata petitione comperimus—quoniam hoc introductum est, ut
populi de colore uocitentur—seditiones turbulentas a quibusdam scelestissimis
incitari et causam laetitiae publicae ad furoris certamina prorupisse. quod
utique gaudii decoram non potest habere qualitatem, si pacem non meruerit
possidere communem. et ideo dignum est clementiam nostram has quoque partes
aspicere, ut ubique possit morum probitas elucere. non enim inania uerborum
popularium cogitamus, sed perniciosae semen seditionis excludimus. <3>
Quapropter illustris magnitudo uestra praesenti iussione commonita patrocinium
partis prasini, quod gloriosae recordationis pater uester impendit, dignanter
assumat. putari enim non debet iniuria populos regere ac gubernare Romanos. nam
si honorum omnium causa pensetur, pro illorum utilitate delecti sunt, qui
honores gloriosissimos accipere meruerunt. <4> Conuocatis ergo spectatoribus, de
Helladio et Thorodon qui laetitiae publicae aptior fuerit aestimatus, populi
confusione sublata constituatur a uobis prasini pantomimus, quatenus sumptum,
quem pro spectaculo ciuitatis impendimus, electis contulisse uideamur. <5> Hanc
partem musicae disciplinae mutam nominauere maiores, scilicet quae ore clauso
manibus loquitur et quibusdam gesticulationibus facit intellegi, quod uix
narrante lingua aut scripturae textu possit agnosci.
XXI. MAXIMIANO V. I. ET ANDREAE V. S. THEODERICUS REX.
<1> Prouocandi sumus affectuosis ciuium studiis ad augmenta ciuitatis, quia nemo
potest diligere quod habitatores intellegit non amare. unicuique patria sua
carior est, dum supra omnia saluum fore quaeritur, ubi ab ipsis cunabulis
commoratur. quapropter uotis paribus inuitemur ad dona, quatenus quod sponte
tribuimus, duplicata gratia conferamus. et ideo nulli graue sit Romanis fabricis
deputatae pecuniae reddere rationem, cum pura conscientia desideret se probari,
quando fructum laboris sui capit, dum ad nos prospera de se peruenire cognoscit.
<2> Quocirca praesenti decernimus iussione Romanae ciuitatis fabricas uos debere
discutere, si labor operis concordat expensis: uel, si apud aliquem constet
residere pecuniam, quae non sit fabricis expensa, deputatae rei reddat
erogandam. quibus rationibus euidenter expressis ad nos instructionem
fidelissimam destinate, ut iudicio nostro respondere uideamini qui estis ad
indaginem ueritatis electi. nullum enim de largitate nostra fraudari uelle
credimus, quando in tali negotio et de propriis facultatibus eum impendere posse
iudicamus. <3> Aues ipsae per aera uagantes proprios nidos amant: erratiles
ferae ad cubilia dumosa festinant: uoluptuosi pisces campos liquidos transeuntes
cauernas suas studiosa indagatione perquirunt cunctaque animalia ubi se norunt
refugere, longissima cupiunt aetate constare. quid iam de Roma debemus dicere,
quam fas est ipsis liberis plus amare?
XXII. MARCELLO V. S. ADVOCATO FISCI THEODERICUS REX.
<1> Solida laus est regiae largitatis, quotiens conueniunt indulta iudiciis, nec
sibi audet casus ascribere, quod bonae dispositionis librat examen, quia ubi
aptantur officia meritis, nil debetur incertis. non enim de rudibus sententiam
ferimus, sed de probatissimis iudicamus. <2> Polisti siquidem forensi cote
multifarie praedicatus ingenium: nutristi facundiam exercitatione causarum:
expertus es, quam suaues fides afferat fructus, ut ipsa etiam conciliet corda
regnantum. haec in te speculator uirtutum noster sensus inspexit: his apud nos
suffragiis placere meruisti, ut dignus existeres ad publicas causas, qui
gessisti hactenus sub integritate priuatas. <3> Sume igitur fisci nostri tuenda
negotia, in utendis officii tui priuilegiis decessorum exempla secuturus. ita
ergo per medium iustitiae tramitem moderatus incede, ut nec calumnia innocentes
graues nec iustis petitionibus retentatores exoneres. illa enim lucra uera
iudicamus, quae integritate suffragante percipimus. non ergo quotiens superes,
sed quemadmodum uincas, inquirimus. <4> Aequitatem nobis placiturus intende: non
quaeras de potestate nostra, sed potius de iure uictorias, quando laudabilius a
parte fisci perditur, cum iustitia non habetur. nam si dominus uincat,
oppressionis inuidia est: aequitas uero creditur, si supplicem superare
contingat. non ergo paruo periculo causas dicimus, quando tunc fama nostra
proficit, cum se commoditas iniusta subducit. quapropter sit interdum mala causa
fisci, ut bonus princeps esse uideatur. maiori quippe compendio perdimus, quam
si nobis indebite uictoria suffragetur.
XXIII. CAELIANO ET AGAPITO VV. II. PATRICIIS THEODERICUS REX.
<1> Decet regalis apicis curam generalitatis custodire concordiam, quoniam ad
laudem regnantis trahitur, si ab omnibus pax ametur. quid est enim, quod nos
melius praedicet, quam quietus populus, concors senatus totaque res publica
morum nostrorum honestate uestita? <2> Hinc est quod praesenti iussione
decernimus, ut magnifici et patricii uiri Festus atque Symmachus contra
illustrem et patricium Paulinum in iudicio uestro, quas se habere dicunt,
exerant actiones. quibus pro legum ratione susceptis et, si iuris ordo patitur,
definitis tunc patricius Paulinus, quicquid aduersum supra memoratos magnificos
uiros se habere causatur, pari sorte depromat. nec tardari uolumus in eius
quoque parte sententiam, dum uelimus omnia inter eos esse decisa nihilque aliud
relinqui, nisi quod debetur affectui. <3> Videte ergo tanti iudicii arbitros uos
electos: uidete expectationem nostram aequabilem flagitare iustitiam: relaturi
gratiae uberrimum fructum si praesens disceptatio quos dignos credidit, non
impares probet. esse debet enim de talibus uiris cura praecipua, qui dare
possunt minoribus euidenter exempla. nam qui inter summos uiros litem neglegit
abolendam, hoc imitari reliquos sine dubitatione permittit.
XXIIII. UNIVERSIS GOTHIS THEODERICUS REX.
<1> Innotescenda sunt magis Gothis quam suadenda certamina, quia bellicosae
stirpi est gaudium comprobari: laborem quippe non refugit, qui uirtutis gloriam
concupiscit. et ideo, iuuante deo, quo auctore omnia prosperantur, pro communi
utilitate exercitum ad Gallias constituimus destinare, ut simul et uos prouectus
occasionem habere possitis et nos quae praestitimus, meritis contulisse
uideamur. latet enim sub otio laudabilis fortitudo et dum se probandi non habet
spatium, occulta est lux tota meritorum. <2> Atque ideo per Nandum saionem
nostrum ammonendum curauimus, ut ad expeditionem in dei nomine more solito armis
equis rebusque omnibus necessariis sufficienter instructi octauo die kalendarum
Iuliarum proxime ueniente modis omnibus deo fauente moueatis, quatenus et
parentum uestrorum in uobis ostendatis inesse uirtutem et nostram peragatis
feliciter iussionem. <3> Producite iuuenes uestros in Martiam disciplinam: sub
uobis uideant, quod posteris referre contendant. nam quod in iuuentute non
discitur, in matura aetate nescitur. accipitres ipsi, quorum uictus semper ex
praeda est, fetus suos nouitate marcentes nidis proturbant, ne molle otium
consuescant: alis uerberant immorantes, cogunt pullos teneros ad uolatum, ut
tales debeant existere, de quibus possit pietas materna praesumere. uos autem,
quos et natura erigit at amor opinionis exacuit, studete tales filios
relinquere, quales uos patres uestros constat habuisse.
XXV. SABINIANO V. S. THEODERICUS REX.
<1> Nil prodest initia rei solidare, si ualebit praesumptio ordinata destruere:
illa sunt enim robusta, illa diuturna quae prudentia incipit et cura custodit.
atque ideo maior in conseruandis rebus quam in inueniendis adhibenda cautela
est, quia de initiis praedicatio debetur inuento, de custoditis adquiritur
laudata perfectio. <2> Dudum siquidem propter Romanae moenia ciuitatis, ubi
studium nobis semper impendere infatigabilis ambitus erit, portum Licini
deputatis reditibus reparari iussio nostra constituit, ut milia tegularum annua
illatione praestaret: simul etiam portubus iunctis, qui ad illa loca antiquitus
pertinebant, qui nunc diuersorum usurpatione suggeruntur inuasi. <3> Cuncta ergo
ad statutam praestationem facies sine dilatione reuocari: quia licet nostra
iussa pro sua reuerentia in nullo uiolanda sunt, ea tamen custodiri uolumus
maxime, quae urbis faciem uidentur ornare. quis enim dubitet fabricarum miracula
hac prouisione seruata et pendenti saxo tornatas camaras tegularum tegmine
custoditas? ut antiqui principes nobis merito debeant laudes suas, quorum
fabricis dedimus longissimam iuuentutem, ut pristina nouitate transluceant, quae
iam fuerant ueternosa senectute fuscata.
XXVI. FAUSTO PPO THEODERICUS REX.
<1> Nefas est apud eos fidem beneficii prioris imminui, quibus alia conuenit
nostra saepius largitate praestari. sed sicut quae semel annuimus rescindi in
perpetuum non merentur, sic qui largitatem nostram moderatis precibus
impetrarunt, nostrorum terminos praestitorum inmodica non debent praesumptione
transcendere. <2> Unde quia religiosi studii reuerentia commonemur, ut quae
dudum ecclesiae uiri uenerabilis Unscilae antistitis praestitimus, ualere in
perpetuum censeamus, nunc quoque illustrem magnificentiam tuam duximus
admonendam, quatenus superindicticiorum onera titulorum praefata ecclesia in ea
summa non sentiat, qua usque a magnifici uiri patricii Cassiodori, pura nobis
fide et integritate comperti, temporibus est soluta. <3> Ea uero quae a tempore
beneficii ad ecclesiam nostram ab aliquibus est translata professio, commune cum
uniuersis possessoribus onus solutionis agnoscat et illius subiaceat functioni,
cuius nacta est iura dominii. alioquin grata nobis augmenta eius esse non
possunt, qui fisci damno proficit. sufficiat possessori compendium pensionis:
tributa sunt purpurae, non lacernae, lucrum cum inuidia periculum est: quanto
melius omnia moderata gerere, quae nullus audeat accusare!
XXVII. SPECIOSO THEODERICUS REX.
<1> Si exterarum gentium mores sub lege moderamur, si iuri Romano seruit
quicquid sociatur Italiae, quanto magis decet ipsam ciuilitatis sedem legum
reuerentiam plus habere, ut per moderationis exemplum luceat gratia dignitatum?
ubi enim quaeratur modestus animus, si foedent uiolenta patricios? <2> Populi
nobis itaque partis prasini petitione suggeritur, dum ad nostrum disponerent
uenire comitatum remedia consueta poscentes, se truculentas insidias a patricio
Theodoro et Inportuno uiro illustri consule pertulisse, ita ut unus eorum
defleatur extinctus. <3> Quod nos, si ita est, pro facti sui acerbitate
commouit, ut innoxiam plebem furor persequeretur armatus, quam fouere ciuicus
debuisset affectus. sed quia condicio minorum regnantis aequabiliter implorat
auxilium, supra memoratos illustres uiros ammoneri praesenti iussione censemus,
ut ad Caeliani atque Agapiti illustrium uirorum adaeque iudicium instructas
destinare non differant te instante personas, quatenus legibus examinata
cognitio eorum sententia terminetur. <4> Sed ne forsitan magnificos uiros
loquacitas popularis offenderit, praesumptionis huius habenda discretio est.
teneatur ad culpam quisquis transeunti reuerentissimo senatori iniuriam
proteruus inflixit, si male optauit, cum bene loqui debuit. <5> Mores autem
graues in spectaculis quis requirat? ad circum nesciunt conuenire Catones.
quicquid illic a gaudenti populo dicitur, iniuria non putatur. locus est qui
defendit excessum. quorum garrulitas si patienter accipitur, ipsos quoque
principes ornare monstratur. respondeant nobis certe qui talibus studiis
occupantur: si tranquillos optant aduersarios suos, certe uolunt eos esse
uictores, quando ad iniurias tunc prosiliunt, cum se superatos turpiter
erubescunt. unde ergo irasci uolunt, quod sine dubiu se optasse cognoscunt?
XXVIII. UNIVERSIS GOTHIS ET ROMANIS THEODERICUS REX.
<1> Digna est constructio ciuitatis, in qua se commendet cura regalis, quia laus
est temporum reparatio urbium uetustarum: in quibus et ornatus pacis adquiritur
et bellorum necessitas praecauetur. <2> Ideoque praesenti iussione profutura
sancimus, ut, si quis cuiuslibet generis saxa in agris suis iacentia muris
habuerit profutura, libens animo sine aliqua dilatione concedat, quod tunc magis
uerius possidebit, cum hoc utilitati suae ciuitatis indulserit. <3> Quid est
enim gratius quam uidere crescere publicum decus, ubi omnium utilitas in
generalitate concluditur? et licet praestentur uilia, ad auctores suos magna
sunt commoditate reditura: datur enim plerumque, quod maiori utilitate
recipitur. et frequenter homo lucra sua complectitur, cum necessario pro
temporis qualitate largitur.
XXVIIII. UNIVERSIS LUCRISTANIS SUPER SONTIUM CONSTITUTIS THEODERICUS REX.
<1> Non dubium est ad utilitatem rei publicae cursus custodiam pertinere, per
quem nostris ordinationibus celerrimus praestatur effectus. et ideo uelut
necessariae rei maior adhibenda cautela est, ut qui ad continuos excursus
constituti sunt, turpi macie non tabescant, ne ieiuna tenuitas laboribus
praeuenta succumbat et incipiat iter effici morosum, quod ad celeritatem constat
inuentum. <2> Quapropter deuotio uestra praesenti iussione commonita terrarum
spatia, quae ueredis antea licuerunt, mutationibus suis a possessore uindicata
restituat, ut nec illi paruo spatio infligantur damna et istis recuperata
sufficiant.
XXX. SENATUI URBIS ROMAE THEODERICUS REX.
<1> Animum nostrum, patres conscripti, rei publicae curis calentem et diuersarum
gentium consilia perscrutantem pulsauit saepius querela populorum, orta quidem
ex causis leuibus, sed graues eructauit excessus. deplorat enim pro
spectaculorum uoluptate ad discriminis se ultima peruenisse, ut legum ratione
calcata desperate persequeretur innoxios seruilis furor armatus, et quod illis
humanitas nostra laetitiae causa praestitit, in tristitiam audacia plectenda
conuertit. quod nos elementiae nostrae solita prouisione comprimimus, ne
paulatim sinendo grauiorem uindicare cogamur offensam. benigni quippe principis
est non tam delicta uelle punire quam tollere, ne aut acriter uindicando
aestimetur nimius aut leniter agendo putetur improuidus. <2> Atque ideo
praesenti definitione sancimus, ut, si cuiuspiam senatoris famulus in ingenui
caede fuerit fortasse uersatus, eum tradat legibus impetitum, ut facti qualitate
discussa proferatur iure ualitura sententia. si uero tanti facinoris reum mala
fide dominus iudiciis praesentare distulerit, nouerit se decem librarum auri
dispendio uulnerandum et nostrae ingratitudinis, quod multo grauius est,
pericula subiturum. <3> Sed ut honestatum omnium par libra componeret et
ciuilitatis gratia reductis moribus conueniret, ad populum quoque praecepta
nostra direximus, quae uobis reserari libenter amplectimur, ut alterutra
iussione pensata resarciatur ciuibus scissa concordia. proinde nullos ab
spectaculorum gaudio remouemus, sed seditionis semina radicitus amputamus. <4>
Intersit igitur inter splendorem uestrum moresque mediocres: refugite tales
familiares, qui sint iniuriarum ministri, qui amori uestro nitantur ascribere
quod delinquunt et dum leuitates suas exerere cupiunt, uestram reuerentiam
implicare contendunt. uos enim, quos semper grauitas decet, nolite truculenter
insequi inania uerba populorum. si quod est forte, quod poenam mereatur,
admissum, in praefecti urbis notitiam deferatur, ut culpa legibus, non per
praesumptam coerceatur iniuriam. quid enim discrepat a peccante, qui se per
excessum nititur uindicare? impaenitenda est ultio de ciue, quae legibus uenit:
et excellenter uidetur de pulsato triumphasse, qui uictor pronuntiatur a iudice.
<5> Inter ipsos quoque aduersarios, ut scitis, non erant prius armata certamina,
sed pugnis se quamlibet feruida lacessebat intentio, unde et pugna nomen
accepit. postea Belus ferreum gladium primus produxit, a quo et bellum placuit
nominari. consilium atrox, crudele praesidium, ferina concertatio. nam et si
datum est prius illi inermem facile uincere, tamen crimini applicandum est, quod
inde posteritas potuit interire. non permittatis ergo a famulis uestris in
ciuibus fieri quod adhuc debet et in hostibus accusari.
XXXI. POPULO ROMANO THEODERICUS REX.
<1> Spectacula uoluptatum laetitiam uolumus esse populorum, nec erigere debet
motus irarum, quod ad remissionem animi constat inuentum. ideo enim tot
expensarum onus subimus, ut conuentus uester non sit seditionis strepitus, sed
pacis ornatus. mores peregrinos abicite: Romana sit uox plebis, quam delectet
audiri. conuicia nec gaudium pariunt nec de laetitia procreantur. hoc fuit
certe, quod culpabatis in exteros: nolite modo uitia turbulenta contrahere, quae
uidetis alios abiecisse. <2> Atque ideo edictali programmate definimus, ut, si
atroces iniurias in quempiam senatorum uox iniusta praesumpserit, nouerit se a
praefecto urbis legibus audiendum, ut pro facti qualitate discussa excipiat
promulgatam iure sententiam. <3> Verum ut omne semen discordiae funditus
amputetur, praefinitis locis pantomimos artes suas exercere praecipimus: quod
uos poterit instruere ad praefectum urbis data praeceptio. tantum est, ut animis
compositis peragatis laetitiam ciuitatis. nihil est enim, quod studiosius
seruare uos cupimus quam uestrorum ueterum disciplinam, ut, quod ab antiquis
laudabile semper habuistis, sub nobis potius augeatis. <4> Soletis enim aera
ipsa mellifluis implere clamoribus et uno sono dicere, quod ipsas quoque beluas
delectet audire: profertis uoces organo dulciores et ita sub quadam harmonia
citharae concauum theatrum per uos resonat, ut tonos possit quilibet credere
quam clamores. numquid inter ista rixae decent aut inflammata contentio? abicite
furores laeti, iram gaudentes excludite. tales enim animi aliorum temperari
possunt, cum uestri fauores suauiter audiuntur.
XXXII. AGAPITO V. I. P. V. THEODERICUS REX.
<1> Eximiae urbis praesulem pacis conuenit esse custodem. nam a quo melius
moderatio debet sperari, quam cui potuit Roma committi? illa enim mater omnium
dignitatum uiros sibi gaudet praesidere uirtutum. et ideo honori tuo debes
animos exaequare, ut quod nostris adeptus es beneficiis, tuis meritis inuenisse
credaris. circumspicere te decet, ne qua in spectaculis seditionum causa
nascatur, quia tuum praeconium est populus quietus. sit insultandi consuetudo
moderata, ut nec libertati pereat honesta licentia nec desit moribus disciplina.
<2> Quocirca sicut nostris oraculis et amplissimum ordinem docuimus et plebem
decreuimus ammoneri, hoc tuam quoque magnitudinem obseruare censemus, ut, si a
quoquam irrogata fuerit iniuria senatori, confestim loquax temeritas legum
seueritate plectatur. si uero senator ciuilitatis immemor quemquam ingenuum
nefaria fecerit caede uexari, protinus relatione transmissa perennitatis nostrae
multam perculsus excipiat. <3> Meminerint enim cuncti sic spectaculorum studia
partesque diuidere, ut in patria debeant esse concordes, nec ad hoc sibi
uoluptatum exhiberi certamina, ut exinde hostilis ira feruescat. uerum, ne
posthac ulla possit iterum furiosa contentio prouenire, Helladius de medio,
uoluptatem populi praestaturus, introeat, habiturus aequalitatem menstrui cum
ceteris partium pantomimis. <4> Illud etiam, quod crebras inter eos seditiones
exagitat, praesenti iussione definimus, ut amatores Helladii, quem de medio
saltare praecepimus sine utriusque partis studio, spectandi eis, ubi delegerint,
libera sit facultas. si uero eorum lubrica uoluntas in unius coloris migrauerit
fauorem, studia sua populus tam in circo quam theatro habeat pro parte quam
diligit, ut is qui praesumpserit, uetitam ipse iudicetur quaesisse discordiam.
XXXIII. AGAPITO V. I. P. U. THEODERICUS REX.
<1> Nescit serenitatis nostrae prolatum semel titubare iudicium: nec quod
prouida dispositione constituit, cuiusquam occasionis surreptione mutauit. dudum
siquidem ad Albinum atque Auienum patricios uiros praecepta nos dedisse
retinemus, ut pantomimum prasini partis eligerent, qui praestantius spectaculis
conueniret: quod nobis factum sua relatione reserarunt. <2> Et ideo nunc
praesenti auctoritate decernimus, ut, quem a supra memoratis magnificis uiris
electum esse constiterit, ei solitum menstruum partis prasini sine imminutione
tribuatis, ut, quod nostra prouisio confusionis tollendae causa constituit, non
fiat seditionis occasio, sed quietis.
XXXIIII. FAUSTO PPO THEODERICUS REX.
<1> Copia frumentorum prouinciae debet primum prodesse cui nascitur, quia
iustius est, ut incolis propria fecunditas seruiat quam peregrinis commerciis
studiosae cupiditatis exhauriat. alienis siquidem partibus illud debet impendi
quod superest et tunc de exteris cogitandum, dum se ratio propriae necessitatis
expleuerit. <2> Atque ideo illustris magnificentia tua per loca singula qui
curam uidentur habere litorum, faciat commoneri, ut non ante quispiam peregrinas
naues frumentis oneret ad aliena litora transituras, quam expensae publicae ad
optatam possint copiam peruenire.
XXXV. FAUSTO PPO THEODERICUS REX.
<1> Cum siccitas praesentis anni, quae localiter certis solet desaeuire
temporibus, terrenis uisceribus nimio calore duratis abortiuos messium fetus non
tam edidit quam inperfecta ubertate proiecit, maiori nunc studio quaerenda sunt
quae etiam in abundantia expeti consuerunt. <2> Et ideo frumenta publica, quae
de Calabro atque Apulo litoribus per cancellarium uestrum aestatis tempore
consuerant destinari, nec autumno uenisse modis omnibus permouemur, cum solis
reflexus australia signa discurrens, naturae ordine modificatus, tumultuosas
procellas aeris permixtione resuscitat: quod ab ipsis quoque mensibus datur
intellegi, quando ex numero imbrium futurorum competenter nomina susceperunt.
quae ergo talis mora, ut in tantis tranquillitatibus uelocia necdum fuerint
destinata nauigia, cum stellarum non mergentium lucidus situs tendi carbasa
festinanter inuitet et aeris sereni fides properantium nequeat uota terrere? <3>
Aut forte incumbente austro remigiisque iuuantibus meatus nauium echinais morsus
inter undas liquidas alligauit: aut Indici maris conchae simili potentia labiis
suis nauium dorsa fixerunt: quarum quietus tactus plus dicitur retinere quam
exagitata possunt elementa compellere. stat pigra ratis tumentibus alata uelis
et cursum non habet, cui uentus arridet: sine anchoris figitur, sine rudentibus
alligatur et tam parua animalia plus resistunt quam tot auxilia prosperitatis
impellunt. ita cum subiecta unda praecipitet cursum, supra maris tergum nauigium
stare constat infixum miroque modo natantia inconcusse retinentur, dum innumeris
motibus unda rapiatur. <4> Sed ut dicamus aliam piscis naturam, forte nautae
praedictarum nauium tactu torpedinis segnissime torpuerunt: a qua tantum
infigentum dexterae praegrauantur, ut per hastam, qua fuerit uulnerata, ita
manum percutientis inficiat, quatenus uiuae substantiae pars sine sensu aliquo
immobilis obstupescat. credo talia incurrerunt, qui se mouere non possunt. sed
echinais illis impedimentosa uenalitas est, concharum morsus insatiata
cupiditas, torpedo fraudulenta simulatio. ipsi enim studio prauo faciunt moras,
ut occasiones incurrere uideantur aduersas. quod magnitudo tua, cui specialiter
conuenit cogitare de talibus, celerrima faciat emendatione recorrigi, ne inopia
non tam ab sterilitate temporis quam a neglegentia matre nata esse uideatur.
XXXVI. FERRIOLO V. S. THEODERICUS REX.
<1> Utilitas personarum bonorum debet successione renouari, ne defectu
seruientium patiatur aliquod res suspensa dispendium. et ideo locum te iubemus
quondam Benedicti in Pedonensi ciuitate ex nostra auctoritate suscipere, ut
omnia uigilanti ordinatione procurans nostrae gratiae merearis augmenta. debes
enim aduertere, quia uicissitudinem reddere studeamus uiuis, qui mortuorum fidem
non possumus obliuisci. <2> Illud etiam pietatis nostrae consuetudine
commonemur, ut, quoniam deuotorum nobis memoria probata non deficit, antefati
Benedicti quondam filios, qui sincera nobis cognoscitur deuotione paruisse,
ciuili facias tuitione uallari, quatenus defensionis praesentis commodo
subleuati securitatem sibi gaudeant paterna seruitia contulisse. prosit ergo
generi, quod potuit unius deuotione praestari, quia maiora nos decet tribuere,
quam uidemur a seruientibus accepisse. hic aequalitas aequitas non est, sed pars
nostra iustissime pensat, cum reddendo plus fuerit onerata.
XXXVII. CRISPIANO THEODERICUS REX.
<1> Quamuis homicidii facinus primus detestetur auditus et cruentam manum oculi
refugiant iudicantum, quia procliuior ad misericordiam uia bonis semper mentibus
patet, tamen iustitiae consideratione librandum est, qua cuique fiat iniuria
necessarium scelus: qui noua infelicitate fortunae tunc erit detestatio
cunctorum, si se seruet innoxium. quis enim ferat hominem ad leges trahere, qui
matrimonii nisus est iura uiolare? <2> Feris insitum est copulam suam extrema
concertatione defendere, dum omnibus est animantibus inimicum, quod naturali
lege damnatur. uidemus tauros feminas suas cornuali concertatione defendere,
arietes pro suis ouibus capitaliter insaeuire, equos adiunctas sibi feminas
colaphis ac morsibus uindicare. ita pro copulatis is sibi animas ponunt qui
uerecundia non mouentur. <3> Homo autem quemadmodum patiatur adulterium inultum
relinquere, quod ad aeternum suum dedecus cognoscitur omisisse? et ideo si
oblatae petitionis minime ueritate fraudaris et genialis tori maculam deprehensi
adulteri sanguine diluisti nec sub praetexta cruentae mentis causam pudoris
intendis, ab exilio, quod tibi constat inflictum, te praecipimus alienum,
quoniam pro amore pudicitiae porrigere ferrum maritis non est leges calcare, sed
condere. <4> Ita tamen, ut, si legitimus extiterit accusator, de facti tui
qualitate te noueris audiendum, ut, si innoxios peremisti, crimen publica
districtione resecetur, si male initos complexus adulterorum morte diuisisti,
aestimetur potius uindicta quam culpa. <5> Si quis tibi autem calumniantium
damna generauit et Agnello fideiussori tuo, ut asseris, a uicario uel eius
officio extortam constiterit fuisse pecuniam, nostra iussione conuentus secundum
leges ablata restituat. nolumus enim in cuiusquam praedam cadere, quos nostra
uisa est sententia liberare. pari modo contra inciuilium impetus Candacis tibi
tuitionem sub aequabili defensione praestamus, ut nec legibus te subtrahat nec
iterum contra iura publica laborare permittat.
XXXVIII. BOIONI V. S. THEODERICUS REX.
<1> Non est beneficium quod praestatur inuitis: nec cuiquam utile uidetur, quod
aduersa uoluntate conceditur. unde spectabilitas tua VViliarit adulescentis
nepotis tui cognoscat nos querelis grauibus expetitos, quod res patris eius non
meliorandi causa, sed deteriorandi uoto detineas. quapropter quicquid ex iure
memorato te retentare cognoscis, sine aliqua dilatione restitue, ut res parentum
propria uoluntate disponat, quia et nobis congrua uidetur esse persona, qui
assumpta domini libertate proficiat. <2> Pullos suos audaces aquilae tamdiu
procurato cibo nutriunt, donec paulatim a molli pluma recedentes adulta aetate
pennescant: quibus ut constiterit firmus uolatus, nouellos ungues in praedam
teneram consuescunt: nec indigent alieno labore uiuere, quos captio potest
propria satiare. sic iuuenes nostri, qui ad exercitum probantur idonei, indignum
est ut ad uitam suam disponendam dicantur infirmi et putentur domum suam non
regere, qui creduntur bella posse tractare. Gothis aetatem legitimam uirtus
facit et qui ualet hostem confodere, ab omni se iam debet uitio uindicare.
XXXVIIII. FESTO V. I. PATRICIO THEODERICUS REX.
<1> Rationabiles petitiones supplicum libenter amplectimur, qui etiam non rogati
iusta cogitamus. quid est enim dignius quod die noctuque assidua deliberatione
uoluamus, nisi ut rem publicam nostram sicut arma protegunt, aequitas quoque
inuiolata custodiat? spectabilis itaque Philagrius in Syracusana ciuitate
consistens, palatii nostri longa obseruatione dilatus, reuerti se ad lares
proprios supplicauit, qui studiorum causa fratris filios ad Romanam exhibuit
ciuitatem. <2> Quos illustris magnificentia tua ex nostra continens iussione in
supra dicta urbe constituat: nec illis liceat ante discedere, nisi hoc secunda
iterum decernamus iussione. ita enim et illis ingenii prouectus adquiritur et
nostrae utilitatis ratio custoditur: quibus mora potest esse proficus, dum
interdum expedit patriam neglegere, ut sapientiam quis possit adquirere. Ulixes
Ithacus in laribus propriis forte latuisset, cuius sapientiam hinc maxime Homeri
nobile carmen asseruit, quod multas ciuitates et populos circumiuit, dum illi
prudentiores sunt semper habiti, qui multorum hominum conuersationibus probantur
eruditi. nature siquidem humana sicut duris laboribus instruitur, ita per otia
torpentia fatuatur.
XL. OSUIN V. I. COMITI THEODERICUS REX.
<1> Ordinatio nostra per moram non debet impediri, ne, quod salubriter constat
esse dispositum, per tarditatis uitium incurrat obstaculum. et ideo ante
distribuenda sunt arma quam possit flagitare necessitas, ut, cum tempus
exegerit, paratiores ad imperata sufficient. ars enim bellandi, si non
praeluditur, cum fuerit necessaria, non habetur. proinde illustris sublimitas
tua Salonitanis militibus, ut cuique se expediendi facultas obtulerit, pro
nostra iussione arma necessaria procurabit, quia fida rei publicae salus est
defensor armatus. discat miles in otio, quod perficere possit in bello. animos
subito ad arma non erigunt nisi qui se ad ipsa idoneos praemissa exercitatione
confidunt. gestiunt uituli certamina, quae impleant aetate robusta: catuli in
nouellis uenationibus ludunt. focos ipsos comprehendere uirgultis teneris
inchoamus: ceterum si robora primis scintillis adhibeas, igniculum opprimis,
quem fouere contendis. sic animi hominum, nisi prius leniter fuerint imbuti, ad
hoc, quod tendis, idonei nequeunt reperiri. primordia cuncta pauida sunt et
aliter timiditas non tollitur, nisi cum rebus necessariis nouitas abrogatur.
XLI. AGAPITO V. I. P. U. THEODERICUS REX.
<1> Praecipua uestri ordinis cura cautiora nos facit proferre iudicia et
admittendos reuerendo coetui examinare cogit sollicitius honor senatus, quem non
solum numero uolumus augeri ciuium, sed ornari maxime luce meritorum. recipiat
alius ordo forte mediocres: senatus respuit eximie non probatos. quapropter unde
melius nobilitati collegam quaerimus quam de uena nobilium, qui se promittat
abhorrere moribus, quam refugit sanguine, uilitatem? atque ideo illustris
magnificentia tua Fausto adulto, filio. illustris Fausti, decernat attribui,
quae circa referendos curiae priscus ordo dictauit. hoc enim praecipientes nihil
imminuimus sacro ordini de solita auctoritate iudicii, quando gloria maior est
dignitatis spectare sententiam procerum post regale iudicium. ornatus enim
ipsorum est, si, quae solent illi deligere, nos iubemus et si, quod ab illis
cottidie petitur, nos magnopere postulemur.
XLII. ARTEMIDORO V. I. P. U. THEODERICUS REX.
<1> Remunaratio meritorum iustum dominantis prodit imperium, apud quem perire
nescit, quod quempiam laborasse contigerit. nam si inopinata tribuimus,
quemadmodum negare possumus quae debemus? in tutum apud nos reponit omnis
deuotio quod meretur et duplicem fructum metit, qui nobis se in aliquo paruisse
cognoscit. <2> Olim quidem a nobis quod esset dignitate pretiosius habere
meruisti, ut regio lateri dignus adhaereres. differri te pertulit noster
affectus: apud amantem prouectus tui causam tardius impetrasti, ut post sacrae
amicitiae genium ad honores ornatior peruenires. cuncta siquidem, unde famam
captat humanitas, in te congeniata sederunt, patria, genus, instituta praeclara.
quorum si unum nobilitatem complet, in te collecta plus facient, qui non minus
genitalis soli fortuna resplendes quam gloria stemmatis et uirtutis ornaris. <3>
Hinc est quod nunc te per indictionem feliciter tertiam ad praefecturae urbanae
culmen erigimus, tribuentes tibi in ea ciuitate fasces, ubi perpetui sunt
honores. quod nos, qui munera nostra uerecundius aestimamus, certe fatebimur,
multum te meruisse de nostro iudicio, ut illi coetui praesidere possis, quem
reuerendum humano generi esse cognoscis. <4> Numquid hoc est palatia regere et
domos proprias ordinare? plerumque honor ex commendatis adquiritur nec tale est
cellam uinariam tuendam suscipere, quale pretiosa diademata custodire. illa,
quae potiora credimus, ad conseruandum melioribus damus et in quibus sustinere
damna non patimur, fidelioribus profecto mentibus applicamus. Roma si habet
parem, aestima nos et aliis similia credidisse: si uero singulare bonum est,
iudicem te praecipuae rei facimus, quam augere semper optamus.
XLIII. SENATUI URBIS ROMAE THEODERICUS REX.
<1> Scitis, patres conscripti, uestrum esse genium culmina dignitatum: scitis
uobis proficere, quod nobis contigerit in fascium honore praestare. quicquid
enim ab unoquoque suscipitur, senatus est, qui meretur. quid enim de uobis
aestimemus, agnoscitis, quando uiris longo labore compertis hoc certe in
praemium damus, ut uestri corporis mereantur esse participes. <2> Hic est enim
uir, qui genitalis soli relicta dulcedine nobis maluit inhaerere, et licet esset
clarus in patria, nostram tamen elegit subire fortunam. superans gratiae
magnitudine uim naturae, qui principe Zenone non tam beniuolo quam affine
gaudebat. et quid illa re publica gratia non potuit obtinere parentis, quae sic
facillime fauet extraneis? sed haec omnia nimius despexit affectus, ut nos ipsi,
pro quibus haec fecisse cognoscitur, merito stupere uideamur in unius gratia tot
desiderabilia fuisse contempta. <3> Qui super hanc eximiam fidem solacia nobis
suae confabulationis adiecit, ut asperas non numquam rei publicae curas, quas
emergentium rerum necessitate suscipimus, sermonis suauitate deliniret. blandus
alloquio, supplicantium fidelis patronus, accusare nesciens, commendare
praesumens. qui tanta se animi puritate clarificauit, ut cum apud nos mereretur
aulicas dignitates, spectaculorum ordinationem laetissimam sibi militiam
uindicaret, quatenus sub specie uoluptatis libere uideretur uelle seruire, a
laboribus quidem temperans, sed in nulla se nobis parte dissocians. <4> Regalem
quin etiam mensam conuiua geniatus ornauit, ibi se nobis studens iungere, ubi
nos certum est posse gaudere. sed quid ultra de eius moribus est dicendum, cui
ad perfectam probationem sufficit, quod amorem nostrum iugiter habere promeruit?
non est maius meritum quam gratiam inuenisse regnantum: nam quibus fas est de
cunctis optimos quaerere, uidentur semper meritos elegisse. <5> Atque ideo
labores eius remuneratione pensantes Artemidoro illustri uiro urbanae
praefecturae fasces indulsimus. huic ergo, patres conscripti, tot ac talibus
meritis praelucenti fauete linguis, fauete collegiis. erit quoque uestrae
beniuolentiae laus, ut, cum dignis caritatem impenditis, ad exemplum ceteros
incitetis.
XLIIII. SENATUI URBIS ROMAE THEODERICUS REX.
<1> Caritatem uestri praecipuam nos habere ex ipsa cura potestis agnoscere, pro
quibus ita uidemur esse solliciti, ut nihil ammonitionis patiamur omitti.
cautela siquidem prodit affectum et quae studiosius diligimus, maiori gratia
custodimus. <2> Hinc est quod uiro illustri Artemidoro, diu nostris obsequiis
erudito, praefecturae urbanae dedimus fasces regendos, ut, quia quorundam
illicitis seditionibus ciuilitas turbabatur, haberent et innoxii purissimum
testem et errantes iustissimum paterentur ultorem. quod nos, qui delectamur
insontibus, in cunctorum notitiam duximus perferendum, ne quis inopinata
districtione solite praesumat excedere. <3> Quocirca talia nos praefato uiro
delegasse noueritis, ut, si quispiam inciuilis extiterit, districtionem ilico
nostrae iussionis incurrat. et quamquam praefecturae urbanae hanc potestatem
dederint leges, nos tamen specialiter delegauimus, ut confidentius fieret, quod
duplex permisisset auctoritas. <4> Audebit ergo seditiosos et a disciplina
publica deuiantes nostra auctoritate percellere. quiescat concertantium feruor
animorum. bona pacis, quae deo propitio nostro labore meruistis, cur
seditionibus foedantur illicitis? numquam maiori damno periclitati sunt mores,
quam cum grauitas Romana culpatur. reparet itaque honesta ciuitas moderationem
suam. pudor est degenerasse prioribus, eo praesertim tempore, cum talem
principem cognoscitis uos habere, qui praemia bene meritis, ultionem tribuat
inquietis.
XLV. BOETHIO V. I. PATRICIO THEODERICUS REX.
<1> Spernenda non sunt quae a uicinis regibus praesumptionis gratia postulantur,
dum plerumque res paruae plus praeualent praestare quam magnae possunt optinere
diuitiae. frequenter enim quod arma explere nequeunt, oblectamenta suauitatis
imponunt. sit ergo pro re publica et cum ludere uidemur. nam ideo uoluptuosa
quaerimus, ut per ipsa seria compleamus. <2> Burgundionum itaque dominus a nobis
magnopere postulauit, ut horologium, quod aquis sub modulo fluentibus temperatur
et quod solis immensi comprehensa illuminatione distinguitur, cum magistris
rerum ei transmittere deberemus: quatenus impetratis delectationibus perfruendo,
quod nobis cottidianum, illis uideatur esse miraculum. merito siquidem respicere
cupiunt, quod legatorum suorum relationibus obstupescunt. <3> Hoc te multa
eruditione saginatum ita nosse didicimus, ut artes, quas exercent uulgariter
nescientes, in ipso disciplinarum fonte potaueris. sic enim Atheniensium scholas
longe positus introisti, sic palliatorum choris miscuisti togam, ut Graecorum
dogmata doctrinam feceris esse Romanam. didicisti enim, qua profunditate cum
suis partibus speculatiua cogitetur, qua ratione actiua cum sua diuisione
discatur: deducens ad Romuleos senatores quicquid Cecropidae mundo fecerant
singulare. <4> Translationibus enim tuis Pythagoras musicus, Ptolemaeus
astronomus leguntur Itali: Nicomachus arithmeticus, geometricus Euclides
audiuntur Ausonii: Plato theologus, Aristoteles logicus Quirinali uoce
disceptant: mechanicum etiam Archimedem Latialem Siculis reddidisti. et
quascumque disciplinas uel artes facunda Graecia per singulos uiros edidit, te
uno auctore patrio sermone Roma suscepit. quos tanta uerborum luculentia
reddidisti claros, tanta linguae proprietate conspicuos, ut potuissent et illi
opus tuum praeferre, si utrumque didicissent. <5> Tu artem praedictam ex
disciplinis nobilibus notam per quadrifarias mathesis ianuas introisti. tu illam
in naturae penetralibus considentem, auctorum libris inuitantibus, cordis lumine
cognouisti, cui ardua nosse usus, miracula monstrare propositum est. molitur
ostendere, quod obstupescant homines euenisse miroque modo naturis conuersis
facti detrahit fidem, cum ostentet et oculis uisionem. facit aquas ex imo
surgentes praecipites cadere, ignem ponderibus currere, organa extraneis uocibus
insonare, et peregrinis flatibus calamos complet, ut minuta possint arte
cantare. <6> Videmus per eam defensiones iam nutantium ciuitatum subito tali
firmitate consurgere, ut machinamentorum auxiliis superior reddatur, qui
desperatus uiribus inuenitur. madentes fabricae in aqua marina siccantur: dura
cum fuerint, ingeniosa dispositione soluuntur. metalla mugiunt, Diomedes in aere
grauius bucinat, aeneus anguis insibilat, aues simulatae fritinniunt et quae
uocem propriam nesciunt habere, dulcedinem probantur emittere cantilenae. <7>
Parua de illa referimus, cui caelum imitari fas est. haec fecit secundum solem
in Archimedis sphaera decurrere: haec alterum zodiacum circulum humano consilio
fabricauit: haec lunam defectu suo reparabilem artis illuminatione monstrauit
paruamque machinam grauidam mundo, caelum gestabile, compendium rerum, speculum
naturae ad speciem aetheris indeprehensibili mobilitate uolutauit. sic astra,
quorum licet cursum sciamus, fallentibus tamen oculis prodire non cernimus:
stans quidam in illis transitus est et quae uelociter currere uera ratione
cognoscis, se mouere non respicis. <8> Quale est hoc homini etiam facere, quod
uel intellexisse potest esse mirabile? quare cum uos ornet talium rerum
praedicanda notitia, horologia nobis publicis expensis sine uestro dispendio
destinate. primum sit, ubi stilus diei index per umbram exiguam horas consueuit
ostendere. radius itaque immobilis et paruus, peragens quod tam miranda solis
magnitudo discurrit, et fugam solis aequiperat, quod motum semper ignorat. <9>
Inuiderent talibus, si astra sentirent, et meatum suum fortasse deflecterent, ne
tali ludibrio subiacerent. ubi est illud horarum de lumine uenientium singulare
miraculum, si has et umbra demonstrat? ubi praedicabilis indefecta rotatio, si
hoc et metalla peragunt, quae situ perpetuo continentur? o artis inaestimabilis
uirtus, quae dum se dicit ludere, naturae praeualet secreta uulgare! <10>
Secundum sit, ubi praeter solis radios hora dinoscitur, noctes in partes
diuidens: quod ut nihil deberet astris, rationem caeli ad aquarum potius fluenta
conuertit, quarum motibus ostendit, quod caelo uoluitur et audaci praesumptione
concepta ars elementia confert, quod originis condicio denegauit. uniuersae
disciplinae, cunctus prudentium labor naturae potentiam, ut tantum possint,
nosse perquirunt: mechanisma solum est, quod illam ex contrariis appetit imitari
et, si fas est dicere, in quibusdam etiam nititur uelle superare. haec enim
fecisse dinoscitur Daedalum uolare: haec ferreum Cupidinem in Dianae templo sine
aliqua illigatione pendere: haec hodie facit muta cantare, insensata uiuere,
immobilia moueri. <11> Mechanicus, si fas est dicere, paene socius est naturae,
occulta reserans, manifesta conuertens, miraculis ludens, ita pulchre simulans,
ut quod compositum non ambigitur, ueritas aestimetur. haec quia te studiosius
legisse cognouimus, praedicta nobis horologia quantocius transmittere maturabis,
ut te notum in illa mundi parte facias, ubi aliter peruenire non poteras. <12>
Agnoscant per te exterae gentes tales nos habere nobiles, quales leguntur
auctores. quotiens non sunt credituri quae uiderint? quotiens hanc ueritatem
lusoria somnia putabunt? et quando fuerint ab stupore conuersi, non audebunt se
aequales nobis dicere, apud quos sciunt sapientes talia cogitasse.
XLVI. GUNDIBADO REGI BURGUNDIONUM THEODERICUS REX.
<1> Amplectenda sunt munera quae probantur omnimodis expetita: quando non est
abiectum, quod potest explere desiderium. nam per quaslibet pretiosas res ad
illud tantum tenditur, ut cupientis animus expleatur. quapropter salutantes
gratia consueta per harum portitores illum et illum oblectamenta prudentiae
uestrae, horologia cum suis dispositoribus credidimus destinanda: unum, in quo
humana sollertia uidetur colligi, quod totius caeli noscitur spatia peruagari:
aliud, ubi solis meatus sine sole cognoscitur et aquis guttantibus horarum
spatia terminantur. <2> Habetote in uestra patria, quod aliquando uidistis in
ciuitate Romana. dignum est, ut bonis nostris uestra gratia perfruatur, quae
nobis etiam affinitate coniungitur. discat sub uobis Burgundia res subtilissimas
inspicere et antiquorum inuenta laudare: per uos propositum gentile deponit et
dum prudentiam regis sui respicit, iure facta sapientium concupiscit. distinguat
spatia diei actibus suis, horarum aptissime momenta constituat. <3> Ordo uitae
confusus agitur, si talis discretio sub ueritate nescitur. beluarum quippe ritus
est ex uentris esurie horas sentire et non habere certum, quod constat humanis
usibus contributum.
LIBER SECUNDUS.
I. IMPERATORI THEODERICUS REX.
<1> Ammonet nos consuetudo sollemnis dare fastis nomen, ornatum proprium Romae,
terrenam curiae claritatem, ut per annorum numerum decurrat gratia dignitatum et
beneficiis principum sacretur memoria saeculorum. Felix a consule sumat annus
auspicium portamque dierum tali nomine dicatum tempus introeat faueatque
reliquae parti fortuna principii. <2> Quid enim uobis credi possit optatius quam
ut alumnos proprios ad ubera sua Roma recolligat et in uenerandi nominis coetu
senatum numeret Gallicanum? agnoscit curia Transalpini sanguinis decus, quae non
semel coronam suam nobilitatis eius flore uestiuit. nouit inter reliquos fasces
uiros inde sumere consulares. qui longo stemmate ducto per trabeas lege temporum
originarius est honorum. nam quis bonorum indolem nesciat esse Felicem, qui
primis auspiciis hinc prodidit meritum, quod ad patriam uisus est festinare
uirtutum. bonum iudicium est secuta prosperitas: creuit cum libertate
prouectibus: nec passi sumus eum inglorium relinquere, qui ad honorem rei
publicae meruit peruenire. <3> Dignus plane largitatibus nostris, qui in ipso
pueritiae flore maturis moribus lubricam frenauit aetatem et, quod rarum
continentiae bonum est, patre priuatus grauitatis factus est filius: cupiditatem
inimicam sapientiae subiugauit, uitiorum blanda contempsit, superbiae uana
calcauit. ita superatis excessibus ante dare uisus est de moribus consulatum.
<4> Nos autem, qui bonis redimimur institutis, quos probitas inspecta conciliat,
curules infulas praestitimus candidato, ut uirtutum desideria possimus prouocare
per munera: quia non deficit rei studium, quae praemium largius habet. atque
ideo uos, qui utriusque rei publicae bonis indiscreta potestis gratia delectari,
iungite fauorem, adunate sententiam: amborum iudicio dignus est eligi, qui
tantis fascibus meretur augeri.
II. FELICI V. I. CONSULI ORDINARIO THEODERICUS REX.
<1> Amamus beneficia nostra geminare nec semel praestat largitas collata
fastidium, magisque nos prouocant ad frequens praemium qui initia nostrae
gratiae suscipere meruerunt. nouis enim iudicium impenditur, fauor autem
placitis exhibetur. decorum est namque principis arbitria non haerere, quia
commendantur priora posterioribus donis et firmatur omnis indubitata de
repetitione sententia. pridem tibi honorum tribuimus gradum, nunc fastigium
concedimus dignitatum: ut et anteriora merito contulisse uideamur et in
sequentibus constantiam tenere nostra benignitas aestimetur. <2> Non enim
relinqui inglorios patimur, qui generis claritate praedicantur. currat quin immo
honorum gratia per parentes, sub imperio boni principis omnium fortuna
proficiat. nam quis desperet augmentum, ubi est in amore donum et praestare
propositum? huius experimenta clementiae te retines approbasse, cum soli
genitalis fortuna derelicta uelut quodam postliminio in antiquam patriam
commeasses. excepit te noster affectus, impleuit beneficiis macus fecitque esse
uotum, quod nostrum expetisses imperium. sic enim decebat crescere, qui meliora
uisus est elegisse. mutatur enim fortuna cum dominis: et in laude regnantis
proficit, quod subiectus adquirit. <3> At tu parem te huic indulgentiae
praestitisti. illustri enim honore ditatus tanta te maturitate tractabas, ut
annos leues patereris esse sub pondere, quem non potuit in prima aetate uincere
fortissima uis naturae. paterna enim substantia locupletatus, quae semper nouos
extollit heredes, conseruasti diuitias, cum ad eas praeter laboris studia
peruenisses. solet enim facile labi, quod sine difficultatibus potuit inueniri.
<4> Auxisti patrimonium uiuacitatis instantia. nam quod signum magis bonae
dispensationis quaeratur, ubi testis est consulatus? in tanta facultate
meruisti, ad quod uix euersis patrimoniis peruenitur. priuata parcitas
liberalitates publicas enutriuit. transisti gloriam patris dispositione
laudabili: et quod ille assumere non ualuit, de eius opibus effecisti. celsos
currus nisi confidentia magna non appetit, dum generosi est animi optare quod
summum est. <5> Audentes facit homines fiducia sui, quia se non patitur
occulere, quem praecipit natura prodire. rediit per te Transalpinae familiae
consulatus et arentes laurus uiridi germine renouasti. sacram urbem tuis uotis
aspice candidatam. tende igitur ad laudum celsa uestigium, ut priores tuos, quos
honore reparas, uirtute transcendas. sume itaque per indictionem quartam
consulatus insignia dignumque te tantorum desideriis praesenti comproba
largitate. <6> Hic profecto locus est, ubi praeconium meretur effusio, et
uirtutis genus est propriam substantiam non amare, ubi tantum opinionis
adquiritur, quantum facultatibus abrogatur. respice te supra omnium umeros atque
ora uolitare talemque te praebe, ut dignus genere, dignus urbe, dignus nostro
iudicio, dignus trabeis aestimeris.
III. SENATUI URBIS ROMAE THEODERICUS REX.
<1> Gaudete, patres conscripti, redisse uobis stipendia dignitatum: gaudete
prouincias longa aetate desuetas uiros uobis pendere consulares et de tali
auspicio maiora promittite. solent initia portendere meliora, dum a paruis
inchoant, quae in sequentibus magna se ammiratione sublimant. <2> Iacebat
nobilis origo sub Gallicano iustitio et honoribus suis priuata peregrinabatur in
patria. tandem pressos diuina leuauerunt: Romam recepere cum gloria et auorum
antiquas laurus ab honorata curiae silua legerunt. nam quis possit negare generi
munus, cuius habetis uelut in arce depositum? in ore quippe rumoris est quondam
Felicis adhuc uiuere consulatum: quia bona norunt durare post hominem et quod
gloriose geritur, fine temporis non tenetur. <3> Cuius ut antiquam prosapiem,
satiati ueterum copia, transeamus, est adhuc in oculis omnium candidati
nobilissimus pater, qui prudentiae facibus ita praeluxit in curia, ut haberetur
merito clarus inter tot lumina dignitatum. litterarum quippe studiis dedicatus
perpetuam doctissimis disciplinis mancipauit aetatem. non primis, ut aiunt,
labris eloquentiam consecutus toto Aonii se fonte satiauit. <4> Vehemens
disputator in libris, amoenus declamator in fabulis, uerborem nouellus sator
aequiperauerat prorsus meritis quos lectitarat auctoros. commendauit etiam
studiorum bona per benignitatis insignia: sciens imperitiam magis inflari aura
superbiae, quae leuibus flabris exponitur, quia uirtutum radicibus non tenetur.
fuit quidam nostrorum temporum Cato, qui abstinendo uitiis alios formaret
exemplis. rerum quoque naturalium causas subtilissime perscrutatus Cecropii
dogmatis Attico se melle saginauit. digna plane scientia, in qua mens
honestissima conquiescat, quae animo semper aliquid salutare complectitur: cui
accidere nulla possunt ingrata, dum sibi commendat omnia mundanarum rerum sola,
cui labilis fortuna non imperat. cetera de illo meminisse uos sufficit, quando
bona explicare tanti uiri non uacat occupatis. <5> Nunc ad candidatum ora
conuertite, ut paternarum laudum in hunc recognoscatis esse uestigium, nec
tantum pater imaginem dedisse corporis quam signa iudicetur transfudisse
uirtutis. uixit enim inter uos, ut scitis, non consuetudine peregrina, sed
grauitate Romana. ab ipsis quippe primordiis honoribus aggregatus pueritiam
suam, quod est certissimae probitatis indicium, gloriosissimis uiris aemula
semper grauitate sociauit, ut post domesticae uirtutis exempla sumeret de
publica auctoritate constantiam. et quamquam omnium gratiam indiscreta fuerit
electione sectatus quia de magnis raro eligi potest, tamen patricii Paulini se
ornauit affectu, ut hinc daret mirabilis conscientiae signum, quod ad uirum
uisus est festinare praecipuum. <6> Praestat enim decus amicitia desiderata
potiorum, quam societas bonorum morum callet infundere, dum affectione concordi
parem sibi studet esse quem diligit. huic igitur, patres conscripti, auitis
bonis cum suis meritis relucenti uestrae gratiae praestate fulgorem. non impar
ad curialium insignia uenit, qui de speciosa stirpe descendit. <7> Legit enim
frequenter Roma fasces de moenibus Gallicanis, ne aut in damno suo praecipua
contemneret aut probata uirtus inhonora cessaret. impleatur ergo nobilis curia
prouincialibus bonis, cuius est proprium quodcumque uidetur esse praecipuum.
ipse quoque annus temporum pater quadrifaria se diuersitate componit, nec
desiderium caperet, si nouitatis gratiam non haberet. fauete ergo, patres
conscripti, augmento uestro, nostro iudicio. nam si candidatus ornabitur, iam
uobis proficit quod meretur.
IIII. ECDICIO VIRO HONESTO THEODERICUS REX.
<1> Delectamur uetustatis inuento et sequi regulas constitutas libenter
amplectimur, quia locus subreptionibus non relinquitur, quotiens rationabiliter
constituta seruantur. et ideo supplicationum tuarum tenore comperto praesenti
auctoritate definimus, ut quicquid ad Antiochum, siliquatici uel monopolii
titulos exercentem, nostra iussione pertinuit, ad te ratione simili
transferatur, contra omnium calumniantium insidias salua aequitate praesenti
auctoritate munitus: habiturus etiam amminicula saionis, quae pro uindicandis
titulis antefatis nostra tibi sollemniter deputauit auctoritas, ita tamen ut
priuatis minime negotiis misceatur defensio tua. nam quod ad auxilium dedimus,
contrarium nullo modo iustitiae sentiatur, quia rationabiliter aliena culpa te
respicit, si quem tibi petis prodesse, per te sibi alter sentiat obfuisse.
V. FAUSTO PPO THEODERICUS REX.
<1> Cum nostra humanitas locum munificentiae uideatur exquirere et interdum
personis minus necessariis amore clementiae sua desideria largiatur, quanto
magis in utilitate rei publicae delectatur expendere, ubi quicquid tribuitur,
donantis utilitas duplicatur! quapropter illustrem magnificentiam tuam praesenti
auctoritate praecipimus sexaginta militibus in Augustanis clusuris iugiter
constitutis annonas, sicut aliis quoque decretae sunt, sine aliqua dubitatione
praestare, ut utilitas rei publicae grato animo compleatur, quae emolumentorum
commoditatibus adiuuatur. <2> Decet enim cogitare de militis transactione, qui
pro generali quiete finalibus locis noscitur insudare et quasi a quadam porta
prouinciae gentiles introitus probatur excludere. in procinctu semper erit, qui
barbaros prohibere contendit, quia solus metus cohibet, quos fides promissa non
retinet.
VI. AGAPITO V. I. PATRICIO THEODERICUS REX.
<1> Deliberationis nostrae consilium uirorum prudentium requirit obsequium, ut
utilitatis publicae ratio sapientum ministerio compleatur. et ideo illustris
magnitudo tua deo auxiliante cognoscat legationem nos ad Orientem deliberasse
transmittere: cui te idoneum iudicantes iussis praesentibus euocamus, ut et tibi
de aestimatione nostra crescat ornatus et nostris iussionibus per te procuretur
effectus. <2> Sed licet omnis legatio uirum sapientem requirat, cui prouinciarum
utilitas totiusque regni status committitur uindicandus, nunc tamen necesse est
prudentissimum eligere, qui possit contra subtilissimos disputare et in conuentu
doctorum sic agere, ne susceptam causam tot erudita possint ingenia superare.
magna ars est contra artifices loqui et apud illos aliquid agere, qui se putant
omnia praeuidere. lactare igitur tanto iudicio, quando ante suscipis electionis
donum, quam tuum probare potuisses ingenium.
VII. SUNAE V. I. COMITI THEODERICUS REX.
<1> Sine usu iacere non decet, quod potest ad decorem crescere ciuitatis, quia
non est sapientiae profutura contemnere. et ideo illustris sublimitas tua
marmorum quadratos, qui passim diruti negleguntur, quibus hoc opus uidetur
iniunctum in fabricam murorum faciat deputari, ut redeat in decorem publicum
prisca constructio et ornent aliquid saxa iacentia post ruinas: ita tamen, ut
metalla ipsa de locis publicis corruisse apud te manifesta ratione doceatur,
quia sicut nolumus ornatum urbis cuiusquam praesumptione temerari, ita priuatis
compendiis calurnniam detestamur inferri.
VIII. SEVERO VIRO VENERABILI EPISCOPO THEODERICUS REX.
<1> Quis melius ad aequitatis iura deligitur quam qui sacerdotio decoratur, qui
amore iustitiae personaliter nesciat iudicare et diligens cunctos in commune
locum non relinquat inuidiae? proinde aptam considerantes uestris meritis
actionem significamus nos per Montanarium sanctitati uestrae mille quingentos
solidos destinasse, quos prouincialibus, prout quemque praesenti anno exercitu
nostro transeunte dispendium pertulisse cognoueris, habita laesionis
aestimatione distribuas, ut nullus a nostra munificentia reddatur alienus, quem
sua damna grauauerunt. nolumus enim sub confusione largiri, quod decet sub
ratione distribui: ne quod nos necessarie transmisisse constat afflictis,
superfluo tribuatur illaesis.
VIIII. FAUSTO PPO THEODERICUS REX.
<1> Inclinari precibus nostra nouit humanitas nec pro affectu pietatis fines
potest iustitiae custodire. benigni quippe principis est ad clementiae commodum
transilire terminos aequitatum: quando sola est misericordia, cui omnes uirtutes
honorabiliter cedere non recusant. <2> Dudum siquidem aestimatis meritis Sabino
aurigae unum solidum menstruum feceramus: nunc autem quamuis histrio honesta nos
supplicatione permouit, asserens ut qui laetitiae publicae minister existit,
mendicitate tristissima non debeat ingrauari. et ideo praesenti iussione
decernimus, ut alterum solidum per mensem supra memoratus equorum moderator
accipiat, quod publicis debeat rationibus imputari. gaudemus enim, quotiens
expensarum paginae his titulis onerantur, quia magnum nobis est commodum, quando
nonnulla pauperibus in qualibet conuersatione largimur.
X. SPECIOSO VIRO DEVOTO COMITIACO THEODERICUS REX.
<1> Propositum regale est grauatis per iniuriam subuenire, ut coercitio praui
iustitiam faciat plus amari. nec dissimulari potest salua communione qua
uiuitur, ut sollicitatores publicos habeat genialis tori reuerenda societas et
illud humani generis procreabile sacramentum scelerata temeritate profanetur.
<2> Agapitae igitur spectabilis feminae supplicatione commoti, quae ab uniuersis
temptatum asserit suum secretum, ut etiam promitterent de nece mariti, a quo
iuste potius merentur extingui, praesenti iussione decernimus, ut a tempore, quo
iugalem copulam animo uitiata dereliquit, omni contractu, qui leuitatis errore
firmus esse non potest, legum ratione cassato, quicquid a retentatoribus
constiterit possideri, sine ulla facies dilatione restitui, nec scelerati ad
irrisionem iustitiae fraudum suarum ualeant compendia uindicare. nimis enim
absurdum est ut, quos poena meruit consumere, etiam lucra sibi ualeant
uindicare.
XI. PROBINO V. I. PATRICIO THEODERICUS REX.
<1> Inter cetera humani generis pondera coniugalis affectus curam sibi
praecipuam uindicauit: non inmerito, quia in honore esse meretur, unde reparatio
posteritatis adquiritur. omne facinus auctores solos insequitur: error matris
transit ad filios et nouo infelicitatis euentu fit dedecus proprium scelus
alienum. ideo enim iura uel diuina uel publica nexum coniugii tanta cautela
praecipiunt custodiri, ut crimen sit magnum conscientiae alienos affectus in
reuerentiam non habere. <2> Basilius siquidem uir spectabilis datis precibus
intimauit Agapitam coniugem suam de propriis penatibus a quibusdam uitio
sollicitationis abductam, dum sexus ille femineus ad mutabilitatis uitia patet:
quod etiam oblata nobis supra memoratae coniugis suae petitione firmauit:
adiciens eam, cum in sacrosanctae ecclesiae saepta refugisset, ignorante marito
magnitudini tuae casam Arcinatinam ratione postposita contulisse. unde nunc
resipiens deplorat ingestam sibimet grauissimam nuditatem, factum suum ipsa
condemnans, quippe ut pauper diuiti, casto lubrica, prudenti uiro donaret
insipiens. <3> Nunc abicite lucra, quae honestam non uidentur commendare
personam, quia illud uos potius decet adquirere, quod et famam uestram possit
augere. hinc etiam prius praecepta dederamus et nunc iterata iussione repetimus,
ut supra scriptam rem sine aliqua dubitatione reddatis. alienatio enim rerum
solidum desiderat habere iudicium, et certe in his uersata rebus, firmum docetur
perdidisse consilium. quid enim facere potuit probum, quae nullis culpis
extantibus reliquit maritum?
XII. COMITI SILIQUATARIORUM ET CURAS PORTUS AGENTI THEODERICUS REX.
<1> Si desideriis nostris commercia peregrina famulantur, si prolato auro
adquiritur externa deuotio, quanto magis suis bonis abundare debet Italia, cum
nulla in parendo probetur sentire detrimenta? et ideo speciem laridi nullatenus
iubemus ad peregrina tranamitti, sed in usus nostros propitia diuinitate
seruetur, ne, quod in nostris partibus conficitur, noxia neglegentia deesse
uideatur. <2> Cauete itaque, ne culpis quamuis parua praebeatur occasio,
scientes periculum grauissimum fore, si studeatis uel leuiter in iussa
committere. in qualitate est, non in quantitate peccatum: mensuram siquidem non
quaerit iniuria. imperium, si in paruo contemnitur, in omni parte uiolatur.
XIII. FRUMARITH SAIONI THEODERICUS REX.
<1> Commouemur quidem pietatis studio querela supplicum, sed ea maxime, quae
uersatur in dispendiis innocentum, ut quibus non fuerunt in exigendo compendia,
grauem subeant in reddendo iacturam. quod nostri temporis manifestum est non
decere iustitiam, ut alterius despectus alterum grauet et reatus sit innoxiis de
contemptibus alienis. Ulpianus siquidem flebili petitione suggessit
administrationis suae tempore debitorem publicum in quadringentis solidis
Venantio postulanti fideiussionis se uinculo tradidisse. quo sponsionem suam
praesumptione truculentium rusticorum despiciente complere supplicem memoratus
solidorum numerus onerauit. <2> Ideoque praedictum Venantium, quem frequenter
multorum scelerum pulsat inuidia, notum solummodo querelis assiduis, in
praesenti negotio decernimus conueniri, ut legaliter conuictus ea, quae
promisisse suggeritur, sine aliqua mora tergiuersationis adimpleat, quia melius
semper legum pondere pressa curatur audacia et, dum metus talibus imponitur,
peccandi licentia non praebetur.
XIIII. SYMMACHO PATRICIO THEODERICUS REX.
<1> Quis possit accusare iam reliqua, si pietatis nomina probantur esse
crudelia? neglegitur leuis reatus, cum tragoedia criminis nagna tonuerit, nec
aliquis nititur quod parum est uindicare, si delicta summa respiciantur euadere.
inimicum trucem ratio ipsa professionis ostendit: iratum plerumque poteris
inuenire collegam: inoboedientem uero filium declinare poenas non permittit
humanitas. <2> Ubi est illa naturae uis, quae amplexu copulae destinatur ad
posteros? ferarum catuli sequuntur parentes: a cespite suo uirgulta non
discrepant: propago uitis propriae seruit origini: et discrepat homo a suo fusus
initio? quid dicamus illa beneficia, quae uel extraneam possint obligare
personam? nutriuntur a paruulis, ipsis laboratur, ipsis diuitiae conquiruntur:
et cum sibi unusquisque credat abundare quod possidet, cum a patribus adhuc
quaeritur, pro altera potius aetate peccatur. pro dolor! non merebimur eorum
affectum, pro quibus subire non recusamus exitium? Maria ipsa saeuis
tempestatibus excitata genitoris cura non refugit, ut peregrinis mercibus
adquirat quod propriae suboli derelinquat. <3> Aues ipsae, quarum uita semper in
escis est, naturam suam extranea sorde non maculant. ciconia, redeuntis anni
iugiter nuntiatrix, eiciens tristitiam hiemis, laetitiam uerni temporis
introducens, magnum pietatis tradit exemplum. nam cum parentes eorum pennas
senio coquente laxauerint nec ad proprios cibos quaerendos idonei potuerint
inueniri, plumis suis genitorum frigida membra refouentes escis corpora lassa
reficiunt: et donec in pristinum uigorem ales grandaeua redierit, pia
uicissitudine iuuenes reddunt, quod a parentibus paruuli susceperunt. et ideo
non immerito longa uita seruantur, qui pietatis officia non relinquunt. <4>
Perdicibus etiam mos est oua perdita per alterius matris damna sarcire, ut
adoptione alienae subolis incommoda suae reparent orbitatis: sed mox ut nati
fiduciam habere coeperint ambulandi, ad campos exeunt cum nutrice: qui ut
fuerint materna uoce commoniti, ouorum suorum potius genetricem petunt, quamuis
ab aliis furtiuis fetibus educentur. <5> Quid ergo homines facere debebunt,
quando hanc pietatem et in auibus inesse cognoscunt? Romulum itaque, qui facti
sui acerbitate pollutus nomen foedat Romanum, ad uestrum facite uenire iudicium:
et si eum patri suo Martino manus iniecisse constiterit, protinus legitimam
sentiat ultionem: quia ideo elegimus mores uestros, quia crudelibus parcere non
potestis, quando genus pietatis est in illos distringere, qui contra naturae
ordinem sceleratis se docentur actionibus miscuisse.
XV. VENANTIO V. I. THEODERICUS REX.
<1> Prouidentiae nostrae ratio est in tenera aetate merita futura tractare et ex
parentum uirtutibus prolis iudicare successus: quia bona certa sunt, quae fidem
ab exordio trahunt, dum origo nescit deficere, quae consueuit radicitus
pullulare. fertur etiam cursu perenni fontium uena uitalis et hanc condicionem
sustinent cuncta manantia, ut sapor, qui concessus est origini, nisi per
accidentia fuerit fortasse uitiatus, nesciat riuulis abnegari. <2> Hinc est,
quod te magnifici patris meritis aestimatum comitiuae domesticorum uacantis
honore prouehimus, ut qui es clarus stemmate, splendeas dignitate. quis enim in
te quamuis futura, tamen certa non teneat, dum gloriosi patris recolat
officiosos labores? qui prudentiae ratione flammatus sic fuit ad repentina
sollicitus, quasi per moram crederetur instructus. <3> Praefecturam enim,
sollicitudinum omnium nobilissimum pondus, quod uel solum fuisset expedire
laudabile, iuncta exercitus nostri cura disposuit, ut nec prouinciis ordinatio
deesset nec exercitui se prouida sollicitudo subtraheret. superauit cuncta
infatigabilis et expedita prudentia: traxit mores barbaros ad quietem: in uotum
nostrum cuncta moderatus est, ut sic accipientibus satisfaceret, ne dantes locum
querimoniis inuenirent. uerum ut de plurimis pauca sufficiant, probauit de se
tanta, ut eligeretur eius inexplorata posteritas. <4> Inter haec tamen generis
ornamenta, quod maximum pulcherrimae nobilitatis decus est, nec tuorum indiges
suffragia meritorum. litterarum siquidem studia, quae cunctis honoribus suo sunt
digna suffragio, sedulus perscrutator assequeris, addens claritati generis
ingenium suauiter eloquentis. incumbe ergo talibus studiis, ama quae in te
remunerata cognoscis, ut nostra quoque iudicia cum tuis prouectibus tendas.
tantum enim a nobis exigis, quantum te bonis actibus imminere cognoscis.
XVI. SENATUI URBIS ROMAE THEODERICUS REX.
<1> Studii nostri est, patres conscripti, remunerationem recto conferre
proposito et bonae indolis uiros ad instituta meliora fructu impensae
benignitatis accendere. nutriunt enim praemiorum exempla uirtutes nec quisquam
est, qui non ad morum summa nitatur ascendere, quando inremuneratum non
relinquitur quod conscientia teste laudatur. <2> Hinc est quod illustrem
Venantium, tam suis quam paternis meritis elucentem, comitiuae domesticorum
uacantis dignitate subueximus, ut natalium splendor insitus ornatior collatis
redderetur honoribus. retinetis enim, patres conscripti, patricium Liberium et
in aduersitate nostra fuisse laudabilem, qui sic Odouacris integerrimis parebat
obsequiis, ut nostra post fuerit dilectione dignissimus, contra quos multa
fecisse uidebatur inimicus. non enim ad nos uilissima transfugae condicione
migrauit nec proprii domini finxit odium, ut alterius sibi procuraret affectum:
expectauit integer diuina iudicia nec passus est sibi regem quaerere, nisi
rectorem primitus perdidisset. <3> Unde sic factum est, ut ei libenter daremus
praemium, quia nostrum fideliter iuuit inimicum. qui casu patrocinante contrario
tantum nobis reddebatur acceptus, quantum tunc cognosci poterat indeuotus. flexo
iam paene domino nullis est terroribus inclinatus: sustinuit immobilis ruinam
principis sui: nec nouitas illum turbare potuit, quam etiam ferocitas gentilis
expauit. prudenter secutus est communes casus, ut, cum diuina iudicia fixe
sustinet, humanam gratiam commendatior inueniret. <4> Probauimus hominis fidem:
tristis ad nostra iura transiuit, qui superatus animum conuertit, non autem, ut
uinceretur, effecit. cui mox ut praefecturae praetorianae concessimus
dignitatem, credita sibi tanta integritate disposuit, ut miraretur aliquis sic
simpliciter deuotum, quem tam callide nouerat fuisse contrarium. is igitur
infatigabili cura, quod difficillinum uirtutis genus est, sub generalitatis
gratia publica uidetur procurasse compendia, censum non addendo, sed conseruando
protendens, dum illa, quae consueuerant male dispergi, bene industria prouidente
collegit. sensimus auctas illationes, uos addita tributa nescitis. ita utrumque
sub ammiratione perfectum est, ut et fiscus crcsceret et priuata utilitas damna
nulla perferret. <5> Iuuat nos referre quemadmodum in tertiarum deputatione
Gothorum Romanorumque et possessiones iunxit et animos. nam cum se homines
soleant de uicinitate collidere, istis praediorum communio causam uidetur
praestitisse concordiae: sic enim contigit, ut utraque natio, dum communiter
uiuit, ad unum uelle conuenerit. en factum nouum et omnino laudabile: gratia
dominorum de cespitis diuisione coniuncta est; amicitiae populis per damna
creuerunt et parte agri defensor adquisitus est, ut substantiae securitas
integra seruaretur. una lex illos et aequabilis disciplina complectitur. necesse
est enim, ut inter eos suauis crescat affectus, qui seruant iugiter terminos
constitutos. debet ergo Romana res publica et memorato Liberio tranquillitatem
suam, qui nationibus tam praeclaris tradidit studia caritatis. <6> Perpendite,
patres conscripti, si hanc subolem inremuneratam relinquere debuimus, cuius
auctorem tot eximia fecisse retinemus. faueant superna dispositis, ut, sicut nos
uirtutes collatis beneficiis inuitamus, ita creuisse meritis honoratas
conscientias approbemus.
XVII. HONORATIS POSSESSORIBUS DEFENSORIBUS ET CURIALIBUS TRIDENTINAE CIVITATIS
THEODERICUS REX.
<1> Munificentiam nostram nulli uolumus extare damnosam, ne quod alteri
tribuitur, alterius dispendiis applicetur. et ideo praesenti auctoritate
cognoscite, pro sorte quam Butilani presbytero nostra largitate contulimus,
nullum debere persoluere fiscalis calculi functionem, sed in ea praestatione
quanti se solidi comprehendunt, de tertiarum illationibus uobis noueritis esse
releuandos. nec inferri a quoquam uolumus, quod alteri nostra humanitate
remisimus, ne, quod dictu nefas est, bene meriti munus innocentis contingat esse
dispendium.
XVIII. GUDILAE EPISCOPO THEODERICUS REX.
<1> Priscarum legum reuerenda dictat auctoritas, ut nascendo curialis nullo modo
possit ab originis suae muniis discrepare nec in aliud rei publicae officium
trahi, qui tali praeuentus fuerit sorte nascendi. quod si eos uel ad honores
transire iura uetuerunt, quam uidetur esse contrarium curionem rei publicae
amissa turpiter libertate seruire et usque ad condicionem peruenisse postremam,
quem uocauit antiquitas minorem senatum? <2> Nouerit itaque reuerentia uestra
Sarsenates municipes collegas suos asseruisse ecclesiam uestram irrationabiliter
sibi uelle defendere. unde prudentia uestra pro integritatis suae proposito
examinata ueritate discutiat quae ueniunt in querelam et, si desideria petitorum
ueritate subsistunt, pro implendis muniis eos ad curiam suam remeare permittat.
<3> Sin uero clero uestro creditis in eis aliquid rationabiliter suffragari, ad
nostrum comitatum instructam personam modis omnibus destinate, quae
aduersariorum debeat intentionibus obuiare. quod si de negotii qualitate
dubitatis, conuenit sacerdotalibus institutis, ut ante controuersiam iustitiam
magis ipse cognoscas, quam de iudicio uictus abscedas. talem siquidem non
oportet publice superari, quem amatorem aequitatis conuenit inueniri.
XVIIII. UNIVERSIS GOTHIS ET ROMANIS VEL HIS QUI PORTIBUS VEL CLUSURIS PRAESUNT
THEODERICUS REX.
<1> Cuncta quidem iure detestamur scelera et omne quod iniquum est clemens
execratur auditus, sed ea maxime quae, humani sanguinis effusione polluta,
nostram contra se incitauere censuram. quis enim ferat in domesticis praesidiis
locum fuisse periculis et ibi inuentum dulcis uitae exitum, unde nasci debuerat
defensionis auxilium? <2> Et ideo praesenti iussione mandamus, ut in famulos,
qui Stephanum dominum suum plectibili scelere trucidantes inhumatam quoque
reuerentiam eius funeris abiecerunt, legum districtione resecetis, quatenus qui
exemplis prouocantur pessimis, poenis arceantur aspectis. pro dolor! pietas in
auibus inuenitur, quae ab humana condicione deseritur. <3> Vultur ipse, cui uita
est cadauer alienum, tantae magnitudinis corpus, nec exiguis alitibus probatur
infestus, sed magis accipitrem, uitam plumigerum auium persequentem, alis
caedit, ore dilaniat totoque suo pondere periclitantibus nititur subuenire: et
homines parcere nequeunt, cuius se genus esse cognoscunt. ille non uult
extinguere quo poterat uesci: serui maluerunt occidere qui eos superstes
consueuerat enutrire. fiat ergo pastus pii uulturis, qui necem potuit crudeliter
desiderare pastoris. tali potius sepulcro recipiatur, qui dominum reddidit
insepultum.
XX. VVILIGIS SAIONI THEODERICUS REX.
<1> Omnes decet gratanter impendere quod publicas uidet utilitates posse
respicere, quando necesse est hoc membra sentire, quod corporis summa sentitur.
atque ideo praesenti decernimus iussione, ut quantas in Rauennati urbe
exculcatorias potueris reperire, frumentis fiscalibus oneratas ad nos usque
perducas, quatenus alimonia publica tali prouisione releuata necessitatem
inopiae non debeant sustinere. reddat Rauenna copiam Liguriae, quam ex ipsa
consueuit accipere. nam quae praesentiam nostram sustinet, multorum debet
solacia reperire. trahit enim comitatus noster obseruantium cateruas et, dum ad
beneficia praestanda curritur, necessaria populis copia postulatur.
XXI. IOHANNI APPARITORI THEODERICUS REX.
<1> Graue nimis est, ut fructu laboris sui fraudetur industrius et cui debet pro
sedulitate conferri praemium, dispendium patiatur iniustum, in ea praesertim re,
quae ad nostram respicit largitatem: ubi nihil debet licere neglegentiae, ne
uideamur minus profutura sanxisse. <2> Dudum siquidem Spei et Domitio
spectabilibus uiris loca in Spoletino territorio caenosis fluentibus inutiliter
occupata largitas nostra concesserat, ubi aquarum uasta profunditas terrenam
gratiam in nullos usus profuturos absorbuerat. iacebat tellus naufraga palustri
torpore confusa et sub utroque iactata dispendio nec aquarum puros liquores
meruerat et decus terrenae soliditatis amiserat. <3> Hoc nos, quibus cordi est
in melius cuncta mutare, supra memoratis tali condicione concessimus, ut, si
eorum opera uel labore turpis desiccaretur illuuies, ipsis liberata rura
proficerent. sed quantum actorum Spei loquitur ingesta petitio, Domitii uiri
spectabilis uitio, dum inmemor iussionis tenaciter parcit expensis, ad initium
reuocatus est labor operantium, cum iam in soli faciem paulatim mollities
siccata duresceret celatamque longa uoracitate tellurem sol insuetus afflaret.
<4> Quod nos nequaquam neglegi posse patiemur, ut bene coepta inuida destruantur
ignauia. proinde deuotio tua praefatum Domitium moderata executione conueniat,
ut aut coeptae rei sedulus operator immineat aut, si hoc sibi sumptuosum esse
crediderit, propriam cedat supplicantibus portionem. oportet enim, ut, si ipse
postulata nequit efficere, consortem beneficii gloriam nostri temporis permittat
implere.
XXII. FESTO V. I. PATRICIO THEODERICUS REX.
<1> Aequum est ut se commodet pietas regalis fati uulnere sauciatis, quia erigi
plus merentur, quos sortis suae aduersa presserunt. atque ideo magnificentiae
tuae praesenti auctoritate declaramus, ut Ecdicii filios, quos in urbe primitus
residere censuimus, ad patriam cum genitoris sui funere, uotiuo quidem reditu,
sed acerbo casu, remeare iubeatis, ne eorum desideriis abnegatis uulnus
geminetur afflictis et, quod nefas dictu est, qui dolorum nubila nostra semper
serenitate detergimus, nunc miseris pias lacrimas denegare uideamur. <2>
Insatiabilis quippe fletus est, qui humandis non sinitur corporibus interesse,
dum semper se reum iudicat, qui cineribus iusta non praestat. Priamus quanto
pretio sepeliendum Hectorem redemit? rogauit furentem, supplicauit armato
uitamque suam exponere maluit, ut cadaueri debita non negaret. et quoniam in his
personis mutua sunt officia pietatis, iniquum est filium genitori gratuito non
impendere, quod patrem magnis talentis constitit effecisse. XXIII.
AMPELIO DESPOTIO ET THEODULO VVV. SSS. THEODERICUS REX.
<1> Decet nostri temporis disciplinam, ut, qui publicis utilitatibus seruiunt,
superfluis oneribus non grauentur. nec dignum est, ut cuiusquam laedat inuidia
nostris motibus ordinata. quapropter figulinis regia uobis auctoritate concessis
operam nauanter impendite, nec uereamini ad alias actiones posse traduci, a
quibus iniuncta praesentia uix credimus explicari. cessabit ergo circa uos
improborum nefanda praesumptio et obscuris dolis effectum nostra tollit
auctoritas. in cassum enim odit, cui se clementia principalis obiecerit.
XXIIII. SENATUI URBIS ROMAE THEODERICUS REX.
<1> Constat senatum populis uiuendi regulam praestitisse: nam quod ornat nomen
Romanum, a uobis legitur institutum. ad hoc patres in illo principio nominati,
ut quasi filiorum per uos possit uita componi. uos enim deuotionem prouinciis,
uos priuatis iura decreuistis et ad omnes iustitiae partes subiectos libenter
parere docuistis. et ideo non decet inde signum resultationis exire, unde
exemplum potuit moderationis effulgere. quod nostra clementia, cui cordi est
rerum omnium tenere mensuram, in uestram notitiam credidit perferendum, ne magis
ignorantia nutriatur excessus, sub quorum conscientia error non potest esse
perpetuus. <2> Igitur prouinciarum iudicum relatione ad magnificum uirum
praefectum praetorii directa comperimus sic primae transmissionis tempus
exemptum, ut nihil aut parum a senatoriis domibus constet illatum: allegantes
per hanc difficultatem tenues deprimi, quos decuerat subleuari (fiet enim, ut
exactorum nimietas, dum a potentibus contemnitur, in tenues conuersa grassetur
et ille potius soluat aliena, qui est deuotus ad propria), praeterea multo
acerbiora iungentes, quod pro sua quisque uoluntate aliquid exigentibus dignetur
abicere, quae tamen omnia detrimenta curialibus dicuntur infligi, et qui in usus
publicos fuerant nostra prouisione reparati contumacibus distrahantur iniuriis.
<3> Atque ideo, patres conscripti, qui parem nobiscum rei publicae debetis
adnisum, sic aequabiliter ordinate, ut quicquid unaquaeque domus senatoria
profitetur, destinatis procuratoribus per prouincias trina illatione persoluat.
<4> Aut certe, quod in locum beneficii solebatis expetere, arcae uicarianae
sedis, si id diligitis, uniuersa complete, ne necesse sit curiali per
multiplicem et inefficacem conuentionis laborem in exiguis uestris illationibus
sua potius damna suscipere eueniatque detestabilis casus, ut qui functionem
propriam uix poterat sustinere deuotus, alienis oneribus prematur infirmus. <5>
Quod nos salua ciuilitate dissimulare non possumus, ut sine acerbitate belli
rebus suis exuantur oppressi et illi magis pereant, qui rei publicae parere
festinant. hoc etiam nos edictali programmate in cunctorum noueritis
prouincialium notitiam pertulisse, ut libere prorumpat in publicum, qui se
alienae functionis pondere nouit oppressum: relaturi a nobis iustitiae fructum,
qui fessis nouimus donare praesidium.
XXV. EDICTUM. THEODERICUS REX.
<1> Quamuis sit querula uox doloris nec se contineant imminuti et laesus animus
uociferatione pascatur, tamen liberior sermo promitur, qui nostra auctoritate
laxatur. detestamur enim miseros premi, commouemur et non querentium malis
uelociusque ad nos peruenit quod dissimulatio patientis abscondit: merito,
quando cunctorum nos respiciunt laesiones, dum illud pietati nostrae perire
credimus, quod per mediocrium damna sentimus. <2> Nuper itaque prouincialium
iudicum relatione cognouimus domos aliquas praepotentum suas non implere per
ordinem functiones. hinc fieri, ut, dum illationis quantitas procurari
quaeritur, a tenuibus summa potior exigatur. superbia deinde conductorum
canonicos solidos non ordine traditos, sed sub iniquo pondere imminentibus
fuisse proiectos, nec uniuersam siliquam, quam reddere consueuerant, sollemniter
intulisse. proinde factum ut curiales, quibus nos uolumus esse prospectum,
imminentum sollicitudine coacti grauia damna sentirent: et, si dici fas est, cum
alienis debitis sub truculentis compulsoribus urgerentur, possessionum quoque
suarum amissione priuati sunt. <3> Quod scelus ut debeat amputari, ad
reuerentissimum quoque senatum praecepta transmisimus et nunc edictali
programmate definimus, ut quisque possessorum siue curialium grauatum se sentit
in aliena calculi functione, ad nostrae serenitatis audientiam uenire
deproperet, sciturus nobis priores excessus omnino displicuisse, cum uiderit
profutura succedere. patuit ergo uobis arbitrium iusti principis, quamuis multis
semper declaretur indiciis. nunc aut sub silentio patientiam doloris obducite
aut sub iustitia iter uocis aperite. iam in uobis erit huius summa consilii,
quibus adiacet eligere, quod uobis perspicitis expedire.
XXVI. FAUSTO PPO THEODERICUS REX.
<1> Nullis compendiis delectamur iniustis nec ad animum nostrae pietatis
perueniunt quae probitatis gratia deseruntur. res publica siquidem iure semper
aequitatis augetur, et cum temperantia diligitur, uelociter profutura succedunt.
<2> Atque ideo illustrem magnificentiam tuam, negotiatorum Apuliae siue
Calabriae supplicatione permoti, duximus instruendam, ut frumenta, quae per
supra dictos negotiatores publico comparantur, non iterum ab eisdem interpretii
nomine solidorum quantitas exigatur. nam si coemptam speciem expensis publicis
necessariam non habetis, ab officio uestro suscepta modiatio fideliter
distrahatur: euentum rei ratio fiscalis habitura, quae iniuste uidetur
imposuisse quod respuit. nimis enim iniquum est, ut ille patiatur dispendium,
qui imperium fecit alienum. <3> Pari condicione censentes de sextario quoque,
quem negotiator eius prouinciae uidetur inferre, ne quis audeat damnata semper
pretia proteruus exigere. et ut ualidius retundamus excessus, poenam triginta
librarum auri sedis uestrae praefectis imponimus, si quis contra haec
saluberrima constituta ausu temerario uenire temptauerit. officium uero decem
librarum auri dispendio se nouerit esse feriendum, si inhibitas praesumpserit
exsequi iussiones. <4> In illa quoque parte fessis clementia nostra se porrigit,
ut si pensionem huius tituli siliquatario praestat, monopolium quoque negotiator
exerceat. si uero siliquatarius hunc titulum negotiatoribus iudicat abrogandum,
nullam ab eis exigat pensionem, quia satis absurdum est, ut affligatur damnis,
qui commoda non habet actionis. <5> In aurariis denique priscus ordo seruetur et
ad eos tantum functio ipsa respiciat, quos huic titulo seruire uoluit
antiquitatis auctoritas. quapropter beneficia nostra erga negotiatores, qui
uestris titulis necessarii comprobantur, omnimodis facite custodiri, ne genus
hominum, quod uiuit lucris, ad necem possit peruenire dispendiis.
XXVII. UNIVERSIS IUDAEIS GENUA CONSISTENTIBUS THEODERICUS REX.
<1> Sicut exorati iustum cupimus praebere consensum, ita per nostra beneficia
fraudes fieri legibus non amamus, in ea parte praecipue, in qua diuinae
reuerentiae credimus interesse. non ergo insultare uideantur elati, diuinitatis
gratia destituti. quapropter tegumen tantum uetustis parietibus superimponere
synagogae uestrae praesenti uos auctoritate censemus, petitionibus uestris
eatenus licentiam commodantes, quatenus constituta diualia permiserunt. nec
aliquid ornatus fas sit adicere uel in ampliandis aedibus euagari. <2> Et
noueritis uos seueritatem minime defugere ueteris sanctionis, si rebus non
abstineatis illicitis. in ipsis uero parietibus cooperiendis uel fulciendis
tantum licentiam damus, si uobis tricennalis non potest obesse praescriptio.
quid appetitis, quae refugere deberetis? damus quidem permissum, sed errantium
uotum laudabiliter improbamus: religionem imperare non possumus, quia nemo
cogitur ut credat inuitus.
XXVIII. STEPHANO V. S. COMITI PRIMI ORDINIS ET EX PRINCIPE OFFICII NOSTRI
THEODERICUS REX.
<1> Tribuenda est iustis laboribus compensatio praemiorum, quia exprobrata
militia creditur quae inremunerata transitur. athletam populis palma designat
esse uictorem. sudores bellicos ciuica corona testatur. exspectant etiam equos
praemia sua et tanta iustitiae uis est, ut nec illis tardius detur laboris
pretium, qui sentire non poterant denegatum. <2> Quod si ita est, dignum est hoc
homini reddere, qui per honesta cognoscitur obsequia placuisse. per tot enim
actionum lubricos casus fixum tenuisti militiae probatae uestigium et, quod raro
in seruiente prouenit, permutatio iudicum numquam circa te uariauit affectum.
nec erat alieni in te iudicii quisquam inuidus, cum etiam decessorum suorum
ordinationibus redderetur aduersus. placere siquidem meruisti cunctis, cum
semper diligenda custodis, silentium in secretis, in actionibus efficaciam, in
obseruationis labore frequentiam: et quod rarum continentiae bonum crebra
hominum uitia fecerunt, cum multis praeberes officia, nulli tuam operam
uenditabas. <3> Vocabulum principis nulla sorde maculasti, seruans dignitatem
nominis exercitatione uirtutis. hinc est quod spectabilitatis honorem, quem
militiae sudore detersis iusta deputauit antiquitas, praesenti tibi auctoritate
conferimus, ut laboris tui tandem finitas excubias remuneratione comitiuae primi
ordinis iam securus intellegas. <4> Et quia gratiam principis dignitas nuda non
asserit nec beneficium dici potest quod nulla utilitate sentitur, priuilegia
quoque, quae tribui scholae tuae exprincipibus diualia constituta uoluerunt,
simili munificentia condonamus. nec quicquam in his debes metuere, quae forsitan
nouella usurpatione temptantur. ab omni ergo damno oneribusque sordidis ius te
muniuit antiquum. <5> Sed quamquam tibi praesenti remuneratione digna soluamus,
futuris tamen uotis spem maximam pollicemur. sed quoniam angusta sunt beneficia,
quae non etiam de futuris aliquid pollicentur, aderit prouidentia principalis,
ut, quos dignos fauore nostro credimus, eos quoque maiore honore cumulemus.
uerum quia celari non decet regium bonum, impetrata praesentia ad prouincialis
iudicis facito notitiam peruenire, quatenus spectabilitatem tuam decoratam
nostro testimonio uniuersitatis corda cognoscant tibique utpote militiae munere
persoluto cultus competens pro nostrorum temporum laude seruetur.
XXVIIII. ADILAE V. S. COMITI THEODERICUS REX.
<1> Quamuis nullos uelimus grauamen aliquod sustinere, quos uidetur pietas
nostra protegere, quia regnantis est gloria subiectorum otiosa tranquillitas,
tamen specialiter ecclesias ab omni iniuria reddi cupimus alienas, quibus dum
aequabilia praestantur, misericordia diuinitatis adquiritur. <2> Et ideo
beatissimi uiri Eustorgii episcopi sanctae Mediolanensis ecclesiae petitione
permoti praesentibus te affatibus ammonemus, ut praediis uel hominibus huius
ecclesiae intra Siciliam constitutis tuitionem studeas salua ciuilitate
praestare, nec a quoquam cuiuslibet nationis homine contra fas patiaris opprimi,
quos decet diuinitatis intuitu subleuari: ita tamen, ut causis publicis et
priuatis, quae contra eos rationabiliter proponuntur, respondere non differant,
quia, sicut nolumus eos ab aliquo praegrauari, ita exceptos a tramite iustitiae
non patimur inueniri.
XXX. FAUSTO PPO THEODERICUS REX.
<1> Non praeiudicat iuri publico personalis exceptio, quia beneficialem esse
principem licet nec intra regulas constituti potest munificentia regalis artari.
ira leuis coerceatur grauissimis institutis: inpatiens ambitio iure refrenetur:
clementia non habet legem nec debet sub angustis terminis benigna sequi, quem
decet sine fine laudari. <2> Defensores itaque sacrosanctae Mediolanensis
ecclesiae pro expensis pauperum, quae sub lucri exaggeratione funduntur, unum
sibi ex negotiatoribus urbis suae desiderant oportere praestari, qui proemptoris
functus officio, exceptus negotiationis oneribus debeat implere quod suscipit.
hoc enim nos et Rauennati ecclesiae commemorant motos rationabili allegatione
tribuisse, quod pietatis exemplum ad suum quoque commodum supplicant
transferendum. <3> Et ideo illustris et praecelsa magnificentia tua, salua in
aliis negotiatoribus commoditate publica, quae ab uniuerso corpore consueuit
inferri, unum eis, quem sibi uisi fuerint eligere, deputabit, qui ita commercium
negotiationis exerceat, quatenus nec monopolii nec siliquatici nec aurariae
aliquid pensionis impendat uel quodlibet grauamen ex permissa nundinatione
sustineat. cur enim illud tardemus annuere, unde nulla possumus damna sentire?
XXXI. DROMONARIIS THEODERICUS REX.
<1> Publicis debent utilitatibus insudare qui nomen dedere militiae. quid enim
agat homo, si professo desit obsequio, ut nec commoda priuata reperiat nec
gloriam strenuitatis adquirat? et ideo comiti sacrarum largitionum nostra
praecepit auctoritas, ut in Hostiliensi loco constitui debeatis, quatenus
fiscali humanitate recreati excursus cum ueredariis per alueum Padi solito more
faciatis, ut diuiso labore equis publicis debeat subueniri, quando cursus uester
non atteritur, qui per uias liquidas expeditur. non enim uobis nimio labore
claudicare contingit, qui manibus ambulatis. uehiculum uestrum non sentit
iniuriam nec defectum patitur, quod unda potius currente portatur.
XXXII. SENATUI URBIS ROMAE THEODERICUS REX.
<1> Grate nobis est, patres conscripti, circa utilitates publicas impensa
deuotio, quia, dum ciuium laudabiles animos comprobamus, locum iustis beneficiis
repperimus. quid est enim tam senatorium quam si utilitatibus publicis impendat
affectum, ut possit patriae prodesse, cui natus est? <2> Vir itaque magnificus
atque patricius Decius, glorioso circa rem publicam amore deuinctus, ultro
postulauit uoto mirabili, quod uix potuisset sub consilio nostrae potestatis
imponi. paludem Decemnouii in hostis modum uicina uastantem fouearum ore
patefacto promisit absorbere, illam famosam saeculi uastitatem, quam sub
diuturnitate licentiae quoddam mare paludestre consedit cultisque locis inimicum
superfundens unda diluuium terrenam gratiam siluestri pariter horrore confudit.
nihil utile nutriens sub liquore spoliatum est solum fructibus, postquam
obnoxium coepit esse paludibus. <3> Et ideo miramur priscae confidentiae uirum,
ut quod diu uirtus publica refugit, manus priuata susceperit. hunc ergo audacem
laborem adgressurum se laudabili perfectione pollicitus est, ut, pereunte
damnoso gurgite, quae fuerant amissa ulterius non perirent. unde nostrae super
hac parte serenitatis postulat iussiones, ut auctoritate publica subeat opus
eximium, quod erit cunctis uiantibus profuturum. <4> Sed nos, patres conscripti,
quibus cordi est bonum desiderium iuuare auxiliaribus constitutis, praesentibus
decretis annuimus, ut ad loca ipsa Decemnouii duos ex uestro corpore dirigatis,
quibus arbitrantibus, quantum spatii restagnatis incursibus paludestris illuuies
occupauit, fixis terminus adnotetur, ut, cum ad perfectionem promissa
peruenerint, liberatori suo reddita terra proficiat nec quisquam inde aliquid
praesumat attingere, quod tam diu inuadentibus aquis non potuit uindicare.
XXXIII. DECIO V. I. PATRICIO THEODERICUS REX.
<1> Iustitiae ratio est, ut laudabile desiderium sequatur prosperitas iussionum
et quod bona uoluntate suscipitur, regalibus quoque hortationibus impleatur.
uobis itaque desideria iusta poscentibus praesenti auctoritate concedimus, ut
stagnis Decemnouii paludibusque siccatis sine fisco possideas in solum rura
reuocata nec ullam metuas liberatis rebus exhibere culturam, quas sub testimonio
generalitatis absoluimus. <2> Hinc etiam ad amplissimum senatum praecepta
transmisimus, ut definito nunc spatio ad tuum pulchre transeat dominium, quod
est a foedis gurgitibus uindicatum. aequum est enim, ut unicuique proficiat
labor suus et sicut expendendo cognoscit incommoda, ita rebus perfectis
consequatur augmenta. illud etiam, qui studio rei publicae semper inuigilamus,
aspeximus, ut, si quis hunc laborem iuncta tecum societate subire delegerit,
habita operis aestimatione habeat iuris proprii spatia pro parte quam suscipit,
ut nec solus immensis oneribus praegraueris et animosius peragatur, quod sub
collegii adiuuatione suscipitur. ita fiet ut et, quae rebus maximis est amica,
molesta careatur inuidia. <3> Quapropter gloriosis desideriis nauanter insiste,
ne opinioni tuae graue sit in assumptis conatibus marcuisse. intuere quippe
omnium ora atque oculos in te esse conuersos: respice serenitatis nostrae
suspensa iudicia ad effectum operis instituti. quanta uales animositate festina,
ut dignus tanta re emersisse iudiceris, qui iam nunc omnium admiratione
laudaris. XXXIIII.
ARTEMIDORO PRAEFECTO URBIS THEODERICUS REX.
<1> Gaudemus in te floruisse nostra iudicia: laetamur dignum praesulem Romanis
arcibus extitisse, qui generosis animis amicum fraudibus non passus es uelare
secretum, ne uos aut delicta complices facerent aut securitas ad maiora potius
incitaret. atquo ideo uniuersa pecunia, quae fuerat fabricis deputata Romanis et
nunc magnitudinis tuae discussione constitit abiuratam, cum nec reddita suo
tempore nec docetur expensa, resumatur sine aliqua dilatione uobisque
ordinantibus iterum Romanis moenibus applicetur. nefas est enim, ut in alios
usus transeant quae sibi subtracta non inmerito Roma suspirat. <2> Deberemus
itaque celatores deputatae pecuniae inmodica poena percellere, qui in tali causa
nostram munificentiam fraudauerunt. sed affuit moderatrix, semper quae nobis est
iuncta, clementia, ne indecore facta plecteremus grauiter incitante iustitia.
sufficiat nobis cupiditatem non implesse quod uoluit. nec maior potest prouenire
uindicta, quando uelut propria uidetur perdere, quae suppressa turpiter
iudicauerat possidere.
XXXV. TANCILAE V. S. THEODERICUS REX.
<1> Acerbum nimis est nostris temporibus antiquorum facta decrescere, qui
ornatum urbium cottidie desideramus augere. quocirca praesentibus te iussionibus
ammonemus, ut de Comensi ciuitate aeneam statuam quae perisse suggeritur, omni
animositate perquiras: spondens etiam centum aureos, si quis haec sacrilega
prodere furta maluerit, quatenus promissio nostrae serenitatis trepidos ad spem
confessionis inuitet, quod etiam ad te destinata edicta proloquuntur. sed cum
haec tamen iussa promulgaueris, si adhuc facinus secreta uelauerint, post diem
uenerabilem locorum artifices facias congregari: a quibus sub terrore perquire
quo ministro fuerit perpetratum. ab imperitis enim harum rerum statuae facilis
euersio non fuisset, nisi eam temptasset mouere loco magistra praesumptio.
XXXVI. EDICTUM. THEODERICUS REX.
<1> Quamuis ad proditionem sceleris relaxata nimis poena sufficiat nec parum sit
munus audaciae supplicii declinasse terrorem, addimus tamen praemium, quod
habere innocentia solet: non quia commissa placuerint, sed delectat nos
munificos esse in amore uindictae. <2> Quapropter praesentis edicti unusquisque
auctoritate cognoscat centum se aureos largitate nostra promereri, si prodat qui
statuam de Comensi ciuitate rapuerunt, et de suo facto, quod maxime nocens
requirit, indulgentiam se nouerit habiturum. damus in aeneo compendio aureum
munus: et metalla quam inuenire possumus pretiosiora largimur: illud potius hac
liberalitate redimentes, ne transeat in usum, quod constat esse prohibitum. <3>
Quis ergo tanta stultitiae caecitate damnetur, ut dubitet erumpere, quando et
securitatem repperit et praemium confessionis adquirit? si quis autem
dissimulandurn forte crediderit eumque aliquo ueritatis indicio serenitas nostra
detexerit, ultimo se nouerit discrimine rapiendum. indignum est enim ut qui
respuunt indulgentiam nostram, detectis postea suffragetur humanitas.
XXXVII. FAUSTO PPO THEODERICUS REX.
<1> Prouectum regni nostri benignitas debet aemulari, ut tnatum humanitas
relaxet dona, quantum res publica suscepit augmenta. non enim aliter laudatum
modum possumus custodire, nisi ad considerationem rerum nostrum debeamus
excitare propositum. inter tot enim cottidie deo propitiante successus
tenacitatis esset uitium angusta largitate contentum. atque ideo illustris
magnificentia tua praesenti auctoritate cognoscat Spoletinis ciuibus ad
exhibitionem thermarum supra consuetudinem aliam millenam esse deputandam.
cupimus enim libenter impendere quae ad salubritatem nouimus ciuium pertinere,
quia laudes sunt nostrorum temporum celebrata gaudia populorum.
XXXVIII. FAUSTO PPO THEODERICUS REX.
<1> Opes nostras cupimus thesauro pietatis augeri, execrantes commoda, quae
nobis uexatorum fuerint calamitatibus adquisita. molesta est illatio nostrae
clementiae quae defletur, quia quicquid sub laetitia penditur, accipientis
laudibus applicatur. <2> Urbis itaque Sipontinae negotiatores hostium se
asserunt depopulatione uastatos: et quia egentium leuamina nostras potius
diuitias aestimamus, illustris magnificentia uestra per hoc iuge biennium
nuncupatos nulla faciat coemptione uexari. <3> Sed quoniam lapsos releuasse
nihil proficit, si onus aliud solutionis accedit, qui memoratis negotiatoribus
noscuntur mutuasse pecuniam, celsitudo tua faciat ammoneri, ne in hoc biennii
spatio quicquam de credita summa existiment postulandum, quatenus sub induciis
supradictis et datam possint reparare pecuniam et aliquatenus debitorum ualeat
respirare substantia. quid enim proficit creditorem se urgere, quando in cassum
nititur nudatos exigere? quibus magis prospicimus, si ad mutuata sustinendo
peruenire faciamus.
XXXVIIII. ALOIOSO ARCHITECTO THEODERICUS REX.
<1> Si audita ueterum miracula ad laudem clementiae nostrae uolumus continere,
quoniam augmenta regalis gloriae sunt, cum sub nobis nulla decrescunt, quo
studio conuenit reparari quod etiam nostris oculis frequenter constat offerri?
delectat enim salutiferi Aponi meminisse potentiam, ut intellegas, quo desiderio
cupimus reficere quod de memoria nostra nescit exire. <2> Caerulum fontem
uidimus in formam dolii concauis hiatibus aestuantem et fornaces anhelantium
aquarum circumducto tereti labio naturae probabili dispositione coronatas: quae
licet more calidae nebulosos uapores exhalent, hanc tamen iucundam
perspicuitatem aspectibus humanis aperiunt, ut quiuis hominum illam gratiam
desideret contingere, etiam cum non ignoret ardere. ore plenissimo in sphaerae
similitudine supra terminos suos aquarum dorsa turgescunt, unde latex tanta
quiete defluit, tanta quasi stabilitate decurrit, ut eum non putes crescere,
nisi quia inde aliquid rauco murmure sentis exire. <3> Veniunt aquae per
algentes meatus tali feruore succensae, ut post recurua spatia, quae arte facta
sunt longiora, calores sint maximos redditurae. o magistri mirandum semper
ingenium, ut naturae furentis ardorem ita ad utilitatem humani corporis
temperaret, ut quod in origine dare poterat mortem, doctissime moderatum et
delectationem tribueret et salutem! iuuat uidere secretum, latices uapores
igneos exhalantes, amicum undis indesinenter ardorem, et calorem uenire decursu
riui, unde usualiter solebat extingui. merito dicunt philosophi elementa sibi
mutuis complexionibus illigari et mirabili coniungi foederatione, quae inter se
contraria intelleguntur uarietate pugnare. <4> Ecce madentem substantiam uapores
producere constat ignitos, quae mox ad thermarum aedificia decora peruenerit,
illisa cautibus unda descendens et aera sua qualitate succendit et tactu fit
habilis, cum recepta fuerit in lauacris: unde non tantum deliciosa uoluptas
adquiritur, quantum blanda medicina confertur. scilicet sine tormento cura, sine
horrore remedia, sanitas impunita, balnea contra diuersos dolores corporis
attributa. quae ideo Aponum Graeca lingua beneficialis nominauit antiquitas, ut
causam tanti remedii aeger cognosceret, cum de tali nomine dubium nil haberet.
<5> Sed inter alia loci ipsius bona illud quoque stupendum esse didicimus, quod
una fluentorum natura diuersis ministeriis uideatur accommoda. nam protinus saxo
suscipiente collisa inhalat primae cellulae sudatoriam qualitatem: deinde in
solium mitigata descendens minaci ardore deposito suaui temperatione mollescit:
mox in uicinum producta cum aliqua dilatione torpuerit, multo blandius
intepescit: postremo ipso quoque tepore derelicto in piscinam Neronianam frigida
tantum efficitur, quantum prius ferbuisse sentitur. <6> Non inmerito auctoris
sui participans nomen collega est cum uiriditate gemmarum, ut ipsa quoque uitrei
elementi colore perspicua quasdam trementes undas quieta commoueat. sed ut ipsum
quoque lauacrum mundius redderetur, stupenda quadam continentiae disciplina in
undam, qua uiri recreantur, si mulier descendat, incenditur, propterea quia et
ipsis altera exhibitio decora collata est: scilicet ne ardentium aquarum
fecundissimum locum non crederent habuisse, unde plurima largiretur, si uterque
sexus uno munere communiter uteretur. <7> Haec perennitas aquarum intellegendi
praestat indicium per igneas terrae uenas occultis meatibus influentem imitus in
auras erumpere excocti fontis inriguam puritatem. nam si naturae fuisset illud
incendium, sine interitu substantiae non esset amissum: sed aquae materia
sensibilis, sicut peregrinum contraxit ignem, sic iterum natiuum facile recepit
algorem. <8> Praestat et aliud adiutorii genus uis illa medicabilis. nam iuxta
caput fontis scintillosi quendam sibi meatum prouida natura formauit. hinc
desuper sella composita, quae humanis necessitatibus in apsidis speciem
perforatur, aegros suscipit interno umore diffluentes: ubi dum fessi nimio
languore consederint, uaporis illius delectatione recreati et lassa uiscera
reficiunt et umores noxia infusione largatos uitali ariditate constringunt: et
quasi aliquo desiderabili cibo refecti ualentiores queant protinus inueniri, sic
medicabili substantiae uenit a sulfure quod calet, a salsedine quod desiccat.
talia posteris non tradere hoc est grauiter in longa aetate peccare. <9>
Quapropter antiqua illic aedificiorum soliditas innouetur, ut siue in cuniculis
siue in thermis fuerit aliquid reparandum, te debeat imminente reconstrui.
uirgulta quoque noxia importunitate nascentia euulsis cespitibus auferantur, ne
radicum quidam capilli paulatim turgentes fabricarum uisceribus inserantur et
more uipereo prolem sibi fecunditate contraria nutriant, unde se compago casura
disrumpat. <10> Palatium quoque longa senectute quassatum assidua reparatione
corrobora. spatium, quod inter aedem publicam et caput igniti fontis interiacet,
siluestri asperitate depurga. rideat florenti gramine facies decora campestris:
quin etiam ardentis aquae fertilitate laetatur miroque modo dum proxime salem
generet sterilem, nutriat pariter et uirores. <11> Sed non his tantum beneficiis
Antenorea terra fecunda est: infert et alia, quae multo grandius obstupescas.
corda illa, ut ita dixerim, montium in uicem secretarii negotia contentiosa
discingunt. nam si quis forte pecus furatum pilis natiuis solito more spoliare
praesumpserit, undis ardentibus frequenter inmersum necesse est ut ante decoquat
quam emundare praeualeat. o uere secretarium iure reuerendum, quando in his
aquis non solum sensum, sed etiam uerum constat esse iudicium et quod humana
nequit altercatione dissolui, fontium datum est aequitate definiri. loquitur
illic tacita natura, dum iudicat, et sententiam quodam modo dicit, quae
perfidiam negantis excludit. <12> Sed quis ista conseruare neglegat, quamuis
plurima tenacitate sordescat? siquidem ornat regnum, quod fuerit singulariter
toto orbe nominatum. et ideo pecunia, quae tibi data est, si opus non potuerit
implere susceptum, quantum adhuc expendendum esse credideris, missis nobis
breuibus indicabis, quia non grauamur expendere, ut tanta uideamur ruris moenia
custodire.
XL. BOETHIO PATRICIO THEODERICUS REX.
<1> Cum rex Francorum conuiuii nostri fama pellectus a nobis citharoedum magnis
precibus expetisset, sola ratione complendum esse promisimus, quod te
eruditionis musicae peritum esse noueramus. adiacet enim uobis doctum eligere,
qui disciplinam ipsam in arduo collocatam potuistis attingere. <2> Quid enim
illa praestantius, quae caeli machinam sonora dulcedine modulatur et naturae
conuenientiam ubique dispersam uirtutis suae gratia comprehendit? quicquid enim
in conceptum alicuius modificationis existit, ab harmoniae continentia non
recedit. per hanc competenter cogitamus, pulchre loquimur, conuenienter mouemur:
quae quotiens ad aures nostras disciplinae suae lege peruenerit, imperat cantum,
mutat animos artifex auditus, <3> et operosa delectatio haec cum de secreto
naturae tamquam sensuum regina tropis suis ornata processerit, reliquae
cogitationes exiliunt omniaque facit eici, ut ipsam solummodo delectet audiri.
tristitiam noxiam iucundat, tumidos furores attenuat, cruentam saeuitiam efficit
blandam, excitat ignauiam soporantem languore, uigilantibus reddit saluberrimam
quietem, uitiatam turpi amore ad honestum studium reuocat castitatem, sanat
mentis taedium bonis cogitationibus semper aduersum, perniciosa odia conuertit
ad auxiliatricem gratiam et quod beatum genus curationis est, per dulcissimas
uoluptates expellit animi passiones. <4> Incorpoream animam corporaliter mulcet
et solo auditu ad quod uult deducit, quam tenere non praeualet uerbo: tacitus
manibus clamat, sine ore loquitur et per insensibilium obsequium praeualet
sensuum exercere dominatum. hoc totum inter homines quinque tonis agitur, qui
singuli prouinciarum ubi reperti sunt nominibus uocitantur. miseratio quippe
diuina localiter sparsit gratiam, dum omnia sua ualde fecit esse laudanda.
Dorius prudentiae largitor et castitatis effector est. Phrygius pugnas excitat,
uotum furoris inflammat. Aeolius animi tempestates tranquillat somnumque iam
placatis attribuit. Iastius intellectum obtusis acuit et terreno desiderio
grauatis caelestium appetentiam bonorum operator indulget. Lydius contra nimias
curas animae taediaque repertus remissione reparat et oblectatione corroborat.
<5> Hoc ad saltationes corruptibile saeculum flectens honestum remedium turpe
fecit esse commentum. hic uero numerus quinarius trina diuisione consistit.
omnis enim tonus habet summum et imum: haec autem dicuntur ad medium. et quoniam
sine se esse non possunt quae alterna sibi uicissitudine referuntur, utiliter
inuentum est artificialem musicam, id est auctorum operationibus diuersis
organis exquisitam, modis quindecim contineri. <6> His rebus aliquid maius
adiciens humana sollertia terris quandam harmoniam doctissima inquisitione
collegit, quae diapason nominatur, ex omnibus scilicet congregata, ut uirtutes,
quas uniuersum melos habere potuisset, haec adunatio mirabilis contineret. hinc
Orpheus mutis animalibus efficaciter imperauit uagosque greges contemptis
pascuis ad audiendi epulas potius inuitauit. illo cantante amauerunt siccas
Tritones terras: Galatea lusit in solidis: deseruerunt ursi amabiles siluas:
leones domestica tandem canneta reliquerunt: iuxta praedonem suum praeda
gaudebat. in unum conuentum contraria uota collecta sunt et fide dicente lyra
omnia sibi aduersa crediderunt. <7> Amphion quoque Dircaeus canendo chordis
Thebanos muros dicitur condidisse, ut, cum homines labore marcidos ad studium
perfectionis erigeret, saxa ipsa crederentur relictis rupibus aduenisse. Musaeum
etiam, et artis Orphei filium et naturae, Maronis praepotens lingua concelebrat,
dicens apud inferos in summa beatitudine constitutum, quod per Elysios campos
felices animas septem chordarum pulsibus amoenabat, significans summo praemio
perfrui, cui disciplinae huius contigerit suauitatibus epulari. <8> Sed haec
omnia humano studio per manualem musicam uidentur effecta. naturalis autem
rhythmus animatae uoci cognoscitur attributus: qui tunc melos pulchre custodit,
si apte taceat, congruenter loquatur et per accentus uiam musicis pedibus
composita uoce gradiatur. inuenta est quoque ad permouendos animos oratorum
fortis ac suauis oratio, ut criminosis irascantur iudices, misereantur
errantibus: et quicquid potest eloquens efficere, ad huius disciplinae non est
dubium gloriam pertinere. <9> Poetis etiam, Terentiano testante, duo primum
metra principalia sunt tributa, id est heroicum et iambicum, unum quod erigeret,
alterum quod placaret. ex quibus ad oblectandos animos audientum diuersa
progenita sunt et ut in organis toni, ita in humana uoce uarias animi
affectiones grauida metra pepererunt. <10> Sirenas in miraculum cantasse curiosa
prodit antiquitas et quamuis nauigantes fluctus abduceret, carbasa uentus
inflaret, eligebant suauiter decepti scopulos incurrere, ne tantam paterentur
dulcedinem praeterire. quibus solus Ithacus euasit, qui nautis sollicitatorem
protinus obstruxit auditum. contra noxiam dulcedinem cogitauit uir
prudentissimus felicissimam surditatem et quam uincere intellegendo non
poterant, melius non aduertendo superabant. se uero soliditati arboris
constrictis nexibus illigauit, ut et famosos cantus liberis auribus probare
potuisset et pericula dulcisonae uocis unda rapiente uinctus euaderet. <11>
Verum ut et nos talia exemplo sapientis Ithaci transeamus, loquamur de illo
lapso caelo psalterio, quod uir toto orbe cantabilis ita modulatum pro animae
sospitate composuit, ut his hymnis et mentis uulnera sanentur et diuinitatis
singularis gratia conquiratur. en quod saeculum miretur et credat: pepulit
Dauitica lyra diabolum: sonus spiritibus imperauit: et canente cithara rex in
libertatem rediit, quem internus inimicus turpiter possidebat. <12> Nam licet
huius delectationis organa multa fuerint exquisita, nihil tamen efficacius
inuentum est ad permouendos animos quam concauae citharae blanda resultatio.
hinc etiam appellatam aestimamus chordam, quod facile corda moueat: ubi tanta
uocum collecta est sub diuersitate concordia, ut uicina chorda pulsata alteram
faciat sponte contremiscere, quam nullum contigit attigisse. tanta enim uis est
conuenientiae, ut rem insensualem sponte se mouere faciat, quia eius sociam
constat agitatam. <13> Hinc diuersae ueniunt sine lingua uoces: hinc uariis
sonis efficitur quidam suauissimus chorus, illa acuta nimia tensione, ista
grauis aliqua laxitate, haec media tergo blandissime temperato, ut homines se ad
tantam perducere non praeualeant unitatem, in quantam ad socialem conuenientiam
ratione carentia peruenerunt. ibi enim quicquid excellenter, quicquid
ponderatim, quicquid rauce, quicquid purissime aliasque distantias sonat, quasi
in unum ornatum constat esse collectum, et ut diadema oculis uaria luce
gemmarum, sic cithara diuersitate soni blanditur auditui. <14> Musarum tela
loquax, stamina uerbosa, fila canentia, in quibus arguto plectro tegitur quod
dulciter audiatur. hanc igitur ad imitationem uariae testudinis Mercurius
dicitur inuenisse, quam tanta utillima procurantem astronomi inter stellas
requirendam esse putauerunt, persuadentes caelestem esse musicam, quando lyrae
formam comprehendere potuerunt inter sidera collocatam. <15> Harmonia uero caeli
humano sermone idonee non potest explicari, quam ratio tantum animo dedit, sed
auribus natura non prodidit. dicunt enim debere credi, ut beatitudo caelestis
illis oblectationibus perfruatur, quae nec fine deficit nec aliqua intermissione
marcescit. in ipso quippe intellectu habitare referunt superna, ipsis deliciis
caelestia perfrui et talibus contemplationibus inhaerentia beatis iugiter
delectationibus contineri. <16> Bene quidem arbitrati, si causam caelestis
beatitudinis non in sonis, sed in creatore posuissent, ubi ueraciter sine fine
gaudium est, sine aliquo taedio manens semper aeternitas, et inspectio sola
diuinitatis efficit, ut beatius esse nil possit. haec ueraciter perennitatem
praestat, haec iucunditates accumulat: et sicut praeter ipsam creatura non
extat, ita sine ipsa incommutabilem laetitiam habere non praeualet. <17> Sed
quoniam nobis facta est uoluptuosa digressio, quia semper gratum est de doctrina
colloqui cum peritis, citharoedum, quem a nobis diximus postulatum, sapientia
uestra eligat praesenti tempore meliorem, facturus aliquid Orphei, cum dulci
sono gentilium fera corda domuerit. et quantae nobis gratiae fuerint actae,
tantae uobis et nostrae aequabili compensatione referuntur, qui et imperio
nostro paretis et quod uos clarificare possit, efficitis.
XLI. LUDUIN REGI FRANCORUM THEODERICUS REX.
<1> Gloriosa quidem uestrae uirtutis affinitate gratulamur, quod gentem
Francorum prisca aetate residem feliciter in noua proelia concitastis et
Alamannicos populos caesis fortioribus inclinatos uictrici dextera subdidistis.
sed quoniam semper in auctoribus perfidiae resecabilis uidetur excessus nec
primariorum plectibilis culpa omnium debet esse uindicta, motus uestros in
fessas reliquias temperate, quia iure gratiae merentur euadere, quos ad parentum
uestrorum defensionem respicitis confugisse. estote illis remissi, qui nostris
finibus celantur exterriti. <2> Memorabilis triumphus est Alamannum acerrimum
sic expauisse, ut tibi eum cogas de uitae munere supplicare. sufficiat illum
regem cum gentis cecidisse superbia: sufficiat innumerabilem nationem partim
ferro, partim seruitio subiugatam. nam si cum reliquis confligis, adhuc cunctos
superasse non crederis. accipe in talibus causis frequenter expertum: illa mihi
feliciter bella prouenerunt, quae moderato fine peracta sunt. is enim uincit
assidue qui nouit omnia temperare, dum iucunda prosperitas illis potius
blanditur, qui austeritate nimia non rigescunt. cede itaque suauiter genio
nostro, quod sibi gentilitas communi remittere consueuit exemplo. sic enim fit,
ut et meis petitionibus satisfecisse uideamini nec sitis solliciti ex illa
parte, quam ad nos cognoscitis pertinere. <3> Quocirca salutantes honore et
affectione, qua dignum est, illum et illum legatos nostros ad excellentiam
uestram consueta caritate direximus, per quos et sospitatis uestrae indicium et
speratae petitionis consequamur effectum. quaedam uero, quae ad nos pro uestris
utilitatibus peruenerunt, per harum portitores uerbo uobis insinuanda
commisimus, ut cautiores effecti optata possitis uictoria constanter expleri.
uestra siquidem salus nostra gloria est et totiens regnum Italiae proficere
iudicamus, quotiens de uobis laeta cognoscimus. <4> Citharoedum etiam arte sua
doctum pariter destinauimus expetitum, qui ore manibusque consona uoce cantando
gloriam uestrae potestatis oblectet: quem ideo fore credimus gratum, quia uos
eum iudicastis magnopere dirigendum.
LIBER TERTIUS.
I. ALARICO REGI VVISIGOTHARUM THEODERICUS REX.
<1> Quamuis fortitudini uestrae confidentiam tribuat parentum uestrorum
innumerabilis multitudo, quamuis Attilam potentem reminiscamini VVisigotharum
uiribus inclinatum, tamen quia populorum ferocium corda longa pace mollescunt,
cauete subito in aleam mittere quos constat tantis temporibus exercitia non
habere. <2> Terribilis est hominibus conflictus, si non sit assiduus et nisi usu
praesumatur, concertandi subito fiducia non habetur. absit ut uobis aliquid
indignatio caeca subripiat. moderatio prouida est, quae gentes seruat: furor
autem instantia plerumque praecipitat et tunc utile solum est ad arma
concurrere, cum locum apud aduersarium iustitia non potest inuenire. <3>
Quapropter sustinete, donec ad Francorum regem legatos nostros dirigere
debeamus, ut litem uestram amicorum debeant amputare iudicia. inter duos enim
nobis affinitate coniunctos non optamus aliquid tale fieri, unde unum minorem
contingat forsitan inueniri. non uos parentum fusus sanguis inflammat, non
grauiter urit occupata prouincia: adhuc de uerbis parua contentio est: facillime
transigitis, si non per arma uestros animos irritetis. obiciamus quamuis cognato
cum nostris coniuratis eximias gentes iustitiamque, quae reges efficit
fortiores: cito conuertit animos, qui contra se tales sentit armatos. <4> Et
ideo salutationis honorificentiam praelocuti legatos nostros illum atque illum
ad uos credidimus esse dirigendos, qui uobis et mandata nostra sufficienter
insinuent et usque ad fratrem nostrum Gundibadum uel alios reges cum uestra
uoluntate deproperent, ne uideamini eorum inmissione laborare, qui maligne
gaudent alieno certamine. auertant enim diuina, ut supra uos iniquitas illa
praeualeat. commune malum uestrum iudicamus inimicum. nam ille me iure
sustinebit aduersum, qui uobis nititur esse contrarius.
II. GUNDIBADO REGI BURGUNDIONUM THEODERICUS REX.
<1> Graue malum est inter caras regiasque personas uoluntates sibimet uidere
contrarias et dissimulando spectare, ut de uno aliquid dolendum possit emergere.
non sine inuidia nostra geritur, si nobis patientibus affinium clade dimicetur.
habetis omnes per me pignora magnae gratiae: non est unus ab alio segregatus: si
quid in uobis delinquitis, meo grauiter dolore peccatis. <2> Nostrum est regios
iuuenes obiecta ratione moderari, quia illi, si nobis uere sentiunt displicere
quod male cupiunt, audaciam suae uoluntatis retinere non possunt. uerentur
senes, quamuis sint florida aetate feruentes. sciant nos aduersarios esse
contrarietatibus suis et illud uelle persequi, ne ab utrisque possit excedi.
decet enim nos aspera uerba dicere, ne affines nostri ad extremum debeant
peruenire. <3> Et ideo illum et illum legatos ad fraternitatem tuam credidimus
destinandos, ut, si filio nostro Alarico uisum fuerit, ad regem Francorum cum
coniuratis nobis gentibus dirigere debeamus, quatenus causa, quae inter eos
uertitur, amicis mediis rationabiliter abscidatur. conuenit enim tales tantosque
reges non inter se lamentabiles rixas quaerere, ut de suis et nos possint
casibus sauciare. <4> Quapropter fraternitas uestra adhibito mecum studio eorum
nitatur reparare concordiam: quia nemo potest credere sine nostro uoto illos ad
haec proelia peruenisse, nisi omnino clareat, ne ad conflictum ueniant, nostra
potius esse certamina. aliqua uero a praesentium gerulis litterarum sermone
uobis commisimus intimanda, ut sic prudentia uestra cuncta componat, quemadmodum
consueuit deo iuuante perficere, unde solet diligentissime cogitare.
III. EPISTULA UNIFORMIS TALIS AD ERULORUM REGEM: AD GUARNORUM REGEM: AD
THORINGORUM REGEM THEODERICUS REX.
<1> Superbiam diuinitati semper exosam persequi debet generalitatis assensus.
nam qui uult opinabilem gentem uoluntaria iniquitate subuertere, non disponit
ceteris iusta seruare. pessima consuetudo est despicere ueritatem. credit sibi
omnia cedere, si elatum contigerit in abominabili certamine superare. <2> Et
ideo uos, quos conscia uirtus erigit et consideratio detestabilis praesumptionis
accendit, legatos uestros una cum meis et fratris nostri Gundibadi regis ad
Francorum regem Luduin destinate, ut aut se de VVisigotharum conflictu
considerata aequitate suspendat et leges gentium quaerat aut omnium patiatur
incursum, qui tantorum arbitrium iudicat esse temnendum. quid quaerit ultra, cui
offertur absoluta iustitia? dicam plane quod sentio: qui sine lege uult agere,
cunctorum disponit regna quassare. <3> Sed melius inter initia perniciosa
reprimatur assumptio, ut sine labore perficiatur omnium, quod certamen esse
poterat singulorum. recolite namque Eurici senioris affectum, quantis uos iuuit
saepe muneribus, quotiens a uobis proximarum gentium imminentia bella suspendit.
reddite filio eius gratiam, quam tamen agnoscitis uestris utilitatibus
attributam. nam si tanto regno aliquid praeualuerit, uos aggredi sine
dubitatione praesumit. <4> Quapropter excellentiam uestram epistulari sermone
salutantes per legatos nostros illum et illum praesentium portitores uerbo uobis
aliqua dicenda commisimus, ut uos, qui nostrum sequimini deo iuuante dispositum,
unus complectatur assensus et foris hoc agatis, ne in uestris prouinciis
dimicare possitis.
IIII. LUDUIN REGI FRANCORUM THEODERICUS REX.
<1> Ideo inter reges affinitatis iura diuina coalescere uoluerunt, ut per eorum
placabilem animum proueniat quies optata populorum. hoc enim sacrum est, quod
nulla permittitur commotione uiolari. nam quibus obsidibus habeatur fides, si
non credatur affectibus? sociantur proximitate domini, ut nationes diuisae
simili debeant uoluntate gloriari et quasi per alueos quosdam concordiae adunata
se possint gentium uota coniungere? <2> Quae cum ita sint, miramur animos
uestros sic causis mediocribus excitatos, ut cum filio nostro rege Alarico
durissimum uelitis subire conflictum, ut multi, qui uos metuunt, de uestra
concertatione laetentur. ambo estis summarum gentium reges, ambo aetate
florentes. non leuiter regna uestra quassatis, si data partibus libertate
confligitis. uirtus uestra patriae non fiat inopinata calamitas, quia grandis
inuidia est regum in causis leuibus grauis ruina populorum. <3> Dicam libere,
dicam affectuose quod sentio: impatiens sensus est ad primam legationem arma
protinus commouere. a parentibus quod quaeritur, electis iudicibus expetatur.
nam inter tales uiros et illis gratum est dare, quos medios uolueritis efficere.
quid de nobis uos ipsi aestimare poteritis, si nos intentiones uestras
reliquisse cognoscitis? absit ille conflictus, ubi unus ex uobis dolere poterit
inclinatus. abicite ferrum, qui in meum pugnare uultis opprobrium. <4> Iure
patris uobis interminor et amantis. ille nos et amicos nostros patietur
aduersos, qui talia monita, quod non opinamur, crediderit esse temnenda.
quapropter ad excellentiam uestram illum et illum legatos nostros magnopere
credidimus dirigendos, per quos etiam ad fratrem uestrum, filium nostrum regem
Alaricum scripta nostra direximus, ut nullatenus inter uos scandala seminet
aliena malignitas: sed in pace perseuerantes, quae sunt mediis amicis
placabiliter finire debeatis. <5> Per eos etiam et uerbo uobis aliqua dicenda
mandamus, ut gentes, quae sub parentibus uestris longa pace floruerunt, subita
non debeant concussione uastari. illi enim credere debetis, quem uestris
utilitatibus arridere cognoscitis, quoniam qui uult alterum in praecipites casus
mittere, eum certum est fideliter non monere.
V. INPORTUNO V. I. PATRICIO THEODERICUS REX.
<1> Si te aut nobilitas sola decoraret aut meritorum tantum laude polleres,
conferendas forsitan dignitates dilatione probabili libraremus, ne magna
uilescerent, cum simul omnia funderentur. nunc autem cum te uniuersa facto
agmine comitentur nec desit uni quod praedicatur in plurimis, conuenit iustitiae
nostrae, ut, cum tu copiosa bona protuleris, uberrime te repleat munificentia
principalis. <2> Non enim crescendi uobis hic ordo qui multis est: paulatim
prouehi mediocris probatur esse uirtutis, dum morosius agnoscitur quod sub
lenitate praeparatur. saltu quodam se tendit uestra prosperitas solaque a uobis
perfectio quaeritur, cum uobiscum multa nascantur. elaboratae sunt enim longa
aetate uestri generis dignitates, quae notissimo quodam habitaculo lares in
uestra posuere familia. <3> Nam, ut prisca saecula transeamus, quae affatim
uiros uisa sunt proferre praecipuos, gemino radias patris ac patrui decore
conspicuus: qui non solum ornamentum familiae suae, sed ipsi decus senatui
praestitere: modernis saeculis moribus ornabantur antiquis: bonitate praediti,
constantia gloriosi, in amicitiam proni, ad odia sumenda difficiles. ita, quod
maximum felicitatis genus est, cum multae probarentur esse potentiae, inuidiam
illos persequentium contigit non habere. <4> Pendebant quin immo circa eos anxia
uota ciuitatis, crescens supra priuatos publicus amor. eorum senatus animum,
eorum sequebatur turba propositum: et necesse erat Romam uelle quod cuncti
uidebantur optare, miroque prosperitatis euentu firmum circa eos custodiebat
arbitrium uoluntas uaga populorum, quod inter ceteras dignitates munus iudicamus
esse praecipuum. nam si paucorum amor iuste iam gloria est, tantae ciuitatis
affectus quod potest habere praeconium? proinde sicut omnia ingrata uidentur
obscura, sic generaliter dilecta praeclara sunt. <5> Tot igitur parentum laude
decoratus tu etiam morum luce conspicuus sume post consulares fasces emeritos
patriciatus insignia, tuarum munus plenarium dignitatum et cani honoris infulis
adultam cinge caesariem, qui meritorum laude aetatis praeiudicia superasti. cur
enim tardo euenirent praemia, cui tot generis suffragabantur exempla? eligitur
quippe in te nascendi laus, uiuendi gloria: et cum multa trahas ab antiquis,
meruisti placere de propriis. <6> Ab ipso quippe uitae principio, quod inter
adulantium greges rarum solet esse, nobilibus studuisti fidem uirtutibus
exhibere. atque ideo instituti tui firma uestigium, ut qui primaeuus gloriam
consecutus es, florentibus annis gloriosis honoribus augearis. inspice denique,
quanta tuorum praecipua laude decoreris. culpae genus est non te fecisse quod
summum est. de maturitate quippe tua multo debent uenire meliora, qui in aetate
tenera te nouimus fecisse praedicanda. confidimus enim nec tui generis
institutum nec nostrum circa te errare posse iudicium.
VI. SENATUI URBIS ROMAE THEODERICUS REX.
<1> Gratum quidem nobis est, patres conscripti, personae nouas ad honorum celsa
perducere. delectat peregrini germinis uiros gremio Libertatis inserere, ut
uariis frondescat senatus aula uirtutibus. ornat enim talis multitudo conuentum
et laetam reddit faciem publicam honorata frequentia. sed multo nobis probatur
acceptius, quotiens dignitatibus reddimus qui de ipsa curiae claritate
nascuntur, quia non sunt de uobis examina nostra sollicita, dum praeiudicata
bona transfunditis qui merita cum luce praestatis. origo ipsa iam gloria est:
laus nobilitati connascitur. idem uobis est dignitatis quod uitae principium.
senatus enim honor amplissimus uobiscum gignitur, ad quem uix maturis aetatibus
peruenitur. <2> Haec licet de uobis omnibus ueraciter iudicemus, ut ordinis
genium complectatur gratia senatorum, maxime serenitatis nostrae luminibus
Deciorum sanguis irradiat, qui tot annis continuis similis splendet claritate
uirtutis: et quamuis rara sit gloria, non agnoscitur in tam longo stemmate
uariata. saeculis suis producit nobilis uena primarios: nescit inde aliquid
nasci mediocre: tot probati quot geniti, et, quod difficile prouenit, electa
frequentia. en pullulat ex uno germine quadrifarium decus, honor ciuium, gloria
generis, augmentum senatus, qui quamuis fulgeant communione meritorum, inuenies
tamen quem possis laudare de propriis. <3> Respicite certe iuuenem per formae
gratiam, mentis pulchritudine plus placentem. refert facie sanguinis decus,
proditur animi natura per uultum et serenitate corporis nubila quoque mentis
abstergit. uerum haec naturae bona litterarum decorauit insignibus, ut cote
magnarum artium detersus mentis penetralibus plus luceret. in libris ueterum
Decios cognouit antiquos nobilemque progeniem gloriosae mortis beneficio
uiuentem. <4> Felicissimus profecto studiorum labor, cui priscorum carmen
contigit discere per parentes et de auita laude primordia teneri pectoris
erudire. libet referre quam magno tunc spectaculo totius scholae in eum
conuertebatur aspectus: quasi cam audiret parentem, illa mox intendebat heredem
quaerens, at quae auctorem cognouerat dicere, per huius posset similitudines
approbare. <5> Nam sicut indigna posteritas laudes antiqui generis abnegat, ita
praeclara de patribus egregie dicta confirmat. creditum est de his omne quod
legitur, dum praeconia ueterum praesens docuit uena uirtutum, in auditorii
officina ingeniorum flamma recalente. his quidem formabatur exemplis, sed
domesticis felicius producebatur imperiis. <6> Subtracto enim solacio maritali
onus regendi mater gloriosa suscepit, quam nec ampla patrimonii cura nec tot
filiorum potuit turbare custodia. aluit nutrimentis, auxit patrimoniis, ornauit
honoribus et quot edidit familiae iuuenes, tot reddidit curiae consulares. haec
igitur rimator morum noster sensus inspexit, qui etiam bonum domesticae uirtutis
inquirit, ut inter priuata laudatis publica debeat ornamenta largiri. <7> Atque
ideo, patres conscripti, illustri et magnifico uiro Importuno patriciatus culmen
indulsimus, ut uester coetus, sicut pullulat sorte nascendi, ita et fascibus
possit augeri. impendite parenti gratiam, adunate sententias: uestra est
indoles, quam probamus. habetis certe quod uobis ingeniosa laude tribuatis, si
amore necessitudinum publicum faciatis esse iudicium et quod pro naturae
caritate dependitur, collatum nostris iussionibus aestimetur.
VII. IANUARIO VIRO VENERABILI EPISCOPO SALONITANO THEODERICUS REX.
<1> Omnes quidem iustitiam colere et obseruare praecipimus, sed eos maxime qui
diuinis honoribus eriguntur, ut supernae gratiae fiant proximi, dum a terrena
fuerint cupiditate longinqui. Iohannes itaque flebili nos allegatione pulsauit
sanctitatem uestram a se sexaginta orcas olei ad implenda luminaria suscepisse,
quarum pretium sibi postulat oportere restitui. bonum quidem uotum, si tamen non
ibi aliquid misceatur aduersum. <2> Nam licet ubique deceat iustitiam custodiri,
in illis rebus maxime necessaria est, quae diuinis obtutibus offeruntur, ne
putemus ignorare deum, unde accipiat, si fraudatis oblationibus adquiescat. et
ideo, si ueram querimoniam cognoscitis supplicantis, consideratione iustitiae,
quam sancta lege praedicatis, facite quae iure debentur sine tarditate restitui:
quatenus nullus ingemiscat illata sibi per uos fuisse dispendia, quos decet
potius praestare iuuamina. quapropter studete, ut, qui non soletis pro rebus
magnis excedere, nunc non uideamini, quod absit, in paruitate peccare.
VIII. VENANTIO V. S. CORRECTORI LUCANIAE ET BRUTTIORUM THEODERICUS REX.
<1> Iustitiae ratio persuadet ab unoquoque postulari quod ei constat iniungi et
pecunias publicas instanter quaerere, ne debitorem neglectus debeat ingrauare.
nam si remissio in ammonitionibus ueniat, cunctos necesse est contemptus
inuoluat. et quodam modo nascitur de pietate crudelitas, si quem neglegis
ammonere, postea cogaris exigere. utilis ergo cura est praedicere, quando et
occasio subtrahitur delictis et locus emundatur illicitis. <2> Quapropter
illustris uiri comitis sacrarum largitionum suggestione comperimus pridem tibi
secundum morem ueterem exactionem binorum et ternorum fuisse delegatam. unde te
praesentibus commonemus affatibus, ut secundum canonicariae fidem tempora debeas
constituta complere, ne, quicquid dispendii assis publicus sustinuerit, de
proprio exsoluere tu cogaris, a quo nec tantae iussioni est habita reuerentia
nec fides suae promissionis impleta.
VIIII. POSSESSORIBUS DEFENSORIBUS ET CURIALIBUS ESTUNIS CONSISTENTIBUS
THEODERICUS REX.
<1> Propositi quidem nostri est noua construere, sed amplius uetusta seruare,
quia non minorem laudem de inuentis quam de rebus possumus adquirere custoditis.
proinde moderna sine priorum imminutione desideramus erigere: quicquid enim per
alienum uenit incommodum, nostrae iustitiae non probatur acceptum. <2> In
municipio itaque uestro sine usu iacere comperimus columnas et lapides
uetustatis inuidia demolitos: et quia indecore iacentia seruare nil proficit, ad
ornatum debent surgere rediuiuum quam dolorem monstrare ex memoria praecedentium
saeculorum. <3> Atque ideo praesenti auctoritate decernimus, ut, si uera fides
est suggerentium nec aliquid publico nunc ornatui probatur accommodum, supra
memoratas platonias uel columnas ad Rauennatem ciuitatem contradat modis omnibus
deuehendas: ut conlapsis metallis oblitterata facies reddatur iterum de arte
pulcherrima et quae situ fuerant obscura, antiqui nitoris possint recipere
qualitatem.
X. FESTO V. I. PATRICIO THEODERICUS REX.
<1> Decet prudentiam uestram in augendis fabricis regalibus obtemperare
dispositis, quia nobilissimi ciuis est patriae suae augmenta cogitare, maxime
cum sit studii nostri illa decernere, quibus cunctos notum est sine suis
dispendiis oboedire. <2> Atque ideo magnitudini tuae praesenti ammonitione
declaramus, ut marmora, quae de domo Pinciana constat esse deposita, ad
Rauennatem urbem per catabolenses uestra ordinatione dirigantur. subuectum uero
direximus de praesenti, ne aut mora nostris ordinationibus proueniret aut
laborantes aliqua detrimenta sentirent.
XI. ARGOLICO V. I. PRAEFECTO URBIS THEODERICUS REX.
<1> Optamus cunctum diem plenum beneficiis nostris excurrere: optamus ubique
praestita nostra radiare, quia in aeuum uiuit quod munificentia principalis
indulserit. quid enim tam regium quam fecisse felicem et eo usque praestare, quo
se erectus stupeat attigisse? beneficia siquidem sunt, quae regna sublimant et
libertatis dominus iugiter potest crescere, si sibi subiectos studeat ampliare.
hoc mansuetudinis nostrae glorioso proposito, quoniam generalitatem patrio
fouemus affectu, per indictionem quartam praefecturae urbanae infulas tibi
copiosa liberalitate largimur, ut paternis honoribus successio clara laetetur et
sub nobis possit proficere quicquid meruit ad nostra saecula peruenire. <2>
Circuminspice itaque quam magnum sit primordiis tuis canam Romam potuisse
committi, ut in illo amplissimo coetu iudicis uidearis eminere suggestu, ubi est
arduum uel ipsum obtinere collegium. stude ergo, ut a meritis tuis exigere
possis quod nos praestitisse cognoscis. auara fuge, iusta sequere, modesta
dilige, iracunda contemne. <3> Quid erit suauius quam in illa turba summorum
nobile protulisse iudicium, ubi tot patriciorum corda prouocantur ad gratiam,
ubi bonum factum celebretur ore sapientum? nusquam maiore laude uirtus agitur,
quam si recte Roma tractetur. quas diuitias aestimes aptiores quam in oculis
senatus conscientiae pretiosam gerere puritatem et ante ipsum Libertatis gremium
nullis uitiis esse captiuum? <4> Viderimus, reliqui fasces qua gloria
censeantur: urbanus praesul dignitas est honorum. non patitur claritas illa
committere, quod possit nobilis turba nescire. locatus in medium cunctorum ad se
trahit aspectum et totius uitae iudicium promulgat fama populorum. haec te et
animo concipere et rebus euidentibus explicare credibile apud nos faciunt studia
litterarum, ubi cognouisti omne quod deceat et ad usum uitae gloriosae animum,
doctorum nimirum institutione, formasti. <5> Fugiat ergo doctrina delictum.
indocilis est animi ad uitia trahi: aedificatus libris locum non relinquit
iniuriis, ubi in teneris annis adquiritur, quod matura aetate seruetur. ad
tramitem recti hortentur te tuorum facta seniorum, ammoneat lectionis
auctoritas, deinde iudicii nostri electio gloriosa, ut maiora sumere de nobis
possis, cum te ea quae commisimus implere cognoueris.
XII. SENATUI ROMANO THEODERICUS REX.
<1> Amamus, patres conscripti, dignitates eximias de nostra benignitate
nascentes. publici enim decoris mater est mens regentis et quale fuerit
dominantis arbitrium, talem parit libertatis aspectum. facilius est quippe, si
dicere fas est, errare naturam quam dissimilem sui princeps possit formare rem
publicam. hinc est quod cupimus, ut perpetuis honoribus fulgeatis, quia quicquid
de uobis fama loquitur, nostris institutionibus applicatur. nam cum omnia celsa
mereamini, nostram inuidiam tangit, si quid uobis fortasse defuerit. <2>
Proinde, quod felicibus sanciatur auspiciis, illustrem Argolicum praefecturae
urbanae dignitate promouemus, ut et ille augeatur fascibus et uobis tanti
iudicis minime subtrahatur ornatus. scitis enim saepe ex hac familia uiros
enituisse praecipuos. recordamini prouecti auum praefecti dogmatis honore
ditatum, cuius innoxiam facundiam fora mirata sunt. studuit uero, cum abundaret
eloquio, sciens dicendi peritum debere esse puritate conspicuum. his meritis ad
honorum celsa perductus, largitiones sacras protexit fida custodia, implens
etiam doctrina quam susceperat magisterii dignitatem, ita in utroque laudatus,
ut in singulis crederetur esse praecipuus. <3> Accedit etiam prouecti
nobilissimus pater, qui comitiuae priuatarum infulas nullius calumniae
acerbitate profanauit, qui affectans famae commoda, pecuniae neglexit augmenta
et, quod rarum uirtutis exemplum est, his egit temporibus continentem, quibus
crimen auaritia non habebat. principis enim propositum facit aut neglegere
iudices aut amare uirtutes. tot igitur originis documenta praemittens credamus
bona de nobili: quia laudabilis uena seruat originem et fideliter posteris
tradit, quae in se gloriosa transmissione promeruit. fauete ergo, patres
conscripti, uestris dignitatibus consecrato, ut ad maiora uirtutum desideria
concitetis quos nos munerum prouocamus exemplis.
XIII. SUNHIVADO V. S. THEODERICUS REX.
<1> Laborum tuorum longa seruitia et exploratae fidei multa documenta hoc nobis
iudicium tradunt, ut qui tuos animos moderatus es, nunc alienis moribus
praeferaris et praestes prouinciae disciplinam, qui priuatus amasti
continentiam. is enim potest alios bene regere, qui se studuit sub decore
tractare. Samnitarum itaque supplicatione permoti hoc remedio laborantibus
credidimus subuenire, si spectabilitatem tuam iuberemus ad finienda iurgia
proficisci. <2> Unde nunc enitere, ut tam bono iudicio laudabili respondeas
instituto, aptumque te nostris praebe mandatis, qui hactenus propria sponte
placuisti. intra prouinciam itaque Samnii si quod negotium Romano cum Gothis est
aut Gotho emersit aliquod cum Romanis, legum consideratione definies, nec
permittimus discreto iure uiuere quos uno uoto uolumus uindicare. censebis ergo
in commune, quae sunt amica iustitiae, quia nescit personas respicere qui meram
cogitat aequitatem.
XIIII. AURIGENI VIRO VENERABILI EPISCOPO THEODERICUS REX.
<1> Quamuis iudicio uestro credamus omnia facinora displicere, maxime a uobis
confidimus exsecrandum quod matrimonii genialis impugnat affectum. quibus enim
animis a continentibus accipitur, quod etiam laicorum detestatione damnatur?
Iulianus itaque nobis lacrimabili aditione conquestus est uxorem suam uel res a
uestris hominibus iniusta usurpatione peruasas. unde si ueram petitionem
supplicantis agnoscitis nec se rationabiliter pulsatus absoluit, in auctorem
facti sine aliqua tarditate resecate. malum enim cum perseuerat, augetur, et
remediale bonum est in peccatum accelerata correctio.
XV. THEODAHADO V. S. THEODERICUS REX.
<1> Iniuuia quidem nostra est laesa iustitia, quia uiolationes earum rerum
merito ad nos trahimus quas amamus. unde illud maxime inultum esse non patimur,
quod in contemptum nostrae iussionis constat admissum. quae enim praesumptio
plectenda non audeat, si sacrae iussionis reuerenda contemnat? ideoque illum,
quem dudum ad uiri illustris Sonae iudicium decreuimus conuenire isque se
inueterata calliditate subitraxit, examini uestro committimus audiendum, ut
finem detis iurgio plectibili machinatione dilatato. praestate itaque audientiae
curam, ut iustitiae uobis crescat opinio, quando pro remedio causantium
committuntur uobis ambigua iurgiorum.
XVI. GEMELLO V. S. THEODERICUS REX.
<1> Firmum est iudicium cuius tenetur exemplum, nec locus ambiguitati
relinquitur ubi experimenta probabilia suffragantur. explorauimus efficaciam
tuam per diuersos industriae gradus, sed uni parem meruisti gratiam, uariis
actionibus aequaliter approbatus. <2> Hinc est quod praesenti tempore in Gallias
nobis deo auxiliante subiectas uicarium te praefectorum nostra mittit
auctoritas. unde perpende qualia de te uideamur habere iudicia, quando ad illos
populos mitteris corrigendos, quos nostris laudibus specialiter credimus
adquisitos. cara est principi gloria et necesse est de illis amplius esse
sollicitum, unde sibi triumphorum uenisse sentit augmentum. <3> Age igitur
mandata, si cupis in te proficere nostra iudicia. turbulenta non ames: auara
declina, ut talem te iudicem prouincia fessa suscipiat, qualem Romanum principem
transmisisse cognoscat. desiderat uiros egregios coacta cladibus suis. effice ut
uictam fuisse delectet. nihil tale sentiat, quale patiebatur, cum Romam
quaereret. abscedat omnis de calamitate tristitia: serenetur tandem nubilus
uultus. nunc illam gaudere conuenit, cum ad sua uota peruenit.
XVII. UNIVERSIS PROVINCIALIBUS GALLIARUM THEODERICUS REX.
<1> Libenter parendum est Romanae consuetudini, cui estis post longa tempora
restituti, quia ibi regressus est gratus, ubi prouectum uestros constat habuisse
maiores. atque ideo in antiquam libertatem deo praestante reuocati uestimini
moribus togatis, exuite barbariem, abicite mentium crudelitatem, quia sub
aequitate nostri temporis non uos decet uiuere moribus alienis. <2> Proinde de
necessitatibus uestris innata nobis mansuetudine cogitantes, quod feliciter
dictum sit, spectabilem uirum Gemellum, uicarium praefectorum, fide nobis et
industria comprobatum ad componendam prouinciam credidimus dirigendum: sperantes
in nullo eum posse delinquere, qui nobis peccantes grauiter intellegit
displicere. <3> Quapropter ordinationibus eius ex nostris iussionibus oboedite,
quia eum credimus uobis profutura decernere. recipite paulatim iuridicos mores.
non sit nouitas molesta, quae proba est. quid enim potest esse felicius quam
homines de solis legibus confidere et casus reliquos non timere? iura publica
certissima sunt humanae uitae solacia, infirmorum auxilia, potentum frena. <4>
Amate unde et securitas uenit et conscientia proficit. gentilitas enim uiuit ad
libitum: ubi magis mortem reperit propriam, qui potest habere quod placeat. uos
iam securi ostentate diuitias: parentum bona longo situ recondita prodantur in
lucem: quia tantum quis nobilior erit quantum et moribus probis et luculenta
facultate reluxerit. <5> Ideo enim uobis uicarium praefecturae direximus, ut cum
tanta dignitate et ciuilem uideamur regulam destinasse. fruemini quod tantum
audiebatis. intellegite homines non tam corporea ui quam ratione praeferri et
illos merito crescere qui possunt aliis iusta praestare.
XVIII. GEMELLO V. S. THEODERICUS REX.
<1> Merentur bona, qui nostram uisi sunt elegisse clementiam, ut eos ueraciter
iudicasse per augmenta propria possimus ostendere. quod si talibus uiris publica
decet prospici largitate, quanto magis eos sua dignum est possidere, quod
commune munus probatur esse iustitiae? <2> Spectabilis itaque Magnus, hostium
conuersatione damnata quod natus est reminiscens, ad Romanum repatriauit
imperium: cuius absentia contigisse dicitur ut eius potuisset perire substantia.
atque ideo praesenti iussione sancimus, quatenus tam in agris quam mancipiis
urbanis aut rusticis, uel quicquid sibi competens quolibet modo nunc amissum
potuerit comprobare, sine aliqua recuperet tarditate, retinens ex nostra
auctoritate dominii ius omne quod habuit: nec quaestionem eum de rebus sibi
antiqua possessione competentibus uolumus sustinere, cui propositi nostri est
etiam noua praestare.
XVIIII. COMMONITORIUM. DANIELI THEODERICUS REX.
<1> Decet ut palatio nostro seruientibus iustis commodis consulamus, quia
fructuosus esse debet publicus labor, ut, quamuis obsequia nobis gratuita iure
debeantur, seruitia tamen per moderata compendia prouocemus. et ideo artis tuae
peritia delectati, quam in excauandis atque ornandis marmoribus diligenter
exerces, praesenti auctoritate concedimus, ut, te rationabiliter ordinante,
dispensentur arcae quae in Rauennati urbe ad recondenda funera distrahuntur,
quarum beneficio cadauera in supernis humata sunt, lugentium non parua
consolatio, quando animae tantum de mundi conuersatione discedunt, corpora uero
dulces quondam superstites non relinquunt. <2> Hinc quibusdam ueniunt dolores ad
pretium, et miserabili sorte uotorum crescit mercantibus de humana morte
compendium. ita tamen, ut non sit iniqua sub hac occasione taxatio, ne cogantur
miseri inter acerba luctuum grauia plorare dispendia facultatum et nefanda
deuotione constricti aut urgeantur patrimonia pro mortuis perdere aut dilecta
corpora uilissimis foueis potius dolentes abicere. sit modus in uoluntate
poscentium, quando ipsa miseratio pro ementibus facit. nam minus debet laedi,
cui amplius pro pietatis officio uidetur imponi.
XX. TRIVVILAE SAIONI ET FERROCINCTO APPARITORI THEODERICUS REX.
<1> Inter gloriosas rei publicae curas, quas perpeti cogitatione deo auxiliante
reuoluimus, cordi nostri est leuamen humilium, ut contra potentiam superborum
nostrae pietatis erigamus obstaculum, nec liceat quicquam apud nos audaciae,
cuius est propositi superba calcare. <2> Castorii igitur flebili calamitate
permoti, quem exitialis hactenus diuersorum pressit inuidia, occasionem praebuit
salutaribus constitutis, ut plus ualeret nostrae pietatis auxilium quam iniqua
calliditas improborum. atque ideo praesenti uobis auctoritate decernimus, ut, si
praefectus uir magnificus Faustus ea quae Castorius possidebat uel titulis
ingrauauit uel priuata usurpatione detinuit, mox ei praedium cum alio eiusdem
meriti uobis imminentibus a peruasore reddatur, ut crudelibus damnis afflicto
pietatis nostrae remedio consulamus. <3> Si quis autem in hac praesumptione
medius inuenitur, ut ad ea quae iussa sunt idoneus nequeat reperiri, ad nos
deducite uinculis illigatum, ut poena possit satisfieri cuius facultas non
sufficit ultioni. tali igitur confusione iam iniquae mentis impetus conquiescat,
ne non tam Castorium quam nostrum uotum persecutus esse uideatur. <4> Quod si
posthac qualibet occasione saepe memoratum Castorium notus ille artifex nocere
temptauerit, quinquaginta librarum auri multa protinus feriatur sitque maior
cruciatibus poena respicere illaesum, quem uidere desiderauit afflictum. en
factum quod cunctas protinus temperet ac corrigat potestates: praetorii
praefectus bacchari non est in humilis laesione permissus et cui a nobis
assurgitur, officiendi potestas miseris abrogatur. hinc omnes intellegant, quo
amore delectemur aequitatis, ut et potentiam iudicum nostrorum uelimus
imminuere, quatenus bona conscientiae possimus augere.
XXI. FAUSTO V. I. THEODERICUS REX.
<1> Humanae consuetudinis mos est, ut uariata plus capiant et quamuis in usum
habeantur eximia, fastidium praestet omne quod satiat. proinde sacris moenibus
iugiter immoranti disponendae utilitatis propriae causa indutias tibi postulas
debere concedi, non quod habitatio tam clara pertaedeat, sed quo dulcior fiat
renouata regressio. atque ideo illustri magnitudini tuae secedendi ad prouinciam
quattuor mensium indutias pietas nostra largitur: ita ut expletis eisdem ad
penates proprios redire festines, quatenus habitatio Romana, quam multiplici
uolumus densare conuentu, subtractis incolis terrarum opinatissima non rarescat.
hoc etiam et uobis iudicamus aptissimum, quando senator Romanus alibi possit
dolere tardatus. ubi enim illa gratia parentum? ubi tanta moenium possit respici
pulchritudo? piaculi genus est absentem sibi Romam diutius facere, qui in ea
possunt constitutis laribus habitare.
XXII. ARTEMIDORO V. I. THEODERICUS REX.
<1> Congruit comitatum nostrum uiris nos decorare nobilibus, ut et illorum
expleatur uotum et obsequium nostrum ornent merita personarum. proinde
magnitudinem tuam ad conspectus nostros, quos tibi non ambigimus esse
gratissimos, his oraculis euocamus, ut qui longa nobiscum aetate uersatus es,
praesentiae nostrae dulcedine capiaris. festinat enim ad principem, qui uel
solum potest uidere propitium: nam cui licet habere nostra colloquia, munera
credit esse diuina. quapropter non tardamus desiderium, cuius optamus aspectum.
uenire te gaudentem credimus, quem alacriter sustinemus.
XXIII. COLOSSEO V. I. COMITI THEODERICUS REX.
<1> Iuuat probatis ordinanda mandare, siquidem et de talibus iudicium gaudet
eligentis et eorum secura substantia est, quae committitur approbatis. nam ut
optamus esse qui placeat, ita curamus ut qui placuerit enitescat. <2> Proinde
prosperis initiatus auspiciis ad Sirmiensem Pannoniam, quondam sedem Gothorum,
proficiscere inlustris cinguli dignitate praecinctus commissamque tibi
prouinciam armis protege, iure compone, ut antiquos defensores recipere laeta
possit, quae se nostris parentibus feliciter paruisse cognoscit. <3> Nosti qua
te nobis conuersationis sinceritate commendes. sola tibi placendi uia est, si
quae gerimus imiteris. aequitatem foue, innocentiam animi uirtute defende, ut
inter nationum consuetudinem peruersam Gothorum possis demonstrare iustitiam:
qui sic semper fuerunt in laudum medio constituti, ut et Romanorum prudentiam
caperent et uirtutem gentium possiderent. remoue consuetudines abominanter
inolitas: is uerbis ibi potius, non armis causa tractetur: non sit coniunctum
negotium perdere cum perire: abiurator alieni furtum, non animam reddat: ne plus
intentio ciuilis rapiat quam bella consumant: scuta in hostes erigant, non
parentes. <4> Et ne quem forte ad mortem uideatur praecipitare paupertas, redde
pro talibus gloriosum plane damnum, lecturus a nobis gratiae uberrimum fructum,
si ciuile ibi potueris plantare propositum et nostris uere iudicibus dignum, si
dispendium iudex subeat, ut uitam periturus adquirat. quapropter consuetudo
nostra feris mentibus inseratur, donec truculentus animus belle uiuere
consuescat.
XXIIII. UNIVERSIS BARBARIS ET ROMANIS PER PANNONIAM CONSTITUTIS THEODERICUS REX.
<1> Institutum suum prouidentia nostra non deserit, cum subiectis semper intenta
profutura disponit, ut ad maiorem deuotionem concitentur qui sui curam nos
habuisse cognoscunt. <2> Hinc est quod Colosseo uiro illustri nomine uiribusque
praepotenti gubernationem uestram defensionemque commisimus, ut qui suae multa
dedit hactenus experimenta uirtutis, augeatur potius in futuris. atque ideo
parientiam uestram saepius approbatam nunc quoque eidem praesenti monstrate,
quatenus in his quae pro regni nostri utilitate rationabiliter agenda
praeceperit, deuotione probabili compleantur: quia fidem constantia probat et
ille integritatem propriae asserit mentis, qui iugibus persistit obsequiis. <3>
Illud praeterea uos credidimus ammonendos, ut non in uos, sed in hostem saeuire
cupiatis. res parua non uos ducat ad extrema discrimina: adquiescite iustitiae,
qua mundus laetatur. <4> Cur ad monomachiam recurratis, qui uenalem iudicem non
habetis? deponite ferrum, qui non habetis inimicum. pessime contra parentes
erigitis brachium, pro quibus constat gloriose moriendum. quid opus est homini
lingua, si causam manus agat armata? aut pax esse unde creditur, si sub
ciuilitate pugnetur? imitamini certe Gothos nostros, qui foris proelia, intus
norunt exercere modestiam. sic uos uolumus uiuere, quemadmodum parentes nostros
cernitis domino praestante floruisse.
XXV. SIMEONIO V. C. COMITI THEODERICUS REX.
<1> Amamus publicis actionibus personas inserere morum probitate conspicuas, ut
per obsequia fidelium nobis crescat utilitatis augmentum. proinde sinceritatem
animi tui per praeclara documenta noscentes siliquatici titulum, quem fidae
dominicatus iure dederamus discussioni indictionis primae, secundae uel tertiae
per prouinciam Dalmaticam, ordinatio tibi nostra committit: ut quolibet fraudis
uestigio damnum publicum te fuerit explorante repertum, procul dubio nostris
aerariis inferatur: quia non tantum lucra quaerimus, quantum mores subiectorum
deprehendere festinamus. <2> Praeterea ferrarias praedictae Dalmatiae cuniculo
te uenitatis iubemus inquirere, ubi rigorem ferri parturit terrena mollities et
igne decoquitur, ut in duritiam transferatur. hinc auxiliante deo patriae
defensio uenit: hinc agrorum utilitas procuratur et in usus humanae uitae
multiplici commoditate porrigitur. auro ipsi imperat et seruire cogit locupletes
pauperibus constanter armatis. conuenit itaque hanc speciem diligenti
indagatione rimari, per quam et nobis generantur lucra et hostibus procurantur
exitia. esto ergo de antefata discussione sollicitus et in publicis utilitatibus
temperatus, ut nostrum rationabile compendium crescendi tibi procurare possit
augmentum.
XXVI. OSUIN V. I. COMITI THEODERICUS REX.
<1> Quamuis prudentiae tuae sit utilitati publicae deputatis ferre praesidium.
tamen ammonitio nostra se cumulat, ut securius fiat. ubi se reuerentia nostrae
iussionis accommodat. Simeonium itaque uirum clarissimum, cuius fides olim nobis
est cognita uel deuotio comprobata, ad ordinationem siliquatici nec non
ferrariarum ad prouinciam Dalmatiam nostra ordinatione direximus. cui expetita
solacia non negetis, ut sublimitas tua nobis commendatior fiat, cum actibus se
publicis praebere festinat.
XXVII. IOHANNI V. S. CONSULARI CAMPANIAE THEODERICUS REX.
<1> Propositum est pietatis regiae locum iniustis odiis amputare et potestatis
armatae supercilium cohibere reuerentia iussionum. infesta est siquidem
humilibus superioris offensa, cum ad laudem trahitur, si uindicta de mediocribus
adquiratur. proinde diu uaria persecutione iactatus ad pietatis nostrae remedia
haud irrite conuolasti, asserens eminentissimam praefecturam tibimet esse
terrori, ne priuata odia in te satiarentur per publicam disciplinam. <2> Sed
nos, qui donatas dignitates iustitiae parere cupimus, non dolori, contra
illicitas praesumptiones nostra te tuitione uallamus, ut regiae maiestatis
obiectu feruentium furor animorum in suis cautibus elidatur et de se magis
poenam sumat proteruia, dum cohibetur innoxia. tamdiu enim iudex dicitur,
quamdiu et iustus putatur, quia nomen, quod ab aequitate sumitur, per superbiam
non tenetur. <3> Restat nunc, ut assumptum impleas consularitatis officium et te
utilitatibus publicis, quas tuos egisse constiterit decessores, sedulus ac
deuotus impendas quantumque a nobis protegeris, tantum modestiae parere
festines. nam si gaudio perfrueris, quod a laesione tua praefectos praetorio
remotos esse cognoscis, qui sub illo esse monstraris, quid te male agentem
passurum esse cognoscis?
XXVIII. CASSIODORO V. I. PATRICIO THEODERICUS REX.
<1> Gratus nobis est eorum semper aspectus qui nostris animis gloriosis
actionibus insederunt, quoniam perpetuum obsidem dederunt amoris sui qui apud
nos probati sunt studere uirtuti. proinde magnitudinem tuam glorioso nobis
seruitio probatam ad comitatum iussis praesentibus euocamus, ut et ornatus de te
regalibus crescat obsequiis et tu nostris conspectibus augearis. <2> Conuenit
enim te etiam requiri, qui nostra fecisti eximie tempora praedicari. ornasti de
conscientiae integritate palatia: dedisti populis altam quietem. hinc omnibus
factus notior, quia qui uoluit te positum in potestate nesciuit: praesentati
autem tribunalibus iudicem sine damni aliquo terrore uiderunt: pretiosior factus
cunctis, quia nullo praemio uendebaris. quis talem non desideret uidere, cui nos
publice constat gratiam rettulisse? nam qui alterum reprimere conati sumus, te
etiam palatio teste laudauimus. tende gradus, accelera festinus aduentum.
alacrem uenire conuenit, qui se a principe sustineri posse cognoscit.
XXVIIII. ARGOLICO V. I. PRAEFECTO URBIS THEODERICUS REX.
<1> Quis nesciat nostrum esse commodum supplicantis quaestum et illud bonis
principibus crescere, quod benigna possunt largitate praestare? hoc sunt enim
regia dona, quod semina: sparsa in segetem coalescunt, in unum coacta depereunt.
optamus ergo munera multis collata diuidere, ut possint ubique nostra beneficia
pullulare. <2> Atque ideo uiri illustris et magnifici patricii Paulini actorum
supplicatione suscepta, quae habetur in subditis, horrea longi temporis
uetustate destructa, quibus illud atque illud uocabulum praefixit antiquitas, si
nunc usui publico minime necessaria esse monstrantur nec aliqua ibidem est
species quae ad fiscum pertinet congregata, praefato uiro cum omnibus ad se
pertinentibus absoluta liberalitate concedimus, ut aedificandi et ad posteros
transmittendi assumpta licentia suis utilitatibus profutura disponat, quia
confert magis rei publicae munus quisquis diruta maluerit suscipere reparanda,
in ea praesertim urbe, ubi cuncta dignum est constructa relucere, ne inter tot
decora moenium deformis appareat ruina saxorum. in aliis quippe ciuitatibus
minus nitentia sustinentur: in ea uero nec mediocre aliquid patimur, quae mundi
principaliter ore laudatur.
XXX. ARGOLICO V. I. PRAEFECTO URBIS THEODERICUS REX.
<1> Romanae ciuitatis cura nostris sensibus semper inuigilat. quid est enim
dignius, quod tractare debeamus, quam eius reparationem exigere, quae ornatum
constat nostrae rei publicae continere? proinde illustris sublimitas tua
spectabilem uirum Iohannem nos direxisse cognoscat propter splendidas Romanae
cloacas ciuitatis, quae tantum uisentibus conferunt stuporem, ut aliarum
ciuitatum possint miracula superare. <2> Videas illic fluuios quasi montibus
concauis clausos per ingentia signina decurrere: uideas structis nauibus per
aquas rapidas non minima sollicitudine nauigari, ne praecipitato torrenti marina
possint naufragia sustinere. hinc, Roma, singularis quanta in te sit potest
colligi magnitudo. quae enim urbium audeat tuis culminibus contendere, quando
nec ima tua possunt similitudinem reperire? et ideo supra dicto Iohanni officii
uestri solacia uos praebere censemus, quoniam ordinationes nostras publicas
uolumus implere personas, priuatas manus amouentes, quae audacius merguntur
illicitis.
XXXI. SENATUI URBIS ROMAE THEODERICUS REX.
<1> Quamuis uniuersae rei publicae nostrae infatigabilem curam desideremus
impendere et deo fauente ad statum studeamus pristinum cuncta reuocare, tamen
Romanae ciuitatis sollicitiora nos augmenta constringunt, ubi quicquid decoris
impenditur, generalibus gaudiis exhibetur. peruenit itaque ad nostram
conscientiam suggestione multorum, quae praua non potest dissimulare commissa,
plura in praeiudicio urbis Romanae detestabiles praesumptores assumere, ut cui
nos summum adhibere desideramus studium, dolum patiatur iniustum. <2> Quapropter
ordinationes nostras ad uestram facimus notitiam peruenire, quibus amplius
credimus ciuitatis uestrae dispendia displicere. dicitur ergo commodi cura
priuati aquam formarum, quam summo deceret studio communiri, ad aquae molas
exercendas uel hortos rigandos fuisse deriuatam: turpe et miserabile hoc in illa
urbe fieri, quod per agros uix deceret assumi. <3> Et quia non possumus admissi
qualitatem ultra iura corrigere, ne, dum fabricis prodesse uolumus, legum
culmina destruamus, si huius nefandissimae rei dominus tricennii praescriptione
munitur, accepto pretio competenti suum uendat errorem, ut, quod laesionem
publicis praestat fabricis, non praesumatur ulterius, ne quod nunc sub largitate
corrigimus, postea seuerissime uindicemus. <4> Si uero tale aliquid moderna
praesumptione temptatum est, sine dubitatione tollatur. unius enim desiderio
praua generalis debet utilitas anteferri, cui uel in causis iustis raro poterit
obuiari. mancipia uero formarum seruitio principum prouisione deputata in
priuatorum cognouimus transisse dominium. aes praeterea, non minimum pondus, et
quod est facillimum direptioni, mollissimum plumbum, de ornatu moenium
referuntur esse sublata, quae auctores suos saeculis consecrarunt. aes enim
Ionos Thessaliae rex, plumbum Mida regnator Phrygiae reppererunt. et quam
miserum est, ut unde famam prouidentiae alii susceperunt, nos opinionem
neglegentiae incurrisse uideamur? templa etiam et loca publica, quae petentibus
multis ad reparationem contulimus, subuersioni fuisse potius mancipata. <5> Et
quoniam malarum rerum emendatio nos delectat, ne concessa uideatur ex
taciturnitate licentia, Iohannem uirum spectabilem electum nostra iustitia ad
haec, quae supra memorauimus, direximus inquirenda, ut cuncta suo ordine
discussa nobis relationis obsequio lucidentur, quatenus, quid de singulis rebus
aut de praesumptoribus earum fieri oporteat, more nostrae iustitiae censeamus.
adhibete nunc studia, praestate solacia, ut inquisitionem, quam debueratis
petere, grata uideamini mente complere.
XXXII. GEMELLO V. S. THEODERICUS REX.
<1> Constat apud nos fidelium non perire seruitia, sed in tristibus impensa
recipere in meliore fortuna. Arelatensibus itaque, qui nostris partibus
perdurantes gloriosae obsidionis penuriam pertulerunt, per indictionem quartam
fiscalia tributa nostra relaxat humanitas, ita ut futuro tempore ad solitam
redeant functionem, quatenus et nos bene meritis uicissitudinem reddidisse
uideamur et ab illis, cum res poposcerit, solita deuotio non negetur. <2>
Satientur in libertate qui pro nobis in angustiis esurire maluerunt: sint laeti
qui tristitiam fideliter pertulerunt. non decet statim de tributis esse
sollicitum, qui casum uix potuit declinare postremum. a quietis ista, non
obsessis inquirimus. quid enim a domino agri exigas, quem eum non coluisse
cognoscas? pretiosum uectigal iam nobis dederunt fidei suae. iniustum est ut
uiles pecunias exigantur qui gloriosas conscientias obtulerunt.
XXXIII. ARGOLICO V. I. PRAEFECTO URBIS THEODERICUS REX.
<1> Gratum nobis est uota nostra circa sacri ordinis augmenta proficere.
laetamur tales uiros emergere, qui senatoria mereantur luce radiare, ut laude
conspicuis deferatur gratia dignitatis. curia namque disciplinis ueterum patet:
nec ei iudicari potest extraneus, qui bonarum artium est alumnus. atque ideo
illustris magnificentia tua in clarissimo Armentario atque Superbo eius filio ea
faciat exhiberi, quae circa referendos curiae cana dictat antiquitas. <2> Hic
est enim praefatus Armentarius, qui et parentum bono et suo nobis commendatur
ingenio, exigens meritis quam sperat precibus dignitatem. nam quid dignius, si
et senatorio uestiatur honore togata professio, ut in illa turba doctorum audeat
liberam proferre sententiam, nec frenetur imperitiae terrore, quem hortantur ad
uocem iura facundiae? <3> Gloriosa est denique scientia litterarum, quia quod
primum est in homine, mores purgat: quod secundum, uerborum gratiam
sumministrat: ita utroque beneficio mirabilis ornat et tacitos et loquentes.
ducantur ergo ad penetralia Libertatis laudati merito suo, ornati nostro
iudicio, habituri sine dubio gratissimum senatum, quorum ars est facere de irato
beniuolum, de suspecto placatum, de austero mitem, de aduersante propitium. quid
ergo patribus imponere non possit, qui flectere animum iudicantis eualuit?
XXXIIII. MASSILIENSIBUS THEODERICUS REX.
<1> Propositi nostri est probatas fortitudine et moderatione personas ad
ordinationem uestram defensionemque dirigere, ut et prouincialium ratio
subleuetur et utilitas publica bonis praesidentibus augeatur. <2> Proinde
comitem Marabadum nobis aequitate compertum ad Massiliensem ciuitatem credidimus
dirigendum, ut quicquid ad securitatem uel ciuilitatem uestram pertinet, deo
iuuante perficiat memorque gratiae nostrae curam possit habere iustitiae,
minoribus solacium ferat, insolentibus seueritatem suae districtionis obiciat,
nullum denique opprimi iniqua praesumptione patiatur, sed omnes cogat ad iustum,
unde semper floret imperium. <3> Quapropter designato uiro in his, quae uobis
pro publica utilitate praeceperit, libentibus animis oboedite, ut fides uestra,
quae iam prioribus monstratur exemplis, subsequentibus quoque declaretur
indiciis, quia gratius est obsequium quod deuotione perpeti custoditur. nos
autem reddere cogitamus locum uicissitudini, qui impensa seruitia non possumus
obliuisci.
XXXV. ROMULO THEODERICUS REX.
<1> Liberalitatem nostram firmam decet tenere constantiam, quia inconcussum esse
debet principis uotum nec pro studio malignorum conuelli, quod nostra noscitur
praeceptione firmari. atque ideo praesenti iussione censemus, ut, quicquid ex
nostra ordinatione patricium Liberium tibi matrique tuae per pittacium
constiterit deputasse, in suo robore debeat permanere, nec a quoquam metuas
irrationabilem quaestionem, qui nostri beneficii possides firmitatem.
XXXVI. ARIGERNO V. I. COMITI THEODERICUS REX.
<1> Pietatis nostrae propositum est miserandis fletibus audientiam non negare,
maxime cum moris nostri sit ad leges cuncta remittere, ut et conquerens mereatur
effectum et pulsatus nullum se queratur sustinuisse praeiudicium. proinde
Firminus contra magnificum uirum patricium Venantium se dicit habere negotium et
frequenter ab eo eius propositiones fuisse contemptas. <2> Et quia in causis
semper est suspecta potentia, dum uelle creditur quod posse iudicatur, antefatum
seruata reuerentia a te praecipimus ammoneri, ut sub sponsione legitima
instructam personam ad comitatum nostrum dirigere se promittat, qui apud
delegatos motu nostro iudices eius intentionibus ualeat praebere responsum:
actor hic poenam suae recepturus audaciae, si contra magnificum uirum habuerit
falsitatis euentum.
XXXVII. PETRO EPISCOPO THEODERICUS REX.
<1> Si in alienis causis beatitudinem tuam conuenit adhiberi, ut per uos
iurgantium strepitus conquiescat, quanto magis ad uos remitti debet quod uos
spectat auctores? atque ideo sanctitas uestra a Germano nos aditos flebili
allegatione cognoscat, qui se filium legitimum asserit quondam Thomatis, dicens
partem facultatis patris sui a uobis detineri sibimet legibus competentem. <2>
Quae petitio si ueritate fulcitur et genitoris eius substantiam probatis iure
competere supplicanti, considerata iustitia, quam monetis, sine obseruationis
longae dispendio debita tribuantur, quoniam causarum uestrarum qualitas uobis
debet iudicibus terminari, a quo expectanda est magis quam uobis. imponenda
iustitia. quod si hanc causam sub aequitate uestrum minime definit arbitrium,
noueritis supplicis querelam ad nostram audientiam perducendam. uos enim docetis
uoces pauperum non debere neglegi, quas potest iustitia comitari.
XXXVIII. VVANDIL THEODERICUS REX.
<1> Quamuis pietatis nostrae constet esse uotum, ut ubique ciuilia, ubique
moderata peragantur, maxime tamen optamus bene geri in regionibus Gallicanis,
ubi et recens uastatio non portat iniuriam et ipsa initia bene plantare debent
nostri nominis famam. principis siquidem opinionem longe lateque disseminat
subiectorum custodita securitas, et ubi exercitus dirigitur, non grauandi, sed
defendendi potius existimentur. <2> Atque ideo praesenti auctoritate delegamus,
ut in Auinione, qua resides, nulla fieri uiolenta patiaris. uiuat noster
exercitus ciuiliter cum Romanis: prosit eis destinata defensio nec aliquid illos
a nostris sinatis pati, quos ab hostili nitimur oppressione liberari.
XXXVIIII. FELICI V. I. CONSULI THEODERICUS REX.
<1> Aequitatis ratio persuadet, ut exercentibus laetitiam publicam consuetudinem
seruemus antiquam, praesertim a consule uenientem, cuius constat esse propositi,
ut debeat ex liberalitate laudari, ne uideatur aliud dignitas promittere et
aliud senatorem uelle complere. quocirca sub opinione munifici parcum non decet
inueniri, quia inumbrat famam publicam in consule tenacitatis obscuritas. <2>
Quapropter illustris magnitudo tua a Mediolanensibus aurigis nos aditos esse
cognoscat illa sibi uestris temporibus fuisse subtracta, quae mos priscus
indulserat, cum praestante tempore munificentia sit pro lege. proinde si nullo
mendacio asserta uitiantur, sublimitatem uestram sequi conuenit uetustatem, quae
suo quodam priuilegio uelut debita quae donantur exposcit. nec licet negari,
quod te cognoscis sub antiquitate largiri.
XL. UNIVERSIS PROVINCIALIBUS IN GALLIIS CONSTITUTIS THEODERICUS REX.
<1> Quamuis sensum nostrae pietatis turba multiplex cogitationis intraret et
diuersas regni partes consueta sedulitate respiceret, festine tamen remedia
uestrae utilitatis aspeximus, quoniam apud conscientiam nostram laesionis genus
est profutura tardare nec possumus aestimare iucundum, quod ingrata fuerit
dilatione suspensum. nam aegrescentibus morbis laesio debacchari permittitur,
cum medicina differtur. <2> Vobis itaque hostili feritate uastatis pro qualitate
laesionis per indictionem quartam relaxatam agnoscite tributariam functionem,
quia non gratulamur exigere, quod tristis noscitur solutor offerre. ita tamen ut
de illis, quae constat intacta, exercituales iuuentur expensae: quia in totum
deuotio deserere non debet quos pro se laborare cognoscit. inualidus est
siquidem ieiunus defensor nec animus ministrat audaciam, cum uirtus corporeo
fuerit robore destituta.
XLI. GEMELLO V. S. THEODERICUS REX.
<1> Tolerabile fit omne quod aequabili ordinatione disponitur, quia diuisum onus
sub communione subiectos certum est non grauare: pars enim extrema ad
unumquemque redit, cum summa uniuersos incluserit. <2> Tritici itaque speciem,
quam ob exercituales expensas nostra prouidentia de Italia destinauit, ne
fatigata prouincia huius praebitione laederetur, ad castella supra Druentiam
constituta de Massiliensibus horreis constat esse portandam. <3> Quapropter
iubemus ut studium deuehendi supradictae speciei commune subeatur, quatenus
celeriter possit fieri, quod uniuersitatis studio uidetur assumi.
XLII. UNIVERSIS PROVINCIALIBUS IN GALLIIS CONSTITUTIS THEODERICUS REX.
<1> Non occurritur sub principe benigno remedia postulare subiectos, quoniam
supplicationem praecedit humanitas et miro modo posteriora fiunt uota quam
praestita. nuper siquidem moti iustitia iusseramus, ut pars aliqua illaesa
prouinciae Gothis nostris alimonia reperta praestaret. <2> Sed quia licet
principem semper humaniora censere, dum uarietatis non habet uitium, quod pro
beneficio fuerit immutatum, sed ut nec minima possessores illatione grauarentur,
ex Italia destinauimus exercituales expensas, ut ad defensionem uestram directus
exercitus nostris humanitatibus aleretur solumque auxilium prouinciae de tam
magna congregatione sentirent. <3> Ducibus etiam ac praepositis sufficientem
transmisimus pecuniae quantitatem, ut eorum praebendae, quae non potuerunt
conuehi, ibi debuissent sine alicuius dispendio comparari, quia delectui uestro
nec illa uolumus imponere, quae uos potuistis, ut arbitramur, offerre.
XLIII. UNIGIS SPATHARIO THEODERICUS REX.
<1> Delectamur iure Romano uiuere quos armis cupimus uindicare, nec minor nobis
est cura rerum moralium quam potest esse bellorum. quid enim proficit barbaros
remouisse confusos, nisi uiuatur ex legibus? <2> Quapropter cum deo propitio
Gallias exercitus noster intrauit, si qua mancipia seruitium declinantia ad
alios se, quam quibus uidebantur competere, contulerunt, prioribus dominis
iubemus sine aliqua dubietate restitui, quia confundi non decent iura imperante
iustitia nec potest abiecto fauere seruitio libertatis defensor. <3> Aliorum
forte regum proelia captarum ciuitatum aut praedas appetunt aut ruinas: nobis
propositum est deo iuuante sic uincere, ut subiecti se doleant nostrum dominium
tardius adquisisse.
XLIIII. UNIVERSIS POSSESSORIBUS ARELATENSIBUS THEODERICUS REX.
<1> Quamuis primum sit laesos incolas refouere et in hominibus magis signum
pietatis ostendere, tamen utrumque humanitas nostra coniungit, ut et largitatis
remedio ciuibus consulamus et ad cultum reducere antiqua moenia festinemus. sic
enim fiet, ut fortuna urbis, quae in ciuibus erigitur, fabricarum quoque decore
monstretur. <2> Pro reparatione itaque murorum Arelatensium uel turrium
uetustarum certam pecuniae direximus quantitatem. <3> Victualia quoque, quae
uestras releuare uideantur expensas, fecimus praeparari, ut uobis destinentur,
cum tempus nauigationis arriserit. releuate nunc animos et de nostra promissione
recreati futurae copiae spem tenentes diuino fauore habetote fiduciam, quia non
minus est quod nostris uerbis quam quod horreis continetur.
XLV. ARIGERNO V. I. COMITI THEODERICUS REX.
<1> Iustitiae nostrae conuenit, ut de indultis beneficiis calumnias fieri non
sinamus, et quicquid praua interpretatione tegitur, fugata mendacii nube
reuelemus. defensores itaque sacrosanctae ecclesiae Romanae conquesti sunt
beatae recordationis quondam Simplicium domum in sacratissima Urbe positam ab
Eufraxio acolutho instrumentis factis sollemniter comparasse, quam per annorum
longa curricula ecclesiam Romanam quieto iure suggerunt possedisse et in usus
alios transtulisse securitate dominii. <2> Nunc autem existere Samareae
superstitionis improba fronte duratum, qui synagogam ibidem fuisse iniquis
conatibus mentiatur, cum ad humanos usus habitacula longe aliter formata
doceantur, quam potest esse memorata constructio. quapropter magnitudo tua
conscientiae suae probata iustitia causam diligenti examinatione discutiat et,
si uera cognouerit quae ueniunt in querelam, considerata aequitate definiat. nam
si humanis actibus sunt calumniae summouendae, quanto magis emendanda credimus
quae contumeliam diuinitatis tangere iudicamus!
XLVI. ADEODATO THEODERICUS REX.
<1> Materia est gloriae principalis delinquentis reatus, qua nisi culparum
occasiones esnergerent, locum pietas non haberet. quid enim salubris ordinatio
gerat, si morum probitas cuncta componat? arida siccitas beneficium madentis
pluuiae exoptat. salutiferis medentium manibus nisi infirma ualitudo non
indiget. sic dum imbecillitati succumbitur, conuenienter remedia tribuuntur.
quapropter casibus asperis praestandum est sub iustitiae laude moderamen, ut nec
uindictam sinamus superare peccata nec culpam insultare patiamur legibus
impunitam. <2> Datis itaque precibus allegasti uiri spectabilis Venantii
Lucaniae at Bruttiorum praesulis odiorum te acerbitate compressum, custodiae
longo situ laborantem, in confessionem raptus adultae puellae Valerianae fuisse
compulsum, ut gratius fuerit spem citae mortis expetere quam tormentorum
crudelia sustinere. inter supremas enim angustias anhelantis uotum est perire
quam uiuere, quia detestabilis sensus poenarum excludit dulcissimae salutis
affectum. illud etiam, quod minime iustitia pateretur, adiciens defensorum tibi
patrocinia saepius postulanti fuisse subtracta, cum aduersarii florentes ingenio
etiam innocentem te possent legum laqueis obligare. <3> Quae supplicatio cum
efficaciter animum nostrae pietatis intraret paulatimque ad misericordiae iura
deflecteret, occurrit Bruttiorum praesulis missa relatio, quae priuatam
allegationem tragoediae suae uoce compressit, negando credi contra fidem
publicam fallaciter supplicanti. <4> Ideoque asperitatem poenae nostra lenitate
mollimus, statuentes ut ex die prolati oraculi sex mensium patiaris exilium, ita
ut nulli post constituta nostra sub qualibet interpretatione tibi liceat obicere
crimen infamiae, quando fas est principi maculosas notas uitiatae opinionis
abstergere, sed hoc exacto tempore patriae rebusque omnibus reformatus, ius tibi
sit liberum omne quod primitus, quia nulla te ingemiscere probri adustione
censemus, quem temporali uolumus exilio detineri: poenam trium librarum auri
nihilominus comminantes, si quis aut obuiando aut aliter intellegendo praesens
nostrum uiolare temptauerit constitutum. <5> Sed quoniam haec statuta ad
innocentes nolumus usque protendi, ne sua cuique minime uideatur ignorantia
profuisse, praesenti auctoritate eos a formidine liberamus, quos utpote
nescientes in eadem causa quolibet loco uel tempore interfuisse constiterit.
similis enim uidetur absentis, qui conscientiam non habet criminosi.
XLVII. FAUSTO PPO THEODERICUS REX.
<1> In partem pietatis recidit mitigata districtio et sub beneficio punit qui
poenam debitam considerata moderatione palpauerit. Iouinum curialem, quem
corrector Lucaniae Bruttiorumque humani nobis suggerit sanguinis effusione
pollutum (ob hoc cum mutuae contentionis ardoribus excitatus rixam uerborum
usque ad nefarium collegae deduxit in ritum, sed conscius facti sui intra
ecclesiae saepta refugiens declinare se credidit praescriptam legibus ultionem)
Vulcanae insulae perpetua relegatione damnamus, ut et sacrato templo reuerentiam
habuisse uideamur nec uindictam criminosus euadat in totum, qui innocenti non
credidit esse parcendum. <2> Careat proinde patrio foco cum exitiabili uicturus
incendio, ubi uiscera terrae non deficiunt, cum tot saeculis iugiter
consumantur. flamma siquidem ista terrena, quae alicuius corporis imminutione
nutritur, si non absumit, extinguitur: ardet continue inter undas medias montis
quantitas indefecta nec imminuit, quod resolui posse sentitur: scilicet quia
naturae inextricabilis potentia tantum crementi cautibus reponit, quantum illi
uorax ignis ademerit. nam quemadmodum saxa incolumia permanerent, si semper
inadiuuata decoquerent? <3> Potentia siquidem diuina sic de contrariis rebus
miraculum facit esse perpetuum, ut palam consumpta occultissimis instauret
augmentis, quae uult temporibus stare diuturnis. uerum cum et alii montes
motibus uaporatis exaestuent, nullus simili appellatione censetur: aestimandum,
quia grauius succenditur, qui Vulcani nomine nuncupatur. <4> Mittatur ergo reus
capitis in locum praedictum uiuus: careat quo utimur mundo, de quo alterum
crudeliter fugauit exitio, quando superstes recipit quod euentu mortis inflixit:
salamandrae secuturus exemplum, quae plerumque degit in ignibus. tanto enim
naturali frigore constringitur, ut flammis ardentibus temperetur. subtile ac
paruum animal, lumbricis associum, flauo colore uestitum. uitam praestat soli,
quae mortalia cuncta consumit. <5> Memorant autem aeui pristini seruatores hanc
insulam ante aliquot annos undarum rupto terrore imitus erupisse, cum Hannibal
apud Prusiam Bithyniae regem ueneno secum ipse pugnauit, ne tantus dux ad
Romanorum ludibria perueniret. plus inde mirabile, ut mons tanta flammarum
congregatione succensus marinis fluctibus haberetur absconditus et ardor ibi
indesinenter uiueret, quem tanta unda uidebatur obruere.
XLVIII. UNIVERSIS GOTHIS ET ROMANIS CIRCA VERRUCAS CASTELLUM CONSISTENTIBUS
THEODERICUS REX.
<1> Laetitia debet esse cunctorum prouida iussio dominantum, quando illud, quod
uos debuistis expetere, nos uidetis offerre. quid est enim gratius quam humanis
rebus cautelam semper adhibere, quae aut fit necessaria aut non grauat esse
superfluam? et ideo Leodefrido saioni nostro praesenti delegauimus iussione, ut
eius instantia in Verruca castello uobis domicilia construatis, quod a positione
sui congruum nomen accepit. <2> Est enim in mediis campis tumulus saxeus in
rotunditate consurgens, qui proceris lateribus, siluis erasus, totus mons quasi
una turris efficitur, cuius ima graciliora sunt quam cacumina et in mollissimi
fungi modo supernus extenditur, cum in inferiore parte tenuetur. agger sine
pugna, obsessio secura, ubi nec aduersarius quicquam praesumat nec inclusus
aliquid expauescat. huic Athesis inter fluuios honorus amoeni gurgitis puritate
praeterfluit causam praestans muniminis et decoris: castrum paene in mundo
singulare, tenens claustra prouinciae, quod ideo magis probatur esse praecipuum,
quia feris gentibus constat obiectum. <3> Hoc opinabile munimen, mirabilem
securitatem cui desiderium non sit habitare, quam uel externos delectat
inuisere? et quamquam deo iuuante nostris temporibus prouinciam securam
credamus, tamen prudentiae nihilominus est cauere etiam quae non putantur
emergere. <4> Munitio coaptanda semper in otio est, qua tunc male quaeritur,
quando necessaria iudicatur. mergi, quibus nomen ex facto est, cohabitatores
piscium, aquatiles uolucres futuras tempestates naturaliter praeuidentes sicca
petunt, stagna derelinquunt. delphini fluctus pelagi metuentes uadosis litoribus
immorantur. echini, qui sunt mella carnalia, costatilis teneritudo, croceae
deliciae diuitis maris, dum futuras tempestates agnouerint, loca mutare
cupientes, quia illis pro leuitate corporis nandi nulla fiducia est, lapillos,
quibus pares possunt esse, complexi, quadam anchorarum ponderatione librati
scopulos petunt, quos fluctibus uexandos esse non credunt. <5> Aues ipsae
aduentu hiemis patrias mutant. ferae pro qualitate temporis cubilia quaerunt.
hominum sollicitudo non debet prouidere quod potest in aduersitate requirere?
non est in mundo unum: humanae res mutabilitate quatiuntur. et ideo prouidentia
dicitur, ut quae sunt futura tractentur.
XLVIIII. HONORATIS POSSESSORIBUS DEFENSORIBUS ET CURIALIBUS CATINENSIS CIVITATIS
THEODERICUS REX.
<1> Optabilis nobis est et grata deuotio, quae bonam praecesserit iussionem, et
merito acceptum redditur, si quid, quod possumus imperare, poscatur. felicitas
enim regnantis est famulantes amare quod expedit, quando labor nobis
cogitationis aufertur, dum subiecti sibi profutura disponunt. <2> Atque ideo
suggestionis uestrae tenore comperto, quam caritate ciuica in communiendis
moenibus suscepistis, absolutam huius rei uobis censemus esse licentiam: nec
quicquam de hac re uereamini, unde gratiae nostrae expectare praemia mox
debetis. uestra enim munitio nostra est nihilominus fortitudo: et quicquid uos
ab incerto eripit, famam nostrae defensionis extendit. <3> Saxa ergo, quae
suggeritis de amphitheatro longa uetustate collapsa nec aliquid ornatui publico
iam prodesse nisi solas turpes ruinas ostendere, licentiam uobis eorum in usus
dumtaxat publicos damus, ut in murorum faciem surgat, quod non potest prodesse,
si iaceat. quocirca perficite confidenter, quicquid cautio ad munimen, quicquid
ornatus expetit ad decorem, tantum nobis scituri gratum fore quod facitis,
quantum exinde gratia uestrae se ciuitatis extulerit.
L. PROVINCIAL1BUS NORICIS THEODERICUS REX.
<1> Grate suscipienda est ordinatio, quae dantem iuuat et accipientem pro
temporis necessitate laetificat. nam quis putare possit onus, ubi magis meretur
in commutatione compendium? <2> Et ideo praesentibus decernimus constitutis, ut
Alamannorum boues, qui uidentur pretiosiores propter corporis granditatem, sed
itineris longinquitate defecti sunt, commutari uobiscum liceat, minores quidem
membris, sed idoneos ad laborem, ut et illorum profectio sanioribus animalibus
adiuuetur et uestri agri armentis grandioribus instruantur. <3> Ita fit ut illi
adquirant uiribus robustos, uos forma conspicuos et, quod raro solet emergere,
in una mercatione utrique uideamini desiderata compendia percepisse.
LI. FAUSTO PPO THEODERICUS REX.
<1> Quantum histrionibus rara constantia honestumque uotum, tanto pretiosior
est, cum in eis probabilis monstratur affectus. carum est enim homini
repperisse, ubi aliquid se laudabile non putauerat inuenire. dudum siquidem
Thomati aurigae ex Orientis partibus aduenienti annonas rationabiles
consideratio nostra largita est, donec eius artem probaremus et animum. sed
quoniam in hoc agone primatum noscitur obtinere eiusque uoluntas patria
derelicta nostri sedes fouere delegit imperii, menstrua eum duximus largitate
solidandum, ne adhuc ambiguum redderemus, quem Italiae dominatum elegisse
cognouimus. <2> Is enim frequenter uictor per diuersorum ora uolitauit, plus
uectus fauore quam curribus. suscepit partem populi protinus inclinatam et quos
ipse fecerat tristes, laborauit iterum reddere laetiores, modo agitatores arte
superans, modo equorum uelocitate transcendens. frequentia palmarum eum faciebat
dici maleficum, inter quos magnum praeconium uidetur esse ad talia crimina
peruenire. necesse est enim ad peruersitatem magicam referri, quando uictoria
equorum meritis non potest applicari. <3> Spectaculum expellens grauissimos
mores, inuitans leuissimas contentiones, euacuator honestatis, fons irriguus
iurgiorum, quod uetustas quidem habuit sacrum, sed contentiosa posteritas fecit
ease ludibrium. primus enim hoc apud Elidem Asiae ciuitatem Oenomaus fertur
edidisse: quod post Romulus in raptu Sabinarum necdum fundatis aedificiis
ruraliter ostentauit Italiae. <4> Sed mundi dominus ad potentiam suam opus
extollens mirandam etiam Romanis fabricam in uallem Murciam tetendit Augustus,
ut immensa moles firmiter praecincta montibus contineret, ubi magnarum rerum
indicia clauderentur. bis sena quippe ostia ad duodecim signa posuerunt. haec ab
hermulis funibus demissis subita aequalitate panduntur, docentes totum illic, ut
putabant, consilio geri, ubi imago capitis cognoscitur operari. <5> Colores
autem in uicem temporum quadrifaria diuisione funduntur: prasinus uirenti uerno,
uenetus nubilae hiemi, russeus aestati flammeae, albus pruinoso autumno dicatus
est, ut quasi per duodecim signa digrediens annus integer signaretur. sic
factum, ut naturae ministeria spectaculorum composita imaginatione luderentur.
<6> Biga quasi lunae, quadriga solis imitatione reperta est. equi desultorii,
per quos circensium ministri missus denuntiant exituros, luciferi praecursorias
uelocitates imitantur. sic accidit ut, dum se colere putarent astra, religionem
suam ludicra similitudine profanarent. <7> Alba linea non longe ab ostiis in
utrumque podium quasi regula directa perducitur, ut quadrigis progredientibus
inde certamen oriretur, ne, dum se praepropere conantur elidere, spectandi
uoluptatem uiderentur populis abrogare. septem metis certamen omne peragitur in
similitudinem hebdomadis reciprocae. ipsae uero metae secundum zodiacos decanos
ternas obtinent summitates, quas ad instar solis quadrigae celeres peruagantur.
<8> Eoae Orientis et Occidentis terminos designant. euripus marie uitrei reddit
imaginem, unde illuc delphini aequorei aquas influunt. obeliscorum quoque
prolixitates ad caeli altitudinem subleuantur, sed potior Soli, inferior Lunae
dicatus est, ubi sacra priscorum Chaldaeicis signis quasi litteris indicantur.
spina infelicium captiuorum sortem designat, ubi duces Romanorum supra dorsa
hostium ambulantes laborum suorum gaudia perceperunt. <9> Mappa uero, quae
signum uidetur dare circensibus, tali casu fluxit in morem. cum Nero prandium
protenderet et celeritatem, ut assolet, auidus spectandi populus flagitaret,
ille mappam, qua tergendis manibus utebatur, iussit abici per fenestram, ut
libertatem daret certaminis postulati. hinc tractum est, ut ostensa mappa certa
uideatur esse promissio circensium futurorum. <10> Circus a circuitu dicitur,
circenses quasi circuenses: propterea quod apud antiquitatem rudem, quae necdum
spectacula in ornatum deduxerat fabricarum, inter enses et flumina locis
uirentibus agerentur. nec uacat quod XXIIII missibus condicio huius certaminis
expeditur, profecto ut diei noctisque horae tali numero clauderentur. nec illud
putetur irritum quod metarum circuitus ouorum ereptionibus exprimatur, quando
actus ipse multis superstitionibus grauidus oui exemplo geniturum se aliqua
profiteretur. et ideo datur intellegi uolitantes atque inconstantissimos inde
mores nasci, quos auium matribus aptauerunt. <11> Cetera circi Romani longum est
sermone decurrere, dum omnia uideantur ad causas singulas pertinere. hoc tamen
dicimus omnimodis stupendum, quod illic supra cetera spectacula feruor animorum
inconsulta grauitate rapiatur. transit prasinus, pars populi maeret: praecedit
uenetus et ocius turba ciuitatis affligitur. nihil proficientes feruenter
insultant: nihil patientes grauiter uulnerantur et ad inanes contentiones sic
disceditur, tamquam de statu periclitantis patriae laboretur. <12> Quod merito
creditur dicatum numerosae superstitioni, ubi ab honestis moribus sic constat
excedi. haec nos fouemus necessitate imminentium populorum, quibus uotum est ad
talia conuenire, dum cogitationes serias delectantur abicere. <13> Paucos enim
ratio capit, raros probabilis oblectat intentio: ad illud potius turba ducitur,
quod ad remissionem curarum constat inuentum. nam quicquid aestimat uoluptuosum,
hoe et ad beatitudinem temporum iudicat applicandum. quapropter largiamur
expensas, non semper ex iudicio demus. expedit interdum desipere, ut populi
possimus desiderata gaudia continere.
LII. CONSULARI V. I. THEODERICUS REX.
<1> Sicut inuidiosa nimis interpellantium suggestione comperimus, inter Leontium
atque Paschasium spectabiles uiros finalis orta contentio est, ita ut terminos
casarum suarum non legibus, sed uiribus crederent uindicandos. unde miramur
tanta animositate fuisse litigatum, quod aut terminis testibus aut iugis montium
aut fluminum ripis aut arcaturis constructis aliisque signis euidentibus constat
esse definitum. <2> Quid isti facerent, si in Aegyptiacis partibus possiderent,
ubi Nili fluminis superueniente diluuio indicia finium uastissimus gurges
abradit et indiscreta terrae facies redditur, ubi omnia limus tegere
comprobatur? quapropter nec tunc ad arma concurrere debuissent, si excitata lis
nulla satisfactione superata discederet. hoc enim per geometricas formas et
gromaticam disciplinam ita diligenter agnoscitur, quemadmodum litteris omnia
sermo conclusus est. <3> Geometriam quippe, ut est hominum genus nimis
acutissimum atque sollicitum, Chaldaei primum inuenisse memorantur, qui rationem
ipsius disciplinae generaliter colligentes et in astronomicis rebus et in
musicis et in mechanicis et in architectis et in medicinam et ad artem
logisticam, uel quicquid potest formis generalibus contineri, aptam esse
docuerunt, ut sine ea nihil horum possit ad agnitionem uerissimam peruenire. <4>
Hanc post Aegyptii, non dissimiliter animi calore feruentes, propter augmenta
Nilotica, quae singulis annis uotiua inundatione patiuntur, ad dimensionem
terrae et recuperandas formas finium transtulerunt, ut fieret arte distinctum,
quod litigiosae confusioni uidebatur obnoxium. <5> Quapropter agrimensorem
peritissimum, cui ab arte nomen est, uestra nihilominus adhibeat magnitudo, ut
iam omnia, quae manifesta ratione distincta sunt, per euidentia debeat documenta
monstrare. nam si hoc egit illa disciplina mirabilis, ut indeterminatos agros
ratione certa distingueret, quanto magis iste monstrare debet omnia, quae iam
probantur suis finibus terminata? <6> Augusti siquidem temporibus orbis Romanus
agris diuisus censuque descriptus est, ut possessio sua nulli haberetur incerta,
quam pro tributorum susceperat quantitate soluenda. <7> Hoc auctor Heron
metricus redegit ad dogma conscriptum, quatenus studiosus legendo possit
agnoscere, quod deberet oculis absolute monstrare. uideant artis huius periti,
quid de ipsis publica sentit auctoritas. nam disciplinae illae toto orbe
celebratae non habent hunc honorem. arithmeticam indicas, auditoriis uacat.
geometria, cum tantum de caelestibus disputat, tantum studiosis exponitur.
astronomia et musica discuntur ad scientiam solam. <8> Agrimensori uero finium
lis orta committitur, ut contentionum proteruitas abscidatur. iudex est utique
artis suae, forum ipsius agri deserti sunt: fanaticum credis, quem tortuosis
semitibus ambulare conspexeris. indicia siquidem rerum inter siluas asperas et
dumeta perquirit, non ambulat iure communi, uia illi est lectio sua, ostendit
quod dicit, probat quod didicit, gressibus suis concertantium iura discernit et
more uastissimi fluminis aliis spatia tollit, aliis rura concedit. <9>
Quapropter auctoritate nostra suffulti talem eligite, post quem partes
erubescant impudenti fronte litigare, quatenus possessorum iura confusa esse non
debeant, quibus est necessarium rebus propriis adhibere culturam.
LIII. APRONIANO ILLUSTRI VIRO COMITI PRIVATARUM THEODERICUS REX.
<1> Magnitudinis uestrae relatione comperimus aquilegum Romam uenisse de
partibus Africanis, ubi ars ipsa pro locorum siccitate magno studio semper
excolitur, qui aridis locis aquas dare possit imatiles, ut beneficio suo
habitari faciat loca nimia sterilitate siccata. <2> Hoc nobis gratum fuisse
cognosce, quatenus industria illa maiorum libris exposita nostris temporibus
uenerit approbanda. signis quippe uirentium herbarum ac proceritate arborum
uicinitatem colligit decenter undarum. terris enim, quibus dulcis umor non longe
subest, ubertas quorundam germinum semper arridet, ut est iuncus aquatilis,
canna leuis, ualidus rubus, salix laeta, populus uirens et reliqua arborum
genera, quae tamen ultra naturam suam felici proceritate luxuriant. <3> Sunt et
alia huius artis indicia: cum nocte adueniente lana sicca in terram ponitur iam
prouisam et rudi caccabo tecta relinquitur, tunc, si aquae proximitas arriserit,
mane umida reperitur. sole autem declarato intuentur etiam magistri loca
solliciti et ubi supra terram uolitare spissitudinem minutissimarum conspexerint
omnino muscarum, tunc promittunt laetificale quod quaeritur inueniri. addunt
etiam in columnae speciem conspici quendam tenuissimum fumum, qui quanta fuerit
altitudine porrectus ad summum, tantum in imum latices latere cognoscunt, ut hoc
sit mirabile, quod per haec aliaque signa diuersa mensura definita praedicitur,
quanta profunditate quaesita monstretur. praedicunt etiam sapores aquarum, ut
nec aspera dispendioso labore debeat quaeri, nec dulcis necessariaque inhonora
contemni. <4> Hanc scientiam sequentibus pulchre tradiderunt apud Graecos ille,
apud Latinos Marcellus: qui son solum de subterraneis fluentis, sed de ipso
quoque ore fontium sollicite tractauerunt. dicunt enim aquas, quae ad orientem
austrumque prorumpunt, dulces atque perspicuas esse et pro sua leuitate
saluberrimas inueniri, in septentrionem uero atque occidentem quaecumque manant,
probari quidem nimis frigidas, sed crassitudine suae grauitatis incommodas. <5>
Atque ideo, si memorato illi uiderit sapientia uestra et lectione codicum et usu
rerum quae sunt praedicta constare, conpetentibus annonis de publico deputatis
peregrinationem eius inopiamque releuabis: accepturus mercedes, ubi artis suae
dona praestiterit. <6> Nam quamuis Romana ciuitas aquis abundet irriguis sitque
fontibus gaudens et formarum inundatione ditissima, reperiuntur tamen plurima
suburbana quae hanc uideantur desiderare peritiam, et merito continetur, qui uel
pro parte necessarius esse cognoscitur. huic tamen mechanicus omnino iungendus
est, ut undas, quas iste repperit, ille leuet et arte subire faciat, quod
ascendere non praeualet per naturam. habeatur ergo et iste inter reliquarum
artium magistros, ne quid desiderabile putetur fuisse, quod sub nobis non potuit
Romana ciuitas continere.
LIBER QUARTUS.
I. HERMINAFRIDO REGI THORINGORUM THEODERICUS REX.
<1> Desiderantes uos nostris aggregare parentibus neptis caro pignori propitia
diuinitate sociamus, ut qui de regia stirpe descenditis, nunc etiam longius
claritate Hamali sanguinis fulgeatis. mittimus ad uos ornatum aulicae domus,
augmenta generis, solacia fidelis consilii, dulcedinem suauissimam coniugalem:
quae et dominatum uobiscum iure compleat et nationem uestram meliore
institutione componat. <2> Habebit felix Thoringia quod nutriuit Italia,
litteris doctam, moribus eruditam, decoram non solum genere, quantum et feminea
dignitate, ut non minus patria uestra istius splendeat moribus quam suis
triumphis. <3> Quapropter salutantes gratia competenti indicamus nos uenientibus
legatis uestris inpretiabilis quidem rei, sed more gentium suscepisse pretia
destinata, equos argenteo colore uestitos, quales decuit esse nuptiales. quorum
pectora uel crura sphaeris carneis decenter ornantur: costae in quandam
latitudinem porriguntur: aluus in breuitate constringitur: caput ceruinam reddit
effigiem, imitantes uelocitatem cuius uidentur habere similitudinem. hi sunt sub
pinguedine nimia mansueti, magna mole celerrimi, aspectibus iucundi, usibus
gratiores: incedunt enim molliter, sessores insanis festinationibus non
fatigant: quiescitur in ipsis potius quam laboretur et compositi delectabili
moderatione agilitate norunt continua perdurare. <4> Verum hunc quamuis
nobilissimum gregem beluasque morigeras uel alia quae direxistis eximia uicta
cognoscitis, quando omnia iure superat, quae decus regiae potestatis exornat.
destinauimus et nos quidem, quae principalis ordo poscebat: sed nihil maius
persoluimus, quam quod uos tantae feminae decore copulauimus. assint uestro
diuina coniugio, ut sicut nos causa iunxit affectionis, ita et posteros nostros
obliget gratia parentalis.
II. REGI ERULORUM THEODERICUS REX.
<1> Per arma fieri posse filium grande inter gentes constat esse praeconium,
quia non est dignus adoptari, nisi qui fortissimus meretur agnosci. in subole
frequenter fallimur: ignaui autem esse nesciunt, quos iudicia pepererunt. hi
enim gratiam non de natura, sed de solis meritis habent, quando uinculo animi
obligantur extranei, et tanta in hoc actu uis est, ut prius se uelint mori quam
aliquid asperum patribus uideatur infligi. <2> Et ideo more gentium et
condicione uirili filium te praesenti munere procreamus, ut competenter per arma
nascaris, qui bellicosus esse dinosceris. damus tibi quidem equos enses clipeos
et reliqua instrumenta bellorum: sed quae sunt omnimodis fortiora, largimur tibi
nostra iudicia. summus enim inter gentes esse crederis, qui Theoderici sententia
comprobaris. <3> Sume itaque arma mihi tibique profutura. ille a te deuotionem
petit, qui te magis defensare disponit: proba tuum animum et opus non habebis
obsequium. adoptat te talis, de cuius gente tu potius formideris. nota sunt enim
Erulis Gothorum deo iuuante solacia. nos arma tibi dedimus: gentes autem sibi
olim uirtutum pignora praestiterunt. <4> Salutantes proinde gratia competenti
reliqua per illum et illum legatos nostros patrio sermone mandamus, qui uobis et
litteras nostras euidenter exponant et ad confirmandam gratiam quae sunt dicenda
subiungant.
III. SENARIO V. I. COMITI PRIVATARUM THEODERICUS REX.
<1> Ad ornatum palatii credimus pertinere aptas dignitatibus personae eligere,
quia de claritate seruientium crescit fama dominorum. tales enim prouehere
principem decet, ut quotiens procerem suum fuerit dignatus aspicere, totiens se
recta iudicia cognoscat habuisse. moribus enim debet esse conspicuus, qui datur
imitandus. facile est quemque sibi degere: multis autem electum uiuere decet.
<2> Cape igitur per indictionem tertiam illustris comitiuae nostri patrimonii
dignitatem, quam tibi non inmerito tribuit regalis auctoritas. diu namque
nostris ordinationibus geminum mutuatus obsequium et consilii particeps eras et
disposita laudabili assumptione complebas. subisti saepe arduae legationis
officium: restitisti regibus non impar assertor, coactus iustitiam nostram et
illis ostendere, qui rationem uix poterant cruda obstinatione sentire. non te
terruit contentionibus inflammata regalis auctoritas, subiugasti quin immo
audaciam ueritati et obsecutus ordinationibus nostris in conscientiam suam
barbaros perculisti. <3> Quid studium tuum longa lucubratione sollicitum et
laboris continui inculpabile referamus obsequium? usus es sub exceptionis
officio eloquentis ingenio: fauebat ipse sui delectatus auditor, dum meliora
faceres, cum recitare coepisses. pronuntiatio tua nostrum delectabat arbitrium,
quia tantum dictantium reficiebas animum, quantum se lassare poterat cura
cogitantum. fuit quoque in te pars altera uitae laudabilis, quod arcana nostra
morum probitate claudebas, multorum conscius, nec tamen, cum plura nosses,
elatus. collegis gratia, superioribus humilitate placuisti. <4> Sic omnium pro
te factus est unus animus ex magna diuersitate sociatus. carpes certe probatae
institutionis gratissimum fructum, quando prouecus tuus ita potuit omnes laetos
efficere, ut uniuersi in te iudicent sua desideria profecisse. tuere igitur hanc
uirtutum amabilem praeclaramque constantiam nostraeque domus auctoritate
subnixus tanto studiosius gratiam quaere, quantum te locum beneficiis respicis
inuenisse. tende itaque adhuc bonis actibus tuos ad potiora successus, sciens
gratiam nostram in illo semper augeri, qui se dignum adepto culmini desiderat
inueniri.
IIII. SENATUI URBIS ROMAE THEODERICUS REX.
<1> Gloriosum quidem nobis est, patres conscripti, honores passim impendere, sed
laudabilius bene meritis digna praestare. quicquid enim talibus tribuimus, pro
generali potius utilitate largimur. cunctis siquidem proficit recti tenax
prouectus nec locus relinquitur iniuriae, cum ad bonos peruenit regula
disciplinae. <2> Hoc itaque praeclaro desiderio illustrem uirum Senarium
comitiuae patrimonii dignitate subueximus, qui uenalitatis obscura animi
claritate refugiat, qui calumnia non laetetur, nec patrimonii auctoritate
suffultus de nostro sibi faciat terrore compendium, sed ius aequabile possit
tenere cum ceteris, unde nobis placere respicit seruientes. haec de illo futura
promittere praeteritorum facit temporum fides. <3> In ipso quippe adulescentiae
flore palatia nostra meritis maturus intrauit et, quod robustas quoque fatigat
aetates, nullo deceptus nouitatis errore ad imperantis conuersus arbitrium
effectum bonarum praestitit iussionum, nunc ad colloquia dignus, nunc ad
exceptiones aptissimus, frequenter etiam in honorem legationis electus, cuius
multiplex meritum incertum apud nos reddebat officium. non enim unius loci uir
debet dici, a quo multa uidentur impleri. <4> Sed haec amplius commendabat
humilitas, quae tam clara quam rara est. nouum est enim sub amore principis
custodire modestiam, quia gaudia semper animos inquietant: modus enim raro
laetis rebus imponitur, qui magis in tristibus inuenitur. <5> Verum inter haec
stupenda meritorum originis quoque simili claritate resplendet, ut haereas, qua
parte sit ditior, cum copiosius utraque possideat. habent ergo singulatim
distributa praeconium, iuncta miraculum. quapropter, patres conscripti, assurgat
primaeuis introeuntibus cana Libertas. nihil de genio uestro subtrahitur, quando
uenientium nouitas honorabiliter inuitatur. parentes publici de clementia
nominati, duplex uos ratio benignitatis inuitet: incipiens mereatur gratiam,
prouectus fauorem.
V. AMABILI VIRO DEVOTO COMITI THEODERICUS REX.
<1> Nullum decet nostras grauanter suscipere iussiones, quae magis utilitates
noscuntur extollere deuotorum. in Gallicana igitur regione uictualium cognouimus
caritatem, ad quam negotiatio semper prompta festinat, ut empta angustiore
pretio largius distrahantur. sic euenit ut et uenditoribus satisfiat et illis
prouisio nostra subueniat. <2> Atque ideo deuotio tua praesenti auctoritate
cognoscat omnes nauicularios Campaniae, Lucaniae siue Tusciae fideiussoribus
idoneis se debere committere, ut cum uictualibus speciebus tantum proficiscantur
ad Gallias, habituri licentiam distrahendi sic ut inter emptorem uenditoremque
conuenerit. <3> Grande commodum est cum indigentibus pacisci: quando fames totum
solet contemnere, ut suam necessitatem possit explere. nam cum ambitioni suae
seruiat, prope modum donare uidetur, qui uendit rogatus. ad saturatos cum
mercibus ire certamen est: suo autem pretium poscit arbitrio, qui uictualia
potest ferre ieiunis.
VI. SYMMACHO V. I. PATRICIO THEODERICUS REX.
<1> Rationales petitiones supplicum libenter amplectimur, qui etiam non rogati
iusta cogitamus. quid est enim dignius quod die noctuque assidua deliberatione
uoluamus, nisi ut rem publicam nostram sicut arma protegunt, aequitas inuiolata
custodiat? spectabilis itaque Valerianus in Syracusana ciuitate consistens
reuerti se ad lares proprios supplicauit, qui studiorum causa liberos suos ad
Romanam ciuitatem deduxit. <2> Quos illustris magnificentia tua ex nostra
continens iussione in supra dicta urbe faciat commorari: nec illis liceat ante
discedere, nisi hoc noster proloquatur affatus. ita enim et illis studiorum
prouectus adquiritur et nostrae iussionis reuerentia custoditur. <3> Non ergo
sibi putet impositum, quod debuit esse uotiuum. nulli sit ingrata Roma, quae
dici non potest aliena, illa eloquentiae fecunda mater, illa uirtutum omnium
latissimum templum. sentiatur plane, quod clarum est: non sine gratia esse
creditur, cui habitatio tanta praestatur.
VII. SENARIO V. I. COMITI PRIVATARUM THEODERICUS REX.
<1> Propositum nostrae pietatis est iniuste periclitantium subleuare fortunas,
quia quod aliena ui constat impositum, trahere non possumus ad delictum. iniquum
est enim, ut hominis uitio deputetur quod eius uoluntate non regitur: et illud
imputetur periclitanti, unde raro datur euadere. <2> Atque ideo sublimitas tua
prosecutores frumentorum, qui de Sicilia fuerant ad Gallias destinati,
lacrimabili nos aditione pulsasse cognoscat, dum susceptum onus promouissent in
pelagus, aduersis flatibus fuisse susceptum: ubi fatiscente compage trabium,
omnia uis absorbuit undarum nec quicquam miseris de aquarum nimietate nisi solas
lacrimas restitisse. <3> Unde illustris sublimitas tua, praesenti auctoritate
commonita, modiationem tritici quam sub hac sorte perisse probauerint,
supradictis prosecutoribus sine aliqua faciat cunctatione reputari. crudelitatis
enim genus est ultra naufragium uelle desaeuire et illos ad dispendia cogere,
quibus inopem uitam probantur inmania elementa cessisse.
VIII. HONORATIS POSSESSORIBUS ET CURIALIBUS FOROLIVENSIBUS THEODERICUS REX.
<1> Graue uideri non debet, quod nostra ordinatione censetur, quia nouimus
aestimare, quod uos oportet implere. a nobis quippe potestis rationabiliter
custodiri, quibus profecistis non grauati. proinde deuotioni uestrae praesenti
auctoritate decernimus, ut accepto pretio competenti de locis uestris ad
Alfuanum trabes sine aliqua dilatione deuehatis, quatenus et nostra ordinatio
sortiri possit effectum et perceptis mercedibus nec uos uideamini sustinere
dispendium.
VIIII. OSVIN V. I. COMITI THEODERICUS REX.
<1> Innocentiae professio est nostram elegisse praesentiam, ubi nec uiolentiae
locus datur nec auaritiae uitia formidantur. Maurentius atque Paula patris
auxilio nudati multorum se iniuriis testantur exponi: quorum adulescentia peruia
uidetur incommodis, cum facile possit subrepi uel iuuenibus destitutis. et ideo
nostrum merentur praesidium, a quibus se calliditas non abstinet improborum.
proinde sublimitas uestra tenorem praesentis iussionis agnoscens supra memoratos
adultos, si quis iurgantium pulsare maluerit, ad nostrum comitatum nouerit
dirigendos, ubi et innocentia perfugium et calumniatores ius possint inuenire
districtum.
X. IOHANNI V. S. CONSULARI CAMPANIAE THEODERICUS REX.
<1> Foedum est inter iura publica priuatis odiis licentiam dare nec ad arbitrium
proprium uindicandus est inconsultus feruor animorum. iniquum quippo nimis est
quod delectat iratum. furentes iusta non sentiunt, quia dum commoti in uindictam
saeuiunt, rerum temperantiam non requirunt. hinc est quod legum reperta est
sacra reuerentia, ut nihil manu, nihil proprio ageretur impulsu. quid enim a
bellica confusione pax tranquilla distabit, si per uim litigia terminentur? <2>
Prouincialium igitur Campaniae atque Samnii suggestione comperimus nonnullos
neglecta temporum disciplina ad pignorandi se studia transtulisse et quasi
edicto misso per uulgus licentiam creuisse uitiorum. his multo acerbiora
iungentes: alienis debitis ad solutionem alios trahi solamque causam probabilem
uideri, si aliqua debitori potuit uicinitate coniungi. o iniquum persuasionis
errorem! diuiduntur causae germanis: filius obligationibus paternis, si non sit
heres, exuitur: uxor maritalibus debitis nisi per successionis uincula non
tenetur: et audacia ad solutionem trahit extraneos, cum absoluant iura
coniunctos. hoc hactenus fieri nostri ignorantia fortasse pertulerit: nunc
necesse est remedium de legibus habeat, quod nostram potuit intrare notitiam.
<3> Proinde edictalis programmatis tenore comperto spectabilitas uestra in
cunctorum faciat notitiam peruenire, ut quisquis quod repetere debuisset
pignorandi studio fortassis inuaserit, uoce iuris amittat nec liceat cuiquam sua
sponte nisi obligatum forsitan pignus auferre. si uero alterum pro altero, quod
nefas dictu est, pignorare maluerit, in duplum cui uim fecit direpta restituat,
quia scelera damna plus cohibent et sola detrimenta cogitant qui pudoris fecere
iacturam. quem uero ab hac redhibitione foedum patrocinium tenuitatis excusat,
pro admissi qualitate facinoris in eum fustuario supplicio uindicetur. non enim
patimur impunitum quod nolumus esse permissum.
XI. SENARIO V. I. COMITI PRIVATARUM THEODERICUS REX.
<1> Spes est certa remedii uota supplicum ad prudentis remisisse iudicium, ut
per ordinationis beneficium confusionis abrogetur incertum. proinde magnitudo
tua, cuius ordinationi uidetur subiacere prouincia, inter possessores Volienses
atque curiales causam diligenti examinatione discutiat, quatenus inter eos
sopiatur querela a uobis patefacta iustitia. non enim decet post audientiam
uestram negotium trahi, a quo post alios iudices debuisset audiri.
XII. MARABADO V. I. COMITI ET GEMELLO V. S. THEODERICUS REX.
<1> Propositi nostri est, ut prouincias nobis deo auxiliante subiectas, sicut
armis defendimus, ita legibus ordinemus, quia semper auget principes obseruata
iustitia et quantum probabili institutione uiuitur, tantum summis adhuc
prouectibus aggregatur. <2> Arcotamia itaque illustris femina flebiliter
ingemiscens nepotis sui calamitatem tali conquestione deplorauit, dum semper
auiae cura tenerior est suorum, asserens Aetheriam nurum suam, mariti postposita
dilectione, cuidam se Liberio iugali foedere sociasse et cum ornatior cupit
nouis thalamis apparere, studuerit prioris uiri facultates euertere, allegans
ditatam filiorum spoliis, quibus magis decuit congregari. <3> Ideoque nos, qui
desideria supplicantum consueuimus remittere ad statuta diualium sanctionum, ut
nec insinuationem supplicum renuamus nec aduersarii negotium credula facilitate
damnemus, sublimitatis uestrae iudicio hanc causam legibus committimus
audiendam, ut omni inciuilitate summota mediis sacrosanctis euangeliis cum
tribus honoratis, quos partium consensus elegerit, qui legum possint habere
notitiam, quicquid prisci iuris forma constituit inter eos, considerata
disciplina nostri temporis, proferatis, quia non decet per uim eos aliquid
agere, qui ad nostra meruerunt regimina peruenire.
XIII. SENARIO V. I. COMITI PRIVATARUM THEODERICUS REX.
<1> Emolumenta deesse laborantibus non oportet, ut et bonae spei aditus
aperiatur et desudantium querela iusta compensatione claudatur. atque ideo
prouidentiam nostram, quae omnes rei publicae partes sub caelesti fauore
circumspicit, ordinasse cognosce, ut Colosseo illustri uiro pro laboribus et
meritis ad Sirmiensem Pannoniam destinato iuxta consuetudinem ueterem uictualia
praebeantur, quatenus, dum memorato uiro necessaria fuerint praeparata, locus
iniustis praesumptionibus abrogetur. <2> Disciplinam siquidem non potest seruare
ieiunus exercitus, dum quod deest semper praesumit armatus. habeat quod emat, ne
cogatur cogitare quod auferat. necessitas moderata non diligit, nec potest
imperari multis quod nequeunt custodire paucissimi.
XIIII. GESILAE SAIONI THEODERICUS REX.
<1> Magni peccati genus est alienis debitis alterum praegrauare, ut qui potest
exigi non mereatur audiri. sua quemque damna respiciant et is soluat tributum,
qui possessionis noscitur habere compendium. atque ideo praesenti tibi
auctoritate delegamus, ut Gothi per Picenum siue Tuscias utrasque residentes te
imminente cogantur exsoluere debitas functiones. <2> In ipsis enim initiis
comprimendus excessus est, ne foeda imitatio quasi turpis scabies paulatim
reliquos comprehendat. si quis ergo iussa nostra agresti spiritu resupinatus
abiecerit, casas eius appositis titulis fisci nostri uiribus uindicabis, ut qui
iuste noluit parua soluere, rationabiliter uideatur maxima perdidisse. qui enim
debent ad fiscum celerius esse deuoti, nisi qui capiunt commoda donatiui, quando
amplius de nostra humanitate recipiunt quam stipendii iure praestetur? nam si
liberalitatis nostrae causa tractetur, nos potius uoluntaria tributa soluimus,
qui fortunas omnium subleuamus.
XV. BENENATO V. S. THEODERICUS REX.
<1> Illustris et magnifici uiri comitis patrimonii suggestione comperimus
dromonarios uiginti et unum de constituto numero mortis incommodo fuisse
subtractos. unde prouidentiam nostram, cuius est proprium quod casu subducitur
recuperare consilio, hoc statuisse cognosce, ut supra dictos dromonarios probare
sine aliqua dubitatione festines, qui tamen ad hoc opus possint idonei reperiri.
<2> Remigum enim labor operosus ualentes animo et uiribus quaerit, ut
confidentia mentis procellis obuiare possit undosis. quid enim audentius quam
illud infidum ac uastissimum mare intrare paruo nauigio, quod eluctari facit
desperationis sola praesumptio? quapropter iussis te nostris hanc cautelam
conuenit adhibere, ut querelam de congregatis debilibus non facias, cum nos
robustissimos quaesisse cognoscas.
XVI. SENATUI URBIS ROMAE THEODERICUS REX.
<1> Utilitatis publicae causa, quam noster animus semper aspectat, uirum
illustrem comitem Arigernum ciuem paene uestrum dudum ad Gallias aestimauimus
dirigendum, ut eius maturitate consilii titubantium potuissent corda firmari.
nouitatem quippe sollicitam prudentes conuenit habere rectores, ut quemadmodum
fuerit uitae formatus ordo, sic currat instituta deuotio. his rebus ad nostra
uota compositis et gloriam ciuilitatis retulit et quod inter uos didicit
diligenter ostendens et bellorum insignia reportauit. <2> Quem desideratum,
sicut putamus, coetui uestro reddidimus, ut qui uobis longa aetate placuit, nunc
gratior fiat, cum eum adiecta bona commendant. quapropter disciplinae se
praefati uiri Romanus ordo restituat et quod quietis amore praecipitur, deuotis
animis impleatur: quatenus et excessibus tollatur licentia et quod optamus
maxime, locum nequeat inuenire uindicta. <3> Si qua etiam per eius absentiam
culpa prouenit, inter uos iustitiae consideratione corrigite, sicut nobilitati
uestrae conuenit agere, cui semper probitas placet: quoniam nos specialiter
iniunxisse cognoscite, ut error, qui ab auctoribus suis minime fuerit emendatus,
legum districtione resecetur. pareatur ergo, patres conscripti uiro multis
temporibus iam probato, cui necesse est praedicanda sequi, qui se hactenus sub
uestra omnium laude tractauit et in tanta frequentia nullius repperit aduersa
iudicia.
XVII. IBBAE VIRO SUBLIMI DUCI THEODERICUS REX.
<1> Definitam rem ab antiquo rege, quam tamen constat rationabiliter esse
decretam, nulla uolumus ambiguitate titubare, quia decet firmum esse quod
commendatur probabili iussione. cur enim priora quassemus, ubi nihil est quod
corrigere debeamus? <2> Atque ideo praesenti tibi auctoritate praecipimus, ut
possessiones Narbonensis ecclesiae secundum praecelsae recordationis Alarici
praecepta, a quibuslibet peruasoribus occupatae teneantur, aequitatis facias
contemplatione restitui, quia uersari nolumus in ecclesiae dispendio
praesumptiones illicitas, dum nostra deceat tempora sedare confusa. <3> Esto
contra talia omnino sollicitus, ut qui es bello clarus, ciuilitate quoque
reddaris eximius. sic et arma tua deo iuuante corroboras, si iustitiam
mediocribus seruare contendas. improbis enim non potuisse resistere non
praeuales excusare, quando omnes tibi libenter cedunt, quem gloriosum in
bellorum certamine cognouerunt. ignauus forte audacibus iubere nihil possit:
nemo plus praesumentibus imperat, quam quem sua facta commendant.
XVIII. ANNAE V. S. COMITI THEODERICUS REX.
<1> Consuetudo est nostrae clementiae probatae nobis fidei agenda committere, ut
cum iudices delegamus praeditos tractatu maturo, locum praua nequeat inuenire
surreptio. dudum siquidem ad nos multorum suggestione peruenit Laurentium
presbyterum effossis cineribus funestas diuitias inter hominum cadauera
perscrutatum concussionemque mortuis intulisse, quem oportet uiuentibus quieta
praedicare. non abstinuisse perhibetur tam crudeli contagio piis dicatas
consecrationibus manus: aurum exsecrabili quaesisse fertur affectu, quem suam
decuisset egentibus dare substantiam uel sub aequitate collectam. <2> Quod te
diligenti examinatione praecipimus indagare, ut, si ueritati dicta perspexeris
conuenire, hominis ambitum eo tantum fine concludas, ne possit supprimere quod
eum non licuit inuenire. scelus enim, quod nos pro sacerdotali honore
relinquimus impunitum, maiore pondere credimus uindicandum.
XVIIII. GEMELLO V. S. THEODERICUS REX.
<1> Decet principalem prouidentiam fessa refouere, ut asperitatem casuum mitiget
lenitas iussionum. non enim sentitur incommodum, si, quod per aduersitatem
constat oppressum, concessa prosperitas ostenderit subleuatum. <2> Siliquatici
namque praestationem, quam rebus omnibus nundinandis prouida definiuit
antiquitas, in frumentis, uino et oleo dari praesenti tempore non iubemus, ut
haec remissio solutionis copiam possit praestare prouinciis et respirent
aliquatenus fessi praesentis salubritate decreti. <2> Quis enim ad uendendum non
incitetur largius, cui solita dispendia subtrahuntur? portus nostros nauis
ueniens non pauescat, ut certum nautis possit esse refugium, si manus non
incursarint exigentum, quos frequenter plus affligunt damna, quam solent nudare
naufragia. sit hoc forsitan sub quiete tolerandum: nunc autem, dum
prouincialibus praestare cupimus, mercium dominis interim consulamus.
XX. GEBERIC V. S. THEODERICUS REX.
<1> Si desideramus locum beneficiis inuenire, ut titulos nostrae possimus
pietatis erigere, quanto magis aliena beneficia intacta uolumus defendi, qui
propria cupimus sponte largiri, maxima quando et illud conscientiae nostrae
reponitur, quod de fisco sub antiqua sollemnitate praestatur! proinde uiri
uenerabilis episcopi Constantii supplicatione comperimus sacrosanctae ecclesiae
ipsius unum iugum, ueterum principum pietate collatum, et nunc quorundam
usurpatione uiolenta retineri. <2> Sed quia nos uti nullum uolumus fraudibus
suis, praesertim cum in dispendio pauperum detestabili mente uersetur, praesenti
auctoritate decernimus, ut ea, quae retro principum constiterint humanitate
deputata, supra memorata ecclesia sine aliqua imminutione percipiat, manente
poena etiam peruasori. qui et ueterum dona et ecclesiae probatur uiolasse
compendia.
XXI. GEMELLO V. S. THEODERICUS REX.
<1> Quamuis efficaciam tuam insistere credamus iniunctis et studiose deflectere
quae nobis cognoueris displicere, tamen sollicitum ammonitio nostra non deserit,
ut instructior reddaris, dum infra scriptis breuibus definita susceperis.
proinde ordinatio nostra nulli uideri debet ingrata, cum necessitas temporis
excuset onera iussionis. <2> Esto itaque ad iniuncta sollicitus, quia licet sit
semper adhibenda, maxima tamen utilis est in necessitate custodia. parebis ergo
commonitus, ut sic possis cum prouincialibus agere, quemadmodum nos eis respicis
uelle praestare, quatenus securus de nostra gratia consequaris, quicquid
sollicitus de prauo studio habere contempseris.
XXII. ARGOLICO V. I. P. U. THEODERICUS REX.
<1> Intolerabilis excessus est, qui supernae maiestatis adfectat iniuriam et
oblitus pietatis crudelia sectatur erroris. quem enim sperabit ueniae locum, qui
reuerendum contempsit auctorem? abscedat ritus e medio iam profanus: conticeseat
poenale murmur animarum. uersari non licet in magicis artibus temporibus
Christianis. <2> Magnitudinis itaque tuae relatione comperimus Basilium atque
Praetextatum, artis sinistrae iam diu contagione pollutos, in accusationem tui
examinis personarum intentione deductos. super qua re nostram te asseris
spectare sententiam, ut confidentius fiat quod pietatis nostrae mandat
auctoritas. <3> Sed nos, qui nescimus a legibus discrepare, quorum cordi est in
omnibus moderatam tenere iustitiam, praesenti auctoritate decernimus, ut quinque
senatoribus, id est magnificis et patriciis uiris Symmacho Decio Volusiano atque
Caeliano nec non illustri uiro Maximiano, hanc causam legitima examinatione
pensetis. et per omnia iuris ordine custodito, si crimen quod intenditur fuerit
comprobatum, ipsarum quoque legum districtione plectatur, ut rei abditi atque
secreti per hoc uindictae genus a culpis talibus arceantur, quos ad leges
trahere non potest incerta notitia. <4> De qua re illustri uiro comiti Arigerno
praecepta direximus, ut omnium uiolenta defensione summota, si se occulunt, ad
iudicium protrahat impetitos et uobiscum in hac causa residens nec opprimi
faciat innoxios nec leges sinat euadere criminosos.
XXIII. ARIGERNO V. I. COMITI THEODERICUS REX.
<1> Quamuis oporteat commissam tibi disciplinam Romanae ciuitatis in omnibus
custodiri, tamen in eis maxime studiosior esse debes, quae nostra tibi
auctoritate delegata cognoscis, ut circa te augeat gratiam custodita iustitia et
augmenta sumas nostri iudicii, qui nobis hactenus de integritate placuisti. <2>
Praefectus igitur urbis sua nobis relatione declarauit Basilium atque
Praetextatum magicis artibus inuolutos impeti accusatione multorum: quos elapsos
intimat mentis alienatione custodum. eos te praecipimus ubicumque repertos ad
iudicium quinqueuirale ducere, quod in praesenti negotio nostra delegauit
auctoritas, ubi te residere censemus, ut uiolenta omnium defensione summota hanc
causam discuti facias legibus et finiri. <3> Et si rei criminis, cuius
impetuntur, fuerint approbati, sententiam subeant, quam iuris definita
sanxerunt. si uero innocentia eorum detestabili pulsatur inuidia, opprimi eos
nulla ratione patiaris, quia in omnibus causis consideratione diuina illud fieri
uolumus, quod opinionem nostrae pietatis accumulat.
XXIIII. HELPIDIO DIACONO THEODERICUS REX.
<1> In lucrum cedunt quae bene meritis conferuntur et de ipso munere magis
adquiritur, cum optimis digna praestantur. petitionis tuae proinde tenore
comperimus loca in Spoletina ciuitate, quae iam longo situ squalor uetustatis
obnuberat, splendorem reparationis expetere, ut rebus antiquitate confusis
nouitatis facies adulta reddatur et beneficio tuo rediuiua consurgant, quae
annositate inclinata corruerant. quod nos, respectu meritorum tuorum et impensi
longa sedulitate seruitii, libenti animo duximus annuendum, ut et uotis iusta
poscentium tribuatur effectus et ciuitati reparationis crescat ornatus. <2>
Atque ideo petitioni tuae robur praesenti humanitate largimur, ut porticum cum
areola post Turasi thermas, si tamen publico usui non deseruit, absoluta
liberalitate potiaris: quia in licentiam reparationis accipiuntur potius praemia
quam donantur. hac igitur auctoritate suffultus in supra dictis locis
aedificandi sume fiduciam nec aliquam in posterum metuas quaestionem, cum te et
ciuitatis tuetur utilitas et reuerenda principis uoluntas.
XXV. ARGOLICO V. I. P. U. THEODERICUS REX.
<1> Constat eum de se praesumere, qui ad sacri ordinis cupit fastigia peruenire.
merita enim suggerunt bonae appetentiae nisus et in qualitate desiderii potest
mens honesta cognosci. quis enim palaestricae artis ignarus in stadium
luctaturus introeat? aut quis certamini misceatur, quod uirtutis conscientia non
suadet? in ipsis conatibus aegra languescunt, quae meritorum praesumptionibus
non iuuantur. <2> Praeconiorum ergo professio est collegium desiderasse summorum
bonumque de se iudicium tradit, qui celsae gradus expetit dignitatis. his igitur
desideriis pietas se nostra libenter indulget, qui etiam in spe erigimus uota
marcentia, ut, dum prouectus quaeritur, probitatis studia plus amentur. <3>
Proinde illustris magnificentia tua Petrum parentum luce conspicuum suaque iam
grauitate senatorem in album sacri ordinis secundum priscam consuetudinem curet
referri, ut et tanto coetui proficiat numerus et candidato de sacro ordine
crescat ornatus.
XXVI. UNIVERSIS MASSILIA CONSTITUTIS THEODERICUS REX.
<1> Libenti animo antiqua circa uos beneficia custodimus, cum noua utilitatibus
uestris praestare cupiamus. seruare quippe terminos ignorat humanitas et
nouellis decet blandiri beneficiis post longa tempora restitutis. <2> Proinde
immunitatem uobis, quam regionem uestram constat principum priuilegio
consecutam, hac auctoritate largimur nec uobis aliquid nouae praesumptionis
patiemur imponi, quos ab omni uolumus grauamine uindicari. censum praeterea
praesentis anni relaxat uobis munificentia principalis, ut et illa possitis
accipere quae uos non contigit postulasse. ipsa est enim perfecta pietas, quae
antequam flectatur precibus, nouit considerare fatigatos.
XXVII. TUTIZAR SAIONI THEODERICUS REX.
<1> Detestabilis est quidem omnis iniuria et quicquid contra leges admittitur
iusta execratione damnatur: sed malorum omnium probatur extremum inde detrimenta
suscipere, unde credebantur auxilia prouenire. exaggerat enim culpam in
contrarium uersa crudelitas et maius reatui pondus est inopinata deceptio. <2>
Vir spectabilis itaque Petrus ammiranda nobis sorte conquestus est saionis
Amarae tuitionem, quam ei contra uiolentos indulsimus, in se potius fuisse
grassatam, ita ut ictum gladii in se demersum aliquatenus postium retardaret
obiectio: subiecta est uulneri manus, quae ut in totum truncata non caderet,
ianuarum percussa robora praestiterunt: ubi lassato impetu corusca ferri acies
corporis extrema perstrinxit. <3> O execrabilem casum! impugnauit hominem
auxilium suum et solacii prosperitate subtracta creuit ex defensione necessitas.
his multo acerbiora subiungens, ut quasi laesio ueniret ad pretium, ita scelus
proprium enormi exactione taxatum est. atque ideo iuste in illos pietatis
nostrae ira consurgit, qui benigna iussa in truculenta ministeria mutauerunt.
nam quae erunt refugia supplicantibus, si et nostra beneficia uulnerabunt? <4>
Proinde praesenti iussione censemus, ut quicquid suprascriptus Amara commodi
nomine de causis memorati supplicantis accepit, quasi oppugnator ingratus a te
constrictus in duplo ei cogatur exsoluere: quia sub poena restitui dignum est,
quod improba temeritate constat extortum. <5> De plaga uero, quam educto gladio
temerarius praesumptor inflixit, ad iudicium comitis Dudae saepe dictus saio te
compellente ueniat audiendus, ut secundum edictorum seriem quae male commissa
claruerint, sine aliqua dilatione componat. tuitionem uero postulanti contra
inciuiles impetus ex nostra iussione salua ciuilitate praestabis, non exemplo
accusati, sed consideratione decenter electi.
XXVIII. DUDAE V. S. COMITI THEODERICUS REX.
<1> Conscientiam probamus, cui iudicanda committimus, quia dignus est inter
alios sequenda decernere, qui sibi modum uisus est legitimae conuersationis
imponere. Petrus itaque uir spectabilis Amaram saionem nostrum, qui contrario
omine pro eius tuitione directus est, educto gladio se asserit uulnerasse
defensoremque fecisse, quod uix inimicus potuisset audere. hoc te et legitima
uolumus disceptatione cognoscere et probabili sententia terminare: quatenus
nullus temptare ausus sit, quod nobis displicere cognoscit.
XXVIIII. ARGOLICO V. I. P. U. THEODERICUS REX.
<1> Si loci uestri cogitaretur auctoritas, si reuerentiae cura Romanae, ultro
debueratis expetere, in quibus arguimini. quid enim praesenti tempore potuistis
culmini urbano tam proprium quam senatus crementa cogitare, quando famae
praesulis proficit, quod ordo sacer adquirit? <2> Sed quantum uiri clarissimi
Armentarii testatur missa suggestio, in contrarium foedo ambitu de mora
quaeritis commoda, cuius uos optare debuisse constat augmenta. quid enim amplius
esse possit incongruum, quam nostris iussionibus expeditis supplicantium uota
suspendere et post sacrae praeceptionis affatum, si dici fas est, adhuc regium
suspendisse iudicium? <3> Sed nos, quibus cordi est post primam culpam non
statim desiderare uindictam, ad ammonitionem potius iussa conuertimus, ne sit
nostra districtio nimia, quam lenis patientia non praecedat. ideoque praesenti
auctoritate decernimus, ut iussionibus nostris nulla dilationis calliditas
afferatur, quia non habet ueniae locum, qui delinquit ammonitus.
XXX. ALBINO V. I. PATRICIO THEODERICUS REX.
<1> Decet quidem cunctos patriae suae augmenta cogitare, sed eos maxime, quos
res publica sibi summis honoribus obligauit, quia ratio rerum est, ut eum
necesse sit plus debere, qui uisus est maiora suscipere. <2> Porrecta itaque
supplicatione testatus es Curuae porticus, quae iuxta domum Palmatam posita
forum in modum areae decenter includit, superimponendis fabricis licentiam
condonari, ut et priuatarum aedium habitatio protendatur et antiquis moenibus
nouitatis crescat aspectus. ita fit, ut, quod per incuriam poterat labi,
manentum uideatur diligentia sustineri, quia facilis est aedificiorum ruina
incolarum subtracta custodia et cito uetustatis decoctione resoluitur, quod
hominum praesentia non tuetur. <3> Unde nos, qui urbem fabricarum surgentium
cupimus nitore componi, facultatem concedimus postulatam, ita tamen, si res
petita aut utilitati publicae non officit aut decori. quapropter rebus speratis
securus innitere, ut dignus Romanis fabricis habitator appareas perfectumque
opus suum laudet auctorem. nulla enim res est, per quam melius possit agnosci et
prudentis ingenium at largitatis effectus.
XXXI. AEMILIANO VIRO VENERABILI EPISCOPO THEODERICUS REX.
<1> Ad finem debet perducere, quae prudentum intentio uisa est suscepisse, quia
sicut perfecta laudem pariunt, ita uituperationem generant, quae in mediis
conatibus aegra deseruntur. defectus enim rerum aut consilium titubare aut uires
arguit defuisse. quapropter sanctitas uestra a tali oblocutione refugiens, quae
in aquae ductu reficiendo probabili cura ex nostra auctoritate suscepit,
celeriter ad effectum faciat peruenire. <2> Nam quid aptius quam ut sitienti
plebi prouideat aquas sanctissimus sacerdos et humana prouidentia satiet quos
etiam miraculis pascere debuisset? imitaris enim antiquissimum Moysen, qui
Israhelitico populo longa ariditate siccato de saxi sterilitate copiosos latices
eduxit et ad implendum miraculum inde fecit currere umidos liquores, ubi erat
sicca durities. tu autem si fontes irriguos saxorum constructione deducis, hoc
labore tuo praestas populis, quod ille miraculis.
XXXII. DUDAE SAIONI THEODERICUS REX.
<1> Cum in omnibus causis uelimus iustitiam custodiri, quia regni decus est
aequitatis affectus, in eis maxime quae fisci nostri nomine proponuntur
nequaquam detestabilis calumnia in inuidiam regnantes affligat. patimur enim
superari salua aequitate per leges, ut inter arma semper possimus esse uictores.
nam quem licenter subiectus superat, non debellat aduersus. <2> Marini itaque
relatione comperimus res Tufae apud Iohannem quondam sub emissione chirographi
fuisse depositas. et quia nobis competere manifestum est quod ad proscriptum
poterat pertinere, ideoque praesenti auctoritate praecipimus, ut uxorem supra
dicti Iohannis filiumque eius Ianuarium moderata exsecutione conuenias. <3> Qui
si intentata iniuste se retinere cognoscunt, aequitatis consideratione
restituant: minus ne, competenti sponsione praemissa ad consularem Campaniae
ueniant legibus audiendi, ut coram partibus positis te imminente, quod forma
continet sanctionum diualium, censeatur: ita tamen, ut nullo praeiudicio, nulla
iniuria, nullo damno innocentia praegrauetur, ne alienae accusationis inuidiam
tuam facere uidearis offensam.
XXXIII. UNIVERSIS IUDAEIS GENUA CONSTITUTIS THEODERICUS REX.
<1> Custodia legum ciuilitatis est indicium et reuerentia priorum principum
nostrae quoque testatur deuotionis exemplum. quid enim melius quam plebem sub
praecepto degere uelle iustitiae, ut conuentus multorum disciplinabilium sit
adunatio uoluntatum? hoc enim populos ab agresti uita in humanae conuersationis
regulam congregauit. haec ratio a feritate diuisit, ne arbitrio casuali
uagarentur, quos regi consilio diuina uoluerunt. <2> Oblata itaque supplicatione
deposcitis priuilegia uobis debere seruari, quae Iudaicis institutis legum
prouida decreuit antiquitas: quod nos libenter annuimus, qui iura ueterum ad
nostram cupimus reuerentiam custodiri. atque ideo praesenti auctoritate
censemus, ut quaecumque legum statuta mouerunt, circa uos illibata seruentur,
quatenus quod ad ciuilitatis usum constat esse repertum, perpeti deuotione
teneatur.
XXXIIII. DUDAE SAIONI THEODERICUS REX.
<1> Prudentiae mos est in humanos usus terris abdita talenta reuocare
commerciumque uiuentium non dicere mortuorum, quia et nobis infossa pereunt et
illis in nullam partem profutura linquuntur. metallorum quippe ambitus solacia
sunt hominum. nam diuitis auri uena similis est reliquae terrae, si iaceat: usu
crescit ad pretium, quando et apud uiuos sepulta sunt, quae tenacium manibus
includuntur. <2> Atque ideo moderata iussione decernimus, ut ad illum locum, in
quo latere plurima suggeruntur, sub publica testificatione conuenias: et si
aurum, ut dicitur, uel argentum fuerit tua indagatione detectum, compendio
publico fideliter uindicabis: ita tamen ut abstineatis manus a cineribus
mortuorum, quia nolumus lucra quaeri, quae per funesta possunt scelera reperiri.
aedificia tegant cineres, columnae uel marmora ornent sepulcra: talenta non
teneant, qui uiuendi commercia reliquerunt. <3> Aurum enim sepulcris iuste
detrahitur, ubi dominus non habetur: immo culpae genus est inutiliter abditis
relinquere mortuorum, unde se uita potest sustentare uiuentium. non est enim
cupiditas eripere, quae nullus se dominus ingemiscat amisisse. primi enim
dicuntur aurum Aeacus, argentum Indus rex Scythiae repperisse et humano usui
summa laude tradidisse. quod nos in contrarium neglegere non debemus, ne sicut
latentia cum laude sunt prodita, ita inuenta cum uituperatione uideantur esse
neglecta.
XXXV. ACTORIBUS ALBINI V. I. THEODERICUS REX.
<1> Consulto prouida decreuit antiquitas minores contractus liberos non habere,
ut et insidiantium laquei frustrarentur et lapsis aetas lubrica subueniret.
obrueretur quippe innocentia, si relaxaretur audacia, essetque cunctis fallendi
studium, si fraus subrepticium lucraretur effectum. <2> Et ideo priscae
consuetudinis supplicatione porrecta suggeritis patronum uestrum in annis
minoribus constitutum facultatibus suis potius aggregasse dispendia, dum ignara
pueritia contraria gerit, quae profutura putauerit, et nunc id tempus aetatis
agere, quo lapsui possimus per ignorantiam subuenire, allegantes, ut quod iura
tribuerunt, nostra quoque beneficia largiantur. <3> Atque ideo, si petitio
uestra a ueritate non deuiat et intra annorum spatia deget, quibus hoc
beneficium leges sacratissimae praestiterunt, nihilque est quod iure contra
referatur, patronum uestrum sollemniter causa cognita in integrum restitui
nostra quoque permittit auctoritas, ita tamen, ut omnia secundum iustitiam
legesque peragantur, quia sic supplicantibus consulere uolumus, ut eorum
aduersarios per iniustitiam non grauemus.
XXXVI. FAUSTO PPO THEODERICUS REX.
<1> Prouidentissimi principis est grauiter imminutis relinquere tributariam
functionem, ut rediuiuis studiis ad implenda sollemnia recreentur qui pressi
damnorum acerbitate defecerant. nam si fessis minime releuetur onus, necessitate
cernitur iacere prostratus. melius est enim praesentia damna contemnere quam
exiguo quaestu perpetua commoda non habere. <2> Atque ideo illustris
magnificentia tua prouincialibus Alpium Cottiarum assem publicum per tertiam
indictionem nos relaxasse cognoscat, quos transiens noster exercitus more
fluminis, dum irrigauit, oppressit. nam licet pro generali securitate frementi
adunatione proruperit, praeteriens tamen istorum culta uastauit. radit enim
semper fluuius alueum suum et licet molliter egrediens uicina fecundet, illud
tamen reddit sterile, quo collectus influxerit. <3> Unde necesse fuit ciuica
uastatione deiectis porrigere dexteram salutarem, ne ingrati dicant se perisse
solos pro defensione cunctorum: misceantur potius laetitiae, qui uiam Italiae
defensoribus praestiterunt. tributa enim non debent tristes exigi, per quos
tributarios feliciter adquisiui. dicat pro illis noster animus, quod regi non
potest imputare subiectus. emimus nostro dispendio prosperitatem Gothorum: nos
necessaria praebuimus, ut hostis uinceretur illaesus.
XXXVII. THEODAGUNDAE ILLUSTRI FEMINAE THEODERICUS REX.
<1> Decet prudentiae uestrae curam subiectorum negotiis adhibere custodiam, quia
uobis ordinantibus illa fieri debent quae regiam possunt demonstrare
praesentiam. sic enim credimus, quia memor natalium tuorum a te abicias omne
uitiosum et illa sola diligere possis, quae et nos amare cognoscis. proauorum
forsitan oblitterentur exempla, si longi generis minus facta recolantur: similes
autem filii patrum praeconia mox sequuntur. <2> Renatus itaque flebili nobis
aditione conquestus est uobis delegantibus cognitores iudicatum se contra
Inquilinam nomine post longa temporis interualla meruisse et excubiis damnisque
confecto uestram tandem prospexisse iustitiam: nec tamen litigatoris improbam
cessare calumniam, dum rediuiuis litibus tenuitatem insequitur supplicantis, ut
non tam uincendi uotum quam aduersarii uideatur quaesisse detrimentum. <3>
Quapropter si uobis iubentibus iudicata cognoscitis nec constat aduersarium
prouocasse legaliter, finitum iure negotium in sua manere facite firmitate, ne
longa quaestio litigantium non tam augeat patrimonia, sed euertat et quod fit
ambitu lucri, causa uideatur esse dispendii.
XXXVIII. FAUSTO PPO THEODERICUS REX.
<1> Cum omnes rei publicae nostrae partes aequabiliter desideremus augeri,
crementa tamen fiscalium tributorum iustissimo sunt pensanda iudicio, quia
seruientium imminutio est huius illationis accessio quantumque pars illa
proficit, tantum se haec a firmitate subducit. sed a nobis, qui fisci utilitatem
stabili uolumus diuturnitate consistere, excludenda est dispendiosa semper
enormitas, ne augmento suo tumens summa deficiat incipiatque magis deesse, quia
immaniter uisa est accreuisse. <2> Proinde illustris magnitudo tua Grauassianos
atque Pontonates nobis supplicasse cognoscat a Ianuario, sed et Probo
discussoribus iniquis se oneribus ingrauatos, cum sterilitas ieiuna locorum
nulla sibi fieri augmenta patiatur. repugnante siquidem natura quaelibet cedit
industria, nec prodest studium laboris impendere, quem ubertas loci non
cognoscitur adiuuare. ibi potest census addi, ubi cultura profecerit. inde et
uaria tributa, quia non est agrorum una fecunditas. <3> Atque ideo consuetudinem
eis pristinam censemus esse reuocandam, ut sicut Odouacris tempore tributa
soluerunt, ita et nunc ab eis publicis utilitatibus seruiatur: et si quid
amplius probatur adiectum, consideratione defectarum uirium summouemus. nolumus
enim tale aliquid indici, quod sit necesse remoueri.
XXXVIIII. THEODAHADO V. I. THEODERICUS REX.
<1> Inter ceteras, quibus humanum genus sollicitatur, inlecebras praecipue
uitanda est alienarum rerum turpis ambitio, quia in immensum iactata rapitur, si
iustitiae ponderibus non prematur. auaritiam siquidem radicem esse omnium
malorum et lectio diuina testatur, quae tali sorte punita est, ut cum multa
rapiat, semper egeat, quam propter uicinitatem generis nostri sic in animis
uestris coalescere nolumus, ut illi nec initia concedamus. <2> Quid enim faciunt
sordes animorum in splendore natalium? illud te potius decet eligere, quod nos
possit ornare. Hamali sanguinis uirum non decet uulgare desiderium, quia genus
suum conspicit esse purpuratum. corrigamus itaque te per incitamenta praeconii,
in quo adhuc non debemus esse districti. <3> Domitius itaque uir spectabilis
data nobis supplicatione conquestus est, possessiones iuris sui, id est illam
atque illam, ab hominibus uestris neglectis legibus fuisse peruasas, dum
ciuiliter oportuit recipi, si iure uidebatur exposci. <4> Sed quia de uobis non
patimur diutius obscura iactari, qui generis claritate fulgetis, praesenti
auctoritate censemus, ut imminente Duda saione nostro, si momenti tempora
suffragantur, occupata nuper cum omnibus, quae direpta sunt, supplicanti
faciatis sine aliqua dilatione restitui. <5> Et si quid partibus uestris de
legibus creditis posse competere, instructam personam ad nostrum comitatum
destinare uos conuenit, ut intentionibus partium sub aequitate discussis feratur
sententia, quam iuris dictat auctoritas. generosos quippe uiros omnia conuenit
sub moderata ciuilitate peragere, quia tantum potentibus laesionis crescit
inuidia, quantum premi posse creditur, qui fortuna inferior comprobatur.
XL. ACTORIBUS PROBINI V. I. THEODERICUS REX.
<1> Districtius aliqua iubere compellimur amore iustitiae, dum circa minores
fortunas clementiora sunt nostri pectoris instituta. trahit enim ad
misericordiam, qui potuit subdi, et hoc habet beneficium mediocritatis suae, ut
probatione salua interim moueat ad dolorem, quia crudelitas subleuat humiles,
premit inuidia potiores. <2> Datis itaque precibus allegatis Basilium uirum
spectabilem nostra dudum praecepta meruisse, ut possessio Arcinatina, quam
patronus uester a coniuge eius Agapita iuris fuerat sollemnitate mercatus,
postposita dilatione cum documentis omnibus praedicto coniugi redderetur, dum a
suis penetralibus sollicitatam lacrimabili conquestione quereretur uxorem:
addentes more nostrae iustitiae postea fuisse praeceptum, ut, si patroni uestri
de causae qualitate praesumerent, ad nostrum comitatum ocius destinarent, ut
quae ratione conuenire poterant, uelut a iustitiae fontibus emanarent. <3>
Quapropter si nullo mendacio asserta uitiantur, per officium nostrae sedis
Basilium decernimus ammoneri, ut, si non nihil est, quod pro suis partibus
possit opponere, quominus in hac causa pulsetur, uestris intentionibus
responsurus occurrat, seu ad comitatum uenire seu in competenti foro iurgare
maluerit, quia nullis necessitatem longinquitatis imponimus, nisi qui suis hoc
commodis expedire cognoscunt. in locum siquidem beneficii nostram praesentiam
damus: et ideo non debet inuitis imponi, quod meretur optari.
XLI. IOHANNI ARCHIATRO THEODERICUS REX.
<1> Propositum regale est pressis labe fortunae pietatis remedio subuenire et
acerbos casus iniuriae meliore sorte mutare. data siquidem supplicatione
conquereris uirum spectabilem Viuianum legum artificio, quo callet, elatum,
personam tuam obiectis criminationibus insecutum et eo usque peruentum, ut
indefensus contra iuris ordinem uicarii urbis Romae sententia damnareris: nunc
autem religiosae mentis affectu odia mundana damnasse auctorique suo tuum
displicuisse periculum. <2> Et ideo, si nullis impugnationibus eneruantur
asserta, laesionem non patimur miseris inhaerere, quam suis constiterit
machinatoribus displicere. quapropter in abolitum missa sententia, quae a
uicario urbis Romae super hac parte cognoscitur promulgata, patriae te rebusque
omnibus nostra reddit auctoritas, nec ullo tempore calumniam super hac parte
formides. <3> Sed ne cuiusquam forsitan plectenda temeritas in te impetus
reparare possit audaciae, patricii Albini saluis legibus tuitio te deputata
communiet, quia nihil fieri uolumus inciuile, cuius cottidianus labor est pro
generali quiete tractare.
XLII. ARGOLICO P. U. THEODERICUS REX.
<1> Bene principalis clementia suscipit quos pietas paterna destituit, quia sub
parente publico genitoris minime sentiri debet amissio. ad nos siquidem iure
recurrit infantia destituta, quibus uniuersorum hominum proficiunt incrementa.
<2> Clarissimorum igitur adultorum Marciani atque Maximi nos querela pulsauit,
cum paschalibus diebus paterni luctus essent uulnere sauciati et in ipso
laetitiae tempore soli cogerentur tristitiam sustinere, utilitatem suam pio
neglexisse contemptu, cum uel firmae aetati inter lacrimas ista cogitare genus
uideretur insaniae. cessat enim lucri ambitus, cum uacatur ad planctus, nec mens
quodlibet aliud capit, cum eam qualitas pietatis impleuerit. <3> Hac crudeli
subreptione captata turrem circi atque locum amphitheatri illustris
recordationis patris eorum detestabili ambitu a uestris suggerunt fascibus
expetitum. quorum insidiatorem non humanitatis ullus reuocauit affectus, non
similis terruit casus: grauauit infantiam, cui non subuenire merito pudoris
aestimatur esse iactura. <4> Sed nos, qui regulas ueterum, qui seruamus momenta
pietatis, salubri ordinatione censemus, ut, si quondam patricius atque
magnificus uir Volusianus pater supplicum supra memorata loca communi iure
possedit, filiis perire non debeant, praesertim cum germen senatorium nouis
cupiamus beneficiis enutrire quam inter ipsa initia spem adultae aetatis aliqua
laesione comprimere. atque ideo illustris magnitudo uestra, si quid tale factum
esse meminit, ilico nouerit corrigendum, ne uenerandum examen senatorii ordinis
iniqua praesumptione temeretur.
XLIII. SENATUI URBIS ROMAE THEODERICUS REX.
<1> Urbis Romanae celebris opinio suo conseruanda est nihilominus instituto, nec
uitia peregrina capit, quae se semper de morum probitate iactauit. leuitates
quippe seditionum et ambire propriae ciuitatis incendium non est uelle Romanum.
ideoque in auctoribus facti legum est seruanda districtio, ne detestabilis
aspectus incendii ad imitationem nefandam uulgi pectora comprehendat. <2> Viri
illustris itaque comitis Arigerni suggestione comperimus Iudaeorum querela se
fuisse pulsatum, quod in dominorum caede proruperit seruilis audacia: in quibus
cum fuisset pro districtione publica resecatum, statim plebis inflammata
contentio synagogam temerario duxerunt incendio concremandam, culpas hominum
fabricarum excidio uindicantes, dum, si quis Iudaeorum probaretur excedere, ipse
debuisset iniuriae subiacere, non autem iustum fuit ad seditionum foeda concurri
aut ad fabricarum incendia festinari. <3> Sed nos, quibus deo propitiante cordi
est perperam commissa dirigere, ut cunctis possit placatis moribus conuenire,
praesenti auctoritate decernimus, ut causam supra memoratam legitima discussione
noscatis et in auctoribus paucis quos potueritis huius incendii reperire, habita
districtione resecetis: quia nolumus aliquid detestabile fieri, unde Romana
grauitas debeat accusari. <4> Illud pari ratione censentes, ut, si aliquid sibi
contra Iudaeos rationabiliter quispiam crediderit suffragari, ad uestrum
iudicium ueniat audiendus, ut quem reatus inuoluerit, censura condemnet. hoc
enim nobis uehementer displicuisse cognosce, ut intentiones uanissimae populorum
usque ad euersiones peruenerint fabricarum, ubi totum pulchre uolumus esse
compositum.
XLIIII. ANTONIO VIRO VENERABILI POLENSI EPISCOPO THEODERICUS REX.
<1> Inuidiosa est contra eum querela, cui sunt reuerentiae iura seruanda, quia
nescio quid admissum graue creditur, ubi contra tales silentium non tenetur.
Stephanus siquidem flebili aditione conquestus est casam iuris sui ante
decessorem prodecessoremque uestrum longa aetate possessam ante hos fere nouem
menses ab hominibus ecclesiae, cui praesidetis, despecto ciuilitatis ordine
fuisse peruasam. quod si ita factum esse cognoscitis, eam iustitiae
consideratione momenti iure restituite supplicanti. decet enim a uobis corrigi,
quod a uestris familiaribus non debuisset admitti. <2> Verumtamen si partibus
uestris in causa momentaria uel principali iustitiam adesse cognoscitis,
tractato prius diligenter inspectoque negotio, quia sacerdotem protendere non
decet improbam litem, instructam legibus ad comitatum nostrum destinate
personam, ubi qualitas negotii agnosci debeat et finiri. quapropter sanctitatis
uestrae animus non grauetur nec se fallacibus uerbis doleat accusatum: multo
maior est opinio purgata, quam si desinentibus querelis non fuerit impetita.
XLV. COMITIBUS DEFENSORIBUS ET CURIALIBUS TICINENSIS CIVITATIS THEODERICUS REX.
<1> Ad comitatum supplices Erulos auctore deo nostris uenire iussimus
constitutis, quibus nauis est praebenda subuectio, ne in patria nostra adhuc
prouinciae suae laborare uideantur inopia. itaque praesenti iussione commoniti
et nauis eis usum usque ad Rauennatem urbem et annonas dierum quinque sine
aliqua dilatione praeparate nec aliquid eis necessarium deesse faciatis,
quatenus prouinciam se deseruisse ieiunam de copiae inuentione cognoscant sitque
illis uberior peregrina terra quam patria.
XLVI. MARABADO V. I. THEODERICUS REX.
<1> Conuenit pietatem nostram petitiones supplicum salubri ordinatione
disponere, quia subiectorum animi releuantur, quotiens maerentium querela
componitur. uir spectabilis itaque Liberius dolenda nobis aditione suggessit
coniugem suam in uestro iudicio contra iuris ordinem praegrauatam. quod si ita
est, remotis praeiudiciis apud arbitros, quos partium consensus elegerit, te
imminente causa legibus audiatur. quod si illic finis negotii nequiuerit
inueniri, per instructas personas, si tamen ipsae uenire non eligunt, nostro
comitatui occurrendi licentiam partibus non negamus, ubi nec redemptio sit forte
suspecta nec insidiosa possit nocere calumnia.
XLVII. GUDISAL SAIONI THEODERICUS REX.
<1> Assidua sollicitudine refouenda sunt, quae continuis exercitiis subiacere
noscuntur. quemadmodum enim subuectio ueredorum necessario sufficiat labori, si
permittatur excedi? incitamentum siquidem improbae praesumptionis est neglecta
custodia. legatorum itaque nostrorum suggestione comperimus cursuales equos
frequenti usurpatione fatigari et quos nos necessitatibus publicis cupimus
custodiri, in usum cognouimus priuatae uoluntatis assumi. <2> Atque ideo in urbe
Roma ordinatione praefecti praetorio et magistri officiorum, quousque utilitas
publica suaserit, te residere censemus, ut nullum Gothorum uel Romanorum exinde
egredi patiaris, nisi quos praedictarum dignitatum uices agentes forte
dimiserint. <3> Et quod nobis frequenter usurpatum esse suggeritur, si quis
inuitis his quibus haec cura mandata est, ueredos praesumere fortassis
assumpserit, cuiuslibet nationis fuerit uel honoris, per unum equum centum
solidos multae nomine cogatur inferre: non quod tanti aestimanda est unius
iumenti laesio, sed quia grandi damno reprimenda est importuna praesumptio. <4>
Nullum praeterea saionum discursus facere patiaris, sed ad causam, quam directus
fuerit, uno tantum itinere permittatur accedere uel redire. quibus in superiorem
multam cadat interdicta frequentia. <5> Parhipporum quin etiam onera centum
librarum nullus excedat. expeditos enim properare mittendarios uolumus, non
migrare censemus. inertiam suam prodit quisquis secum multa portauerit, nec
cogitat de celeritate qui delicata se maluerit conuersatione tractare. grues
denique pelagus transiturae paruos lapillos uncis pedibus amplectuntur, ut nec
eorum leuitas nimio uento rapiatur nec natiua celeritas iniquis ponderibus
ingrauetur. hoc imitarine queunt, qui se ad publicas necessitates electos esse
cognoscunt? et ideo quinquaginta solidorum multam iam non ueredarius, sed
catabolensis incurrat, quisquis ultra centum libras parhippum crediderit
onerandum. <6> His autem, qui supra scriptarum dignitatum uicibus in urbe
praesunt, te obseruare praecipimus, quatenus excessus, qui ab illis detectus
fuerit, exsecutione tua supra dicta condemnatione puniatur. si quos autem
intemperans culpa perculerit, collectam quantitatem per uices agentes mancipibus
mutationum uolumus applicari, ut cursualis tractus inde habeat remedium, unde
hactenus sumpsit incommodum. <7> Mundanis siquidem rebus frequenter nascitur de
aduersitate prosperitas et homines cum laedere cupiunt, beneficia frequenter
impertiunt. sed omnia sic efficaciter ac diligenter implebis, ut prouocati bonis
actibus deuotioni tuae maiora committere debeamus.
XLVIII. EUSEBIO V. I. THEODERICUS REX.
<1> Post tumultuosae urbis sollicitudines taediosas et obseruationum molestias
ingrauantes magnitudo tua prouinciali desiderat amoenitate recreari, asserens
occupationum tibi causas praesentibus emersisse temporibus, quibus expeditis
rurali desideras suauitate gaudere. <2> Et quia uere illa securitas est, quae
nostris iussionibus datur, cum tempus tibi fuerit occupationis emensum, octo
mensium indutias in Lucaniae dulces recessus nostra auctoritate concedimus, ut
ex illo tempore supputentur, cum te egredi ex urbe diuino fauore contigerit.
quibus peractis multorum desiderio ad Romanas sedes uenire festina, conuentui
nobilium et digna tuis moribus conuersatione reddendus.
XLVIIII. UNIVERSIS PROVINCIALIBUS ET CAPILLATIS DEFENSORIBUS ET CURIALIBUS
SISCIA VEL SAVIA CONSISTENTIBUS THEODERICUS REX.
<1> Districtio semper subtrahi non debet regiae iussionis, ut et audaces metus
comprimat et laceratos spes futura refoueat. plerumque enim denuntiata
comminatio plus efficit quam poena componit. et ideo deo auspice Fridibadum
locis uestris praeesse censuimus, qui abactores animalium legitima seueritate
coerceat, homicidia resecet, furta condemnet quietosque uos ab sceleratis
ausibus reddat, quos nunc praesumptio iniqua dilacerat. uiuite compositi, uiuite
bonis moribus instituti, nullum natio, nullum promeritus honor excuset. necesse
est uindictae subiaceat qui prauis moribus obsecundat.
L. FAUSTO PPO THEODERICUS REX.
<1> Campani Vesuuii montis hostilitate uastati clementiae nostrae supplices
lacrimas profuderunt, ut agrorum fructibus enudati subleuentur onere tributariae
functionis. quod fieri debere nostra merito pietas adquiescit. <2> Sed quia
nobis dubia est uniuscuiusque indiscussa calamitas, magnitudinem uestram ad
Nolanum siue Neapolitanum territorium probatae fidei uirum praecipimus
destinare, ubi necessitas ipsa domestica quadam laesione grassatur, ut agris
ibidem diligenter inspectis, in quantum possessoris laborauit utilitas,
subleuetur: quatenus mensurate conferatur quantitas beneficii, dum modus integer
cognoscitur laesionis. <3> Laborat enim hoc uno malo terris deflorata prouincia,
quae ne perfecta beatitudine frueretur, huius timoris frequenter acerbitate
concutitur. sed non in totum durus est euentus ille terribilis: praemittit signa
grauia, ut tolerabilius sustineantur aduersa. <4> Tantis enim molibus natura
rixante montis illius hiatus immurmurat, ut excitatus quidam spiritus grandisono
fremitu uicina terrificet. fuscantur enim aera loci illius exhalatione
taeterrima et per totam paene Italiam cognoscitur, quando illa indignatio
commouetur. uolat per inane magnum cinis decoctus et terrenis nubibus excitatis
transmarinas quoque prouincias puluereis guttis compluit, et quid Campania pati
possit, agnoscitur, quando malum eius in orbis alia parte sentitur. <5> Videas
illic quasi quosdam fluuios ire puluereos et harenarum sterile impetu feruente
uelut liquida fluenta decurrere. stupeas subito usque ad arborum cacumina dorsa
intumuisse camporum et luctuoso subito calore uastata, quae laetissima fuerant
uiriditate depicta. uomit fornax illa perpetua pumiceas quidem, sed fertiles
harenas, quae licet diuturna fuerint adustione siccatae, in uarios fetus
suscepta germina mox producunt et magna quadam celeritate reparant, quae paulo
ante uastauerant. quae est ista singularis exceptio unum montem sic infremere,
ut tot mundi partes probetur aeris permutatione terrere et sic suam substantiam
ubique dispergere, ut non uideatur damna sentire? <6> Longe lateque pulueres
rorat, uicinis autem quasdam moles cructuat et tot saeculis mons habetur, qui
erogationibus tantis expenditur. quis credat tam ingentes glebas usque in plana
deductas de tam profundis hiatibus ebullisse et spiritu quodam efflante montis
ore consputas quasi leues paleas fuisse proiectas? <7> Alibi cacumina magna
terrarum localiter uidentur ardere: huius incendia paene mundo datum est posse
cognoscere. quemadmodum ergo non credamus incolis, quod testimonio potest
uniuersitatis agnosci? quapropter, ut dictum est, talem eligat uestra prudentia,
qui et remedia laesis conferat et locum subreptionibus non relinquat.
LI. SYMMACHO PATRICIO THEODERICUS REX.
<1> Cum priuatis fabricis ita studueris, ut in laribus propriis quaedam moenia
fecisse uidearis, dignum est, ut Romam, quam domuum pulchritudine decorasti, in
suis miraculis continere noscaris, fundator egregius fabricarum earumque comptor
eximius, quia utrumque de prudentia uenit, et apte disponere et extantia
competenter ornare. <2> Notum est enim, quanta laude in suburbanis suis Romam
traxeris, ut, quem illas fabricas intrare contigerit, aspectum suum extra urbem
esse non sentiat, nisi cum se et agrorum amoenitatibus interesse cognoscat:
antiquorum diligentissimus imitator, modernorum nobilissimus institutor. mores
tuos fabricae loquuntur, quia nemo in illis diligens agnoscitur, nisi qui et in
suis sensibus ornatissimus inuenitur. <3> Et ideo theatri fabricam magna se mole
soluentem consilio uestro credimus esse roborandam, ut quod ab auctoribus
uestris in ornatum patriae constat esse concessum, non uideatur sub melioribus
posteris imminutum. quid non soluas, senectus, quae tam robusta quassasti?
montes facilius cedere putarentur, quam soliditas illa quateretur: quando et
moles ipsa sic tota de cautibus fuit, ut praeter artem additam et ipsa quoque
naturalis esse crederetur. <4> Haec potuissemus forte neglegere, si nos
contigisset talia non uidere: caueas illas saxis pendentibus apsidatas ita
iuncturis absconditis in formas pulcherrimas conuenisse, ut cryptas magis
excelsi montis crederes quam aliquid fabricatum esse iudicares. fecerunt antiqui
locum tantis populis parem, ut haberent singulare spectaculum, qui mundi
uidebantur obtinere dominatum. <5> Sed quia nobis sermo probatur esse cum docto,
libet repetere, cur antiquitas rudis legatur haec moenia condidisse. cum agri
cultores feriatis diebus sacra diuersis numinibus per lucos uicosque
celebrarent, Athenienses primum agreste principium in urbanum spectaculum
collegerunt, theatrum Graeco uocabulo uisorium nominantes, quod eminus
astantibus turba conueniens sine aliquo impedimento uideatur. <6> Frons autem
theatri scaena dicitur ab umbra luci densissima, ubi a pastoribus inchoante
uerno diuersis sonis carmina cantabantur. ibi actus musicus et prudentissimi
saeculi dicta floruerunt. sed paulatim factum est, ut honestissimae disciplinae
improborum consortia fugientes uerecunda se exinde consideratione subtraherent.
<7> Tragoedia ex uocis uastitate nominatur, quae concauis repercussionibus
roborata talem sonum uidetur efficere, ut paene ab homine non credatur exire.
erigitur autem in hircinos pedes, quia si quis inter pastores tali uoce
placuisset, capri munere donabatur. comoedia a pagis dicta est: comus enim pagus
uocatur, ubi rustici gestientes humanos actus laetissimis carminibus irridebant.
<8> His sunt additae orchestarum loquacissimae manus, linguosi digiti, silentium
clamosum, expositio tacita, quam musa Polymnia repperisse narratur, ostendens
hominos posse et sine oris affatu suum uelle declarare. Musae uero Eoa lingua
quasi homousae dicuntur, quod inuicem sicut uirtutes necessariae sibi esse
uideantur. his leuium pinnarum acumina ideo in fronte pinguntur, quoniam earum
sensus celeri cogitatione subuectus res altissimas intuetur. <9> Pantomimo
igitur, cui a multifaria imitatione nomen est, cum primum in scaenam plausibus
inuitatus aduenerit, assistunt consoni chori diuersis organis eruditi. tunc illa
sensuum manus oculis canorum carmen exponit et per signa composita quasi
quibusdam litteris edocet intuentis aspectum, in illaque leguntur apices rerum
et non scribendo facit quod scriptura declarauit. idem corpus Herculem designat
et Venerem, feminam praesentat in mare, regem facit et militem, senem reddit et
iuuenem, ut in uno credas esse multos tam uaria imitatione discretos. <10> Mimus
etiam, qui nunc tantummodo derisui habetur, tanta Philistionis cautela repertus
est, ut eius actus poneretur in litteris, quatenus mundum curis edacibus
aestuantem laetissimis sententiis temperaret. <11> Quid acetabulorum tinnitus?
quid dulcissimi soni referam uaria percussione modulamen? quod tanta gratia
iucunditatis accipitur, ut inter reliquos sensus auditum sibi ad munus summum
tunc homines aestiment fuisse collatum. ubi aetas subsequens miscens lubrica
priscorum inuenta traxit ad uitia et quod honestae causa delectationis repertum
est, ad uoluptates corporeas praecipitatis mentibus impulerunt. <12> Hos ritus
Romani sicut ceteras culturas ad suam rem publicam inutiliter trahentes
aedificium alta cogitatione conceptum magnanimitate mirabili condiderunt. unde
non inmerito creditur Pompeius hinc potius Magnus fuisse uocitatus. et ideo siue
masculis pilis contineri siue talis fabrica refectionis studio potuerit
innouari, expensas uobis de nostro cubiculo curauimus destinare, ut et uobis
adquiratur tam boni operis fama et nostris temporibus uideatur antiquitas
decentius innouata.
LIBER QUINTUS.
I. REGI VVARNORUM THEODERICUS REX.
<1> Cum piceis timbribus et pueros gentili candore relucentes, spathas nobis
etiam arma desecantes uestra fraternitas destinauit, ferro magis quam auri
pretio ditiores. splendet illic claritas expolita ut intuentium facies fideli
puritate restituant, quarum margines in acutum tali aequalitate descendunt, ut
non limis compositae, sed igneis fornacibus credantur effusae. harum media
pulchris alueis excauata quibusdam uidentur crispari posse uermiculis: ubi tanta
uarietatis umbra conludit, ut intextum magis credas uariis coloribus lucidum
metallum. <2> Hoc uestra cotis diligenter emundat, hoc uester splendidissimus
puluis ita industriose detergit, ut speculum quoddam uirorum faciat ferream
lucem, qui ideo patriae uestrae natura largiente concessus est, ut huius rei
opinionem uobis faceret singularem: enses, qui pulchritudine sui putentur esse
Vulcani, qui tanta elegantia fabrilia uisus est excolere, ut quod eius manibus
formabatur, non opus mortalium, sed crederetur esse diuinum. <3> Proinde per
illum et illum legatos uestros soluentes debitae salutationis affectum arma
uestra libenter nos accepisse declaramus, quae bonae pacis studia transmiserunt:
uicissitudinem muneris pro expensarum uestrarum consideratione tribuentes, quae
tantum uobis reddantur accepta, quantum nobis uestra fuere gratissima. praestent
diuina concordiam, ut haec inter nos grata mente facientes gentium nostrarum
uelle iungamus et inuicem solliciti mutuis possimus utilitatibus obligari.
II. HESTIS THEODERICUS REX.
<1> Illo et illo legatis uestris uenientibus grande uos studium notitiae nostrae
habuisse cognouimus, ut in Oceani litoribus constituti cum nostra mente
iungamini: suauis nobis admodum et grata petitio, ut ad uos perueniret fama
nostra, ad quos nulla potuimus destinare mandata. amate iam cognitum, quem
requisistis ambienter ignotum. nam inter tot gentes uiam praesumere non est
aliquid facile concupisse. <2> Et ideo salutatione uos affectuosa requirentes
indicamus sucina, quae a uobis per harum portitores directa sunt, grato animo
fuisse suscepta. quae ad uos Oceani unda descendens hanc leuissimam substantiam,
sicut et uestrorum relatio continebat, exportat: sed unde ueniat, incognitum uos
habere dixerunt, quam ante omnes homines patria uestra offerente suscipitis.
haec quodam Cornelio describente legitur in interioribus insulis Oceani ex
arboris suco defluens, unde et sucinum dicitur, paulatim solis ardore
coalescere. <3> Fit enim sudatile metallum, teneritudo perspicua, modo croceo
colore rubens, modo flammea claritate pinguescens, ut, cum in maris fuerit
delapsa confinio, aestu alternante purata uestris litoribus tradatur exposita.
quod ideo iudicauimus indicandum, ne omnino putetis notitiam nostram fugere,
quod occultum creditis uos habere. proinde requirite nos saepius per uias, quas
amor uester aperuit, quia semper prodest diuitum regum adquisita concordia, qui,
dum paruo munere leniuntur, maiore semper compensatione prospiciunt. aliqua
uobis etiam per legatos uestros uerbo mandauimus, per quos, quae grata esse
debeant, nos destinasse declaramus.
III. HONORATO V. I. QUAESTORI THEODERICUS REX.
<1> Usu quidem prouenit bene meritos dona nostra suscipere: sed tu iure
hereditatis principis tibi beneficia uindicasti. honorem fratris adipisceris,
quia sapientia quoque germanus es. ab eisdem bonis non repellimus quem similem
comprobamus. eant nunc parentes ac liberi et bonarum artium studia incitamento
similitudinis aemulentur. nouam in te fecimus legem parentes in amministratione
succedere. hic prouectus non adimitur et mutatur: quia licet persona subrogata
sit, familiae tamen non deficit quod gratissimus germanus adquirit. <2> O uere
uestris meritis electi at auspicio nominis honorati! praesentiunt quaedam
parentes positis in prole uocabulis et ut uenturarum rerum cursus ex alto est
imperio diuinitatis, cogitatio praesagantis instruitur: loqui datur, quod nos
sensisse nescimus, sed post casum reminiscimur quod ignorantes ueraciter
dixeramus. <3> Tali igitur omine Decoratus eualuit: eualuit, inquam, ac se
honoribus palatinis iudicio nostro laudatus immiscuit, dignitatem sumens quam
solemus dare prudentibus, hoc plane supra ceteros adipiscens, quod potuit
emergere post electos. sub genii nostri luce intrepidus quidem, sed reuerenter
astabat, opportune tacitus, necessarie copiosus, curarum nostrarum eximium
leuamen, et cum potestatis nostrae gratia ditaretur, morum magis laude contentus
mediocribus se potius exaequabat. uiuit apud nos recordatio bonorum, quia fides
hominis nescit cum morte deficere. secreta nostra, quasi obliuisceretur,
occuluit: iussa, quasi scriberet per ordinem, retinuit, sine auaritia seruiens
et gratiam nostram summa cupiditate perquirens. <4> Diuertimus quidem ad bene
meriti laudes, sed compendio sermonis assumpti, cum illum referimus, te docemus.
fuit nimirum gratus, quod apud nos et post fata esse non desinit: tristes
quaerimus quem nos amisisse dolemus. sed acerbum casum mitigat, quod ei uicaria
uirtute succedis, quia nemo perdidisse se sentit quod in alterum inuenisse
cognoscit. non extranea secteris exempla, cui domestica suppetunt tam magna
praeconia. tu Decoratus ex illo es, ille Honoratus ex te est. adunent se merita,
quando se iunxere sic nomina. <5> Nam de te iustius credimus meliora, qui
sequeris, quia semper est diligentior imitator prioris, quando te praecedentis
bona licet eligere et noua cumulare. atque ideo ab indictione tertia quaesturae
te dignitate subuehimus facimusque nostri consilii claritate uiuere Honoratum,
ut esse nunc incipias, quod ante uocabaris. age nunc inhaerendo iustitiae, ut,
qui inexperto honorem dedimus, meliora tibi probatissimo conferamus.
IIII. SENATUI URBIS ROMAE THEODERICUS REX.
<1> Certum est, patres conscripti, prudentibus uiris uestrum florere consilium:
sed et hoc probatur egregium, quod uobis permiscetur dignitas litterarum. omnes
enim, quos ad quaesturae culmen euehimus, doctissimos aestimamus, quales legum
interpretes et consilii nostri decet esse participes: dignitas, quae nec
diuitiis nec solis natalibus inuenitur, sed tantum eam doctrina cum coniuncta
potest impetrare prudentia. nam licet in aliis honoribus beneficia conferamus,
hinc semper accipimus. est nimirum curarum nostrarum felix portio: ianuam
nostrae cogitationis ingreditur: pectus, quo generales curae uoluuntur,
agnoscit. <2> Aestimate, quid de illi debeat iudicari, qui tanti particeps fit
secreti. ab ipso legum peritia postulatur: illuc uota confluunt supplicantum et,
quod est omni thesauro pretiosius, penes ipsum ciuilitatis nostrae fama
reponitur. quaestore iusto innocentium conscientia fit secura, improborum tantum
uota redduntur anxia, et cum malis subripiendi spes tollitur, studium bonis
moribus adhibetur. <3> Unicuique propria iura custodit, pecuniae continens,
aequitatis profusus, nescius decipere, promptissimus subuenire. ingenio
principis seruit, quod uniuersa superat: illius ore loqui cogitur, cui nullus
similis inuenitur. hunc locum uitiis uacuum, uirtutibus plenum qui sub nostra
potuit expedire praesentia, nonne uobis dignus est esse collega? scitis enim qua
glorietur stirpe prouectus. <4> Meministis igitur Decoratum aduocationis
laboribus insudantem, qua se unicuique bonorum probitate coniunxerit. causis
uestris fidelis orator affuit: necessariis rebus insistens iudicantis portauit
animum ad subsellia cognitorum: cui merito frequens palma contigit, quia
sapienter alleganda tractauit. pudoris enim sustinere iacturam nesciunt, qui se
prius iudice corriguntur. inferior gradu praestabat uiris consularibus se
patronum et cum honoribus uestris impar haberetur, patricius ei dictus est in
celeberrima cognitione susceptus. <5> Nimis rarum est, patres conscripti,
solidum loqui et, cui multa necesse est dicere, titubantia non proferre. hoc in
Decorato certissimum fuit, hoc et ante nostra iudicia uos probastis. quis enim
tempore suo eum quasi gubernatorem litium ignorare potuit, qui causarum scopulos
transire contendit? legibus profecto minus indiguit, qui eius solacia non
quaesiuit. iam non de morte festinata conquerimur: ex huius fecunda pullulauit
stirpe germanus. nam qui prius fratris umbra tegebatur, illo naturae lege
subducto famae suae comas per aperta distendit. <6> Bona siquidem germinis iuste
praecox intulit, qui nascendi ordine primus eualuit: sed fetura nobilis fructum,
quem in decessore perdidit, in successore seruauit. concordat huic familiae
ramus ille ditissimus qui Vergiliano carmine semper enascitur: hoc enim auulso
non deficit alter aureus et simili frondescit uirga metallo. nutriuit quippe et
hic aduocatione facundiam: opinionem Romanae urbis cedens fratri Spoletinorum se
maluit miscere negotiis: res tantum dura, quantum a uestra prudentia cognoscitur
segregata. inter bene moratos enim asseruisse iusta facillimum fuit:
prouincialibus autem se uaga libertate tractantibus nimis arduum. <7> Videtur
iuris suasisse modestiam, ubi ipsi quoque iudices improba plerumque cupiditate
rapiuntur et quantum sibi inter mediocritatem uidentur esse praecipui, tantum
non sinunt suis uoluntatibus obuiari. inter talia leges uindicare difficile est
et magnae persuasionis uis ad propositum recti uenalitatem reuocare iudicantis.
sumite ergo, patres conscripti, libenter nostra iudicia et Honoratum quaesturae
culmine prouectum gremium uestrum gratanter excipiat. dignus est enim a uobis
diligi qui par tantis honoribus meruit reperiri.
V. MANNILAE SAIONI THEODERICUS REX.
<1> Laudabile est in illa parte geminare custodiam, quam constat rei publicae
necessitatibus exquisitam. per hanc enim et legationum utilitas et ordinationum
nostrarum celeritas explicatur: hoc etiam aulicis potestatibus per uarias
iussiones ministrat effectum: hoc crebris illationibus nostrum ditat aerarium,
ut paene quicquid in re publica geritur, cursuali ministerio compleatur. decet
proinde semper esse paratum, quod utilitatibus publicis probatur accommodum, ne,
quod ad celeritatem repertum est, incongruam potius festinantibus inferat
tarditatem. <2> Atque ideo praefecti praetorio et magistri officiorum ubi pro
publica utilitate delegerint ordinatione locatos, excedentium improbam
praesumptionem tali te praecipimus districtione resecare, ut, siue Gothus sit
aut Romanus qui sine nostra uel eorum quorum interest euectione ueredum
praesumit attingere, per unum equum centum statim solidos a te cogatur
exsoluere. et de illis quoque pari seueritate censemus, qui supra euectionum
numerum cursuales equos usurpare praesumunt. <3> Parhippis quin etiam non ultra
quam centum libras iubemus imponi. nimis enim absurdum est, ut a quo celeritas
exigitur magnis ponderibus opprimatur. auis ipsa onere grauata pigrescit.
carinae quae laborem non sentiunt repletae grauius mouentur. quid quadrupes
facere possit, qui pressus nimietate succumbit? si quis autem a modulo definito
amplius fuerit habere repertus, duarum unciarum auri damno feriatur. <4> Quam
summam protinus exactam, sicut iam anterioribus edictis constitutum est, per
officium magisteriae dignitatis cursui proficere debere censemus. iustum est
enim ut cogatur illa uendere, unde publicum equum male noscitur onerasse: sit
nuditatibus expeditus qui uoluntate noluit esse celerrimus. praeterea
commonemus, ut praepositorum commoda non praesumas nec quicquid eos potestatis
habere reuerenda sanxit antiquitas, aliqua usurpatione degenies. nos enim per te
geminare uolumus custodiam, non antiquae consuetudinis remouere cautelam.
VI. STABULARIO COMITIACO THEODERICUS REX.
<1> Suscipienda precatio est quae publicis utilitatibus non repugnat et
amplectenda desideria priuatorum, quae sic remedium quaerunt, ut nobis non
uideantur generare dispendium. uiri itaque clarissimi Iohannis querela
comperimus Thomatem domus nostrae certa praedia suscepisse, id est illud atque
illud, et nunc decem milia solidorum reliquatorem nostris utilitatibus extitisse
et per diuersas ludificationes non implere debitam quantitatem, quod apud nos
quoque procerum nostrorum suggestione perclaruit. <2> Ideoque causam tali
credidimus remedio muniendam, ut uniuersam substantiam supradicti Thomatis sub
hac condicione fixis titulis publico debeas applicare, quatenus, si intra kal.
Septembrium diem quod rationabiliter exponitur a Thomate minime fuerit
exsolutum, praedicta substantia Iohanni uiro clarissimo contradatur, qui eius
debitum lucre nostro promisit aerario. quod si obligationem suam praedictus
Thomas soluere intra praefinitum tempus fortasse potuerit, uniuersa ei quae
sublata sunt illibata reddantur, ita ut nec fiscus noster sustinere uideatur
incommoda et nos cognoscamur subiectis solitam praestitisse iustitiam. possemus
enim adhuc ultra differre, si quid prodesset neglegentissimum sustinere, quem
per tam longum temporis spatium semper inuenimus imparatum.
VII. IOHANNI V. C. ARCARIO THEODERICUS REX.
<1> Decet eorum uota in ratum reddere, qui malunt utilitates publicas continere:
nec patimur de damno proprio esse sollicitos, qui nos a dispendiis fecere
securos. tua igitur suggestione comperimus per illam indictionem patrimonii
nostri praedia in Apulia prouincia constituta, id est illud atque illud, honesto
uiro Thomati libellario titulo commisisse, sed eum male amministrando suscepta
usque ad decem milia solidorum de indictionibus illa atque illa reliquatorem
publicis rationibus extitisse: qui a proceribus nostris frequenter ammonitus
debita reddere detestabili calliditate neglexit. et ne tibi aliqua in posterum
quaestio nasceretur, publicis utilitatibus debitam quantitatem sub hac ratione
satisfacere te uelle testaris, si tibi praedia supradicti debitoris loco
pignoris contradantur. <2> Hinc est, quod desiderium tuum iusta ratione
conceptum praesenti iussione firmamus: primum, ut nullam ex hac re nomine
publico metuas quaestionem: deinde sub hac condicione tibi uniuersam
substantiam, quam uel nunc tenet uel primo tempore possidebat, cum nostris
rationibus obnoxius esse iam coeperat, Thomatis debitoris addicimus, quam pridem
nostro nomine fixis titulis fecimus uindicari: <3> hoc tantum humanitatis
intuitu relaxantes, ut usque ad kal. Sept. spatium habeat reddendi debitam
quantitatem: minus ne cum ad supradictum diem tu pecuniam uiro illustri comiti
patrimonii nostri, quae debetur, intuleris facultas eius uniuersa, sicut
diximus, tuis compendiis applicetur. quod triste non credimus esse perdenti,
quando nec ex toto uidetur amittere, quod te generum suum cognoscit adquirere:
nam quod poteras adipisci iure successionis, condicione a te possidetur
emptoris.
VIII. ANASTASIO CONSULARI THEODERICUS REX.
<1> Conuenit sublimitatem tuam nostris iussionibus oboedientiae tribuere sedulam
firmitatem, quatenus ad effectum trahatur quod salubri ordinatione disponitur.
moderate siquidem nouit iniuncta sibi complere prudentia et sine ingratitudinis
naeuo delegata explicabili procurare consilio. <2> Atque ideo ad Fauentinam
ciuitatem ciuilem exsecutionem te praecipimus destinare, ut sine cuiusquam
concussione uel damno quadrati ad Rauennatem urbem ex nostra iussione
deuehantur, quatenus et nostro desiderio gratulemur impleto et querulis
uociferandi amputetur occasio.
VIIII. POSSESSORIBUS FELTRINIS THEODERICUS REX.
<1> Necessitas publica multorum debet deuotione compleri, quia non decet paucos
suscipere quod constat plurimis expedire, ne regia iussa tepefacta lentescant,
dum res utilis delegatur infirmis. in Tridentina igitur regione ciuitatem
construi nostra praecepit auctoritas. <2> Sed quia territorii paruitas
magnitudinem operis non potest sustinere, hoc sollicitudo nostra prospexit, ut
acceptis mercedibus competentibus pedaturam murorum omnes in commune subeatis
qui uicinitate iungimini, quatenus accommodato solacio securius impleatur, quod
paucis inexplicabile fortasse cognoscitur: hac scilicet condicione definita, ut
nullus ab his oneribus excusetur, unde nec diuina domus excipitur.
X. VERANI SAIONI THEODERICUS REX.
<1> Cum deo iuuante pro defensione generali felicissimus producatur exercitus,
prouidendum est, ne aut ipsi penuria inconsulta fatigentur aut (quod dici nefas
est) uastationem nostrae uideantur prouinciae sustinere. primus enim
prosperitatis gradus est suis non esse damnosum, ut, pro quorum compendio
laboramus, eorum non uideamur afflixisse fortunas. <2> Et ideo deuotioni tuae
praesenti auctoritate delegamus, ut multitudinem Gepidarum, quam fecimus ad
Gallias custodiae causa properare, per Venetiam atque Liguriam sub omni facias
moderatione transire. quibus ne aliqua excedendi praeberetur occasio, per
unamquamque condamam sumptus eis tres solidos largitas nostra direxit, ut illis
cum prouincialibus nostris non rapiendi uotum, sed commercii sit facultas. <3>
Illud plane pro cunctorum quiete laborantibus indulgentia nostra concedit, ut,
si aut eorum carpenta itinere longiore quassantur aut animalia attrita
languescunt, te custode atque mediante cum possessoribus sine aliqua oppressione
mutentur, ut, qui daturi sunt corpore aut qualitate meliora, quamuis paruis
sanis animalibus adquiescant, quia incerta est uita eorum, qui nimia fatigatione
lassantur. ita fit, ut nec illis desit subuectio necessaria et nullus se laesum
tali permutatione cognoscat.
XI. GEPIDIS AD GALLIAS DESTINATIS THEODERICUS REX.
<1> Fuerat quidem dispositionis nostrae, ut uobis iter agentibus annonas
iuberemus expendi: sed ne species ipsae aut corruptae aut difficile
praeberentur, in auro uobis tres solidos per condamam elegimus destinare, ut et
mansiones uobis, prout herbarum copia suppetit, possitis eligere et quod uobis
est aptum magis, emere debeatis. nam et possessorem haec res occurrere facit, si
uos necessaria comparare cognoscit. mouete feliciter, ite moderati. tale sit
iter uestrum, quale decet esse qui laborant pro salute cunctorum.
XII. THEODAHADO V. I. THEODERICUS REX.
<1> Si iustitiam colere uniuersos et amare praecipimus, quanto magis eos qui
nostra proximitate gloriantur, quos omnia decet sub laude gerere, ut regiae
possint fulgorem consanguinitatis ostendere. haec est enim indubitata nobilitas,
quae moribus probatur ornata: quia pulchrum est commodum famae foeda neglexisse
lucra pecuniae. <2> Argolici itaque uiri illustris et Amandiani uiri clarissimi
heredes supplici nobis aditione conquesti sunt Pallentianam massam, quam eis pro
compensatione largitas nostra transfuderat, ut casae Arbitanae amissionem hac
commoditate solarentur, ab hominibus uestris nullis causis extantibus indecenter
inuasam et inde creuisse culpandae surreptionis uitium, unde dari debuit
gloriosae moderationis exemplum. <3> Quapropter si nullo mendacio asserta
uitiantur, magnitudo uestra quae sunt ablata restituat: et, si quid uobis
creditis posse competere, ad comitatum nostrum instructam iure personam modis
omnibus destinate, ut ciuiliter plantata causatio finem de legibus sortiatur.
ibi enim quicquid geritur, inuidiae tuae potius applicatur et maiora detrimenta
famae suscipis, dum talia non uitare contendis: hic autem confligunt causae
uiribus suis et sine derogatione quilibet mediocris addicitur, quando iustitia
teste superatur.
XIII. EUTROPIO ET AGROECIO THEODERICUS REX.
<1> Studium uestrum rei publicae grata mente debetis impendere, quia nos
agnouistis bene meritis multa praestare. nam pietatis intuitu uicissitudinem
pollicemur, cum tamen pro uobis omnia iubeamus. atque ideo praesenti iussione
uos credidimus ammonendos, ut annonas constitutas exercitui praebere debeatis,
quatenus nec illi neglegantur aduerso uoto nec prouinciales perniciosa debeat
grauare direptio. Commodius enim sub expensarum lege tenetur exercitus, quam si
cuncta fuerit uastare permissus. ignorat modum seruare praesumptio nec potest
sub modo redigi, cui licentia fuerit uisa concedi. quapropter consequatur
exercitus alimoniam deputatam, ne qua pars praedictam possit sustinere
molestiam.
XIIII. SEVERINO V. I. THEODERICUS REX.
<1> Iustitiae ratio persuadet excedentes reprimere, ut ad cunctos possit quietis
suauitas peruenire. nam quemadmodum aequabilitas agitur, si uires mediocrium
consurgere non sinantur? prouincialium itaque nostrorum saepius querela
comperimus possessores idoneos Sauiae non solum casarum suarum tributariam
functionem in tenuem relisisse fortunam, uerum etiam scelerato commercio aliquid
exinde suis applicare compendiis, ut functio publica commoditas sit priuata. <2>
Hoc quidem per plurimos desiderauimus corrigi, sed hactenus in tuam laudem
uidetur potuisse differri, quatenus fides haberetur acceptior, quando post
multos neglegentes studium uestrum efficacissime comprobatis. atque ideo
prudentia, qua notus es, uniuersum possessorem considerata iustitia te iubemus
inspicere et aequalitatem tributi hac ratione moderari, ut quae sub aliis facta
est omni redemptione cassata pro pessessionum atque hominum qualitate assis
publicus imponatur. sic enim et iustitia perficitur et uires nostrorum
prouincialium subleuantur. <3> Eos autem, quos sine iussione nostra censum
imposuisse constiterit et pro libito suo quorundam onera in alios proiecerunt,
legum seueritas insequatur, ut omnia illis detrimenta sarciant, quibus
incompetenter damna fecerunt. illud quoque praecipimus inquirendum, ut inter
defensores, curiales et possessores illatorum ratio uestigetur et quicquid ab
octaua indictione nuper exempta super tributarium solidum se possessor
probauerit intulisse nec nostro aerario constat illatum aut in expensis
necessariis, quae in prouincia factae sunt, iusta ratione non claruerit
erogatum, iniqua praesumptio modis omnibus corrigatur. <4> Hanc quoque partem
non aestimes neglegendam, ut si hoc, quod tabularius a cubiculo nostro suscepit,
rationabiliter non docetur expensum, ab iniusto retentatore reddatur. quid enim
tam absurdum, nisi ut liberalitas nostra, quam uniuersis proficere uolumus, nunc
a paucis furtiuo compendio opprimatur? <5> Iudices quoque prouinciae uel
curiales atque defensores tam de cursu quam de aliis rebus illicita dicuntur
possessoribus irrogare dispendia: quod te perquirere et sub ratione legum
emendare censemus. <6> Antiqui barbari, qui Romanis mulieribus elegerunt
nuptiali foedere sociari, quolibet titulo praedia quaesiuerunt, fiscum possessi
cespitis persoluere ac superindicticiis oneribus parere cogantur. <7> Iudex uero
Romanus propter expensas prouincialium, quae grauare pauperes suggeruntur, per
annum in unumquodque municipium semel accedat: cui non amplius quam triduanae
praebeantur annonae, sicut legum cauta tribuerunt. maiores enim nostri discursus
iudicum non oneri, sed compendio prouincialibus esse uoluerunt. <8> Domestici
comitis Gothorum nec non et uicedomini aliqua dicuntur prouincialibus
concinnatis terroribus abstulisse: quibus iustitia uestra in examinationem
deductis, quicquid super hac parte inique gestum esse cognouerit, amotis
dilationibus legaliter ordinabit. <9> His ergo ac talibus, quae ad utilitatem
publicam uel prouinciales pertinent, sub omni ratione discussis ea te per omnia
uolumus agere, quae nostrae mansuetudini non debeant displicere. illud sane
prouidentia nostra respexit, ut omnibus a te sollicita atque aequabili
indagatione compertis polyptychi iubeantur ascribi: quatenus et testimonia
uestrae fidei clareant et nulla posthac, quae abrogari uolumus, semina fraudis
iterentur.
XV. UNIVERSIS POSSESSORIBUS IN SAVIA PROVINCIA CONSTITUTIS THEODERICUS REX.
<1> Licet cunctis laborantibus comitatus noster concedat deo auxiliante
iustitiam et hinc remedia subiectis ad reliquas regni partes quasi a uiuo fonte
descendant, tamen frequenti aditione permoti ingeniosa pietate repperimus et
aequitatem uobis concedere et fatigationem longi itineris abrogare, quia
dulciora sunt beneficia, quae nullis difficultatibus obtinentur. <2> Misimus
itaque illustrem et magnificum Seuerinum nostris institutionibus eruditum, ut
hoc apud uos gereret quod nobis semper placuisse cognouit. uidit enim quam
honorabilis apud nos iustus habeatur, quemadmodum bonis actibus clementia
nostrae serenitatis arrideat. exercet profecto quod nos aestimat gratanter
accipere: nec potest amari rapacitas continenti principi nulla redemptione
placitura. praesumenter ergo conueniat ad eum laesorum tumultus: speret remedium
qualibet pressus iniuria. <3> Difficultatem uobis querelae summouemus, dum in
ipsis cunabulis scelera commissa resecantur: sine aliqua formidine alieni
tributi sarcina grauatus exclamet, accepturus remedium quod de legibus habet.
sic enim confidimus, quia per eos, quos instituta nostra componunt, innocentibus
detrimenta non ueniant. qualia uero pro quiete uestra uel aequalitate tributorum
disponenda censuimus, oracula nostra, quae dedimus ad supradictum uirum
illustrem Seuerinum, uulgata declarabunt, ut unusquisque unde supplicare debeat,
euidenter agnoscat.
XVI. ABUNDANTIO PPO THEODERICUS REX.
<1> Quamuis utilia rei publicae nostra semper consuetudine censeamus et ob id
omnibus possint esse gratissima quae iubemus, quia cunctis profutura noscuntur,
tractandum tamen est, ut principis desiderium nulli existere debeat onerosum.
nam et si praeclare cogitata non bene agantur, ingrata sunt: illud autem solum
perfectum dicitur, quod de uoluntate simul et actione laudatur. <2> Cum nostrum
igitur animum frequens cura pulsaret naues Italiam non habere, ubi tanta
lignorum copia suffragatur, ut aliis quoque prouinciis expetita transmittat, deo
nobis inspirante decreuimus mille interim dromones fabricandos assumere, qui et
frumenta publica possint conuehere et aduersis nauibus, si necesse fuerit,
obuiare. sed tantae rei quem desideramus effectum magnitudinis uestrae
sollicitudine credimus esse procurandum. <3> Ideoque per cunctam Italiam
directis artificibus apta operi ligna perquire, et sicubi cupressos aut pinos
reppereris in uicinitate litoris, dato competenti pretio dominis consulatur.
haec enim tantum sunt quae ad taxationem uocentur, cetera uilitate sui non
indigent aestimari. <4> Sed ne prouisio nostra in mediis conatibus deserta
languescat, nautarum te iubemus sub hac moderatione iam nunc competentem numerum
diuinitate iuuante procurare. et si is qui nobis necessarius aestimatur seruus
fuerit alienus, aut conducat eum classibus seruiturum aut, si hoc ipse magis
elegerit, accepto pretio rationabili publico cedat sui iura dominii. si uero
libertate gaudet electus, quinos solidos donatiuum et annonam se nouerit
accipere competentem. <5> Eo modo et illi tractandi sunt qui a suis dominis
exuuntur, quando libertatis genus est seruire rectori (frequenter enim laborum
patientes existunt, quibus districti domini colla presserunt): ita tamen, ut
supradicti nautae arrarum nomine pro hominum qualitate binos aut ternos solidos
a uestra debeant sede percipere, quatenus unusquisque, cum fuerit ammonitus,
paratus debeat inueniri. piscatores uero non iubemus in hac definitione
concludi, quia dolenter amittitur, qui ad procurandas delicias possidetur,
quando et altera consuetudo est uentis saeuientibus occurrere et litora piscosa
sulcare.
XVII. ABUNDANTIO PPO THEODERICUS REX.
<1> Alacriter incumbendum est incohatis, cum iam uicinitas perfectionis
arriserit, quando spes effectus taedium laboris excludit et magnum genus
incitamenti credere desiderata compleri. dudum igitur magnitudini uestrae ex
Italiae litoribus officia iussimus praeparare nautarum, ut dromones, quos
industria fabricare ualuisset, manus remigum prouisa susciperet. sed tu iudicio
nostro electionique respondens ostendisti, quam fuerit indubitata perfectio
efficacissimis imperasse, quod quaeritur. renuntias ilico completum, quod uix
credi poterat incohatum, ut paene quanta uelocitate nauigari solet constructio
nauium, tanta sit celeritate completa. <2> Nec solum uerba narrata sunt:
obtulisti oculis nostris subito classeam siluam, domos aquatiles, exercituales
pedes, qui nullo labore deficiant, sed inconcussos homines ad destinata
perducant, trireme uehiculum remorum tantum numerum prodens, sed hominum facies
diligenter abscondens. hoc primum instituisse legimus Argonautas. quod et
armatis aptum et congruum probatur esse commerciis, ut, qui peregrinas classes
optabamus aspicere, nunc mittamus aliis prouinciis et terrorem pariter et
decorem. <3> Ornasti rem publicam tua institutione reparatam. non habet quod
nobis Graecus imputet aut Afer insultet. illud apud nos inuidi uigere
respiciunt, unde illi per magna pretia sua uota complebant. nunc praedictis
rebus armamenta procurate, uela praecipue alas nauium facientia, lignum
uolatile, quidam spiritus currentium carinarum, praenuntia mercium, auxilia
quieta nautarum, quorum beneficio conficiunt otiosi, quod a celerrimis auibus
uix probatur impleri. <4> Hoc Isis rati prima suspendit, cum per maria Harpocran
filium suum audaci femina pietate perquireret. ita dum materna caritas suum
desiderium festinat explere, mundi uisa est ignota reserare. atque ideo, diuino
nobis auxilio suffragante cuius uirtutis est hominum uota perficere, proximo die
iduum Iuniarum ad urbem Rauennatem congregatio nauium cuncta conucniat, quatenus
res uicino fine gaudentes ad plenissimum perducantur effectum. <5> Sed quoniam
dromonum numerum iuuante deo cupimus ampliari, si qua ligna fabricis eorum
necessaria per utramque Padi ripam potuerint inueniri, nullo obsistente iubemus
abscidi, quia sine praeiudicio dominorum operi tantum praesenti uolumus inuenta
concedi. mittat Padus noster indigenas pelago naues et abies, quae fluentis
amnicis nutrita surrexit, marinarum superare cumulos discat undarum. <6> Illud
etiam magnopere credidimus amputandum, quod uestra fieri suggestione comperimus:
ne quis in fluminibus nauigeris diuersis territoriis meantibus, id est in Mincio
Ollio Ausere Arno Tiberi, audeat fluminum alueos piscandi studio turpissima
saepe concludere, et quae sunt praesumpta, protinus auferantur. pateat amnis in
nauium cursus: sufficiat humano desiderio consuetis artibus delicias quaerere,
non commento rustico libertatem fluminis impedire, ne, quod dici nefas est,
utilitati publicae uoluptas priuata obstitisse uideatur.
XVIII. VVILIAE V. I. COMITI PATRIMONII THEODERICUS REX.
<1> Utilitas publica sicut ad conseruationem respicit omnium, ita debet perfici
studio ac labore cunctorum, quia magnae laudis occasio est, si in causa communi
aliquid singulariter uideatur impleri. facit enim unde commendetur et reliquis,
qui tamen et sibi se profuisse cognoscit. pridem igitur nos iussisse meministi,
ut per domum nostram nauigandi quaererentur artifices. <2> Quos deo auxiliante
prouisos ad Rauennatem urbem die iduum Iuniarum praecipimus incunctanter
occurrere, ut aduentus eorum constructioni nauium opportune uideatur offerri, ne
res diuisae generare sibi uideantur aliquam tarditatem et parum sit unam
perficere, nisi contingat utramque procurare. <3> Si qua etiam per ripam
fluminis Padi ligna fabricandis apta dromonibus in praediis regalibus potuerint
reperiri, artificibus huic operi a magnifico uiro Abundantio praefecto praetorio
deputatis abscidendi sit permissa licentia. uolumus enim hoc exemplum a nostris
praediis incohare, ut nulli grauis sit iussio, quae constringit et principem.
XVIIII. GUDINANDO SAIONI THEODERICUS REX.
<1> Maiora sibi facit credi, quisquis efficaciter iniuncta peregerit, quia
indubitanter illi aliquid committitur qui optime comprobatur, et honestum
suffragium est secundi iudicii documentum prionis. atque ideo ordinatione
magnificorum uirorum Abundantii praefecti praetorio atque VViliae comitis
patrimonii ad illam prouinciam te iubemus excurrere, ut tam de domo regia quam
in locis aliis habitantes secundum priora praecepta prouisos nautas ad urbem
Rauennatem die iduum Iuniarum deo auxiliante festinare compellas, quatenus nulla
tarditas tam praeclaris iussionibus afferatur. caue ergo ne te uenalitas maculet
aut neglectus turpis inuoluat et tam magnae rei supra te ruentis pondere
comprimaris, si tantis ac talibus rebus impar extiteris.
XX. ALIULFO SAIONI THEODERICUS REX.
<1> Per utramque ripam Padi reperiri ligna comperimus fabricandis apta
dromonibus, ideoque tibi praesenti iussione delegamus, ut secundum ordinationem
magnificorum uirorum Abundantii praefecti praetorio atque VViliae comitis
patrimonii ad loca designata cum artificibus incunctanter accedas et, siue in
domo regia seu in priuata reperta fuerint, sine aliqua facies tarditate
procurari, quia nulli graue credimus praebere, quod deo auxiliante pro communi
utilitate praeparatur. <2> Verum ita uolumus te iniuncta peragere, ut nihil ad
laedendum possessorem studiose uideatur inquiri, sed tantum quae sunt necessaria
utilitatis nostrae causa praesumantur. non exquiratur aliqiud a domino, quod
postea publico non dicatur acceptum. ligna siluestria iubemus caedi, non aliquid
de alienis facultatibus uiolenter abscidi. talia nobis prosunt, qualia nostros
grauare non possunt, quae, si causa praesens non exquireret, ille se crederet
non habere. <3> In Mincio Ollio Ausere Tiberi et Arno fluminibus comperimus
quosdam saepibus cursum fluminis, quantum ad nauigandi studium pertinet,
incidisse. quod te uolumus ordinatione magnifici uiri Abundantii praefecti
praetorio modis omnibus amputare, nec tale aliquid permittatis quemquam ultra
praesumere, sed inuiolati aluei tractus nauium relinquatur excursibus. scimus
enim retibus, non saepibus esse piscandum. nam hinc quoque detestabilis auiditas
proditur, ut sibi tantum festinet includere, quantum ad multos poterat
peruenire.
XXI. CAPUANO V. S. THEODERICUS REX.
<1> Si te tironem iudicia nostra delegissent, si ad examinis trutinam uenisses
incognitus, monendum aestimaremus, quali te prudentia, quo decore tractares. sed
omnium crederis intellegentiam habere uirtutum, qui exerceri meruisti militia
litterarum. aestimas enim, qua te debeas modestia continere, qui alieni negotii
uisus es uota peregisse. nam si te iudicis suspicio saeua tetigisset, laudando
iustitiam leni ac penetrabili remedio eius animum corrigebas, obtinens suaui
persuasione, quod superiori non potuisses imponere. quis ergo dubitat illa te
diligere, quae constat publica uoce suasisse! <2> Professa bona non habentur
ambigua: nec cuiusquam adquiescit ingenium, ut quod ipse potuit emeritus
prosequi, ab aliis tamquam rudis uideatur edoceri. prolati documenti fidem fieri
legitima uoce poscebas examinans, si retinerent incorruptam scrinia ueritatem.
iudex nunc exhibe, quod te uolebas apud alios obtinere. age, ne tua tibi
obiciatur oratio, quia pondus est pudoris grauissimi propria uoce conuinci. sume
igitur auctore deo recturam decuriarum, humanorum actuum ueracissimum testem,
securitatem possidentium, publicae fidei splendidissimum templum. unde tantum
tibi laudis adquiritur, quantorum illic utilitas incorrupta seruatur. <3> Viuat
ibi perpetuis saeculis decedentium uoluntas: transeant in posteros iudicia
parentum: scriniis tuis seruetur omnium quies. alii honores habeant et
terribiles fasces: tibi humanae uitae gratissimi uidentur militare custodes. ibi
enim absolutiones sunt hominum, uincla causarum, catena litium, carcer furoris.
de quo uerius diceret uates Mantuanus: 'clauduntur litis portae, furor impius
intus inclusus fremit horridus ore cruento.' decuriales igitur habita meritorum
aestimatione deligito, quia non decet tantae urbis appellare quod uile est.
maioris etiam natu utere, cum fuerit necesse, sententia, factus tot patribus
senior, tantis tacentibus uox senatus. uide quid dignitatis acceperis, ut inter
tot eloquentes uiros sis dicendi primarius, quos etiam nobis profitemur esse
reuerendos. assume ergo concedere quae iubemus, praestare quae cedimus, ut illis
aperias ianuas curiae, quos nostra electio aulam iusserit Libertatis intrare.
XXII. SENATUI URBIS ROMAE THEODERICUS REX.
<1> Licet caute semper eligendus sit qui uobis mittitur approbandus, quia ipse
magis traditur examini, cuius sententia noscitur prolata pensari, illas tamen
prudentibus uiris sociari cupimus dignitates, quae Romanis arcibus quasi gemmae
nobiles affiguntur. ubi enim dignius eloquens quam in ciuitate proficiat
litterarum, ut ibi declaret meritum, ubi nutriuit ingenium? aptum est omne bonum
locis suis et laudabilia quaeque sordescunt, nisi congrua sede potiantur.
requirit pugna ualidas manus, desiderat nauigium pectus animosum: sic scrinia
uestra fidele propositum, sic curia facunda disertum. multa ergo deliberatione
pensandus esse creditur, qui cottidie uestris sensibus offeratur. <2> Capuanum
igitur spectabilem uirum aestimatio nostra respexit, qui curiae uestrae
sententiam maioris natu auctoritate facundus ediceret et senatus scrinia
conscientiae puritate seruaret, ut actus illos mundo celeberrimos sua reddat
integritate laudandos. magnum munus est, patres conscripti, ad integritatem
deligi, nec mediocriter probatur conscientia, cui est ueritas commissa
saeculorum. nam si praedicatur testis qui in praesenti negotio uera dixerit, qua
laude censeri poterit, qui cunctis temporibus certa transmittit? sed quamuis
alumni uestri habeatis cuncta notissima, iuuat magis illa repetere quae omnium
consensus possit agnoscere. <3> Adest semper electo quaedam sermonum gratia,
blanditur auribus, mentem trahit, utitur perspicuitate facundiae, qualem de
pura, conscientia decet emanare. est enim quoddam speculum morum agentis oratio
nec maius potest mentis esse testimonium quam qualitas inspecta uerborum. nam ut
eius propria describamus, patitur in simplicibus rebus linguae retinacula: his
eo tamen terrentior cum perorat: et hoc illi ad gratiam datum est prouidente
natura, ut quem prae foribus haesitantem uideras, eloquentem in certaminibus
obstupescas. <4> Illa uero memoria, quae oratorum thesaurus iure uocitatur,
tanta in eum firmitate consedit, ut semel audita scripto apud eum putes esse
recondita. magnum beneficium obliuionis nescire defectum: et quaedam similitudo
uere caelestium est tempore decursa semper habere praesentia. quae nunc ideo
declaramus, ut cognoscatis subiectorum gratas nos habere uirtutes et iudicium
nostrum non per casuale uotum, sed per electionis studium doceamus esse
conceptum. <5> His ergo, patres conscripti, Capuanum bonis dotatum a praesenti
indictione decuriarum rectorem esse praecipimus, maioris etiam natu auctoritate
subuehimus, ut, qui se morum cana maturitate tractauit, quod est amplissimum
reuerentiae genus, in uestro ordine aetatis honore gratuletur. augebit
eloquentiam officio meliore ditatus, quoniam multum facundior est qui sententiam
dictat quam ille qui supplicat. libertas uerba nutrit, metus autem copiam
frequenter intercipit. actus quoque ipse longe dissimilis, ut qui pridem
assistebat etiam mediocribus humilibusque fortunis, nunc introducat uestrae
curiae consulares.
XXIII. ABUNDANTIO PPO THEODERICUS REX.
<1> Tatanem saionem nostrum cum sagittariis ad illustrem uirum comitem
VViliarium aestimauimus esse dirigendum, ut maius sumeret robur duplicatus
exercitus. ostentent inuenes nostri bellis, quod in gymnasio didicere uirtutis.
Schola Martia mittat examina: pugnaturus ludo, qui se exercere consueuit in
otio. atque ideo illustrem magnitudinem uestram eis annonas et nauigia secundum
consuetudinem praebere censemus, quatenus iuuante deo quo directi sunt debeant
peruenire. uestrae enim sollicitudini damus nostrarum efficaciam iussionum, quia
nullatenus destitui posse creditur, quod ordinationibus tuis iuuante deo
incohatur.
XXIIII. EPIPHANIO V. S. CONSULARI PROVINCIAE DALMATIAE THEODERICUS REX.
<1> Iohanna Andreae quondam iugali suo successisse legis munere perhibetur, quae
intestata nullis existentibus proximis luce dicitur esse priuata. cuius
substantia a diuersis nullo legitimo iure suffultis usurpatione uoluntaria
suggeritur possideri, et quia caduca bona fisco nostro competere legum cauta
decreuerunt, ideo te praesentibus oraculis ammonemus, ut huius rei ueritate
discussa, si re uera, ut ad nos perlatum est, nullus ei aut testamento heres
extitit aut proximitatis iure successit, fisci nostri eam facies compendiis
aggregari: quando innocentiae nostrae professio est iusta compendia non
neglegere, apud quem calumnia numquam locum potuit inuenire. <2> Rogari enim in
talibus causis, non fraudari principem decet, quia neglegentiae uitium est
praesumptiones relinquere, quas iura praecipiunt amputare. si quid autem contra
reppereris, quietos dominos habere patieris, quia magis illa nostra sunt
patrimonia, quae a subiectis legitime possidentur.
XXV. BACAUDAE V. S. THEODERICUS REX.
<1> Fessos annos munificentia nostra corroborat, dum aetatem occiduam penuriae
non facit detrimenta sentire. iuuenum siquidem uirtus praesumptione laboris
animatur: sola senum uita est quietis inuenisse remedia. atque ideo tua
supplicatione permoti designati tribunatus curam in Mediolanensi urbe
diligentissime peragendam ad te decernimus pertinere ita, ut, quod est in rei
publicae militia nouum, donec uixeris, numquam tibi successorem tribuat
cuiusquam plectenda praesumptio, quatenus in exhibendis uoluptatibus officii
huius cura, mansuetudinis nostrae beneficio, iugiter perfruaris, habens in
utroque, quod tuam consoletur aetatem, loci commodum et laetitiam uoluptatum.
XXVI. UNIVERSIS GOTHIS PER PICENUM ET SAMNIUM CONSTITUTIS THEODERICUS REX.
<1> Quamuis munificentia nostra sit omnibus ubique gratissima, multo tamen
acceptiora credimus quae nostri praesentia conferuntur, quia maiora de conspectu
principis populi sumunt, quam de largitate beneficia consequuntur. nam paene
similis est mortuo, qui a suo dominante nescitur nec sub aliquo honore uiuit,
quem regis sui notitia non defendit. <2> Et ideo praesenti iussione mandamus, ut
octauo iduum Iuniarum die deo auxiliante ad praesentiam nostram uenire debeatis:
qui sollemniter regalia dona suscipitis, si uenire protinus festinatis. illud
tamen necessario commonentes, ut uenientium nullus prouenire possit excessus, ne
possessorum segetes aut prata uastetis, sed sub omni continentia properantes de
custodita disciplina grata nobis esse uestra possit occursio, quia ideo
exercituales gratanter subimus expensas, ut ab armatis custodiatur intacta
ciuilitas.
XXVII. GUDUIN SAIONI THEODERICUS REX.
<1> Consuetudine liberalitatis ragiae commonemur, ut Gothis nostris debeamus
sollemnia dona largiri. et ideo deuotio tua millenarios prouinciae Piceni et
Samnii sine aliqua dilatione commoneat, ut eos, qui annis singulis nostrae
mansuetudinis praemia consequuntur, pro accipiendo donatiuo ad comitatum faciat
incunctanter occurrere, quatenus, qui bene nobis meriti fuerint, maiore
munificentia gratulentur. <2> Inculpabiliter enim necesse est uiuat, qui suam
praesentiam nouit principibus offerendam: bonos enim laus, malos querela
comitatur. decet etiam nos sub hac occasione singulorum facta perquirere, ut
nulli possit perire quod fecit in acie. nam si semper consuetudinarias res
expectet exercitus, uirtutem non potest amare neglectus. trepidus discat ad
iudicem uenire, qui se non meminit aliquid audacter egisse: ut melius possit
hostibus uiolentus insurgere, qui nostrae mauult imputationis uulnera declinare.
XXVIII. CARINO V. I. THEODERICUS REX.
<1> Habent hoc gloriosum praeiudicium bonarum merita personarum, ut otio
torpescere non sinantur qui probis actionibus innotescunt: et ideo tam desiderio
uestro satisfacientes, quam quod uos necessarios esse credidimus, iussis
praesentibus euocamus, quatenus et uiris nobilibus obsequia nostra decorentur et
quae utilia nobis credimus, per te expedire possimus.
XXVIIII. NEUDI V. I. THEODERICUS REX.
<1> Mouit nos quidem Anduit fusa precatio, sed magis miserabiliorem reddidit
uirum luminis sui ademptus ornatus, quia necesse est ut amplius permoueat uisa
quam audita calamitas. is enim perpetua nocte superstes ad remedia nostra
mutuati luminis beneficio festinauit, ut quem uidere non poterat, saltem
clementiae suauitate sentiret. clamat enim sibi Gudila uel Oppane incognitam suo
generi condicionem seruitutis imponi, cum pridem sub libertate nostros fuerit
secutus exercitus. <2> Mirati sumus talem in famulatum trahi, qui a uero domino
debuisset expelli. nouus ambitus talem quaerere, quem possis horrere seruumque
dicere, cui debeas diuina consideratione seruire. adiciens enim huiusmodi
calumnias Pitziae comitis celebratae opinionis uiri sibi examinatione summotas,
nunc autem infirmitatis suae mole compressum manu uindicare non posse, quae
patrona fortibus probatur assistere. <3> Sed nos, quorum est proprium inter
pares se dispares aequabilem iustitiam custodire, praesenti iussione decernimus,
ut, si in iudicio supra memorati quondam Pitziae se probauit ingenuum,
calumniantes protinus amouete: nec audeant ulterius necessitatibus alienis
illudere, quos semel conuictos decuerat sua uota damnare.
XXX. GUDUIN V. S. THEODERICUS REX.
<1> Quos duces eligimus, eis simul et aequitatis momenta iure delegamus, quia
non tantum armis quantum iudiciis uos effici cupimus clariores. Costula igitur
atque Daila cum deo propitio Gothorum nostrorum libertate laetentur, onera sibi
seruilia a uobis causantur iniungi, quae nec ipsos deceat perpeti nec cuiquam
irrationabiliter fas sit imponi. quod si ita gestum esse cognoscis, sine aliqua
dilatione facias amoueri, ne ad nos exinde ulterius querela reuocetur et
incipiat grauis esse animo nostro in ducem reuoluta causatio, quem magis oportet
talia peragere, quae nos delectet audire.
XXXI. DECORATO VIRO DEVOTO THEODERICUS REX.
<1> Thomas uir clarissimus intra Apuliam Calabriamque prouincias de siliquatici
titulo indictionum octauae nonae undecimae primae secundae et quintae decimae,
quas ad conductionem suam pertinuisse commemorat, nonnullos maximam pecuniae
quantitatem debere conqueritur. et quia utilitatem publicam diuturna non
conuenit ludificatione differri, ideoque deuotio tua praesentia decreta
suscipiens Marcum presbyterum, Andream et Simeonium uel reliquos, quos breuis
subter adnexus eloquitur, seruata in omnibus ciuilitate conueniat, ut, si eos
non per calumniam, sed manifestos re uera fisco constiterit esse debitores,
summam, quae rationabiliter postulatur, sine aliqua imminutione persoluant. <2>
Prouidendum est enim, ne spiritus contumacium personarum publicis rationibus
aliquod uideatur afferre dispendium. qui uero minus intentata cognoscunt, ad
iudicium competens te imminente conueniant, ut quod aequitati congruit,
utrarumque partium allegatione recognita saluis legibus impleatur.
XXXII. BRANDILAE THEODERICUS REX.
<1> Adiit nos innumeris uicibus Patzenis repetita conquestio, qui cum esset in
expeditione felicissima constitutus, a Procula coniuge tua uxorem suam asseruit
trina fuisse caede laceratam, ita ut solo beneficio desperationis euaderet, cum
non plagis fessa, sed iam crederetur extincta. hanc nos, si tamen uera est, in
femina quam maxima mirantes audaciam, transire non patimur impunitam. <2> Atque
ideo decretis te praesentibus ammonemus, ut, si factum euidenter agnoscis,
delatam querimoniam, pudori tuo consulens, maritali districtione redarguas,
quatenus ex eadem causa ad nos querela iusta non redeat. et legibus noueris
resecari posse, quod te oportuerat domestica districtione corrigere. <3> Quod si
mendacium magis petitoris accusans causam dicere fortasse uolueris, summoto
dilationis obstaculo ad comitatum nostrum cum supra dicta coniuge tua
incunctanter occurre, exceptura aut de iniqua praesumptione uindictam aut de
mulieris improbitate uictoriam.
XXXIII. VVILITANCO DUCI THEODERICUS REX.
<1> Grauis est Patzenis clementiae nostrae sensibus intimata conquestio. qui se
in expeditione Gallica constituto in eum Brandilam prosiluisse testatur
excessum, ut uxorem eius Reginam proprio sociandam duceret esse coniugio et in
iniuriam nostrorum temporum adulterium simulata matrimonii fuerit lege
commissum. haec nos, si uera sunt, transire nequaquam patimur impunita. nam
quando affectus tutos quis habeat, si tunc sceleri subiacebit, cum pro omnium
salute pugnauerit? <2> Respicite, impudicae, gementium turturum castissimum
genus: quod, si a copula sua fuerit casu intercedente diuisum, perpetua se
abstinentiae lege constringit: gratiam coniunctionis non repetit, quam reliquit:
fidem seruat, dum laudem pudoris ignoret, et moribus studere deprehenditur, quod
nulla uiduitatis gloriatur conuersatione. <3> Mulierum se, pro dolor! uota
continere nequeunt, quibus castitatem ratio persuadet, poena legis imponit,
terror maritalis extorquet. perierunt profecto mores, si nec illis comparari
possunt, quae ratione carentia temperantur. et ideo sublimitas tua impetitos ad
suum faciat examen occurrere et rerum ueritate discussa, sicut iura nostra
praecipiunt, in adulteros maritorum fauore resecetur, quia defensorem rei
publicae redire noluerunt qui scelerata praesumptione coniuncti sunt. <4>
Confundi sine dubio desiderauerunt omnia, qui temptauerunt legibus inimica. sed
melius est paucorum damno malorum corrigatur intentio, quia omne matrimonium,
quod absit, incertum relinquitur, si in tanta reuerentia sine aliquo terrore
peccetur.
XXXIIII. ABUNDANTIO PPO THEODERICUS REX.
<1> Frontosum sui nominis testem frequenti nobis insinuatione suggestum est
pecuniae publicae decoxisse non minimam quantitatem. quem a diuersis iudicibus
fecimus iusta examinatione perquiri, ne forsitan, ut assolet, eum non ueritas,
sed infamaret inuidia. ille omnia confessus reddere se posse constituit. si ei
largae praeberentur indutiae: quibus frequenter emensis immemor prommisionis
suae ad constituta semper imparatus occurrit, fugere quidem nescius, sed suae
sponsionis ignarus, obliuiosus cum relinquitur, trepidus cum tenetur. mutat
uerba, uariat constituta nec in una dicti sui qualitate contentus diuersis
imaginibus immutatur. <2> Merito chamaeleonti bestiae conferendus, quae paruorum
serpentium formae consimilis aureo tantum capite et reliquis membris subalbentis
prasini colore distinguitur. haec quotiens humanos aspectus incurrerit, dum ei
fugiendi uelocitas denegatur, nimia timiditate confusa colores suos multifaria
qualitate commutat, ut modo ueneta, modo blattea, modo prasina, modo possit
cyanea reperiri. unde mirum est in una superficie tot diuersa conspicere. <3>
Quam non immerito pandiae gemmae dicimus esse consimilem, in qua unus se fulgor
non potest continere: fluctuat aspectibus tremulis, dum lapis teneatur
immobilis. nam quod modo uideris, mox aliud ibi, si amplius intuearis, aduertis:
sic mutatum credis, quod neminem eripuisse cognoscis. <4> His permutationibus
aestimatis mens Frontosi simillima reperitur, quae dicti sui non habet fidem,
quae tot uarietates continet quot uerba protulerit: Protei fabulis iure
sociandus, qui subito comprehensus substantiae suae formam omnimodis non
habebat. nam ut celaret hominem, aut leo frendebat aut sibilabat anguis aut in
undas liquidas soluebatur. <5> Et quia sic notus est, cum facies ad tuum uenire
iudicium, primum agito, ne promittat, caueto ne constituat, quia leuissimi animi
mos est polliceri facile quae non disponit implere. quicquid autem persoluere
considerata aequitate potuerit, constrictus sine aliqua dilatione iam reddat,
quia post tot falsitates argutiae suae reputare poterit, quod se frequenter
illusisse cognoscit.
XXXV. LIVVIRIT COMITI ET AMPELIO V. I. THEODERICUS REX.
<1> Cum pro incerti temporis euentu Romanas aedes inopia facie castigata
pulsaret et quamuis rare, tamen tam pulchrae ciuitati uideretur esse foedissima,
aequum iudicauimus Hispaniae triticeas illi copias exhibere, ut antiquum
uectigal sub nobis felicior Roma reciperet. iussis quidem nostris uiri
spectabilis Marciani laude digna seruiuit industria: sed parum diligenter
impleta sunt, quae constat optime fuisse procurata. ii enim, qui portanda
susceperant, morarum taedia non ferentes destinatum frumentum in Africae
partibus pro suo dicuntur uendidisse compendio. <2> Quod quamuis inultum minime
transire debuisset, ut amor proprii commodi tot populorum ieiuna uota
suspenderet, tamen quia nobis insitum est culpas remittere, quas possumus cauta
ordinatione corrigere, Catellum et Seruandum uiros strenuos credidimus esse
dirigendos, ut, quia naucleri ducentos octoginta solidos in triticum et in
naulis septingentos quinquaginta octo solidos accepisse perhibentur, si apud uos
facti ueritas innotescit, in summam ratione collecta, ab eis mille triginta octo
solidorum quantitas inferatur, ut, qui uindictam remisimus, damna minime
sentiamus. in qua parte ita se sublimitas uestra diligenter impendat, ut et
iustitiae et publicis utilitatibus satisfecisse uideatur.
XXXVI. STARCEDIO V. S. THEODERICUS REX.
<1> Continuatis laboribus attritum corpus debilitatem tibi causaris attulisse
membrorum, ut, qui ante bellicis fueras aptus insignibus, nunc uel ad otiosam
uitam uix idoneus approberis: expetens, ut ad expeditiones felicissimas non
cogaris, a quibus non uoto, sed necessitate subduceris. atque ideo
allegationibus tuis diutius perquisitis et ad rerum fidem deductis otium tibi
non ignobile praesenti iussione largimur, quia non est ignauiae culpa, quem
excusat miseranda calamitas. <2> Sed sicut tibi remissam uitam concedimus, ita
te donatiuo praesenti auctoritate priuamus, quia non est aequum, ut, cum de tuo
cognoscaris idoneus, rem laborantium accipere debeas otiosus. fruere igitur
secura uita a diuersorum insidiis nostro munimine liberatus. nec aliquis tibi
imputabit desertoris opprobrium, quando illi, quos contigerit a militia morbi
causa suspendi, ex prioribus factis habendi sunt iure reuerendi. nec enim dignus
est a quoquam redargui, qui nostro iudicio meretur absolui.
XXXVII. IUDAEIS MEDIOLANENSIBUS THEODERICUS REX.
<1> Libenter annuimus quae sine legum iniuria postulantur, maxima cum pro
seruanda ciuilitate nec illis sunt neganda beneficia iustitiae, qui adhuc in
fide noscuntur errare. atque ideo discant rerum bonarum suauissimum saporem, ut,
qui humanam iustitiam nituntur quaerere, sollicitius incipiant diuina iudicia
cogitare. <2> Proinde quoniam nonnullorum uos frequenter causamini praesumptione
laceratos et quae ad synagogam uestram pertinent perhibetis iura rescindi,
opitulabitur uobis mansuetudinis nostrae postulata tuitio, quatenus nullus
ecclesiasticus, quae synagogae uestrae iure competunt, uiolentia intercedente
peruadat nec uestris se causis importuna acerbitate permisceat, sed ut
religionis cultu, ita et actuum sint conuersatione discreti: hac tamen
moderatione principalis auxilii beneficium concedentes, ut nec uos quod ad
praefatae ecclesiae ius uel religiosas certe personas legibus pertinere
constiterit, inciuiliter attrectare temptetis. <3> Tricennalis autem humano
generi patrona praescriptio eo, quo cunctis, uobis iure seruabitur nec
commodalia uos irrationabiliter praecipimus sustinere dispendia, ut hac pietatis
nostrae defensione muniti petitio uestra ab illicitis se liberatam gratuletur
incommodis. concedimus quidem clementiae nostrae consuetudine quae rogastis: sed
quid, Iudaee, supplicans temporalem quietem quaeris, si aeternam requiem
inuenire non possis?
XXXVIII. UNIVERSIS POSSESSORIBUS THEODERICUS REX.
<1> Ammonet nos formarum cura praecipua, ut quae possunt noxie crescere,
debeamus celerius amputare, quatenus et soliditas aquaeductus deo auxiliante
incorrupta seruetur et uobis leue sit opus, quod in teneris arboribus adhibetur.
nam quae nunc uirgulta sunt, erunt, si neglegantur, et robora. ista enim quae
modo facili auulsione dirimuntur, postea uix securibus icta succumbunt. atque
ideo sociata debetis properatione contendere, ut praesenti diligentia futuri
laboris euadatis incommoda. haec est enim ciuilis euersio, sine oppugnatione
discidium, aries, ut ita dixerim, fabricarum. <2> Quapropter omnem siluam, quae
parietibus inimica consurgit, de Rauennati forma iubemus radicitus amputari, ut
signini aluei reparata constructio talem nobis deducat liquorem, qualem potuit a
fontibus suscipere puritatem. tunc erit exhibitio decora thermarum, tunc
piscinae uitreis fontibus fluctuabunt: tunc erit quae diluat aqua, non inquinet,
post quam lauari continuo non sit necesse. additur etiam quod, si ad potandum
unda suauis influxerit, omnia nostro uictui redduntur accepta, quando humanae
uitae nullus cibus gratus efficitur, ubi aquarum dulcium perspicuitas non
habetur. nam si lauari cupimus purissimis liquoribus, quanto magis satiari
talibus festinamus? quae si nunc futura tractentur, nulli labor facit taedium,
qui sumitur pro delectatione cunctorum.
XXXVIIII. AMPELIO V. I. ET LIVVIRIT V. S. THEODERICUS REX.
<1> Decet prouincias regno nostro deo auxiliante subiectas legibus et bonis
moribus ordinari, quia illa uita uere hominum est, quae iuris ordine continetur.
nam beluarum ritus est sub casu uiuere: quae dum rapiendi ambitu feruntur,
inprouisa temeritate succumbunt. agrum suum denique a dumosis sentibus doctus
purgat agricola, quia laus excolentis est, si agreste solum dulcissimis
fructibus amoenetur. sic quies suauissima populi et dispositio tranquilla
regionum praeconium probatur esse regnantum. <2> Multorum itaque querela
comperimus in prouincia Hispaniae, quod summum inter mortales crimen est, uitas
hominum uaga praesumptione populari et leuium occasione causarum subire multos
interitum. sic mala pace quasi ludo corruunt, quanti uix potuissent cadere sub
necessitate bellorum. dehinc non polyptychis publicis, ut moris est, sed
arbitrio compulsorum suggeruntur prouincialium subiacere fortunae. quod genus
euidentis est praedae pro illius uoluntate dare, qui ad suum commodum amplius
festinat exigere. <3> Cui rei nos regali prouidentia succurrere cupientes
sublimitatem uestram per uniuersam Hispaniam loco muneris credidimus
destinandam, ut sub ordinationis uestrae nouitate inueteratae possit
consuetudini nil licere. uerum ut more medicorum saeuioribus morbis accelerata
remedia tribuamus, inde curationis nostrae fiat initium, ubi maius noscitur esse
periculum. <4> Homicidii scelus legum iubemus auctoritate resecari: sed quantum
uehementior poena est, tanto eius rei debet inquisitio plus haberi, ne amore
uindictae innocentes uideantur uitae pericula sustinere. pereant itaque soli
nocentes in correctione multorum, quando et hoc pietatis genus est coercere
infantiam criminis, ne iuuenescat augmentis. <5> Exigentes uero assem publicum
per grauamina ponderum premere dicuntur patrimonia possessorum, ut non tam
exactio quam praeda esse uideatur. sed ut totius fraudis abrogetur occasio, ad
libram cubiculi nostri, quae uobis in praesenti data est, uniuersas functiones
publicas iubemus inferri. quid enim tam nefarium quam praesumptoribus liceat in
ipsa etiam trutinae qualitate peccare, ut quod est iustitiae proprie datum, hoc
per fraudes noscatur esse corruptum? <6> Conductores domus regiae, quacumque
gente sint editi, ad liquidum ueritate discussa tantum decernimus soluere,
quantum nostra praedia constiterit pensitare. et ne cuiquam labor suus uideatur
ingratus, solaria eis pro qualitate locatae rei uestra uolumus aequitate
constitui. non enim nostra, sed illorum rura dicenda sunt, si pro uoluntate
conducentis modus eueniat pensionis. <7> Transmarinorum igitur canonem, ubi non
parua fraus fieri utilitatibus publicis intimatur, uos attonite iubemus
exquirere atque statutum numerum pro uirium qualitate definire, quia contra
fraudes utile remedium est nosse quod inferant. <8> Monetarios autem, quos
specialiter in usum publicum constat inuentos, in priuatorum didicimus transisse
compendium. qua praesumptione sublata pro uirium qualitate functionibus publicis
applicentur. <9> Telonei quinetiam canonem nulla faciatis usurpatione confundi,
sed modum rebus utillimum, quem praestare debeat, imponentes commerciandi
licentiam aequabili ratione reuocate, ne se tendat in uagum ambitiosa enormitas
exigentium. <10> Actus praeterea Laeti, cuius conscientia summa pulsatur
inuidia, sub consueta nobis censemus aequitate perquiri, ut nec fraus astutis
machinationibus occulatur nec innocentia falsis criminationibus ingrauetur. <11>
Quoscumque uero in furtiuis actionibus reperitis fuisse uersatos, pro fortunarum
quantitate suppressam reddant uestra aestimatione pecuniam. quod si haec per
alios dispersa esse constiterit, et illi nihilominus teneantur obnoxii qui
scientes passi sunt in tali actione misceri: complices enim extiterunt criminis,
qui non detexerunt facta raptoris. <12> Praebendarum tenor adscriptus, quem
nostra diuersis largitur humanitas, prouincialibus suggeritur intolerabilis
causa esse damnorum, quando et in species exigitur et impudenter eius pretium
postulatur. detestabilis cupiditatis sunt ista documenta competentia sibi
distrahere et ad exigendi impudentiam mox redire. quod nimis improbum, nimis
uidetur absurdum, ut et nostra constituta praetereant et tributariorum, qui
fouendi sunt, uideantur afflixisse substantiam. sint igitur praefixo modo
contenti, siue ibidem positi, siue hinc nihilominus destinati: habeant liberum
unum tantum de duobus expetere, dummodo geminata exactione fortunae alienas non
debeant ingrauare. <13> Exactorum quoque licentia amplius fertur a
prouincialibus extorqueri, quam nostro cubiculo constat inferri. quod diligenti
examinatione discussum ad hunc uos modum functiones publicas reuocare
decernimus, quem Alarici atque Eurici temporibus constat illatas. <14>
Paraueredorum itaque subuectiones exigere eos, qui habent ueredos adscriptos,
prouincialium querela comperimus. quod nullum penitus sinatis praesumere, quando
per turpissimos quaestus et possessor atteritur et commeantium celeritas
impeditur. <15> Vilicorum quoque genus, quod ad damnosam tuitionem queruntur
inuentum, tam de priuata possessione quam publica funditus uolumus amoueri, quia
non est defensio, quae praestatur inuitis: suspectum est quod patiuntur
nolentes. nam hoc est re uera beneficium, si sine murmure feratur acceptum.
seruitia igitur quae Gothis in ciuitate positis superflue praestabantur,
docernimus amoueri. non enim decet ab ingenuis famulatum quaerere, quos misimus
pro libertate pugnare.
XL. CYPRIANO COMITI SACRARUM THEODERICUS REX.
<1> Quamuis ultra desideria supplicum frequenter nos praestitisse beneficia
gaudeamus et, quod est difficillimum, humanae ambitionis interdum uota
superemus, haec tamen libentius amplectimur, quae nos merito fecisse gloriamur.
diu quippe trutinandus est, cui traduntur examina, talisque debet a principe
deligi, qualis ab ipsa potest lege dictari. gemmarum diuites uenae auri fulgore
pretiantur et gratiam pulchritudinis capiunt, quia nulla degeneri uicinitate
sordescunt. <2> Sic bone merita splendidis dignitatibus sociata alternis
praeconiis adiuuantur et unius rei facies de adiuncta uenustate pulchrescit: non
enim de te aliquid redemptae laudi aut loquaci famae credidimus, qui nobis
spectantibus saepe placuisti. interpellantium siquidem confuses querelas
distincta nimis ac lucida relatione narrabas, et qui proprios dolores expromere
non poterant, tuis commendati allegationibus obtinebant, et ne fauoris alicuius
putaretur excessus, desideria supplicum ipsis praesentibus intimabas. <3> Ori
tuo altercantium desideria conuenerunt et, quod difficillimum gratiae genus est,
alternae parti indiscreta laude placuisti, quae res ipsos oratores quoque
postponit. nam cum illis sit propositum diu tractata unius partis uota dicere,
tibi semper necesse fuit repentinum negotium utroque latere declarare. additur
etiam regalis praesentiae geniatissimum pondus, sub quo te ita facile contigit
expeditum, ut quod illi uix possunt artificiosis schematibus a iudicibus
obtinere, tu probareris a principe puris allegationibus impetrare. <4> Erat
nimirum serenitatis nostrae in bonum publicum parata sententia, quia nullam
tarditatem in cognoscendo negotio sustinebat. mox enim a te narrata causa
conspecta est, et cur tardaret negotii finis, cum tu suggestionem lucida
breuitate concluderes? didicisti, ut credimus, iudicare nostris seruiendo
iudiciis: ita, quod efficacissimum discipulatus genus est, agendo potius
instructus es quam legendo. <5> Talibus igitur institutis edoctus Eoae sumpsisti
legationis officium, missus ad summae quidem peritiae uiros: sed nulla inter eos
confusus es trepidatione, quia nihil tibi post nos potuit esse mirabile.
instructus enim trifariis linguis non tibi Graecia quod nouum ostentaret inuenit
nec ipsa, qua nimium praeualet, te transcendit argutia. <6> Accessit meritis
tuis cunctis laudibus pretiosior fides, quam diuina diligunt, mortalia
uenerantur. nam inter mundi fluctuantes procellas unde se humana fragilitas
contineret, si nostris actibus mentis firmitas non adesset? haec inter socios
amicitiam seruat, haec dominis pura integritate famulatur, haec supernae
maiestati reuerentiam piae credulitatis impendit et, si beneficium tantae rei
latius quaeras, incommutabilis fidei est omne quod bene uiuitur. <7> Sume igitur
per indictionem tertiam sacrarum largitionum deo propitio dignitatem. utere
congruis tuis natalibus institutis. meruisti hactenus, ut honorum fastigia
cederemus: age nunc, ut tibi gratiae nostrae celsiora nihilominus conferamus.
XLI. SENATUI URBIS ROMAE THEODERICUS REX.
<1> Licet candidatos uobis frequenter genuerit munificentia principalis et
fecunda indulgentia nostra uobis altera sit natura, habetis nunc profecto uirum,
quem et nos elegisse deceat et uos suscepisse conueniat. cui sicut fortunatum
fuit a nobis erigi, ita laudabile erit uestro coetui honorum lege sociari. hoc
tamen curiae felicius prouenit, quod nobis et impolitus tiro militat, illa uero
non recipit nisi qui iam dignus honoribus potuerit inueniri. <2> Conuenienter
ergo ordo uester aestimatur eximius, qui semper est de probatissimis
congregatus. non enim illic profanis reseratur introitus, sed tales illuc
permittuntur accedere, quales inde etiam cernuntur exire. suscipite itaque
collegam, quem palatia nostra longa examinatione probauerunt: qui regiis ita
intrepidus militauit affatibus, ut iussa nostra saepe nobis spectantibus atque
laudantibus explicaret. <3> Cognoscitis profecto quae loquimur. quis enim
uestrorum a Cypriani deuotione summotus est? nam qui solacia eius petiit, mox
beneficia nostra suscepit. obtinuit ille saepius in uectationibus nostris, quod
in consistoriis agi solebat antiquis. si quando enim releuare libuit animum rei
publicae cura fatigatum, equina exercitia petebamus, ut ipsa uarietate rerum
soliditas se corporis uigorque recrearet. tunc nobis causas multiplices relator
delectabilis ingerebat eratque eius infastidita suggestio sub iudicis animo
taedioso. <4> Ita dum causas praestandi benignus artifex ingerebat, reficiebatur
animus beneficiorum auiditate succensus. his igitur adhaesit obsequiis
candidatus, qui sic militauit animo nostro, ut nulla eum grauaret offensio.
irascebamur saepe causis improbis, nec tamen displicere poterat lingua
relatoris: damnabamus interdum negotium, cuius placebat assertor: et impetum
nostri animi frequenter sustinuit, qui gratiae momenta possedit. <5> Gloriatur
etiam non extrema luce natalium. nam pater huic, sicut meministis, Opilio fuit,
uir abiectis quidem temporibus, ad excubias tamen palatinas electus. qui multo
amplius crescere potuit, nisi fides eius sub auidissima remuneratoris
sterilitate iacuisset. quid enim conferre poterat tenuis donator? qui si tamen
non ditauit, innotuit, quia magnae abundantia laudis est in penuria rei publicae
uel mediocria munera meruisse. <6> Vicit iste maiores suos felicitate saeculorum
et, quod amplius euectus est, nostris est temporibus applicandum. talis quippe
est in subiectis mensura prouectuum, qualis fuerit et distantia dominorum.
quapropter, patres conscripti, praedictum Cyprianum suis meritis et natalium
splendore fulgentem ad sacrarum largitionum culmen eueximus, ut et uester
augeatur numerus et incitetur deuotio seruientum. aestimate, reuerentissimi
patres, quid de uestro ordine senserimus, quando eos, quos uobis aggregandos
credimus, multiplici allegatione praedicamus.
XLII. MAXIMO V. I. CONSULI THEODERICUS REX.
<1> Si consularem munificentiam prouocant, qui peruncta corporum flexibilitate
luctantur: si organo canentibus redditur uicissitudo praemiorum: si uenit ad
pretium delectabilis cantilena: quo munere uenator explendus est, qui ut
spectantibus placeat, suis mortibus elaborat? uoluptatem praestat sanguine suo
et infelici sorte constrictus festinat populo placere, qui eum non optat
euadere. actus detestabilis, certamen infelix cum feris uelle contendere, quas
fortiores se non dubitat inuenire. sola est ergo in fallendo praesumptio, unicum
in deceptione solacium. <2> Qui si feram non mereatur effugere, interdum nec
sepulturam poterit inuenire: adhuc superstite homine perit corpus et antequam
cadauer efficiatur, truculenter absumitur. captus esca fit hosti suo, et illum,
pro dolor! satiat quem se perimere posse suspirat. spectaculum tantum fabricis
clarum, sed actione deterrimum, in honore Scythicae Dianae repertum, quae
sanguinis effusione gaudebat. <3> O miserae deceptionis errorem illam
desiderasse colere, quae hominum morte placabatur! primum sibi per lucos et
siluas agrestium populorum uota et uenationibus dedita hanc triplicem deam falsa
imaginatione finxerunt, ipsam in caelo Lunam, ipsam in siluis dominam, ipsam
apud inferos Proserpinam esse firmantes. sed solum Erebi potentem non improbe
forsitan aestimarunt, quando tali falsitate decepti in profundas uiui tenebras
cum suis erroribus intrauerunt. <4> Hunc ludum crudelem, sanguinariam
uoluptatem, impiam religionem, humanam, ut ita dixerim, feritatem Athenienses
primum ad ciuitatis suae perduxere culturam, iustitia permittente diuina, ut ad
irrisionem spectaculi perueniret, quod falsae religionis ambitus inuenisset. <5>
Hoc Titi potentia principalis, diuitiarum profuso flumine, cogitauit aedificium
fieri, unde caput urbium potuisset. et cum theatrum, quod est hemisphaerium,
Graece dicatur, amphitheatrum quasi in unum iuncta duo uisoria recte constat
esse nominatum: oui specie eius harenam concludens, ut et currentibus aptum
daretur spatium et spectantes omnia facilius uiderent, dum quaedam prolixa
rotunditas uniuersa collegerat. <6> Itur ergo ad talia, quae refugere deberet
humanitas. primus fragili ligno confisus currit ad ora beluarum et illud, quod
cupit euadere, magno inpetu uidetur appetere. pari in se cursu festinant et
praedator et praeda nec aliter tutus esse potest, nisi huic, quem uitare cupit,
occurrerit. tunc in aere saltu corporis eleuato quasi uestes leuissimae supinata
membra iaciuntur et quidam arcus corporeus supra beluam libratus, dum moras
discedendi facit, sub ipso uelocitas ferina discedit. <7> Sic accidit, ut ille
magis possit mitior uideri, qui probatur illudi: alter angulis in quadrifaria
mundi distributione conpositis rotabili facilitate praesumens non discedendo
fugit, non se longius faciendo discedit, sequitur insequentem, poplitibus se
reddens proximum, ut ora uitet ursorum: ille in tenuen regulam uentre suspensus
inuitat exitiabilem feram et nisi periclitatus fuerit, nil unde uiuere possit
adquirit: <8> alter se gestabili muro cannarum contra saeuissimum animal, ericii
exemplo, receptatus includit, qui subito in tergus suum refugiens intra se
collectus absconditur et cum nusquam discesserit, eius corpusculum non uidetur.
nam sicut ille ueniente contrario reuolutus in sphaeram naturalibus defensatur
aculeis, sic iste consutili crate praecinctus munitior redditur fragilitate
cannarum. <9> Alii tribus ut ita dixerim dispositis ostiolis paratam in se
rabiem prouocare praesumunt, in patenti area cancellosis se postibus occulentes,
modo facies, modo terga monstrantes, ut mirum sit euadere quos ita respicis per
leonum ungues dentesque uolitare. <10> Alter labenti rota feris offertur: eadem
alter erigitur, ut periculis auferatur. sic haec machina ad infidi mundi formata
qualitatem istos spe refouet, illos timore discruciat: omnibus tamen uicissim,
ut decipere possit, arridet. <11> Longum est per tot periculorum casus
sermonibus euagari. sed apte iungendum est, quod sit de inferis Mantuanus: quis
scelerum comprehendere formas, quis omnia poenarum percurrere nomina possit? sed
uobis, quibus necesse est talia populis exhibere, largitate manus fundite
praemia, ut haec miseris faciatis esse uotiua. alioquin uiolenta conpulsio est
sollemnia dona subtrahere et mortes detestabiles imperare. <12> Et ideo quicquid
in longam consuetudinem antiqua liberalitate peruenit, sine aliqua dilatione
concedite supplicanti, quia homicidii reatus est ills esse tenacem, quos editio
uestra inuitauit ad mortem. heu mundi error dolendus! si esset ullus aequitatis
intuitus, tantae diuitiae pro uita mortalium deberent dari, quantae in mortes
hominum uidentur effundi.
XLIII. TRANSIMUNDO REGI VVANDALORUM THEODERICUS REX.
<1> Quamuis a diuersis regibus expetiti pro solidanda concordia aut neptes
dedimus aut filias deo nobis inspirante coniunximus, nulli tamen aestimamus nos
aliquid simile contulisse, quam quod germanam nostram, generis Hamali singulare
praeconium, uestrum fecimus esse coniugium: feminam prudentiae uestrae parem,
quae non tantum reuerenda regno, quantum mirabilis possit esse consilio. <2> Sed
stupeo uos his beneficiis obligatos Gesalecum, qui nostris inimicis, dum a nobis
foueretur, adiunctus est, in uestram defensionem sic fuisse susceptum, ut qui ad
uos uiribus destitutus priuatusque fortunis uenerat, subita pecuniae ubertate
conpletus ad gentes exteras probetur esse transmissus: qui quamuis deo iuuante
laedere nihil possit, tamen animum uestrae cogitationis aperuit. <3> Quid
expectent extraneorum iura, si sic meretur affinitas? nam si causa misericordiae
susceptus est in regno uestro, teneri debuit: si nostri propter expulsus est,
non oportuerat cum diuitiis ad aliena regna transmitti, quae ne uobis
redderentur infesta, nostra fecerunt absolute certamina. ubi est, quod tanta
lectione saginatus alios solebas docere de moribus? hoc si uoluisses cum sorore
nostra tractare, utique uobis non potuisset accidere, quia nec fratrem
permiserat laedi nec maritum fecerat in rebus talibus inueniri. <4> Atque ideo
per illum et illum legatos nostros salutantes honorificentia conpetenti petimus,
ut hanc iniustitiam deliberatio uestra pertractet, ne parentum nostrorum animus
causis euidentibus excitatus cogitet aliquid temptare quod pacem uideatur
irrumpere. grauiter siquidem dolet iniuria, quae contigerit insperata et si inde
proueniat dolus, unde credebatur auxilium. quaedam uero per harum portitores
uerbo uobis insinuanda commisimus, ut aestimantes omnia, quid fieri in tanta
causa oporteat, prouidentia uestra reponat, quia non est leue prudentes uiros in
pacis constituta peccare.
XLIIII. TRANSIMUNDO REGI VVANDALORUM THEODERICUS REX.
<1> Ostendisti, prudentissime regum, post erroris euentum sapientibus subuenire
posse consilium nec pertinaciae uitium uos amare, quod brutis hominibus uidetur
accidere. obligastis animum meum tanta uos in melius celeritate mutando. nam cum
rex satisfacit, quaelibet dura dissoluit, quia sic est in principibus humilitas
gloriosa, quemadmodum in mediocribus odiosa potest esse iactantia. <2> Nuper
uobis obiecimus Gesaleci quondam regis dolosa meditatione discessum: sed uos
nobilitatis uestrae memores et honoris actum rei nobis sub ueritate declarastis.
unde non fuit sic uituperabile hominem prauis suspicionibus locum dedisse,
quantum gloriosum est dominantem tam celerrime se potuisse purgare. ille enim,
qui minus poterat cogi, animae non passus est arcana uiolare. <3> Cui laudi
uicissitudinem, in qua possumus parte, reddentes sincerem purgationem pura mente
suscepimus. sed auri transmissi munera non tenemus, ut et ipsi intellegatis
causam per iustitiam fuisse motam, quam nulla potuit finire uenalitas. fecimus
utrique regalia: sic nos superauimus tyrannicam cupiditatem, sicut et uos
uicisse constat errorem. redeant ad cubiculum uestrum munera, quorum tantum
oblatio uidetur esse gratissima. neglegatur aurum, ubi electum est conscientiae
praemium: patiatur aliquando repulsam, quod semper auaris regibus imperabat. eat
nunc actus isto per gentes carum parentem non excusasse culpam et laesos animos
respuisse pecuniam. <4> Ita, quod per bella solebat quaeri, amoris studio
declaratum est potuisse contemni. intellegant parentes tales fuisse qui studio
auaritiae causas sibi nequiuerint excitare. omnia siquidem superauit affectus:
tunc coepit petitio magis desinere, quando pulsatus obiecta non passus est
abnegare. recipite igitur munera sensibus suscepta, non manibus. suauius nobis
fuit ista reddere quam multo grandia suscepisse. estote nunc ad similia cauti,
ad uentura solliciti: quia instructus redditur animus in futuris, quando
praeteritorum commonetur exemplis. quapropter illo et illo legatis uestris
redeuntibus plenissime reddimus salutationis affectum, optantes ut sospitatem
uestram diuina concedant, cuius nobis animos ualidissime cognoscimus esse
sociatos.
LIBER SEXTUS.
I. FORMULA CONSULATUS.
<1> Priscorum iudicio qualis sit consulatus, hinc omnino datur intellegi, quando
inter mundi dignitates eximias solus meruit habere palmatas uestes, quas
felicitas dabat: praemia uincentium, nomen annorum: compensatio sola cui
debebantur omnia. statum rei publicae Romanae uiri fortis dextera tuebatur,
fortunas omnium ac liberos ciuis consilia uindicabant: et tot magnis debitis
sola erat huius retributio dignitatis, reperta in libertatis ornatum, inuenta ad
generale gaudium. <2> Per illam nimirum status imperii iugiter creuit, illam
semper felix Roma suscepit. merito pridem genus habebatur imperii: merito supra
omnes ciues poterat, qui ab hoste patriam uindicabat. utilitates publicas sub
aequitate disponens ius dicebat etiam capiti: sed tuto illi commissa est
potestas necis, qui fuerat auctor salutis. <3> Hinc est quod etiam fasces atque
secures tantae potestati praeceptae sunt inligari, ut, cum tardius soluerentur,
moram deliberationis acciperent, si de caede aut nece hominis aliquid
censuissent: ita cum omnia eius traderentur arbitrio, ne insolesceret animo,
consul dictus est a consulendo. <4> Hinc tanta largitas profluebat, ut illa
dextera, quae sanguinem copiose fuderat hostium, uitae auxilium ciuibus manaret
irriguum. sic quos felices per bella fecerat, studio largitatis explebat. in
argumentum etiam publicae gloriae soluebat famulos iugo seruili, qui libertatem
tantae dederat ciuitati. <5> Sed nunc sumitis ista felicius, quando nos habemus
labores consulum et uos gaudia dignitatum. palmatae siquidem uestrae nostrae
probantur esse uictoriae et prosperrimae condicionis euentu uos in pace
ingenuitatem ceditis famulis, cum nos securitatem demus per bella Romanis. atque
ideo per illam indictionem consulatus te decoramus insignibus. <6> Pinge uastos
umeros uario colora palmatae, ualidam manum uictoriali scipione nobilita, lares
proprios etiam calceis auratus egredere, sellam curulem pro sua magnitudine
multis gradibus enisus ascende, ut in otio subiectus merearis, quod nos post
maximos labores assumimus imperantes. <7> Rem uictoriarum agitis, qui bella
nescitis: nos iuuante deo regimus, nos consulimus et uestrum nomen annum
designat. uicistis felicitate principes, qui et honores summos geritis et
dominationis taedia non habetis. quapropter erige confidentiam mentis tuae:
consules esse magnanimos decet. opes priuatas non cogites, qui gratiam publicam
donando habere decreuisti. <8> Hinc est enim, quod alios iudices etiam non
rogantes euehimus, consules autem sperantes tantummodo promouemus, ut soli ad
has largitates ueniatis, qui uos pares tantis expensis esse cognoscitis.
alioquin onera essent potius, non honores, si supra uires aliquid inponeremus
inuitis. fruere igitur decenter optatis. hic est ambitus qui probatur. esto
mundo clarus, tibi prosperrimus, tuis autem posteris feliciter imitandus.
II. FORMULA PATRICIATUS.
<1> Si antiquitatis ordinem perscrutemur origine dignitatum, patriciorum familia
Ioui noscitur fuisse dicata, ut summi dei, sicut putauere, cultura locum
primarium possideret. sed quia uos aliquid habere decebat eximium et nomen ipsum
patribus magna se uicinitate iungebat, superstitione derelicta ad uestrum coetum
optima condicione migrauit, quia pontificalis laus conscientiae senatui recte
poterat conuenire. <2> Sic ex augurali familia reges quoque legitis institutos,
non iniuria, quia decuit a tali proposito uenire qui publica poterat iura
tractare. hinc est quod et honor ipse cinctus est, cum uacaret, nihil
iurisdictionis habens et iudicantis cingulum non deponens. in quo felicitas
perpetua nascitur, dum successoris ambitio non timetur: nam mox ut datus fuerit,
in uitae tempus reliquum homini fit coaeuus: ornatus indiuiduus, cingulum
fidele, quod nescit ante deserere quam de mundo homines contingat exire. <3>
Credo ad similitudinem pontificatus, unde uenerat, rem fuisse formatam: qui
sacerdotium non deponunt, nisi cum uitae munera derelinquunt. additur quod leges
tantam illis reuerentiam detulerunt, ut in sacris positus, cum hoc fuerit honore
praecinctus, paternae potestatis nexibus exuatur, nisi contra specialiter a
principe caueatur. quod constat ratione probabili constitutum, ut qui
amplissimum genium pretiosae libertatis acceperat, uilissimam condicionem cum
subditis non haberet. <4> Praefectorios et aliarum dignitatum uiros praecedit,
uni tantum cedens fulgori, quem interdum etiam a nobis constat assumi. proinde
necessario laudatam intellege dignitatem, ne aut nos parum dedisse uideamur aut
tu neglegentius tractes, si te aliquid mediocre suscepisse putaueris. quapropter
ab illa indictione nostro munere subleuatus patriciatus culmen ascende, quod
quidam iuridicorum a patribus dictum esse uoluerunt, facturus omnia quae tantam
reuerentiam decent. nam quamuis magna contulerit nostra clementia, habes adhuc
quod expetas, si te probabiliter tractare contendas.
III. FORMULA PRAEFECTURAE PRAETORIO.
<1> Si honoris alicuius est origo laudabilis, si bonum initium sequentibus rebus
potest dare praeconium, tali auctore praefectura praetoriana gloriatur, qui et
mundo prudentissimus et diuinitati maxime probatur acceptus. nam cum Pharao rex
Aegyptius de periculo futurae famis inauditis somniis urgeretnr nec uisionem
tantam humanum posset reuelare consilium, Ioseph uir beatus inuentus est, qui et
futura ueraciter praediceret et periclitanti populo prouidentissime subueniret.
<2> Ipse primum huius dignitatis infulas consecrauit: ipse carpentum reuerendus
ascendit: ad hoc gloriae culmen euectus, ut per sapientiam conferret populis
quod praestare non potuerat potentia dominantis. ab illo namque patriarcha et
nunc pater appellatur imperii: ipsum hodieque resonat uex praeconis, instruens
iudicem, ne se patiatur esse dissimilem: merito, ut, cui tanta potestas potuit
dari, uideretur semper subtiliter ammoneri. <3> Quaedam enim huic dignitati et
nobiscum iura communia sunt. exhibet enim sine praescriptione longinquos, magna
quantitate multat errantes, fiscum pro sua deliberatione distribuit, euectiones
simili potestate largitur, uacantia bona proscribit, delicta prouinciarum
iudicum punit, uerbo sententiam dicit. quid est, quod non habeat commissum,
cuius est uel ipse sermo iudicium? paene est, ut leges possit condere, quando
eius reuerentia sine appellatione potest negotia terminare. <4> Ingressus
palatium nostra consuetudine frequenter adoratur et tale officium morem uidetur
soluere, quod alios potuit accusare. potestate igitur nulla dignitas est
aequalis. uice sacra ubique iudicat. nullus ei miles de fori sui auctoritate
praescribit excepto officiali magistri militum: credo, ut uel illis aliquid
antiquitas cederet, qui uidebantur pro re publica bella tractare. curiales etiam
uerberat, qui appellati sunt legibus minor senatus. <5> In officio suo ius
retinet singulare et talibus tantisque noscitur iubere, quos etiam prouinciarum
iudices non audeant in aliqua parte contemnere. officium plane geniatum,
efficax, instructum et tota animi firmitate praeualidum, qui sic peragent iussa,
ut nullis morentur dilationibus imperata. militia perfunctis tribunorum et
notarionum honorem tribuit et milites suos illis exaequat, qui inter proceres
mixti nostris conspectibus obsecundant. <6> Gratanter implemus quae ille
constituit, cuius reuerentia et nos ita constringimur, ut sine dubitatione
faciamus quae illum decreuisse cognoscimus. non inmerito, quando palatium sua
prouisione sustentat, seruientibus nobis procurat annonas, humanitates ipsis
quoque iudicibus facit, legatos gentium uoraces explet ordinationibus suis: et
licet aliae dignitates habeant titulos praefinitos, ab ista paene totum geritur,
quicquid in imperio nostro aequabili moderatione tractatur. <7> Hanc denique
curarum omnium pulcherrimam molem, quod prosperum nobis, utile rei publicae sit,
ab illa indictione tuis umeris decenter inponimus, quam tu et ingenii uirtute
sustineas et summa fide tractare contendas. quae quantum diuersis
sollicitudinibus constringitur, tanto magis laudes amplissimas dignitas haec
triumphat. <8> Et ideo tantum lumen gloriae sit actionibus uestris, ut et
palatio nostro fulgeat et in prouinciarum longinquitate reluceat. par tibi sit
cum potestate prudentia: conscientiae tuae quadrifaria uirtus assideat. tribunal
tuum ideo tam excelsum factum esse noueris, ut locatus ibi nihil humile
abiectumque cogitares. considera quid debeas dicere, quod a tantis excipitur.
<9> Monimenta publica talia contineant, quae se legisse nullus erubescat.
praesul mirabilis partem non habet cum delictis, qui nisi aliquid egregium
assidue fecerit, culpam uel otiosus incurrit. nam si praedictus auctor
sanctissimus ille recolatur, quoddam sacerdotium est praefecturae praetorianae
competenter agere dignitatem.
IIII. FORMULA PRAEFECTURAE URBANAE.
<1> Cum de dignitate commissa laus semper iudicis aestimetur et potior habendus
est quam sunt illi quibus praeesse cognoscitur, nemo amplius uidetur erigi quam
cui potuit Roma committi. grande est quidem procerem esse, sed multo grandius de
proceribus iudicare. senatus ille mirabili opinione gloriosus probatur habere
praesulem, quem mundus suspicit iura condentem: eoque fit ut illi utantur in
senatu potestate perfecta, qui apud te trepidant dicere proprias causas. <2>
Verum haec quoque modestia cognoscitur esse praedicanda, ut optent se legibus
teneri, quae ab ipsis sciuntur potuisse constitui. quae res pro parte nobis
absolute communis est: sed hac sola ratione discreti, quod alteri subdi non
possumus, qui iudices nos habemus. <3> Respice tot doctos uiros et considera,
quale sit his aliquid dicere nec erroris uerecundiam formidare. de talibus
disceptas, quos tibi cognoscis esse potiores. sic ergo locum tuum tracta, ut
omnes te iudicem honoratae congregationis agnoscant. consides supra omnes
scilicet consulares: sententiam primus dicis: et in illa Libertatis aula
reuerendus aspiceris, in qua commissos habere mundi primarios approbaris. <4>
Quis iam de obscuro uitio cogitare possit, qui se inter tot morum lumina esse
cognoscit? uis odium non recipere? studium a te gratificationis exclude.
publicum amorem necesse est habeas, si secretius nil promittas. erit nimirum
magnum et singulare praeconium, si iudices non accipiant, ubi sunt qui multum
dare contendant. <5> Dicioni tuae non solum Roma commissa est, quamuis in illa
contineantur uniuersa, uerum etiam intra centesimum potestatem te protendere
antiqua iura uoluerunt, ne tantae ciuitatis iudicem muralis agger includeret,
cum Roma omnia possideret. tu etiam ex designatis lege prouinciis ab
appellatione cognoscis. <6> Aduocati tibi militant eruditi, quando in illa
patria difficile non est oratores implere, ubi magistros eloquentiae contigit
semper audire. carpento ueheris per nobilem plebem, publica te uota comitantur,
fauores gratissimi consona tecum uoce procedunt. bene age, quia te ueniente
licet populis et tacere. habes copiose, unde tibi gratiam tantae ciuitatis
adquiras, si merces diuersae sub nulla uenalitate uendantur, si exhibitio
salubriter accensa thermarum rapinarum ardoribus non tepescat, si spectaculum,
quod praebetur uoluptati, non sit causa litigii. suauiter enim cogit gratum esse
populum, quisquis in certaminibus partium declinat iniustum. <7> Tanta enim uis
est gloriosae ueritatis, ut etiam in rebus scaenicis aequitas desideretur.
ammonitionum igitur ordine decurso per indictionem illam habitu te togatae
dignitatis ornamus, ut indutus ueste Romulea iura debeas adfectare Romana. nam
si isti dignitati par fueris, nihil est quod a nobis minime consequaris. ad
omnia enim tali suffragio eris nihilominus dignus, si actionem tuam laudet
senatus. perfecta enim rei fides est, ubi consentanei testes probantur esse
summates.
V. FORMULA QUAESTURAE.
<1> Si tantum clarae sunt dignitates quantum nostris aspectibus perfruuntur, si
praesentia frequens prodit dominantis affectum, nullus ita iudicum potest esse
gloriosus quam ille qui est in cogitationum nostrarum participatione susceptus.
aliis enim pecuniae publicae committimus procurationem, aliis causas concedimus
audiendas, aliis patrimonii nostri iura delegamus: quaesturam toto corde
recipimus, quam nostrae linguae uocem esse censemus. <2> Haec nostris
cogitationibus necessario familiariter applicatur, ut proprie dicere possit quod
nos sentire cognoscit: arbitrium suae uoluntatis deponit et ita mentis nostrae
uelle suscipit, ut a nobis magis putetur exisse quod loquitur. o quam arduum est
subiectum uerba dominantis assumere, loqui posse quod nostrum credatur et
prouecti in publicum decorem gloriosam facere falsitatem! <3> Considerate quid
ponderis habeatis pariter et decoris. si quid dubitamus, a quaestore requirimus,
qui est thesaurus famae publicae, armarium legum, paratus semper ad subitum et,
ut ait Tullius magister eloquentiae, nihil praestabilius uidetur quam posse
dicendo tenere hominum mentes, allicere uoluntates, impellere quo uelit, unde
autem uelit, deducere. nam si oratoris est proprium grauiter et ornate dicere,
ut possit animos iudicum commouere, quanto facundior debet esse, qui ore
principis populos noscitur ammonere, ut recta diligant, peruersa contemnant,
bonos sine fine laudent, pessimos uehementer accusent? ut paene feriata sit
districtio, ubi praeualet eloquentiae fortitudo. sit imitator prudentissimus
antiquorum, mores et alienos corrigat et suos debita integritate custodiat. <4>
Talem denique oportet esse quaestorem, qualem portare principis decet imaginem.
nam si nos, ut assolet, causam gestis audire contingat, quae auctoritas erit
linguae, quae sub oculis regalem genium possit implere? adesse debet scientia
iuris, cautela sermonis, ut nemo debeat reprehendere quod principem constiterit
censuisse. opus erit praeterea firmitas animi, ut a iustitiae tramite nullis
muneribus, nullis terroribus auferatur. <5> Nam pro aequitate seruanda et nobis
patimur contradici, cui etiam oportet oboediri. sed uide ut tantum doctrinae
deferas, quatenus probabiliter omnia perquisitus exponas. aliae quippe
dignitates assessorum solacia quaerant: tua uero dignitas principi consilia
sumministrat. atque ideo prudentiae uel eloquentiae tuae fama prouocati
quaesturam tibi, gloriam litterarum, ciuilitatis templum, genetricem omnium
dignitatum, continentiae domicilium, uirtutum omnium sedem, per illam
indictionem deo praestante concedimus, ut sic agas, quemadmodum te parem rebus
praedictis esse contendas. <6> Ad te enim prouinciae sua uota transmittunt: a te
senatus iuris quaerit auxilium: a te docti probantur expetere quod nouerunt, et
necesse tibi est omnibus sufficere, quantos a nobis contigerit legum remedia
postulare. sed cum haec omnia feceris, nullis elationibus efferaris, nulla
mordearis inuidia, alienis calamitatibus non laeteris, quia quod odiosum est
principi, non potest conuenire quaestori. exerce potestatem principis condicione
subiecti. sic ore nostro glorificatus eloquere, ut te tamen rationem credas
nobis iudicibus redditurum, ubi aut culpabilis uicissitudinem recipit aut boni
propositi gloriam laudatus adquirit.
VI. FORMULA MAGISTERIAE DIGNITATIS.
<1> Reuerendum honorem sumit, quisquis magistri nomen acceperit, quia hoc
uocabulum semper de peritia uenit et in nomine cognoscitur, quid sit de moribus
aestimandum. ad eum nimirum palatii pertinet disciplina: ipse insolentium
scholarum mores procellosos moderationis suae prospero disserenat. tam multi
ordines sine confusione aliqua componuntur et ipse sustinet onus omnium, quod
habet turba discretum. sic nominis sui grauitate perfunctus ornat actibus
principatum. <2> Per eum senator ueniens nostris praesentatur obtutibus: ammonet
trepidum, componit loquentem, sua quin etiam uerba solet inserere, ut nos
decenter omnia debeamus audire. aspectus regii haud irritus promissor,
collocutionis nostrae gloriosus donator, aulici consistorii quasi quidam
lucifer: nam sicut ille uenturum diem promittit, sic iste desiderantibus uultus
nostrae serenitatis attribuit. causarum praeterea maximum pondus in eius
audientiae sinibus optima securitate reponimus, ut eius curis fidelibus
subleuati utilitatibus publicis uiuacius occupemur. <3> Veredorum quin etiam
opportunam uelocitatem, quorum status semper in cursu est, diligentiae suae
districtione custodit, ut sollicitudines nostras, quas consilio iuuat, beneficio
celeritatis expediat. <4> Per eum exteris gentibus ad laudem rei publicae
nostrae ordinatur humanitas et nolentes redeunt, quos maerentes exceperit. per
eum quippe nobis legatorum quamuis festinantium praenuntiatur aduentus: per eum
nominis nostri destinatur euectio et isti principaliter creditur, quod tam
necessarium esse sentitur. <5> His etiam laboribus aestimatis potestatem maximam
huic decreuit antiquitas, ut nemo iudicum per prouincias fasces assumeret, nisi
hoc et ipse fieri decreuisset. subdidit eius arbitrio aliena iudicia, ut ad
ipsum rediret quod alter uisus est praestitisse. molestias quidem non habet
exigendae pecuniae, sed late bono fruitur potestatis indeptae, credo, ut ex
diuersis titulis defloraretur dignitas ad leuamen principis instituta. <6>
Peraequatores etiam uictualium rerum in urbe regia propria uoluntate constituit
et tam necessariae rei iudicem facit. ipse enim gaudium populis, ipse nostris
temporibus praestat ornatum, quando tales uiros copiae publicae praeficit, ut
plebs querula seditionem nesciat habere satiata. <7> Officium uero eius tanta
genii praerogatiua decoratur, ut militiae perfunctus muneribus ornetur nomine
principatus miroque modo inter praetorianas cohortes et urbanae praefecturae
milites uideantur inuenisse primatum, a quibus tibi humile soluebatur obsequium.
sic in fauore magni honoris iniustitia quaedam a legibus uenit, dum alienis
excubiis praeponitur, qui alibi militasse declaratur. <8> Adiutor etiam magistri
nostris praesentatur obtutibus, ut uicaria sorte beneficii nos eligamus eius
praesidium qui nobis praestat fidele solacium. hanc igitur dignitatem, tot
titulis claram, tot insignibus opulentam, per indictionem illam gubernandam tibi
congrua grauitate committimus, ut omnia quae gesseris magister fecisse uidearis:
quia nihil moribus residuum relinquitur, si, quod absit, a tanta maturitate
peccetur.
VII. FORMULA COMITIVAE SACRARUM LARGITIONUM.
<1> Grata sunt omnino nomina quae designant protinus actiones, quando tota
ambiguitas audienti tollitur, ubi in uocabulo concluditur quid geratur. donis
enim praesidere regalibus comitiuam sacrarum largitionum indicia rerum uerba
testantur. quod uere decorum, uere fuit omnimodis exquisitum in donorum regalium
parte sequestratam facere dignitatem et alterius honorem dicere, dum nos constet
dona conferre. actus innocens, pietatis officium illud semper ingerere, unde se
fama principis possit augere. <2> Regalibus magna profecto felicitas militare
donis et dignitatem habere de publica largitate. alii iudices optemperant
residuis uirtutibus regnatoris: haec sola est, quae tantummodo seruiat ad
momenta pietatis. nihil enim per ipsam districtum geritur, nil seuerum forte
censetur, sed tunc obsequitur, quando pro nobis uota funduntur. supplicum per te
fortunas erigimus, kal. Ianuariis affatim dona largimur et laetitia publica
militia tua est. <3> Verum hanc liberalitatem nostram alio decoras obsequio, ut
figura uultus nostri metallis usualibus inprimatur, monetamque facis de nostris
temporibus futura saecula commonere. o magna inuenta prudentium! o laudabilia
instituta malorum! ut et imago principum subiectos uideretur pascere per
commercium, quorum consilia inuigilare non desinunt pro salute cunctorum. <4>
Sed huic, ut ita dixerim, munerariae dignitati praeconem largitatis nostrae,
publicae felicitatis indicium, locum quoque primiceriatus adiungimus, ut per te
demus honores, per quem et nostrae pecuniae conferimus largitates: merito,
quando et simili gratia utraque praestantur et ab uno debuerunt iudice geri,
quae parili uidentur laude coniungi. <5> Parum est autem, quod prouinciarum
iudices tuae subiacent dignitati: ipsis quoque proceribus chartarum confirmas,
dum perfectum non creditur nisi a te fuerit pro sollemnitate completum. <6>
Vestis quoque sacra tibi antiquitus noscitur fuisse commissa, ne quid quod ad
splendorem regium pertinet tuis minus ordinationibus oboediret. <7> Curas quoque
litorum aduenticia lucri prouisione committis. negotiatores, quos humanae uitae
constat necessarios, huic potestati manifestum est esse subiectos. nam quicquid
in uestibus, quicquid in aere, quicquid in argento, quicquid in gemmis ambitio
humana potest habere pretiosum, tuis ordinationibus obsecundant et ad iudicium
tuum confluunt qui de extremis mundi partibus aduenerunt. <8> Salis quoque
commercium inter uestes sericas et pretiosissimam margaritam non inepte tibi
deputauit antiquitas, ut sapientiam tuam euidenter ostenderet, cui talis species
deputata seruiret. <9> Quapropter per illam indictionem comitiuae sacrarum et
primiceriatus tibi conferimus dignitates, ut multis laudibus decorari possis,
qui honorum numerositate praecingeris. utere igitur sollemniter titulis tuis et
si quid tibi de antiquo priuilegio usus abstulit, plurima certe quae uindicare
debeas dereliquit, quando duarum dignitatum gloriosa quidem cura, sed et
laboriosa custodia est, quae tibi copiosum fructum decoris afferunt, si probis
moribus excoluntur.
VIII. FORMULA COMITIVAE PRIVATARUM.
<1> Comitiua priuatarum, sicut nominis ipsius sentitur insonare uocabulum, per
rationalium curam quondam principum priuatam fertur gubernasse substantiam. et
quia iudicis fastigium exercere non poterat inter homines extremis condicionibus
inclinatos, alios quoque titulos prouida deliberatione suscepit, ne dignitas
Latialis causam tantum modo uideretur habere cum famulis, sed actibus urbanis
tunc se felicius occupauit, postquam agrestium causas decenter amisit. <2> Quid
enim prius facerent inter seruos iura publica, qui personam legibus non
habebant? non ibi aduocatus aderat, non se partes sollemni actione pulsabant;
erat secretarium impolita seditione confusum et appellabatur abusiue iudicium,
ubi non allegabantur a partibus dicta prudentium. utitur nunc dignitas liberorum
causis et legitimus praesul ueraciter habetur, quando de ingenuorum fortunis
disceptare posse sentitur. <3> Primum tibi contra nefarias libidines et humani
generis improbos appetitus quasi parenti publico decreta custodia est, ne quis
se probrosa commixtione pollueret, dum uicino sanguini reuerentiam non haberet.
grauitas enim publica proximitatis sanctitatem et coniunctionis gratiam habita
aestimatione discreuit, quia longe aliud debetur proximitatis naturae quam
corporali possumus indulgere licentiae. contra hos eligeris unicus et continens
inquisitor, ut, dum talia probra persequeris, consequaris praeconia castitatis.
<4> Defunctorum quin etiam sacram quietem aequabilia iura tuae conscientiae
commiserunt, ne quis uestita marmoribus sepulcra nudaret, ne quis columnarum
decorem inreligiosa temeritate praesumeret, ne quis cineres alienos aut
longinquitate temporis aut uoraci flamma consumptos scelerata perscrutatione
detegeret, ne corpus, quod semel reliquerat molestias mundanas, humanas iterum
pateretur insidias. nam etsi cadauera furta non sentiunt, ab omni pietate
alienus esse dinoscitur, qui aliquid mortuis abrogasse monstratur. uide quae
tibi commissa sunt: castitas uiuentium et securitas mortuorum. <5> Habes quoque
per prouincias de perpetuario iure tributorum non minimam quantitatem.
canonicarios dirigis, possessores ammones, et cum aliis iudicibus non modica
iura partiris. caduca bona non sinis esse uacantia. ita quod usurpator potuit
inuadere, tu fiscum nostrum facis iustis compendiis optinere. proximos
defunctorum nobis legaliter anteponis, quia in hoc casu principis persona post
omnes est, sed hinc optamus non adquirere, dummodo sint qui relicta debeant
possidere. <6> Repositiuae quoque pecuniae, quae longa uetustate competentes
dominos amiserunt, inquisitione tua nostris applicantur aerariis, ut qui sua
cunctos patimur possidere, aliena nobis debeant libenter offerre. sine damno
siquidem inuenta perdit, qui propria non amittit. <7> Proinde, quod felicibus
applicetur auspiciis, per indictionem illam comitiuae priuatarum te honore
decoramus, quam leges praefectis quoque parem esse decreuerunt: est enim et ipsa
aulica potestas palatio nostro iure reuerenda, quam tu facies ultra terminos
suos crescere, si susceptam continenter egeris dignitatem.
VIIII. FORMULA COMITIVAE PATRIMONII.
<1> Antiquae consuetudinis ratio persuadet chartis nostris illos imbuere, qui
longe positi transmissas accipiunt dignitates, ut quos non poteramus praesentes
instruere, lectio probabilis commoneret. sed te, quem ad patrimonii nostri curas
regalis deflorauit electio, non destinatis praeceptionibus instruimus quam usu
serenissimae collocutionis erudimus. confabulationes siquidem nostrae erunt tibi
instrumenta iustitiae, quando illud gratum nobis esse perspexeris, quod et
diuinis potest conuenire mandatis. <2> Patrimonium siquidem nostrum pro
subleuandis priuatorum fortunis tibi credimus, non premendis. nam si
tranquillitatis nostrae uelis considerare rationem, quoddam regiae domus famulis
praeiudicium humilitatis imponis. proprias quippe utilitates improbus dominus
quoquo modo nititur uindicare: ceterum qui bonae famae studere cognoscitur, suo
semper iudicio plus grauatur. insolens libertati genus est rusticorum, qui adeo
sibi putant licere uoluntaria, quoniam ad nostram dicuntur pertinere
substantiam. esto igitur illis cum erecta potestate moderatus. temperamentum
simul damus, cui posse concedimus. <3> Considera, suscepta dignitas quo debeat
splendore tractari, per quam supra ceteros iudices familiaritatem principis
habere meruisti. nam sicut sol ortus corporum colores fugata nocte detegit, ita
se morum tuorum qualitas assidue uiso principe non celabit. mens tua et oculis
nostris patebit et auribus. in uultu et in uoce cognoscimus seruientium mores.
si facies tranquilla, si uox moderata suggesserit, credimus esse probatissimas
causas: quicquid enim turbulenter dicitur, iustitiam non putamus. quapropter
pensabit loqui tuum dominantis examen, quando nequeunt proprias tegere
uoluntates, qui suos possunt proferre sermones. <4> Speculum siquidem cordis
hominum uerba sunt, dum illud moribus placere creditur, quod ipse sibi ad
agendum legisse monstratur. superbus quin etiam uaricatis gressibus patet:
iracundus luminum feruore declaratur: subdolus terrenum semper amat aspectum:
leues inconstantia prodit oculorum: auarus obuncis unguibus explanatur. et ideo
ad quas prouecti estis, studete uirtutibus, quia nemo potest principem fallere,
qui etiam rerum naturalium causas in uobis optime probatur inquirere. <5>
Quapropter ad comitiuam patrimonii nostri te per indictionem illam deo iuuante
promouemus, ut inauarum iudicem palatia nostra testentur, quem nos iudicauimus
esse promouendum. quid enim maius cupias quam si te linguas nobilium laudare
cognoscas? alibi forte iudices formidentur iniusti: hic ubi remedium praesens
petitur, redempta sententia non timetur. querimonias possessorum sine uenali
protractione discinge. omne siquidem iustum celeritatis commodo transit ad
beneficium et quod debito redditur, tali gratia munus putatur. <6> Possessiones
nostrae uel quia sunt immobiles non egrediantur terminos constitutos, ne
condicione contraria quod non potest moueri, malis moribus contingat extendi.
trade etiam militibus tuis quam sectari delegeris animi castitatem, quoniam ille
iustus potest dici, sub quo non probatur excedi. utere igitur auctore deo
concesso tibi feliciter priuilegio dignitatis. incitet te ad bonorum desiderium
saepissime quod uideris, quia in his quae feceris iudex et testis ero. <7> Nam
et si epulas nostras sollicita ordinatione disponas, non solum nostro palatio
clarus, sed et gentibus necesse est reddaris eximius. legati enim paene ex tota
orbis parte uenientes cum nostris coeperint interesse conuiuiis, ammirantur
copiose repertum, quod in patria sua norunt esse rarissimum. stupent etiam
abundantiam unius mensae tantas seruientium turbas posse satiare, ut iudicent
consumpta recrescere, unde tantae copiae probantur exire. habent nimirum in sua
patria quod loquantur, dum parentibus suis dicere gestiunt quae uiderunt. <8>
Sic propemodum in toto mundo celeberrimus redditur, qui prouidus nostris
apparatibus inuenitur. adde quod tempora nostrae laetitiae secretaria tua sunt,
cum pectus redditur curis alienum et tunc tibi tribuitur suggerendi locus,
quando cunctis adimitur. merito, ut qui es iudex tanti apparatus et epularum,
delinitus cibis tibi animus concedatur.
X. FORMULA QUA PER CODICILLOS VACANTES PROCERES FIANT.
<1> Periclitarentur grauiter boni mores, si aut solis diuitibus aut corpore
ualentibus praestarentur tantummodo dignitates, dum multos inuenias excubias
palatii refugere, qui magis possunt laudabili conuersatione fulgere. multis enim
facultas sua non sufficit ad triumphum, multis philosophantibus corporis
ualitudo subtrahitur et fit plerumque, ut sapientes inremunerati iaceant, si
semper homines ad honores comitatensi obseruatione perueniant. rarum est uni
multa confluere, cum omnibus debeat regnantis pietas subuenire. <2> Quid si
expensas consulatus pauper nobilis expauescat? quid si sapientia clarus
praefecturae nequeat sustinere molestias? quid si pondera quaesturae affluens
lingua formidet? quid si reliqui fasces molestiarum taedio uitentur forte quam
meritis? nonne si a magnis uiris talia fugiantur, in uerecundiam nostrae
mansuetudinis quandam repulsam suscipiunt dignitates? quanto iustius bono
principi inremuneratum nihil relinquere, quod fecit natura laudabile! sapientia
est, quae honores meretur, totum aliud extrinsecus uenit. sola est prudentia,
quae rebus omnibus praeponitur, quando in homine feliciter inuenitur. sit apud
nos et fortunis integerrimus consularis, sint et sine longo labore primates,
habeant exercitia praemia sua: sed et iste honorabilis locus sit, qui tantum
meritis comparatur. <3> Neque enim absurde leges sacratissimae censuerunt eos,
quos bonae opinionis fama commendat, codicillis uacantibus tales quaerere
summitates. quos etsi facultas in tanti honoris apparatu desereret, uirtus
conscia non celaret. animati sunt ad talia, qui de sua uidebantur desperare
fortuna. hoc et ualidissimus ad labores, hoc et inbecillis corpore meretur ad
laudes. nam omnes sub diuersitate praedicantur, quos huiusmodi honoris nomen
amplectitur et magis nescio quid amplius meriti extorsisse creditur, qui rem
laborantium otiosus meruisse sentitur. <4> Atque ideo praesentibus codicillis ab
illa indictione illud tibi propitia diuinitate defende, ut considerata ratione
praesentis temporis adepti honoris ordine potiaris: ita tamen, ut illi modis
omnibus praeferantur, qui sudore maximo nostris aspectibus affuerunt. necesse
est enim, ut unum cedat meritum duobus euictum. alioquin omnes ad quietas
possunt currere dignitates, si laborantes minime praeferantur otiosis.
consequantur illa qui possunt, nec uobis desint ista quae cedimus. sic utraque
gratia concitati et illi ad palatia nostra festinare poterunt et uos optati
honoris gaudia comitantur.
XI. FORMULA ILLUSTRATUS VACANTIS.
<1> Constat felicem esse rem publicam, quae multis ciuibus resplendet ornata.
nam sicut caelum stellis redditur clarum, sic relucent urbes lumine dignitatum:
non quia fiat homo alter honoribus, sed quia modestior efficitur, a quo
conuersationis ordo melior postulator. quis enim opinionem suam uituperabiliter
tractare uelit, quam specialiter ad laudes electam esse cognoscit? illum
siquidem honores glorificant, quem commendat et uita. nam malo instituto uiuere
nec principi fas est, quando et de illo populus occulte potest dicere, cui mores
suos publice nullus ausus est imputare. <2> Cape igitur pro fide ac laboribus
tuis comitiuae domesticorum illustratum uacantem, ut et tuis ciuibus decoratus
appareas, et, quod est dulcissimum mentibus bonis, iugiter propriis utilitatibus
occuperis. quid enim fortunatius quam agrum colere et in urbe lucere, ubi opus
proprium delectat auctorem nec aliquid fallendo conquiritur, dum suaui horrea
labore cumulantur? quapropter nos dedimus delectabilem honorem, tu
conuersationis associa dignitatem, nam utraque sibi coniuncta sunt: unum pendet
ex altero: non coalescunt sparsa semina, nisi et terrae qualitas fuerit operata:
habiturus messem de nostra gratia copiosam, si a te iudicia nostra cognouerimus
optime fuisse tractata.
XII. FORMULA COMITIVAE PRIMI ORDINIS.
<1> Magnum quidem multis et inter uices uidetur esse geniatum publicae utilitati
probis actionibus occupari: sed quanto felicius honorem splendidum sumere et
cogitationum molestias non habere? interdum enim assidui labores et ipsas
ingratas faciunt dignitates, dum inbecillitas humana cito solet sustinere
fastidia et quod prius ambisse creditur, postea uitare uelle sentitur. sed hoc
multo praestantius adesse conspectibus regiis et abesse molestiis, gratiam
habere loci et uitare contumelias actionis. dulce est aliquid sic mereri, ut
nulla possit anxietate turbari, dum multo gratius redditur, ubi prosperitatis
sola gaudia sentiuntur. <2> Hunc igitur honorem tam tibi respicis otiosa
remuneratione praestitum quam nimium laborantibus antiqua noscitur prouisione
collatus, ut rectores prouinciarum anni actione laudatos uix ad tale culmen
adducerent, quibus confitebantur plurima se debere. consiliarii quoque
praefectorum conscientia clari, dictatione praecipui, qui in illo actu
amplissimae praefecturae sic uidentur exercere facundiam, ut ad utilitates
publicas expediendas alteram credas esse quaesturam. unde frequenter et nos
iudices assumimus, quia eos doctissimos comprobamus. <3> Quid ergo de tali
honore sentiatur, agnosce, quando perfecti uiri pro tot laudabilibus institutis
huius inueniunt praemia dignitatis et merito cum tanta pompa ceditur, quae
senatorii quoque ordinis splendore censetur, spectabilitas clara et consistorio
nostro dignissima, quae inter illustres ingreditur, inter proceres aduocatur:
otiosi cinguli honore praecincta dignitas, quae nullum nouit offendere, nullum
cognoscitur ingrauare et super omnia bona concitare nescit inuidiam. <4>
Quocirca prouocati moribus tuis comitiuam tibi primi ordinis ab illa indictione
maiestatis fauore largimur, ut consistorium nostrum sicut rogatus ingrederis,
ita moribus laudatus exornes, quando uicinus honor est illustribus, dum alter
medius non habetur. delectet te illos imitari, quos proximitate contingis. <5>
Tu locum amplum et honorabilem facis, si te moderata conuersatione tractaueris.
ammoneat te certe, quod suscepta dignitas primi ordinis appellatione censetur,
utique quia te sequuntur omnes qui spectabilitatis honore decorantur. sed uide
ne quis te praecedat opinione, qui sequitur dignitate. alioquin graue pondus
inuidiae est splendere cinguli claritate et morum lampade non lucere.
XIII. FORMULA MAGISTRI SCRINII QUAE DANDA EST COMITIACO, QUANDO PERMILITAT.
<1> Si honor frequenter defertur otiosis, si interdum aut nobilitas eligitur aut
ad promerendum aliquid personae tantum gratia suffragatur, quo studio
remunerandi sunt, qui ad agonis sui praemia peruenerunt? considerandum, quali
labore seruitum est, et sic de remuneratione cogitandum. harum quippe rerum
mensura de contrario uenit, dum tale oboedientibus dari debet donum, quale
indeuotis potuit esse periculum. <2> Grandia sunt, quae sustinent excubantes:
personas contumaces ad parendum cogunt, latentes in cubilibus suis prudenti
sagacitate uestigant, superbis modestiam aequalitatis imponunt: ita quod a
iudicibus breuiter dicitur, ab ipsis efficacia famulante completur. notum est
quae pericula sustineant, cum ad causas mittuntur alienas. si segnius agat,
petitor queritur: si districte, pulsatus uociferatur. sic inter utrumque
diuersum rara laus est inuenisse praeconium. <3> Dignitatum pace dicamus,
facilius est laudatum iudicem reperire quam militem iniuncta sine offensione
complere. aliud est enim tantum dicere legitima, aliud ad terminum deduxisse
iustitiam. laudabiliter quidem bonum dicitur, sed multo gloriosius statuta
complentur. uerba tantum diriguntur a praesulibus, a militibus autem postulator
effectus. post omnia periculis subduntur, si constricti aliquid uerisimile
conquerantur. <4> Frequenter nocuit aliis ipsa quoque integritas actionis. nam
multos, quos in executione contristare nisi sunt, ipsos postea impensos iudices
pertulerunt. offendunt enim frequenter ignari quibus sunt postea parituri et dum
causis alienis fidem custodiunt, interdum pericula propriae salutis incurrunt.
uerum inter haec militem euasisse laudatum nonne iuste uidetur esse miraculum?
<5> Talibus igitur meritis uicissitudo reddenda est, ut nimio labore torpentes
indultis compensationibus excitemus. utere igitur confidenter quicquid ueteranis
munifica iura tribuerunt, nulli sordido subiciendus oneri, qui te purissima
conuersatione tractasti. <6> Comitiuam quoque tibi primi ordinis, quam tali
militia perfunctis cana deputauit antiquitas, secundum statuta diualia
uindicabis. <7> Haec quidem priscorum beneficio consequeris, sed nostri nominis
contra inciuiles impetus et conuentionalia detrimenta perenni tuitione uallaris,
ut officium, quod nostris iussionibus speciali sollicitudine famulatum est,
amplius aliquid a militibus ceteris promereri potuisse uideatur. multa quoque
tot librarum auri percellendum esse censemus, si quis statuta nostra qualibet
crediderit occasione uiolanda. nec tamen aliquid contra te ualere permittimus,
quod dolosa fuerit machinatione temptatum.
XIIII. FORMULA DE HIS QUI REFERENDI SUNT IN SENATU.
<1> Optamus quidem curiam senatus amplissimi naturali fecunditate compleri
subolemque eius tantum crescere, ut (quod difficillimum auiditatis genus est)
parentum uideatur uota satiare. sed minus amantis est non amplius aliquid
quaerere, unde tantum numerum possit augere. agricola diligens praeueniendo
adiuuat imbrem caelestem et ante rigat plantaria, quam pluuias mereantur
optatas. arborum quin etiam fetus meliorare contendens diuersi germinis feturas
instituit, ut multiplicata dulcedine fructuum hortis suis conserat uarietatis
ornatum. sic nos uirtutum iucundissimas laudes in cinctum Gabini desideramus
includere, ut germen alienum amplexu gratiae colligatum curiae moribus
inolescat. <2> Sed haec cultura longe dissimilis est. arboribus enim quod melius
putatur inseritur: ad illas peregrina ueniunt, ut de illorum potius suauitate
dulcescant. uobis autem, ut agrestia proficiant, offeruntur. nam quamuis ignis
nocte reluceat, soli tamen praesentatus obscurus est: hinc est quod ad illum
ordinem nihil potest eximium deferri, nisi quod per ipsum probatur augeri. et
ideo illum natalium splendore conspicuum et ingenii calore prudenter accensum
senatus lumen excipiat. hactenus enim fuit suis meritis clarus: sed iam erit de
uestra conspicuitate perlucidus. <3> Pandite curiam, suscipite candidatum: iam
senatui praedestinatus est, cui nos contulimus laticlauiam dignitatem. benignos
esse necesse est publicos patres, quia hoc uocabulum non tantum suo debet
germini quantum studio uotoque generali.
XV. FORMULA VICARIIS U. R.
<1> Vices agentium mos est sic iudicum uoluntatibus oboedire, ut suas non
habeant dignitates. splendent mutuato lumine, nituntur uiribus alienis et
quaedam imago in illis esse uidetur ueritatis, qui proprii non habent iura
fulgoris. tu autem uicarius diceris et tua priuilegia non relinquis, quando
propria est iurisdictio, quae datur a principe. habes enim cum praefectis
aliquam portionem: partes apud te sub praetoriana aduocatione confligunt: uice
sacra sententiam dicis et, quod maxime fidei signum est, in inscriptionibus uita
tibi committitur hominum, quod inter mortales constat esse pretiosum. <2>
Additur quod nec salutari te sine chlamyde iura uoluerunt, scilicet ut sub ueste
militari semper uisus numquam credereris esse priuatus. sed haec omnia ad
praefecturae gloriam iudicamus esse concessa, ut qui tantae sedis uicarium
diceret, umbratile nil uideret. considera qualia de te praestes, qui tanta
auctoritate subueheris. exuendus a crimine non nudetur ab innoxia facultate: nam
quid tibi debere possit, si nummis suis imputet quod euasit? ad similitudinem
quippe summorum carpento ueheris. intra quadragesimum sacratissimae urbis iura
custodis. Praeneste ludos edis in uicem consulis in honorem positus
dignitatemque senatoris adquiris et illa tibi panduntur atria quae summatibus
probantur esse collata. <3> Hinc est quod in aula Libertatis locum patrium tenes
et ibi mereris consessum, ubi est uel intrasse praeconium. ipsi quin etiam
senatores, qui praecedunt ordine, aliqua uidentur a te necessaria postulare.
habes quod praestes potioribus te nec inmerito inter praecipuos censendus es,
qui aut iuuare potes aut laedere consulares. erige animos sub qualitate
modestiae. talis est unaquaeque dignitas, qualis administrantium est uoluntas.
nihil abiectum est, quod in re publica geritur, nisi malis fuerit moribus
uitiatum. nam si humilium priuatorum placet aequalitas, quanto magis grata est
in potestatis culmine custodita, quae difficile modum seruat, dum ad suum uelle
festinat? <4> Proinde uicariae tibi dignitatem serenitatis nostrae aestimatione
conferimus, quam sic Romae geras, ut conscientiam tuam tanta ciuitate facias
esse dignissimam. usurus omnibus priuilegiis, quae tuos decessores habuisse
constiterit, quia sicut a uobis instituta antiquorum deposcimus, ita et
dignitati uestrae uetera non negamus.
XVI. FORMULA NOTARIORUM.
<1> Non est dubium ornare subiectos principis secretum, dum nullis aestimantur
necessaria posse committi, nisi qui fuerint fide magna solidati. publicum est
quidem omne quod agimus: sed multa non sunt ante scienda, nisi cum fuerint deo
auxiliante perfecta. quae tanto plus debent occuli, quanto amplius desiderantur
agnosci. <2> Regis consilium solos decet scire grauissimos. imitari debent
armaria, quae continent monumenta chartarum, ut quando ab ipsis aliqua
instructio quaeritur, tunc loquantur: totum autem dissimulare debent, quasi
nesciant scientes. nam sollicitis inquisitoribus saepe et uultu proditur, quod
tacetur. assit innocentia, quae cuncta commendat, quia in placida mente regia
decent uerba deponi. <3> Sed quoniam te probatis moribus institutum uenatrix
bonae conuersationis sollicitudo nostra respexit, ab illa indictione notarium te
nostrum esse censemus, ut ordine decurso militiae ad primiceriatus feliciter
peruenias summitatem. honor, qui efficit senatorem, cui patrum aula reseratur,
non iniuria: nam qui nostris curis militat assidua lucubratione, iuste uidetur
et curiam Libertatis intrare. <4> Additur etiam perfuncti laboris aliud munus,
ut, si quoquo modo ad illustratum uel uacantem meruerit peruenire, omnibus
debeat anteponi, qui codicillariis illustratibus probantur ornari. unde absolute
colligitur primiceriatus meritis datum uti, ut in uno eodemque titulo dispar
esset dignitas aequaliter adquisita. animari debes igitur ad labores, quando
tibi tale praemium propositum uides, quale se gaudent inuenisse summates.
XVII. FORMULA REFERENDARIORUM.
<1> Quamuis tantum sit clara unaquaeque dignitas, quantum eam praesentiae
nostrae conspectus illuminat, dum semper honorem suscipit, qui nostra colloquia
decenter adquirit, nemo tamen sermones nostros tantum meretur quam qui
referendarius esse dinoscitur. per eum nobis causarum ordines exponuntur, per
eum interpellantium uota cognoscimus et ipsis responsa reddimus, ut negotia
compedita soluamus. <2> Magnum est in hoc agone principali seruire prudentiae et
ad subitum sic dolores alienos asserere, ut conquerentium uideatur uota satiare.
quale est enim in tumultuosis processionibus nostris nulla permixtione confundi
aut minime tantis clamoribus impediri? necesse habet a turbatis exquirere, quod
nobis possit placabiliter intimare et distinctius referre quam potuisset audire.
<3> Arduum est trepidantium dicta componere et uerum dicere: non tantum
interpellator formidat negotii sui casum quantum sustinet iste in relatione
periculum. si quid minus dixerit, inimicus asseritur, redemptus clamatur.
negotii dominus timoris patrocinio potest sua uerba conuertere, referenti autem
non licet aliquid immutare. sententiae uero nostrae tanta memoriae cautela
tenendae sunt, ut nihil minus, nihil additum esse uideatur. nobis plerumque
audientibus nostra dicturus es et difficili condicione constrictus iudicio
nostro subiaces, dum alienas causes explanare contendis. <4> Quapropter
referendarium te electio nostra constituit: sed tu puritatem conscientiae et
ueritatem linguae nostris iussionibus adhibeto. eruditionem uero mirabilem
collocutio tibi nostra concedit, quae dum per te alios ordinat, qualitatem tuae
mentis exornat. sub nobis enim non licet esse imperitos, quando in uicem cotis
ingenia splendida reddimus, quae causarum assiduitate polimus. <5> Quapropter
illa cunctis iussisse nos referte, quae aut debuistis aut potuistis accipere.
nostra sic probatis, si iusta redicitis. amate quod nos glorificat. sit uelle
uestrum quale uidetis nostrum esse propositum. ad summum tales uos esse cupimus,
ut etiam per uos iudices corrigamus. peculiare de uobis aliquod uectigal
exigimus, ut sicut uobiscum familiariter miscemus affatus, ita et nostra opinio
specialiter a uobis mereatur affectum.
XVIII. FORMULA PRAEFECTURAE ANNONAE.
<1> Si ad hanc mensuram censendae sunt dignitates, ut tanto quis honorabilis
habeatur, quanto ciuibus profuisse cognoscitur, is certe debet esse gloriosus,
qui ad copiam Romani populi probatur electus. tui siquidem studii est, ut
sacratissimae urbi praeparetur annona, ubique redundet panis copia et tam magnus
populus tamquam una mensa satietur. per officinas pistorum cibosque discurris,
pensum et munditiam panis exigis nec uile iudicas esse, unde te possit Roma
laudare: merito, quando gloria singularis est illius ciuitatis affectus. <2> Et
ne quod agis aliquid putetur extremum, carpentum praefecti urbis mixta
gratificatione conscendis. tu illi in spectaculis coniunctissimus inueniris, ut
plebs, quam industria tua satiat, in suam reuerentiam te honoratum esse
cognoscat. nam si querela panis, ut assolet, concitetur, tu promissor ubertatis
seditiones ciuicas momentanea satisfactione dissoluis et per te prospicitur, ne
quid a populis conquerentibus excedatur. <3> Non immerito Pompeius fertur copiae
quantitate prouisa usque ad rerum peruenisse fastigia, quia merito singularis
amor est populi, cum potuerit a penuria liberari. hinc ille gratificationem
meruit plausumque popularem: hinc unice semper amatus est et in gratia ciuium
omnium uicit facta maiorum: qui ne aliquando inhonore diceretur, cum nominis
taxatione uocabatur et Magnus. <4> Hoc te exemplum inuitet ad prospera, quando
ille honoris tui locum egisse cognoscitur, quem felix Roma mirabatur. ne quis
autem putet abiectis te hominibus imperare, dignitati quoque tuae pistorum iura
famulata sunt, quae per diuersas mundi partes possessione latissima tendebantur,
ne inopia faciente uilesceret, quod Romanae copiae laudabili famulatione
seruiret. suarii quoque, Romanae copiae causa reperti, tuo deputati uidentur
examini. <5> Gloriare priuilegiis adquisitis. tribunal tuum non est inter
minimas dignitates, quando et Romana gratia frueris et prouinciis iussa
transmittis. sed ut actionis ipsius in totum merita perscrutemur, triticeas
quidem copias praefectura praetoriana procurat, sed non minor laus est
dispensationem probabilem facere quam frumenta colligere, quando in quauis
abundantia querela non tollitur, si panis elegantia nulla seruetur. <6> Sic
Ceres frumenta dicitur inuenisse, Pan, autem primus consparsas fruges coxisse
perhibetur, unde et nomine eius panis est appellatus. ita et illa praedicata est
quae repperit et iste laudatus est, qui decenter edenda humanis usibus
applicauit. <7> Atque ideo cognoscentes industriam tuam, quae semper est amica
sapientiae, praefecturam annonae per illam indictionem nostra tibi electione
deferimus. considera nunc, quia non licet aliquid furari de populo: nam quod in
ciuitatis damno committitur, silentio non celatur. nescit plebs tacere, quando
interdum et hoc loquitur, quod a nemine perpetratur. in fraudulentos distringe,
panis pondera aequus examinator intende: sollicitius auro pensetur, unde a
Quiritibus uiuitur, quia gratior nobis est laetitia fauentis populi Romani quam
copia pretiosissimi metalli. intuere certe quod loquimur. quid habes melius quod
optes quam illius populi gratiam quaerere, quam nos etiam constat optare?
XVIIII. FORMULA COMITIS ARCHIATRORUM.
<1> Inter utillimas artes, quas ad sustentandam humanae fragilitatis indigentiam
diuina tribuerunt, nulla praestare uidetur aliquid simile quam potest
auxiliatrix medicina conferre. ipsa enim morbo periclitantibus materna gratia
semper assistit, ipsa contra dolores pro nostra inbecillitate confligit et ibi
nos nititur subleuare, ubi nullae diuitiae, nulla potest dignitas subuenire. <2>
Causarum periti palmares habentur, cum negotia defenderint singulorum: sed
quanto gloriosius expellere quod mortem uidebatur inferre et salutem
periclitanti reddere, de qua coactus fuerat desperare! ars quae in homine plus
inuenit quam in se ipse cognoscit, periclitantia confirmat, quassata corroborat
et futurorum praescia ualitudini non cedit, cum se aeger praesenti debilitate
turbauerit, amplius intellegens quam uidetur, plus credens lectioni quam oculis,
ut ab ignorantibus paene praesagium putetur quod ratione colligitur. <3> Huic
peritiae deesse iudicem nonne humanarum rerum probatur obliuio? et cum lasciuae
uoluptates recipiant tribunum, haec non meretur habere primarium? habeant itaque
praesulem, quibus nostram committimus sospitatem: sciant se huic reddere
rationem, qui operandam suscipiunt humanam salutem. non quod ad casum fecerit
sed quod legerit, ars dicatur: alioquin periculis potius exponimur, si uagis
uoluntatibus subiacemus. unde si haesitatum fuerit, mox quaeratur. <4> Obscura
nimis est hominum salus, temperies ex contrariis umoribus constans: ubi quicquid
horum excreuerit, ad infirmitatem protinus corpus adducit. hinc est quod sicut
aptis cibis ualitudo fessa recreatur, sic uenenum est, quod incompetenter
accipitur. habeant itaque medici pro incolumitate omnium et post scholas
magistrum, uacent libris, delectentur antiquis: nullus iustius assidue legit
quam qui de humana salute tractauerit. <5> Deponite, medendi artifices, noxias
aegrotantium contentiones, ut cum uobis non uultis cedere, inuenta uestra
inuicem uideamini dissipare. habetis quem sine inuidia interrogare possitis.
omnis prudens consilium quaerit, dum ille magis studiosior agnoscitur, qui
cautior frequenti interrogatione monstratur. in ipsis quippe artis huius initiis
quaedam sacerdotii genere sacramenta uos consecrant: doctoribus enim uestris
promittitis odisse nequitiam et amare puritatem. <6> Sic uobis liberum non est
sponte delinquere, quibus ante momenta scientiae animas imponitur obligare. et
ideo diligentius exquirite quae curent saucios, corroborent inbecillos: nam
uidero, quod delictum lapsus excuset, homicidii crimen est in hominis salute
peccare. sed credimus iam ista sufficere, quando facimus qui uos debeat
ammonere. <7> Quapropter a praesenti tempore comitiuae archiatrorum honore
decorare, ut inter salutis magistros solus habearis eximius et omnes iudicio tuo
cedant, qui se ambitu mutuae contentionis excruciant. esto arbiter artis
egregiae eorumque discinge conflictus, quos iudicare solus solebat effectus. in
ipsis aegros curas, si contentiones eorum noxias prudenter abscidas. magnum
munus est subditos habere prudentes et inter illos honorabilem fieri, quos
reuerentur ceteri. <8> Visitatio tua sospitas sit aegrotantium, refectio
debilium, spes certa fessorum. requirant rudes, quos uisitant aegrotantes, si
dolor cessauit, si somnus affuerit: de suo uero languore te aegrotus interroget
audiatque a te uerius quod ipse patitur. habetis et uos certe uerissimos testes,
quos interrogare possitis. perito quidem archiatro uenarum pulsus enuntiat, quod
intus natura patiatur: offeruntur etiam oculis urinae, ut facilius sit uocem
clamantis non aduertere, quam huius modi minime signa sentire. <9> Indulge te
quoque nostro palatio: habeto fiduciam ingrediendi, quae magnis solet praemiis
comparari. nam licet alii subiecto iure seruiant, tu rerum dominos studio
praestantis obserua. fas est tibi nos fatigare ieiuniis. fas est contra nostrum
sentire desiderium et in locum beneficii dictare, quod nos ad gaudia salutis
excruciet. talem tibi denique licentiam nostri esse cognoscis, qualem nos habere
non probamur in ceteris.
XX. FORMULA CONSULARITATIS.
<1> Quamuis dignitatem tuam a consulibus descendere nominis ipsius uideantur
testimonia declarare, tamen et insignia tanta circumstant, ut nullus possit
ambigere te de illius lampadis claritate lucere. secures enim et fasces, quos
illi dicauit genio antiquitas, tuis uidentur phaleris deputata, ut iurisdictio
concessa uel tacita possit ammonere prouincias. sed quale tibi debet esse quod
curules inclitas probatur ornare? uultus quin etiam regnantium geniata obsequii
pompa praemittit, ut non solum summi iudicis, sed et dominorum reuerentia
cumulatus orneris. <2> O magnae temperationis inuentum! de nomine consulis
promitteris clementissimus et de principum imagine metuendus. in aliquibus adhuc
prouinciis ornatus paenula carpenti etiam subuectione decoraris, ut multis
declaretur indiciis per expressas imagines rerum uices te praecelsae gerere
dignitatis. considera magnum esse quod suscipis, et nulla criminum deiectione
uitieris. nominis tui auctor multa conferendo praedicatur: tu age, ne ullis
cupiditatibus accuseris, ut, si dare non praeuales, certe te moderari uelle
festines. proximus enim habetur donanti, de quo potest dici 'abstinens est
iugiter alieni'. certe foedissimae contrarietatis uitium est studere furtis et
habere uocabulum largitatis. <3> Erigat ad laudem tuos animos, quod uocaris. non
te profecto meritis imparem facis, si turpissimae ambitionis delicta calcaueris.
nam errores noxios uincere, uitia maculosa superare, et iste re uera editus est
de moribus consulatus. nec enim superflue prudentissimi ueterum talia rebus
nomina imposuerunt, dum continentiae magnae praesulem prouinciis mitterent
consularem. triumpha iura publica, largire iustitiam et ex fortiore parte
imitari praeuales, quem nominis proximitate contingis. pecuniis potest indigere
mediocris, morum talenta non potest non habere, qui iustus est. <4> Non pauescas
largas consulum manus: habent et boni pauperes diuitias suas. illud ergo a te
quaeritur, quod in pectore humano nascitur, non quod terrae uisceribus
continetur. quanto melius triumphare ex animi thesauro, unde numquam nascitur
paenitudo, quia nec tenuis efficeris cum plura concedis, quin immo tantum
locupletior redderis, quantum te bona conscientiae sparsisse cognoscis.
quapropter opinionis tuae laude pellecti per illam indictionem in illa prouincia
consularitatis te praecipimus agere dignitatem, ut tibi non sit acceptum, quod
legibus probatur inimicum. illa magis dilige, quae aequitatis iura commendant.
<5> Nomen tuum actionibus proba. consule fessis et tunc uere diceris consularis.
sed ut omnia aequabili moderatione pensentur, institue pecunias non quaerere et
agnoscis munera tibi copiosa prouenire. hanc enim condicionem humanis actibus
diuina posuerunt, ut ille magis possit ditescere, qui lucra turpia nescit
optare. ignorantes accipiunt qui bene agunt, quia necesse est ut, dum parumper
malorum ambitio contemnitur, superno munere plus donetur.
XXI. FORMULA RECTORIS PROVINCIAE.
<1> Omnino prouide decreuit antiquitas iudices ad prouinciam mitti, ne possit ad
nos ueniendo mediocritas ingrauari. quis enim latronum ferret audaciam, si longe
positam cognoscerent disciplinam? absolute poterat uis permissa grassari, si
conquerens tardius crederetur audiri. sed quanto melius in ipsis cunabulis adhuc
mollia reprimere quam indurata crimina uindicare! in compendium mittimus mala,
si praesentia faciamus esse iudicia. quis enim audeat peccare, cum supra
ceruices suas districtionem cognouerit imminere? <2> Et ideo te illi prouinciae
rectorem per illam indictionem nostra mittit electio, ut re uera corrigere
nitaris quos tibi commissos esse cognoscis. Chlamydis tuae procul dubio inter
alia clauos intende, quos scias non inaniter positos, nisi ut, cum publicum
agentes purpuram cernerent, de uigore semper principis ammonerent. geniatus
indutus, uestis gratiosa, quam filio suo Priapo Venus dicitur texuisse, ut
eximiae pulchritudinis matrem singulariter ornatus filius testaretur. <3>
Respice quantum dederint leges et ad mensuram te potestatis extende. tibi
fiscalium tributorum credita monstratur exactio. constat esse tuae fidei
commissum principi renuntiare, quod in prouinciis probatur emergere. tu etiam
senatorem ibidem residentem iuberis audire: tu in praefectorum militem cum
ipsius tantum conscientia uindicare: tuum nomen in subscriptionibus iusserunt
honoratis prouincialibus anteferri. quid de te aestimatum sit, datur aduerti,
cui tot uidentur nobiles potuisse postponi. <4> Additur, quod a principe frater
uocaris, ut nobilitate pretiosi nominis a uilitate criminum tollereris. cogita
tantorum hominum tibi commissas esse fortunas. fama erunt nostri temporis tui
mores. esto in te continens, ut possis in alios esse iudex. prima aequitas est a
se praesules inchoare, ut debeant criminosi metuere quem nequeunt similem
reperire. nullas enim in se culpas timet reus, quas habere respexerit
cognitorem, quando agentem male nisi bonis moribus non aestimat displicere. suos
actus nullus damnat in altero, quia natura est humani animi ut nitatur potius
uindicare, quod se cognouerit admisisse. <5> O quale est liberum tribunalibus
insidere, non esse obnoxium reo suo, ne incipiat potior fieri qui redemit.
timeat districtum, timeat continentem, non audiat blandum. da ut possit rigidam
formidare sententiam. auari iudices nesciunt quantum delinquunt: nam cum uendunt
aliena crimina, sua faciunt esse peccata. quapropter esto sollicitus, ut bonae
actionis tuae laudes potius audiamus. a nobis confidenter exigis quod remittis,
quia tantum de remuneratione tua cogitamus, quantum te pecunias non quaesisse
cognoscimus.
XXII. FORMULA COMITIVAE SYRACUSANAE.
<1> Regalis est prouidentiae tales iudicum personas eligere, ut ad comitatum
necessitatem non habeant ueniendi, quos in longinquis regionibus contigerit
immorari. nullum enim tale negotium est, quod Siculi itineris tantas pati possit
expensas, dum commodius sit causam perdere quam aliquid per talia dispendia
conquisisse. non enim querelas de Sicilia uolumus uenire, sed laudes, quia
grauatur apud nos actio praesulis, si eam tam longinqui potuerint accusare
petitores. falsus enim dolor esse non creditur, ubi tanti laboris taedia
subeuntur. et ideo maiore cura tractanda sunt, unde inuidia plus timetur. <2>
Proinde per indictionem illam comitiuam tibi Syracusanae ciuitatis propitia
diuinitate concedimus, ut omnia sic agere nitaris, quemadmodum nos tibi
praestitisse cognoscis. de proximis uota causantium sustinemus: inde autem ultro
requirimus, unde ad nos difficile ueniri posse sentimus. habes quae te decorare
debeant, si tu tamen ibi conscientia defaecatus adueneris. <3> Militum tibi
numerus nostris seruit expensis. redderis inter arma geniatus: processio tua
procinctualis ornatus est. exercitu uteris pacato, nec pericula belli subis et
armorum pompa decoraris. uerum inter haec ciuilem cogita disciplinam. non
permittas milites esse possessoribus insolentes. annonas suas sub moderatione
percipiant: causis non misceantur extraneis. pro securitate se omnium cognoscat
electum, qui se gloriatur armatum. priuilegia dignitatis tuae nec uolumus minui
nec iubemus excedi. sufficiat tibi tantum gerere, quantum decessores tuos
constiterit rationabiliter effecisse.
XXIII. FORMULA COMITIVAE NEAPOLITANAE.
<1> Inter cetera uetustatis inuenta et ordinatarum rerum obstupenda praeconia
hoc cunctis laudibus meretur efferri, quod diuersarum ciuitatum decora facies
aptis amministrationibus uidetur ornari, ut et conuentus nobilium occursione
celebri colligatur et causarum nodi iuris disceptatione soluantur. unde nos
quoque non minorem gloriam habere cognoscimus, qui facta ueterum annuis
sollemnitatibus innouamus. nam quid prodesset inuentum, si non fuisset iugiter
custoditum? <2> Exeunt a nobis dignitates relucentes quasi a sole radii, ut in
orbis nostri parte resplendeat custodita iustitia. ideo enim tot emolumentorum
commoda serimus, ut securitatem prouincialium colligamus. messis nostra
cunctorum quies est, quam non possumus aliter recordari, nisi ut subiecti non
uideantur aliquid irrationabiliter perdidisse. <3> Et ideo ad comitiuam te
Neapolitanam per illam indictionem libenter adducimus, ut ciuilia negotia aequus
trutinator examines tantumque famam tuam habita maturitate custodias, quantum te
illi populo uel in leui culpa facile displicere cognoscas. urbs ornata
multitudine ciuium, abundans marinis terrenisque deliciis, ut dulcissimam uitam
te ibidem inuenisse diiudices, si nullis amaritudinibus miscearis. praetoria tua
officia replent, militum turba custodit. considis geniatum tribunal: sed tot
testes pateris quot te agmina circumdare cognoscis. <4> Praeterea litora usque
ad praefinitum locum data iussione custodis. tuae uoluntati parent peregrina
commercia. praestas ementibus de pretio suo et gratiae tuae proficit quod auidus
mercator adquirit. sed inter haec praeclara fastigia optimum esse iudicem decet,
quando se non potest occulere, qui inter frequentes populos cognoscitur
habitare. factum tuum erit sermo ciuitatis, dam per ora fertur populi, quod a
iudice contigerit actitari. <5> Habet ultionem suam hominum frequentia, si
loquatur aduersa, et de iudice iudicium esse creditur, quod multis
adstipulationibus personatur. contra quid melius quam illum populum gratum
respicere, cui cognosceris praesidere? quale est perfrui fauore multorum et
illas uoces accipere, quas et clementes dominos delectat audire! nos tibi
proficiendi materiam damus: tuum est sic agere, ut sua beneficia principem
delectet augere.
XXIIII. FORMULA HONORATIS POSSESSORIBUS ET CURIALIBUS CIVITATIS NEAPOLITANAE.
<1> Tributa quidem nobis annua deuotione persoluitis: sed nos maiore
uicissitudine decoras uobis reddimus dignitates, ut uos ab incursantium
prauitate defendant qui nostris iussionibus obsecundant. erit nostrum gaudium
uestra quies: suaue lucrum, si nesciatis incommodum. degite moribus compositis,
ut uiuatis legibus feriatis. quid opus est quemquam facere, unde poenas possit
incurrere? quaerat iudex inter uos causas et non inueniat. <2> Ratio motus
uestros componat, qui rationales uos esse cognoscitis. improbis iudicem, testem
bonis moribus destinamus, ut nemo se cogi sentiat, nisi quem ordo legitimae
conuersationis accusat. atque ideo illi nos comitiuam Neapolitanae ciuitatis per
illam indictionem dedisse declaramus, ut uestra gubernatione laudatus alteram
mereatur de nostro iudicio dignitatem. cui uos conuenit prudenter oboedire, quia
utrumque laudabile est, ut bonus populus iudicem benignum faciat et mansuetus
iudex grauissimum populum aequabili ratione componat.
XXV. FORMULA (DE COMITE) PRINCIPIS MILITUM DE COMITIVA SUPRA SCRIPTA.
<1> Omnes apparitiones habere decet iudices suos: nam cui praesul adimitur, et
militia denegatur. sed nos, quibus cordi est locis suis uniuersos ordines
continere, indicamus illi comitiuam Neapolitanam domino iuuante largitos, ut
iudicibus annua successione reparatis uobis sollemnitas non pereat actionis.
quapropter designato uiro praestate competenter obsequium, ut sicut uos non
patimur emolumentorum commoda perdere, ita et uos parendi debeatis priscam
regulam custodire.
LIBER SEPTIMUS.
I. FORMULA COMITIVAE PROVINCIAE.
<1> Quamuis omnium dignitatum officia a manu secludantur armata et ciuilibus
uestibus uideantur induti qui districtionem publicam docentur operari, tua
tantum dignitas a terroribus ornatur, quae gladio bellico rebus etiam pacatis
accingitur. uide quo iudicio frueris euectus, quando aliis uigorem fascium
uideamus esse creditum, tibi autem ab ipsis legibus ferrum constet esse
porrectum. rem cruentam dederunt animo pacato, ut et noxii nimium metuerent et
laesi de optata ultione gauderent. alioquin culparentur priores, si temperata
omnia non fecissent. sed cum te intellegas ad moderamen electum, humanum facile
non concupiscas exitium. <2> Reus qui dicitur, et probetur. scito puniendi
remedium datum tibi pro salute multorum. arma ista iuris sunt, non furoris. haec
ostentatio nimirum est contra noxios instituta, ut plus terror corrigat quam
poena consumat. non enim cogitur ferro succidere robustam qui adhuc teneram
uerbis curuat audaciam. ciuilis est pauor iste, non bellicus, quem tu sic facies
esse gloriosum, si habere non probetur excessum. <3> Habes etiam et ferrum
nihilominus incruentum. claudantur nexibus catenarum, quos leuium criminum
pulsat inuidia. cunctator esse debet, qui iudicat de salute: alia sententia
potest corrigi, de uita transactum non patitur immutari. signa tua abactores
timeant, fures pauescant, latrones perhorreant, innocentia tantum laeta
respiciat, dum sibi auxilia uenisse credit, quae legum disciplina transmisit.
nemo redemptionibus tuum uelle deflectat: gladius contemnitur, ubi aurum
suscipitur: tu te inermem reddis, si a uirili animo cupiditate recesseris. <4>
Quocirca per indictionem illam comitiuae tibi in illa prouincia tribuimus
dignitatem, ut ad titulos tuos pertinentia ciuilitate potius laudabilis
exsequaris nec quicquam praesumas facere, nisi quod priuatus possis legibus
uindicare. ipsa est enim recta amministratio, quae et sine potestate defenditur,
ut tunc probetur fuisse iustus, quando ei quae mauult obicere possit inimicus.
<5> Nec tamen spes uestra uelut fastiditate deseritur: nam si bene prouinciarum
amministrationibus praesidetis, honores uos amplissimos sperare leges merito
censuerunt. unde iam uidetur paene debitum, quod uobis a tanta auctoritate ultro
noscitur fuisse promissum.
II. FORMULA PRAESIDATUS.
<1> Prudenter omnimodis inspexit antiquitas prouinciarum dignitates annua
successione reparari, ut nec diutina potestate unus insolesceret et multorum
prouectus gaudia reperirent. sufficit enim unicuique discessisse laudatum, quia
dum tempus potestatis prolixum quaeritur, culparum obprobria non uitantur. illa
enim uel in breuitate declinare mirabile est, dum frequenter et his subrepunt,
qui a fascibus sub uelocitate discedunt. annus uniuersus et ad declaranda
conscientiae bona sufficit et facilius se ab errore custodit. sit in uestro
proposito amministrationem unius anni suscipere: nostrum est merentibus tempus
augere, quia non facile remouere cupimus quos iustos esse sentimus. <2> Idcirco
conuersationis tuae moribus inuitati per illam indictionem praesidatum tibi in
illa prouincia propitia diuinitate concedimus, ut sic debeas agere, quemadmodum
nobis possessor gratias cum tributis uideatur exsoluere. decessorum bona exempla
sequere: a uitiosorum te imitatione disiunge: non putetur omnis consuetudo
probabilis. cautum debut reddere, non sequacem error alienus. prodit stultitiae
culpam, qui sequitur accusatum. sed illud melius eligitur, unde praecedentis
opinio sub ammiratione laudatur. <3> Respice quantis sit prouincia plena
nobilibus. habes qui et bene de te loqui debeant et derogare praesumant, quia
nulla potestas est, quae qualitatem famae suae de ore hominum possit auferre.
contra qui fructus est opinione praedicabili per confines ire prouincias et ibi
inuenire uerissimam laudem, ubi non imperas potestate! additur, quod
inremuneratum non relinquimus, si te egisse probabiliter audiamus. horre uitium
et principis mereris affectum. uoluntatem regiam in legibus habes: illis
obtempera et nostra cognosceris implere mandata.
III. FORMULA COMITIVAE GOTHORUM PER SINGULAS CIVITATES.
<1> Cum deo iuuante sciamus Gothos uobiscum habitare permixtos, ne qua inter
consortes, ut assolet, indisciplinatio nasceretur, necessarium duximus illum
sublimem uirum, bonis nobis moribus hactenus comprobatum, ad uos comitem
destinare, qui secundum edicta nostra inter duos Gothos litem debeat amputare,
si quod etiam inter Gothum et Romanum natum fuerit fortasse negotium, adhibito
sibi prudente Romano certamen possit aequabili ratione discingere. inter duos
autem Romanos Romani audiant quos per prouincias dirigimus cognitores, ut
unicuique sua iura seruentur et sub diuersitate iudicum una iustitia
complectatur uniuersos. <2> Sic pace communi utraeque nationes diuinitate
propitia dulci otio perfruantur. scitote autem unam nobis in omnibus
aequabiliter esse caritatem: sed ille se animo nostro amplius commendare
poterit, qui leges moderata uoluntate dilexerit. non amamus aliquid inciuile:
scelestam superbiam cum suis detestamur auctoribus. uiolentos nostra pietas
execratur. in causa possint iura, non brachia. nam cur eligant quaerere
uiolenta, qui praesentia probantur habere iudicia? ideo enim emolumenta
iudicibus damus, ideo tot officia diuersis largitatibus continemus, ut inter uos
non sinamus crescere quod possit ad odium pertinere. <3> Unum uos amplectatur
uiuendi uotum, quibus unum esse constat imperium. audiat uterque populus quod
amamus. Romani uobis sicut sunt possessionibus uicini, ita sint et caritate
coniuncti. uos autem, Romani, magno studio Gothos diligere debetis, qui et in
pace numerosos uobis populos faciunt et uniuersam rem publicam per bella
defendunt. itaque destinato a nobis iudici uos conuenit oboedire, ut quicquid
pro conseruandis legibus censuerit, modis omnibus impleatis, quatenus et nostro
imperio et uestrae utilitati satisfecisse uideamini.
IIII. FORMULA DUCATUS RAETIARUM.
<1> Quamuis spectabilitatis honor unus esse uideatur nec in his aliquid aliud
nisi tempus soleat anteferri, tamen rerum qualitate perpensa multum his creditum
uidetur quibus confinales populi deputantur, quia non est tale pacatis
regionibus ius dicere, quale suspectis gentibus assidere, ubi non tantum uitia
quantum bella suspecta sunt nec solum uox praeconis insonat, sed tubarum
crepitus frequenter insultat. <2> Raetiae namque munimina sunt Italiae et
claustra prouinciae: quae non immerito sic appellata esse iudicamus, quando
contra feras et agrestissimas gentes uelut quaedam plagarum obstacula
disponuntur. ibi enim impetus gentilis excipitur et transmissis iaculis
sauciatur furibunda praesumptio. sic gentilis impetus uestra uenatio est et ludo
geritis quod uos assidue feliciter egisse sentitis. <3> Ideoque ualidum te
ingenio ac uiribus audientes per illam indictionem ducatum tibi cedimus
Raetiarum, ut milites et in pace regas et cum eis fines nostros sollemni
alacritate circueas, quia non paruam rem tibi respicis fuisse commissam, quando
tranquillitas regni nostri tua creditur sollicitudine custodiri. ita tamen, ut
milites tibi commissi uiuant cum prouincialibus iure ciuili nec insolescat
animus, qui se sentit armatum, quia clipeus ille exercitus nostri quietem debet
praestare Romanis. quos ideo constat appositos, ut intus uita felicior secura
libertate carpatur. <4> Quapropter responde nostro iudicio, fide nobis et
industria placiturus, ut nec gentiles sine discussione suscipias nec nostros ad
gentes sub incuriositate transmittas. ad necessitatem siquidem rarius uenitur
armorum, ubi suscepta surreptio custodiri posse sentitur. priuilegia uero
dignitatis tuae nostris tibi iussionibus uindicabis.
V. FORMULA CURAE PALATII.
<1> Aula nostra sicut agnoscitur peritis dispositoribus instituta, ita doctorum
in ea diligens debet esse cautela, quoniam pulchritudo illa mirabilis, si
subinde non reficitur, senectute obrepente uitiatur. haec nostrae sunt
oblectamenta potentiae, imperii decora facies, testimonium praeconiale regnorum:
haec legatis sub ammiratione monstrantur et prima fronte talis dominus esse
creditur, quale eius habitaculum comprobatur. et ideo magna uoluptas est
prudentissimae mentis pulcherrima iugiter habitatione gaudere et inter publicas
curas animum fessum reficere dulcedine fabricarum. <2> Quas primum Cyclopes
dicuntur ad antrorum modum amplissimas in Sicilia condidisse, postquam in
cauernis montium Polyphemus ab Ulixe singularis oculi lugendam pertulerat
orbitatem. inde ad Italiam fabricandi peritia legitur fuisse translata, ut quod
tantis ac talibus institutoribus inuentum est, aemulatrix posteritas in suum
commodum custodiret. <3> Hinc est quod spectabilitatem tuam ab illa indictione
curam palatii nostri suscipere debere censemus, ut et antiqua in nitorem
pristinum contineas et noua simili antiquitate producas: quia, sicut decorum
corpus uno conuenit colore uestiri, ita nitor palatii similis debet per uniuersa
membra diffundi. ad quae sic poteris idoneus inueniri, si frequenter geometram
legas Euclidem, si schemata eius mirabili uarietate descripta in tuae mentis
contemplatione condideris, ut in hora commonito famuletur tibi copiosa notitia.
<4> Archimedes quoque subtilissimus exquisitor cum Metrobio tibi semper
assistant, ut ad noua reddaris paratissimus, qui libris ueterum probaris
eruditus. non enim tibi minima cura delegatur, quando animum nostrum fabricandi
studio cupidissimum artis tuae ministerio probaris explere. nam sicubi aut
ciuitatem reficimus aut castellorum uolumus fundare nouitatem uel si construendi
nobis praetorii amoenitas blandiatur, te ordinante ad oculos perducitur quod
nobis cogitantibus inuenitur. decorum magisterium, propositum omnino gloriosum
in tam longas aetates mittere, unde te debeat posteritas ammirata laudare. <5>
Quicquid enim aut instructor parietum aut sculptor marmorum aut aeris fusor aut
camerum rotator aut gypsoplastes aut musiuarius ignorat, te prudenter interrogat
et tam magnus ille fabrilis exercitus ad tuum recurrit iudicium, ne possit
aliquid habere confusum. uide ergo quanta debet nosse, qui possit tantos
instruere. recipis certe bonae dispositionis tuae uberrimum fructum, cum tu de
illorum labore laudaris, si ab eis diligenter facta monstraueris. quapropter
quicquid ad te pertinet, ita decenter, ita firmiter uolumus explicari, ut ab
opere ueterum sola distet nouitas fabricarum. <6> Sed haec possibilia facis, si
dona nostra nulla cupiditate suppresseris. efficaciter enim imperat artifici,
qui eum competenti non patitur commoditate fraudari. manus larga artium nutrit
ingenia, quando qui de uictu non cogitat, perficere iussa festinat. illud quoque
considera, qua gratificatione tracteris, ut aurea uirga decoratus inter obsequia
numerosa ante pedes regios primus uidearis incedere, ut ipso testimonio
uicinitatis nostrae agnoscamur tibi palatia commisisse.
VI. FORMULA COMITIVAE FORMARUM.
<1> Quamuis Romuleae fabricae collatae sibi uix possint praecipuae reperiri,
quia totum ad ammirationem noscitur exquisitum, quod ibi cernitur esse fundatum,
tamen interesse arbitramur, quod utilitas necessaria gratificat et quod
pulchritudinis tantum causa commendat. Traiani forum uel sub assiduitate uidere
miraculum est: Capitolia celsa conscendere hoc est humana ingenia superata
uidisse. sed numquid per ea uiuitur aut corporis salus aliqua inde delectatione
recreatur? <2> In formis autem Romanis utrumque praecipuum est, ut fabrica sit
mirabilis et aquarum salubritas singularis. quot enim illuc flumina quasi
constructis montibus perducuntur, naturales credas alueos soliditate saxorum,
quando tantus impetus fluminis tot saeculis firmiter potuit sustineri. cauati
montes plerumque subruunt, meatus torrentium dissipantur: et opus illud ueterum
non destruitur, si industria suffragante seruetur. <3> Respiciamus certe aquarum
copia quantum Romanis moenibus praestat ornatum. nam thermarum illa pulchritudo
quid esset, si dulcissima quaedam aequora non haberet? currit aqua Virgo sub
delectatione purissima, quae ideo sic appellata creditur, quod nullis sordibus
polluatur. nam cum aliae pluuiarum nimietate terrena commixtione uiolentur, haec
aerem perpetue serenum purissime labens unda mentitur. quis possit talia
sermonibus idoneis explicare? <4> Claudiam per tantam fastigii molem sic ad
Auentini caput esse perductam, ut cum ibi ex alto lapsa ceciderit, cacumen illud
excelsum quasi imam uallem irrigare uideatur. Aegyptius Nilus certis temporibus
crescens per campos iacentes superducto diluuio aere sereno turbulentus
exaestuat: sed quanto pulchrius est Claudiam Romanam per tot siccas montium
summitates lauacris ac domibus liquores purissimos fistularum uberibus emisisse
et ita aequaliter fluere, ut numquam se possit desiderata subducere! ille enim
dum recedit, limus est, dum uenit insperate, diluuium. quis ergo famosum Nilum
urbis nostrae fluminibus non aestimet esse superatum? quando Nilicolas suos aut
ueniendo terret aut recedendo destituit. <5> Verum haec non superflua
commemoratione narrauimus, ut possis aduertere qualis a te diligentia
perquiratur, cui pulchritudo tanta committitur. qua de re per indictionem illam
comitiuam tibi formarum sub magna deliberatione credidimus, ut summo studio
nitaris efficere quod tantis ac talibus rebus respicis expedire. <6> In primis
noxias arbores, quae inferunt fabricarum ruinas, dum sunt quidam moenium
importabiles arietes, censemus radicitus amputari, quia nulla laesio remouetur,
cuius origo non tollitur. si quid autem conficiente senio fuerit demolitum,
peruigili celeritate reparetur, ne crescente defectu augeatur nobis causa
dispendii. ductus aquae fortuna tua est, dum incolumis eris, si illa
solidaueris, tantumque apud nos proficis, quantum te illis studuisse probaueris.
agat ergo peritia fidesque tua, ut et constructio fabricae illibata permaneat et
aquae distributio nulla se custodum uenalitate subducat.
VII. FORMULA PRAEFECTURAE VIGILUM URBIS ROMAE.
<1> Quamuis nomen tuum ad ciuitatis te uigilias debeat excitare, ut possis
implere quod diceris, tamen prouidentiae nostrae solita cautela non deserit,
nisi eos quos ad agendum deligimus, ad parendum quoque suauiter inuitemus. quid
enim tibi pulchrius quam in illa urbe operam nauanter impendere diligentiae
tuae, ubi tales testes uidentur assistere? cautela quidem tua, mox adhibita
fuerit, per patriciorum et consulum ora discurrit: uix te contingit aliquid
sollicite facere et audis proceres cum ammiratione laudare. mediocrem dignitatem
regis et in summa opinione uersaris. custos Romanae ciuitatis diceris, quoniam
eam ab intestino hoste defendis. <2> Quapropter circa fures esto sollicitus.
quos etsi tibi leges punire minime praecipiunt, tamen eos indagandi licentiam
non tulerunt: credo ut quamuis essent raptores detestabiles, tamen, quia
dicebantur Romani, maiori eos subderent dignitati. utere igitur per indictionem
illam praefecturae uigilibus dignitate. horror tibi poenarum ademptus est, non
potestas: nam lex a quo uoluit malos capi ipsum censuit plus timeri. eris igitur
securitas soporantium, munimen domorum, tutela claustrorum, discussor obscurus,
arbiter silentiosus, cui fallere insidiantes fas est et decipere gloria. <3>
Actus tuus uenatio nocturna est, quae miro modo si non cernitur, tunc tenetur.
furta magis in furibus facis, dum illos circumuenire niteris quos omnibus
illudere posse cognoscis. praestigii genus est quod agitis, ut latronum
uersutias irretire possitis. facilius enim aestimamus sphingae aenigmata
comprehendi potuisse quam raptoris fugacem praesentiam reperire. ille
circumspectus ad omnia, instabilis ad uentura, trepidus ad insidias quemadmodum
potest capi, qui more uenti nullo situ cernitur contineri? <4> Vigila impiger
cum nocturnis auibus: nox tibi pandat aspectus et sicut illae reperiunt in
obscuris cibum, ita tu possis inuenire praeconium. esto nunc ad iniuncta
sollicitus. uenalitas tibi non adimat quod concedit industria. nam licet haec
sub profunda caligine uideantur geri, nullus tamen actus est qui possit
abscondi. priuilegia quoque tua uel officii deputati ex nostra tibi auctoritate
rationabiliter uindicabis, quia necesse est in tam magna ciuitate per diuersos
iudices agi, quod ab uno non potest explicari.
VIII. FORMULA PRAEFECTURAE VIGILUM URBIS RAVENNATIS.
<1> Quamuis dignitate magni nominis prima fronte decoreris, quia non potuit
antiquorum prudentia summa imaque simili appellatione censere, ne splendorem
quem summis dabat alterius uilitate pollueret, tamen hinc intellegitur, quid
sentire maiorum potuisset auctoritas, quando praefectos uigilibus appellare
uoluerunt qui pro generali quiete discurrunt. tibi enim commissa est fortunarum
securitas, ciuitatis ornatus, utilitas omnium, scilicet ut contra domesticos
grassatores bellum pacatum gereres, si quem ciuium laedendum esse sentires. <2>
Custodi fortunas omnium. securus somnus te uigilante carpitur et molestia nulla
sentitur. in pace positus sumis de nocturno fure uictorias. tuis laureis mane
ciuitas defensa laetatur, quae, dum captos respicit, tunc se occulto hoste
caruisse cognoscit. cottidie triumphas, si bene uigilas, et cum rara sit gloria
bellici certaminis, tibi iugiter latronibus famulatur inuentis. o ducatum nimia
ciuium affectione susceptum! assumes praedones inquirere, quos pro se dominus
non ualet inuenire et duplici ratione beneficus aut futura furta prohibes aut
admissa concludis. <3> Nonne ista quaedam est ineffabilis gratia ciuitatis unum
in se suscipere, quod uidet omnibus expedire? merito tibi gloriosum nomen
praefecti prudens antiquitas deputauit, quia istud facere non poterat, nisi qui
ciues a suis commodis plus amabat. officium quoque tuum non paruo constat munere
subleuatum, quando et ipsis momenti iura dilatata sunt, qui pro securitate
ciuium militare noscuntur. <4> Quae cum ita sint, praefecturam tibi uigilibus
per illam indictionem, delectati tua opinione, concedimus, ita ut et curam huius
dignitatis et priuilegia tibi competentia modis omnibus exsequaris. sed quamuis
nomen odiosissimum furum generalis persequatur assensus, tamen quia de effusione
humani sanguinis agitur, nihil subitum aut indeliberatum iubemus assumi.
modestiam sequere, qui damnas audaciam: continentiam dilige, qui furta
condemnas. ad gesta perducti audiantur aliquid pro salute dicturi, quoniam
quicquid non discutitur, iustitia non putatur. conuictis uero atque confessis
quae sunt secreta seruentur: quando crudele nihil efficit qui sequitur leges.
VIIII. FORMULA COMITIVAE PORTUS URBIS ROMAE.
<1> Deliciosa magis quam laboriosa militia est in Portu Romano comitiuae gerere
dignitatem. illic enim copiosus nauium prospectatur aduentus: illic ueligerum
mare peregrinos populos cum diuersa prouinciarum merce transmittit et inter tot
spectacula dulcium rerum commodum tuum est uenientes euasisse periculum. his
primum faucibus Romanae deliciae sentiuntur et undis Tiberinis quasi per aluum
uadunt quae ad commercia ciuitatis ascendunt. <2> Bene inuenta dignitas, quae
copias uidetur ornare Romanas. nam quid elegantius potest agi quam unde probatur
populus ille satiari? o inuenta maiorum! o exquisita prudentium! ut quia longius
a litore Roma uidebatur posita, inde magis esse inciperet, ubi decorum ingressum
nauium possideret. duo quippe Tiberini aluei meatus ornatissimas ciuitates
tamquam duo lumina susceperunt, ne uacaret a gratia quod tantae urbi ministrabat
expensas. eximia ergo res tibi committitur, si moderate peragatur. <3> Tu copiam
facis, dum ingredientes iuste tractaueris. auara manus portum claudit et cum
digitos attrahit, nauium simul uela concludit. merito enim illa mercatores
cuncti refugiunt, quae sibi dispendiosa esse cognoscunt. quapropter aduersus ibi
uentus est immoderata praesumptio: nam placidum mare damnat, qui undas
cupiditatis exaggerat. unusquisque pro sollemnitate commonitus offerat
uoluntarium munus. Xenia sunt enim ista, non debita. a paucis accipit qui nimium
quaerit: et sibi ipse nutrit uitae munera, qui moderatur oblata. <4> Sit tibi
ergo cura praecipua non solum te abstinere, uerum etiam cohibere praesumentium
manus, quia non est leue in illa ubertate delinquere, quam decet cunctos
indesinenter optare. quocirca per indictionem illam comitiuae Portus te honore
decoramus, ut sicut tibi dignitas dulces delicias amministrat, ita et tu honori
opinionem laudabilem derelinquas.
X. FORMULA TRIBUNI VOLUPTATUM.
<1> Quamuis artes lubricae honestis moribus sint remotae et histrionum uita uaga
uideatur efferri posse licentia, tamen moderatrix prouidit antiquitas, ut in
totum non effluerent, cum et ipsae iudicem sustinerent. amministranda est enim
sub quadam disciplina exhibitio uoluptatum. teneat scaenicos si non uerus, uel
umbratilis ordo iudicii. temperentur et haec legum qualitate negotia, quasi
honestas imperet inhonestis, et quibusdam regulis uiuant, qui uiam rectae
conuersationis ignorant. student enim illi non tantum iucunditati suae, quantum
alienae laetitiae et condicione peruersa cum dominatum suis corporibus tradunt,
seruire potius animas compulerunt. <2> Dignum fuit ergo moderatorem suscipere,
qui se nesciunt iuridica conuersatione tractare. locus quippe tuus his gregibus
hominum ueluti quidam tutor est positus. nam sicut illi aetates teneras adhibita
cautela custodiunt, sic a te uoluptates feruidae impensa maturitate frenandae
sunt. age bonis institutis quod nimia prudentia constat inuenisse maiores. leue
desiderium etsi uerecundia non cohibet, districtio praenuntiata modificat.
agantur spectacula suis consuetudinibus ordinata, quia nec illi possunt inuenire
gratiam, nisi imitati fuerint aliquam disciplinam. <3> Quapropter tribunum te
uoluptatum per illam indictionem nostra facit electio, ut omnia sic agas,
quemadmodum tibi uota ciuitatis adiungas, ne quod ad laetitiam constat inuentum,
tuis temporibus ad culpas uideatur fuisse transmissum. cum fama diminutis salua
tua opinione uersare. castitatem dilige, cui subiacent prostitutae: ut magna
laude dicatur: 'uirtutibus studuit, qui uoluptatibus miscebatur'. optamus enim
ut per ludicram amministrationem ad seriam peruenias dignitatem.
XI. FORMULA DEFENSORIS CUIUSLIBET CIVITATIS.
<1> Si ad cuiuslibet negotium peragendum talis eligitur, qui consilio et
grauitate laudetur, quanto praestantior esse debes, qui suscipis negotia
ciuitatis? nam si periculum est unum decipere, quid erit imparem tantorum
iudiciis extitisse? causa enim multorum bene acta nobilitat, quando totum bono
proposito agere creditur, qui generalibus desideriis adesse sentitur. <2>
Defensorem te itaque illius ciuitatis per indictionem illam, ciuium tuorum
supplicatione permota, nostra concedit auctoritas, ut nihil uenale, nihil
improbum facere uelis, qui tali nomine nuncuparis. commercia ciuibus secundum
temporum qualitatem aequabili moderatione dispone. definita serua quae iusseris,
quia non est labor uendendi summas includere nisi statuta pretia castissime
custodire. imples enim re uera boni defensoris officium, si ciues tuos nec
legibus patiaris opprimi nec caritate consumi.
XII. FORMULA CURATORIS CIVITATIS.
<1> Quamuis per se honorabilis habeatur, qui uel minimam sollicitudinem ciuitati
propriae uidetur impendere et inter suos magna reuerentia perfruatur, qui ciues
se amare professus est, tamen indubitatus honor est qui nostra electione
confertur, quia praeditus bonis institutis creditur, cui aliquid principis
auctoritate delegatur. <2> Et ideo ab indictione illa illius ciuitatis curam ad
te uolumus pertinere, ut laudabiles ordines curiae sapienter gubernes, moderata
pretia ab ipsis quorum interest facias custodiri. non sit merces in potestate
sola uendentium: aequabilitas grata custodiatur in omnibus. opulentissima
siquidem et hinc gratia ciuium colligitur, si pretia sub moderatione seruentur,
ut uere curatoris impleas officium, cum tibi sollicitudo fuerit de utilitate
cunctorum. consuetudines autem tibi ex nostra auctoritate defende, quas in eodem
loco tuos constat habuisse maiores.
XIII. FORMULA COMITIVAE ROMANAE.
<1> Si clausis domibus ac munitis insidiari solet nequissimum uotum, quanto
magis in Romana ciuitate uidetur illici, qui in plateis pretiosum reperit quod
possit auferri? nam quidam populus copiosissimus statuarum, greges etiam
abundantissimi equorum, tali sunt cautela seruandi, quali et cura uidentur
affixi, ubi, si esset humanis rebus ulla consideratio, Romanam pulchritudinem
non uigiliae, sed sola deberet reuerentia custodire. <2> Quid dicamus marmora
metallis et ante pretiosa? quae si uacet eripere, rara manus est quae possit a
talibus abstinere. ubi sunt exposita, quae facere potuerunt diuitiae generales
et labor mundi, quem inter ista deceat esse neglegentem? quis in causa tali
patitur esse uenalis, quando grauissimum damnum potest fieri in pulchritudine
singulari? <3> Qua de re per illam indictionem comitiuae Romanae cum priuilegiis
et iustis commodis suis tibi concedimus dignitatem, ut fideli studio magnoque
nisu quaeras improbas manus et insidiantes aut priuatorum fortunis aut moenibus
ad tuum facias uenire iudicium et rei ueritate discussa congruam subeant de
legibus ultionem, quia iuste tales persequitur publicus dolor, qui decorem
ueterum foedant detruncatione membrorum faciuntque illa in monumentis publicis,
quae debent pati. <4> Officium tuum et milites consuetos noctibus potius
inuigilare compelle: in die autem ciuitas se ipsa custodit: uigilans enim studio
non indiget alieno. furta quidem persuadent: sed tunc praesumptus facile
capitur, cum custos minime superuenire sentitur. statuae nec in toto mutae sunt,
quando a furibus percussae custodes uidentur tinnitibus ammonere. proinde
diligentiam tuam deuotione laudabili sentiamus, ut cui nunc laboriosos fasces
iniungimus, securos honores postea conferamus.
XIIII. FORMULA COMITIVAE RAVENNATIS.
<1> Si aestimanda est dignitas ex labore, si laudabilis sollicitudo actuum
publicorum parit gratiam liberaliter seruienti, summa gratificatione locus tuus
habendus est, qui suis necessitatibus probatur adimere nostris ordinationibus
tarditatem. quis enim nesciat quantam copiam nauium leuiter procures ammonitus?
a dignitatibus palatii nostri uix in euectionibus scribitur et iam a te summa
celeritate completur. <2> Nam inter dimissorum festinationes anxias uix sufficit
alter aduertere quod te uiuaciter contingit implere. negotiatorum operas
consuetas nec nimias exigas nec uenalitate derelinquas. sit modus qui non potest
grauare laborantes, ut, cum res querelosas sine querimoniis egeris, maiora de
nostro examine merearis. <3> Proinde comitiuam Rauennatem per illam indictionem
tibi serenitas nostra concedit, ut dignitatis tuae priuilegia subeas et labores.
officium tuum aequitatis consideratione moderare. semper enim et laedendi et
praestandi causas inuenit, qui publicis actionibus adhibetur. sed quantum
amministratio tua inter mediocres agitur, tanta debet aequalitate trutinari,
quia illum potius expedit tenere mensuram, qui defectam noscitur gubernare
substantiam. idonei damna uix sentiunt, tenues autem leui dispendio uulnerantur,
quando uel mediocri iniuria totum uidetur amittere, qui exiguum cognoscitur
possidere.
XV. FORMULA AD PRAEFECTUM URBIS DE ARCHITECTO FACIENDO IN URBE ROMA.
<1> Romanae fabricae decus peritum conuenit habere custodem, ut illa mirabilis
silua moenium diligentia subueniente seruetur et moderna facies operis affabris
dispositionibus construatur. hoc enim studio largitas nostra non cedit, ut et
facta ueterum exclusis defectibus innouemus et noua uetustatis gloria uestiamus.
<2> Proinde illum illustris magnitudo tua Romanis arcibus ab illa indictione
datum architectum esse cognoscat. et quia iustis commodis studia constat artium
nutrienda, ad eum uolumus pertinere quicquid decessores eius constat
rationabiliter consecutos. uidebit profecto meliora quam legit, pulchriora quam
cogitare potuit, statuas illas, auctorum suorum scilicet adhuc signa retinentes,
ut quamdiu laudabilium personarum opinio superesset, tamdiu et similitudinem
uiuae substantiae imago corporis custodiret: conspiciet expressas in aere uenas,
nisu quodam musculos tumentes, neruos quasi gradu tensos et sic hominem fusum in
diuersas similitudines, ut credas potius esse generatum. <3> Has primum Tusci in
Italia inuenisse referuntur, quas amplexa posteritas paene parem populum urbi
dedit quam natura procreauit. mirabitur formis equinis signa etiam inesse
feruoris. crispatis enim naribus ac rotundis, constrictis membris, auribus
remulsis credet forsitan cursus appetere, cum se metalla nouerit non mouere.
quid dicamus columnarum iunceam proceritatem? moles illas sublimissimas
fabricarum quasi quibusdam erectis hastilibus contineri et sub tanta aequalitate
concauis canalibus excauatas, ut magis ipsas aestimes fuisse transfusas, ceris
iudices factum, quod metallis durissimis uideas expolitum, marmorum iuncturas
uenas dicas esse genitales, ubi dum falluntur oculi, laus probatur creuisse
miraculis. <4> Ferunt prisci saeculi narratores fabricarum septem tantum terris
adtributa miracula: Ephesi Dianae templum: regis Mausoli pulcherrimum
monumentum, a quo et mausolea dicta sunt: Rhodi solis aeneum signum, quod
colossus uocatur: Iouis Olympici simulacrum, quod Phidias primus artificum summa
elegantia ebore auroque formauit: Cyri Medorum regis domus, quam Memnon arte
prodiga illigatis auro lapidibus fabricauit: Babyloniae muri, quos Samiramis
regina latere cocto sulpure ferroque construxit: pyramides in Aegypto, quarum in
suo statu se umbra consumens ultra constructionis spatia nulla parte respicitur.
<5> Sed quis illa ulterius praecipua putabit, cum in una urbe tot stupenda
conspexerit? habuerunt honorem, quia praecesserunt tempore et in rudi saeculo
quicquid emersisset nouum, per ora hominum iure ferebatur eximium. nunc autem
potest esse ueridicum, si uniuersa Roma dicatur esse miraculum. quapropter talia
uirum peritissimum suscipere decet, ne inter illa nimis ingeniosa priscorum ipse
uideatur esse metallicus et intellegere non possit, quae in illis artifex
antiquitas, ut sentirentur, effecit. et ideo det operam libris, antiquorum
instructionibus uacet, ne quid ab illis sciat minus in quorum locum cognoscitur
subrogatus.
XVI. FORMULA DE COMITE INSULAE CURITANAE ET CELSINAE.
<1> Constat plerumque bene posse agi, ubi non defuerit persona monitoris. omnia
enim sine priore confusa sunt et dum unusquisque iuxta uoluntatem suam cogitat
uiuere, regulam cognoscitur omittere disciplinae. itaque antiquae consuetudinis
morem secuti Curitanae et Celsinae insulis te iudicem per illam indictionem
nostra cedit auctoritas. <2> Iustum est enim ut qui a reliquorum hominum sunt
conuersatione diuisi, ad habitationes corum uadat qui eos probabili ratione
componat, ne quaedam sit necessitas iniustitiae communes actus longe positos
ignorasse. habetis igitur, supra dicti, qui inter uos emergentes causas et
audire debeat et finire. et si quid etiam a nostra fuerit pietate decretum eodem
commonente peragite, quia erroribus locus tollitur, quando uobis cui debeatis
obseruare declaratur. quem credimus ita bonis actibus studere, ut augmenta
nostrae gratiae possit accipere. necesse est enim ut a nobis remunerationem
sumat, si uobis quae sunt profutura disponat.
XVII. FORMULA DE PRAEPOSITO CALCIS.
<1> Gloriosum opus est seruienti unde Romana ciuitas probatur ornari, dum tantum
quis apud nos proficit quantum pracdictae Urbi proprio labore contulerit. dubium
non est coctilem calcem, quae est niuibus concolor, spongiis leuior,
instrumentum esse maximum fabricarum. haec quantum ignis adustione dissoluitur,
tantum exinde parietum firmitas roboratur: petra solubilis, saxea mollities,
harenacius lapis, qui tunc potius accenditur, quando aquis copiosissimis
irrigatur: sine quo nec saxa fixa sunt nec harenarum minuta solidantur. et ideo
maius studium meretur accipere, quod primum locum in Romanis moenibus noscitur
optinere. <2> Quocirca industriam tuam multorum sermone celebratam ad coctionem
distributionemque calcis ab indictione illa nostra praeponit auctoritas, ut tam
publicis quam priuatis fabricis abunde procurata sufficiat et ad aedificandum
cunctorum animi concitentur, dum uiderint paratum esse quod quaeritur.
priuilegia uero loci tui nostris iussionibus rationabiliter uindicabis, ut
maiora mereri possis, si bene tibi delegata compleueris.
XVIII. FORMULA DE ARMIFACTORIBUS.
<1> Considera quid suscipis, et intellegis locum te dare non debere peccatis.
arma enim bene construere hoc est salutem uelle omnium custodire, quia prima
facie ipsis terretur inimicus et incipit animo cedere, si se cognoscit similia
non habere. atque ideo ab indictione illa militibus te at fabris armorum,
inuitati morum tuorum opinione, praefecimus, ut tale opus ab artificibus exigas,
quale nobis placere posse cognoscis. securitas te nostrae non inducat absentiae.
quicquid feceris nos uidemus. age qui usu ipso subtilissima perquisitionis
errores artificum possumus prima fronte deprehendere et laudabiliter operata
iudicare. <2> Vide ergo qua diligentia, quo studio faciendum est quod ad nostrum
uenturum constat examen. age itaque ut nulla te uenalitas, nulla culpa demergat,
quia ueniale esse non potest quod in tali causa delinquitur, ne inde puniaris de
qua parte peccaueris. opus quod mortem generat et salutem, interitus peccantium,
custodia bonorum, contra improbos necessarium semper auxilium. hoc primum
Phoroneus Iunoni dicitur obtulisse, ut inuentum suum numinis, ut putabant,
auspicio consecraret. haec in bello necessaria, in pace decora sunt: haec
denique imbecilles fragilesque mortales cunctis beluis efficiunt fortiores.
XVIIII. FORMULA AD PPO DE ARMIFACTORIBUS.
<1> Multorum insinuatione comperimus illum probis moribus institutum commissa
sibi posse fideliter expedire. idcirco illustris magnitudo uestra nos eum
elegisse cognoscat, ut et militibus praesit secundum morem pristinum et
artificibus iubere possit armorum, quatenus consuetudines suas sic eleganter
adimpleant, ut nulla in eis inueniri possit offensio. quia licet ubique culpa
laedat, hic tamen grauiter percutit, si bellorum instrumenta neglexerit.
proditionis quippe instar est exercitui subtrahere quod eum constat armare.
quibus consuetudines suas prouidentia uestra deputabit, ut, dum illis excusatio
uictualium tollitur, necessaria uiuacius exigantur.
XX. FORMULA BINORUM ET TERNORUM, SI PER IUDICEM AGANTUR.
<1> Ad genium dignitatis tuae credimus pertinere, si competentia tibi uideamur
iniungere, quia tanto quis gratior redditur, quanto parendi causas amplius
suscepisse monstratur. et ideo binorum et ternorum titulos, quos a
prouincialibus exigi prisca decreuit auctoritas, per illam indictionem, officio
tuo procurante, ad scrinia comitis sacrarum largitionum transmittere maturabis,
ita ut omnis quantitas intra kal. Martiarum diem sollemniter impleatur. ne de
proprio reddere cogaris quod procurare neglexeris. tuam enim tetigisset
iniuriam, si alter eos titulos uideretur exigere, quos ad te praeceperunt leges
sacratissimae pertinere.
XXI. FORMULA BINORUM ET TERNORUM, SI PER OFFICIUM AGANTUR.
<1> Quamuis prisca consuetudo binorum et ternorum exactionem ad te iusserit
pertinere, tamen, ne te multiplex occupatio praegrauaret et impedimenta tibi
faceret sollicitudo geminata, illum et illum scriniarios officii nostri duximus
destinandos, ut tibi officioque tuo debeant imminere, quatenus cum eorum solacio
intra kal. Martiarum diem ad illustrem uirum illum comitem sacrarum largitionum
sollemnis quantitas deferatur, ne opinionis publicae reus efficiaris, si
largitiones sacras per moram aliquam putaueris esse tardandas. ita ut te
excipiendum esse non existimes, quem nos credidimus adiuuandum. nam si quid
minus fuerit quam oportebat illatum, de tuis hoc noueris facultatibus eruendum.
XXII. FORMULA COMMONITORII ILLI ET ILLI SCRINIARIIS DE BINIS ET TERNIS.
<1> Non dubitamus esse gratissimum, quando quis commonetur officium implere
susceptum, quia illud est potius graue, si miles uiuat otiose, cui quaestus est
actio sua, honor principalis iniunctio. similis enim discincto habetur, qui
ignobili torpori relinquitur. quapropter per indictionem illam ad illam uos
prouinciam iubemus accedere: ut cum iudice uel eius officio intra diem kal.
Martiarum quae de binis et ternis quantitas sollemniter postulatur, ad comitis
sacrarum scrinia, postposita dilatione, dirigatis, sic tamen, ut nec aerarium
nostrum aliquid minus a consuetudine percipiat nec possessor supra modum
professionis exsoluat. et non dubitetis commonitionis nostrae periculum
sustinere, si quid actum contra priscum ordinem potuerimus agnoscere.
XXIII. FORMULA VICARII PORTUS.
<1> Beneficia nostra gratiae tuae specialiter damus, si te agere commissa
rationabiliter approbemus. nec enim inremuneratus iaces, si et populos
peregrinos prudenter excipias et nostrorum commercia moderata aequalitate
componas. nam licet ubique sit necessaria prudentia, in hac potius actione
uidetur accommoda, quando inter duos populos nascuntur semper certamina, nisi
fuerit iustitia custodita. quapropter arte placandi sunt qui mores afferunt
simillimos uentis, quorum nisi prius animi temperentur, in contemptum maximum
natiua facilitate prosiliunt. qua de re modestiae tuae fama prouocati curas
illius portus per illam indictionem te habere censemus, ut omnia ad tuum titulum
pertinentia sic agas, quemadmodum ad meliora peruenias. in paruis enim discitur,
cui potiora praestentur.
XXIIII. FORMULA PRINCIPIS DALMATIARUM.
<1> Magna inter collegas suos praerogatiua decoratur, quisquis gerit militiam
nomine principatus. cognoscitur enim locum agere primarium: quando in rebus
humanis magna pars nominum asserit excellentiam dignitatum. hoc etiam tui loci
probatur exemplo, sine quo nec secretarii praestatur accessus nec postulationis
pompa peragitur, totusque ille iudicis genius ita tibi legibus probatur
creditus, ut sine te nequeat esse perfectus. <2> Comiti quidem prouinciarum
potestas data est, sed tibi iudex ipse commissus est. tu uitem tenes improbis
minantem: tu disciplinam inter iura custodis: tibi insolentiam perorantis fas
est distringere, quam praesuli non licet uindicare: gesta quin etiam totius
actus te subscribente complentur et consensus tuus quaeritur, postquam uoluntas
iudicis explicatur. age, ut qui talibus praeponeris, ea implesse merito
sentiaris. <3> Itaque per indictionem illam ad illam te prouinciam iubemus
excurrere, ut mixtus iudicis officio competentia loco tuo peragas et qui
princeps a nobis egrederis, nullis uilitatibus accuseris. reuerentissimum enim
te omnibus facis, si quod de nomine tuo creditur, et in moribus sentiatur.
XXV. FORMULA EPISTULAE, QUAE AD COMMENDANDOS PRINCIPES COMITI DESTINATUR.
<1> Inuitat nos consuetudo sollemnis et uobis ornatum officii dirigere et
pristinos ordines excubantium custodire. nostra enim laus est, si uos militia
Romana comitetur, quando talibus ministris potestis agere, quod uidetur priscis
sanctionibus conuenire. sic enim Gothos nostros deo iuuante produximus, ut et
armis sint instructi et acquitate compositi. hoc est, quod reliquae gentes
habere non possunt: hoc est, quod uos efficit singulares, si assueti bellis
uideamini legibus uiuere cum Romanis. <2> Quapropter ex officio nostro illum
atque illum ad uos credidimus esse dirigendos, ut secundum priscam consuetudinem
qui tuis iussionibus obsecundant eos rationabili debeat antiquitate moderari.
cui gratiam tuam in conseruandis annonis et consuetudinibus suis ex nostra
iussione praestabis. debet enim a te diligi, qui a nobis meruit destinari.
XXVI. FORMULA COMITIVAE DIVERSARUM CIVITATUM.
<1> Saeculi huius honor humanae mentis est manifesta probatio, quia libertas
animi uoluntatem propriam semper ostendit, dum se contemnit occulere, qui sibi
alios cognouerit subiacere. sed humanae mentis felix illa condicio est, quae
arbitrium prouectionis suae intra terminum moderationis includit et sic peragit
dignitatis breuissimum spatium, ut uniuersis temporibus reddatur acceptus. <2>
Quapropter interdum, iudices, ad blanda descendite. laboriosum quidem, sed non
est impossibile iustitiam suadere mortalibus, quam ita cunctorum sensibus
beneficium diuinitatis attribuit, ut et qui nesciunt iura rationem tamen
ueritatis agnoscant. necesse est enim, ut, quod a natura conceditur, summonente
iterum eadem suauiter audiatur. et ideo non laboretis populis imponere quod eos
constat et propria uoluntate sentire. facile enim sequuntur uestigia uerbi
alieni, qui se possunt monitore compelli. <3> Propterea per indictionem illam in
illa ciuitate comitiuae honorem secundi ordinis tibi propitia diuinitate
largimur, ut et ciues commissos aequitate regas et publicarum ordinationum
iussiones constanter adimpleas, quatenus tibi meliora praestemus, quando te
probabiliter egisse praesentia senserimus.
XXVII. FORMULA HONORATIS POSSESSORIBUS ET CURIALIBUS DE COMITIVA SUPRA SCRIPTA.
<1> Utile est unum semper eligere, cui reliqui debeant oboedire, quia, si
uoluntas diuersorum uaga relinquitur, confusio culparum amica generatur. itaque
ciuitatis uestrae comitiuam per indictionem illam nos illi largitos fuisse
noueritis, cui saluberrimam parientiam commodate, ut causis uestris ferat
remedium, et iussionibus publicis procuret effectum: scituri quod, si quis se
probabili deuotione tractauerit, similia de nostris sensibus haud irrite
postulabit.
XXVIII. FORMULA PRINCIPIBUS MILITUM COMITIVAE S(UPRA) S(CRIPTAE).
<1> Gratum uobis esse confidimus, quando militiae uestrae iudices destinamus,
quia tunc ordines uestros agitis, quotiens uobis non defuerit praesentia
iudicantis. relatiua ista intellectui sunt nomina: si praesulem ademeris,
militem non relinquis: apparitio enim tollitur, quotiens qui iubere poterat
abrogatur. uobis ergo actum cedimus, dum ad uos dirigimus dignitates et tam diu
uos militare facimus, donec iudices destinamus: nec istud leue credatis
beneficium, ut cum uos sitis obsequium, uobis occurrat electio cognitorum. <2>
Et ideo per indictionem illam illum comitem militiae uestrae cognoscite
destinatum. quem ita acturum esse putamus tam in causis publicis quam priuatis,
ut cum laus optata comitetur. cui deuotionem iustissimam commodantes in his quae
uobis praeceperit sollemniter oboedite, quia reuerentiam nostram honoratam esse
credimus, si bene habitos nostros iudices sentiamus.
XXVIIII. FORMULA DE CUSTODIENDIS PORTIS CIVITATUM.
<1> Nullatenus de eius fide dubitatur qui ad custodiam ciuitatis eligitur, quia
probatae conscientiae constat esse credendum quod fuerit pro securitate
multorum. atque ideo curam portae illius ciuitatis nostra tibi auctoritate
concedimus, ut et improborum non pateat aduentibus et bonorum non retardet
accessus. nam si porta semper obserata sit, instar est carceris: si iterum
iugiter pandatur, murorum nil proderit habere munimina. <2> Sit ergo utrumque
moderatum, ut et custodiae nocturnae satisfacias et incompetenter eam claudere
non praesumas. eris nimirum uia ciuium et ingressus mercium singularum, amicus
scilicet copiae quam optas intrare. stude ergo cum alimoniis inuitare uenientes.
non tibi quod despiciatur est creditum. quibusdam faucibus ciuitatis
praeponeris, qui ingredientibus uictualibus praeesse monstraris. quod te oportet
sine querela perficere, ut in paruis agnoscere possimus, cui maiora credere
debeamus.
XXX. FORMULA TRIBUNATUS PROVINCIARUM.
<1> Aequitati conuenit ut unus quisque ad fructum militiae emenso tempore debeat
peruenire et laboris recipiat praemium pro compensatione meritorum. unde quia
priscae consuetudinis ratio persuadet, ut a nobis debeat designari, qui uobis
tribunus esse mereatur, ideoque hac auctoritate censemus, ut ille, quem locus
uidetur exposcere, uobis in supradicto honore praesideat, quatenus, cum ad
tempus uenerit constitutum, optato honore potiatur. diuina sunt ista iudicia,
non humana, ut quem superna ad debitum tempus uoluerunt perducere, merito
uideatur et laboris sui praemia suscepisse. <2> Excubiarum suarum igitur
competentia priuilegia consequatur, quia nullum emolumento consueto fraudari
desideramus, quem sine culpis ad primatum uenisse cognoscimus. quapropter illi
pro utilitate publica disponenti modis omnibus oboedite, quoniam partem iudicis
habent priores, quando ab ipsis requiritur, si quid a uobis insolentius
excedatur.
XXXI. FORMULA PRINCIPATUS IN URBE ROMA.
<1> Cum in urbo Roma plurima fieri censeamus et necesse sit partem ibi esse
comitiaci officii, ut utilitates publicae uideantur impleri, more nostro
prospeximus, ut, quia principem cardinalem obsequiis nostris deesse non patimur,
tu eius locum uicarii nomine in urbe Roma sollemniter debeas continere, quatenus
et ille primates sui laboribus perfruatur et tu in alterius honore possis
discere, quod in tuo debeas feliciter exhibere. <2> Si quos etiam comitiacorum
ad comitatum iudicaueris esse dirigendos consulens obsequio nostro, tuo
subiacebit arbitrio. eos autem, quos retinendos putaueris, indulta securitate
potientur, ita tamen, ut uicissim omnia modereris, quatenus nec excubantes
continuus labor atterat nec segnes iterum rubigo otii fugienda consumat.
XXXII. FORMULA QUA MONETA COMMITTITUR.
<1> Omnis quidem utilitas publica fideli debet actione compleri, quia totum
uitiosum geritur, ubi conscientiae puritas non habetur: tamen omnino monetae
debet integritas quaeri, ubi et uultus noster imprimitur et generalis utilitas
inuenitur. nam quid erit tutum, si in nostra peccetur effigie, et quam subiectus
corde uenerari debet, manus sacrilega uiolare festinet? additur quod uenalitas
cuncta dissoluitur, si uictualia metalla uitiantur, quando necesse est respui
quod in mercimoniis corruptum uidetur offerri. quis ergo patiatur unius esse
commodum dispendia scelesta cunctorum, ut detestabile uitium uenire possit ad
pretium? <2> Sit mundum quod ad formam nostrae serenitatis adducitur: claritas
regia nil admittit infectum. nam si uultus cuiuslibet sincero colore depingitur,
multo iustius metallorum puritate principalis gratia custoditur. auri flamma
nulla iniuria permixtionis albescat, argenti color gratia candoris arrideat,
aeris rubor in natiua qualitate permaneat. nam si unum laedere legibus putatur
esse damnandum, quid ille mereri poterit, qui in tanta hominum numerositate
peccauerit? <3> Pondus quin etiam constitutum denariis praecipimus debere
seruari, qui olim penso quam numero uendebantur: unde uerborum uocabula
competenter ab origine trahens compendium et dispendium pulchre uocitauit
antiquitas. pecunia enim a pecudis tergo nominata Gallis auctoribus sine aliquo
adhuc signo ad metalla translata est. quam non sinimus faeculenta permixtione
fieri contemptibilem, ne iterum in antiquam cognoscatur redire uilitatem. <4>
Proinde te, cuius nobis laudata est integritas actionis, ab illa indictione per
iuge quinquennium monetae curam habere praecipimus, quam Seruius rex in aere
primum inpressisse perhibetur: ita ut tuo periculo non dubites quaeri, si quid
in illa fraudis potuerit inueniri. nam sicut casus asperos subibis, si quid
fortasse deliqueris, ita inremuneratum non derelinquimus, si te egisse
inculpabiliter senserimus.
XXXIII. FORMULA TRACTORIAE LEGATORUM DIVERSARUM GENTIUM.
<1> Quis dubitet utilitatis publicae interesse rationem, ut, quibus nos constat
dona conferre, nullam uideantur itineris iniuriam sustinere, quando nec uobis
morarum detrimenta faciunt et illi se bene habitos fuisse cognoscunt? atque ideo
humanitatem subter annexam uel ad equos capitum definitum illius gentis legatis
sine aliqua tarditate praestabitis, quatenus ad sedes suas inremunerati non
debeant peruenire, quia festinantibus gratior est celeritas in redeundo quam
quaelibet munerum magnitudo.
XXXIIII. FORMULA EVOCATORIAE, QUAM PRINCEPS MOTU SUO DIRIGIT.
<1> Non dubitamus ultronea grate suscipi, quae in locum muneris solent postulata
conferri, quia domini recordatio concedit semper augmenta nec possunt esse
principis uacua gratificationis indicia. quapropter ad comitatum nostrum iussis
te praesentibus euocamus, ut non mediocri gaudio perfruaris. <2> Et ideo otii
delectatione postposita ad illam diem ad urbem illam uenire depropera, ut et
tibi aspectum nostrum gratum fuisse iudicemus, cum te festinasse cognoscimus.
desiderat enim aula nostra praesentiam bonorum, dum nescio quo pacto quicquid
regali sapientiae gratum esse cognoscitur, et diuino iudicio comprobatur, quia
ille qui corda nostra regit, ipse etiam quod debeamus sentire concedit.
XXXV. FORMULA EVOCATORIAE, QUAE PETENTI CONCEDITUR.
<1> Manifestatio est conscientiae bonae praesentiam iusti principis expetisse,
quam solus ille desiderare potest, qui de magna mentis puritate confidit.
aspectum solis nisi clara lumina non requirunt, quia illi tantum possunt
rutilantes pati radios, quos constat oculos habere purissimos. sic praesentiam
principis ambiunt qui de cordis sinceritate praesumunt. <2> Hinc est quod
ueniendi tibi ad comitatum fiduciam grata mente largimur, ne honor euocationis,
qui pro uestra gloria constat inuentus, ad iniuriam conuertatur, dum aliqua
fuerit dilatione tardatus. inuitamus quin immo desideria uenientum, quia inde
magis crescimus, si uiros nobiles nostris obsequiis aggregamus.
XXXVI. FORMULA COMMEATALIS.
<1> Nemo dubitat homines suaui uarietate recreari, quia in continuatione rerum
magnum mentibus constat esse fastidium. dulcedo mellis, si assidue sumatur,
horrescit: serena ipsa, quamuis magnopere desiderentur, iugiter adepta
sordescunt: non immerito, quia dum sit homo commutabilis, naturae suae desiderat
habere qualitates. <2> Et ideo festinanti tibi prouinciali oblectatione refoueri
copiam tot mensuum in supra dicta prouincia concedimus immorandi, quia paene
reclusus aduertitur, cui mutare solum liberum non uidetur: ita tamen, ut cum
promeritas indutias domino iuuante transegeris, ad urbanas sedes redire
festines. nam si taedium est continuatim uiuere in urbis celebritate, quanto
magis in agris diutina tempora peregisse! libenter ergo damus indutias
discedendi, non ut Roma debeat deseri, sed ut amplius commendetur absenti.
XXXVII. FORMULA SPECTABILITATIS.
<1> Optamus nobis deo auxiliante subiectos uaria dignitatum praerogatiua
gloriari: desideramus probabile genus hominum inpressa gratia dignitatis ornare,
ut laudabilius unus quisque possit uiuere, cum se honores reuerendos cognouerit
accepisse. sic enim et ad uirtutis studia decenter ascenditur et a bonis ciuibus
res publica plus amatur. atque ideo te spectabilitatis nitore decoramus, ut
sententiam tuam in conuentibus publicis spectandam esse cognoscas, cum inter
nobiles decorus assederis, ut, si haec praedicabili conuersatione tractaueris,
in futurum praemiis melioribus augearis.
XXXVIII. FORMULA CLARISSIMATUS.
<1> Constat iucundum esse rerum bonarum saporem et utilem ambitum laudis, qui
appetitur per augmenta uirtutis. hoc nos studium prouidae liberalitatis
infundimus, ut maior sit cultus morum, dum crescunt desideria praemiorum.
clarissimatus igitur honorem, ornamenta iudicii nostri, regia tibi largitur
auctoritas, quod praebeat et exactae uitae testimonium et futurae prosperitatis
polliceatur augmentum. quapropter nihil iam obscurum agere patiaris, qui
clarissimatus dignitate resplendes. grande siquidem uitae testimonium est non
tam clarum quam clarissimum dici, quando paene totum de illo optimum creditur
qui tanti fulgoris superlatiuo nomine uocitatur.
XXXVIIII. FORMULA TUITIONIS.
<1> Superfluum quidem uidetur tuitionem specialiter a principe petere, cuius est
propositi uniuersos communiter uindicare. sed quia securitatem tuam quorundam
uiolentorum exsecranda temeritas inquietat, non piget dolentium querelis ad hanc
partem pietatis adduci, ut quod omnibus praestare cupimus, supplicanti
potissimum conferamus. atque ideo diuersorum te, quemadmodum quereris,
dispendiis sauciatum in castra defensionis nostrae clementer excipimus, ut cum
aduersariis tuis non, ut hactenus, campestri certamine, sed murali uidearis
protectione contendere. ita fit ut, truculentis uiribus pressus, reddaris
auxiliis regalibus exaequatus. <2> Quapropter tuitionem tibi nostri nominis
quasi ualidissimam turrem contra inciuiles impetus et conuentionalia detrimenta
nostra concedit auctoritas: ita tamen, ne, his praesumptionibus subleuatus,
ciuile despicias praebere responsum et tu uidearis insolens calcare iura
publica, quem primitus detestanda premebat audacia. et quia ministros efficaces
nostra debet habere praeceptio nec decet principem loqui quod non uideatur posse
compleri, praesentis beneficii iussione, aduersus Gothos illa, aduersus Romanos
illa, facile te fides et diligentia custodiuit: quia nemo laborat defendere quod
timetur offendi, dum praestans dominus fieri formidatur ingratus. fruere igitur
nostra clementia: beneficio laetare suscepto. nam si ulterius a quoquam sub
inciuilitate temptaris, tua de inimicis potius uota complebis.
XL. FORMULA DE MATRIMONIO CONFIRMANDO ET LIBERIS LEGITIMIS FACIENDIS.
<1> Aeternum est beneficium quod posteritatis fuerit fauore collatum nec plus
est conueniens regi quam si humanae praestet origini. in lucem quippe uenturus
casus suscipere non meretur aduersos, ne ante grauamen districtionis incurrat
quam gaudia supernae lucis inueniat. <2> Oblata itaque supplicatione depromis
mulierem quam tibi placitus illigauit amplexus, beneficio nostro iugali
honestate debere sociari, ut ex ea liberi nati nomen nanciscantur heredum. nam
cum spontanea copula animantia cuncta consociet dignumque unicuique uideatur
esse quod placuit, durum est ibi libertatem liberam non haberi, unde liberi
procreantur. <3> Et ideo illam quae, sicut iure praecipitur, honestate non
fuisse probatur aequalis, legitimam tibi fieri censemus uxorem et filios ex
eadem coniuge, siue qui suscepti sunt siue qui sunt suscipiendi, heredum uolumus
iura sortiri, ut sub nulla dubietate diligas quos tibi absolute successores
futuros esse cognoscas. natura enim tibi praestitit filios, sed nos tali
securitate facimus esse carissimos.
XLI. FORMULA AETATIS VENIAE.
<1> Gloriosa est supplicatio, quae ueniam quaerit aetatis: quando se grauitatem
de moribus profitetur accipere, quam maturitatem uitae adhuc non contingit
intulisse. minor nascendo grandaeuus cupis esse consilio. ita quod in humanis
rebus audacissimum est, ad erroris auxilium beneficium contemnis annorum.
quapropter oblata supplicatione depromis, ut, cum tibi sit ratio firma
prudentiae, actiones tuae non relinquantur ambiguae, ne infirmetur iure quod non
potest utilitate titubare. hoc nos, quibus cordi est bona desideria perficere,
libenter accipimus, quia nullas se captare uelle profitetur insidias, quisquis
habere liberos contractus constanter affectat. <2> Atque ideo, si id tempus
constat elapsum, quo ad hanc ueniam accedi iura uoluerunt, nos quoque
probabilibus desideriis licentiam non negamus, ut in competenti foro ea quae in
his causis reuerenda legum dictat antiquitas, sollemniter actitentur, ita ut
alienandis rusticis uel urbanis praediis constitutionum seruetur auctoritas: ne
cum opinioni praestare uolumus, utilitatem supplicis laedere uideamur. cape
igitur nostro beneficio potiorem annis aetatem et quod petis ab oraculo, moribus
exhibeto. nam professio maturitatis acerbae locum denegat actionis, quando multo
grauior est culpa, quam suae promissionis impugnat auctoritas.
XLII. FORMULA EDICTI, AD QUAESTOREM, UT IPSE SPONDERE DEBEAT, QUI SAIONEM
MERETUR.
<1> Frequenter saiones, quos a nobis credidimus pia uoluntate concedi, querelis
maximis cognouimus ingrauatos. corruptum est, pro dolor! beneficium nostrum,
creuitque potius de medicina calamitas, dum ad alios usus petentium malignitate
translati sunt quam eos nostra remedia transtulerunt. unde nobis necesse fuit
remedio salubri uotis pestiferis obuiare, ne, dum pietatis studio ad aequabilia
beneficia trahimur, subreptionum iniquissima patiamur. <2> Atque ideo edictali
programmate definimus, ut, quicumque contra uiolentas insidias propter
ineluctabiles necessitates suas mereri desiderat forte saionem, officio nostro
poenali se uinculo cautionis astringat, ut, si praecepta nostra eius inmissione
plectibili is apud quem meretur excesserit, ipse poenae nomine det auri libras
tot et satisfacere se promittat quaecumque aduersarius eius potuerit tam commodi
quam itineris sustinere detrimenta. <3> Nos enim cum reprimere inciuiles animos
uolumus, praegrauare innocentiam non debemus. saio autem, qui sua uoluntate
modum praeceptionis excesserit, donatiuo se nouerit exuendum et gratiae nostrae,
quod est damnis omnibus grauius, incurrere posse periculum nec sibi ulterius
esse credendum, si iussionis nostrae, cuius executor esse debuit, temerator
extiterit.
XLIII. FORMULA PROBATORIAE CHARTARIORUM.
<1> Constat militiam bene geri, quae probatis moribus uidetur imponi, quando
ipse secum potest reuoluere, quod iudex eum admonere debuit: maxime cum ad
patrimonia diuinae domus talis mereatur accedere, ut detestabili cupiditate non
possit accendi. deinde cum splendidissimum officium censoria quadam grauitate
reluceat et turpe sit illi misceri qui dignis moribus non potest approbari,
congruum uidetur tales quaerere qui in nullo debeant displicere. atque ideo
tribuni chartariorum suggestione comperta, penes quem officii est digna
reuerentia, ab illo die chartarii te uolumus nomen adipisci, ut qui nobis bene
acturus promitteris, documentis laudabilibus approberis. auaritiam declina: fuge
longius iniqua compendia. multo melius proficitur, si bonis operibus seruiatur.
XLIIII. FORMULA DE COMPETITIONIBUS.
<1> Nescio quid grande de se uidetur promittere, qui loca desiderat publica
possidere. hoc enim ita fieri decet, si res squalida in meliorem loci faciem
transferatur et reuocetur ad ornatum quod pridem iacere uidebatur incultum.
atque ideo desideranti tibi illum locum proprietario iure concedimus, praeter
aes aut plumbum uel marmora, si tamen ibi fuerint latere comperta. age itaque ut
per te decorem sumat quod neglectum incuriosa uetustate iacuerat, quatenus boni
ciuis laudem inuenire merearis, si faciem tuae ciuitatis ornaueris, securus
etiam ad quoslibet uel ad posteros transmissurus quod proprio fuerit labore
compositum. quia tanto firmius unusquisque talia possidebit, quanto se
auctoresque suos amplius expendisse probauerit.
XLV. FORMULA, QUA CENSUS RELEVETUR EI QUI UNAM CASAM POSSIDET PRAEGRAVATAM.
<1> Cum de agri utilitate uiuatur et omnibus inde certum sit iustum uenire
compendium, tributum illud possessionis in illa prouincia constitutae ita
quereris onerosum, ut uniuersas tibi uorauerit facultates hiatus ille
uastissimus functionis et quod aliunde magno labore potest colligi, per illam
uideatur absumi, cuius utilitatem nimia transcendit illatio, dum plus
compulsoribus redditur quam a sedulo cultore praestetur. quapropter credimus te
euadere posse nuditatem, si dominium huius ruris amiseris, cui iugis sterilitas
de compulsoribus uenit, ne condicione miserabili seruias necessitati, cuius
dominus esse meruisti. <2> Sed quia hoc genus beneficii praestari mediocribus
leges sacratissimae censuerunt, ut qui unius cespitis enormitate deprimitur nec
alterius commodo subleuatur, moderatione habita ei debeat subueniri, magnitudini
uestrae, cui cordi est cogitare iustitiam, praesenti auctoritate decernimus, ut,
si ita est, tot solidos tributarios supradictae possessionis datis
praeceptionibus ad eos quorum interest ita faciatis de uasariis publicis
diligenter abradi, ut huius rei duplex uestigium non debeat inueniri, sed per
saecula sine errore seruetur quod una tantum summa concluditur.
XLVI. FORMULA QUA CONSOBRINAE MATRIMONIUM LEGITIMUM FIAT.
<1> Institutio diuinarum legum humano iuri ministrauit exordium, quando in illis
capitibus legitur praeceptum quae duabus tabulis probantur ascripta. sacer enim
Moyses diuina institutione formatus Israhelitico populo inter alia definiuit, ut
concubitus suos a uicinitate pii sanguinis abstinerent, ne et se in proximitatem
redeundo polluerent et dilatationem prouidam in genus extraneum non haberent.
hoc prudentes uiri sequentes exemplum multo longius pudicam obseruantiam
posteris transmiserunt, reseruantes principi tantum beneficium in consobrinis
nuptiali copulatione iungendis, intellegentes rarius posse praesumi quod a
principe iusserant postulari. <2> Ammiramur inuentum et temperiem rerum stupenda
consideratione laudamus hoc ad principis remissum fuisse iudicium, ut qui
populorum mores regebat, ipse et moderata concupiscentiae frena laxaret. et
ideo, supplicationum tuarum tenore permoti, si tibi tantum illa consobrini
sanguinis uicinitate coniungitur nec alio gradu proximior approbaris, matrimonio
tuo decernimus esse sociandam nullamque uobis exinde iubemus fieri quaestionem,
quando hoc et leges nostra permitti uoluntate consentiunt et uota uestra
praesentis auctoritatis beneficia firmauerunt. erunt uobis itaque deo fauente
posteri sollemniter heredes, castum matrimonium, gloriosa permixtio, quoniam
quicquid a nobis fieri praecipitur, necesse est ut non culpis, sed laudibus
applicetur.
XLVII. FORMULA AD PPO, UT SUB DECRETO CURIALIUM PRAEDIA VENUNDENTUR.
<1> Patitur hoc inprouida mortalium plerumque condicio, ut, cum laedere putatur,
consulat et cum consulere uidetur, affligat. sed illud magis est eligendum, quod
prodesse cognoscitur. nam uenena ipsa si iuuare probantur, accepta sunt: et
contra refugienda est suauitas mellis, quae inferre dinoscitur laesiones. finis
ergo sapientis est amare quod expedit: sic nec aegri uotum respicit qui prodesse
contendit. praedia quidem curialium non facile distrahi prudens definiuit
antiquitas, ut ad necessitates publicas melius sufficerent, si substantiae
iuuamina plus haberent. <2> Sed in hac iterum parte prospexit, ut, si apud uos
ineluctabilis necessitas appareret, ei suarum rerum distractio subueniret. nam
quid prodest, si quispiam uideatur idoneus et fieri non possit a contractis
nexibus absolutus? egenti similis est, qui reddere nequit alienum, nec dici
potest proprium, quod liberare dominum non uidetur aditum. <3> Sed quamuis hoc
uestrae potestati fuerit legum auctoritate concessum, tamen, ne quam uel
rarissimi facti sustineretis inuidiam, illius municipis allegatione permoti, nos
quoque eminentiae uestrae praesenti iussione permittimus, ut ad liquidum
ueritate discussa, si aliter solui nequeunt contracta ligamina, praedii sui,
quod propria uoluntate delegerit, habeat licentiam distrahendi, ita ut reddat
debitum quod probatur esse contractum, ne uitio uoracitatis imbutus facultates
suas absorbere uideatur esse permissus. constet apud uos probabilis causa
damnorum, quoniam illi uolumus subueniri qui duris necessitatibus probatur
astringi: utrumque enim potest esse culpabile aut malis moribus frena laxare aut
iustas iterum querelas excludere. quapropter prouide uobis permisit antiquitas
de illa causa decernere, cui est utile curiam custodire. a quibus enim urbium
munia poterunt sustineri, si ciuitatum nerui passim uideantur abscidi?
LIBER OCTAVUS.
I. IUSTINO IMPERATORI ATHALARICUS REX.
<1> Iuste possem reprehendi, clementissime principum, si pacem uestram quaererem
tepide, quam parentes meos constat ardentius expetisse: aut in qua parte dignus
heres existorem, si auctoribus meis impar in tanta gloria reperirer? non nos
maiorum purpuratus tantum ordo clarificat, non sic regia sella sublimat quantum
longe lateque patens gratia uestra nobilitat. omnia enim regno nostro perfecte
constare credimus, si hanc nobis minime deesse sentimus. <2> Sed ut pietati
uestrae praeconiale est diligere quorum patres contigit uos amasse — nemo enim
creditur impendisse ueteribus puritatem innocuam, nisi qui eorum stirpem habere
probatur acceptam — claudantur odia cum sepultis: ira perire nouerit cum
proteruis: gratia non debet occumbere cum dilectis: sed magis affectuosius
tractandus est, qui ad regni causas innocens inuenitur. <3> Perpendite quid a
uobis mereatur successor bonorum. uos auum nostrum in uestra ciuitate celsis
curulibus extulistis, uos genitorem meum in Italia palmatae claritate
decorastis. desiderio quoque concordiae factus est per arma filius, qui annis
uobis paene uidebatur aequaeuus. hoc nomen adulescenti congruentius dabitis,
qualia nostris senioribus praestitistis. in parentelae locum uester iam transire
debet affectus: nam ex filio uestro genitus naturae legibus uobis non habetur
extraneus. <4> Atque ideo pacem non longinquus, sed proximus peto, quia tunc
mihi dedistis gratiam nepotis, quando meo parenti adoptionis gaudia
praestitistis. introducamur et in uestram mentem, qui adepti sumus regiam
hereditatem. illud mihi est supra dominatum tantum ac talem rectorem habere
propitium. primordia itaque nostra solacia mereantur principis habere longaeui:
pueritia tuitionem gratiae consequatur et non in totum a parentibus destituimur,
qui tali protectione fulcimur. <5> Sit uobis regnum nostrum gratiae uinculis
obligatum. plus in illa parte regnabitis, ubi omnia caritate iubetis. quapropter
ad serenitatem uestram illum et illum legatos nostros aestimauimus esse
dirigendos, ut amicitiam nobis illis pactis, illis condicionibus concedatis,
quas cum diuae memoriae domno auo nostro inclitos decessores uestros constat
habuisse. aliquid forsitan et amplius mereor sinceritatis, cuius nec aetas
uidetur esse suspecta nec generatio iam probatur extranea. quaedam uero per
supra scriptos legatos nostros serenissimis sensibus uestris uerbo intimanda
commisimus, quae clementiae uestrae more ad effectum facite peruenire.
II. SENATUI URBIS ROMAE ATHALARICUS REX.
<1> Plenissimum gaudium constat esse, patres conscripti, cognoscere dominantis
exortum, ut qui creditur uniuersos posse protegere, audiatur ad regni culmina
peruenisse. mensura laetitiae de magnitudine nuntii uenit et tanta fit alacritas
animi, quanta fuerit et consideratio rei. <2> Nam si prudentes uiros erigunt
commoda praedicta sodalium, si amicorum releuat sospitas nuntiata, quanta
exultatione suscipi debet omnium rectorem feliciter prouenisse terrarum, quem
non protulit commota seditio, non bella feruentia pepererunt, non rei publicae
damna lucrata sunt, sed sic factus est per quietem, quemadmodum uenire decuit
ciuilitatis auctorem! magnum profecto felicitatis genus optinere sine
contentionibus principatum et in illa re publica adulescentem dominum fieri, ubi
multos constat maturis moribus inueniri. non enim potest cuilibet aetati deesse
consilium, ubi tot parentes publicos constat inuentos. <3> Praelata est ergo
spes nostra cunctorum meritis et certius fuit de nobis credi quam quod de aliis
potuit approbari: non iniuria, quoniam quaeuis claritas generis Hamalis cedit et
sicut ex uobis qui nascitur, origo senatoria nuncupatur, ita qui ex hac familia
progreditur, regno dignissimus approbatur. probata sunt praesenti facto quae
loquimur. <4> Nam cum domni aui nostri pro beneficiorum quantitate dulcissima
nobis recordatio urgeretur extremis, magnitudinem dominationis suae tanta in nos
celeritate transfudit, ut non tam regnum quam uestem crederes esse mutatam. tot
proceres manu consilioque gloriosi nullum murmur, ut assolet, miscuerunt: sed
ita cum magno gaudio secuti sunt principis sui iudicia, ut uoluntatem ibi potius
agnosceres conluxisse diuinam. quapropter necessarium duximus propitio deo de
ortu regni nostri uos facere certiores, quia dilatatum quam mutatum uidetur
imperium, cum transit ad posteros: nam quodammodo ipse putatur uiuere, cuius
uobis progenies cognoscitur imperare. <5> Hoc habuerunt uestra uota, haec illius
fuit indubitata sententia, ut heredem bonorum suorum relinqueret qui beneficia
eius in uobis possit augere. amore principum constat inuentum, ut simulacris
aeneis fides seruaretur imaginis, quatenus uentura progenies auctorem uideret,
qui sibi rem publicam multis beneficiis obligasset. sed quanto uerior est qui
uiuit in posteris, per quos plerumque et forma corporis redditur et uigor animi
protelatur! <6> Et ideo nobilitatis uestrae fidem maiore nunc studio debetis
ostendere, quatenus et priora munera meritis uideantur esse collata et futura
indubitanter eis praestemus, quos praeteritorum immemores fuisse minime
senserimus. <7> Noueritis etiam diuina prouidentia fuisse dispositum, ut
Gothorum Romanorumque nobis generalis consensus accederet et uoluntatem suam,
quam puris pectoribus offerebant, iuris etiam iurandi relligione firmarent. <8>
Quod uos secuturos esse minime dubitamus tempore, non amore: nam a uobis potuit
inchoari quod praeuenti longinquitate sequimini. constat enim excellentissimos
patres tanto amplius posse diligere, quanto maiores honores ceteris ordinibus
uisi sunt accepisse. <9> Sed ut primordia nostra et circa uos benignitatis
possitis agnoscere, quia decet curiam uestram beneficiis introire, illustrem
Sigismerem comitem nostrum uobis cum his qui directi sunt fecimus sacramenta
praestare, quia inuiolabiliter seruare cupimus quae publica auctoritate
promittimus. <10> Si qua autem a nobis creditis postulanda, quae uestrae
securitatis incrementa multiplicent, indubitanter petite commoniti, quos ad
fundendas preces nos etiam uidemur hortari. promissio enim est ista quam
commonitio: nam qui reuerendum senatum supplicare praecipit, quod impetrare
possit nihilominus compromisit. nunc uestrum est tale aliquid sperare, quod
communem rem publicam possit augere.
III. POPULO ROMANO ATHALARICUS REX.
<1> Si uos externus heres imperii suscepisset, dubitare forsitan poteratis, ne,
quos prior dilexerat, inuidendo subsequens non amaret, quia nescio quo pacto,
cum successor amplius laudari nititur, praecedentis fama lentatur. nunc uero
persona tantum, non est autem uobis gratia commutata, quando recte nobiscum agi
credimus, si ueneranda iudicia aui subsequamur. <2> Nostrae siquidem opinionis
interest, ut, quos ille benignissime tuitus est, nos etiam statuta copia et
beneficiorum ubertate pascamus. minus cogitant qui obscuris principibus et
uersatis in mediocri actione succedunt: nos talis praecessit, ut exquisitis
uirtutibus eius sequi uestigia debeamus. <3> Quapropter, quod auspice deo dictum
sit, gloriosi domni aui nostri ita uobis nuntiamus ordinatione dispositum, ut
Gothorum Romanorumque suauissimus consensus in regnum nostrum accederet, et, ne
aduersis rebus aliqua possit remanere suspicio, uota sua sacramentorum
interpositione firmarunt: se dominatum nostrum tanto gaudio subire, tamquam si
illis domnus auus noster fatali sorte non uideretur esse subtractus, ne solis
linguis, sed etiam imis pectoribus probarentur esse deuoti. <4> Quod si uos, ut
opinamur, libenti animo similia feceritis, harum portitores sub obtestatione
diuina uobis fecimus polliceri iustitiam nos et aequabilem clementiam, quae
populos nutrit, iuuante domino custodire et Gothis Romanisque apud nos ius esse
commune nec aliud inter uos esse diuisum, nisi quod illi labores bellicos pro
communi utilitate subeunt, uos autem habitatio quieta ciuitatis Romanae
multiplicat. <5> Ecce ad condicionem clementissimam sacramenti inclinando
nostrum eueximus principatum, ut nihil dubium, nihil formidolosum populi habere
possint quos beatus noster auctor enutriuit. ecce Traiani uestri clarum saeculis
reparamus exemplum: iurat uobis per quem iuratis, nec potest ab illo quisquam
falli, quo inuocato non licet inpune mentiri. erigite nunc animos et deo
propitio meliora semper optate, ut, sicut a caritate potestatem regiam
inchoauimus, ita tranquillitatem deo placitam sequentibus temporibus exequamur.
IIII. DIVERSIS ROMANIS PER ITALIAM ET DALMATIAS CONSTITUTIS ATHALARICUS REX.
<1> Honorabile credimus indicare quod fama potuistis teste cognoscere. iure
siquidem de se bene arbitrabitur aestimatum, qui regium meretur alloquium, quia
dignitas est subiecti affatus meruisse dominantis, in ea praesertim causa, in
qua omnium corda sic uidentur esse sollicita, ut, si non cognoscant prosperum,
credant semper aduersum. nam qui audit mutatum, nouum nihilominus formidat
imperium. et re uera nescio quid triste creditur cogitare, qui tardat inter
initia benigna promittere. <2> Quapropter locum sinistris cogitationibus
amputantes aliter de nobis non patimur credi, quam quod de nostris parentibus
potuit aestimari. et ideo, quod diuinitate propitia dictum sit, glorioso domno
auo nostro feliciter ordinante, tam Gothorum quam Romanorum praesentium pro
munimine, indepti regni sacramenta suscepimus. quod uos quoque facturos esse
libentissime iudicamus, ut, qui fideles parentibus nostris extitistis, nobis
quoque simili deuotione pareatis. <3> Suauius enim diligit heredem, qui
beneficiorum recordatur auctorem. sed ut uobis beniuolentiae nostrae iam nunc
integritas innotescat, iuris iurandi uobis fecimus relligione promitti, quod et
nostrum possit declarare propositum et spem debeat munire cunctorum.
V. DIVERSIS GOTHIS PER ITALIAM CONSTITUTIS ATHALARICUS REX.
<1> Voluissemus quidem uobis domni aui nostri longaeuae uitae gaudia nuntiare:
sed quoniam diligentibus dura condicione subtractus est, nos heredes regni sui
deo sibi imperante substituit, ut successione sanguinis sui beneficia uobis a se
collata faceret esse perpetua, dum nos illa et augere et tueri cupimus, quae ab
illo facta esse cognoscimus. cuius ordinationi, adhuc eo superstite, in regia
ciuitate ita sacramenti interpositione cunctorum uota sociata sunt, ut unum
crederes promittere, quod generalitas uidebatur optare. <2> Hoc uos sequentes
exemplum pari deuotione peragite, ne quid a praesentibus minus fecisse
uideamini, a quibus creditur totum similiter posse compleri. illum uero comitem
uobis fecimus iurata uoce promittere, ut, sicut nobis uestrum animum proditis
deuotissime, sic optata de nostris sensibus audiatis. recipite itaque prosperum
semper uobis nomen, Hamalorum regalem prosapiam, blatteum germen, infantiam
purpuratam, per quos deo iuuante parentes nostri decenter euecti sunt et inter
tam prolixum ordinem regum susceperunt semper augmentum. <3> Credimus enim de
diuinitate propitia, quae maiores nostros dignanter adiuuit, nunc quoque gratiam
suae dignationis impendere, ut et nobis regnantibus bonarum rerum fructus
dulcissimos afferatis, qui sub nostris parentibus copiosa uirtutum laude
floruistis.
VI. LIBERIO PPO GALLIARUM ATHALARICUS REX.
<1> Scimus animum uestrum de obitu gloriosae memoriae domni aui nostri acerbo
dolore fatigari, dum omnia bona grauiter defleantur amissa: plus enim quaeritur,
dum dominus desiderabilis abrogatur. expedit autem studio pietatis afflictam
mentem compensatiuo remedio consolari, quia uix sentitur amissus, cui non
succedit extraneus. <2> Sic enim sibi deo imperante prospexit, dum esset et post
fata prouidus, ut regionibus suis pacem relinqueret, ne aliqua nouitas quieta
turbaret. in sellam regni sui nos dominos collocauit, quatenus decus generis,
quod in illo floruit, in successores protinus aequali luce radiaret. cui
ordinationi Gothorum Romanorumque desideria conuenerunt, ita ut sub iurisiurandi
religione promitterent fidem se regno nostro deuoto animo seruaturos. <3> Quod
ad illustris magnitudinis uestrae notitiam credidimus perferendum, ut ab his,
qui in Galliis regno pietatis nostrae deuoti sunt, simile proferatur exemplum
et, sicut animos nostros circa se minores non desiderant effici, ita pari
condicione teneantur astricti.
VII. UNIVERSIS PROVINCIALIBUS PER GALLIAS CONSTITUTIS ATHALARICUS REX.
<1> Licet gloriosae memoriae domni aui nostri pro excellentibus meritis tristis
uobis uideatur occasus, tamen, quia ille humana condicione decubuit, ad
continuandam gubernationem, quam singulariter gesserat, nos reliquit, ne damnum
boni principis sentiretis, cuius uobis noscitur regnare progenies. nullus enim
apud nos perdit, quod illi paruit, sed duplici largitate munifici et illius
debita reddimus et futuris obsequiis beneficia ingenita pietate mutuamur. <2>
Atque ideo fidem pristinam maiore nunc uos conuenit deuotione monstrare, quia
bene prospicit rebus futuris qui regnantium seruit initiis, dum ipse et in
reliquum perseuerare creditur, qui primordia fouere sentitur. indicamus autem
fauore diuino, cum ad regni culmina perueniremus, omnia nobis sic felicia, sic
tranquilla cessisse, ut unum loqui crederes quod generalitas insonabat nec
putaretur humanum, quod tot uota ingentium populorum nihil probata sunt habere
contrarium. <3> Unde uos quoque praedicta conuenit imitari, ut Gothi Romanis
praebeant iusiurandum et Romani Gothis sacramento confirment se unanimiter regno
nostro esse deuotos, quatenus et nobis uestra sinceritas laudabiliter innotescat
et ad quietem uestram proficiat inuicem promissa concordia. eat inter uos
legalis missa tranquillitas: potior minori non sit infestus. habetote animum
pacatum, qui bellum non habetis externum, quia primum inde nobis placere
poteritis, si uobis hac ratione prospicitis.
VIII. VICTORINO VIRO VENERABILI, EPISCOPO ATHALARICUS REX.
<1> De fide atque constantia tales sunt commonendae personae, quae desideriis
humanis diuersa sorte quatiuntur. uos autem, quos sapientia firmos efficit et
mens religiosa consolidat, ad prouincialium potius conuenit adunationes animari,
quia iuste debitor fit alieni arbitrii, qui a pluribus meretur audiri.
quapropter salutantes ueneratione qua dignum est, quod uobis quidem maerorem
possit indicere, transitum gloriosae memoriae domni aui nostri cum dolore maximo
nuntiamus. <2> Sed inde potest uestra tristitia temperari, quia nos in sede
regni sui diuinitate propitia collocauit, ut in totum desiderio uestro non
uideatur ereptus, qui uobis consurgit in successione reparatus. fauete nunc
orationibus sacris nostris libenter auspiciis, ut rex caelestis humana nobis
regna confirmet, gentes externas atterat, peccata absoluat, consolidet et
conseruet propitius quod parentibus nostris dignatus est praestare gloriosis.
<3> Quapropter sanctitas uestra prouinciales cunctos ammoneat, ut inter se
habentes concordiam regno nostro per omnia debeant esse purissimi. cupimus enim
in subiectis fidem reperiri, quam larga possimus pietate munerari.
VIIII. TULUIN V. I. PATRICIO ATHALARICUS REX.
<1> Licet ad regendos populos idoneos efficiant, quos ad augustum culmen diuina
prouexerint — quando nec aetas impedit, ubi sese potentia caelestis infundit —,
tamen ad releuandam florentissimae nostrae aetatis sollicitudinem uisum est te
uirum prudentissimum conuenienter adhibere, quem constat etiam domni aui nostri
tractatibus iugiter et laudabiliter adhaesisse. quod si dignum fuit hoc illum
talem tantumque facere, quanto magis nobis conuenit solacium quaerere, quod pro
adulescentiae flore decenter adhuc possumus indigere! <2> Magna est enim
infinitaque prudentia, quam nemo sic assequitur, ut eam non necessarie et per
alios quaerere uideatur. senes ipsi consiliis sapientiam discunt et a maturis in
commune quaeritur quod pro omnium utilitate tractatur. solacium curarum
frequenter sibi adhibent maturi reges et hinc meliores aestimantur, si soli
omnia non praesumunt. quod si longaeui domini subiectorum ingeniis adiuuantur,
consulte relaxamus aetatis nostrae breues ferias, ut suis incrementis aucta
prosperius robustior ad imperii pondera sustinenda consurgat. <3> Atque ideo te
cum fauore diuino suggestu praesentalis patriciatus euehimus, ut pro re publica
nostra tractantem sedes celsa sublimet ne sententia salutaris, cui decet
humiliter pareri, a loco uideatur uenisse communi. hic est honor, qui et armis
conuenit et in pace resplendet: hunc illa diues Graecia, quae multa
gloriosissimo domno auo nostro debuit, gratificata persoluit: uelauit fortes
humeros chlamydum uestis, pinxit suras eius calceus iste Romanus et dignanter
uisus est accipere, quod se cognoscebat sumere per honorem. crescebat uisendi
studium eois populis heroam nostrum, dum nescio quo pacto in eo, qui bellicosus
creditur, ciuilia plus amantur. <4> Hac igitur honoris remuneratione contentus
pro exteris partibus indefessa deuotione laborauit et praestare cum suis
parentibus principi dignabatur obsequium, qui tantorum regum fuerat stirpe
procreatus. sic se magnorum beneficia semper extollunt, ut et quibus imperare
nequeunt, iura uenerationis imponant. diligunt crementi sui prouecti semper
auctorem et moralitatis iura nesciunt, qui beneficiis non tenentur. <5> Sed
longum est de eius gloria sufficienter loqui, quem singularem gentibus saecula
fecunda genuerunt. ipsius te labor instituit, ut nos minus laborare debeamus.
tecum pacis certa, tecum belli dubia conferebat et, quod apud sapientes reges
singulare munus est, ille sollicitus ad omnia secure tibi pectoris pandebat
arcana. tu tamen nullos responsis ludebas ambiguis. <6> Amasti in audiendo
patientiam, in suggestione ueritatem: saepe quae ad eum falso peruenerant, recti
studio corrigebas et, quod rarum confidentiae genus est, interdum resistebas
contra uota principis, sed pro opinione rectoris. patiebatur enim inuictus ille
proeliis pro sua fama superari et dulcis erat iusto principi rationabilis
contrarietas obsequentis. <7> Ama nunc sublimior iustitiam, quam seruiens
diligebas. ostende te illius esse discipulum, qui numquam laborauit in cassum:
iunctus Hamalo generi nobilissima tibi facta consocia. omne siquidem bonum regis
suadere debet affinitas. acturus es consueta prudentia, ut laude morum fastigium
contigisse uidearis excelsum. <8> Extat gentis Gothicae huius probitatis
exemplum: Gensimundus ille toto orbe cantabilis, solum armis filius factus,
tanta se Hamalis deuotione coniunxit, ut heredibus eorum curiosum exhibuerit
famulatum. quamuis ipse peteretur ad regnum, impendebat aliis meritum suum et
moderatissimus omnium quod ipsi conferri poterat, ille paruulis exhibebat. atque
ideo eum nostrorum fama concelebrat: uiuit semper relationibus, qui quandoque
moritura contempsit. sic quamdiu nomen superest Gothorum, fertur eius cunctorum
adtestatione praeconium. unde fas est de te meliora credere, quem nostri constat
generis affinitate gaudere.
X. SENATUI URBIS ROMAE ATHALARICUS REX.
<1> Habetis, patres conscripti, unde glorioso principi gratiam referre debeatis,
quando praecelso uiro Toluin et nostra affinitate fulgenti uestri ordinis
contulimus dignitatem. auctus est enim pacis genius de ferri radiantis ornatu
nec discincta iacet toga iam procinctualis effecta. ante uobis contulimus
honores, sed nunc ipsam ereximus dignitatem. per omnes est nimirum splendor
refusus, quem praesens potest habere patricius: quando illa est natura purissimi
luminis, quae relucet et proximis. <2> Sed quamuis sit uobis notissimus
candidatus, qui domni aui nostri tam claris ac diuturnis adhaesit obsequiis,
tamen iuuat illa repetere, quae constat ad institutoris eius gloriam pertinere.
<3> Primum, quod inter nationes eximium est, Gothorum nobilissima stirpe
gloriatur. qui mox inter parentes infantiam reliquit, statim rudes annos ad
sacri cubiculi secreta portauit, agens non ut aetas, sed ut locus potius
expetebat. nam licet omnia regum obsequia sub cautela peragenda sint, illic
tanto amplius timoris adquiritur, quanto proximus plus habetur. arduum nimis est
meruisse principis secretum, ubi si quid cognoscitur prodi, uel ab alio
formidatur. has procellas moderator sui sine offensione transmisit, carus
summatibus, collegis semper acceptus, ut iam tunc magnae felicitatis uideretur
esse praesagium gratiam meruisse cunctorum. <4> Cuius ut coepit aetas adulescere
tenerique anni in robustam gentis audaciam condurari, ad expeditionem directus
est Sirmensem: ut quod ab illo Martio uiro uerbis didicerat, in camporum
libertate monstraret. egit de Hunnis inter alios triumphum et emeritam laudem
primis congressibus auspicatus neci dedit Bulgares toto orbe terribiles. tales
mittunt nostra cunabula bellatores: sic paratae sunt manus, ubi exercetur
animus. nutritus in otioso seruitio laboriosos subegit et quod exercitatione non
didicit, uirtus prona compleuit. <5> Rediit subito ad principem ueteranus
egressus primaeuus, ut non pacatis obsequiis, sed armis semper studuisse
crederetur. hoc rimator ille actuum et bonorum remunerator inspiciens uigorem
illi regiae domus uirtutis contemplatione commisit, ut quem ingeniosum bella
probauerant, fortissimi regis consiliis misceretur, ad inuenienda subtilis, ad
implenda robustus, ad celanda cautissimus. egit locum merito publici secreti:
cum ipso proelia, cum ipso negotiorum aequabilia disponebat et in tantam se
similitudinem eius cogitationis adiunxerat, ut causis recognitis, quod ille
uelle poterat, iste sua sponte peragebat. defensorem omnium suis tractatibus
adiuuabat et ministrando consilium regebat ipse rectorem. <6> Ammonet etiam
expeditio Gallicana, ubi iam inter duces directus et prudentiam suam bellis et
pericula promptissimus ingerebat. Arelatus est ciuitas supra undas Rhodani
constituta, quae in orientis prospectum tabulatum pontem per nuncupati fluminis
dorsa transmittit. hunc et hostibus capere et nostris defendere necessarium
fuit. quapropter excitata sunt Gothorum Francorumque ualidissima ea tempestate
certamina. <7> Affuit illic dubiis rebus audacia candidati, ubi tanta cum globis
hostium concertatione pugnauit, ut et inimicos a suis desideriis amoueret et
uulnera factorum suorum signa susciperet: uulnera inquam, opinio inseparabilis,
sine assertore praeconium, propria lingua uirtutis, quae licet ad praesens
periculum ingerant, reliquum tamen uitae tempus exornant. eget enim
astipulatoribus corpus illaesum, quaerit alios, qui uisa diuulgent: de
fortitudine probata non ambigitur, quae tali testimonio comprobatur. conflictus
uirorum fortium mutua tela refluit nec semper tutus fuit, qui cum numeroso hoste
contendit. unius forsitan ictus sollerter eluditur: qui multis resistit, a parte
qua non credidit uulnus excipit: quae in tantum nunc sunt gloriosa, quantum tunc
habuere pericula. iuuat igitur fortissimi uiri narrare quietum felicitatis
exemplum, quia non est in duce perfecta laus asserere semper anxios labores. <8>
Mittitur igitur, Franco et Burgundio decertantibus, rursus ad Gallias tuendas,
ne quid aduersa manus praesumeret, quod noster exercitus impensis laboribus
uindicasset. adquisiuit rei publicae Romanae aliis contendentibus absque ulla
fatigatione prouinciam et factum est quietum commodum nostrum, ubi non habuimus
bellica contentione periculum: triumphus sine pugna, sine labore palma, sine
caede uictoria. tantum ergo eius gloriae debemus, quantum utilitatis accepimus:
quem et ille arbiter rerum largitione redituum iudicauit esse prosequendum, ut
ibi fieret dominus possessionum, ubi utilitati publicae procurauit augmentum.
<9> Aquileiensem quoque tempestatem inter eius prospera iure memoramus, quia
discrimina, dum feliciter cedunt, suauissimae memoriae sensum relinquunt. cum
uentis saeuientibus furentem pelagum spuma testaretur undarum, diu iactatum
nauigium tumens fluctus absorbuit, nullum relinquens forti uiro solacium nisi
tantum remigia brachiorum. tunc iste nautis pereuntibus cum caro pignore solus
euasit. <10> Ibi amor piissimi regis, ibi meritum probatum est periclitantis,
quando regnator ille uix litori constitutus, ut eum exitio praeualeret eripere,
undas iterum desiderabat intrare. tunc eius pericula formidauit, qui saluti
propriae timere nesciuit. <11> Nonno uobis, patres conscripti, asperis casibus
diuinitus uidetur exemptus, cui praesens parabatur euentus? hunc itaque uirum
bellis exercitatum, felicitate clarum, prudentia comprobatum, quod deo auspice
dictum sit, ad patriciatus praesentalis culmen eueximus. fauete nunc auspiciis
candidati et uiris nostris Libertatis atria reserate. conuenit gentem Romuleam
Martios uiros habere collegas.
XI. SENATUI URBIS ROMAE ATHALARICUS REX.
<1> Confide, patres conscripti, quod ad agendas optimo regi gratias omnium
uestrum studia debeant concitari, quando prouectum meum excogitatum noscitis pro
utilitate cunctorum. atque ideo alacriter excipiendum est, quod necessarie
fuisset optandum. omnibus quidem utile est iudicia principum sequi, sed ipse
facit propria, qui gratanter susceperit aliena. <2> Retinetis me senatus semper
fouisse coetum, sed nunc maxime, cum uestrum uideor intrare collegium. assumptio
dignitatis ordinis uestri nobis gratiam duplicauit, quando me inter eos esse
sentio, a quibus me amari posse confide. accedit etiam illud animi uestri
gratissimum pignus, quod patriciorum genius per nos constat erectus, quando nemo
gentilium in uobis putabit abiectum, quod in me respicit honoratum. <3> In
expetendis quoque honoribus apud gloriosae memoriae Theodericum principem regum
mea uobis saepe uota coniunxi, ut quadam praesentia talia uidear praemisisse, ad
quos me cum gratia decebat intrare. confidentius enim illud expetitur, ubi post
collata beneficia festinatur. saepe consules, saepe patricios, saepe praefectos
habita intercessione promoui, uobis inpetrare contendens, quod mihi ardue
potuissem optare. congaudete nunc, patres conscripti, meis auspiciis, qui
uestris faui semper honoribus. <4> Vultis scire, qua uos affectione complectar?
insertus stirpe regia uocabulum uobiscum uolui habere commune. uiuite deo
propitio securi et, quod est felicissimum suauitatis genus, exultate cum liberis
uestris. studete, sicut semper, praedicari moribus Romanis et bonorum actuum
famam sub alta quiete perquirite. interest nostrae gloriae, ut, quorum numerum
auximus, eos propitia diuinitate tueamur.
XII. ARATORI V. I. ATHALARICUS REX.
<1> Perfectionem necessariarum rerum completam esse iudicamus, si, quemammodum
eligendo uirum magnificum patricium armatae rei publicae parti prouidimus, ita
et de sociando ei litterarum peritissimo consulamus. decet enim tractatores
habere doctissimos, quibus potestas summa committitur, ut, nullo defectu
impediente meritorum, prouisa rei publicae utilitas explicetur. alii sunt
honores qui se ordinaria prouisione componunt: de generali autem securitate
sollicito talis associandus fuit, qui parem in suis studiis non haberet. <2>
Neque enim adhuc minus probatus agnosceris, licet primaeuus ueneris ad honores.
aduocationis te campus exercuit: te iudicii nostri culmen elegit. nam ita intra
te fuit quamuis ampla professio litterarum, ut tuum ibi consenescere non
pateremur ingenium. auspicatus es militem, cum implere potueris cognitorem, et
quamuis traheret te eloquentia pro defensione dicere, suadebat tamen aequitas
iudicanda proferre. probatum est, quid utilitatis habeat moribus armata
facundia. nam sicut perniciosum est doctos praua suadere, sic salutare munus
est, cum ueritatis terminos disertitudo nescit excedere. <3> Sed ut merita tua
exemplis potius laudabilibus asseramus, iuuat repetere pomposam legationem, quam
non communibus uerbis, sed torrenti eloquentiae flumine peregisti. directus enim
de partibus Dalmatiarum ad domnum auum nostrum sic necessitates prouincialium,
sic utilitates publicas allegabas, ut apud illum magna cautela sollicitum et
copiosus esses et fastidia non moueres. abundantia siquidem uerba cum suauissimo
lepore defluebant et cum finem faceres, adhuc dicere quaerebaris: delectando
mouendo implebas magis ueri oratoris nisum, cum iam causidici deseruisses
officium. <4> Genitoris quin etiam tui facundia et moribus adiuuaris, cuius te
eloquium instruere potuit, etiamsi libris ueterum non uacasses. erat enim, ut
scimus, egregie litteris eruditus. et ut aliquid studioso exquisitum dicere
uideamur, has primum, ut frequentior tradit opinio, Mercurius repertor artium
multarum uolatu Strymoniarum auium collegisse memoratur. <5> Nam et hodie grues,
qui classe consociant, alphabeti formas natura inbuente describunt: quem in
ordinem decorum redigens, uocalibus consonantibusque congruenter ammixtis, uiam
sensualem reperit, per quam alta petens ad penetralia prudentiae mens possit
uelocissima peruenire. hinc Helenus auctor Graecorum plura dixit eximie uirtutem
eius compositionemque subtilissima narratione describens, ut in ipso initio
possit agnosci magnarum copia litterarum. <6> Sed ut ad propositum redeamus,
paterno igitur exemplo ingenium extendisse credendus es, qui in Romano foro
eloquentiam non nutristi. o beatum magistrum felicissimumque discipulum, qui
affectuose didicit, quod aliis doctorum terror extorsit! <7> Romanum denique
eloquium non suis regionibus inuenisti et ibi te Tulliana lectio disertum
reddidit, ubi quondam Gallica lingua resonauit. ubi sunt, qui Latinas litteras
Romae, non etiam alibi asserunt esse discendas? euaserat Caecilius pondus
uerecundiae, si hunc prouectum saecula priora genuissent. soluta est quippe uis
illa sententiae: mittit et Liguria Tullios suos. <8> Cognosce quid ex meritis
tuis aestimauimus, quando te illius consilio uides esse sociatum, qui nostri
inperii tractat arcanum. hinc est quod te comitiis domesticorum illustratum isto
honore decoramus, ut merito maiora de nostris debeas sperare iudiciis, qui in te
adhuc meliora credimus inueniri. grande tibi negotium uides esse commissum:
quidquid egeris, generalitas sentit. nam qui potest in uniuersitate peccare,
gloriosus nimis est, si nescit excedere.
XIII. AMBROSIO V. I. QUAESTORI ATHALARICUS REX.
<1> Securus celsa conscendit, qui se in paulo minoribus approbauit et certo
procedit uestigio, qui gradatim desiderio potitur accepto. sine merito siquidem
remuneratum putatur omne quod subitum est nec inexplorati suspicionem refugit,
quod repente prouenerit. contra omnia deliberata robusta sunt et totum bonis
actibus optinuisse creditur, qui post documenta laudatae militiae promouetur.
<2> Dudum inter gymnasia litterarum adscitus ab illo inspectore meritorum, qui
iudiciis suis etiam futura praedicebat, priuatarum largitionum fascibus
praefuisti: honor, nisi ex te creuisset, exiguus, quem tu suscipiens patrocinium
meritorum ita gratia dominantis auxisti, ut tibi saepe committeretur quod
dignitas non habebat. quod si laudabile est uel mediocribus esse honoribus
parem, quanto praestantius uicisse moribus aulicam dignitatem. haec cum tu sub
tanto iudice laudata perageres, gratiam quoque loci alterius inuenisti. <3>
Dictationibus enim probaris adhibitus, cum sit offensionibus alter expulsus, et
ita suspensum honorem tuum sustinebat ingenium, ut palatio deesse non sineres
iudicem, cuius ad tempus abrogatam cognouimus dignitatem. non sunt imparia
tempora nostra transactis: habemus sequaces aemulosque priscorum. <4> Ecce
iterum ad quaesturam eminens euenit ingenio. redde nunc Plinium et sume
Traianum. habes magna quae dicas, si et tu simili oratione resplendeas. fama
temporum de legitima atque eloquenti iussione generatur. omnia si quidem bona
cumulat lingua diserta et quod a nobis praecipitur, gratia dictantis ornatur.
esto nobis ad bona suggerenda promptissimus et aduersum improbitatem male
praesumentium constanter erectus. dic etiam auribus nostris quod est omnino pro
nobis. bonus princeps ille est, cui licet pro iustitia loqui, et contra
tyrannicae feritatis indicium audire nolle constituta ueterum sanctionum. <5>
Renouamus certe dictum illud celeberrimum Traiani: sume dictationem, si bonus
fuero, pro re publica et me, si malus, pro re publica in me. sed uide quid a te
quaeramus, quando nec nobis aliquid iniustum licere permittimus. decreta ergo
nostra priscorum resonent constituta, quae tantam suauitatem laudis inueniunt,
quantum saporem uetustatis assumunt. <6> Praeiudicia, quae nos horremus, in
aliis non amamus. obligamus te certe generalitati, dum absolute praecipimus iura
seruari. quod ideo nunc dicimus, ut opportune omnibus in te consuluisse
uideamur. decet enim praemonere, ne te iam tardius post aliena pericula uideamur
uelle corrigere. bonorum exempla sequere et nobilitatis tuae memor incede. illi
digne ad uitia generis sui redeunt, qui contemptibili stirpe nascuntur. <7> His
igitur in bonum publicum praedictis per quintam feliciter indictionem quaesturae
tibi insignia deo praestante concedimus, honorem prudentium, fontem omnium
dignitatum, quando exinde procedit, quod indulgentiae nostrae largitate
manauerit. age ut, qui ad consilium nostrum adscisceris, prudentia cunctis et
grauitate praeminere noscaris. nam quid tibi conueniat, uides. uox legum
diceris, dum nos iura condamus. incumbe nunc probitati uel fidei, ut, sicut te
prior honor dignum fecit alteri, ita secundus tertiae faciat dignitati.
XIIII. SENATUI URBIS ROMAE ATHALARICUS REX.
<1> Accipite, patres conscripti, iudicium quod initia nostra protulerunt, quando
plus cogitantur omnino quae cauta sunt, quia talis subsecutio creditur, quale
primordium uenisse sentitur. nemo enim futurum putat esse diligentem, quem in
ipsa nouitate opinionis suae non uidet esse custodem. prouidus institutor hortum
suum fecundis nititur ornare plantariis, ut reddant fructus optatos, quae
sollicitis fuerant exculta laboribus: quanto magis regnum decet inter initia
pacis amoenitate componi, ne habere speciem agri uideatur inculti! <2> Et ideo
beneficiis nostris quasi quandam ianuam cogitauimus dare quaestorem, per quem
uenientium dignitatum culmina decenter exirent. sunt uobis certe de candidato
nota, quando et moderna, quae loquimur. nam cum transitum gloriosae memoriae
domni aui nostri subiectorum anxia corda lugerent — bonum quippe amissum dum
quaeritur, plus amatur —, per eum uobis et nostri auspicii et uestrae
securitatis optata patuerunt. intellegite, quali nos aequitate constringimus in
futuris, ut ipse uobis legum fieret custos, qui conseruandae iustitiae fuerat
promissor effectus. <3> Affuit mandatis regalibus eloquens et decorus orator,
permulcens etiam inspectus, quos gratissimos reddebat auditus. tales enim decet
esse aulicos uiros, ut naturae bona indicio frontis aperiant et possint agnosci
de moribus, cum uidentur. tacens enim plerumque despicabilis est, si eum tantum
lingua nobilitat: semper autem in honore manet, si, cuius est tranquillus
animus, eum quoque serenissimus commendet aspectus. hoc denique facto testamur
copiam nos habere prudentium, quando talis eligitur, qui ex utraque parte
laudetur. <4> Eloquentiae uero bona ineptum est in quaestore praedicare, cum ad
hoc specialiter probetur adscitus, ut opinionem temporum commendet qualitate
dictorum. aliis enim iudicibus prouinciarum committatur exactio, aliis priuati
aerarii custodia delegetur: hic autem aulicae famae insignia reponuntur, unde
per totum mundum opinio uulgata laudetur. quod uobis adeo, patres conscripti,
aestimauimus esse repetendum, ut tales nos quaerere credatis, quales et nostrae
laudi et uestrae securitati expediat inueniri. agnoscite, docti, bonum principis
uotum: confidite de beneficiis, qui litterarum probamini habere notitiam.
segnissimi est torpere, cum se ad prouectum cognoscat rerum dominos inuitasse.
<5> Quapropter, patres conscripti, illustrem Ambrosium quaesturae culmine
decoratum fauor uestrae benignitatis excipiat. de illo enim non debet dubitari,
qui a uestro ordine iam in prima dignitate meruit approbari.
XV. SENATUI URBIS ROMAE ATHALARICUS REX.
<1> Gratissimum nostro profitemur animo, quod gloriosi domni aui nostri
respondistis in episcopatus electione iudicio. oportebat enim arbitrio boni
principis oboediri, qui sapienti deliberatione pertractans, quamuis in aliena
religione, talem uisus est pontificem delegisse, ut nulli merito debeat
displicere, ut agnoscatis illum hoc optasse praecipue, quatenus bonis
sacerdotibus ecclesiarum omnium religio pullularet. recepistis itaque uirum et
diuina gratia probabiliter institutum et regali examinatione laudatum. <2>
Nullus adhuc pristina contentione teneatur. pudoren non habet uicti, cuius uotum
contingit a principe superari. ille quim immo suum efficit, qui eum sub puritate
dilexerit. nam quae sit causa doloris, quando hoc et in isto reperit, quod
alteri in partem ductus optauit? ciuica sunt ista certamina, pugna sine ferro,
rixa sine odio: clamoribus, non doloribus res ista peragitur. nam etsi persona
summota sit, nihil tamen a fidelibus amittitur, cum optatum sacerdotium
possidetur. <3> Quapropter redeunte legato uestro inlustri uiro Publiano
rationabile duximus ad coetum uestrum salutationis apices destinare. magna enim
iucunditate perfruimur, quotiens cum nostris proceribus uerba miscemus. et hoc
quoque suauissimum uobis minime dubitamus, si quod illius fecistis imperio,
nobis etiam cognoscitis esse gratiosum.
XVI. OPILIONI COMITI SACRARUM ATHALARICUS REX.
<1> Solent quidem uenientes ad aulicas dignitates diutina exploratione
trutinari, ne imperiale iudicium aliquid probare uideatur ambiguum, quando
gloria regni est reperisse iudices exquisitos. sed tam frequens est familiae
uestrae felicissimus prouectus, tam in multis personis declarata prudentia, ut
licet aliquis uos eligat ad subitum, nihil fecisse uideatur incertum.
similitudinem suorum felix uena custodit, quando pudet delinquere, qui similia
nequeunt in sui genere reperire. <2> Hinc est, quod melius agnoscitur elegisse
nobilem quam fecisse felicem: quia iste commonitus per ueterum se facta
custodit, ille exemplum non habet nisi quod fecerit. quapropter secure tibi
credimus, quod totiens tuo generi commissum fuisse gaudemus. pater his fascibus
praefuit: sed et frater eadem resplenduit claritate. ipsa quodammodo dignitas in
penatibus uestris larem posuit et domesticum factum est publicum decus. <3> Nam
militiae ordinem sub fraterna laude didicisti, cui mutuo conexus affectu
implebas laboribus socium et consiliorum participatione germanum, ad te potius
pertinere diiudicans quod frater acceperat. hoc baculo reclinabatur ille
felicior, astu quaedam neglegens praesumptione tui, quia per te omnia cernebat
impleri. <4> En dulce fratrum obsequium et praesentium temporum antiqua
concordia. bene talibus sensibus iudicium creditur, qui seruare mores
naturaliter sentiuntur. quod si amoeni recessus et prouinciale otium forte
libuissent, ad te cateruae causantium et anxia currebant uota laesorum. boni
iudicis inter eos assumebas officium ut futurorum quodam urgente praesagio, quod
a nobis accipere poteras, meritorum assumptione peragebas. <5> Meminimus etiam,
qua nobis in primordiis regni nostri deuotione seruieris, quando maxime
necessarium fidelium habetur obsequium. nam cum post transitum diuae memoriae
domni aui nostri anxia populorum uota trepidarent et de tanti regni adhuc
incerto herede subiectorum se corda perfunderent, auspicia nostra Liguribus
felix portitor nuntiasti et sapientiae tuae allocutione firmati maerorem, quem
de occasu conceperant, ortu nostri imperii in gaudia commutabant. innouatio
regis sine aliqua confusione transiuit et sollicitudo tua praestitit, quod nos
nullus offendit. <6> Atque ideo probato talibus institutis ab indictione
feliciter sexta sacrarum largitionum comitiuam propitia tibi diuinitate
concedimus. usurus es omnibus priuilegiis atque emolumentis, quae ad tuos
decessores pertinuisse noscuntur: absit enim, ut aliqua calumniae machinatione
quatiantur qui actionis suae firmitate consistunt. fuit enim tempus, cum per
delatores uexarentur et iudices. deponite iam formidinem, qui non habetis
errorem: fructibus uestrarum utimini dignitatum: nam quod uobis per decessores
prodecessoresque uestros temporibus domni aui nostri consuetudo longa dedit,
indulgentia quoque nostra custodit. <7> Conferimus tibi honorem germani: sed tu
fidem eius imitare seruitii. nam si illum sequeris, multos laude praecedis,
uirum auctoritatis maximae, probatae constantiae, qui sub tanto principe et sine
culpa paruit et iudicia laudatus exercuit. promptum est enim aestimare quid
egerit, quando sub ingrato successore palatinum officium praeconia eius tacere
non potuit. difficile non est itaque moribus sequi posse germanum, quia et in
conuersationis fructu plerumque consentiunt, qui unius semine procreantur.
XVII. SENATUI URBIS ROMAE ATHALARICUS REX.
<1> Tanta est, patres conscripti, in candidato copia meritorum, ut uereamur, ne
tardius putetur electus quam non sit iudicio comprobatus. nam cum diuae memoriae
auus noster optimos uiros exquireret, nobis eum inremuneratum prosperior fortuna
seruauit. illi paruit, illi multa officiositate seruiuit et a domino largissimo
beneficiorum sine aliqua retributione constat esse derelictum. credo dilata est
compensatio meriti, ut nobis aptior fieret causa praestandi: congenimat enim se
pietas nostra lege naturae. condignum est ab herede solui, quod collatum constat
auctori. cur enim munificentia nostra eum differret, cum eum proficere
consuetudo suae nobilitatis urgeret? <2> Pater huic manu clarus ac summa fuit
morum nobilitate conspicuus, quem nec feruentia bella respuerunt et tranquilla
otia praedicarent, corpore ualidus, amicitia robustus aeui antiquitatem
gestabat, abiectis saeculis Odouacris ditatus claris honoribus. his temporibus
habitus est eximius, cum princeps non esset erectus. <3> Sed quid antiquam
parentum eius repetimus nobilitatem, cum uicina resplendeat luce germani? cuius
non dicam proximitati, sed uel amicitiae coniunctum fuisse potest esse
laudabile. huius uirtutibus ita se sociauit atque conexuit, ut hoc potius sit
incertum, qui magis praedicetur ex altero. <4> Amicitiis ille praestat fidem:
sed magnam promissis debet iste constantiam. ille quoque auaritia uacuus: et
iste a cupiditate probatur alienus. hinc est quod norunt regibus seruare fidem,
quia nesciunt uel inter aequales exercere perfidiam. ibi enim mores facilius
probantur, ubi natura sub libertate monstratur. quomodo ergo sub puritate non
seruiant dominis, qui nesciunt illusisse collegis? <5> His laudibus electus a
coniuge Basilianae sociatus fertur esse familiae, quod plerumque uenit a meritis
coniungi posse nobilibus. inspicite in eo, si placet, etiam familiarem uitam,
quia saepius maioribus uestris uiros industrios haec signa prodiderunt. res huic
priuata tanta fuit moderatione disposita, ut nec aliqua tenacitate sorderet nec
iterum nimia effusione laberetur. <6> Gentiles uictu, Romanos sibi iudiciis
obligabat et unde ingratitudo dignitatibus plerumque uenit, iste disceptando
sibi amicitias colligebat. uidete quid faciat nobilis natura. ex iudicibus natus
arbitrum agebat, quod nisi ex morum probitate nulla potest contingere ratione.
nam fascibus oboedire plerumque potestatis necessitas cogit: priuato iudici
parere sola sententiarum probitas facit. unde nobis plus laudis uidetur habere
uoluntarius iudex, quando ad audientiam non eligitur nisi qui iustus esse
moribus aestimatur. <7> Quapropter, patres conscripti, fauete uestris alumnis et
nostris fauete iudiciis. secundo ad uestram curiam uenit, qui et ex senatore
natus est et aulicis dignitatibus probatur honoratus.
XVIII. FIDELI V. I. QUAESTORI ATHALARICUS REX.
<1> Professionem constat esse iustitiae legum peritos iudices ordinare, quia uix
potest neglegere qui nouit aequitatem nec facile erroris uitio sordescit, quem
doctrina purgauerit. dudum te forensibus negotiis insudantem oculus imperialis
aspexit, nec latere potuit, qua fide suscepta peregeris, qua luculentia tractata
peroraris. <2> Aequo gradu eloquentia tua atque conscientia pariter incedebant:
nullus susceptus quod amplius desideraret habuit: nullus iudicum quod in te
corrigere posset inuenit. accessit enim uenustas oris et castitas animi: iuuenem
te solus decor ostendit: ab ore primaeuo cana uerba manauerunt. contendit flos
aetatis et maturitas mentis: sed potius illa superauit, quae nos ad uirtutum
gradus gloriamque perducit. <3> Quapropter aptamus munera nomini et meritis
tuis, ut arcana regia Fidelis accipias et uir eloquens litteratam reperias
dignitatem. nunc causas gloriose iudica, quas laudabiliter perorabas: assideat
tibi propria et exercitata doctrina. modo est felix et certa condicio
negotiorum, quando ille sententiam dicit, qui non potest ignorare quod legit.
non enim decet iudicem ministrum esse uoluntatis alterius, ut magis alteri
pareat, cui tot milites obsecundant. certe si in aliis utcumque tolerandum,
nimis in quaestore pudendum est, ut qui eligitur ad principis consilium,
solacium expectet alienum. <4> Et ideo, quod deo auspice dictum sit, per sextam
indictionem quaesturae tibi conferimus dignitatem. sed tuus honor imperitis
opprobrium est. nam sicut conscientia laeta est, quae prouehitur meritis, ita
sub reatu iacet, qui se imparem cognoscit muneribus consecutis. habes priscos
uiros, quos te deceat imitari. praecede fama quem sequeris dignitate. <5> Nam si
te priuata uita uirtutibus exercuit, quanto melius prouecta declarabit?
sumpsisti nomen ex meritis: custodi, ut semper laeteris ueritate uocabuli. nam
cum omnis appellatio ad declarandas res uideatur imposita, nimis absurdum est
portare nomen alienum et aliud dici quam possit in moribus inueniri. uerum haec
bonae conscientiae dicta sufficiant, quia dubitari de illo creditur, qui
plurimis ammonetur.
XVIIII. SENATUI URBIS ROMAE ATHALARICUS REX.
<1> Licet coetus uester genuino splendore semper irradietur, clarior tamen
redditur quotiens augetur lumine dignitatum. nam caelum ipsum stellis
copiosissimis plus refulget et de numerosa pulchritudine mirabilem intuentibus
reddit decorem. naturae siquidem insitum est, ut bonorum copia plus delectet.
prata denique floribus pinguntur innumeris: laudatur pinguis arui densior seges.
antiquitas uos fecerit nobiles haberi: nos senatum uolumus etiam de numerositate
praedicari. <2> Hinc est quod uobis aggregare cupimus quem repererimus ubicumque
praecipuum. nam licet apud uos seminarium sit senatus, tamen et de nostra
indulgentia nascitur, qui uestris coetibus applicetur. alumnos cunctae uobis
pariunt aulicae dignitates, quaestura autem uere mater senatoris est, quoniam ex
prudentia uenit. quid enim dignius, quam curiae participem fieri qui adhaesit
consilio principali? sed quia prudenti uiro generaliter non sufficit conclusa
laudatio, eius nota propriaque tangamus. <3> Quaestorem nostrum, patres
conscripti, cognoscite eloquentia prius exercitata placuisse et sic aduocationis
suae crebras egisse uictorias, ut merito sibi eum electio triumphalis asciuerit,
quatenus palmis felicibus inauguratus nobis daret omina laurearum. ad forense
gymnasium prima aetate deductus studuit semper integritati mentis et nobilissimo
pudore castitatem corporis sub nimio labore transegit. <4> Orator facundus,
grauissimus patronus susceptas causas suis praeconiis adiuuabat, quando credi
non poterat negotium inprobabile, cui talis uidebatur assistere. nonne
praetermittere hunc uirum esset publicum damnum? quid enim aut nobis aut uobis
esse debet acceptius quam nostro coniungi lateri, qui inter leges meruit
approbari? amare namque eas potest, per quas doctus enituit, dum affectat
unusquisque gloriam suam nec obliuisci potest animus, ex qua nobis fuerit parte
sociatus. <5> Creditis forte, principes uiri, nouam in hunc imparatamque
apparuisse prudentiam? origo eius hereditarias sibi litteras uindicauit, cuius
pater ita in Mediolanensi foro resplenduit, ut et trino fratrum et Tulliano
cespite pullularet. proinde quamuis sit uel inter mediocres difficillimum
placendi genus, tamen aduocationis laudem inter primarios eloquentiae frequenter
meruit inuenire. is contra magnum Olybrium stetit, is palmarii Eugenetis linguae
ubertate suffecit, et illis par extitit, quos singulares Roma cognouit. <6> Quid
enim generosius quam tot litterarum proceres habuisse maiores? nam si
inueteratae et per genus ductae diuitiae nobiles faciunt, multo magis
praestantior est, cuius origo thesauris prudentiae locuples inuenitur.
quapropter, patres conscripti, fauete nostro iudicio ac suis meritis candidato:
quando si collegae manum clementiae porrigitis, uos potius subleuatis.
XX. AVIENO V. I. PPO ATHALARICUS REX.
<1> Assertio meritorum est potuisse eligi post improbitatem iudicis accusati,
quando excessus praecendentium non corrigitur, nisi cum successor optimus
inuenitur. contrariis rebus plerumque medicina succedit, nam, dum calor uitalis
adhibitus fuerit, frigus pestiferum tunc recedit. nubila ipsa uentorum
spiratione terguntur et aquilo faciem caeli tranquillam reddit, quam australis
aura turbauit. sic nos decessorem tuum summouimus amore generalitatis, ut tu
saluberrimus aduenires. <2> Contraria prioribus imitare et laudanda peregisti.
ille calumniis odiosus: tu stude, ut iustitia reddaris acceptus. rapax ille: tu
continens. bonorum omnium breuis est definitio uitare quae fecit, quando illa
uere laudanda sunt, quae suo iudicio non probauit. respice denique in illo odium
publicum, et tu amorem affectare cunctorum. tanti tuis moribus gratias agant,
quanti illius acerbitatem actionis accusant. animare igitur dedecore
praecedentis, quando post illum professae malitiae uirum uel a malis abstinuisse
laudandus es. nam quale erit, si beneficia prouinciis tribuas quae hactenus non
habebant? bonum insolitum plus amatur et sequenti gaudio confert dulcedinem
temporum praemissa tristitia. <3> Atque ideo praefecturae tibi fasces per sextam
feliciter indictionem deo auxiliante conferimus, quae quanto fuit hactenus
laesione terribilis, tanta nunc habere debet beneficia lenitatis, siquidem
sauciata cura tua refouenda sunt. non tuis, non alienis manibus quisquam
grauetur. nam ultra omnes impietates est nocere laesos, qui sanare creditur
uulneratos. redeat ad nomen antiquum praefectura illa praetorii toto orbe
laudabilis: cuius si principium quaeramus, per Ioseph a beneficiis inchoauit.
nec inmerito a legibus nostris pater prouinciarum, pater etiam praedicatur
imperii, quia sic iuste, sic prouide agi uoluerunt, ut non districtum iudicis
nomen, sed uocabulum illi pietatis imponerent. <4> Iustis ac debitis compendiis
nostrum per te crescat aerarium. lucra rennuimus, quae legum cauta profanant:
pecunias illas uolumus, quibus libra iustitiae suffragatur. aedes nostras
nequitiam non patimur introire, quia nec priuatim intromittere possumus quam
publica uoce damnamus. <5> Audite, iudices, quid amemus, nolite aliud in malum
publicum suspicari. nam cui uos per iniquas prouisiones creditis esse
placituros, cum nos cognoscatis sola illa diligere, quae possunt iustitiae
monitis conuenire? uestris iam moribus peccatis, si post ista delinquitis. sed
illi forte talia gesserint, qui ad dignitates suis parentibus incognitas
peruenerunt: tu post patris praefecturam laudabilem aliquid quod melius
praedicetur adiunge, quia diligentior semper debet esse qui sequitur, dum bona
parentum probabiliter et imitari cupimus et uincere festinamus. <6> Accedit
etiam tuis laudibus, quod dictis prudentum probaris imbutus. graue est sapienti
offendere, ubi alterum reperit incidisse. ius forte praetereat, qui iura
nesciuit: totum a te legitimum quaeritur, cuius origo indocta fuisse nescitur.
aequales tibi sunt libri ueterum et actiones parentum. praesta opinioni tuae,
praesta nostro iudicio, ut impar non sis meritis quorum aequasti per nostra
beneficia dignitates.
XXI. CYPRIANO V. I. PATRICIO ATHALARICUS REX.
<1> Licet propriis frequenter honoribus et germani tui fueris dignitate
laudatus, tamen, quia natura bonorum non expenditur cum refertur, quasi ad
indictum reuertimur, de quo iam praeconia multa sonuerunt. testificatum est de
te, quicquid de fidelibus, quicquid debuit de bene meritis aestimari. sed digne
laudum cum uoluerit nouitates emittit, qui se actionis probitate compleuit. <2>
Natura perennis fontis est gloriae uena manabilis: nam sicut ille fluendo non
expenditur, sic nec ista celebri sermone siccatur. quod et si transacta
taceantur, tu noua probaris suggerere quae dicantur, qui cum aetate crescis
semper et meritis. cursus annorum laudis tibi procurat augmentum. senescis
quidem corpore, sed laude iuuenescis. merito tibi prolixior aetas optatur, in
quo fama semper robustior inuenitur. <3> Habuisti sub diuae memoriae auo nostro
in utraque parte laudatas semper excubias. uidit te adhuc gentilis Danuuius
bellatorem: non te terruit Bulgarum globus, qui etiam nostris erat praesumptione
certaminis obstaturus. peculiare tibi fuit et renitentes barbaros aggredi et
conuersos terrore sectari. sic uictoriam Gothorum non tam numero quam labore
iuuisti. <4> Postea uero, quod non minus ipsis certaminibus fuit, referendarii
officium laboriosis contentionibus exhibebas. fuerunt enim apud illum uirtutum
omnium uirum exercitualia uel pacata seruitia. quis enim non ageret bellum, qui
illi potuit competens exhibere responsum? qui tantam firmitatem animi semper
exegit, tantam uerborum in asserenda ueritate constantiam, ut merito se uicisse
diceret hostem, qui illo praesente uitare ualuisset errorem. hinc fuit, quod
eius obsequia reddiderunt prudentes, quia cautela semper adhibita erigit sensum
et, dum culpam quis formidet incurrere, sapientibus se nititur aggregare. <5>
Contulit etiam dignitatem sacrarum largitionum, hoc est laborum tuorum
aptissimum munus, quam sic casta, sic moderata mente peregisti, ut maiora tibi
deberi faceres, quamuis eam in magna praemia suscepisses. per haec te florida
iuuentus exercuit, sed nostris temporibus aetas matura seruauit. consilio quidem
plurimum uales, nec fractus tamen aetate cognosceris: sic enim adeptus es
senectutis bona, ut eius non subires incommoda. haec sunt quae in te aestimamus
augenda, ut, sicut es conscientia praeditus, reddaris quoque honore reuerendus.
<6> Sunt enim beneficiis nostris consentanea in te et superna iudicia, quando
talium filiorum pater effectus natura ipsa uideris esse patricius. quorum bona
uernantia non est absurdum referri, quando educantium felicior laus est de
filiorum probitate laudari. primum, quod non minimae laudis praestat initium,
infantia eorum est nota palatio. sic fetus tui, more aquilae se probantes,
regales oculos ab ipsis paene cunabulis pertulerunt. relucent etiam gratia
gentili nec cessant armorum imbui fortibus institutis. <7> Pueri stirpis Romanae
nostra lingua loquuntur, eximie indicantes exhibere se nobis futuram fidem,
quorum iam uidentur affectasse sermonem. habemus, unde tibi, felix pater,
praemium debeat referri, qui et filiorum tuorum nobis animos optulisti.
quapropter multis laboribus multaque fide et constantia comprobato patriciatus
tibi deo auspice conferimus dignitatem, honorem quidem celsum, sed qui tuis
meritis probetur aequalis. fruere igitur probatissimis institutis, ut cum tu
bona geminaueris, nostris iterum beneficiis augearis.
XXII. SENATUI URBIS ROMAE ATHALARICUS REX.
<1> Si fauore uestro dignus est, qui uel semel regale potuit impetrare iudicium,
quid, patres conscripti, uir magnificus merebitur Cyprianus, qui uobis totiens
gratior debet effici, quotiens a nobis dignitates acceperit? certantes in stadio
numerosior corona glorificat, Olympicos currus frequens palma nobilitat: sic uel
in leuibus rebus gloriosior efficitur, cui frequenter praemia conferuntur. de
primo denique prouectu potest esse cunctatio, dum multi fallunt principis
animum, quando facile est illudere, cui semper uotum est praestitisse: sed talem
mentis exhibuit constantiam, tantum bonorum habuit propositum, ut semper in se
prouocauerit regium munus. <2> Haec est certa gloria, haec indubitata sententia
frequenter potuisse mereri, per quod homines constat ornari. hos etiam intrare
in uestram curiam decet, qui ad primos honores non expendunt meritum suum, sed
cum magna susceperint, iterum maiora promerentur. ornant quoque tales et nostra
iudicia, quando bene prius electus creditur, qui saepius approbatur. natura ipsa
boni adhibita perseuerantia pretiatur, quia minus est laudanda incipere quam
bonorum propositum custodire. <3> Similes habuistis olim, patres conscripti,
Decios, similes uetustas praedicat fuisse Coruinos. neque enim hic uir, de quo
nobis sermo est, nostrum sibi tantummodo conciliauit arbitrium. ab uno quippe
principe prouehi uidetur forte gratiosum: nam et sub altero meruisse prouectum
apud utrosque integrum constat fuisse iudicium. cunctos ergo sequaces habet, qui
aliquid ex ueritate decernit. <4> Hunc prouectus sui auctorem meruit, ut nos
augmentatores dignissime reperiret. ille in eum fundamenta posuit honorum, nos
culmen construximus dignitatum. et ideo, patres conscripti, tot laboribus, tot
laudibus clarificato illustri uiro Cypriano suggestum quoque patriciatus
addidimus, ne maior esset meritis suis quam honoribus nostris. fauete nunc
collegae quem saepe decorastis extranei. securus ad uos redit, qui iam honores
suos in Libertatis aula reposuit. <5> Habet etiam, unde uobis reddatur
acceptior, quando tales curiae uestrae alumnos protulit, de quibus quamuis
auidus pater tamen propria uota superauit, non infantia trepidos, non ad
respondendum, ut licebat, ignaros: uariis linguis loquuntur egregie, maturis
uiris communione miscentur. sic cum nobis noti sunt, in ipso aetatis primordio
adulescentiam transierunt. praestet diuina maiestas, ut, sicut de patre eorum
munificentiae nomen extulimus, sic et in eis pietatis nostrae titulos augeamus.
XXIII. BERGANTINO V. I. COMITI PATRIMONII ATHALARICUS REX.
<1> Licet munificentiam regis cotidie deceat cum sole relucere et iugiter
aliquid facere, quo possit largitas principis apparere, hinc tamen conscientiae
debitum soluitur, quotiens parentibus sub aequitate praestatur. lucrantur
principes dona sua et hoc uere thesauris reponimus, quod famae commodis
applicamus. absit enim, ut negemus affini, quod solemus custodire subiectis:
quando qui nobis sanguine coniungitur, plus meretur nec fraudari potest proprio
desiderio, qui militat sub iudice gratioso. <2> Atque ideo illustrem
magnitudinem tuam praecelso atque amplissimo uiro Theodahado massas subter
annexas tot solidos pensitantes ex patrimonio quondam magnificae feminae matris
ipsius praecipimus reformari, eius feliciter dominio plenissime uindicandas,
cuius successionis integrum ius in ea qua praecipimus parte largimur. <3> De
cuius fide ac sinceritate praesumimus, ut sequenti tempore reliqua supra
memorati patrimonii cum adiecta quantitate mereatur. quid enim tali uiro negare
possimus, qui etiam meliora suis obtinere possit obsequiis, uel si non
probaretur affinis? uir quem nobilitatis suae nulla inflat elatio, modestia
humilis, prudentia semper aequalis quid a nobis mereatur, intendite, quando ad
gloriam nostram trahimus, quod eum proximum confitemur. <4> Quapropter
aequissimae iussioni operam nauanter impendite delectisque sedis uestrae
chartariis designatas massas actoribus eius sine aliqua dilatione contradite, ut
summa nobis caritate sociato gratia praesentis muneris reddatur acceptior.
XXIIII. CLERO ECCLESIAE ROMANAE ATHALARICUS REX.
<1> Tanto diuinitati plurima debemus, quanto a ceteris mortalibus maiora
suscipimus: nam quid simile rependat deo, qui potitur imperio? sed licet pro
tanto munere nihil compensari possit idonee, ipsi tamen gratia redditur, dum in
seruientibus honoratur. <2> Itaque flebili aditione causamini hoc fuisse longae
consuetudinis institutum, ut, si quis sacrosanctae Romanae ecclesiae seruientem
aliqua crederet actione pulsandum, ad supra dictae ciuitatis antistitem negotium
suum dicturus occurreret, ne clerus uester forensibus litibus profanatus,
officiis potius saecularibus occupetur: addentes diaconum quoque uestrum ad
contumeliam religionis tanta executionis acerbitate compulsum, ut saius eum
propriae custodiae crederet mancipandum. <3> Presbyterum quin etiam ecclesiae
Romanae pro leuibus causis asseritis criminaliter impetitum. quod nobis pro
ingenita reuerentia, quam nostro debemus auctori, displicuisse profitemur, ut,
qui pridem sacris meruerant inseruire mysteriis, conuentionibus inreuerenter
expositi nefariis iniuriis subiacerent. sed aliorum plectenda subreptio nobis
contulit plenissimae laudis euentum, ut causa contingeret praestandi, quae nos
caelestibus commendaret auxiliis. <4> Atque ideo considerantes et apostolicae
sedis honorem et consulentes desiderio supplicantum praesenti auctoritate
moderato ordine definimus, ut, si quispiam ad Romanum clerum aliquem pertinentem
in qualibet causa probabili crediderit actione pulsandum, ad beatissimi papae
iudicium prius conueniat audiendus, ut aut ipse inter utrosque more suae
sanctitatis cognoscat aut causam deleget aequitatis studio terminandam, et si
forte, quod credi nefas est, competens desiderium fuerit petitoris elusum, tunc
ad saecularia fora iurgaturus occurrat, quando suas petitiones probauerit a
supra dictae sedis praesule fuisse contemptas. <5> Quod si quis extiterit tam
improbus litigator atque omnium iudicio sacrilega mente damnatus, qui
reuerentiam tantae sedi exhibere contemnat et aliquid de nostris affatibus
crediderit promerendum, ante alicuius conuentionis effectum decem librarum auri
dispendio feriatur, quae a palatinis sacrarum largitionum protinus exactae per
manus saepe memorati antistitis pauperibus erogentur, carensque impetratis
negotii quoque sui amissione multetur. dignus est enim duplici poena percelli,
qui et diuinam reuerentiam et nostra iussa temerauit. <6> Sed item uos, quos
iudicia nostra uenerantur, ecclesiasticis uiuite constitutis. magnum scelus est
crimen admittere, quos nec conuersationem decet habere saecularem: professio
uestra uita caelestis est. nolite ad mortalium errores et humilia uota
descendere. mundani coerceantur humano iure, uos sanctis moribus oboedite.
XXV. IOHANNI V. S. REFERENDARIO ATHALARICUS REX.
<1> Valde dignum est in eis aliena seruare, quibus nos oportet propria dona
conferre. quid enim de illa munificentia possis ambigere, quando a nobis te
intellegis mereri, quod a nostris decessoribus accepisti? profitemur itaque
alterius quidem donum, sed nostrum esse iudicium et modernam principis mentem
praeuenisse tantum uelocissimam largitatem. <2> Hinc est quod diuae memoriae
auum nostrae clementiae domum in castro Lucullano positam, obsequiorum tuorum
sedulitate prouocatum, constat uoluisse largiri. cuius dispositionem secutus
patricius Tuluin posteaquam illi nostra est liberalitate concessa, praefatam
domum actu legitimo in tua optime iura transmisit. <3> Quapropter serenitas
nostra uel inchoatae uoluntatis desiderium uel Tuluin plenissimae donationis
effectum praesenti auctoritate corroboramus, ut saepe dicta domus patriciae
recordationis Agnelli in Lucullano castro posita cum omnibus ad se pertinentibus
in tua uel heredum tuorum possessione permaneat, et quicquid de hac facere
malueris, habebis liberam potestatem, cuiuslibet uel priuati uel publici nominis
posthac inquietudinem summouentes: ubi et si quid esset quolibet casu, qualibet
inquisitione fortassis ambiguum, huius auctoritatis nostrae iudicio constat
explosum. fruere iuuante deo rebus propriis ex nostra quoque auctoritate
solidatis. alii enim tibi iura legitima praestiterunt, nos possessionis quietem
et cunctis saeculis securam conferimus firmitatem. <4> Sed ne quis forsitan tam
egregiae uoluntatis nostrae inuidus temerator existat, iubemus eum qui ex hac re
quolibet tempore uel fisci nomine uel priuati mouere temptauerit aliquam
quaestionem, dare tibi, uel ad quem pertinere uolueris domum superius
designatam, poenae nomine auri libras tot et frustratum suis ausibus
infamatumque discedere. hunc enim uoluntatis suae meretur inuenire fructum, qui
aliquid contra nostrum uidetur quaesisse iudicium.
XXVI. UNIVERSIS REATINIS ET NURSINIS ATHALARICUS REX.
<1> Gloriosus domnus auus noster desideria uestra cognoscens Quidilanem Sibiae
filium priorem uobis quidem facere disponebat: sed quia interueniente mortali
condicione nequiuit cogitata complere, necesse nobis est eius uota perficere, ne
tantus uir de aliquo inaniter iudicaretur bona potuisse sentire. <2> Atque ideo
praesenti auctoritate praecipimus, ut eum priorem feliciter habere debeatis et
quae ordinauerit pro disciplina seruanda, ubi nostra maxime utilitas continetur,
in omnibus oboedire debeatis, quia sic domni aui nostri estis moribus instituti,
ut et leges libenter audiatis et iudices. <3> Hoc est enim, quod nostrum comit
imperium, quod opinionem uestram inter gentes amplificat, si talia geratis, quae
et nobis accepta et diuinitati possunt esse gratissima. robustius enim inimici
nostri uincuntur moribus bonis, quia quos superna protegunt, felices aduersarios
habere non possunt. pugnatis enim efficaciter foris, dum in sedibus uestris
iustitiam fouere contenditis. ita enim duo mutua se amplexatione consociant: qui
aequitatem coluerit, fructum uictoriae possidebit. <4> Nam quae necessitas ad
iniusta compellat, cum uos et sortes alant propriae et munera nostra domino
iuuante ditificent? nam et si cui aliquid expetendum est, speret de munificentia
principis quam de praesumptione uirtutis, quia uobis proficit, quod Romani
quieti sunt, qui, dum aeraria nostra ditant, uestra donatiua multiplicant.
XXVII. DUMERIT SAIONI ET FLORENTIANO VIRO DEVOTO COMITIANO ATHALARICUS REX.
<1> Seueritas publica sicut ab innocentibus uacat, ita necesse est, ut in
sceleratis operam suae districtionis impendat, quia non semper unum merentur
iudicium diuersa merita personarum. morbi ipsi dissimilibus sucis sanantur
herbarum: aliis cibi, aliis ferrum optatam reuocat sospitatem et pro qualitate
passionis praeceptum merentur artificis. <2> Et ideo deuotio uestra per
Fauentinum territorium incunctanter excurrat et, si quos Gothorum atque
Romanorum in direptionibus possessorum se miscuisse reppererit, secundum facti
aestimationem et damnis affligantur et poenis, quia grauius plectendi sunt qui
nec ammonitionibus iustis nec initiis principis oboediendum esse crediderunt,
quando maior ambitus est nouis dominis uelle seruire, ut commendati bonis
initiis reliquam uitam securitatis munere perfruantur.
XXVIII. CUNIGASTO V. I. ATHALARICUS REX.
<1> Permouit serenitatem nostram Constanti atque Venerii dolenda conquestio, qua
sibi a Tancane iuris proprii agellum, quod Fabricula nominatur, cum suo peculio
causantur ablatum, adicientes, ne rerum suarum repetitionibus imminerent,
liberis sibi condicionem ultimae seruitutis imponi. <2> Atque ideo magnitudo
tua, decretis obsecuta praesentibus, praefatum suo iubeat adesse iudicio, ubi
omni inter partes ueritate discussa iuri consentaneam et amicam uestris moribus
proferte iustitiam: quia sicut graue est de suo dominos iure decedere, ita
nostris est saeculis inimicum seruitutis iugo libera colla deprimere. <3>
Momenti iure si competunt, primitus reddantur inuasa, ita tamen, ut persona
legitima disceptationibus non desistat. cesset uiolenta praesumptio, ut causa
iudicis cognoscatur arbitrio et aut conuictos seruos cum rebus sibi
competentibus possideat aut probatos liberos indemnes atque integros
derelinquat. sufficit enim quod ei relaxamus poenam qui facere praesumpsit
iniuriam.
XXVIIII. HONORATIS POSSESSORIBUS ET CURIALIBUS PARMENSIS CIVITATIS ATHALARICUS
REX.
<1> Dignum est, ut libenti animo faciatis quae iuberi pro urbis uestrae
utilitate cognoscitis: nam quod proprio sumptu decuit aggredi, compendiose uobis
constat offerri. ciuitatem siquidem uestram diutina siccitate laborantem iuuante
deo domnus auus noster saluberrima unda rigauit. <2> Cui nunc studio uestro
cloacarum ora pandantur, ne, sordium obiectione tardata, reciprocans unda
uestris aedibus illidatur et quas debuit abluere, easdem uobis cogatur inferre.
cui operi, quamquam uos urgere debeat ciuicus amor, uirum spectabilem Genesium
praecipimus imminere, ut nos ad meliora prouocetis, si quae iussimus gratanter
efficitis.
XXX. GENESIO V. S. ATHALARICUS REX.
<1> Amore ciuitatis uestrae antiqui operis formam domnus quidem auus noster
regia largitate construxit. sed nihil prodest aquarum copias urbibus inmisisse,
nisi nunc prouideatur cloacarum opportuna digestio: more uitae humanae, cuius
ista salubritas continetur, si quod ore quis suscipit, alia parte corporis
relaxatus effuderit. <2> Et ideo sublimitas tua Parmenses municipes huic faciet
operi nauiter insistere, quatenus antiquos cuniculos siue subterraneos siue qui
iunguntur marginibus platearum diligenter emendent, ut cum sollemniter optatus
uobis liquor influxerit, nulla abiecti laetaminis obiectione tardetur: quia
gratiam unda non habet nisi quae iugiter influit et uisa semper abscedit. illa
enim quae pulchre riuis exercitata ridet, quam deformis est in lacunis: palus
enim nec uisu grata, nec iumentis accommoda. <3> Elementum pulcherrimum quidem,
sed cum in naturali puritate seruatur. sine hoc agri squalent, urbes anhela
siccitate fatigantur, ut merito antiqua prudentia quos a ciuica conuersatione
segregandos esse iudicauit, aquarum interdictione puniuerit. quapropter tam
utillimae rei omnium debet studere consensus, quia ciuis animum non habet, qui
urbis suae gratia non tenetur.
XXXI. SEVERO V. S. ATHALARICUS REX.
<1> Cum te praefectorum consiliis laudabiliter inhaerentem omnia didicisse
credamus, quae ad rei publicae statum pertinent componendum, maxime cognouisti
litteris eruditus pulchram esse faciem ciuitatum, quae populorum probantur
habere conuentum. sic enim et in illis splendet libertatis ornatus et nostris
ordinationibus necessarius seruit effectus. feris datum est agros siluasque
quaerere, hominibus autem focos patrios supra cuncta diligere. <2> Aues ipsae
gregatim uolant, quae innoxia uoluntate mitescunt: canori turdi amant sui
generis densitatem: strepentes sturni compares sequuntur indesinenter exercitus:
murmurantes palumbi proprias diligunt cohortes et quicquid ad simplicem pertinet
uitam, adunationis gratiam non refutat. <3> Contra animosi accipitres, aquilae
uenatrices et supra omnes alites acutius intuentes uolatus solitarios
concupiscunt, quia rapaces insidiae innoxia conuenticula non requirunt. ambiunt
enim aliquid soli agere, qui praedam cum altero non desiderant inuenire. sic
mortalium uoluntas plerumque detestabilis est, quae conspectum hominum probatur
effugere, nec potest de illo aliquid boni ueraciter credi, cuius uitae testis
non potest inueniri. <4> Redeant possessores et curiales Bruttii: in ciuitatibus
suis coloni sunt, qui agros iugiter colunt. patiantur se a rusticitate diuisos,
quibus et honores dedimus et actiones publicas probabili aestimatione
commisimus, in ea praesertim regione, ubi affatim ueniunt inelaboratae deliciae:
<5> Ceres ibi multa fecunditate luxuriat: Pallas etiam non minima largitate
congaudet: plana rident pascuis fecundis, erecta uindemiis: abundat multifariis
animalium gregibus, sed equinis maxime gloriatur armentis: merito, quando
ardenti tempore tale est uernum siluarum, ut nec muscarum aculeis animalia
fatigentur et herbarum semper uirentium satietatibus expleantur. uideas per
cacumina montium riuos ire purissimos et quasi ex edito profluant, sic per
Alpium summa decurrunt. additur, quod utroque latere copiosa marina possidet
frequentatione commercia, ut et propriis fructibus affluenter exuberet et
peregrino penu uicinitate litorum compleatur. uiuunt illic rustici epulis
urbanorum, mediocres autem abundantia praepotentum, ut nec minima ibi fortuna
copiis probetur excepta. <6> Hanc ergo prouinciam ciuitatibus nolunt incolere,
quam uel in agris suis se fatentur omnino diligere? quid prodest tantos uiros
latere litteris defaecatos? pueri liberalium scholarum conuentum quaerunt et mox
foro potuerint esse digni, statim incipiunt agresti habitatione nesciri:
proficiunt, ut dediscant: erudiuntur, ut neglegant et cum agros diligunt, se
amare non norunt. quaerat eruditus, ubi possit existere gloriosus: prudens
frequentiam non respuat hominum, in qua se nouit esse laudandum. alioquin
uirtutibus fama tollitur, si earum merita in hominibus nesciantur. <7> Nam quale
desiderium est ciuium frequentiam deserere, cum aliquas quoque auium
conuersationi humanae se uideant uelle miscere? mortalium enim penatibus
fiducialiter nidos philomena suspendit et inter commanentium turbas pullos
nutrit intrepida. foedum ergo nimis est nobili filios in desolationibus educare,
cum frequentationi humanae uideat alites sua pignora commisisse. redeant igitur
ciuitates in pristinum decus: nullus amoenitatem ruris praeponat moenibus
antiquorum. <8> Quomodo potest in pace refugi, pro qua oportet bellum, ne
uastetur, assumi? cui enim minus grata nobilium uideatur occursio? cui non
affectuosum sit cum paribus miscere sermonem, forum petere, honestas artes
inuisere, causas proprias legibus expedire, interdum Palamediacis calculis
occupari, ad balneas ire cum sociis, prandia mutuis apparatibus exhibere? caret
profecto omnibus his, qui uitam suam uult semper habere cum famulis. <9> Sed ne
ulterius in eandem consuetudinem mens aliter inbuta relabatur, datis
fideiussoribus tam possessores quam curiales sub aestimatione uirium poena
interposita promittant anni parte maiore in ciuitatibus se manere, quas habitare
delegerint. sic fit, ut eis nec ornatus desit ciuium nec uoluptas denegetur
agrorum.
XXXII. SEVERO V. S. ATHALARICUS REX.
<1> Cum Nymphadius u. s. pro causis suis ad comitatum sacratissimum festinaret,
itineris longinquitate confectus, animalia fessa reparare contendens, ad fontem
Arethusae in Scyllacino territorio constitutae elegit ponere mansionem, eo quod
ipsa loca et pasturarum ubertate fecunda sint et aquarum inundatione
pulchrescant. est enim, ut dicitur, sub pede collium supra maris harenam
fertilis campus, ubi fons uastus egrediens cannis cingentibus in coronae speciem
riparum suarum ora contexit, amoenus admodum et harundineis umbris et aquarum
ipsarum uirtute mirabilis. <2> Nam cum ibi tacitus homo et studiose silentiosus
aduenerit, aquas fontis irrigui reperit sic quietas, ut in morem stagni non tam
currere quam stare uideantur. at ubi concrepans tussis emissa fuerit aut sermo
clarior fortasse sonuerit, nescio qua ui statim aquae ibidem concitatae
prosiliunt: os illud gurgitis ebullire uideas grauiter excitatum, ut putes aquam
rigentem succensae ollae suscepisse feruorum: silenti homini tacita, loquenti
strepitu et fragore respondens, ut stupescas sic subito perturbatam, quam nullus
tactus exagitat. <3> Noua uis, inaudita proprietas aquas uoce hominum commoueri,
et, quasi appellatae respondeant ita hominum sermonibus prouocatae, nescio quid
inmurmurant. credas ibi aliquod animal prostratum somno quiescere, quod
excitatum magno tibi strepore respondeat. legitur quidem nonnullos fontium
uariis scaturrire miraculis, ut aliqui potati animalibus reddant uarium colorem,
alter greges albos efficiat, quidam in saxeam duritiam suscepta ligna
conuertant. sed has causas nulla ratio comprehendit, quia supra intellectum
humanum esse cognoscitur quod tantum rebus naturalibus applicatur. <4> Sed ut ad
querellam supplicantis cito redeamus, hic cum mansionem supradictus Nymphadius
habuisset, insidiis rusticorum abactos sibi asserit caballos: quod temporum
nostrorum habere non decet disciplinam, ut delectatio illius loci tali damno
redderetur horribilis. quod uiuacitatem tuam diligenti censemus examinatione
discutere, quae et de palatio nostro auctoritatem et de legibus uisa est
iustitiam collegisse, ut more ipsius fontis scelus quod actum est uidearis
ulcisci. <5> Perquirantur fures summo silentio, teneantur in suis laribus
quieti, dum, mox ut executor increpuerit, eorum corda turbentur, in uoces
prosiliant et se terribili murmuratione confundant. sic aquas suas omina sibi
iudicent dedisse poenarum. sit ergo in eis competens uindicta, ut loca sint
peruia: inuitet posita disciplina studium commeantium, ne latronum excessibus
uitetur tale miraculum, quod semper laetificare cognoscitur inquisitum.
XXXIII. SEVERO V. S. ATHALARICUS REX.
<1> Sicut incognita uelle nosse prudentis est, ita comperta dissimulare dementia
est, eo praesertim tempore, cum noxia res ad correctionem possit celerrimam
peruenire. frequenti siquidem probatione didicimus Lucaniae conuentu qui prisca
superstitione Leucothea nomen accepit, quod ibi sit aqua nimio candore
perspicua, praesumptionibus illicitis rusticorum facultates negotiantium hostili
direptione saepe laceratas, ut qui ad natale sancti Cypriani religiosissime
uenerant peragendum mercimoniisque suis faciem ciuilitatis ornare, egentes
turpiter inanesque discederent. <2> Hoc nos simplici ac facili remedio
credidimus corrigendum, ut spectabilitas uestra praedicto tempore una cum
possessoribus atque conductoribus diuersarum massarum, quietem conuenientium
anticipata debeat cautela procurare, ne atrocis facti reos inueniat, quos poena
consumat. quod si aliquis rusticorum uel cuiuslibet loci homo causa nefandae
litis aduenerit, inter ipsa initia comprehensus fustuariae subdatur protinus
ultioni et pompatus mala uota corrigat, qui prius occultum facinus excitare
temptabat. <3> Est enim conuentus iste et nimia celebritate festiuus et
circumiectis prouinciis ualde proficuus. quicquid enim praecipuum aut
industriosa mittit Campania aut opulenti Bruttii aut Calabri peculiosi aut Apuli
idonei uel ipsa potest habere prouincia, in ornatum pulcherrimae illius
uenalitatis exponitur, ut merito tam ingentem copiam iudices de multis
regionibus aggregatam. uideas enim illic conlucere pulcherrimis stationibus
latissimos campos et de amoenis frondibus intextas subito momentaneas domos,
populorum cantantium laetantiumque discursum. <4> Ubi licet non conspicias
operam moenium, uideas tamen opinatissimae ciuitatis ornatum. praesto sunt pueri
ac puellae diuerso sexu atque aetate conspicui, quos non fecit captiuitas esse
sub pretio, sed libertas: hos merito parentes uendunt, quoniam de ipsa
famulatione proficiunt. dubium quippe non est seruos posse meliorari, qui de
labore agrorum ad urbana seruitia transferuntur. quid uestes referam innumera
uarietate discretas? quid diuersi generis animalia nitere pinguissima? ubi tali
cuncta taxatione proponuntur, ut quamlibet emptor fastidiosissimus inuitetur.
sic de illo commercio nemo ingratus redit, si cuncta probabilis disciplina
componit. <5> Est enim et locus ipse camporum amoenitate distensus: suburbanum
quoddam Consilinatis antiquissimae ciuitatis, qui a conditore sanctorum fontium
Marcellianum nomen accepit. hic erumpit aquarum perspicua et dulcis ubertas, ubi
in modum naturalis antri apsidis fabricata concauitas sic perspicuos liquores
emanat, ut uacuum putes lacum, quem non dubitas esse plenissimum. hic perlucidus
usque ad fundum patet, ut aspectibus tuis aerem potius apparere iudices, non
liquorem. aemulatur serenum diem aqua subtilissima, nam quicquid in imo geritur,
inoffensa oculis claritate monstratur. <6> Conludunt illic gregatim laetissimi
pisces, qui ad manus pascentium sic intrepidi ueniunt, tamquam se nouerint non
esse capiendos: nam qui tale aliquid praesumpsit efficere, mox poenam
diuinitatis cognoscitur excepisse. longa sunt illius fontis memoranda
describere. ueniamus ad illud singulare munus sanctumque miraculum. <7> Nam cum
die sacratae noctis precem baptismatis coeperit sacerdos effundere et de ore
sancto sermonum fontes emanare, mox in altum unda prosiliens aquas suas non per
meatus solitos dirigit, sed in altitudinem cumulumque transmittit. erigitur
brutum elementum sponte sua et quadam deuotione sollemni praeparat se miraculis,
ut sanctificatio maiestatis possit ostendi. nam cum fons ipse quinque gradus
tegat eosque tantum sub tranquillitate possideat, aliis duobus cernitur
crescere, quos numquam praeter illud tempus cognoscitur occupare. magnum
stupendumque miraculum fluenta labentia sic ad humanos sermones uel stare uel
crescere, ut eis credas audiendi studium minime defuisse. <8> Fiat omnium
sermone uenerabilis fons iste caelestis: habeat et Lucania Iordanem suum. ille
exemplum baptismatis praestitit, hic sacrum mysterium annua deuotione custodit.
quapropter et reuerentia loci et utilitas rei dare debet populis sanctissimam
pacem, quia cunctorum iudicio sceleratissimus habendus est, qui talium dierum
gaudia temerare contendet. relegantur populis et proponantur ista quae diximus,
ut cum inulta esse minime creduntur, excedendi licentia non quaeratur.
LIBER NONUS.
I. HILDERICO REGI VVANDALORUM ATHALARICUS REX.
<1> Durissima nimis sorte constringimur, ut quos ante dulces parentes diximus,
nunc eis causas amarissimas imputemus, quas nemo potest relinquere, qui pietatis
noscitur monimenta cogitare. quis enim nesciat diuae recordationis Amalafridam,
generis nostri decus egregium, uiolentum apud uos reperisse lucis occasum, et
quam pridem habuistis dominam, passi non estis uiuere nec priuatam? haec si
contra fas parentelae grauis esse uidebatur, remitti ad nos debuit honorabilis,
quam magnis supplicationibus expetistis. parricidii genus est, ut quam uobis
fecerat affinem coniunctio regis, nefandis ausibus in eius uos interitum
misceretis. <2> Quid tantum mali a suo coniuge relicta promeruit? si successio
debebatur alteri, numquid femina in eo ambitu potuit inueniri? mater quin immo
haberi debuit, quae uobis regna transfudit. nam et hoc nobilitati uestrae
fuisset adiectum, si inter Hasdingorum stirpem retinuissetis Hamali sanguinis
purpuream dignitatem. hoc Gothi nostri ad suum potius opprobrium intellegunt
fuisse temptatum. nam qui dominae alienae gentis intulit necem, omnino eius
parentum uisus est despexisse uirtutem, quando nemo quod resecandum credit,
putat esse temptandum. <3> Et ideo morali ratione commoniti per illum et illum
legatos nostros uerbis prius a uobis expetimus aequitatem, spectantes qualis
excusatio tantis casibus afferatur. nam etsi quodlibet negotium in tali persona
fuisset enatum, nobis debuit intimari, ut et nostro iudicio periret, quae se
pessimis actibus miscuisset. restat ut naturalis eius fingatur occasus.
inpossibilia non dicimus, noua non quaerimus: illum et illum atque illum
tradite, per quos res facta debeat elucere. sit in eis totius causae absoluta
probatio, sine bello, sine caede, aut nos efficiat placatos, aut uos reddat
obnoxios. <4> Quod si creditis esse temnendum nec uos ad rationabilia responsa
componitis, condicione initae pacis absoluimur, qui laesi foederis uinculo non
tenemur. uindicet nunc superna maiestas scelus qualibet arte commissum, quae ad
se clamare profitetur fraterni sanguinis impiam caedem.
II. EDICTUM. ATHALARICUS REX.
<1> Qui rei publicae statum et generale cupit stare fastigium, ad uniuersa debet
esse sollicitus, quia non est salus in corpore, nisi quam et membra potuerint
optinere. iniuria unius loci compago tota concutitur et tanta conuenientiae uis
est, ut unum uulnus ubique credas accipi, quando illa coeperit condolere. res
publica siquidem non est unius ciuitatis cura, sed totius regni prouisa
custodia: quapropter si quid ex ipsa minuitur, in origine dispendia sentiuntur.
minus enim habere necesse est, cui aliquid perit. et ideo diuersarum ciuitatum
peruigil nos cura sollicitat, ne permissa longius mala possint grauare palatia.
arbor enim, quam florere uides, quam summa conspicis uiriditate laetari,
subterraneo suco fecunditatis animatur, reddens in superficiem quod continet in
radice. hominum quoque uultus magna hilaritate decoratur, si uisceribus sanis
grauamen nullius sentiat laesionis. sic regnum iure dicitur integerrimum, si
nusquam fuerit inminutum. hoc fieri potest, cum undique summouetur effrenata
licentia nec datur ausus menti malignae sub abominabili libertate peccare.
curiales, quibus a prouida sollicitudine nomen est, grauissima dicuntur
infestatione quassari, ut quicquid eis honoris causa delegatur, ad iniuriam
potius uideatur esse perductum. o nefarium scelus, importabile malum! quando
debuit rei publicae seruiendo proficere, tunc libertatem suam cum fortunis
uidetur amittere. <2> Quocirca edictali programmate definimus, ut si quis
uersatus fuerit aut in iniuria aut in dispendio curialis uel aliquid ei,
praeterquam iussum fuerit a nobis uel ab aulicis quorum interest potestatibus,
imponere fortasse praesumpserit, aut decem librarum auri dispendio feriatur,
ipsi qui aliquid tale pertulit nihilominus profuturarum, aut, si facultas
uindictae non sufficit, per fustuaria supplicia laceretur, et reddat debitum
poenis, quod non potuit compensare pecuniis, ita tamen, ut, quae pro publica
utilitate fuerint delegata, ingenua sollicitudine compleantur, quando plus
incipiunt debere, quos alienas iniquitates non permittimus sustinere. <3>
Praedia curialium, unde maxime mediocribus parantur insidiae, nullus illicita
emptione peruadat, quia contractus dici non potest, nisi qui de legibus uenit.
circa saionum et militantum molestias iudicum protegantur auxilio. ab ipsis
quoque moderatoribus eos nostra uindicabit auctoritas, quando grauius plectendus
est, si ille, cui delegatur auxilium, probetur inferre detrimentum. <4> Erigite
colla, depressi: subleuate animos, malorum sarcinis ingrauati: date studium
recuperare quae uos male cognoscitis amisisse. unicuique ciui urbs sua res
publica est. administrate ciuitatum sub consentanea uoluntate iustitiam. ordines
uestri aequabiliter uiuant. nolite grauare mediocres, ne uos merito possint
opprimere potiores. poena ista peccati est, ut unusquisque in se recipere possit
quod in alterum proteruus exercuit. uiuite iuste, uiuite continenter, quia uix
audet quisquam in illos excedere, quibus culpas non potest inuenire. <5> Grues
moralem nouerunt exercere concordiam, inter quas nullus primatus quaeritur, quia
iniquitatis ambitus non habetur. uigilant uicissim, communi se cautela
custodiunt, ipse pastus alternus est. sic honor nullis adimitur, dum omnia sub
communione seruantur. his etiam uolatus uicaria aequalitate disponitur: ultima
fit prima et quae primatum tenuit, esse posterior non recusat. sic quadam
communione sociatae sibi sine regibus obsequuntur, sine dominatu parent, sine
terrore famulantur. uoluntarie seruiendo liberae sunt et inuicem se diligendo
muniuntur. quarum morem scriptores rerum naturalium contuentes politiam quandam
inter ipsas esse commemorant, quas ciuico affectu uiuere cognouerunt. <6> Has si
uos imitemini, omnes a uobis prauitatum calumnias excludetis. nam uos, qui recti
uota recipitis, habetis per leges potestatem in ciuibus uestris. non enim in
cassum uobis curiam concessit antiquitas, non inaniter appellauit minorem
senatum, neruos quoque uocitans ac uiscera ciuitatum. quid in ista appellatione
non habeatis uel potentiae uel honoris? nam qui senatui comparatur, a nullo
genio claritatis excluditur.
III. BERGANTINO V. I. COMITI PATRIMONII ATHALARICUS REX.
<1> Si labor omnis assiduus adeo diuersos exigit fructus, ut aurum argentumque
solita commutatione mercetur, cur non ipsa diligenter exquirimus, propter quae
alia poscere uidebamur? Italia diues inferat nobis et aureos fructus. omnis
prouentus adquiritur, ubi metallum fuluidum reperitur. nam quid necesse est
terram multiplici fecunditate lassari, si ipsa magis pretia in ea potuerint
inueniri? frumenta nobis usualiter natura industria suffragante concedit: passim
se uina profundunt: metallum raro proditur, ut studiosius expetatur. <2>
Quapropter ad massam iuris nostri Rusticianam in Bruttiorum prouincia
constitutam magnitudinem tuam iubemus chartarium destinare et si, ut ab artifice
harum rerum Theodoro dicitur, memoratis rebus terra fecunda est, officinis
sollemniter institutis montium uiscera perquirantur: intretur beneficio artis in
penetrale telluris et uelut in thesauris suis natura locuples inquiratur.
cameris enim ingeniosa praesumptione reuolutis, talpinum animal imitantes,
itinera fodiunt quae nullis ante patuerunt. sic ambitio nil relinquit
absconditum nec ubi interdum sustinere possit extremum. <3> Intrant homines
caligines profundas, uiuunt sine superis, exulant a sole et, dum sub terris
compendia quaerunt, nonnunquam lucis gaudia derelinquunt. est illis aliquando
ruina uia sua et reditus procurare nequeunt, qui pedibus suis semitas operosis
manibus effecerunt. sed quibus cautior ars, uita felicior est, intrant egentes,
exeunt opulenti: sine furto diuitias rapiunt, optatis thesauris sine inuidia
perfruuntur et soli sunt hominum qui absque ulla nundinatione pretia uideantur
adquirere. mox enim ut supernae luci fuerint restituti, minuta quaeque grauiora
discernentibus aquis a genetrice terra separant ac fictilibus recondita uasta
fornace decoquunt, donec soluantur utiliter in liquorem, riuosque de flamma
uenientes tanto igne depurgant, quousque pulchritudinem sui prodant, quam
terrena uiscera, ne cuperentur, absconderant. <4> Vincitur natura, dum eam
meliorat industria. pulchrior est dum arserit, potior dum decoxerit, quia tantum
crescit ad pretia, quanta fuerit sinceritate mundata. origo quidem nobilis, sed
de flamma suscipit uim coloris, ut magis credas inde nasci, cuius similitudine
uidetur ornari. sed cum auro tribuat splendidum ruborem, argento confert
albissimam lucem, ut mirum sit unam substantiam tradere, quod rebus dissimilibus
possit aptari. proinde quicquid ad exercendam huius artis peritiam pertinere
cognoscitis, ordinatio uestra perficiat, ut et terra Bruttiorum ex se tributum
quod dare possit inueniat, quae fructibus copiosa luxuriat. decet enim ut inter
tanta bona nec illa desint quae putantur esse praecipua. cur enim iaceat sine
usu, quod honestum potest esse compendium? <5> Aurum si quidem per bella
quaerere nefas est, per maria periculum, per falsitates opprobrium, in sua uero
natura iustitia. honesta sunt lucra per quae nemo laeditur et bene adquiritur
quod a nullis adhuc dominis abrogatur. grypes aurum iugiter leguntur effodere
atque huius metalli inspectione gaudere: quibus quoniam non est ambitus lucri,
cupiditatis crimine non dicuntur accendi, scilicet, quia omnis actus in
qualitate propositi est et non est uituperandum quod nulla fuerit uoluntate
lasciuum. sint ergo sedula operatione continui quaestus, inuidiam non pauescant:
quod ars dicitur, a crimine liberatur.
IIII. ABUNDANTIO PPO ATHALARICUS REX.
<1> Felix querella est, quando leges pietate superantur, et beata condicio
subiectorum, si cognoscant illum aliis misertum, quem et sibi optant esse
propitium. neque enim ob aliud curiales leges sacratissimae ligauerunt, nisi ut,
cum illos soli principes absoluerent, indulgentiae praeconia reperirent, hoc
est, ubi dominus aduersum sua iudicia amabili concertatione dissentit, quando et
ipsius quaedam iustitia est, ut qui pius dicitur, districtionis termino minime
teneatur. nam et iste quidam rationabilis ordo est militia tandem soluere, qui
inpares laboribus probantur existere. curialis enim, si nulla ualitudine
corporis continetur, ad solas deceptiones apponitur, et adesse quid proderit, si
eum contingat defectum uiribus inueniri? similis quippe est absenti, a quo non
poterint imperata compleri. deinde dum curia multiplici numerositate laetetur,
non uidetur perculsa damnis paucos perdidisse de plurimis. <2> Quapropter
illustris magnificentia tua Agenantiam uxorem Campaniani uiri disertissimi in
Lucania prouincia constitutam filiosque eorum de albo curiae suae faciat
diligenter abradi, ut uentura posteritas nesciat fuisse quod uetatur obicere,
quia calumnia non praesumitur, ubi aliqua probatio non habetur. proinde in
possessorum numero potius collocentur passuri nihilominus molestias quas ipsi
aliis ingerebant. <3> Ad tributa enim solita turbabuntur: faciem compulsoris
horrebunt ‚ a potestatibus iussa prius uenisse nesciebant ‚, et uotiua
ignorantia fatigati formidare delegata incipient per quae antea timebantur. nam
et ex ea parte bonis moribus uixisse probandi sunt, quando patiuntur inter illos
otiosi uiuere, quorum se non cognoscunt odia meruisse. alioquin non paterentur
sub illis esse, quos se cognoscebant malis actibus incitasse. fruantur ergo
beneficio principali: uiuant remissa pace tranquilli, qui fuerunt in actionum
suarum qualitate compositi.
V. EPISCOPIS ET HONORATIS ATHALARICUS REX.
<1> Possessorum territorii uestri querella comperimus supra temporis
necessitatem quorundam ciuium suorum execrabilem sustinere saeuitiam, dum primo
tempore panicii speciem coemptam in propriam recondidere substantiam spectantes
caritatem mediocribus grauem, ut parcius reponentibus detestabilem inferant
nuditatem, quando homines in famis periculo constituti rogantes offerunt quos se
spoliare posse cognoscunt. in necessitate siquidem penuriae pretii nulla
contentio est, dum patitur quis induci, ne possit aliqua tarditate percelli. <2>
Haec igitur uota damnantes praesentes direximus portitores, ut siue in gradu
siue in aliis locis frumentorum condita potuerint inuenire, tantum sibi
unusquisque dominus uel familiae suae retineat, quantum se expendere posse
cognoscit, reliquum periclitantibus uendat, praesentibus scilicet harum gerulis,
qui ad eam rem destinati esse noscuntur, moderata tamen pretii quantitate, qua
eum constiterit a suis prouincialibus comparasse, ut nec nimium grauetur qui
emit et aliquo compendio foueatur ille qui distrahit. <3> Quapropter libentibus
animis implete quae iussa sunt, quia uobis debetis inuicem in hac parte
consulere, ne, dum caritatem nimiam quaeritis, scelestum uobis aliquid potius,
quod absit, optetis. ne quis ergo uenditionem sibi inpositam conqueratur, sciat
libertatem in crimine non requiri, sed illud boni ingenii magis esse, si non
festinet excedere. uendat itaque sub iusta ratione qui distrahit. si consentit,
operatur laudem suam: si discrepat, nostrum facit esse praeconium, quando bonum
est iubentis, si iustitia imponatur inuitis.
VI. PRIMISCRINIO ATHALARICUS REX.
<1> Cum diuturnis laboribus excubares, ita te inbecillitate corporis asseris
grauiter sauciatum, ut nec ad famam militiae percipiendam possis occurrere, ad
quam constat uoto te praecipiti festinasse, metuens ne per absentiam tui ab
ipsis paene faucibus dulcissimus tibi fructus uideatur auferri, postulans etiam
ut, algentis corporis necessitate constrictus, Baiani lauacri siccitate laxeris.
<2> Dignum plane quod inter praemia summa praestemus, ut, sicut conferimus
uictis spem, ita tribuamus supplicantibus et salutem. quapropter et a uinculo te
emolumenticii terroris absoluimus et praedicti lauacri munere subleuamus, ut
primum mentis gaudio recreatus facilius membrorum recipias sospitatem. naturalis
siquidem cura est aegris dare laetitiam: nam fac inualidum gaudere, sanatus est.
<3> Perge igitur ad amoenos recessus: perge ad solem, ut ita dixerim, clariorem:
ubi salubritate aeris temperata terris blandior est natura. illic miraculis alta
cogitatione perpensis cum arcanis mundi mens humana colloquitur nec admirari
desinit quae ibi agi posse cognoscit: primum Nerei fluenta marinis deliciis esse
completa, tot portus naturae prudentia terrenis sinibus intermissos, tot insulas
nobiles amplexu pelagi dotatas: deinde inmissum Auerno stagneum mare, ubi ad
uoluptatem hominum uita regitur ostreorum, industriaque mortalium fieri, ut res
alibi fortuita ibi semper appareat copiosa. <4> Quantis ibi molibus marini
termini decenter inuasi sunt! quantis spatiis in uisceribus aequoris terra
promota est! dextra laeuaque greges piscium ludunt. claudantur alibi
industriosis parietibus copiosae deliciae: captiui teneantur aquatiles greges:
hic ubique sub libertate uiuaria sunt. adde quod tam amoena est suscepta
piscatio, ut ante epulosum conuiuium intuentium pascat aspectum. magnum est enim
gaudium desiderata cepisse: sed in huiusmodi rebus gratior est plerumque
amoenitas oculi quam utilitas captionis. <5> Sed ne longius euagemur, inter
Neptunias gazas habitare creditur, cui otia Baiana praestantur. his itaque rebus
deliciosa exercitatione saginati ad pulcherrima lauacra contenditis, quae sunt
et miraculis plena et salutis qualitate pretiosa. nam etsi hominum cura
fabricata noscuntur, naturalibus certe ministeriis exhibentur. fornaces ibi non
robora conuecta succendunt: cessante flamma perpetuus calor operatur: illic
globi fumiferi nesciuntur: aura est purissima, quae ministrat uapores, sudores
prouocat dulciter anhelos: et tantum a communibus balneis salubrior inuenitur,
quantum ab humana industria celsior est natura. uideas illic undas perpetuis
fumare gurgitibus, quae ita uidentur lauantum explere desideria, ut humano
credas studio temperatas. <6> Cedat corallici pelagi laudata semper opinio:
adsurgat Indici maris de albarum candore fama locupletior. quid mihi cum
pretiis, si animus non fruatur optatis? baianis litoribus nil potest esse
praestantius, ubi contingit et dulcissimis deliciis uesci et impretiabili munere
sanitatis expleri. fruere igitur bonis nihilominus expetitis: nostris beneficiis
ad tua emolumenta peruenies: Baianis remediis consequere rem salutis.
VII. REPARATO PRAEFECTO URBIS ATHALARICUS REX.
<1> Post parentum claras administrationes bene conferuntur posteris
eminentissimae dignitates, dum nullius adquiescit ingenium iacere intra
aestimationem suorum, quando quidam honestus ambitus est quos sequimur tempore,
uelle praeconiis anteire. additur etiam, quod priscorum dogmatibus eruditi
opinionis gratia delectentur augeri. nam quanto se unusquisque melioribus
cognoscit artibus studuisse, tanto amplius grandiora praesumit appetere. <2>
Dudum itaque illustris recordationis genitoris tui res publica sensit Romana
diligentiam. comitiuae siquidem largitionum praesidens, functus etiam uicibus
praefectorum, praetorianam egit integerrime dignitatem, curiam reparans,
pauperibus ablata restituens et quamuis liberalibus studiis fuerit impolitus,
placere non omisit industriis, quando naturaliter per se commendari potest bonum
ingenium, etiam cum rebus accidentibus non uidetur ornatum. <3> Sed hoc quantum
est ad tuarum notitiam litterarum? doctrina si quidem quos ab imperitis
discernit, sapientibus amica societate coniungit, cui perfacile est ornare
generosum, quae etiam ex obscuro nobilem facit. crescit quoque praeclaris
meritis tuis, quod in affinitatis gratiam te talis elegit, quem semper contigit
de iudicii sui integritate praedicari, moribus communis, conscientia singularis,
qui se semper suis moribus et amicorum conuersatione et sua fecit probitate
laudari. qualem ergo suo sanguini aestimandus est sociasse, qui numquam inprobum
uel communioni suae decreuit adiungere. <4> Et ideo licet primaeuus uenias ad
honorem, post tanti uiri iudicium ineptum est te dicere non probatum. nam si
bene illis suggerentibus in extraneis causis placidas aures praebemus, cur magis
in genere suo eorum iudicia non sequamur, ubi semper studiose sibi prospiciunt
etiam qui in aliis actibus frequenter excedunt? atque ideo, quod feliciter
dictum sit, per indictionem illam urbanae tibi tribuimus infulas dignitatis, ut,
sicut in illo ordine primus, ita habearis et meritorum laude praecipuus. <5>
Paene siquidem terrarum oculis offertur quod in illa ciuitate peragitur. quem
iam sibi iudex placatum faciat, si illum senatum tantae benignitatis offendat?
quid sit maturitatis, quid prudentiae, in ordinis ipsius aestimatione cognoscis,
cuius primaeua germina mox ut adoleuerint, patres uocantur. adulescentia illic
inchoat a maturitate consilii: tractant iuuenes cum modestia senum: ibi morum
pondus in flore praemittitur, quod uix alibi cana aetate generatur. <6> Talem te
ergo habita moderatione tractabis, ut cum tot proceres ad curiam uocas, dignam
ante illos sententiam tuae uoluntatis aperias. nimis quippe arduum est aliquid
tale inter illos dicere, quod nequeat tantis prudentibus displicere. ideoque non
unius dignitatis uir aestimandus est, qui ab illa turba doctorum bonum potuit
referre iudicium. nam si gratum est uel sub raritate praedicari, quid illi
gaudii prouenire possit, quem tot nobilium uota laudauerint? iustitiam dilige:
oppressis te dignanter impende: redde laudes posteris tuis, quas tu a maioribus
accepisti.
VIII. OSUIN V. I. COMITI ATHALARICUS REX.
<1> Propositi nostri est honestos labores palma remunerationis ornare, ut
uicissitudine, qua prouecti gaudent, desides mordeantur sibique imputare possint
quod clementissimis temporibus iudicii nostri praemia non merentur. atque ideo
illustrem magnitudinem tuam deo iuuante ad Delmatiarum atque Sauiae prouincias
iterum credidimus destinandam, ut quicquid pro utilitatibus nostris esse
cognoscis, aequabili ordinatione disponas populumque nobis deuotum per tuam
iustitiam facias esse gratissimum, quia dominorum laudibus applicatur, cum se
probabiliter tractat electus. <2> Non exempla aliena perquiras: memor esto quae
feceris et non indiges ammoneri. quid est enim quod de tua quisquam debeat
actione dubitare, quando ipsis prouinciis adhuc propria bona redolere cognoscis?
quodam modo iam debitum est illi uelle praestare, apud quem te scis fuisse
laudabilem. oboedientibus enim iuste indulgetur animus et quos scimus memores
bonorum, indubitanter eis denuo praebemus affectum. <3> Aetas quidem tua
prouecta est, sed actus quoque maturior quid tibi nunc subripere ualeat, in quo
nec iuuentus reprehensibilis fuit? sed haec in domni aui nostri regno fecisti:
nunc talia demonstra, ut temporibus nostris reseruasse uidearis, quicquid
probitatis addideris.
VIIII. UNIVERSIS GOTHIS SIVE ROMANIS ATHALARICUS REX.
<1> Per prouincias nobis deo praestante concessas tales uiros cupimus destinare,
qui sunt armis praediti et iustitia gloriosi, ut absit a uobis et extranearum
gentium metus et calumniosis non pateatis insidiis, quia non minus est malum
bellicum uitasse quam saeua discussionis euadere. ipsa est enim uera securitas,
quae de nulla iudicis iniquitate formidat. atque ideo, quod deo auspice dictum
sit, illustrem comitem Osuin et palatio nostro clarum et prouinciis longa
conuersatione notissimum Dalmatiis decreuimus praesidere. cui pro utilitate
nostra iubenti parere procurate, quoniam tantam eius estis iustitiam frequenter
experti, ut et sine regia iussione ei deberetis priorum memores oboedire. habet
enim proprium ius ille qui iustus est: nam etsi terrore minime potestatis
erigitur, aequitate tamen suadente semper auditur. <2> Simul etiam et uirum
illustrem Seuerinum ad uos aestimauimus dirigendum, ut compositi consona
uoluntate possint uobis laudanda praecipere. nam si disparibus calamis conuenit
unum melos edicere, multo magis uiris prudentissimis aptum est iusta concordi
uoce suadere. <3> Verum ut primordia nostra a praestitis inchoarent
clementissimumque dominum in ipso regni limine sentiretis, per quartam
indictionem quod a uobis augmenti nomine quaerebatur, illustrem uirum comitem
patrimonii nostri nunc iussimus remouere. <4> Hoc etiam insuper uobis
concedentes, ut, cum deo propitio supra dictum uirum ad nostra obsequia uenire
fecerimus, tales homines destinate, per quos possimus euidenter agnoscere,
quemadmodum in futurum census doceatur impositus, ut, si grauatos uos esse
cognoscimus, pro parte nobis qua uisum fuerit considerata aequitate releuemus.
ita fit ut habeatis spem et futuri beneficii, qui estis iam pro parte remedia
consecuti. <5> Quapropter seruire uos conuenit utilitatibus nostris, quando ea
quae magis sperare precibus potuistis, ultro contulit munificentia principalis.
sic enim tradente clementissimo nobis auctore didicimus, ut a subiectorum
beneficiis non uacemus. disciplina uidelicet imperandi est amare quod multis
expedit, quoniam res publica nimium soliditatis accipit, si tributariorum
facultas inlaesa constiterit.
X. HONORATIS POSSESSORIBUS DEFENSORIBUS SYRACUSANAE CIVITATIS VEL UNIVERSIS
PROVINCIALIBUS ATHALARICUS REX.
<1> Dudum quidem uobis ortum nostri imperii aestimauimus nuntiandum: nunc decet
subsequi beneficium pro laetitia augenda cunctorum, ut, quibus fuit gratissimus
noster exortus, sit illis regalis animus in aliqua parte munificus. crescere
nobiscum deo praestante cuncta desideramus, quia ille uere noster est census,
quem laetus possessor exsoluit. <2> Proinde subtrahimus pecuniae quod
augmentetur gloriae et auari ad laudes profuse nitimur subleuare cultores.
pridem diuae memoriae domnus auus noster de suis beneficiis magna praesumens,
quia longa quies et culturam agris praestitit et populos ampliauit, intra
Siciliam prouinciam sub consueta prudentiae suae moderatione censum statuit
flagitari, ut uobis cresceret deuotio, quibus se facultas extenderat. sed illius
praedicanda iustitia locum nostrae benignitati praeparauit, ut, quod ei offerri
iuste potuit, nos clementi animo quasi illata stipendia donaremus: et quodam
praesagio mentis diuinae fecit etiam pium, cui parabat imperium. <3> Atque ideo
per quartam feliciter indictionem quicquid a uobis supra consuetudinariam
functionem augmenti nomine uel petebatur uel constat exactum, liberalitas nostra
concedit. quod etsi iuste potuistis pendere, gloriam uos potius nostrae
largitati iubemus inferre. <4> Sed ut latius extendatur nostra clementia
suauemque dominum impensis beneficiis sentiatis, quicquid a discussoribus noui
census per quintam indictionem probatur affixum, ad nostram eos fecimus deferre
notitiam, ut, quod rationabile fuerit aestimatum, libentibus animis perferatis,
quia nullum laedit obseruata iustitia. <5> Sed ne credatis pro ordinatorum
tantum arbitrio uos grauari, si quis est qui de eorum facto aestimat
conquerendum, ad remedia nostrae pietatis occurrat, ut iudicantes corrigamus,
qui etiam non rogati beneficia clementer indulsimus. nam et gloriosae
recordationis domnus auus noster de eorum commotus fuerat tarditate, ut erat
altae prudentiae perscrutator, aestimans eos tamdiu in prouincia non sine uestro
grauamine residere, quos repetita iussione censuerat iam redire. <6> Sed nos,
quos decet implere quicquid ille sub aequitate disposuit, deo auxiliante eius
nunc in uobis inchoata perficimus. reddite modo largitati nostrae prosperrimum
uotum et fidele seruitium. habetis principem, qui uobis cum beneficiis probatur
exortus et quod subiectis dulcius est, augetur ingenio beniuolo cum aetatis
augmento. in quam rem Quidilanem saionem nostrum credidimus dirigendum, per quem
uobis iussa prosperrima deo largiente pandantur.
XI. GILDILAE VIRO SUBLIMI COMITI SYRACUSANAE CIVITATIS ATHALARICUS REX.
<1> Ad Victorem et VVitigisclum spectabiles uiros Siciliae prouinciae censitores
praecepta nostra direximus, ut quicquid possessoribus tributariae functionis per
eos nuper uidetur adiectum, de quarta indictione non exigant, quia grauis est
eius rei illatio, cuius adhuc iustitia non probatur. <2> De ordinationibus uero
eorum nobis fecimus instructiones deferri, ut, si aestimatis uiribus sub
aequalitate sit dispositum, debeat permanere moderatum, sin uero aliquem contra
rationem constat esse praegrauatum, nostro releuetur arbitrio, ita tamen ut, si
aliquid per quartam indictionem probatur illatum, possessoribus sine aliqua
imminutione reddatur, quia sine querella suscipi debet onus impositum, quod
longis temporibus constat esse portandum. <3> Nunc quod restat, prouinciales uos
conuenit admonere, ut quibus beneficia dedimus, eorum deuotionem per omnia
sentiamus et quod debetur principi, grato animo uideatur exsolui.
XII. VICTORI ET VVITIGISCLO VV. SS. ATHALARICUS REX.
<1> Tarditas uestra apud gloriosae memoriae domnum auum nostrum merito uos fecit
esse suspectos, quos etiam secundis praeceptionibus credidit ammonendos, ut
relicto tandem prouincialium grauamine ad eius deberetis iustitiam festinare: et
nunc quoque suspicionis maxime fecit augmentum, ut nec ad initia nostra
uoluissetis occurrere, quod libera conscientia potuisset optare. <2> Et ideo
praesenti auctoritate censemus, ut, si quid super tributarium solidum per
quartam indictionem a prouincialibus exegistis, sine aliqua eis inminutione
reddatis, quia supra ueterem censum nulla indictionis praedictae eos uolumus
damna sentire. <3> Hoc etiam addendum esse credidimus ‚ quando amore clementiae
errores nolumus inuenire, ne coacti potius resecemus quod salua iustitia
dissimulare non possumus ‚ ut, si aliquem studio laesistis prauo, uestro magis
emendetis arbitrio, quia hoc est propria delicta corrigere quod et non facere.
<4> Et ne forsitan credatis longinquitatis difficultate latere quae gesta sunt,
Siculis fiduciam uos dedimus subsequendi. uidete nunc, si uoces possitis ferre
querulas, quas etiam nostra inuitauit auctoritas. ammonuimus igitur quos pios
decet: iam suo uitio uidetur accusari, qui spontanea noluit uoluntate recorrigi.
XIII. VVILIAE V. I. COMITI PATRIMONII ATHALARICUS REX.
<1> Magnitudinis tuae suggestione comperimus de domesticorum excessibus, qui
destinatis comitibus obsequuntur, prouinciales damnis plurimis ingrauatos: quod
credimus emolumentorum paruitate nutritum, quia sub quadam excusatione peccare
creditur, cui necessaria non praebentur. <2> Et ideo speciali beneficio
generalia compendia largientes magnitudini tuae praesenti auctoritate
praecipimus, ut supra ducentos solidos et decem annonas, quas hactenus
acceperunt, a quinta feliciter indictione quinquaginta eis solidos annuos
faciatis incunctanter adiungi, qui uestris rationibus debeant imputari, ut, dum
mater criminum necessitas tollitur, peccandi ambitus auferatur. <3> Si quis
autem iussionum nostrarum inprobus temerator exstiterit, ut aliquo casu in
damnis prouincialium aut praeiudiciis implicetur, emolumentis careat uniuersis,
quia ille dignus est praemia consequi, qui parere cognoscitur aequitati: ideo
enim a nobis accipit, ne ab aliis quaerat. nostrum dare nobilitas est: dona
regalia quamuis parua sublimant, quia simul et meritorum gratiam reperisse
creditur, qui principali munere subleuatur.
XIIII. GILDILAE VIRO SUBLIMI COMITI SYRACUSANAE CIVITATIS, ATHALARICUS REX.
<1> Prouincialium Siculorum nobis est suggestione declaratum quaedam a tua
potestate fieri, unde eorum fortunae uideantur affligi. quod ideo leuiter
accepimus, quia ipsi uindicari praeterita noluerunt. constat enim esse dubium,
quod concedit aduersarius: et percelli non potest iure, cui mauult querelosus
ignoscere. sed ut suspiciones iniquas futuris casibus abrogemus, obseruanda
iugiter praesenti iussione decernimus, ut nec isti aliquid de futuro metuant nec
tu per ignorantiam quae dicuntur incurras. <2> Prima fronte pro reparatione
murorum pecuniae diuersis prouincialibus dicuntur extortae, cum tamen nulla
exinde surrexerit promissa constructio. hoc si constat ammissum, aut muri exinde
pro eorum munimine construantur aut unusquisque recipiat quod ei probatur
incompetenter ereptum. nimis enim absurdum est spondere munitiones et dare
ciuibus execrabiles uastitates. <3> Quorundam etiam substantias mortuorum sine
aliqua discretione iustitiae fisci nomine caduci te perhibent titulo uindicare,
cum tibi hoc tantum de peregrinis uideatur esse commissum, quibus nullus heres
aut testamentarius aut legitimus inuenitur. nefas est enim, ut, quod a nobis
praecipitur, a te nostro nomine per iniuriam uindicetur. <4> Praeterea
conuentionibus se grauari omnimodis ingemiscunt, ut ad iudicium deducendi paene
tanta uideantur amittere, quanta uix probantur addicti dispendia sustinere.
uocatio enim iudicis spes iustitiae debet esse, non multa. nam ipse iuste
suspectus redditur, ante cuius audientiam grauamina sentiuntur. unde censemus,
ut, si nostra conueniunt decreta pulsatos, tantum commodi percipiat exsecutor,
quantum gloriosus domnus auus noster pro honoribus personarum debere saiones
accipere expressa quantitate constituit. commodum enim debet esse cum modo: nam
si mensuram aequalitatis excesserit, uim sui nominis non habebit. <5> Si uero
tua iussione conuentio destinatur dumtaxat in illis causis atque personis, ubi
te misceri edicta uoluerunt, mediam portionem exsecutor accipiat, quam de
praeceptis regiis sumere potuisset, quia non potest conuenire iustitiae, ut
tantum a te directo tribuatur, quantum pro reuerentia nostrae iussionis
offertur. <6> Si quis autem saluberrimi constituti temerator extiterit, in
quadruplum iubemus ablata restitui, ut, quod delectatione cupiditatis
ammittitur, asperitate dispendii uindicetur. Edicta uero gloriosi domni aui
nostri uel uniuersa praecepta, quae ad Siciliam pro commonendis uniuersorum
moribus destinauit, sub tanta uolumus oboedientia custodiri, ut sacrilegii reus
habeatur, quisquis beluinis motibus excitatus munimen temptauerit irrumpere
iussionum. <7> Duorum negotia Romanorum etiam his inuitis ad tuum diceris uocare
iudicium: quae si cognoscis facta, ulterius non praesumas, ne dum uis iudicium
incompetenter quaerere, reatum potius uidearis inuenire. memor enim prius debes
esse edicti, qui inter alios mauis a te sequenda constitui: alioquin tota tibi
decernendi auctoritas tollitur, si a te illa regula minime custoditur. <8>
Ordinariis iudicibus amministrationum suarum potestas inlibata seruetur.
cognitores suos legitima turba comitetur. obseruationum illarum non mordearis
inuidia. Gothorum laus est ciuilitas custodita. tota ad uos fama confluit, si
uobis rarus litigator obseruet. uos armis iura defendite, Romanos sinite legum
pace litigare. <9> Nauigiis uecta commercia te suggerunt occupare et ambitu
cupiditatis exosae solum angusta pretia definire: quod non creditur a suspicione
longinquum, etiamsi non sit actione uitiosum. quapropter si rumorem huiusmodi,
ut conuenit, uitare festinas, episcopus ciuitatis et populus conscientiae tuae
testes assistant. omnibus placeat, quod ad cunctorum necesse est pertinere
fortunas. pretia communi debent deliberatione constitui, quia non est delectatio
commercii, quae iubetur inuitis. <10> Quocirca sublimitatem tuam iussis
praesentibus credidimus ammonendam, quia excedere nolumus quos amamus nec
aliquid de talibus sinistrum patimur dici, per quos aliorum mores putamus posse
recorrigi.
XV. IOHANNI PAPAE ATHALARICUS REX.
<1> Si antiquis principibus studium fuit leges exquirere, ut subiecti populi
delectabili tranquillitate fruerentur, multo praestantius est talia decernere,
quae possunt sacris regulis conuenire. absint enim a nostro saeculo damnosa
compendia. illud tantum uere possumus lucrum dicere, quod constat diuina iudicia
non punire. <2> Nuper siquidem ad nos defensor ecclesiae Romanae flebili
allegatione peruenit, cum apostolicae sedi peteretur antistes, quosdam nefaria
machinatione necessitatem temporis aucupatos ita facultates pauperum extortis
promissionibus ingrauasse, ut, quod dictu nefas est, etiam sacra uasa emptioni
publicae uiderentur exposita. hoc quantum fuit crudele committi, tanto gloriosum
est adhibita pietate resecari. <3> Atque ideo sanctitas uestra statuisse nos
praesenti definitione cognoscat, quod etiam ad uniuersos patriarchas atque
metropolitanas ecclesias uolumus pertinere, ut a tempore sanctissimi papae
Bonifatii, cum de talibus prohibendis suffragiis patres conscripti senatus
consulta nobilitatis suae memores condiderunt, quicumque in episcopatu optinendo
siue per se siue per aliam quamcumque personam aliquid promisisse declaratur, ut
exsecrabilis contractus cunctis uiribus effetetur. <4> Si quis autem in hoc
scelere deprehenditur fuisse uersatus, nullam relinquimus uocem, uerum etiam si
aut repetendum aut quod acceptum est non reddendum esse crediderit, sacrilegii
reus protinus habeatur, accepta restituens compulsione iudicis competentis.
iustissimae siquidem leges ut bonis aperiunt, ita claudunt malis moribus
actionem. <5> Praeterea quidquid in illo senatus decretum est consulto,
praecipimus in eos modis omnibus custodiri, qui se quoquo modo uel interpositas
quascumque personas scelestis contractibus miscuerunt. <6> Et quia omnia decet
sub ratione moderari nec possunt dici iusta quae nimia sunt, cum de apostolici
consecratione pontificis intentio fortasse prouenerit et ad palatium nostrum
perducta fuerit altercatio populorum, suggerentes nobis intra tria milia
solidorum cum collectione chartarum censemus accipere. a quibus tamen omnes
idoneos rei ipsius consideratione remouemus, quia de ecclesiastico munere
pauperibus est potius consulendum. <7> Alios uero patriarchas, quando in
comitatu nostro de eorum ordinatione tractatur, in supra dictis condicionibus
atque personis intra duo milia solidorum iubemus expendere. in ciuitatibus autem
suis tenuissimae plebi non amplius quam quingentos solidos se distributuros esse
cognoscant. reliquos accipientes et edicti praesentis et senatus consulti nuper
habiti poena constringat: sed et dantes canonum seueritas persequatur. <8> Vos
autem, qui patriarcharum honore reliquis praesidetis ecclesiis, quoniam
constitutio nostra ab illicita promissione liberauit, restat ut bona imitantes
exempla sine aliquo ecclesiarum dispendio dignos maiestate pontifices offeratis.
iniquum est enim, ut locum apud uos habeat ambitus, quem nos laicis diuina
consideratione perclusimus. <9> Quapropter si quis apostolicae praesul ecclesiae
uel patriarcharum episcopum siue per se siue per parentes uel seruientium
quascumque personas aliqua suffragii crediderit ambitione promouendum, et ipsum
reddere accepta definimus et quod est canonibus statutum, eum modis omnibus esse
passurum. si quis uero quae dederit aut promiserit eodem superstite timuerit
publicare, ab heredibus uel proheredibus eius ecclesia repetat, cuius suffragio
antistes deprehenditur ordinatus, nota infamiae nihilominus superstites
inurente. reliquos quoque ordines sub eadem fieri districtione praecipimus. <10>
Quod si forsitan dolosae machinationis inuento sacramentis persona
intercedentibus fuerit obligata, ut saluo statu animae commissam iniquitatem
neque approbare possit neque audeat accusare, damus licentiam quibuslibet
honestis personis in singulis quibusque ciuitatibus apud iudices competentes hoc
crimen deferre, et quicquid ex ea potuerit probatione recolligi, ut ad
probationem insequentes animemus, tertiam partem indicatae rei ille percipiat,
qui tale facinus uoluerit approbare: reliqua ipsis ecclesiis proficiat quod
uidentur extorta, aut in fabricis earum aut in ministeriis nihilominus
profutura. decet enim ad usus bonos conuertere quae uoluit peruersitas iniqua
fraudare. <11> Quiescat igitur malignantium praua cupiditas. quo tendunt, qui a
fonte praeclusi sunt? recolatur et timeatur Simonis iusta damnatio, qui emendum
credidit totius largitatis auctorem. orate ergo pro nobis edicta nostra
custodientes, quae diuinis noscitis conuenire mysteriis. sed quo facilius
principis uotum uniuersorum mentibus innotescat, hoc senatui, hoc populis per
praefectum urbis praecipimus intimari, ut generalitas agnoscat nos illos
persequi, qui maiestati potius uidentur aduersi. uos quoque hoc uniuersis, quos
deo propitio regitis, episcopis intimate, ne quis sit alienus a culpa qui potuit
agnoscere constituta.
XVI. SALVENTIO V. I. PRAEFECTO URBIS ATHALARICUS REX.
<1> Grata res est cunctis profutura uulgare, ut generale fiat gaudium, quod
potuit esse uotiuum. alioquin laesionis causa noscitur, si beneficia potius
occulantur. dudum siquidem senatus amplissimus ab splendore suo cupiens maculam
foedissimae suspicionis abradere prouida deliberatione constituit, ut in
beatissimi papae consecratione nullus se abominabili cupiditate pollueret, poena
etiam constituta, qui talia praesumere temptauisset: non iniuria, quia tunc
electi uere meritum quaeritur, cum pecunia non amatur. <2> Quod nos laudantes et
augentes inuentum ad beatissimum papam direximus constituta, quae his antelata
praefulgent, ut ab honestate sanctae ecclesiae profanus ambitus auferatur. hoc
uos ad notitiam senatus et Romani populi uolumus sine aliqua dilatione
perducere, quatenus cunctorum figatur cordi, quod cupimus omnium studio
custodiri. <3> Verum ut principale beneficium et praesentibus haereat saeculis
et futuris, tam definita nostra quam senatus consulta tabulis marmoreis
praecipimus decenter incidi et ante atrium beati Petri apostoli in testimonium
publicum collocari: dignus enim locus est, qui et gloriosam mercedem nostram et
senatus amplissimi laudabilia decreta contineat. in quam rem illum direximus,
quo redeunte noscamus impleta quae iussimus. incertum enim uidetur habere quod
praecipit, cui rerum effectus tardius innotescit.
XVII. SALVENTIO V. I. PRAEFECTO URBIS ATHALARICUS REX.
<1> Si principes antiqui moenia Romana in populorum exquisiuere laetitiam, ne
ciues illi merito singulares aliquid commune cum ceteris possiderent, nefas est
inter tot rerum iucunda eos longam sustinere tristitiam, quia exultatio
ciuitatis illius generale uotum est, dum necesse est laetari reliqua, si mundi
caput gaudere proueniat. <2> Apostolici siquidem papae Iohannis et procerum
nostrorum relatione cognouimus illum atque illum Romanos pro sola suspicione
seditionis tam longae custodiae poena maceratos, ut cuncta ciuitas maerorem de
illorum continua calamitate contraxerit, ut eis nec dierum festiuitas, nec ulla,
quae apud nos est gratissima, nominis sui dignitas subueniret. quod nobis pro
sui facti acerbitate displicuit, ut qui in iudicio conuicti minime feruntur,
debita malis tormenta cruciatusque pertulerint. <3> Et ideo magnitudinem tuam
iussis praesentibus ammonemus, ut quocumque loci reperire potueris, eos
absoluere non moreris. quos etiamsi aliquo reatu inuolutos esse claruit,
intercessionibus supra dictis eos iam a metu liberos esse censemus. si uero
innocentes se tormenta sustinuisse confidunt, damus querellis eorum liberam
uocem, ut iustis legibus uindicent quod iniquis ausibus pertulerunt, quia
nolumus innocentes a iudicibus deprimi, quos ad eorum praesidia constat eleuari.
<4> Reuocent nunc ad laetitiam pristinam animos Romani nec nobis credant placere
posse nisi qui eos eligunt modesta aequalitate tractare. intellegant parentes
nostros pro sua quiete laboriosa subire pericula, nos autem multis expensis
agere, ut illi debeant garrula exultatione gaudere. <5> Nam et si quid inique
uel acerbe hactenus pertulerunt, non credant a nostra mansuetudine neglegendum,
qui nec nobis otia damus, ut illi secura pace ac tranquilla laetitia
perfruantur: cito sentiunt quia nos amare non possumus, quos illi pro suis
excessibus horruerunt. nam quorum gratiam impetrare possunt, qui suis ciuibus
displicere meruerunt et, dum tempus habuissent amoris publici, egerunt unde
iuste debeant execrari?
XVIII. EDICTUM. ATHALARICUS REX.
Prouide decreuit antiquitas uniuersitatem edictis generalibus admoneri, per quae
et delictum omne corrigitur et excedentis uerecundia non grauatur. cuncti enim
sibi aestimant dici, ubi nullum constat exponi et similis fit innocentis, quem
contigerit sub communione purgari. hinc et nostra uere pietas custoditur, dum
feriato gladio nascitur metus et prouenit sine cruore correctio. commouemur enim
placati, minamur otiosi et clementer irascimur, quando uitia sola damnamus. diu
est, quod diuersorum querellae nostris auribus crebris susurrationibus
insonarunt quosdam ciuilitate despecta affectare uiuere beluina saeuitia, dum
regressi ad agreste principium ius humanum sibi aestimant feraliter odiosum.
quos nunc apte iudicauimus comprimendos ut eo tempore inimica bonis moribus
crimina persequamur, quo hostibus reipublicae diuina uirtute resistimus.
utrumque quidem noxium, utrumque pellendum: sed tanto grauius grassantur uitia
quanto probantur interna. unum recumbit in altero. facilius quippe inimicorum
acies cadunt, si nostrorum delicta subducimus. <1> Primam humano generi noxiam
peruasionem, sub qua nec dici potest ciuilitas nec haberi, seueritate legum et
nostra indignatione damnamus statuentes, ut sanctio diui Valentiniani aduersum
eos diu pessime neglecta consurgat, qui praedia urbana uel rustica despecto
iuris ordine per se suosque praesumpserint expulso possessore uiolenter intrare.
nec aliquid de eius districtione detestabili uolumus temperatione mitigari,
insuper addentes ut, si quis ingenuorum ad satisfaciendum legi superius
definitae idoneus non habetur, deportationis protinus subiaceat ultioni, quia
plus debuit cogitare iura publica, qui se nouerat alibi non posse sustinere
uindictam. iudices igitur competentes, ad quos potest admissum facinus
pertinere, si inuasorem, cum possint amouere, pertulerint tenere praesumpta, et
adepti cinguli honore priuentur et fisco nostro tantum fiant obnoxii, quantum
praesumptor potuisset addici, in auctoribus tamen facinoris manentibus
constitutis. quod si quis in tantam raptatus amentiam tyrannico spiritu iuri
publico parere neglexerit uiribusque praepotens destinati officii spreuerit
paucitatem, relatione iudicis nostris auribus notabilis ingeratur, ut indulta
executione saionum ultionem sentiat uigoris regii, qui oboedire noluit
cognitori. <2> Et quia summis principibus iuris communione uiuendum est, si quis
legum ordine praetermisso nomine publico titulos praesumpserit uel praesumpsit
affigere, in tantum possidenti fiat obnoxius, quantum sanctio superius memorata
testatur. merito enim et sacrilegii poena percellitur, qui iniquo peruasionis
pondere ausus est maiestatem regii nominis ingrauare. litis quoque expensas
iudicio superatus exsoluat, quia hinc dantur fomenta detestabilis iurgii, cum
improbi uincuntur illaesi, nec dolet calumniantibus pudoris damnum, si euaserint
dispendia facultatum. <3> Si quis autem de nostris scriniis aliquid crediderit
promerendum, aduersario suo, quantum ad causam eius pertinet, de consecuta serie
iussionum nihil aestimet supprimendum: ni fecerit, careat impetratis, uel si
aliquid ex eo agere temptauerit, nihilominus habeatur infirmum, quia illos solos
uolumus uti beneficiis nostris, quos non cognoscimus studere uersutiis. <4> Qui
suasione plectenda matrimonia diuidere nititur aliena, ipsius coniugium habeatur
illicitum: ut magis contigisse sentiat sibi, quod in altero malignus exercere
temptauit. siue pro coniunctionibus caritate priuatur, futurum illi matrimonium
iure denegamus, quia non meretur iugalis reuerentiae praemia consequi, qui in
genialis tori ausus est diuisione grassari. sed ne aliquos huius sceleris reos
ultio nostra derelinquat, illos, quos spes non habet praesentis coniugii uel
futuri, si quid in alienos thalamos dolosa machinatione praesumpserint,
facultatum suarum priuentur media portione fisci protinus uiribus applicanda. si
uero prohibente pauperie in aliquorum substantia nequiuerit uindicari, poena
religentur exilii, ne, quod dictu nefas est, ideo uideantur comminationem iuris
publici euadere, quia uilissimae noscuntur subiacere fortunae. sed haec de
sollicitatoribus affectus alieni pietas nostra decreuit. <5> Ceterum in
adulteris totum districtissime uolumus custodiri, quicquid diuali potuit
commotione decerni. <6> Uno tempore duabus nemo copuletur uxoribus, quia se
nouerit rerum suarum amissione plectendum. nam aut libido est, et recte perfrui
non sinitur: aut cupiditas, et iure nuditate damnatur. <7> Si quis autem
superflua turpique cupidine coniugali honestate despecta ad concubinae elegerit
uenire complexus: si ingenua fuerit, iugo seruitutis cum filiis suis modis
omnibus addicatur uxori, ut illi se per honesta iudicia sentiat subdi, cui per
illicitam libidinem credidit posse praeponi. quod si ad tale flagitium ancilla
peruenerit, excepta poena sanguinis matronali subiaceat ultioni, ut illam
patiatur iudicem, quam formidare debuisset absentem. <8> Donationes nullius
terror extorqueat: nullus adquirere per fraudem uel execrabilem lasciuiam
concupiscat: sola enim honestas merito cupit lucra. de legibus in allegationem
iustissimae largitatis illam districtionem uolumus custodiri, quam pro ueritate
sollicita legalis sanxit antiquitas. sic enim, ut ipsa testatur, et fraudi non
patebit occasio et ueritati maior crescit auctoritas. alioquin nulli praecipimus
uideri firmum, quod ipse conditor, non implendo quae leges uel iura praecipiunt,
fecit incertum. <9> Maleficos quoque uel eos, qui ab eorum nefariis artibus
aliquid crediderint expetendum, legum seueritas insequatur, quia impium est nos
illis esse remissos, quos caelestis pietas non patitur impunitos. qualis enim
fatuitas est creatorem uitae relinquere et sequi potius mortis auctorem? turpis
actus ex toto sit a iudicibus alienus. nemo faciat quod iura condemnant, quia
decretali poena plectendi sunt, qui se prohibitis excessibus miscuerunt. quid
enim in aliis damnent, si ipsi se inhonesta contagione commaculent? sit etiam
sub diuitibus tuta mediocritas. <10> A caedis temperetur insania. nam
praesumptio manuum actus probatur esse bellorum, maxime in eis, quos tuitionis
nostrae munit auctoritas. si quis autem contra facere improba praesumptione
temptauerit, uiolator nostrae iussionis habeatur. <11> Appellari a suspecto
iudicibus ordinariis in una causa secundo non patimur, ne, quod ad remedium
repertum est innocentis, asylum quodam modo uideatur existere criminosis. si
quis uero uetita iterare temptauerit, negotio priuatus abscedat. <12> Sed ne
pauca tangentes reliqua credamur noluisse seruari, omnia edicta tam nostra quam
domni aui nostri, quae sunt uenerabili deliberatione formata, et usualia iura
publica sub omni censemus districtionis robore custodiri, quae tanto munimine se
tegunt, ut nostra quoque iurisiurandi interpositione cingantur. quid per multa
discurrimus? legum usualis regula et praeceptorum nostrorum probitas ubique
seruetur.
XVIIII. SENATUI URBIS ROMAE ATHALARICUS REX.
<1> Laudabilium iussionum causas plerumque praebet uituperabilis excessus
alienus et miro modo momenta iustitiae de iniquitatis occasione nascuntur. silet
enim aequitas, si culpa non uociferetur admissa et feriatum quiescit principis
ingenium, quod non fuerit aliqua querella prouocatum. <2> Conquerentium siquidem
uocibus adacti et frequentium populorum de rebus quibusdam interpellatione
commoniti necessaria quaedam Romanae quieti edictali programmate duodecim
capitibus, sicut ius ciuile legitur institutum, in aeuum seruanda conscripsimus,
quae custodita residuum ius non debilitare, sed potius corroborare uideantur.
<3> Haec in coetus uestri splendore recitentur et per triginta dies praefectus
urbis locis celeberrimis faciat sollemni more proponi, ut nostra ciuilitate
recognita spes truculentis moribus auferatur. nam qua confidentia proteruus
assumat quod principis agnouerit damnasse clementiam? redeat amor omnibus
disciplinae, per quam et parua coalescunt et potiora seruantur. <4> Ideo enim
exercitus nostros iuuante deo crebris expeditionibus commouemus, ut
uniuersitatem compositam uiuere legibus sentiamus. reddatur haec animo nostro
uicissitudo praemiorum, ut, quem rei publicae utilitatibus cognoscitis
occupatum, rarissima querellarum aditione pulsetur. teneant iudices legitimas
districtiones: uotum foedissimae uenalitatis abiciant. metus cuncta componit, si
reus crimen in iudicante non inuenit.
XX. AD UNIVERSOS IUDICES PROVINCIARUM ATHALARICUS REX.
<1> Cum uos prouinciis nostris iuuante deo annua reparatione praestemus nec
desint iudicia per uniuersos fines Italiae distributa, intellegimus de inopia
iustitiae copiam uenire causarum. culpa siquidem uestrae probatur esse
neglegentiae, quotiens a nobis coguntur homines legum beneficia postulare. nam
quis eligeret tam longe petere, quod in suis uideret sedibus aduenisse? <2> Sed
ut uobis uersutas excusationes et duras necessitates prouincialibus tolleremus,
de aliquibus casibus hactenus pessimo torpore neglectis edictalis programmatis
definitione censuimus, ut et uobis cresceret confidentia recte iudicandi et
paulatim audacia maligna possit inminui. quod more sollemni per conuentus
publicos triginta dierum facite proponi editione, ut iure condemnatus habeatur
qui post haec remedia manere praesumpserit desperatus.
XXI. SENATUI URBIS ROMAE ATHALARICUS REX.
<1> Filiorum causas iure ad patrum cognoscimur remisisse personas, ut ipsi de
illorum prouectu debeant cogitare, quorum interest studia Romana proficere.
neque enim credendum est uos inde posse minus esse sollicitos, unde et generi
uestro crescit ornatus et coetui prouenit assidua lectione consilium. nuper
siquidem, ut est de uobis cura nostra sollicita, quorundam susurratione
cognouimus doctores eloquentiae Romanae laboris sui constituta praemia non
habere et aliquorum nundinatione fieri, ut scholarum magistris deputata summa
uideatur imminui. <2> Quapropter, cum manifestum sit praemium artes nutrire,
nefas iudicauimus doctoribus adulescentium aliquid subtrahi, qui sunt potius ad
gloriosa studia per commodorum augmenta prouocandi. <3> Prima enim grammaticorum
schola est fundamentum pulcherrimum litterarum, mater gloriosa facundiae, quae
cogitare nouit ad laudem, loqui sine uitio. haec in cursu orationis sic errorem
cognoscit absonum, quemadmodum boni mores crimen detestantur externum. nam sicut
musicus consonantibus choris efficit dulcissimum melos, ita dispositis
congruenter accentibus metrum nouit decantare grammaticus. <4> Grammatica
magistra uerborum, ornatrix humani generis, quae per exercitationem pulcherrimae
lectionis antiquorum nos cognoscitur iuuare consiliis. hac non utuntur barbari
reges: apud legales dominos manere cognoscitur singularis. arma enim et reliqua
gentes habent: sola reperitur eloquentia, quae Romanorum dominis obsecundat.
hinc oratorum pugna ciuilis iuris classicum canit: hinc cunctos proceres
nobilissima disertitudo commendat et ut reliqua taceamus, hoc quod loquimur inde
est. <5> Qua de re, patres conscripti, hanc uobis curam, hanc auctoritatem
propitia diuinitate largimur, ut successor scholae liberalium litterarum tam
grammaticus quam orator nec non et iuris expositor commoda sui decessoris ab eis
quorum interest sine aliqua imminutione percipiat et semel primi ordinis uestri
ac reliqui senatus amplissimi auctoritate firmatus, donec suscepti operis
idoneus reperitur, neque de transferendis neque de imminuendis annonis a
quolibet patiatur improbam quaestionem, sed uobis ordinantibus atque
custodientibus emolumentorum suorum securitate potiatur, praefecto urbis
nihilominus constituta seruante. <6> Et ne aliquid pro uoluntate praebentium
relinquatur incertum, mox ut sex menses exempti fuerint, statutae summae
consequantur praedicti magistri mediam portionem, residua uero anni tempora cum
annonarum debita redhibitione claudantur: ne cogantur de alieno pendere
fastidio, cui piaculum est uel horarum aliquo uacasse momento. <7> In tantum
enim quae sunt decreta uolumus firmissime custodiri, ut si quis cuius interest
differendam putauerit hanc quasi debitam functionem, procurato more usurarum
dispendia ipse patiatur, qui iusta commoda laudabiliter laborantibus plectenda
cupiditate subtraxit. <8> Nam si opes nostras scaenicis pro populi oblectatione
largimur et ea studiosissime consequuntur qui adeo necessarii non habentur,
quanto magis illis sine dilatione praebenda sunt, per quos et honesti mores
proueniunt et palatio nostro facunda nutriuntur ingenia! <9> Hoc autem
praesentibus litterarum magistris uenerando coetui uestro praecipimus intimari,
ut sicut nos agnoscunt de suis commodis esse sollicitos, ita a se prouectus
adulescentium enixius nouerint nos exigendos. cesset nunc illa satyricis
doctoribus querulis usurpata sententia, quia duabus curis ingenium non debet
occupari. ecce iam habere tolerabile probantur hospitium: unde nunc merito, uni
sollicitudini iugiter inhaerentes, toto uigore animi ad bonarum artium studia
transferantur.
XXII. PAULINO V. C. CONSULI ATHALARICUS REX.
<1> Indiscreti hominum mores confusique uagarentur, si aut culpa formidinem aut
uirtus praemia non haberet. sed cum utraque suis finibus propriaque terminatione
claudantur, de illo nefas est ambigi, qui meruit eligi iudicio principali. non
enim quicquam aut odio decernimus aut pellecti aliqua gratificatione laudamus.
electio nostra de meritis uenit et tanto quis regali animo proximatur, quanto
bonis studiis societate coniungitur. non uereamini absentes nec sitis de
principis ignoratione solliciti. <2> Latere potest forsitan uulgare hominum
genus: nesciri non potest proles senatus, quando bene noti sunt, qui meritis
asseruntur et abunde cognoscitur, quisquis fama teste laudatur. quapropter te
longissime constitutum mentis nostrae oculus serenus inspexit et uidit meritum,
quod non habebatur occultum. propositum siquidem tuum celebrata dilatauit
opinio, faciens fidem generis morum pondere, non aetate. neque enim fas erat, ut
quem familia tanta produxerat, sententia nostra in eo corrigendum aliquid
inueniret. <3> Semen generis morum fructibus reddidisti. nil uobis aetas longa
subduxit: antiquos in te Decios Roma cognouit, Decios inquam, priscis saeculis
honorata prosapies, libertatis auxilium, curiae decus, Romani nominis singulare
praeconium: cui specialiter adscriptum est quod immanissimum hostem status rei
publicae periclitatus euasit et in tanta uirorum fortium multitudine solus
inuentus est, qui patriam plus amasset. haec uos exempla submonendo semper
accendunt, quia magnus uerecundiae stimulus est laus parentum, dum illis non
patimur esse impares quos gaudemus auctores. <4> Et ideo, quod deo auspice
dictum sit, per indictionem duodecimam sume insignia consulatus, honorem quidem
arduum, sed familiae uestrae domesticum. uos enim completis paginam consularem:
uos crebro nominat cursus annorum et dum copia plerumque soleat habere
fastidium, uestrum nomen repetitum semper efficitur gloriosum. huic denique
generi superna fauerunt praestando desideriis patrum felicia germina masculorum.
hinc est quod in illo rerum capite collegam uix uidetis extraneum: hos habetis
iudices quos parentes. o temporum singulare praeconium! curia Romana completur
paene uestra familia: ecce uere nunc unum dicendum est corpus, quando constat
uicini sibi generis societate permixtum. <5> Sed non remittas animos confidentia
tuorum nec credas posse sufficere, quod tibi contigit de illorum praedicatione
gaudere. plus exigitur heres bonorum, quando sine cessatione compellitur, qui
maiorum uirtutibus admonetur. adde laudes egregias: senioribus tuis sequens
aetas cum aliqua opinabili nouitate succedat. nam si gloriosum est posteris
auitas extendere facultates, quanto praestantius est hereditarias augere
uirtutes! mores tuos domestica conuersatione laudauimus: sed maius aliquid nunc
decet publicis exhibere conspectibus, unde sibi nec aetas tenera blandiatur nec
metus quicquam uindicet nec magister assumat.
XXIII. SENATUI URBIS ROMAE ATHALARICUS REX.
<1> Quid, patres conscripti, de uobis iudicemus, expendite, ut ad summarum
culmina dignitatum germinis uestri uiros quos numquam uidimus eligamus, non
fastidio neglegentiae, sed honorabili praesumptione naturae. ad examen ueniant
quae putantur incerta: num quis de illa re aestimet deliberandum, ubi nihil
reperitur ambiguum? <2> Omnes quidem benignitas nostra complectitur, sed tales
ueritatis testimonio praedicamus. praecedit quidem gratia, sed sequitur
incorrupta sententia. nam sicut idem curiae corpus est uobis, ita in unum
laudabili proposito conuenitis. uos ergo dilexisse iudicium est, unde libertatis
augmentum et nostri imperii crescit ornatus. rerum causae semper in semine sunt:
fructus editus prodit auctores et quicquid a diuinitate meremur, de felici prole
colligitur. <3> Hinc est quod patricium Venantium sub admiratione pensamus et
fecunda prole gaudentem et tot consularibus patrem. educauit enim liberos nulla
discretione laudandos, pondere moderationis aequales, ingenii uiuacitate
consimiles et morum societate uere germanos, quorum infantia bonis artibus
enutrita iuuentutem quoque armis exercuit, formans animum litteris, membra
gymnasiis: tradens amicis exhibere constantiam, dominis fidem: et quicquid in
illo uiro gratia diuina concessit, integra perfectione transmissum cernas in
posteris. iactent se alii possessione locupleti summumque bonum solas putent
esse diuitias. in hac autem domo non tantum patrimoniis, sed et uirtutibus
aditur hereditas. <4> Hoc est profecto quod uere diuites facit, quando nullum
melius potest esse compendium quam laudibus successisse maiorum. probatum est
etiam in eo bonis dispensatoribus nil deesse. alieni continens, propria sub
moderatione distribuens et inusitata laude mirabilis, nulli grauis tot protulit
consulares. recipiat haec audiens fructum bonorum: agnoscat se praeconem habere
quem dominum et inter tot lumina procerum singulariter fuisse laudatum. nam si
homines ornat semel accepisse palmatam, quid ille censendus est, qui tot meretur
in filiis consulatus? <5> Et ideo, patres conscripti, alumnum uestrum Paulinum
aurea dignitate uestimus, ut iuuentus eius, quae fulget meritis, trabea quoque
resplendeat triumphali. hunc honorem Deciorum familia non miratur, quia eorum
plena sunt atria fascibus laureatis. aliis rara dignitas ista contingit: in hoc
decursu generis paene nascitur consularis. <6> Fauete ergo, patres conscripti,
nostris muneribus et uestro nihilominus candidato. nam licet nuncupemini omnibus
generaliter patres, huic etiam estis specialiter et parentes. nomen uestrum a
curae similitudine deriuatum fidelissima rerum appellatione confirmat, non
translaticia usitatione uocabuli, sed honora sorte nascendi. cedant uobis hanc
felicitatem diuina perpetuam, ut licet gratiam praestetis exoticis, prole uestra
uiuacius gaudeatis.
XXIIII. SENATORI PPO ATHALARICUS REX.
<1> Si te uoluntas nostra adhuc latentem aut inhonorum forsitan inuenisset,
gauderemus quidem repertum, sed bene dubitaremus acturum, quia spes magis quam
fructus in nouo est. sed cum domni aui nostri innumeris prouectibus magnoque
iudicio glorieris, inconueniens res est disceptationi subdere, quem uix possumus
sub admiratione praedicare. tanti quippe principis non examinanda, sed ueneranda
est sententia, quia non potest de factis eius ambigi, cum et nos ab ipso
cognoscamur electi: qui diuinae supplicationi semper assiduus exegit meritis, ut
illa faceret quae superna gratia custodiret. <2> Nam quem ille uirum aut
exercitibus praeficiens cum uictoria non recepit aut iudicem cingens non
iustissimum comprobauit? cum futuris rebus eum crederes habere tractatum: nam
quod concepisset animus, reddebat semper effectus miroque sapientiae studio non
habebat dubium, quod ueraciter praeuidebat esse uenturum. <3> Denique ex te
probare possumus eximium principis institutum. quem primaeuum recipiens ad
quaestoris officium mox repperit conscientia praeditum et legum eruditione
maturum. fuisti nimirum summa temporum laus, ut illum sic ad omnia sollicitum
inoffensa redderes famulatione securum, dum molem tantam regalis ingenii
facundiae tuae uiribus sustineres. te in dictationibus amoenum, te ad iustitiam
rigidum, te habuit a cupiditatibus alienum. <4> Beneficia quippe ipsius nulla
abominabili taxatione uendebas, ut honor tibi ad opinionis diuitias proficeret,
dum minime pretio subiaceret. hinc est quod uidebaris aequissimo principi
gloriosa dilectione sociatus, quia eras a uitiis probabili sequestratione
diuisus. interpellantium te ponderibus sapientissimus arbiter onerabat tantumque
de animi tui cognita disceptatione praesumpsit, ut in beneficii locum tuum
praestaret aestuantibus sine aliqua cunctatione iudicium. <5> Quotiens ille te
grandaeuis proceribus inputauit, dum non sufficerent ad primordia tua, quos
tanta longaeuitas aetatis instruxerat? erat plane quod in te praedicaret
eximium, animum ad promerenda beneficia patulum et contra uitia cupiditatis
obstructum, dum nescio quo pacto rara est in hominibus manus clausa et aperta
iustitia. <6> Veniamus ad magisteriam dignitatem, quam non pecuniae largitate,
sed morum nosceris suffragio consecutus: quo loco positus semper quaestoribus
affuisti. nam cum opus esset eloquio defaecato, causa tuo protinus credebatur
ingenio. exigebaris a benigno principe quod se tibi nouerat minime commisisse et
quadam gratia praeiudiciali uacuabat alios labore, ut te sententiae suae copiosa
laude compleret. <7> Non enim proprios fines sub te ulla dignitas custodiuit,
quando conscientiae tuae constat creditum, quod a multis fuit proceribus
sincerissime peragendum. nesciuit quisquam de te summurmurare contraria, cum
tamen de principali gratia sustineres inuidiam. derogare cupientes uicit
integritas actionis: aduersi tui coacti saepe locuti sunt quod animus non
habebat. nam quaelibet malitia formidat contra manifesta bona aliquid profiteri,
dum generalibus odiis ueretur exponi. <8> Egisti rerum domino iudicem familiarem
et internum procerem. nam cum esset publica cura uacuatus, sententias prudentium
a tuis fabulis exigebat, ut factis propriis se aequaret antiquis. stellarum
cursus, maris sinus, fontium miracula rimator acutissimus inquirebat, ut rerum
naturis diligentius perscrutatis quidam purpuratus uideretur esse philosophus.
longa fiunt, si cuncta proferamus: quin potius ad beneficia nostra conuertimur,
ut quod ab illo cognoscebatur deberi, ab herede inperii tibi sentias iuste
persolui. <9> Quapropter iuuante deo, quo auctore omnia prosperantur, ab
indictione duodecima in praefecturae praetorianae te suggestu atque insignibus
collocamus, ut probatum iudicem sine metu prouinciae suscipiant, quas hactenus
inproborum cognouimus actione fatigatas. sed quamuis habeas paternam
praefecturam Italico orbe praedicatam, aliorum tibi tamen exempla non ponimus:
utere moribus tuis et omnium uota complesti. <10> Percurre iuuante deo gloriae
campum, quem semper a te nouimus expetitum. nam si te continentem, ut credimus,
et dignitas ista probauerit, hoc est saeculi ambitiosa superasse. solitus es
quidem iusta non uendere: sed nunc oportet inpensius laesis per iniuriam
subuenire. inuigilet incorruptibilis sensus aduersus male consuetas manus:
excludatur undique studium fraudulentum, quia hoc dignum est per iudicem
prouenire sincerum. diutius quidem differendo pro te cunctorum uota lassauimus,
ut et beniuolentiam in te probaremus generalitatis et cunctis desiderabilior
aduenires. habet hoc enim humana condicio, ut celerius adepta fastidio sint, dum
omne pretiosum uilescit oblatum et contra dulcius accipitur, quod sub aliqua
dilatione praestatur. <11> Sed non sumus tantummodo de tuorum temporum laude
contenti: perquire omnia ad titulos praefecturae praetorianae pertinentia, quae
aliorum uisa est fraudare cupiditas. non liceat quemquam gloriari furtis aut
praeiudiciis suis. lumen te inmisimus rebus celatis, quando nec prudentiae tuae
quisquam poterit illudere nec fidem aliqua oblatione lentare. <12> Constitue et
huic regulam dignitati, qui ante actis fascibus mirabilis continentiae exempla
praebuisti. nam licet paene omnes honores summos aequaliter egeris, habes tamen
proposita conscientiae bona, ubi nullam decet esse mensuram. hic enim decorum
est terminum non habere: hic honesta probatur ambitio, cuius etiam et nimietas
placet. omne siquidem praedicandum quanto profusius quaeritur, tanto gloriosius
inuenitur.
XXV. SENATUI URBIS ROMAE ATHALARICUS REX.
<1> Cumulauimus quidem, patres conscripti, beneficiis nostris copiosum
uirtutibus, diuitem moribus, plenum magnis honoribus Senatorem: cuius si merita
consideretis, debemus omne quod soluimus. qua enim compensatione commendandus
est, qui aures dominantium luculenta saepius praedicatione compleuit, dignitates
sibi creditas eximia grauitate tractauit et nisus est tempora facere quae merito
laudarentur in principe. trahebat regnantis animum ueritas et disertitudo
dictorum, cui sic omnia retulit, ut miraretur ipse qui fecit. <2> Allegauit
solus quod omnes iuuaret et dum purpuratas auditori suo fenerat laudes,
gratiosum uobis nostrum fecit inperium. commendat enim suam gentem, qui oratione
placabili permulcet regiam summitatem, quando ex uobis et alter talis creditur,
a quo similia postulentur. <3> Patrem quoque clementiae nostrae in ipsa curia
Libertatis qua disertitudine deuotus asseruit! recolitis quemadmodum facta eius
orator nobilis excolebat, uirtutes ipsius plus mirabiles faciens quam honores.
in absoluto datur probare quod dicimus. aestimate, patres conscripti, quali
gratia potuistis ab illo respici, a quorum se corpore sic uidebat ornari.
gloriosis quippe dominis gratiora sunt praeconia quam tributa, quia stipendium
et tyranno penditur, praedicatio autem nisi bono principi non debetur. quid,
praeconiales uiri, creditis his tantum fuisse contentum, ut dominos niteretur
laudare superstites, a quibus dum uicissitudo praemiorum forsitan quaeritur,
laboris taedia non uitantur? <4> Tetendit se etiam in antiquam prosapiem
nostram, lectione discens quod uix maiorum notitia cana retinebat. iste reges
Gothorum longa obliuione celatos latibulo uetustatis eduxit. iste Hamalos cum
generis sui claritate restituit, euidenter ostendens in septimam decimam
progeniem stirpem nos habere regalem. <5> Originem Gothicam historiam fecit esse
Romanam, colligens quasi in unam coronam germen floridum quod per librorum
campos passim fuerat ante dispersum. <6> Perpendite, quantum uos in nostra laude
dilexerit, qui uestri principis nationem docuit ab antiquitate mirabilem, ut,
sicut fuistis a maioribus uestris semper nobiles aestimati, ita uobis antiqua
regum progenies inperaret. cedimus, patres conscripti, et si adhuc referre
uolumus, beneficia collata superantur. <7> Nostris quoque principiis quanto se
labore concessit, cum nouitas regni multa posceret ordinari? erat solus ad
uniuersa sufficiens: ipsum dictatio publica, ipsum consilia nostra poscebant, et
labore huius actum est, ne laboraret inperium. <8> Reperimus eum quidem
magistrum, sed impleuit nobis quaestoris officium et mercedes iustissima
deuotione persoluens cautelam, quam ab auctore nostro didicerat, libenter
heredis utilitatibus exhibebat. uerum his aliquid maius adiciens primordia regni
nostri et armis iuuit et litteris. nam dum curae litorum regias cogitationes
incesserent, subito a litterarum penetralibus eiectus par suis maioribus ducatum
sumpsit intrepidus, cui quia defuit hostis, moribus triumphauit eximiis. <9> Nam
deputatos Gothos propriis pauit expensis, ut nec prouinciales percelleret nec
fiscum nostrum expensarum oneribus ingrauaret. arma eius nulla possessorum damna
senserunt. fuit nimirum prouinciarum uerissimus custos: nam ille defensor
proprie dicendus est, qui tuetur innoxie. <10> Mox autem ut tempus clausit
nauium commeatum bellique cura resoluta est, ingenium suum legum potius auctor
exercuit, sanans sine damno litigantium quod ante sub pretio constabat esse
laceratum. talem Metelli in Asia, talem Catonis in Hispania legitis fuisse
ducatum, qui plus de sua disciplina quam per arma laudati sunt: non iniuria,
quia hostem congredi uarius semper euentus est, indubitata uero gloria morum
custodisse mensuram. <11> Quid ergo? num quid tali actione praesumens aliqua se
elatione iactauit, dum familiare est hominibus extolli, cum bene de se
cognouerint aestimari? nonne tanta se communione tractauit, ut principis sibi
gratiam ad beneficia tantum crederet esse concessam, beniuolus cunctis,
moderatus in prosperis, ignorans nisi grauiter lacessitus irasci? qui cum sit
iustitia rigidus, ad remissiones irarum non perdurat austerus: suarum rerum
distributor egregius et dum nesciat aliena quaerere, nouit propria largus
offerre. hos igitur mores lectio diuina solidauit, quando semper bene geritur,
si caelestis metus humanis motibus obponatur. hinc enim uirtutum omnium sumitur
manifesta cognitio: hinc sapientia ueritatis sapore conditur. sic ad omnia
redditur humilis, quem inbuit doctrina caelestis. <12> Huic ergo, patres
conscripti, deo auspice a duodecima indictione praefecturae praetorianae
regendam tribuimus dignitatem, ut querellas omnes infidelium nundinatione
collectas deo praestante sua integritate componat faciatque tam nimium
desideratus, ut cunctis possit esse beneficus. assint superna dispositis, ut
quem nos probauimus longa conuersatione prudentem, prosperrimus sibi,
fidelissimus nobis, utilis rei publicae debeat inueniri et relinquat posteris
famam, per quam gloriosam saeculis suam faciat esse familiam.
LIBER DECIMUS.
I. IUSTINIANO IMPERATORI AMALASUINTHA REGINA.
<1> Adeo uobis, clementissime principum, distulimus hactenus indicare filii
nostri gloriosae recordationis occasum, ne amantis laederemus animum per tristia
nuntiorum: sed nunc iuuante deo, qui consueuit casus asperos in prospera
commutare, illa magis elegimus in uestram deferre notitiam, de quibus nobiscum
possitis participata exultatione gaudere: iuuat enim diuina munera diligentibus
confiteri. <2> Perduximus ad sceptra uirum fraterna nobis proximitate
coniunctum, qui regiam dignitatem communi nobiscum consilii robore sustineret,
ut et ille auorum suorum purpureo decore fulgeret et animos nostros solacium
prudentis erigeret. iungite nunc uota felicia, ut, sicut nos in imperio pietatis
uestrae omnia fieri prospera desideranter expetimus, ita nobis fauere uestram
beniuolentiam comprobemus. peracto itaque nuntio, quod uobis pro ingenita
clementia credimus esse uotiuum, addimus etiam gratissimae legationis officium,
ut pacem, quam mente semper geritis et iam mihi specialiter retinetis esse
collatam, adiectione quoque meorum proteletis. nam licet concordia principum
semper deceat, uestra tamen absolute me nobilitat, quando ille redditur amplius
excelsus, qui uestrae gloriae fuerit unanimitate coniunctus. <3> Sed quoniam
epistularum breuitate uniuersa sufficienter nequeunt expediri, salutantes
reuerentia competenti quaedam legatis nostris uerbo uobis insinuanda commisimus,
quae consuetudine uestrae serenitatis libenter accipite, ut ab omnibus euidenter
possit agnosci quod iuste nobis probamus de uestra mansuetudine polliceri.
conuenit enim de uobis indubitanter praesumi, quando et nos pro desiderio uestro
in his quos commendastis talia facimus, qualia uos sperasse cognouimus.
II. IUSTINIANO IMPERATORI THEODAHADUS REX.
<1> Nouis regibus mos est per diuersas gentes prouectus sui gaudia nuntiare, ut
adquirant affectum principis externi de ipsa communione regnandi. quod facienti
mihi, piissime imperator, multo melius diuina tribuerunt, quando uestram gratiam
securus expeto, quam praecellentissimam domnam sororem meam uobiscum, pepigisse
cognosco. <2> Ab eius enim iudicio me nullatenus deuiare certissimum est, quae
tanta sapientiae luce resplendet, ut et propria regna mirabili dispositione
componat et promissam cunctis gratiam robusta firmitate custodiat. ideo enim me
curarum suarum fecit esse socium, quatenus et ego illos desiderem habere
reuerendos, quos sibi ipsa fecit esse pacificos, prudentiae suae more
diiudicans, ut talium amicitias eligeret, qui in toto orbe simile nil haberent.
<3> Neque enim noua est ista dilectio: nam si decessorum uestrorum facta
recolatis, agnoscitis quandam esse consuetudinis legem cum illo imperio
amicitiam Hamalos semper habuisse. quae tantum certior quantum uetustior, quia
facile mutari non potest quod per longa saecula custoditur. suscipite itaque
affectiosis mentibus et nostra primordia et domnae sororis nostrae, cui
singulariter studetis, fauete iudicio. nam si me similiter diligitis, regem
quodammodo pariter efficitis. <4> Sed quoniam nos amplius loqui desideria
nouitatis exposcunt et litterarius sermo narrare plura non patitur, ideo tantis
meritis, sicut dignum est, salutationis honore completo, harum portitoribus
legatis nostris aliqua pietati uestrae delegauimus intimanda, quia nemo utilius
tractat quam qui uestrae mansuetudini committere sua uota deliberat.
III. SENATUI URBIS ROMAE AMALASUINTHA REGINA.
<1> Post flebilem filii nostri diuae recordationis occasum uicit animum piae
matris generalitatis affectio, ut non maeroris sui causas, sed uestra potius
augmenta cogitaret. quaesiuimus regales curas quo solacio fulciremus. sed auctor
ille castitatis et misericordiae singularis, qui nobis primaeuum subtracturus
erat filium, maturi fratris reseruauit affectum. <2> Elegimus deo auspice
consortem regni nostri felicissimum Theodahadum, ut quae hactenus rei publicae
molem solitaria cogitatione pertulimus, nunc utilitates omnium iunctis consiliis
exequamur, quatenus in tractatibus duo, in sententiis unus esse uideamur. Astra
ipsa caeli mutuo reguntur auxilio et uicario labore participata mundum suis
luminibus amministrant. ipsi quoque homini duplices manus, socias aures, oculos
geminos diuina tribuerunt, ut robustius perageretur officium quod duorum fuerat
societate complendum. <3> Exultate, patres conscripti, et factum nostrum
supernis commendate uirtutibus. nihil reprehensibile desiderauimus agere, quae
cum alterius consilio cuncta delegimus ordinare. communio siquidem regni mores
asserit, quando placabilis esse iuste creditur, qui potestatis suae habere
participem comprobatur. reserauimus itaque deo iuuante palatia uiro nostri
generis claritate conspicuo, qui Hamalorum stirpe progenitus regalem habeat in
actibus dignitatem: patiens in aduersis, moderatus in prosperis et, quod
difficillimum potestatis genus est, olim rector sui. <4> Accessit his bonis
desiderabilis eruditio litterarum, quae naturam laudabilem eximie reddit
ornatam. ibi prudens inuenit, unde sapientior fiat: ibi bellator reperit, unde
animi uirtute roboretur: inde princeps accipit, quemadmodum populos sub
aequalitate componat: nec aliqua in mundo potest esse fortuna, quam litterarum
non augeat gloriosa notitia. <5> Accipite, quid maius generalitatis uota
meruerunt. princeps uester etiam ecclesiasticis est litteris eruditus: a quibus
semper quicquid est pro homine, commonemur: iudicare recte, bonum sapere, diuina
uenerari, futura cogitare iudicia. necesse est enim, ut sequatur iustitiae
uestigium, qui de sua sententia causam se credit esse dicturum. uiderim quae
lectio acuat ingenium: diuina semper efficere nititur pium. <6> Veniamus ad
illam priuatae uitae largissimam frugalitatem, quae tantam procurabat donis
abundantiam, conuiuiis copiam, ut considerato eius antiquo studio nihil noui
habere uideatur in regno. in hospitalitate promptus, in miseratione piissimus:
sic cum multa expenderet, census eius caelesti remuneratione crescebat. talem
uniuersitas debuit optare, qualem nos probamur elegisse, qui rationabiliter
disponens propria non appetat aliena: tollitur enim necessitas principibus
excedendi, quotiens assueuerint propria moderari. <7> Laudata est nimirum
sententia, quae rerum praecipit modum, quia nimium non placet etiam quod bonum
putatur. gaudete nunc, patres conscripti, et supernae gratiae pro nobis uota
persoluite, quando talem mecum constitui principem, qui et de nostra aequitate
bona faciat et propria suae pietatis ostendat. hunc enim et maiorum suorum
commonet uirtus et auunculus efficaciter excitat Theodericus.
IIII. SENATUI URBIS ROMAE THEODAHADUS REX.
<1> Diuina uobis beneficia, patres conscripti, prouenisse feliciter nuntiamus,
dominam rerum toto orbe gloriosam consortem me regni sui larga pietate fecisse,
ut nec illi deesset fidele solacium et nobis auitum congrue praestaretur
imperium. suscipiatur gratissime quod generalitatem constat optasse: reserentur
nunc sine metu uota cunctorum: ut unde periculum pertuli, inde me uniuersitas
cognoscat ornari. praesumpsistis enim me inconscio susurrare, quod palam non
poteratis assumere. quantum uobis debeam, hinc datur intellegi, ut illud mihi
festinaretis diuinitus euenire, quod meus animus non audebat appetere. <2> Hoc
nobis est potius nouum quam uobis incognitum. magna ergo gratia completum debet
accipi, quod uelociter quam oportebat uidebatur aperiri. sed si quid de uobis
meremur, cum tamen plurimum apud uos ualere nostram gratiam confidamus, domnae
et sororis nostrae gloriosas laudes iugiter personate: quae magnitudinem imperii
sui nostra uoluit participatione roborari, ut tamquam in duobus luminibus unus
esset aspectus et concordem sensum nemo crederet segregatum. <3> Sic sunt enim,
simul quos et gratia iungit et parentela conciliat. arduum sibi hoc forsitan
aestiment impares mores. difficile est illos aliter uiuere, qui sibi possunt
bonarum cogitationum similitudine conuenire. consilium quippe imitari detrectat
inprouidus: sapientiam uero ille quaerit in altero, penes quem est scientiae
magnitudo. <4> Sed inter diuersa munera, quae nobis cum regia maiestate diuina
tribuerunt, illud amplius permulcet animum nostrum, quod nos sapientissima
domina trutina magnae disceptationis elegit: cuius prius ideo iustitiam pertuli,
ut prius ad eius prouectionis gratiam peruenirem. causas enim, ut scitis, iure
communi nos fecit dicere cum priuatis. o animi nobilitas singularis! en aequitas
mirabilis, quam mundus loquatur. non dubitauit parentem prius iuri publico
subdere, quem paulo post uoluit ipsis quoque legibus anteferre. explorauit
conscientiam, cui erat regni traditura censuram, ut et illa domina cognosceretur
esse cunctorum et me probatum perducere dignaretur ad regnum. <5> Quando his
muneribus, quando soluamus tantae gratiae quae debemus, ut quae cum paruulo
filio imperauit sola, nunc mecum delegerit regnare sociata? in ipsa est enim
decus regnorum omnium, in ipsa nostrae originis flos bonorum. quicquid fulgemus,
ab eius claritate suscipimus, quando non solum parentibus laudem contulit, sed
ipsum quoque genus humanitatis ornauit. quis possit sufficienter edicere, quanta
pietate, quanto morum pondere decoretur? discerent profecto noua philosophi, si
uiderent et minora libris suis faterentur condita quam huic cognoscerent
attributa. <6> In tractatibus acuta, sed ad loquendum summa moderatione
grauissima. haec est regalis procul dubio uirtus celerius necessaria sentire et
tardius in uerba prorumpere. nescit enim paenitenda loqui, qui proferenda prius
suo tradit examini. hinc est quod eius doctrina mirabilis per multiplices
linguas magna ubertate diffunditur, cuius ingenium ita paratum reperitur ad
subitum, ut non putetur esse terrenum. in libris regum regina austri uenisse
legitur ad discendam sapientiam Salomonis: hic principes audiant quod sub
ammiratione cognoscant. paucis uerbis sensus clauditur infinitus et summa
facilitate componitur, quod ab aliis nec sub longa deliberatione formatur. <7>
Beata res publica quae tantae dominae gubernatione gloriatur. minus fuit, ut
generalitas sub libertate seruiret: additum est tantis meritis, ut ei subderetur
et reuerentia principalis: hoc enim obsequio dignissime dominamur. nam cum
tantae prudentiae pareo, cunctis uirtutibus obsecundo. sub tali siquidem
monitore regni pondere non grauamur, dum si quid sit pro nouitate incognitum,
fiet nobis eius instructione certissimum. <8> Ad bonum publicum ueritatem non
pudet confiteri. agnoscite, principes uiri, sapientissimae esse dominae, quod in
nobis potuerit plus placere. illam enim aut interrogando melius sentimus aut
eius imitatione proficimus. uiuite nunc felices, uiuite deo auxiliante concordes
et aemulamini gratiam, quam regiam cognoscitis tenere concordiam.
V. THEODOSIO HOMINI SUO THEODAHADUS REX.
<1> Potestatis nostrae censuram rerum uolumus esse modestiam, ut, quantum diuina
beneficia percepimus, tantum aequabilia plus amemus. priuata siquidem studia a
nostro animo probantur exclusa, quia generalis dominus custos factus sum deo
auxiliante cunctorum. et ideo praesenti iussione praecipimus, ut quicumque ad
domum nostram noscitur pertinere et curae tuae probatur esse commissus, nullis
praesumptionibus insolescat, quia solus dicendus est ille meus, qui legibus
potuerit esse tranquillus. augete famam nostram per patientiam uestram. <2> Si
quis habuerit cum altero forte negotium, ad communia iura descendite: fora uos
tueantur, non iniqua praesumptio. a domesticis inchoare uolumus disciplinam, ut
reliquos pudeat errare, quando nostris cognoscimur excedendi licentiam non
praebere. mutauimus cum dignitate propositum et si ante iusta districte
defendimus, nunc clementer omnia mitigamus, quia domum exceptam non habet
princeps, sed quicquid diuino auxilio regimus, nostrum proprie confitemur. <3>
Estote ergo circa eos, qui iuri nostro ante fuere subiecti, omnino solliciti:
nullum contra legem aliquid permittatis excedere. laus ad me uestra potius
perueniat quam aliqua querella procedat, quia bona conscientia tunc uere
imperat, cum generaliter praestare festinat.
VI. PATRICIO V. I. QUAESTORI THEODAHADUS REX.
<1> Necessarium probatur esse rei publicae personas dignitatibus aptas eligere,
ut cui iustitia committitur, malis moribus non grauetur. alioquin inefficax est
ab homine exigere quod agnoscitur non habere: contra confidenter quaeritur, quod
inesse sentitur. <2> Et ideo primum nobis placuit tuos mores inspicere, sine
quibus possunt quaelibet optima displicere. ornamentum enim bonorum omnium est
sincera benignitas, quae non est sola, quia de uirtutibus cognoscitur esse
generata. ordinem serua nostri iudicii, ut, sicut haec prima quaesiuimus, ita te
custodire iustitiam prae omnibus sentiamus. <3> Secunda nobis cura fuit
eloquentiae tuae fluenta perquirere, quam licet singulariter diligamus, moribus
tamen iuste postponimus. in illis enim uita cognoscitur, hic tantum lingua
laudatur. sed in te ualde decorum, quia utrumque nosceris habere sociatum.
aequaliter enim splendes actionis merito et dictionis eloquio, ut iuste possit
intellegi per te uoluntas principis expediri. nam inter ceteras artes oratoriam
sic diligimus, ut eam ornamentum litterarum omnium esse fateamur. <4> Quicquid
enim in qualibet disciplina concipitur, ab ista sub decore profertur. reperiat
quamuis magna philosophus: quid proderit sentire, si laudabiliter non possit
excolere? naturale est inuenire, sed facundi decenter adserere. quale est enim
cunctis desiderantibus loqui et res communes ita diserte dicere, quas etiam
prudentes se mirentur audisse? in hac te cognouimus arte praeualidum, ut et
suadere possis suauiter et suggestionibus tuis nescias maligna miscere. <5>
Atque ideo quaesturae tibi fasces per tertiam decimam indictionem propitia
diuinitate concedimus, ut saties generalitatis uotum iuridicorum sequendo
iudicium. totum te legibus, totum responsis trade prudentium. sic nobis optime
famularis, si priscorum seruias constitutis. considera in uerbis tuis laudem
positam principalem: fama nostra est quod loqueris, conscientia sine dubitatione
quod sentis. <6> Intellege quantum sit, quod a te exigatur, cui opinio nostra
committitur. haec subiectos nostros amplectitur: haec per gentes exteras
peruagatur: per hanc ubi non uidemur, agnoscimur. decreta nostra tradunt
ciuitatibus prouinciisque sermones: iudicare de nobis possunt etiam qui nostris
iussionibus obsequuntur. summo ergo studio constat esse seruandum, quod de nobis
potest ferre iudicium.
VII. SENATUI URBIS ROMAE THEODAHADUS REX.
<1> Post primordia nostri imperii uobis feliciter nuntiata congrua nobis
contigit, patres conscripti, causa sermonis ut iudicem nos cognoscatis elegisse,
cuius nos lingua possit ornare. quaestor enim eloquens rei publicae decus est,
qui et uota nostra optime uideatur edicere et antiquorum iura firmo consilio
custodire. <2> Hic est enim Patricius suis iam uocabulis honoratus: nam perpetua
fruitur laude, cui est honor in nomine: cuius affluentem facundiam studia Romana
genuerunt: ostentans merito de loci dignitate peritiam. nam qui illic potuit
imbui, meruit ubique laudari: ibi defaecatus sermo Latinus est: ibi discuntur
uerba toto nitore lucentia. aliae regiones uiua balsama et olentia tura
transmittant: Roma tradit eloquium, quo suauius nil sit auditum. sic bonis
artibus eruditus mox est forensibus aptatus excubiis, ut oratores, quos longa
meditatione perceperat, consimili declamatione monstraret. <3> Notum est etiam
quanta cum collegis suis moderatione contendit. certaminibus eius modestia
semper affuit: dicendi calore raptatus studuit laudabilibus inuentis, non, quod
plerique faciunt, uacauit iniuriis: qui sic perorauit causas sub tranquillitate,
ut mores proprios semper assereret. contendisse siquidem, non litigasse repertus
est. alienam enim causam faciebat suam gloriam. nam sic cognitus est uincere, ut
probaretur contrarii animum non laesisse. <4> Talem itaque uirum non decuit
diutius iustitiam petere, sed docere: quia iudiciaria uirtus est linguae bonis
abundare et mentis temperantiam custodire. cognoscite, patres conscripti, quid
fieri uelimus, quando in iudicibus primum mores elegimus, in ea praesertim
dignitate quae iura consueuit edicere. non enim temporibus nostris potestate
regia est armata quaestura, sed legibus probatur esse composita. <5> Velle
nostrum antiquorum principum est uoluntas, quos in tantum desideramus imitari,
quantum illi iustitiam sunt secuti. illa est enim reuerenda priorum auctoritas,
quae a recto tramite non declinat. sequendi enim necessitatem relinquit
posteris, qui iustitiam suis miscuerit constitutis. et ideo, patres conscripti,
per tertiam decimam indictionem illustri Patricio quaesturae contulimus
dignitatem, ut qui est clarus nomine, magnificus etiam sit honore. fouete in eum
nostra iudicia: ut quod nos praestitimus, uobis placitum nihilominus sentiatur.
VIII. IUSTINIANO AUGUSTO AMALASUINTHA REGINA.
<1> Ita nos gratia uestrae pietatis oblectat, ut quicquid ad decorem nostrum
potest proficere, libenter a uestris uelimus partibus postulare: quia talia
uobis diuina tribuerunt, ut et uos eius affluenter muneribus abundetis et
sperantibus benigno animo quae sunt necessaria concedatis. <2> Et ideo
mansuetudinem uestram reuerenter salutans harum portitorem illum ad excellentiae
uestrae beneficia destinaui, ut marmora uel alia necessaria quae quondam
Calogenitum comparare feceramus, per praesentium portitorem ad nos peruenire
domino fauente iubeatis, ut cognoscamus nos a pietate uestra re uera diligi,
quorum facitis uota compleri. uestra enim gloria est noster ornatus, quando uos
praestitisse cognoscitur quod nostris laudibus adplicatur. decet enim ut et
orbis iste Romanus iuuamine uestro resplendeat, quem amor uestrae serenitatis
illustrat.
VIIII. IUSTINIANO AUGUSTO THEODAHADUS REX.
<1> Aequum est, sapientissime imperator, ut illa nobis libenti animo faciatis
impendi, ad quae si essemus desides, a uestra potius clementia deberemur
hortari. uobis enim gratum esse non dubium est, quicquid per nos ad Italiae
decorem contigerit expediri, quia laudibus uestris iure proficit, quando uidetur
crescere quod ad nostrae rei publicae potest gloriam pertinere. <2> Quapropter
exhibens principatui uestro reuerentissimum salutationis affectum harum
portitorem ad illa direximus exhibenda, ad quae quondam Calogenitus fuerat
destinatus, ut, etsi persona rebus humanis subtracta est, beneficia tamen uestra
ad nos, domino iuuante perueniant, ne cassetur desiderium quod conuenienter est
de nostra praesumptione securum.
X. THEODORAE AUGUSTAE AMALASUINTHA REGINA.
<1> Cum propositi nostri sit illa quaerere quae probantur ad gloriam pii
principis pertinere, dignum est uos sermone uenerari, quos bonis omnibus constat
semper augeri. concordia non est sola praesentium: quin immo illi se melius
respiciunt, qui animi caritate se coniungunt. atque ideo reddens Augustae
reuerentiae salutationis affectum spero, ut redeuntibus legatis nostris, quos ad
clementissimum et gloriosissimum principem destinauimus, de uestra nos faciatis
sospitate gaudere, quia prospera uestra ita nobis grata uidentur ut propria et
necesse est sospitatem desideranter suscipere, quam nos iugiter constat optare.
XI. MAXIMO V. I. DOMESTICO THEODAHADUS REX.
<1> Si gloria est bonorum principum incognitas honoribus clarificare personas,
dum quicquid a subiectis proficitur regnantum laudibus applicatur, quanto nobis
praestantius est nobilissimae familiae reddere, quod eam cognoscimus etiam
nascendi sorte meruisse! sic enim iustitiam sequimur, si bonis heredibus
parentum praemia non negemus. decet enim etiam priores suos uincere, qui ad
nostra meruerunt tempora peruenire. <2> Anicios quidem paene principibus pares
aetas prisca progenuit: quorum nominis dignitas ad te sanguinis fonte perducta
collectis uiribus hilarior instaurata rutilauit. quis ergo relinqueret in
posteris minus honoros, quos tamdiu constat fuisse praecipuos? accusarentur
saecula, si talis potuisset latere familia. atque utinam nobis Marios uel
Coruinos annosior uita seruasset! uix satiaretur principis uotum, si nos
contingeret personas illas talium possidere meritorum. quemadmodum nunc profecto
neglegamus inuenta, qui desideramus habere praeterita? <3> Atque ideo, quod
feliciter dictum sit, primiceriatus, qui et domesticatus nominatur, ab
indictione quarta decima tibi conferimus dignitatem. usurus es omnibus titulis
qui ad eius pertinent actionem. hic honor quamuis tantis natalibus uideatur
inferior, cunctis tamen fascibus tuis uidetur esse felicior: cuius tempore
meruisti coniugem regiae stirpis accipere, quam in tuis curulibus nec
praesumpsisses optare. <4> Age nunc, ut sicut tibi est uotiuus, ita nobis
reddatur acceptus. considera quid merueris et dignum te nostra affinitate
tractabis. nam qui familiae regnantis adiungitur, in laudum gremio collocatur.
nunc maior opera mansuetudini detur: nunc omnibus communio benigna praebeatur,
ut talem probemur elegisse, quem nulla possit prosperitas immutare. humilis age
rem gloriae, quia de modestia laus sumitur, de elatione odium concitatur.
prouectibus quidem proxima est indubitanter inuidia, sed tolerantia melius
uincitur, quae contentione semper augetur. <5> Supra ceteras uirtutes amicam
sapientibus ama patientiam: erectus ex nobis sustinendo potius quam uindicando
laudaberis. iram uince: benigna dilige: caue, ne maior uideatur esse felicitas
moribus tuis, sed qui nostro iungeris generi, proximus gloriosis actionibus
comproberis. laudati sunt quidem hactenus parentes tui, sed tanta non sunt
coniunctione decorati. nobilitas tua non est ultra quo crescat. quicquid
praeconialiter egeris, proprio matrimonio dignissimus aestimaris.
XII. SENATUI URBIS ROMAE THEODAHADUS REX.
<1> Ne quis nos, patres conscripti, in honoribus dandis non aestimet habuisse
rationem, quod post insignia consulatus minora magis posterius conferamus. quin
immo suaserunt nobis merita candidati, ne iam maturus nulla uideretur sumere,
qui primaeuus emerita cognoscitur accepisse. auari quippe principis erat in uno
honore spatia uitae tam magna concludere et ideo magis nihil praestare, quia
prius cognoscitur summa meruisse. quin potius omnia miscue concedamus: nulla
dignitas minor est, cum bene geritur, quando reuerentiam plerumque actio uidetur
accipere de claritate personae. haec autem tunc sunt gradibus distincta, cum
diuersis fuerint attributa. nam honorem suum semper aequaliter retinet quicquid
probe gesserit consularis. sic minorum fluminum uocabula maior amnis absorbet et
quamuis plurima fluenta Tiberis uester excipiat, tamen a proprio nomine non
declinat. <2> Et ideo, quod feliciter dictum sit, illustri uiro atque magnifico
patricio Maximo primiceriatus, qui et domesticatus nominatur, a quarta decima
indictione gerendam tribuimus dignitatem, ut mediocritas honoris merito
cresceret praesidentis. neque enim fas est humile dici quod gerit Anicius:
familia toto orbe praedicata, quae uere dicitur nobilis, quando ab ea actionis
probitas non recedit. <3> Sed his bonis addimus, patres conscripti, ut nostrae
affinitati praecelsae clara familiae uestrae gratia misceatur. uerum hanc
gloriam non sibi tantum potest unus assumere, quam nos probamur Romano nomini
contulisse. reddite affectui meo plenissimam caritatem. plus est amandus a
domino, qui parentis nomen dignatus est praestare subiecto. <4> Sed aequum est,
patres conscripti, ut carus existat, per quem uobis tam felicia contigerunt.
exultate generaliter et has nuptias laetitia profusa celebrate. unde profecit
nomen omnium, uota debent esse cunctorum. quae preces a me exigere potuerunt,
quod meus animus spontanea deliberatione concessit, ut uestri ordinis uiros
parentes uere appellare possimus, qui nobis affinitatis claritate iungendi sunt?
XIII. SENATUI URBIS ROMAE THEODAHADUS REX.
<1> Postquam uenerabiles uiros episcopos agnita legatione remisimus nec
petitionibus uestris, quamuis essent quaedam reprehensibilia, noster animus
obuiasset, uenientes ad nos aliqui retulerunt ciuitatem Romanam adhuc inepta
sollicitudine laborare et id agere, ut, nisi nostrae mansuetudinis interesset,
pericula sibi potius certa ex dubiis suspicionibus concitaret. unde aestimate,
cui debeat populorum inanis leuitas imputari nisi uestro ordini, a quo decuerant
cuncta componi. <2> Per uestram siquidem sapientiam ammoneri prouincias oportuit
uniuersas, ut talia probarentur assumere, quae principis primordia uiderentur
ornare. uerum quae ciuitas non fiat excusabilis, si Roma deliquerit? res minor
ad potioris currit exemplum et alieni facti iure inuidiam sustinet, quae
peccatis praestat exemplum. sed gratias diuinitati referimus, quae dona sua
uestris potius ornauit excessibus. <3> Ecce prius culpas ignoscimus quam
deuotiones aliquas sentiamus. nil debemus et soluimus: ante benefici sumus, ut
postea gratissimos inuenire possimus. sed licet in hac parte nostrae modestiae
grauitas asseratur, nolumus tamen nos tantum praedicari, nisi ut et deuotionis
Romanae benignitas possit ostendi. plus enim uestra opinione pascimur, quam si
de nostra semper tranquillitate laudemur. <4> Amouete suspiciones ab ordine
uestro semper extraneas. non decet senatum corrigi, qui debet alios paterna
exhortatione moderari. nam ex quibus habebunt genium mores, si parentes publicos
minores contigerit inueniri? sufficiunt haec nobilibus, sufficiunt ista
uerecundis, ut ad studium perfectae deuotionis incitemus quos paululum de praua
suspicione culpauimus. nos enim quod praesentiam uestram expetiuimus, non
uexationis iniuriam, sed utilitatis uestrae causas profunda cogitatione
tractauimus, ut illud magis debuissetis efficere, quod uobis cognouimus
expedire. <5> Certe munus est uidere principem. hoc a uobis pro rei publicae
utilitate uolumus fieri, quod praemiis solebat optari. sed ne ipsa remedia in
aliqua parte uiderentur austera, cum res poposcerit aliquos ad nos praecipimus
euocari, ut nec Roma suis ciuibus enudetur et nostra consilia uiris prudentibus
adiuuentur. <6> Redite ergo in pristinam deuotionem, et sollicitudines meae,
quas pro generalitate sustineo, uestro potius adiuuentur ingenio, quia hoc uobis
semper insitum fuit principibus uestris uotum puritatis offerre nec parere
necessitate terroris, sed potius amore dominantis. reliqua per harum portitorem
illum uerbo dicenda commisimus, ut summotis cogitationibus ambiguis nostris
ammonitionibus credere debeatis.
XIIII. POPULO ROMANO THEODAHADUS REX.
<1> Licet uobis sit insitum dominos uestros pura mente diligere et obsequiis id
agere, ut regnantis animum possitis habere placabilem, hoc tamen maiorum
uestrorum semper proprium fuit, ut tamquam membra capiti, ita suis principibus
uiderentur adiungi. quam enim uicissitudinem reddat qui maximo labore
defenditur, cuius per dies singulos ciuilitas custoditur, nisi ut illos diligat
supra omnia, per quos habere probatur uniuersa? <2> Absit enim a temporibus
nostris, ut in uobis aliquid tale reperiamus, quod nostris indignationibus esse
possit idoneum. fides uestra, quae uos hactenus asseruit, modo potius euidenter
ostendat. non uarium, non dolosum, nec seditionibus plenum populum decet esse
Romanum. mali mores uestro nomini probantur aduersi. sed hoc quoque mirabile
est, quod grauitatem uestram cogimur ammonere, quam constat semper sponte
sapuisse. nullae uos ineptae suspiciones, nulla timoris umbra deterreat. habetis
principem, qui pietatis studio optet in uobis inuenire quod diligat. hostibus
uestris, non defensoribus obuietis. inuitare, non excludere debuistis auxilium.
<3> Sed sensus iste fortassis eorum est, qui minus probantur intellegere quae
generaliter poterant expedire: ad uestrum potius redite consilium. numquid uos
noua gentis facies ulla deterruit? cur expauistis, quos parentes hactenus
nominastis? qui relictis familiis ad uos uenire properabant, de uestra erant
potius securitate solliciti. quando, rogo, talis ab illo uicissitudo recepta
est, cui salutis praemia debebantur? <4> Illud enim, quod ad nos attinet, scire
debuistis, quia die noctuque incessanter optemus, ut quod parentum nostrorum
temporibus constat enutritum, sub nobis potius diuinis auxiliis augeatur. ubi
enim fama regnantis erit, si uos, quod absit, patiamur imminui? nolite talia
cogitare, qualia nos minime uidetis assumere. immo magis, si quis aliqua
iniquitate depressus est, spem de bona conscientia non amittat, quando subleuare
cupimus quos studere probis moribus inuenimus. <5> Aliqua etiam uobis per illum
uerbo dicenda commisimus, ut nostrum circa uos in omni parte animum propitium
sentientes, iugibus, sicut oportet, obsequiis et oratione sincera deuoti esse
debeatis.
XV. IUSTINIANO IMPERATORI THEODAHADUS REX.
<1> Constat desiderium nostrae uoluntatis expleri, quotiens ad pietatem uestram
salutiferos apices contigerit destinari, quia semper felici gaudio repletur, qui
uobiscum sincera mente colloquitur. et ideo salutans clementiam uestram
honorificentia competenti harum portitorem pro negotio Rauennatis ecclesiae
uenientem gratissima uobis petitione commendo: quando talis offertur causa
praestandi, ubi merces uideatur adquiri, quam uos facere semper exoptant qui
serenitatem uestram florere desiderant. non est enim dubium meliora recipere,
quos contingit iusta praestare.
XVI. SENATUI URBIS ROMAE THEODAHADUS REX.
<1> Imperiosa nimium res est, patres conscripti, pietas nostra, quando propria
uoluntate uincimur, qui alienis condicionibus non tenemur. nam cum deo
praestante possimus omnia, sola nobis credimus licere laudanda. cognoscitis,
prudentes uiri, uerba quae loquimur: uel nunc clementiam, quam nobis ante
promittere debuistis, agnoscite. ecce nec sollicitos patimur, quibus infensi
esse putabamur. sic est a principe grauis uincenda suspicio: sic curare debuit,
qui noxius esse non uoluit. postulata siquidem sacramenta uobis ab illo atque
illo praestari nostra decreuit auctoritas, quod bene imperaturo non est
difficile persuasum, quia sic uobis securitatem dedimus, ut nihil nostro
proposito addere uideremur. <2> Talia siquidem qualia promittimus eramus acturi,
quia deo debemus ista, non homini. nam qui per lectiones sacras antiqua regna
cucurrimus, quid aliud optare possumus, nisi quod diuinitati in aliis placuisse
sentimus? ipse enim remunerator est bonorum omnium deus: nam quicquid in
subiectos pietatis efficimus, illum nobis repensare sine dubio iudicamus.
quapropter conscientiam fidelem adepta securitate monstrate, quia post talia
redditur clementiae nostrae potius quam offertur affectus.
XVII. POPULO ROMANO THEODAHADUS REX.
<1> Cognoscite, Quirites, quali uos princeps uester firmitate dilexerit, ut
temptatus asperis rebus non uos pateretur esse sollicitos, nec uoluimus amplius
uota uestra differri, quos semper optamus in summa rei publicae celebritate
laetari. uestra enim securitas noster ornatus est et hoc uere gratanter
accipimus, cum gaudia uos habere sentimus. quapropter, flexi petitionibus
uestris, per illum atque illum praestari uobis sacramenta censuimus, ut regis
uestri animum non habeatis incognitum: nec liceat falsis suspicionibus errare,
dum manifeste teneatur quod credatis in principe. <2> Aestimate quid uobis
benignitatis uideatur impendi, quando ille iurat, qui non potest cogi. scimus
enim pro remedio nos datos esse cunctorum: non despicimus sanare subiectos: et
ideo, licet culmini nostro uideretur incongruum, libenter adquieuimus facere,
quod generalitatem probamus optasse. intellegite, quantum nobis imponere uester
uideatur affectus: fide uobis constringimur, qui uel solo uerbo promissa seruare
sacris lectionibus ammonemur. ostendite nunc deuotionem uestram: supernae
maiestati iugiter supplicate, ut tranquilla tempora, quae uos habere cupimus,
caelesti munere concedantur.
XVIII. SENATUI URBIS ROMAE THEODAHADUS REX.
<1> Remedium, quod pro uobis, patres conscripti, pia mente tractauimus, non
sinimus uobis fieri acerba suspicione contrarium, quia laesionis instar est
occulte consulere et aliud uelle monstrare. cognoscite itaque arma nostra pro
salute uestra potius destinata, ut qui uos temptauerit appetere, diuino auxilio
Gothorum manus ei debeat obuiare. nam si insidias gregis strenuus pastor
excludit, si pater familias diligens decipientibus locum subreptionis
intercipit, qua nos conuenit cautela Romam defendere, quam constat in mundo
simile nihil habere? summa non mittuntur in casu, quia probatur minus diligere,
qui neglegit aduersa tractare. <2> Sed ne in aliquo uobis grauis existeret uel
ipsa defensio, exercitui destinato ordinante illo annonas fecimus secundum forum
rerum uenalium comparari, ut et illis tolleretur necessitas excedendi et uobis
auferretur causa dispendii. his etiam praefecimus maiorem domus nostrae
Vuaccenem, qui pro suarum qualitate uirtutum bellatoribus esset iure reuerendus,
cuius exemplo et excessus uitarent et fortitudinis instrumenta perquirerent. <3>
Quos tamen locis aptis praecepimus immorari, ut foris sit armata defensio, intus
uobis tranquilla ciuilitas. intellegite quid excogitauerit consolatorium
principis pro uobis ingenium: defensio uos obsidet, ne manus inimica circumdet
et a periculis excipimus quos nostrorum sanguine uindicamus. absit enim ut
nostris temporibus urbs illa muris uideatur protegi, quam constat gentibus uel
sola opinione fuisse terrori. ita enim de diuino speramus auxilio, ut quae
semper fuit libera, nullius inclusionis decoloretur iniuria.
XVIIII. IUSTINIANO AUGUSTO THEODAHADUS REX.
<1> Gratias diuinitati referimus, cui est regum semper accepta tranquillitas,
quod prouectum nostrum clementiae uestrae gratissimum esse declarastis. constat
enim amare uos posse, quem gaudetis ad regni culmina peruenisse. sic decuit
suscipi qui se per uos praesumpsit augeri. praestate igitur mundo uestrae
benignitatis exemplum, ut detur intellegi quantum promoueat, qui se pura uobis
affectione commendat. <2> Non enim rixas uiles per regna requiritis: non uos
iniusta certamina, quae sunt bonis moribus inimica, delectant, quia nihil aliud
uos constat appetere, nisi quod opinionem uestram possit ornare. quemadmodum
enim pacem exorati poteritis abicere, quam pro ingenita pietate et iracundis
gentibus consuestis inponere? bona quidem uestrae concordiae non tacemus. totum
creditur eximium, quicquid uobis fuerit praedicabili caritate sociatum. <3> Sed
et uobis, gloriosi principes, cum sitis absolute mirabiles, aliquid tamen
additur, cum uos omnia regna uenerantur. nam commune est cunctis in suis
imperiis praedicari, sed illud est omnimodis singulare in extranea gente laudes
proprias inuenire, quia ibi sunt uera iudicia, ubi neminem comprimit ulla
timiditas. diligeris quidem, piissime imperator, in propriis regnis: sed quanto
praestantius est, ut in Italiae partibus plus ameris, unde nomen Romanum per
orbem terrarum constat esse diffusum! oportet ergo uestram pacem seruari, quae
uobis contulit exordia gloriosa uocabuli. <4> Sed ut sacris affatibus ordine
respondere uideamur, reuerentissima salutatione decursa piis sensibus indicamus
beatissimum papam urbis Romae uel amplissimum senatum nostra praeceptione
commonitos, ut uir eloquentissimus Petrus legatus serenitatis uestrae et
doctrina summus et conscientiae claritate praecipuus sine aliqua dilatione
competentia responsa reciperet nec contra uestram uoluntatem moras incongruas
sustineret, quia totum illud desideramus efficere, quod uestro nequeat iudicio
displicere: quando et pietatem uestram hoc studere cognoscimus, quod nobis per
omnia prodesse sentimus. <5> Cui uirum uenerabilem illum legatum nostrum
adiungendum esse credidimus, ut non per occasionem legationis uestrae, sed
propria potius destinatione nostra possitis uota cognoscere.
XX. THEODORAE AUGUSTAE THEODAHADUS REX.
<1> Litteras pietatis uestrae gratia, qua desiderata semper sumuntur, accepi et
colloquia oris uestri muneribus omnibus celsiora reuerentissima gratulatione
promerui, cuncta mihi de tam sereno animo promittens, quando quicquid optare
potui, in tam benigna collocutione suscepi. <2> Hortamini enim ut quicquid
expetendum a triumphali principe domno iugali uestro credimus, uestris ante
sensibus ingeramus. quis iam dubitet ad effectum peruenire, quod talis potestas
dignabitur allegare? ante quidem de causarum nostrarum aequitate praesumpsimus,
sed nunc amplius de uestra promissione laetamur. non enim poterunt uota nostra
differri, quando interest, quae meretur audiri. nunc implete promissa, ut rem
tenere faciatis, cui spem certissimam contulistis. <3> Additum est etiam gaudio
meo, quod talem uirum uestra serenitas destinauit, qualem et tanta gloria debuit
mittere et uestra decet obsequia retinere. dubium enim non est illam mores
deligere, cui obseruatur assidue, dum constat defaecari animum bonis
praeceptionibus institutum. hinc est quod uestra reuerentia commoniti duximus
ordinandum, ut siue beatissimus papa siue senatus amplissimus sine aliqua
dilatione respondeant, quod ab eis expetendum esse iudicastis, ne gloria uestra
minus reuerenda putetur, cui studium dilationis opponitur, sed potius de
celeritate facti uotiua gratia possit augeri. <4> Nam et de illa persona, de qua
ad nos aliquid uerbo titillante peruenit, hoc ordinatum esse cognoscite, quod
uestris credidimus animis conuenire. desiderium enim nostrum tale est, ut
interueniente gratia non minus in regno nostro quam in uestro iubeatis imperio.
significamus itaque supra dictum ante nos a uenerabili uiro papa egredi fecisse,
quam uester legatus harum portitor de urbe Roma potuisset exire, ne aliquid
accederet quod uestris animis obuiaret. <5> Quapropter salutans ueneratione,
quae tantis debet meritis exhiberi, uirum uenerabilem illum et moribus et
doctrina pollentem sanctitatis etiam honore reuerendum ad uestram clementiam
legationis officio peculiariter curauimus destinandum, quia gratas uobis illas
credimus esse personas, quas diuinis mysteriis iudicamus acceptas.
XXI. THEODORAE AUGUSTAE GUDELIVA REGINA.
<1> Aestimare te conuenit, Augustarum prudentissima, quantis cupiam nisibus
gratiam uestram quaerere, quam etiam domnus iugalis meus magno studio desiderat
optinere. nam licet hoc illi sit omnimodis carum, mihi tamen cognoscitur esse
praecipuum, quando me tantae dominae ita potest amor erigere, ut supra regnum
cognoscar maius aliquod inuenire. quid enim gratius quam si gloriae uestrae
uidear caritatis participatione sociari, ut quia uos abunde fulgetis, nobis
libenter de proprio splendore mutuemini, cum damnum non est lumini alteri de sua
claritate largiri? fouete desideria nostra, quae cognoscitis sinceritate
praecipua. gratia uestra per omnia nos regna commendet. debetis enim nos claros
reddere, qui de uestra uolumus luce fulgere. <2> Quapropter serenitati uestrae
reuerentiam salutationis inpertiens affectuosa me animis uestris praesumptione
commendo, sperans, ut sic omnia mirabilis prudentia uestra componat, quatenus
fiducia, quae nobis de animo uestro data est, uberius augeatur. nam cum nullam
inter Romana regna deceat esse discordiam, emersit tamen et qualitas rei, quae
nos efficere cariores uestrae debeat aequitati.
XXII. IUSTINIANO IMPERATORI THEODAHADUS REX.
<1> Retinetis, sapientissimi principum, et per legatos nostros et per uirum
disertissimum Petrum, quem nuper ad nos uestra pietas destinauit, quo studio
concordiam Augustae serenitatis optemus. et nunc iterum per illum uirum
sanctissimum eadem credidimus esse repetenda, ut uera atque affectuosa iudicetis
quae frequenter expetita cognoscitis. pacem siquidem sub omni sinceritate
petimus, qui causas certaminis non habemus. talis ergo ad nos ueniat, sic
composita, sic decora, ut eam tantis uotis merito quaesisse uideamur. absit
autem ut quod nobis committitur debeat ingrauare. <2> Pro nobis potius tractate
quod conuenit. trahitur enim ad beniuola, cui causa creditur rationabiliter
ordinanda, nec potest utilitatem propriam anteferre, cui magis decorum est
credenti profutura praestare. considerate etiam, principes docti, et Ablabi
uestri historica monimenta recolite, quantum decessores uestri studuerint de suo
iure relinquere, ut eis parentum nostrorum foedera prouenirent. aestimate, qua
gratia debent oblata suscipi, quae consuerant postulari. non arroganter
loquimur, qui ueritatem fatemur. gloriae uestrae potius proficit quod
demonstrare contendimus, quando nunc illi uestram gratiam ultro quaerunt, qui
suis parentibus meliores se esse cognoscunt. associentur amicitia gratuita
uestris animis quos prius uobis largitatis studio iungebatis, ne bona tantum
illorum temporum fuisse credantur, quae uos et copiosa benignitate uincitis et
affluenti munere superatis. <3> Atque ideo salutationis honorificentiam
praelocuti illum uirum uenerabilem sacerdotio clarum, doctrinae laude conspicuum
legationis nostrae ad pietatem uestram fecimus uota deferre. confidimus enim in
uirtute diuina, quod et suis meritis uobis abunde placeat et desideria probae
petitionis optineat, sperantes ut eum cum effectu rerum celerius recipere
debeamus. sed quia epistularis series continere non poterat uniuersa, aliqua
sacris sensibus uerbo insinuanda commisimus, ne fastidium uobis faceret lectio
prolixa chartarum.
XXIII. THEODORAE AUGUSTAE THEODAHADUS REX.
<1> Suscipientes legatum uestrum uirum eloquentissimum Petrum et, quod est ipsis
dignitatibus honorabilius, uestris obsequiis inhaerentem, optata nobis Augustae
gratiae monimenta fulserunt, ut per eum disceremus acceptum uobis esse, quod in
hac re publica constat euenisse. ostendistis uos diligere quicquid ad iustitiam
cognoscitur pertinere, quando per diuinam prouidentiam omni suspicione detersa
desiderabilis potest unanimitas permanere. nunc est potius quod regna coniungat
promissio fixa et uotiua concordia. <2> Et ideo illum uirum uenerabilem uestris
conspectibus uere dignissimum legatum nostrum ad uos specialiter credidimus esse
dirigendum, ut, uobis annitentibus, serenissimi iugalis uestri pacis gratia
solidetur, quatenus generalitas euidenter agnoscat merito uenisse nos ad
suauitatem foederis per tale uinculum caritatis. <3> Et quia semel bene inita
nulla debent contraria occasione suspendi, si quid est quod difficultate sui
nobis non oportet imponi, sapientiae uestrae moderatione mitigetur, ut affectum,
quem circa regnum uestrum habere coepimus, iugibus studiis augeamus. <4>
Quapropter erigite uestrae sapientiae firmitatem et hanc uobis palmam concordiae
specialiter uindicate, ut, sicut clementissimi imperatoris fama in proeliis
inclita dicitur, ita in pacis studio opinio uestra cunctorum ammiratione
laudetur. familiariter uos et frequenter uideat harum portitor quem direxi,
quatinus effectum possit celerem promereri, qui ad praesumptam gratiam uisus est
destinari. speramus enim iusta non grauia, cum tamen nihil uideatur inpossibile,
quod per talem gloriam cognoscimus allegare.
XXIIII. THEODORAE AUGUSTAE GUDELIVA REGINA.
<1> Veniente uiro sapientissimo Petro ita nos amor uestrae serenitatis expleuit,
ut uidisse nos aestimemus, cuius colloquia benigna suscepimus. quis enim tanta
affabilitate suscepta non reddat uenerationis eximia, cui ante dignationis
eloquium iure ab omnibus commendationis suae debetur officium? <2> Et ideo per
illum uirum uenerabilem legatum domni iugalis nostri ad uos specialiter directum
salutiferos apices curauimus destinandos, ut recurrens uestrae serenitatis
affatus et de optata incolumitate laetificet et de firmissimae gratiae nos
faciat exultatione gaudere. tali enim compendio et causarum bene disponitur ordo
et uestrae tranquillitatis geminata crescit affectio. suscipiamus ergo uestri
animi bona, quia hoc est uere regale propositum gloriose uiuere amore cunctorum.
<3> Quaedam uobis per harum portitorem uerbo suggerenda commisimus, quae pro
ingenita mansuetudine et libenter accipite et efficaciter deo auxiliante
praestate.
XXV. IUSTINIANO IMPERATORI THEODAHADUS REX.
<1> Per uenerabilem uirum Heracleanum presbyterum Augusta nobis pagina uestrae
serenitatis illuxit, gratiam sermonis benigne tribuens et apte munera
salutationis inpertiens, ut re uera magnum sit beneficium tam suaue principis
meruisse colloquium. cui reddimus quanta ualemus caritate responsum, optantes ut
et sospitatem uestram saepius nos audire contingat et regni uestri felicitas
semper accrescat, quia tale uotum nos decet habere, quod gloriam salutemque
uestram iugiter possit extendere. <2> Significamus etiam pro uestro uoto ad
papam urbis Romae nos litteras destinasse, ut praesentium gerulo litterarum sine
aliqua dilatione respondeat, quatenus qui a uobis dirigi meruit, celeritatis
gratiam consequatur. nostri enim uoti est causas emergere, in quibus possimus
uestris desideriis oboedire, quia sic uos ad reddendam dilectionem efficaciter
commonemus, si uobis in aliqua parte pareamus.
XXVI. IUSTINIANO IMPERATORI THEODAHADUS REX.
<1> Intellegimus serenitatis uestrae gratiam muneribus omnibus ditiorem, quando
illa nos hortamini facere, quae ad mercedem nostram possint omnimodis pertinere.
tale siquidem uotum semper amantis est, ut causas nos misericordiae uelitis
agere, quae nos diuinae possint commendare potentiae. <2> Et ideo significamus
gloriae uestrae monasterium famularum dei, quod uobis insinuatum est tributorum
graui sorte laborare, eo quod ager eius nimia inundatione perfusus sterilitatis
uitia de inimica humectatione contraxerit: ad uirum eminentissimum Senatorem
praefectum praetorio dedisse nos nihilominus iussionem, ut eius ordinatione
prouida ad praedium, de quo querella est, diligens inspector accedat et, rebus
moderata inquisitione trutinatis, quicquid grauaminis potest habere possessio,
rationabiliter abrogetur, ita ut competens atque sufficiens dominis remanere
possit utilitas, quia uere nobis lucrum pretiosissimum iudicamus, quod pro
mansuetudinis uestrae uoluntate concedimus. <3> De Ranildae quoque causa, unde
uestra serenitas me commonere dignata est, quamuis ante longum tempus sub
parentum nostrorum regno contigerit, tamen necesse nobis fuit negotium de
propria largitate componere, ut tali facto eam non paeniteret mutata religio.
<4> Earum siquidem rerum iudicium non praesumimus, unde mandatum specialiter non
habemus. nam cum diuinitas patiatur diuersas religiones esse, nos unam non
audemus imponere. retinemus enim legisse nos uoluntarie sacrificandum esse
domino, non cuiusquam cogentis imperio: quod qui aliter facere temptauerit,
euidenter caelestibus iussionibus obuiauit. merito ergo pietas uestra inuitat
nos ad talia quae nobis praecipiunt diuina mandata.
XXVII. SENATORI PPO THEODAHADUS REX.
<1> Non dare, sed reddere uidetur expensas, quisquis tributariis aliquo remedio
subuenire festinat. quid enim iustius est quam petenti conferre quod
intellegitur ipse laborasse? ad misericordiam forsitan pascantur otiosi: cultor
agri ad futuram famem deseritur, nisi ei, cum necesse fuerit, subuenitur. <2>
Quapropter industriosae Liguriae deuotisque Venetiis copia subtracta dicitur
esse de campis: sed nunc nascatur in horreis, quia nimis impium est plenissimis
cellis uacuos esurire cultores. atque ideo illustris magnitudo uestra, quorum
dignitas ad hoc legitur instituta, ut de repositis copiis populum saturare
possetis, Liguribus, quos tamen indigere cognoscitis, tertiam portionem ex
horreis Ticinensibus atque Dertonensibus per solidum uiginti quinque modios
distrahi censitote. <3> Venetis autem ex Taruisiano atque Tridentino horreis ad
definitam superius quantitatem idem dari facite tertiam portionem, ut miserata
diuinitas copiam largiri possit, quam homines in se exercuisse cognoscit. et
ideo tales uiros his distributionibus adhibete, ut indulgentia nostra maxime ad
illos perueniat qui suis uiribus pasci minime potuerunt.
XXVIII. SENATORI PPO THEODAHADUS REX.
<1> Decet regiam iustitiam custodire quod a iudicibus bene agentibus fuerit
ordinatum, maxime quorum conscientia sic nota est, ut nihil incaute, nihil
uenalitatis studio fecisse uideantur. et ideo arcarios prorogatores tritici,
uini et casei, macellarios, uinarios, capitularios horreariorum et
tabernariorum, fenerarios et cellaritas, qui ad urbem Romam uel ad mansionem
pertinent Rauennatem, sed et eos, qui ripam Ticinensem et Placentinam siue per
alia loca quicumque publicos titulos administrare noscuntur, quos a uobis
conperimus ordinatos, cuius iudicia sic libenter amplectimur, sic seruari
desideramus, tamquam a nobis facta esse credantur, nec sinimus contra illos
cuiusquam praeualere malitiam, qui uestro iudicio amministrationes publicas
susceperunt. <2> Quapropter in designatis titulis ambitio, inimica semper
iustitiae, conquiescat: consuetudinarium bene agentibus locum protinus tollamus
inuidiae: non liceat cuiquam intra quinquennium praedictis uelle succedere, si
tamen uestra inquisitione eos nulla culpa respuerit. sint ergo intrepidi, qui
uestra uoluntate uel sunt uel fuerint ordinati: procurent sibi necessaria
securi: non timeat intra hoc quinquennium expelli, quem commendauerit probitas
actionis. <3> Propter sterilitatem quoque praesentis temporis de singulis
speciebus, prout eminentiae uestrae rationabiliter uisum fuerit, pretia facite
temperari, ut hi, quibus commissum est exercere singulos apparatus, de iniusto
grauamine non querantur. sed quoniam humana ambitio nisi per metum damni non
potest inhiberi, si qui a uobis titulis ordinatis, siue suffragiis siue
patronorum precibus nisus, uisus fuerit cuique succedere, statim triginta
librarum auri multa feriatur, a uobis nihilominus exigenda. <4> Quod si ad hoc
damnum idoneus non potuerit inueniri, corporali supplicio poenam luat qui non
potuerit in supra dicta perculsione sufficere et frustretur ausibus suis, poena
etiam inurendus infamiae, qui contra interdicta nostra aliqua tergiuersatione
uenire temptauerit. nihil enim securum, nihil poterit stabile reperiri, si
semper inuidentium uota ad illicitas accedere permittantur insidias. quod
magnitudo uestra in omnium faciat peruenire notitiam, ne quis per ignorantiam se
existimet excusandum, quod non intellexerit fuisse prohibitum.
XXVIIII. VVISIBADO COMITI THEODAHADUS REX.
<1> Cum generis tui honoranda nobilitas et magnae fidei documenta suasissent, ut
tibi urbem Ticinum, quam per bella defenderas, gubernandam pace crederemus,
limosae podagrae subita inundatione completus, aquas Bormias potius siccatiuas,
salutares huic specialiter passioni, uelle te expetere postulasti. desiderium
tuum remediali iussione sanamus, ut sospitatem, quam merito in te quaerimus,
iussionis beneficio compleamus. <2> Absit enim, ut bellicosissimum uirum
tyrannis grauissimae calamitatis exarmet, quae miro modo membra uirentia
infusione poenalis umoris cogit arescere nodosque mobiles replet marmoreo tumore
crescentes. cum norit alia cuncta uacuare, iuncturae petit concauas lacunas, ubi
palustri statione pigrescens saxa perficit de liquore et quae ad decorem
inflexionis natura laxauerat, in turpissimum rigorem peregrina soliditate
constringit. <3> Haec passio insanabilis et sanitas passibilis ligat solutos,
contrahit uiuos et decrescere facit corpora, quae nulla sunt mutilatione
truncata. constantibus membris proceritatis mensura perit et minor cernitur, cui
nihil subductum esse sentitur. subtrahuntur superstiti ministeria membrorum:
corpus uiuum est nec mouetur et inter insensibilia redactum iam non proprio
uoto, sed motu fertur alieno. haec uiua mors supra omnia tormenta sana dicitur
et melius habere fertur, qui euasisse causam tanti periculi non probatur. <4>
Desederit quidem dolor, sed dimittit reliquias fortiores et, nouo infelicitatis
exemplo, passio uidetur abscedere et aeger non desinit aegrotare. appendia ipsa
cruciatis debitoribus aliquando soluuntur: ista enim uincula sunt quae, cum
semel potuerint illigare captum, nesciunt in tota uita dissoluere. infelicia
signa relinquit abscedens et more gentium barbararum hospitium corporis
occupatum suis indiciis uiolenta defendit, ne ubi ferox ista coepit succedere,
aduersa illuc iterum sanitas audeat fortassis intrare. hoc licet omnibus
uideatur esse contrarium illis maxime, qui armorum exercitatione floruerunt, ne
membra illa durissima langoris decoctione mollescant, et qui ab hoste foris
superari minime potuerunt, ab interna potius contrarietate uincantur. perge
igitur auctore deo gressibus tuis ad locum praedictum. absit enim, ut bellator
noster ambulet passibus alienis. equino dorso, non humana subuectione portetur,
quia uiro forti graue est sic uiuere, ut nec inermem possit implere. quae ideo
tibi exaggerata narratione retulimus, ut ad studium sanitatis uotiua nimis
cupiditate rapiaris. utere igitur aquis illis, primum potae dilutoriis, deinde
thermarum exhalitationibus siccatiuis, ubi merito indomabilis ceruix illa
flectitur passionis, quando interna plurima effusione mundantur, exteriora
attractiua uirtute libera fiunt et uelut duobus auxiliis congregatis in medium
missa superatur. amentur illic munera concessa diuinitus. contra illam humani
generis debellatricem data sunt opportuna munimima lauacrorum et quam non edomat
iuge decennium, non mille potionum mollit introitus, uoluptuosis illic remediis
effugatur. praestent optatum diuina beneficium, ut famam loci uerissimam tua
potius salubritate noscamus, quem nobis desiderabile est euadere quicquid adimit
corpoream sospitatem.
XXX. HONORIO PRAEFECTO URBIS THEODAHADUS REX.
<1> Relationis uestrae tenore comperimus in uia sacra, quam multis
superstitionibus dicauit antiquitas, elephantos aeneos uicina omnimodis ruina
titubare, et qui solent in carnali substantia supra millenos annos uiuere,
occasum uideantur proximum in simulacris aereis sustinere. his prouidentia
uestra reddi faciat propriam longaeuitatem uncis ferreis hiantia membra
solidando: aluum quoque demissam subdito pariete corroboret, ne illa magnitudo
mirabilis soluatur turpiter in ruinam. <2> Nam et uiuis ipse casus aduersus est,
qui, dum in genus cubationis arte hominum succisis arboribus ingentia membra
commiserint, toto pondere supinati nequeunt propriis uiribus surgere, quos semel
contigerit corruisse, scilicet quia pedes eorum nullis inflectuntur articulis,
sed in modum columnarum rigentes atque incuruabiles iugiter perseuerant. ibi
tanta mole prostrati sunt, ut tunc magis metallicos possis credere, cum se uiuos
aspicias non mouere. iacent superstites similitudine cadauerum: mortuos putes,
quos uiuos esse non dubites et more cadentium fabricarum, nesciunt locum sponte
relinquere, quem suis membris potuerint occupare. <3> Magnitudo illa terribilis
nec formicis minutissimis par est, quando beneficium non habet naturae, quod
ultima uidentur animalia meruisse. humano solacio consurgunt, cuius arte
iacuerunt. belua tamen suis gressibus restituta nouit memor esse beneficii: in
magistrum quippe recipit quem sibi subuenisse cognoscit: ad ipsius arbitrium
gressus mouet, ipsius uoluntate cibos capit, et, quod omnem intellegentiam
quadrupedum superat, non dubitat primo aspectu adorare quem cunctorum intellegit
esse rectorem: cui si tyrannus appareat, inflexa permanet nec imponi potest
beluae hoc et malis pendere, quod a se nouit bonis principibus exhibere. <4> In
uicem manus promuscidem tendit et magistro profutura gratanter accipit, quia se
ipsius cura uiuere posse cognoscit. est enim, ut ita dixerim, praedictae beluae
nasuta manus, per quam data suscipit et ori suo uoranda transmittit. nam cum sit
altum animal, breuissima ceruice compositum est, ut quod cibos ex humo non
praeualebat carpere, hoc se ministerio uideretur posse satiare. temptando solum
cautus semper incedit, retinens initio captiuationis suae fuisse sibi noxiam
ruinam. <5> Flatum suum, quia dolori capitis humani mederi dicitur, rogatus
exhalat. hic dum ad aquas uenerit hauriendas, per cauum promuscidis in modum
pluuiae imbrem postulatus effundit et sic agnoscit quod petitur, ut libens
faciat quod rogatur. motu corporis ab diuersis postulat quod magistro porrigat
et nutritoris compendia sua putat alimenta. quod si aliquis praebere
contempserit postulata, uesicae collectaculo patefacto tantam dicitur alluuionem
egerere, ut in eius penatibus quidam fluuius uideatur intrare, contemptum
uindicans de fetore. <6> Nam et laesus seruat offensam et longo post tempore
reddere dicitur, a quo iniuriatus esse sentitur. oculi quidem parui, sed
grauiter se mouentes. credas aliquid regium eius intendisse conspectum. despicit
scurriliter ludentes: honestum aliquid gratanter adtendit et aduertis recte
iudicare, cui leuia cognoueris displicere. <7> Cutis huius ulcerosis uallibus
exaratur, a qua transportaneorum nefanda passio nomen accepit, quae in tantam
duritiam solidatur, ut putes esse osseam cutem. haec nulla ui transmittitur,
nullo ferri acumine penetratur, ideoque Persarum reges hanc beluam ad bella
traxerunt, quae et nullis ictibus pulsata cederet et aduersarios sua mole
terreret. <8> Quapropter eorum uel formas habere gratissimum est, ut qui uiuam
substantiam non uiderunt, opinatum animal tali imaginatione cognoscant. et ideo
non patiaris perire, quando Romanae dignitatis est artificum ingeniis in illa
urbe recondere, quod per diuersas mundi partes cognoscitur diues natura
procreasse.
XXXI. UNIVERSIS GOTHIS VVITIGIS REX.
<1> Quamuis omnis prouectus ad diuinitatis est munera referendus nec aliquid
constat bonum, nisi quod ab ipso dinoscitur esse collatum, tamen quam maxime
causa regiae dignitatis supernis est applicanda iudiciis, quia ipse nihilominus
ordinauit, cui suos populos parere concessit. unde auctori nostro gratias
humillima satisfactione referentes indicamus parentes nostros Gothos inter
procinctuales gladios more maiorum scuto subposito regalem nobis contulisse
praestante domino dignitatem, ut honorem arma darent, cuius opinionem bella
pepererant. <2> Non enim in cubilis angustiis, sed in campis late patentibus
electum me esse noueritis, nec inter blandientium delicata colloquia, sed tubis
concrepantibus sum quaesitus, ut tali fremitu concitatus desiderio uirtutis
ingenitae regem sibi Martium Geticus populus inueniret. quamdiu enim fortes uiri
inter bella feruentia nutriti principem ferre poterant non probatum, ut de eius
fama laboraret, quamuis de propria uirtute praesumeret? necesse est enim talem
de cunctis opinionem currere, qualem gens meruerit habere rectorem. <3> Nam
sicut audire potuistis, parentum periculis euocatus adueneram communem cum
omnibus subire fortunam: sed illi ducem me sibi esse non passi sunt, qui
exercitatum regem quaerere uidebantur. quapropter primum diuinae gratiae, deinde
Gothorum fauete iudiciis, quia me regem omnes facitis, qui unanimiter uota
confertis. deponite nunc damnorum metum: dispendiorum suspiciones abicite: nihil
sub nobis asperum formidetis. <4> Amare nouimus uiros fortes, qui saepius bella
peregimus. additur, quod unicuique uirorum uestrorum testis adsisto. ab alio
enim mihi non est opus facta uestra narrari, qui omnia uobiscum laboribus
sociatus agnoui. arma Gothorum nulla promissionum mearum uarietate frangenda
sunt: ad gentis utilitatem respiciet omne quod agimus: priuatim nec nos
amabimus: hoc sequi promittimus quod ornet regium nomen. <5> Postremo nostrum
per omnia pollicemur imperium, quale Gothos habere deceat post inclitum
Theodericum: uir ad regni curas singulariter et pulchre compositus, ut merito
unusquisque principum tantum praeclarus intellegatur, quantum consilia illius
amare dinoscitur. idcirco parens illius debet credi, qui eius facta potuerit
imitari. et ideo pro regni nostri utilitate estote solliciti, de interna
conuersatione domino iuuante securi.
XXXII. IUSTINIANO IMPERATORI VVITIGIS REX.
<1> Quanta sit nobis, clementissime imperator, gratiae uestrae uotiua suauitas,
hinc omnino datur intellegi, ut post tot grauissimas laesiones et tanta
effusione sanguinis perpetrata sic uideamur pacem uestram quaerere, tamquam nos
nemo uestrorum putetur ante laesisse. pertulimus talia, qualia et ipsos possunt
offendere qui fecerunt, insecutiones sine reatu, odium sine culpa, damna sine
debitis. et ne pro paruitate sui neglegi potuisset, non in prouinciis tantum,
sed in ipso rerum capite probatur inflictum. aestimate, quos dolores abicimus,
ut uestram iustitiam reperire possimus. talis res effecta est, quam mundus
loquatur: quae sic a uobis meretur componi, ut aequitatem uestram generalitas
debeat ammirari. <2> Nam si uindicta regis Theodahadi quaeritur, mereor diligi:
si commendatio diuae memoriae Amalasuinthae reginae prae oculis habetur, eius
debet filia cogitari, quam nisus uestrorum omnium perducere decuisset ad regnum,
ut cunctae gentes potuissent agnoscere uicissitudinem uos gratiae tanto pignori
reddidisse. <3> Illud etenim uos debuit permouere, quod distributione mirabili
ante regni fastigia inuicem uos diuinitas nostram fecit habere notitiam, ut
amoris causam tribueret, quibus aspectus gratiam contulisset. quali enim
reuerentia principem colere potui, quem adhuc in illa positus fortuna suspexi?
sed potestis et nunc omnia redintegrare quae facta sunt, quando non est
difficile illum in affectum retinere, qui gratiam constat desideranter expetere.
<4> Et ideo salutantes clementiam uestram honorificentia competenti indicamus
nos legatos nostros illum atque illum ad serenitatis uestrae sapientiam
destinasse, ut omnia more uestro cogitetis, quatinus utraeque res publicae
restaurata concordia perseuerent et quod temporibus retro principum laudabili
opinione fundatum est, sub uestro magis imperio diuinis auxiliis augeatur.
reliqua uero per legatos praedictos serenitati uestrae uerbo insinuanda
commisimus, ut et aliqua epistularis breuitas perstringeret et causas nostras
suggerentes plenius intimarent.
XXXIII. MAGISTRO OFFICIORUM VVITIGIS REX.
<1> Illum et illum legatos nostros ad serenissimum principem dirigentes congruum
fuit magnitudini uestrae per eos salutiferos apices destinare, ut in omni parte
uestra beneficia mererentur, cum nostrae deportarent collocutionis affectum. <2>
Et ideo epistularem gratiam uestris meritis exhibentes speramus, ut apud
clementissimi imperatoris animos eis uestra prudentia suffragetur, quia sic sunt
iusta quae petimus, ut omnium sapientium mereantur adnisum. facile enim a uobis
debet corrigi, quod non decuisset admitti. sed potestis omnia gratanter, omnia
placabiliter ordinare, quia dulcior solet esse gratia post amaritudines
expiatas. refugere uos enim potuisset ignotus: ego autem, qui ornatum rei
publicae uestrae uidi, qui tot nobilia procerum corda cognoui, non me desidero a
piissimi principis gratia diuidere, si in me uelit quae sunt iusta cogitare. <3>
Nam si alter offensam meruit, ego debeo gratissimus haberi, qui odioso cum
uindicta successi. uestros animos sum secutus: praemia mihi fuerant reddenda,
non laesio. et ideo non negetur gratia, cui nulla sunt penitus imputanda. atque
ideo sepultum sit odium cum morte peccantis. nam etsi de uobis aliquid minus
forte mereamur, Romana libertas cogitetur, quae per bellorum tumultus ubique
concutitur. pauca dixisse sapientiae uestrae sufficiunt, quia in alto pectore
protenditur, quod consideratum semper augetur.
XXXIIII. EPISCOPIS SUIS VVITIGIS REX.
<1> Si sacerdotibus etiam ignotis honorem debemus, quanto magis illis quos
amabili ueneratione conspeximus! aliter enim requirimus notum et aliter
appellamus incognitum. uisorum maior semper affectus est, dum gratissime
retinetur qui assiduo et suaui sermone coniungitur. et ideo per harum portitores
legatos nostros, quos ad serenissimum principem destinauimus, sanctitati uestrae
praesentamus debitae uenerationis obsequium, sperantes, ut pro nobis orare
dignemini et, ubi usus exegerit, solacia uestra reperiant, quia necesse est, ut
bene uelitis quos uobis religione iunctos esse cognoscitis.
XXXV. PRAEFECTO THESSALONICENSI VVITIGIS REX.
<1> Illum et illum legatos nostros ad serenissimum principem deo fauente
direximus, per quos necesse fuit magnitudini uestrae reddere salutationis
affectum, quando honori uestro et sapientiae debetur, ut uobiscum collocutionis
gratia perfruamur. speramus autem ab excellentia uestra, ut moram non debeant
sustinere, quos nos sub celeritate perspicitis destinasse, quatenus uestris
beneficiis applicemus, si eos remota tarditate peruenire cognoscimus.
LIBER UNDECIMUS.
PRAEFATIO CHARTARUM PRAEFECTURAE.
<1> Praefationis auxilium ex contrarietate plerumque nascitur, actionum, quando
illud opitulatur scriptori, quod potuit impedire cogitanti. quae res etsi laudes
adimit, clementer tamen ueniam tractata concedit, quia quod constat otiosos
debere, nemo potest occupatos exigere. quapropter administrator amplissimus si
uacasse credatur, obprobrium est, cuius etiam secretum dicitur, quod tumultuosis
actionibus uerberatur. sed uix nobis aliquid praestabit ad effectum ducta
probatio, quando et occupati fuisse credimur et male scribere minime debuisse
iudicamur. <2> Nam multo satius est uitiosa tenebris occulere quam culpanda
praesumpta inportunitate uulgare. uerum hoc mihi obicere poterit otiosus, si
uerbum improuida celeritate proieci, si sensum de medio sumptum non ornauerim
uenustate sermonum, si praecepto ueterum non reddiderim propria personarum:
occupatus autem, qui rapitur diuersitate causarum, cui iugiter incumbit
responsum reddere et alteri expedienda dictare, non me addicere poterit, qui se
in talibus periclitatum esse cognoscit. <3> Facile enim absolutor est alieni
conscius sui: neque enim semper in illis ualemus, quae interdum posse iudicamur.
argutum inuentum laetum fundit ingenium: tepentia dicta mens concipit occupata.
aliquando acutum iugiter decet esse compositum, quia dicendi ars in nostra sita
potestate cognoscitur, alacritas mentis diuinis tantum muneribus applicatur. <4>
Remanet itaque ad excusandum breuitas insperata librorum, quam nemo purgat
diutius nisi qui bene creditur esse dicturus. sed ne quis forsitan possit
offendi, quod in praetoriano culmine constitutus sic omnimodis actioso pauca
dictauerim, accipiat uiri prudentissimi Felicis praesumptione factum, cuius
participatus sum in omni causa consilium. <5> Etenim uir primum est morum
sinceritate defaecatus, scientia iuris eximius, uerborum proprietate distinctus,
senilis iuuenis, altercator suauis, mensuratus eloquens: qui necessitates
publicas eleganter implendo ad fauorabilem opinionem suo potius labore perduxit.
alioquin tantis causarum molibus oneratus aut impar esse potui aut forte
arrogans inueniri. sed melius, quod eius fatigatione recreatus sic regalibus
curis affui, ut non potuissem in arduis rebus deficiens approbari. <6> Duos
itaque libellos dictationum mearum de praefecturae actione subiunxi, ut qui
decem libris ore regio sum locutus, ex persona propria non haberer incognitus,
quia nimis absurdum est in adepta dignitate conticescere, qui pro aliis
uidebamur plura dixisse. <7> Sed postquam duodecim libris opusculum nostrum
desiderato fine concluseram, de animae substantia uel de uirtutibus eius amici
me disserere coegerunt, ut per quam multa diximus, de ipsa quoque dicere
uideremur. <8> Modo parcite diserti, fauete potius inchoantes: nam si nihil
mereor eloquentiae munere, considerandus sum potius ex officiosissimo labore,
qui tantis rei publicae necessitatibus occupatus sic uacare potui sub urentibus
curis, si me gloriari contigisset fluminibus Tullianis. nam ipse quoque fons
eloquentiae cum dicere peteretur, fertur excusasse se, quod pridie non legisset.
quid iam aliis accidere poterit, si tanta laus facundiae auctorum uisa est
beneficia postulare? aegrescit profecto ingenium, nisi iugi lectione reparetur.
cito expenduntur horrea, quae assidua non fuerint adiectione fulcita. <9>
Thesaurus ipse quam facile profunditur, si nullis iterum pecuniis compleatur.
sic humanus sensus, cum alieno non farcitur inuento, cito potest attenuari de
proprio. si quid autem in nobis redolet, studiorum flos est, quod nihilominus
marcidum redditur, si a matre lectione carpatur. illic enim potest esse
laetissimum, unde docetur et natum, quando omnia in origine sua plenissime
uiuunt, quae necdum a naturalibus sinibus auferuntur. proinde ueniae magna pars
est, si scribimus non uacantes, si legimur non legentes. sed iam remoueamur ab
excusationis uoto, ne magis offendat nimis affectata defensio.
I. SENATUI URBIS ROMAE SENATOR PPO.
<1> Commendatis mihi, patres conscripti, prouectum meum, si uobis intellego
fuisse uotiuum: credo enim euenisse prosperrime quod tot felices constat
optasse. desideria quippe uestra bonorum omnium probantur auspicia, quando nemo
potest talium fauore suscipi, nisi quem diuinitas praecepit augeri. mutuamini
ergo gratiam, ut exigatis obsequium. natura rerum est amare collegam. laudes
quin immo uestras extollitis, si honorem qui Senatori datus est erigatis. <2>
Sollicitudo patrum ad publicas me utilitates instanter impellat, ut uestro magis
imputetur praeconio, cum tali meruero placere solacio. secunda mihi est cura
uobis me commendare post principes, quia illud uos amare confidimus, quod et
rerum dominos iubere sentimus: primum, ut hoc putemus utile quod honestum, ut
nostros actus quasi pedisequa semper iustitia comitetur et quod a continenti
principe non emimus, nulli turpiter uenditemus. <3> Audistis, principes uiri,
quae rerum pondera praedicatus exceperim. supra uires exigitur, qui dignitatis
culmina laudatur ingressus. haec non audemus falsa dicere, sed confitemur esse
potiora: nam talia iudicia non inuenerunt merita, sed fecerunt: neque enim nos
inde iactamus, qui intellegimus dominos nostros humilia uoluisse sustollere, ne
uideantur inmeritis tam ingentia praestitisse. rapiunt nos praedicandi temporis
bona et uelut longa ariditate sitientes ad haustum dulcissimi saporis inuitant.
<4> O saeculi beata fortuna! sub principe feriato matris regnat affectio, per
quam totum sic peragitur, ut generalis nos tegere caritas sentiatur. huic
gloriosum praestat obsequium cui omnia seruiunt et mirabili temperamento
concordiae, antequam possit populos regere, suis iam coepit moribus imperare.
hoc est profecto difficillimum regnandi genus exercere iuuenem in suis sensibus
principatum. rarum omnino bonum est dominum triumphare de moribus et hoc
consequi in florida aetate, ad quod uix creditur cana modestia peruenire. <5>
Gaudeamus, patres conscripti, et supernae maiestati gratias supplici deuotione
referamus, quando nulla erit accessu temporis difficilis clementia nostro
principi, qui in annis puerilibus didicit seruire pietati. sed hoc miraculum
utriusque moribus demus: nam tantus est genius maternus, cui etiam iure princeps
seruire debuisset extraneus. <6> Hanc enim dignissime omnia regna uenerantur,
quam uidere reuerentia est, loquentem audire miraculum. qua enim lingua non
probatur esse doctissima? Atticae facundiae claritate diserta est: Romani
eloquii pompa resplendet: natiui sermonis ubertate gloriatur: excellit cunctos
in propriis, cum sit aequaliter ubique mirabilis. nam si uernaculam linguam bene
nosse prudentis est, quid de tali sapientia poterit aestimari, quae tot genera
eloquii inoffensa exercitatione custodit? <7> Hinc uenit diuersis nationibus
necessarium magnumque praesidium, quod apud aures prudentissimae dominae nullus
eget interprete. non enim aut legatus moram aut interpellans aliquam sustinet de
mediatoris tarditate iacturam, quando uterque et genuinis uerbis auditur et
patriotica responsione componitur. iungitur his rebus quasi diadema eximium
inpretiabilis notitia litterarum, per quam, dum ueterum prudentia discitur,
regalis dignitas semper augetur. <8> Sed cum tanta gaudeat perfectione
linguarum, in actu publico sic tacita est, ut credatur otiosa. paucis litigia
nodosa dissoluit: bella feruentia sub quiete disponit, silentiose geritur
publicum bonum. non audis praedici quod palam uidetur assumi et temperamento
mirabili dissimulando peragit quod adcelerandum esse cognoscit. <9> Quid tale
antiquitas honora promeruit? Placidiam mundi opinione celebratam, aliquorum
principum prosapia gloriosam purpurato filio studuisse percepimus, cuius dum
remisse administrat imperium, indecenter cognoscitur imminutum. nurum denique
sibi amissione Illyrici comparauit factaque est coniunctio regnantis diuisio
dolenda prouinciis. militem quoque nimia quiete dissoluit. pertulit a matre
protectus quod uix pati potuit destitutus. <10> Sub hac autem domina, quae tot
reges habuit quot parentes, iuuante deo, noster exercitus terret externos: qui
prouida dispositione libratus nec assiduis bellis adteritur nec iterum longa
pace mollitur. in ipsis quoque primordiis, quando semper nouitas incerta
temptatur, contra Orientis principis uotum Romanum fecit esse Danuuium. <11>
Notum est quae pertulerint inuasores: quae ideo praetermittenda diiudico, ne
genius socialis principis uerecundiam sustineat perditoris. quid enim de nostris
partibus senserit, hinc datur intellegi, quando pacem contulit laesus, quam
aliis concedere noluit exoratus. additur quod tantis nos legationibus tam raro
requisitus ornauit et singularis illa potentia, ut Italicos dominos erigeret,
reuerentiam Eoi culminis inclinauit. <12> Franci etiam, tot barbarorum uictoriis
praepotentes, quam ingenti expeditione turbati sunt? lacessiti metuerunt cum
nostris inire certamen qui praecipiti saltu proelia semper gentibus intulerunt.
sed quamuis superba natio declinauerit conflictum, uitare tamen proprii regis
nequiuit interitum. nam Theodericus ille diu potenti nomine gloriatus in
triumphum principum nostrorum langoris potius pugna superatus occubuit:
ordinatione credo diuina, ne nos aut affinium bella polluerent aut iuste
productus exercitus uindictam aliquam non haberet. macte procinctus Gothorum
omni felicitate iucundior, qui hostem regalem capite caedis et nobis nec unius
ultimi fata subducis. <13> Burgundio quin etiam ut sua reciperet, deuotus
effectus est, reddens se totus, dum accepisset exiguum. elegit quippe integer
oboedire quam imminutus obsistere: tutius tunc defendit regnum, quando arma
deposuit. recuperauit enim prece quod amisit in acie. beatam te, domina, laude
multiplici, cui diuino beneficio necessitas tollitur cuncta certaminis, quando
aduersos rei publicae aut caelesti felicitate uincis aut tuis imperiis spontanea
largitate coniungis. <14> Exultate, Gothi pariter ac Romani: dignum miraculum,
quod omnes loquantur. ecce praestante deo felix domina quod habet eximium
uterque sexus, impleuit: nam et gloriosum regem nobis edidit et latissimum
imperium animi fortitudine uindicauit. <15> Haec quantum ad arma pertinent,
utcumque referuntur: nam si pietatis eius atria uelimus intrare, uix nobis
poterunt centum linguae centumque ora sufficere: cui par est quidem aequitas et
uoluntas, sed maior benignitas quam potestas. dicamus igitur parua de magnis,
pauca de plurimis. scitis quanta bona nostro ordini caelesti benignitate largita
est: nihil est dubium, ubi est testis senatus. afflictos statu meliore
restituit, illaesos sublimauit honoribus et singillatim bona tribuit, quos sub
uniuersali munimine custodiuit. <16> Ea quae asserimus iam creuerunt. respicite
namque patricium Liberium praefectum etiam Galliarum, exercitualem uirum,
communione gratissimum, meritis clarum, forma conspicuum, sed uulneribus
pulchriorem, laborum suorum munera consecutum, ut nec praefecturam, quam bene
gessit, amitteret et eximium uirum honor geminatus ornaret: confessus meritum,
cui solus non sufficit ad praemium. accepit enim et praesentaneam dignitatem, ne
de re publica bene meritus diu absens putaretur ingratus. <17> O admiranda
beniuolentia dominorum, quae in tantum extulit praedictum uirum, ut donatis
fascibus et patrimonium iudicaret addendum: quod sic ab uniuersis gratanter
exceptum est, ut in munere eius cuncti se potius crederent esse ditatos, quando
quicquid digno ceditur, hoc multis sine dubio collatum esse sentitur. quid ergo
de animi firmitate loquar, quae uicit et philosophos ualde praedicatos? procedit
enim ex ore dominae beneficus sermo et manens sub securitate promissio. <18> Non
sunt nobis, patres conscripti, minus probata quae loquimur: uerus testis est,
qui laudat expertus. cognouistis enim quae contra me uota conflixerunt: non
aurum, non magnae ualuere preces: temptata sunt uniuersa, ut probaretur
sapientissimae dominae gloriosa constantia. <19> Ordo flagitat dictionis
Augustarum ueterum pompam moderna comparatione excutere. sed quemadmodum illi
sufficere poterunt exempla feminea, cui uirorum laus cedit uniuersa? hanc si
parentum cohors illa regalis aspiceret, tamquam in speculum purissimum sua
praeconia mox uideret. enituit enim Hamalus felicitate, Ostrogotha patientia,
Athala mansuetudine, VVinitarius aequitate, Unimundus forma, Thorismuth
castitate, VValamer fide, Theudimer pietate, sapientia, ut iam uidistis,
inclitus pater. cognoscerent hic profecto uniuersi singillatim propria, sed
feliciter faterentur esse superata, quando unius praeconium cum turba se iure
non potest aequare uirtutum. <20> Aestimate quale eis esset de tali herede
gaudium, quae merita potuit transire cunctorum. quaeratis forsitan sequestratim
principis bona: abunde praedicat subolem, qui eius laudat auctorem. deinde
retinetis facundissimi Symmachi eximium dictum: 'specto feliciter uirtutis eius
augmenta, qui differo laudare principia'. subuenite, patres conscripti, et
agendo pro me communibus dominis gratias debitum meum uestra satisfactione
persoluite: nam sicut unus satiare non ualet omnium uota, ita multi unius
possunt complere disposita.
II. IOHANNI PAPAE SENATOR PPO.
<1> Supplicandum uobis est, beatissime pater, ut laetitiam quam per uos deo
largiente percepimus, custodiri nobis uestris orationibus sentiamus. quis enim
dubitet prosperitatem nostram uestris meritis applicandam, quando honorem
adipiscimur, qui a domino diligi non meremur, et permutatione officii bona
recipimus, dum talia non agamus? ecclesiasticis siquidem ieiuniis fames est
exclusa popularis: decoris lacrimis tristitia foeda discessit et per sanctos
uiros acceleratum est, ne traheret diutius quod grauabat. <2> Et ideo salutans
officiositate, qua dignum est, precor ut uiuacius oretis pro salute regnantium,
quatenus eorum uitam caelestis princeps faciat esse longaeuam, Romanae rei
publicae hostes imminuat, tempora tranquilla concedat: deinde, quod ornat pacem,
necessariam nobis copiam de abundantiae suae horreis largiatur: mihique filio
uestro intellegentiae sensus aperiat, ut quae uere sunt utilia, sequar, quae
uitanda, refugiam. <3> Vigor ille rationabilis animae nobis consilium praestet:
facies ueritatis albescat, ne mentem nostram innubilet caligo corporea: sequamur
quod intus est, ne foris a nobis simus: instruat quod de uera sapientia sapit:
illuminet quod caelesti claritate resplendet. talem denique iudicem publicus
actus excipiat, qualem filium catholica mittit ecclesia. in suis nos etiam
muneribus uirtus sancta custodiat, quia grauiores insidias antiqui aduersarii
tunc subimus, quando eius dona suscipimus. <4> Nolite in me tantum reicere
ciuitatis illius curam, quae potius uestra laude secura est. uos enim
speculatores Christiano populo praesidetis: uos patris nomine uniuersa
diligitis. securitas ergo plebis ad uestram respicit famam, cui diuinitus est
commissa custodia. quapropter nos decet cogitare aliqua, sed uos omnia. pascitis
quidem spiritaliter commissum uobis gregem: tamen nec ista potestis neglegere,
quae corporis uidentur substantiam continere. nam sicut homo constat ex
dualitate, ita boni patris est utraque refouere. primum penuriam temporis, quam
delicta promerentur, orationibus sanctis amouere. si quid tamen, quod absit,
acciderit, tunc bene necessitas excluditur, quando contra eam sub ubertate
tractatur. <5> Monete me quae sunt gerenda sollicite. bene agere uel correptus
exopto, quia difficilius errat ouis, quae uoces desiderat audire pastoris nec
facile efficitur uitiosus, cui ammonitor insistit assiduus. sum quidem iudex
Palatinus, sed uester non desinam esse discipulus: nam tunc ista recte gerimus,
si a uestris regulis minime discedamus. sed cum me a uobis desiderem et moneri
consiliis et orationibus adiuuari, iam uobis est applicandum, si quid in me
fuerit aliter quam optabatur inuentum. <6> Sedes illa toto orbe mirabilis
proprios tegat affectione cultores, quae licet generalis mundo sit praestita,
nobis etiam cognoscitur et localiter attributa. tenemus aliquid sanctorum
apostolorum proprium, si peccatis diuidentibus non reddatur alienum, quando
confessiones illas, quas uidere uniuersitas appetit, Roma felicior in suis
sinibus habere promeruit. <7> Nihil ergo timemus talibus patronis, si oratio non
desistat antistitis. arduum est quidem multorum desideriis satisfacere, sed
nouit diuinitas magna praestare. ipsa retundat inuidos: ipsa nobis faciat ciues
caelesti aspiratione gratissimos et supplicationibus uestris tempora tribuat,
quibus superna gratia praedicetur indulta.
III. DIVERSIS EPISCOPIS SENATOR PPO.
<1> Corporalium patrum naturalis mos est de filiorum prouectione gaudere, dum
eorum institutionibus applicatur quicquid laudis in clara prole conceditur. uos
autem spiritales parentes, qui auctorem rerum illuminata mente conspicitis, pro
me sanctae trinitati sedulo subplicate, ut splendere laetum faciat in medio
positum candelabrum, quatenus nec mihi interior desit uisus et de me aliis
pandatur aspectus. <2> Numquid proderit iudicem aliis esse perspicuum, si sibi
potius reddatur obscurus? dignitatem conscientiae donet, qui tribunalia
praestare dignatus est. faciat inoffensum iudicem, ne damnet errantem. sit nobis
prosperrime praesens, ut infausta uitia reddantur absentia. amorem suum tribuat,
ut peccandi ambitum miseratus excludat. <3> Quapropter, animae ueri parentes,
affectuosa et probabili petitione uos deprecor, ut indicto ieiunio domino
supplicetis, qui uitam principum nostrorum florenti regno protendat, hostes rei
publicae defensor imminuat, donet quieta tempora et ad laudem sui nominis
copiosa faciatque rerum omnium tranquillitate, ut me uobis reddere dignetur
amabilem. <4> Sed quo facilius uestra quoque exaudiatur oratio, estote circa eos
quos destinamus attenti. quod nescimus, nobis non debet imputari. actus eorum
testimonia uestra prosequantur, ut aut laudatus gratiam aut accusatus apud nos
inuenire possit offensam. neque enim nobis imputare poterunt, si delinquunt,
quando non iubentur male dare, ut perperam cogantur accipere. <5> Orfanis
uiduisque contra saeuos impetus deo placita praestate solacia, ita tamen, ne,
quod accidit per nimiam pietatem, dum miseris subuenire quaeritis, locum legibus
auferatis. nam si aliquid offendit forte districtum, talia date cunctis monita,
ut iura possitis reddere feriata. excludite, sanctissimi, inter immundos
spiritus implacabiles uitiorum furores, uiolentiam temperate, auaritiam
depellite, furta remouete, depopulatricem humani generis luxuriem a uestro
populo segregate. sic auctorem iniquitatis efficaciter uincitis, si eius
persuasiones de humanis cordibus auferatis. <6> Episcopus doceat, ne iudex
possit inuenire quod puniat. administratio uobis innocentiae data est. nam si
praedicatio uestra non desinat, necesse est ut poenalis actio conquiescat. et
ideo dignitatem meam in omni uobis parte commendo, quatenus actus nostri
sanctorum orationibus adiuuentur, qui minus in humana potestate praesumimus. <7>
Familiariter etiam mihi suadete quod iustum est. non sum callidus abiurator:
quod generaliter debeo, incoactus exoluo. dependo etiam sanctitati uestrae
honorificae salutationis officium textumque epistulae affectuoso fine concludo,
ut in mentem uestram dulciora remaneant, quia bene sibi animus posteriora
commendat.
IIII. AMBROSIO V. I. AGENTI VICES SENATOR PPO.
<1> Secure uobis, deo iuuante opinionem nostram credimus, cuius conscientiam per
causarum uarios usus longa aetate probauimus. nam si in aduocationis studio
iustitiae claritate fulsistis, quid nunc prouecti ad consilia nostra facietis?
crescit enim in illo meritum, cui maius datur officium, quando iam habendus est
in iudicum partem, qui meruit aulicis potestatibus assidere. ornentur ergo
subsellia cuius ore fora tonuerunt. absens adhaere nostro lateri pleniorem
laudem inde sumpturus, quia integrum tibi reputabitur quod bene ordinaueris
solus. hanc coram positus mecum curam participareris et gloriam: nunc autem tibi
tantum cogimur debere, quicquid inde praestante deo laudis potuerimus accipere.
<2> Quapropter officium tibi obseruare censemus, quod nostris iussionibus
obsecundat, praeceptis etiam tuis pro publicis utilitatibus iustissime
designatis praecipimus oboediri, quatinus et tibi sit pro publica utilitate
mittendi fiducia et nullus de contemnendi sumat audaciam. si quos etiam
fideiussoribus committere necessarium aestimaueris, confidenter assume, quia
illud magis releuare potest animum nostrum, si aliquid per uos cognoscamus
impletum. praesenti enim sola uerba praestares: nunc autem facta potius debentur
absenti. <3> Consilium quippe tantae sedis ingens est procul dubio fama
meritorum: sed considera quid exigatur cui tale nomen imponitur. labor uester
procuret mihi omnium quietem. scitis quae turpia neglectus intulerit. scopulus
uitandus est, ubi alter offendit. sed haec uos monere mea potius curiositas quam
uestri diffidentia facit. nam omnia uos illa gerere credimus, quae iuuante deo
famae nostrae et rei publicae utilia esse iudicamus.
V. AMBROSIO V. I. AGENTI VICES SENATOR PPO.
<1> Gaudere uos quidem in eis credo, quae caritatem uestram optasse diiudico:
nam ipsius quodammodo res agitur, cuius in alterum uota complentur. sed hinc
intellego antiquae amicitiae fructum, qui uenustate felicior est, in suauissimi
saporis emanasse dulcedinem, si prius Romanae ciuitatis copiam per eos quorum
interest tamquam munus eximium nostris hospitiis offeratis. <2> Ideo enim
peregrinationis incommoda, ideo tot angusta cogitationis intrauimus, ut populus
ille antiquis delectationibus assuetus beatissimis regnantium temporibus
explosis necessitatibus perfruatur. procul enim sit, ut aliquo illius ciuitatis
esuriente satiemur. illorum, quod absit, indigentia nostra penuria est. quid
plura? laeti esse non possumus, nisi et illos gaudentes communiter audiamus. <3>
Atque ideo tota uiuacitate incorrupta frumenti species congregetur, ut panis
inde coctus non horrori, sed deliciis uideatur esse propositus. ponderatio iusta
seruetur. uincant copiae mentium desideria. non putatur abundare quod quaeritur.
fugite scelerata lucra, uitate nefanda compendia. quicquid ibi male praesumitur,
in mei animi laesione grassatur. nemo putet ueniale, quod in ista temptauerit
parte sumere. in nobis facilius consentimus excedi quam Romanorum utilitates
patiamur imminui: non ut fauorem captem plausumque popularem, sed ut iuuante deo
meum in illis compleam dilectionis arbitrium. <4> Ciues si quidem omnes fouendi
sunt, sed Romani aliquid plus merentur. urbs ornata tot eximiis senatoribus,
beata tam nobilibus populis laudes debet nostrorum principum personare, quas
homo nationis exterae se miretur audisse. nam iuste se illic extollit laetitia
popularis, quae dominos cognoscitur habere uictores. <5> Quapropter impendendum
est, quicquid fides, quicquid magna potest exhibere cautela, quia illud uere
nostrum est commodum, quod illorum mihi procurat affectum. laetentur
praesentibus gaudiis qui erant de nostra actione suspensi: illorum ne desideria,
illorum uota iuuerunt et hoc mihi apud rerum dominos profuit, quod ab eis
uniuersaliter audiebatur optari. <6> Agite nunc, ut amor iste iuuante domino
perseueret, quia eos amplius in reliquum credo facere, quod se in me feliciter
sentiunt inchoasse. abundantiam nunc petamus communibus uotis: supernae
misericordiae humiles supplicemus, ut primum nobis salutem dominorum clementia
diuina concedat, ceterum prouentum quem praestiterit non neglegentia diminuit,
non uenalitas ulla subducat. fidem meam promitto, sed cum ipsis diuinitatis dona
sustineo: cautelam offero, turpia fraudulentissimae nundinationis excludo. ipsi
autem in domino de promerita ubertate glorientur.
VI. IOHANNI CANCELLARIO SENATOR PPO.
<1> Quamuis statutis gradibus omnis militia peragatur et tempora sibi
custodiant, qui iudicum iussionibus obsecundant, tuus honor cognoscitur sollemni
ordine non teneri, qui suis primatibus meruit anteponi. tibi enim reddunt
obsequia, qui te praeire noscuntur et reflexa condicione iustitiae illis
reuerendus aspiceris, quos subsequi posse monstraris. hanc inaequabilem
aequitatem, speciale decretum, singulare beneficium sub aspectu iudicis agis nec
potest rationabiliter culpari, quod inpugnante ordine uideatur assumi. <2>
Nullus tibi de temporis qualitate praescribit. transgressio matriculae actio tua
est et solus confidenter neglegis quod alios seruare compellis. sed talia tibi
pro excellentibus meritis conceduntur. dum credi debet omnes industria fideque
superare, quem nos constat elegisse. nemo enim sequentem probat, nisi quem sibi
laudanda uirtus associat, quando uituperabile est inferiorem erigere nisi
meritis alios uideatur excellere. <3> Hoc igitur laudabile praeiudicium,
sententiam gratiosam, militiam domesticam a duodecima indictione cancellorum
tibi decus attribuit, ut consistorii nostri secreta fideli integritate
custodias, per te praesentandus accedat, per te nostris auribus desiderium
supplicis innotescat, iussa nostra sine studio uenalitatis expedias omniaque sic
geras, ut nostram possis commendare iustitiam. actus enim tui iudicis opinio est
et sicut penetrale domus de foribus potest congruenter intellegi, sic mens
praesulis de te probatur agnosci: non iniuria, quia talem unusquisque ad
responsa sua uidetur eligere, qualem se cunctos decreuerit aestimare. <4> Vestes
ipsae, quae nostris corporibus applicantur, nonne nos deformare possunt, si
aliquo inquinamento sordescant? quanta uero gratia nos decorare uidentur, cum
laudabili puritate nituerint! sic miles ad secreta iudicis proximatus praesulis
sui famam aut ornat aut maculat. in nobis siquidem peccant, qui alios grauant et
dum spolium obsecrantis ambitur, fama praesidentis exuitur. <5> Considera, si
neglegere debemus unde nos culpari posse cognoscimus. ultra omnes dementes est,
qui ulcisci non appetit quem grassatum in suo dedecore comprehendit. respice,
quo nomine nuncuperis. latere non potest quod inter cancellos egeris. tenes
quippe lucidas fores, claustra patentia, fenestratas ianuas et quamuis studiose
claudas, necesse est ut te cunctis aperias. nam si foris steteris, meis non
emendaris obtutibus: si intus ingrediaris, obseruantium non potes declinare
conspectus. <6> Vide quo te antiquitas uoluerit collocari: undique conspiceris,
qui in illa claritate uersaris. proinde ad nostra monita aures animumque
conuerte: fige menti omnia quae iubemus: non te tamquam uacuam fistulam dicta
perexeant, quae tamdiu plena conspicitur, quamdiu in eam undae influere posse
noscuntur. esto potius conceptaculum, quod audita custodias, quod suscepta non
fundas: quia nihil proderit, si auribus tuis transitura placeant et in cordis
sinibus se omnia non defigant.
VII. UNIVERSIS IUDICIBUS PROVINCIARUM SENATOR PPO.
<1> Iustissime quaeritur quod annua deuotione praestatur, quando sub quodam
gaudio constat inferri, quod soluitur lege generali. stipendium namque est, quod
subiectum facit munificum dici et offerentis nomen accipit, qui se quod penditur
debere cognoscit. quam lautum est intrepidum foro assistere, publicum non timere
et inter deuotos laudabilem collocari, qui pudorem non sinitur habere compulsi.
<2> Inhonorum est enim omne quod cogitur nec offerentis habet gratiam, qui
damnis suis perducitur ad tributa: contra quam libero dignum est compulsoribus
nil debere! ille solus delectabilis ager est domino, in quo superuenire non
timetur exactor. merito ergo testimonium solutionis securitas dicitur, de qua
non solum animus, sed substantia communitur. <3> Et ideo, quod feliciter dictum
sit, indictione duodecima per dioecesin dicationis tuae sollemni moderamine
custodito possessorem te officiumque tuum praecipimus ammonere, ut trina
illatione deuotus constitutis temporibus suam compleat functionem, ita ut cesset
uenalis illa dilatio, quae non ad tributariorum compendia, sed fraudis ambitu
cognoscitur exquisita. nam qui se huiusmodi onera subleuare dicunt, aliud magis
pondus abominabilis nundinationis imponunt. <4> Absit a nostris temporibus
detestabilis et fugienda uersutia. possessor nihil aliud, nisi quod publico
debetur, exoluat: nam sua damna potius agunt, qui sub nobis aliqua fraudare
contendunt. quapropter sicut fiscalia onera nulla occasione uolumus aggrauari,
ita constitutis temporibus praefinitas illationes praecipimus deo iuuante
compleri, quatenus et possessorum deuotio gratissima dominis innotescat et
tarditatis inuoluta confusio nostris rationibus auferatur. unde singulis
quibusque temporibus sollemni more factos breues ad scrinia nostra transmittite,
sicut te et prisca legum et nostrae iussionis praesens commonere uidetur
auctoritas, ne, si aliquid horum aestimaueris neglegendum, tu tibi absolute
facias esse periculum. <5> Verumtamen ut iustissimarum praeceptionum diligentior
procuretur effectus, illum atque illum praecedentibus meritis comprobatos tibi
officioque tuo iussimus imminere, ut nihil possit nocere neglegentia, ubi
adhibetur sollicitudo geminata. unde continenter agite, si prouectum uestrum
magis desideratis extendere. impia lucra sint a uobis omnimodis aliena: uos
possessorem deuotum redditis, si fraudulentis non grauetur incommodis. de
aequitate potius quam de rapacitate proficitur. semper metuit iniusta
praesumptio: quid enim adquiri putatur, ubi bona conscientia perditur? aut in
qua parte possit homo proficere, si innocentiam probatus fuerit amisisse? <6>
Nolite sine praemio credere, quae uidentur ad bonam conscientiam pertinere.
habebunt nos bene agentes, in quo possumus, adiutores. remuneratorem enim illi
me esse promitto, quem se aliqua honestate tractasse cognouero. agite ergo:
laudes ad me potius uestri perueniant quam querellae. maius commodum non
quaeratis, quam si nihil uenditis. illa tantum sequenda sunt lucra, quae potest
laetus offerre et miles sollemniter securus accipere. non censor, sed laudator
uester esse desidero. cauete ergo, ne reddatur infestus qui uobis cupit esse
beneficus: nam grauius semper irascitur, qui contra propositum commouetur.
VIII. EDICTUM PER PROVINCIAS. SENATOR PPO.
<1> Priscorum mos fuit noua iura decernere, ut succedenti populo aliquid quod
omissum uidebatur adiungerent: nunc autem sufficiens satis conscientiae ueterum
decreta seruare. erat ante genus hominum sub hac nouitate sollicitum, dum
regulam uitae suae in aliena cognoscerent uoluntate pendere: modo uero
unusquisque nouit fixum, quod ab antiquis plenissime non dubitat constitutum.
sufficiunt ergo uobis iura, si non desit uoluntas eximia. quid praeconum uoces,
quid periculosas sententias praesulum erectis auribus sustinetis? <2> Propriae
uitae imponit modum, qui sibi se iudicem intellegit constitutum. studete cuncti
actibus bonis et formidanda nescitis. nolite inardescere ad praesumptiones
illicitas: amate uiuere quieti: transigite semper innoxii. quid litibus honesta
confunditis? cur facitis quae mox timere possitis? si quaeritis lucra, uitate
potius damnosa litigia. si quod tamen emerserit ciuile certamen, legibus patriis
estote contenti: nullus ad seditiosa consurgat, nullus ad uiolenta confugiat.
furoris genus est in saeculo pacato turbulento studere proposito. <3> Sed quia
de nobis iudicibus etsi non uerus, tamen oritur rationabilis metus, dum
inexperta potestas trahit potius ad timorem, quantum ad meum propositum
pertinet, iuuante deo rerumque dominis regnantibus omnia uobis iusta, omnia
moderata promittite. primum, quod maxime iudicem dehonestat, nundinatio a me
foeda nescibitur. non enim mea uerba more uestium suspensa uenduntur. sperari a
uobis aliquid sola specierum indigentia faciet, non malitiosa uenalitas. ubi
tamen erit quae tempus mitigat moderata praeceptio, non indicimus quod ematur
nec ad taxationem trahimus quae necessaria non habentur. <4> Estote tantum ad
consueta solliciti, de nouitate securi, quia illud solum nobis iudicauimus esse
commodum, si uos iuuante domino seruemus illaesos. non uos quisquam militum pro
sua uoluntate concutiet: non exactor adiecticiis grauabit incommodis: non solum
nostras, sed et officii innoxias custodibimus manus. alioquin inutile bonum est
iudicem non accipere et multis accipiendi licentiam praebuisse. neque enim sic a
nobis egrediuntur, ut ea quae passi fuerint aliis merito fecisse uideantur.
imminuta sunt enim uestro amore suffragia, quae hactenus omnium detrimento
crescebant. <5> Ostendimus in nobis deo iuuante continentiam, ut eam militibus
sine pudore imperare possimus. non enim potest auctoritatem habere sermo qui non
iuuatur exemplo, dum iniquum sit bona praecipere et talia non fecisse. ordinatio
igitur nostra utilitatem publicam tantummodo respiciet, non furta priuata.
scimus quae pro nobis uota fuderitis, qua fuistis anxietate suspensi. deforme
nobis est talia facere, ut minus possitis in uestra exultatione gaudere. <6>
Patebunt deo propitio aures nostrae ad suscipienda desideria supplicantum: actor
causae suis nos oculis sub libertate uisurus est: non redempta, sed propria
lingua loquebitur. nobis enim nec seruitus imperabit nec a nobis nobilitas
ueneranda fatigabitur. praetoria denique nostra nullus turpis actus intrabit,
nemo a nobis quam uenerat minus locupletior redit. nesciuit domesticum penetrale
a subselliis discrepare. iudicem me obseruans inueniet, quocumque respexerit.
<7> Verecundiae memores iuuante deo sic agere nos optamus, quemadmodum a rerum
dominis mandata suscepimus. uos ad omnia iusta estote deuoti, ut me prouinciarum
patrem faciatis esse quam iudicem, quia iterum grauius irascitur, qui minime de
prauitatum actione pensatur. nam si praebuistis laesionibus obsequium, quid illi
impendere debetis, quem uobis magnopere studere cognoscitis? sollemnia commoda
sedis nostrae laborantibus militibus non negentur, quia ipse praebet uiam
excedendi, qui non patitur iusta persolui. <8> Praeceptis etiam nostris
oboedientiam aequabili moderatione praestate. compellat rationabiliter proprius
animus, ne uos urgeat terror armatus. odium sibi excitat, qui iustis resultat
imperiis. quem iam coegero, non amabo. sic enim cuncta quae agenda sunt uolumus
explicari, ut uos nullo compulsore faciamus imminui. seruari uobis cupimus
concessa pridem dominorum beneficia nulla abominabili praesumptione distracta.
honorem nostrum sola uos optamus gratulatione sentire et regnantibus bona
petere, qui uestra desideria uisi sunt praestitisse. <9> Viuite nunc adepta
securitate gaudentes. quem fas non fuit cogere, potuistis uoluntariis
sponsionibus obligare. nam qui dubitat sub dei confidentia iusta promittere,
uult habere liberum, quod non est pollicitus, immutare. tenete igitur arbitrii
mei idoneum uadem, speculum cordis, imaginem uoluntatis, ut quibus non sum facie
notus, fiam morum qualitate recognitus. in hac me potius parte conspicite, qua
latent praesentes. non est uobis damnum absentiae meae: utilius est iudicem
mente nosse quam corpore.
VIIII. IUDICIBUS PROVINCIARUM SENATOR PPO.
<1> Sciens ab eis contrarium posse credi, qui praecedentibus malis fuerant
imminuti, dum mens humana facile suspicatur de quolibet illa quae pertulit,
propositi nostri uotum edictali tenore promisimus, ne iuuante deo quos securos
esse cupimus uel de ipsa sollicitudine grauaremus. non enim est paruum tormentum
aduersum aliquid formidare uenturum, dum semper grauius aestimatur emergere quod
timetur. absit a nostris temporibus uel minima credulitas laesionis. reo iam
uicinus est qui malus putatur, quia tunc aliquid persuadetur animo, cum
intrauerit pectus apta suspicio. <2> Quapropter dicatio tua per loca celeberrima
proponi faciat destinata. aptum est enim ab his iussa cognosci, quos decreuimus
ammoneri. excitetur nunc amor omnium circa dominos felices, ut, sicut nos nullum
contraria uoluimus cogitatione suspendere, ita se et illi deuotos debeant pie
regnantibus exhibere. sponsiones autem nostras uos ueras efficitis, si
prouincialibus aequabiliter praesidetis. diligite iustitiam, quae uos et
amabiles faciat et gloriosum commodum sua participatione concedat. <3> Scitote
officia uobis quasi actuum uestrorum testes assistere. et ideo quam magnum est
in tantorum conspectu facere quod omnium possint ora praedicare? iudicium quasi
iuridicium cognoscite uocitatum. praesulem agere non decet quod alter accuset.
quid timeat reus, cum uiderit crimen in fascibus constitutum? sola malis illa
tormenta sunt, si publica uota moribus suis sentiant esse contraria. dici enim
non potest disciplina, quando ipsa fuerit corrigenda. <4> Studete ergo nobiscum,
ut boni mores prouincialibus dentur, sed nuditas auferatur. de remediis potius
quam de laesione tractetur. graue malum est quemquam ad largienda iuris
beneficia fieri et mixtum laesionibus inueniri. sic agite, ut, cum iustitia
probata quaeritur, annus uester breuis esse uideatur. honores uobis potius
offerantur. necessitatem quippe ambitus amittetis, si prouincialium uobis uota
societis. nullos uestrorum actuum facimus esse custodes nec sub priuato arbitrio
ingenium iudicis inclinamus: sed omnia sic gerite, ne fiat necessarium quod nunc
credimus esse turpissimum. instar nostrae geritis dignitatis si uos conscientiae
puritate tractetis. obuiate malis, fouete nihilominus innocentes. <5> Si quis
tamen est, qui ausu temerario contra uestros fasces erigatur nec possitis
exercere quod iustum est, aut petitorem protinus cum uestra relatione
transmittite aut, si uiribus deseritur ueniendi, negotium destinata relatione
declaretur, quando et euectiones publicas accepistis, et nobis gratum sit audire
de talibus. atque ideo totius uobis excusationis causa summota est, quando aut
per dignitatem uestram potestis recta gerere aut certe nobis quae sunt
necessaria nuntiare.
X. BEATO V. C. CANCELLARIO SENATOR PPO.
<1> Cum rerum domini clementia de famuli sui Dani salute cogitaret, cuius uotum
est de cunctorum sospitate laetari, remedia Lactarii montis eum iussit expetere,
ut cui medella humana nil profuit, uulgatum loci beneficium subueniret: qui
crebra tussi retonans anhelo pectore membra tenuauit, dum ministeria naturae
nimia concussione debilitata uirtutes suas explicare nequeunt ad salutem. escas
enim in auxilium humani corporis contributas, dum apte non transigit, reddit
inutiles. nec interest talibus an sumere cibum an sustinere ieiunium. in dies
singulos substantia uiua deficit et uelut rimosum dolium paulatim defluens donec
euacuetur, expenditur. <2> Huic igitur ferocissimae passioni beneficium montis
illius diuina tribuerunt, ubi aeris salubritas cum pinguis arui fecunditate
consentiens herbas producit dulcissima qualitate conditas, quarum pastu uaccarum
turba saginata lac tanta salubritate conficit, ut quibus medicorum tot consilia
nesciunt prodesse, solus uideatur potus ille praestare, reddens pristino ordini
resolutam passionibus uim naturae. replet membra uacuata, uires effetas
instaurat et fomento quodam reparabili aegris ita subuenit quemadmodum somnus
labore fatigatis. <3> Haec itaque armenta in tam abundanti pabulo exhausta
uidere miraculum est, ut umor ille lacteus non praestet origini suae, qui
corpora mortalium probatur laesa reficere, miroque modo herbis animalia non
proficiunt, unde hominum membra pinguescunt. exiles per dumeta discurrunt
montium, tenues uidentur et instar eius cui medentur sustinent passionis. lac
autem tam pingue, ut haereat digitis, cum exprimatur in uasis. <4> Qua de re
anonas deputatas subuectionemque necessariam praebete uenienti, ut in supra
dicto loco armentali suco salubriter pastus eodem alimento reparetur eius
iuuentus, quo nutritur infantia. consurgite, animi tali passione laborantium:
iam non amaro antidoto horrebitis dulcissimam uitam. uoluptuose bibite quae
saluberrima sentiatis. felicitatis genus est inde curari, unde libens animo
aeger possit expleri.
XI. EDICTUM DE PRETIIS CUSTODIENDIS RAVENNA.
<1> Venalitas uictualium rerum temporis debet subiacere rationi, ut neque in
uilitate caritas nec in caritate uilitas expetatur, sed aequalitate perpensa et
murmur ementibus et grauamen querulis negotiatoribus auferatur. <2> Atque ideo
trutinatis omnibus et ad liquidum calculatione collecta diuersarum specierum
pretia subter affiximus, ut omni ambiguitate summota definitarum rerum debeat
manere custodia. si quis autem uendentium non seruauerit quae praesentis edicti
tenor eloquitur, per singulos excessus sex solidorum multam a se nouerit
exigendam et fustuario posse subiacere supplicio, quatinus eum et damni metus
terreat et praedicta poena uehementer affligat.
XII. EDICTUM PRETIORUM PER FLAMINIAM.
<1> Si otiosi populi urbium singularum sub pretiorum iustitia continentur,
quanto magis debet laborantibus subueniri, ne utilitas commeantium saucietur
discrimine fortuitorum! et ideo susceptio transeuntium requies debet esse
curarum, ne quod ad leuamen inuentum esse constat, detestabile potius grauamen
infligat. recipiatur hospes ad pretia definita: iniquitatem non patiatur auaram
qui inuitatur ad gratiam, quando turpis aucupatio est terrere enormitate pretii
et susceptione blandiri. <2> Praedoni similis est, qui sub iniqua cupit
uoluntate distrahere: utrosque enim constat aliena uelle diripere et
considerationem iustitiae non habere. nescitis quanta possitis adquirere
moderati? ultro ad commoda uestra ueniunt, qui uos temperanter agere posse
cognoscunt. nullus ergo se aestimet, quod est familiare semper absentium,
longinquitatis obliuione defendi, quando ad nos cotidie ueniunt qui uestra
mercimonia patiuntur. <3> Cauete potius damna multarum, qui lucrorum auiditates
appetitis. sex enim solidorum dispendium se nouerit sustinere et laceratione
corporis affligendum, si quis aliter uendendum esse crediderit, quam miles
noster in rem directus pretia cum ciuibus atque episcopis locorum habita
deliberatione censuerit. sufficere enim debent omnibus honesta lucra de ciuibus,
ne obsessa potius itinera uideantur esse latronibus.
XIII. IUSTINIANO AUGUSTO SENATUS URBIS ROMAE.
<1> Honestum nimis et necessarium uidetur esse negotium pro securitate Romanae
rei publicae pio principi supplicare, quia conuenit a uobis expeti quod nostrae
possit proficere libertati. nam inter cetera bona, quae uobis singulariter
diuina tribuerunt, nihil gloriosius probatur accedere, quam quod uos cognoscitis
ubique posse praestare. rogamus ergo, clementissime imperator, et de gremio
curiae supplices tendimus manus, ut pacem uestram nostro regi firmissimam
praebeatis nec nos patiamini abominabiles fieri, qui semper de uestra concordia
uidebamur accepti. <2> Romanum si quidem nomen uos commendatis, si nostris
dominis benigna conceditis. gratia uestra nos erigit ac tuetur et hoc mereri
cognoscimus, quod de uestra mente sentitur. quietem ergo Italiae foedera uestra
componant, quia tunc amari possumus, si per uos dilectio uotiua copuletur. cui
rei si nostrae preces adhuc non uidentur posse sufficere, aestimate patriam
nostram in haec precatoria uerba prorumpere: <3> 'Si tibi aliquando grata fui,
ama, piissime principum, defensores meos. qui mihi dominantur, tibi debent esse
concordes, ne incipiant talia in me facere, quae a uotis tuis cognouerint
discrepare. non mihi sis causa crudelis exitii, qui semper uitae gaudia
praestitisti. ecce alumnos meos sub tua pace geminaui, ecce ciuibus ornata
resplendui. si me laedi pateris, ubi iam nomen tuae pietatis ostendis? quid enim
pro me nitaris amplius agere, cuius religio, quae tua est, cognoscitur sic
florere? senatus meus honoribus crescit, facultatibus indesinenter augetur. <4>
Noli per discordiam dissipare quod deberes per bella defendere. habui multos
reges, sed neminem huiusmodi litteratum: habui prudentes uiros, sed nullum sic
doctrina et pietate pollentem. diligo Hamalum meis uberibus enutritum, uirum
fortem mea conuersatione compositum, Romanis prudentia carum, gentibus uirtute
reuerendum. iunge quin immo uota, participare consilia, ut tuae gloriae
proficiat, si mihi aliquid prosperitatis accedat. noli me sic quaerere, ut non
ualeas inuenire. tua sum nihilominus caritate, si nullum facias mea membra
lacerare. <5> Nam si Libya meruit per te recipere libertatem, crudele est me
amittere quam semper uisa sum possidere. impera motibus iracundiae, triumphator
egregie. plus est quod generali uoce petitur quam si uester animus cuiuslibet
ingratitudinis offensione uincatur.' <6> Haec Roma loquitur, dum uobis per suos
supplicat senatores. quod si adhuc minus est, beatorum apostolorum Petri atque
Pauli petitio sanctissima cogitetur. nam qui securitatem Romanam saepe
defendisse probantur ab hostibus, quid erit quod eorum meritis uester non
tribuat principatus? sed ut omnia reuerentiae uestrae congruere uideantur, per
illum uirum uenerabilem legatum piissimi regis nostri ad uestram clementiam
destinatum preces nostras credidimus porrigendas: ut tam multa debeant efficere,
quae uel singula potuerunt apud pios animos optinere.
XIIII. GAUDIOSO CANCELLARIO PROVINCIAE LIGURIAE SENATOR PPO.
<1> Cum multis itineribus Comum ciuitas expetatur, ita se eius possessores
paraueredorum assiduitate suggerunt esse fatigatos, ut equorum nimio cursu ipsi
potius adterantur. quibus indultu regali beneficium praecipimus iugiter
custodiri, ne urbs illa, positione sua libenter habitabilis, rarescat incolis
frequentia laesionis. est enim post montium deuia et laci purissimi uastitatem
quasi murus quidam planae Liguriae. quae licet munimen claustrale probetur esse
prouinciae, in tantam pulchritudinem perducitur, ut ad solas delicias instituta
esse uideatur. <2> Haec post tergum campestria culta transmittit et amoenis
uectationibus apta et uictualibus copiis indulgenter accommoda: a fronte
sexaginta milibus dulcissimi aequoris amoenitate perfruitur, ut et animus
recreabili delectatione satietur et piscium copia nullis tempestatibus
subducatur, merito ergo Comum nomen accepit, quae tantis laetatur compta
muneribus. hic profecto lacus est nimis amplissimae uallis profunditate
susceptus, qui concharum formas decenter imitatus spumei litoris albore
depingitur. <3> Circa quem conueniunt in coronae speciem excelsorum montium
pulcherrimae summitates, cuius ora praetoriorum luminibus decenter ornata quasi
quodam cingulo Palladiae siluae perpetuis uiriditatibus ambiuntur. super hunc
frondosae uineae latus montis ascendunt. apex autem ipse quasi quibusdam
capillis castanearum densitate crispatus ornante natura depingitur. hinc riui
niueo candore relucentes in aream laci altitudine praecipitante descendunt. <4>
Huius sinibus ab austro ueniens Addua fluuius faucibus apertis excipitur. qui
ideo tale nomen accepit, quia duobus fontibus adquisitus quasi in proprium mare
deuoluitur, qui tanto impetu uastissimi aequoris undas incidit, ut nomen
retinens et colorem in septentrionem obesiore aluei uentre generetur: putes
quandam lineam fusciorem in aquis albentibus esse descriptam miroque modo
influentis discolor natura conspicitur, quae misceri posse simili liquore
sentitur. <5> Hoc et in marinis quidem fluctibus fluuiorum inundatione
contingit: sed ratio ipsa uulgariter patet, ut torrentes praecipites limosa
faece corrupti uitreo sint aequori discolores. hoc autem iure putabitur
stupendum, quod simile tantis qualitatibus elementum per pigrum stagnum uideas
ire celerrimum, ut amnem per solidos campos putes decurrere, quem se peregrinis
undis non uideas colore posse miscere. <6> Quapropter incolis harum rerum iure
parcitur, quando amoena omnia delicata sunt ad labores et facile onus
afflictionis sentiunt, qui uti suauibus deliciis consuerunt. fruantur ergo
munere regali perpetuo, ut sicut gaudent natiuis epulis, ita eos exultare faciat
munificentia principalis.
XV. LIGURIBUS SENATOR PPO.
<1> Regale munus impetratum gaudium debet esse cunctorum, ut prouocetis ad
meliora, cum de uobis concessa probaueritis esse gratissima. nam si subuenire
semper amantis est, cuiusmodi uos aestimatos intellegitis, quos releuatos esse
sentitis? sed ne uestram laetitiam longis praelocutionibus differamus, quia
bonarum rerum celerrima semper desideratur agnitio, gloriosissimi domini deuotae
Liguriae necessitatibus consulentes centum libras auri per illum atque illum de
cubiculo suo pietate solita destinarunt, ut, iudicio uestro quibus est causa
notissima, tanta unusquisque huius muneris participatione laetetur, quanta
necessitate grauatus esse cognoscitur, ne quod afflictis datum est usurpet
inlaesus, sed illi reparatis uiribus consurgant, qui damnorum sarcina premente
corruerant. <2> Hastensis autem ciuitas, quae supra ceteras suggeritur
ingrauata, dispositionis uestrae iustitia maxime subleuetur, ut secundum modum
dispendii commoditate beneficii perfruatur. sumite pietatis stipendium,
tributarii, et dominorum aestimate clementiam, qui condicione mutata hoc uos ab
aerario uidetis accipere, quod consueueratis inferre. sed ut beneficia dominorum
subtractis exactionum incommodis augeantur, celerius relatio uestra nos
instruat, quid unicuique de hac summa relaxandum esse iudicatis, ut tantum de
prima illatione faciamus suspendi, quantum ad nos notitia directa uulgauerit.
quapropter piissimis dominis uotis salutaribus reddite quae debetis, ut ratio
uestra supplicando peragat, quod se in ipso uniuersitas recepisse cognoscat.
XVI. LIGURIBUS SENATOR PPO.
<1> Studiose nos oportet erigere, quos statuit regalis pietas subleuare: nam
quibus dominorum clementia uoluit descendere, conuenit his etiam subiectos de
propria dignitate praestare. nuper mihi gratias retulistis, quod spem uobis
bonorum quam fructum aliquem contulissem. inuitastis me ad beneficia quia magna
suscepistis gratulatione promissa. absoluimus uotum iudicis obligati. quae
fuerunt praedicta, nunc probantur impleta. <2> Initium igitur a libra faciemus,
quia ubi conscientiam fas est intendere, inde debet sermo iudicis inchoare. hinc
est, quod in ponderibus atque mensuris uos suggeritis ingrauatos. et ideo nostra
cura prouidebit, ut nullius uos ulterius ex ea parte uexare possit iniquitas,
quia graue scelus esse iudicamus aut mensuras modum excedere aut libram
aequissimi ponderis iustitiam non habere. <3> Milites etiam sedis nostrae nec
non exactores atque susceptores, a quibus grauia uobis inferri dispendia
suspirastis, praeceptis nostris fecimus conueniri, ut deductis ad liquidum
ratiociniis si quid fraudis potuerit inueniri, sine aliqua dilatione persoluant:
quia hoc nostris temporibus profitemur inimicum, ut alter alterius laetetur
incommodo. <4> Nunc ad apparatum florentissimi exercitus uota conuertite,
uniuersa sine querella uel tarditate aliqua procurantes. efficaciter enim me ad
omnia benigna constringitis, si gratanter quae sunt iussa completis. laetus
oboediat, quem causa generalitatis inuitat. illa sola dolere debent dispendia,
quae studio uidentur cupiditatis imposita. nam quod pro rerum necessitate
praecipitur, inde prudentum animus non grauatur.
XVII. PROMOTIONES OFFICII PRAETORIANI, QUAE NATALE DOMINI FIUNT.
<1> Si hodierno die redemptionis inuenimus uitale remedium, si caelesti
beneficio panditur spes salutis, conuenit etiam nos longo labore fatigatis
gaudii deferre medicinam, ut superna bona quae periclitanti mundo collata sunt,
generaliter sentiantur. alioquin piaculum quoddam est inter tristes uelle
gaudere, et humanitatis refugit affectum, qui dolorem non sequitur alienum.
contra quanto se melius excitat de communione laetitia, quando incitamentum
magnae alacritatis est plurimos uidere gaudentes! <2> Hinc est quod sapientes
mortale genus unum hominem esse testati sunt, quoniam omnes a cunctis casibus
suis indiuisos esse uoluerunt. quapropter unusquisque iuxta matriculae seriem
tua designatione uulgetur, ut quem loci ordo postulat, gradibus promotionis
accedat. egrediatur unus, ut anteponat uniuersos. totam sequentium seriem ad
prouectum trahit, dum prior militiam perfunctus exierit.
XVIII. DE CORNICULARIO QUI EGREDITUR.
<1> Amplectenda est promotionum grata sollemnitas, quae bene meritorum soluit
excubias, quia tironibus conceditur spes laboris, dum uicissitudo fuerit reddita
ueteranis. et ideo Anthianum, qui praetorianis inculpabiliter paruisse
perhibetur obsequiis, inter tribunos et notarios ad adorandos aspectus properet
principales, ut iuxta consuetudinem praesentatus spectabilitatis decoretur
insignibus.
XVIIII. DE CORNICULARIO QUI ACCEDIT.
<1> Optatus ad optata perueniens sui nominis sortiatur effectum. et ideo
supradictum assiduis laboribus comprobatum corniculariorum sumere censemus
officium, ut iure inter primates assistat, qui tironum inculpabiliter egit
excubias.
XX. DE PRIMISCRINIO QUI EGREDITUR.
<1> Olim quidem efficaciter peragens imperata multorum meruisti bona iudicia:
sed nunc et diuino fauore commendatus erigeris, quando militiae laboribus
perfunctus esse monstraris. quapropter spectabilitatis honore suffultus inter
tribunos et notarios uenerandam purpuram adoraturus accede, ut per sacros
aspectus principis tuae subsistat firmitas dignitatis.
XXI. DE PRIMISCRINIO QUI ACCEDIT.
<1> Differri non patimur merita fidelium, ut ad studia bonorum actuum prouocemus
uota cunctorum. demus igitur quae sunt iusta laboribus, ut prouectu priorum
inuitemus corda sequentium. atque ideo Andreas, qui praetorianis fascibus
inculpabiliter noscitur obsecutus, gradum feliciter primiscriniatus ascendat, ut
locum, quem uersutia nesciuit exquirere, se gaudeat probis moribus inuenisse.
XXII. DE SCRINIARIO ACTORUM.
<1> Iuste potentiora consequitur, qui de commissa sibi negotii perfectione
laudatur. et ideo Castellum, quem matriculae series fecit accedere, nostra
auctoritas quoque actorum scriniarii curam praecipit obtinere.
XXIII. DE CURA EPISTULARUM.
<1> Constantiniani merita licet plures asserant, adstipulatio quoque nostra
commendat. tanta est etenim in eo sinceritas mentis, ut et iudice teste mereatur
laudari. hic itaque epistularum canonicarum curam prouectus accipiat, ut amplius
momenta suae integritatis exhibeat, quando fidem publicam sibi respicit esse
commissam.
XXIIII. DE SCRINIARIO CURAE MILITARIS.
<1> Conuenienter honoris praestat augmentum probitas actionis nec decet
differri, quem frequenter efficacem contigit approbari. hinc est quod Lucinum
scriniarium curae militaris esse praecipimus: exhibiturus obsequium cui se
merito non dubitat attributum.
XXV. DE PRIMICERIO EXCEPTORUM.
<1> Decet nos incunctanter tribuere promotionis ascensus, quos labor militiae
meretur assiduus. sicut enim aequum est desidiosis laborantium praemia denegare,
ita conuenit excubantibus remunerationis optata concedere. et ideo Patricius
exceptorum primicerium se a nobis nouerit institutum, ut ad tale perductus
officium placuisse suarum merita gaudeat actionum.
XXVI. DE SEXTO SCHOLARIO.
<1> Dignus est nostro iudicio promoueri, qui a multis praesulibus meruit
approbari. uni enim acceptum fuisse interdum gratia est, multis placuisse
iudicium. iustus igitur locum sexti scholaris se nouerit consecutum inuenturus
militiae praemium, cum se actibus studuerit sociare fidelibus.
XXVII. DE PRAEROGATIVARIO.
<1> Quis Iohannem non aestimet merito esse promouendum, qui nostro iudicio
cancellorum olim sumpsit officium et tunc iam praerogatiuam conscientiae meruit,
quando secreti munus iudicialis accepit? fruatur itaque gaudio et ordinis et
honoris, qui moribus noscitur placuisse laudatis. hunc igitur praerogatiuarium
sententia nostra confirmat, ut gradu potitus emeriti deuotioribus animis
publicae pareat iussioni.
XXVIII. DE COMMENTARIENSE.
<1> Iuuat bene meritorum uotis beneficiis respondere uicariis, ut deuotiore
mente possit obsequi, qui meruit anteferri. quapropter Heliodorus
commentariensium fruatur officio. digne siquidem eius integritati committimus
quae custodienda esse censemus.
XXVIIII. DE REGENDARIO.
<1> Aequitati uidetur accommodum, si efficaci actione laudatis digna moribus
uicissitudo praestetur. habet enim suam gloriam, qui pensatis excubiis militarem
noscitur promouere fortunam. hinc est quod Carterium regendarii locum feliciter
obtinere censemus, ut spe futuri prouectus auidius praetorianis possit inhaerere
laboribus.
XXX. DE PRIMICERIO DEPUTATORUM ET DE PRIMICERIO AUGUSTALIUM.
<1> Dignum est ut sequatur uota fidelium fructus laborum et superior gradus
excipiat, quos gestarum rerum integritas affectata commendat. hinc est quod
Ursum primicerium deputatorum atque Beatum primicerium Augustalium esse
censemus: ut qui ad maiora prouecti uidentur officia, praedicanda conscientiae
sequantur exempla.
XXXI. DE PRIMICERIO SINGULARIORUM QUI EGREDITUR.
<1> Decet palmae praemia consequi, qui sacramentis militaribus uidentur esse
perfuncti, quia diutinus labor sibi uindicat quod inexperta uix potest inuenire
nobilitas. et ideo, quoniam Urbicus primiceriatus sui noscitur tempora
peregisse, inter domesticos et protectores sacram purpuram adoraturus accedat,
ut uenerandis clarificatus aspectibus militaribus excubiis se gaudeat liberatum.
XXXII. DE PRIMICERIO SINGULARIORUM QUI ACCEDIT.
<1> Adest militaribus obsequiis integritas iudicantis, quia gratanter exsoluit
quod deberi iuste cognoscit. quapropter Pierius primicerium singulariorum se
nostra auctoritate cognoscat effectum.
Si qua sunt alia, fiducialiter suggerantur: quia non est haesitationis metus,
ubi non est iudicis uenalis auditus.
XXXIII. DE CONCEDENDIS DELEGATORIIS.
<1> Moras intercipit, quem praestandi consuetudo constringit, quia plus ille ad
beneficia compellitur, qui innata beniuolentia commonetur. neque enim decet, ut
nostrorum factorum dissimiles esse debeamus, dum oporteat crescere numerositate
remedii, cui administrationis tempora uidentur augeri. et ideo de praesenti
uobis delegatorios nostra largitur humanitas, ut tunc habeatis commoda praemii,
quando estis et sudoris terminum consecuti. non uos anxia mora suspendimus nec
cruciabili dilatione fatigamus. unus sit finis sollicitudinis et laboris. nam
differendum quis putet, si beneficia sua uendere non retractet?
XXXIIII. ANTHIANO SUGGERENTE DICTUM EST.
<1> Petitionem tuam retinebit officium, donec consensum sequentium, dum facultas
fuerit, inquiramus, quia uni incaute creditur quod est a plurimis asserendum.
ite omnes prouecti. estote cuncti feliciter approbati. nil sustinuistis dubium,
dum omne iudicium habeatur incertum. sola uos alpha complectitur, ubi ea littera
non timetur. sic enim unusquisque proprio usus est uoto, tamquam de alieno non
pependisset arbitrio.
XXXV. DELEGATORIA.
<1> Si Olympiaci currus agitator rapit praemia post labores, si ferarum certamen
inhonestum uelociter solet coronare uictores, quam celeritatem remunerationis
merebitur, a quo laudabiliter militiae sacramenta peraguntur? cur enim agentum
in rebus miles officii post tot laboris incerta aliquid patiatur ambiguum, qui
crebris actionibus excubando ideo principis nomen habere promeruit, quia
militiae sacramentis ceteros antecellit? <2> Obseruauit enim iugiter
imperialibus iussis et ut reuerentiam praetorianae sedis extolleret, tunc ad
eius uenit obsequium, quando uocabulum coepit habere praecipuum. tales ergo
tardare piaculum est, quia post palmam nemo dilatus est. uotiuum non potest dici
quod tristis suscipit. grauamina nulla metuant absoluti, ne portus hoc ingerat
liberis quod facere potuit procella uexatis. <3> Quapropter experientia tua de
illa prouincia ex illatione tertia fiscalium tributorum solidos, quos principi
Augustorum prouida deputauit antiquitas, sine aliqua dilatione persoluat, quos
noueris tertiae decimae indictionis rationibus imputandos. sed caue uenales
moras: declina damnosa fastidia, ut qui desideras similia consequi, exemplum
tibi non uidearis intulisse dispendii. qua enim poscentem ratione summoueas, si
te actionis tuae qualitate constringas? honorabiles quidem a cunctis habendi
sunt ueterani, sed ab his maxime, qui militiae labore detinentur. tibi ergo
praestas quod parcis alteri, quando indemnitas prioris lucrum potius fit
sequentis.
XXXVI. ANATOLICO CANCELLARIO PROVINCIAE SAMNII SENATOR PPO.
<1> Qui laboriosas excubias et officia magnae sedulitatis inuenit,
rationabiliter et temporis definita constituit, ut quod erat sub uitae termino
positum praemium, non haberet incertum. alioquin quis sufficere semper et
expectare posset, cum se mortalibus lux ipsa subduceret? qua de re sub incerta
uita certa militia est nec habet quod possit metuere, qui ad designatum tempus
inoffense meruit peruenire. <2> Astra ipsa, ut astronomi uolunt, licet assidua
repetitione uoluantur, cursus sui definita custodiunt. nequit esse ambiguum,
quod fine proprio tenetur inclusum. Saturnus annis triginta constituta sibi
caeli spatia peruagatur. stella Iouis duodecim annis attributam sibi regionem
illustrat. Martis sidus ignea celeritate raptatum decem et octo mensibus
deputata sibi discurrit. sol anni spatio zodiaci circuli signa praeteruolat.
astrum Veneris mensibus quindecim spatia concessa transcendit. Mercurius
uelocitate succinctus tredecim mensibus proposita sibi interualla praeteruehit.
Luna peculiari nobis uicinitate proximior triginta diebus peragit, quod anni
spatio sol aureus circumactus impleuerit. <3> Merito ergo laboris finem mortales
inueniunt, quando, ut philosophi dicunt, et ipsa, quae deficere nequeunt nisi
cum mundo, cursus sui terminos rationabiliter acceperunt, hac tamen
interueniente distantia, quod illa opus suum finiunt, ut ad principium redeant,
humanum genus ideo militat, ut peractis sudoribus conquiescat. <4> Et ideo illi,
qui inculpabiliter cornicularii est perfunctus officio, septingentos solidos,
quos ei longaeua consuetudo deputauit, per illam indictionem de Samnii prouincia
ex illatione tertia sine ambiguitate contrade: quia non potest dubitare de
praemio, quem uera iudicis commendat assertio. praefuit enim cornibus secretarii
praetoriani, unde ei nomen est deriuatum, laudatis actionibus comprobatus: eo
ministrante caliculum scripsimus inempti, quod magnis pretiis optabatur impleri:
gratificati sumus, cui leges fauerunt: negauimus, cui iustitia non promisit. <5>
Nemo tristis extitit de uictoria sua, quia saluis facultatibus obtinuit, quando
ut fieret superior, non redemit. nostis omne quod loquimur: neque enim in
cubiculis nostris secretaria uestra peracta sunt: quod egimus, cohortes
nouerunt. fuimus nimirum ad nocendum priuati, ad praestandum iudices. districtio
nostra in uerbis est habita et in factis sensa benignitas. irascebamur placati,
minabamur innoxii et ne potuissemus laedere, terrorem uidebamur inferre.
habetis, ut solebatis dicere, castissimum iudicem: relinquam uos integerrimos
testes.
XXXVII. LUCINO V. C. CANCELLARIO CAMPANIAE SENATOR PPO.
<1> Bene antiqua moderatione prouisum est, ut laboris sui pretia recipiant qui
publicis utilitatibus obsecundant, ne quis haberetur praeteritus, qui probabili
fuerat actione laudandus. nam cui officio remuneratio solueretur, si
praetorianis laboribus praemia tardarentur? quicquid enim paene in re publica
geritur, eorum strenuitate completur et, quod difficillimum seruiendi genus est
‚ sic enim omnia cogitur implere, ut non permittatur excedere ‚, exercitibus
paret, armatis obtemperat et inde reportat gratiam, ubi inuenire potest alter
offensam. <2> Quid publicas illationes per difficiles minutias referamus esse
collectas, quas magna subtilitate compositas et ab illis exigunt, quos offendere
non praesumunt? eorum est etiam sudoribus applicandum, quod uictuales expensae
longe quidem positae, sed tamquam in urbe regia natae sine querela prouincialium
congregantur, quia dum suis temporibus aliquid apte quaeritur, danti dispendium
non putatur. <3> Actus ipsorum nostra gloria est, opinio temporum, uirtus
explicabilis iussionum, et quicquid pro continendis omnibus gratificationis
accipimus, eorum iuste prouisionibus applicamus. splendescunt usu ipso laboribus
attributi, qui reddunt homines semper instructos: labores, inquam, uiolenti
magistri, solliciti paedagogi, per quos cautior quis efficitur, dum incurri
pericula formidantur. erudiatur quis forensibus litteris: alter qualibet
disciplina doceatur: ille tamen instructior redditur, qui actu continuae
deuotionis eruditur. <4> Et ideo talibus cum honore soluendum est quod merentur,
ut et sibi aliquando accipiat, qui semper rei publicae utilitatibus adquirebat.
quocirca illi primiscrinio iam militiae labore perfuncto ex canone prouinciae
Campaniae tertiae illationis tot solidos sollemniter te dare censemus, ut et
ille iustis laboribus perfruatur et posteri eius exemplum liberae famulationis
accipiant, cum eum pro sua fide bene habitum fuisse cognoscunt.
XXXVIII. IOHANNI CANONICARIO TUSCIAE SENATOR PPO.
<1> Moderatrix rerum omnium diligenter considerauit antiquitas, ut, quoniam erat
plurimis per nostra scrinia consulendum, copia non deesset procurata chartarum,
quatinus, cum iudices multis profutura decernerent, odiosas moras dulcia
beneficia non haberent. hoc munus supplicantibus datum est, ne auare
constringerentur ad commodum, pro quibus a largitate publica constabat acceptum.
ademptus est impudentissimus exactionibus locus: specialiter a damnis exemit
propter quos principis humanitas dedit. <2> Pulchrum plane opus Memphis
ingeniosa concepit, ut uniuersa scrinia uestiret quod unius loci labor elegans
texuisset. surgit Nilotica silua sine ramis, nemus sine frondibus, aquarum
seges, paludum pulchra caesaries, uirgultis mollior, herbis durior, nescio qua
uacuitate plena et plenitudine uacua, bibula teneritudo, spongeum lignum, cui
more pomi robur in cortice est, mollities in medullis, proceritas leuis, sed
ipsa se continens, foedae inundationis pulcherrimus fructus. <3> Nam quid tale
in qualibet cultura nascitur, quam illud, ubi prudentium sensa seruantur?
periclitabantur ante hoc dicta sapientium, cogitata maiorum. nam quemadmodum
uelociter potuisset scribi, quod repugnante duritia corticis uix poterat
expediri? ineptas nimirum moras calor animi sustinebat et cum differebantur
uerba, tepescere cogebantur ingenia. <4> Hinc et priscorum opuscula libros
appellauit antiquitas: nam hodie quoque librum uirentis ligni uocitamus exuuias.
erat indecorum, fateor, doctos sermones committere tabulis impolitis et in
ueternosis ramalibus imprimere, quod sensualis poterat elegantia reperire.
grauatis manibus paucis memoriam commonebat nec inuitabatur plura dicere, cui se
talis pagina uidebatur offerre. sed hoc primordiis consentaneum fuit, quando
rude principium tale debuit habere commentum, quod prouocaret ingenia
sequentium. inuitatrix pulchritudo chartarum affluenter dicitur, ubi exceptionis
subtrahi materia non timetur. <5> Haec enim tergo niueo aperit eloquentibus
campum, copiosa semper assistit et quo fiat habilis, in se reuoluta colligitur,
dum magnis tractatibus explicetur. iunctura sine rimis, continuitas de minutiis,
uiscera niuea uirentium herbarum, scripturabilis facies, quae nigredinem
suscipit ad decorem, ubi apicibus eleuatis fecundissima uerborum plantata seges
fructum mentibus totiens suauissimum reddit, quotiens desiderium lectoris
inuenerit: humanorum actuum seruans fidele testimonium, praeteritorum loquax,
obliuionis inimica. <6> Nam memoria nostra et si causas retinet, uerba commutat:
illic autem secure reponitur, quod semper aequaliter audiatur. quapropter
deputatam summam tot solidorum de Tuscia prouincia illi subadiuuae ex illatione
tertia te praebere censemus tertiae decimae indictionis rationibus imputandam,
quatenus scrinium publicum integritatem fidei suae laudabili debeat perpetuitate
seruare. quod defectum inter mortalia nesciens annua cumulatione semper
augescit, noua iugiter accipiens et uetusta custodiens.
XXXVIIII. VITALIANO V. C. CANCELLARIO LUCANIAE ET BRUTTIORUM SENATOR PPO.
<1> Apparet, quantus in Romana ciuitate fuerit populus, ut eum etiam de
longinquis regionibus copia prouisa satiaret, quatenus circumiectae prouinciae
peregrinorum uictui sufficerent, cum illi se ubertas aduecta seruaret. nam quam
breui numero esse poterat, qui mundi regimina possidebat! <2> Testantur enim
turbas ciuium amplissima spatia murorum, spectaculorum distensus amplexus,
mirabilis magnitudo thermarum et illa numerositas molarum, quam specialiter
contributam constat ad uictum. hoc enim instrumentum nisi fuerit usuale,
necessarium non habetur, quando nec ornatui potest proficere nec parti aliae
conuenire. denique haec quasi uestimenta pretiosa corporum ita sunt indicia
ciuitatum, dum nullus adquiescit superflua facere, quae se nouit magnis pretiis
explicare. <3> Hinc enim fuit, ut montuosa Lucania sues penderet, hinc ut
Bruttii boum pecus indigena ubertate praestarent. fuit nimirum utrumque
mirabile, ut et prouinciae tantae ciuitati sufficerent et sic ampla ciuitas
earum beneficiis uictualium indigentiam non haberet. erat quidem illis gloriosum
Romam pascere: sed quanto dispendio uidebatur posse constare adducere tam multis
itineribus quae darentur ad pondus, dum quae probabantur decrescere nullus
poterat imputare! <4> Redactum est ad pretium, ubi pati non poterant
detrimentum, quod nec itineribus imminuitur nec laboribus sauciatur. intellegant
prouinciae bona sua. nam si antiqui eorum fuerunt ad dispendia deuoti, cur isti
non sint ad compendia soluenda munifici? et ideo ambos titulos in assem publicum
iam redactos diligentia tua statutis illationibus procurabit, ne meis temporibus
neglegentes esse uideantur qui alienis dignitatibus laudabili integritate
paruerunt. <5> Nam licet et alias prouincias studuerim reficere, nihil tamen in
illis actum est quod uoluerim uindicare. senserunt me iudicem suum et quibus
priuatus ab auis atauisque praefui, uiuacius nisus sum in meis fascibus
adiuuare, ut me agnoscerent retinere affectum patriae, quos in meis prouectibus
sentiebam propensa exultatione gaudere. pareant ergo non compulsione aliqua, sed
amore, quando et hanc summam illis imminui, quae solebat offerri. nam cum mille
ducenti solidi annuis praestationibus soluerentur, ad mille eos regia largitate
reuocaui, ut exultarent gaudiorum crementis de oneribus imminutis.
XL. INDULGENTIA.
<1> Quamuis nomen ipsum iudicis dicatum uideatur esse iustitiae et totius anni
orbitam aequitatis iubeamur ambulare uestigiis, his tamen diebus in domicilium
pietatis iure deflectimus, ut ad redemptorem omnium remissionis itinere
peruenire possimus. ex hac enim uirtute suauissimos fructus legimus et
remittendo aliis nobis parcimus. nam qui periculose iusti sumus, sub securitate
semper ignoscimus. quapropter poenas abdicimus, tormenta damnamus et tunc uere
iudices sumus. <2> Macte, indulgentia, quae soluis et praesules. tu patrona
humani generis, tu afflictis rebus medica singularis. quis tuo non egeat munere,
cum sit peccare commune? ab uniuersis necessario peteris, quando sub te spes
uitae sumitur, quae sub iustitia non habetur. nam dum cum tribus aliis sororibus
caelesti gratia perfruaris et amabili amplexatione nectamini, omnes tibi,
quamuis et ipsae uirtutes sint, honorabiliter cedunt, quando te humano generi
salutiferam esse cognoscunt. sed quid tantum de terrena conuersatione dicamus?
pietas est, quae regit et caelos. o si tecum liceret longis habitare temporibus!
totus excluderetur reatus, et parcendo fieret ut parcere tolleretur. <3> Sed
prouidentissime tanta res sacris solum temporibus uidetur esse concessa, ut
gratius mundus acciperet, unde pro rerum nouitate gauderet. quapropter abstine
noxiam, lictor, securem, cui licet impune facere quod in aliis cognosceris
uindicare: ama paulisper ferrum splendidum, non cruentum. catenas tuas lacrimis
madidas felicior rubigo suscipiat: illud potius reconde, quod solebat includere.
auditoria feralium uocum meliore sorte mutescant. sic re uera nomen custodis
sine mortibus alienis. quid semper inferis laboras? aliquando et superis milita.
otium tibi clemens actus indicit. qui iustitiae inexorabili excubat necesse est,
ut eum pietas benigna discingat. <4> Et ideo cella gemituum, tristitiae domus,
apud superos Plutonis hospitium, locus perpetua nocte caecatus, tandem infusione
lucis albescat: in quo non unum tormentum sustinet reus, qui antequam incurrat
necis exitus, a superis probatur abscisus. primum pedor ille collega catenarum
abominabili maerore discruciat: auditum alieni gemitus et lamenta conturbant:
gustum ieiunia longa debilitant: tactum pondera prementia defetigant: lumina
diutinis tenebris obtusa torpescunt. non est unum clausis exitium: multifaria
morte perimitur, qui carceris squalore torquetur. <5> Nunc ergo reos de Auerno
tuo uicturos emitte: redeant ad superos, qui ex magna parte inferos pertulerunt:
atria tua uacuitatibus impleantur. locus ille perennium lacrimarum quondam
tristes incolas perdat. non sunt inde qui laeti sunt: qui tunc profecto habebit
gratiam, si desertus appareat. exite, inclusi, uicina semper morte pallentes:
redite ad lucem, quos caligantes tenebrae possidebant, nihil amplius optata
morte passuri, nisi quod adhuc poteratis occidi. <6> Sed uos, qui nulla debetis
ambitione iam decipi, delicta derelinquite cum catenis, dierum beneficiis
absoluti. uiuite nunc honestate, qui didicistis superstites mori. cognoscite
quam beneficialis sit bona conuersatio: altera contulit teterrimum carcerem,
haec nouit splendidam tribuere libertatem: ista praestabit ut uelis uiuere, illa
dedit ut eligeres iam perire. si leges astringunt, ulterius uos nullus includit.
secreta pauescite: ad forum sine trepidatione uenite. <7> Illa iuste refugitis,
per quae tristia pertulistis. mirentur uos liberos, qui uiderunt reos. odisse
debetis quod uos tradidit neci. pecora ipsa uitare norunt, quae se laesisse
cognoscunt: itinera illa non repetunt, ubi in foueam corruerunt. tenaces laqueos
auis cauta declinat, haerentem uiscum ales suspecta non insidet. pisceus lupus
harenis se mollibus, ut plumbati lini insidias euadat, immergit: cuius ut
superducta retia eius tergum frustra diraserint, alacer in undas exilit et
uitati periculi gaudia liberatus agnoscit. <8> Scarus esca pellectus, cum
iunceum carcerem coeperit introire, mox se ad exitium suum inuitatum fuisse
cognouerit, in caudam labitur, paulatim se ab angusto subducens. quem si alter
eiusdem generis cognouerit inretitum, extrema eius mordicus trahit, ut qui sibi
captus non potest subuenire, alterius solacio probetur euadere. sic et sauri
argutum piscium genus a uelocitate nominati cum se in insidias nexuosas
impulerint, quasi quibusdam funibus aequabiliter illigati totis nisibus
trahentes retrorsum socium conantur liberare captiuum. plura sunt, si talia
perquirantur. omnia enim, quae possunt habere contraria, facilis casus
absumeret, si curam salutis propriae non haberent. <9> Ad te, claustrorum
magister, uerba reuocemus. patere poenale secretarium tuum innocenter esse
secretum. torqueris quidem, quod nullus affligitur: a communibus gaudiis maestus
exciperis, dum tibi soli non parcitur uenia generali, liuidae inuidiae
comparandus. sustine de omnium securitate iacturam, qui habuisti de multorum
afflictione laetitiam. sed ut tuos quoque gemitus consolemur, illos tibi
tantummodo uindica, quos lex pietatis gratia non relaxat, ne, cum truculentis
parceret, asperrima facinora leuigaret. soluamur ergo cuncti saecularibus
actibus implicati. patitur omnis homo periculosos nexus, quos festinet euadere.
claustra reos dimittant: nos uincula improbae cogitationis absoluant.
LIBER DUODECIMUS.
I. DIVERSIS CANCELLARIIS PROVINCIARUM SINGULARUM SENATOR PPO.
<1> Nescio quis magnus esse creditur, qui de penetralibus iudicis destinatur,
quoniam tanto plus aestimatur quis amare iustitiam, quanto ab illo frequentius
constat auditam. per milites suos intellegitur iudex et sicut discipuli magistri
scientiam produnt, sic nos obsequentium mores aperiunt. praeceps non putatur
obseruasse moderato, auarus paruisse non aduertitur continenti: stultus
prudentibus seruisse non creditur. <2> Periclitamur, fateor, in actionibus
nostris, si uos mala intentione tractetis et, quod nulli accidit uestrum,
alienum uitium nostrum celebratur obprobrium. sustinemus tales casus, quales nos
in alios iudicare non possumus et lex, qua fruuntur cuncti, in nobis non potest
custodiri. sed habemus iterum ex alia parte solacium, quod uestra bona nostra
creduntur esse mandata et nobis otiosis adquiritur, quicquid gloriae uestris
laboribus expeditur. <3> Si te enim aliquis sapienter agere uideat, statim famam
tui praeceptoris exaltat, dum tale institutum fuisse creditur, qualia gesta
nihilominus sentiuntur. una est sententia plebis tales esse iudices, quales uos
contigerit approbari. et ideo magnopere cauendum est, ne ille de uobis incipiat
iudicare, cuius uos opinionem contigerit ante lacerasse. ulciscitur poenis quod
misistis in fabulis et tormentis uestris compensat, quod populus uulneratus
exaggerat. quam periculosum est pati iudicem rationabiliter iratum et illum de
fortunis tuis decernere, quem te constat grauiter irritasse! quapropter stude
magis, ut nostra potius uoce lauderis, quia sicut te potest iudicis uel sermo
aduersus deprimere, ita prosperrima sententia subleuare. <4> Perge igitur per
illam indictionem iuuante deo ad illam prouinciam, cancellorum pompa decoratus
et gloriosa grauitate praecinctus. absens cogita praesentis pudorem. nam quid
debeas temptare uile, qui militas sub honore? fasces tibi iudicum parent et dum
iussa praetorianae sedis portare crederis, ipsam quodammodo potestatem
reuerendus adsumis. edicta nostra tu primus obserua: ostende bonam te
intendentibus uiam. nam cuius est iudicis custodire mandata, si milites nostra
uideantur neglegere constituta? <5> Reginam illam procacium uitiorum auaritiam
fuge, cui cuncta crimina detestabili deuotione famulantur: quae dum pectus
hominis ingressa fuerit, gregatim quoque maleficas cohortes admittit. ferri non
potest recepta, quia nescit esse solitaria. agmen habet blandissimum, arma
suscipit ex talentis et per dulcedinem superat quos amara deceptione captiuat.
proinde ad utilitates publicas esto sollicitus: iniuncta morali compulsione
procura. plus agit inculcator rationis quam possit exercere terribilis. persona
tua refugium sit oppresso, infirmi defensio, praesidium aliqua calamitate
concluso. sic enim proprie nostros cancellos agitis, si laesorum impia claustra
soluatis.
II. UNIVERSIS IUDICIBUS PROVINCIARUM SENATOR PPO.
<1> Gratias diuinitati refero, quia et prouinciales fecerunt quae monui et ego
compleui omnia quae promisi. nam nec me sensit quisquam aliqua uenalitate
pollutum nec ego pertuli tributarios indeuotos. habemus utrimque quod in nobis
diligere debeamus: illi repererunt affectuosos iudices, nos adquisiuimus
integerrimos praecones. agamus itaque deo praestante quod coepimus. possessor
mihi publicas pecunias libens inferat: ego illi in conuentu iustitiae tributa
persoluam. <2> Vobis autem commode repetitur, quod ueraciter actum esse
sentitur, quando de rebus praeteritis spes magna redditur in futuris. probastis
enim, quia nullum coegimus dare quod non debuisset offerre. non publicis, non
priuatis a me quisquam damnis afflictus est. discussorum terrores fecimus
ignorari. nec extraordinaria quaesiuimus, qui cuncta geri legibus optabamus. sed
nec uos sitis in ea parte dissimiles. praesules imitatores esse dignitatis
nostrae iura uoluerunt, quibus paene eandem quam nobis iurisdictionem per
prouincias contulerunt. <3> Nullum repudiat sequenda iustitia: omnes clarificat,
quos sui participatione sublimat: minorem se ille solus facit, qui ab ipsa
discesserit. cur accipiendi uota sectemur? nullam gloriam recipit qui diues
uocatur: contra omni laude decoratur qui iustus edicitur. desideremus potius
quod nos pretiosiores locupletibus facit. fasces accipimus, ut graues esse
debeamus: tribunalia conscendimus, ut morum gradibus euehamur. <4> Nil uile, nil
cupidum iudices decet. claras enim suas maculas reddunt, si illi ad quos multi
respiciunt aliqua reprehensione sordescunt. alioquin expedit non uideri quam
cunctorum irrisione signari. omnes ergo, qui gremiorum celsa petimus, uitiorum
humilia deseramus. sit in nobis frons libera, ut aliorum possimus emendare
peccata. aequat crimen omne quos inquinat et ideo dissimilis ab accusato debet
esse qui iudicat. haec nos annuo sermone conuenit loqui, quia bonarum rerum
nulla satietas est. fateor auiditatem desiderii mei: cupio me uobiscum uelle
praedicari. <5> Veniamus nunc ad consueta: quae ideo debent suscipi grata, quia
probantur esse sollemnia. quapropter, quod feliciter dictum sit, te officiumque
tuum cum dei iuuamine possessorem praecipimus ammonere, ut tributa indictionis
tertiae decimae deuota mente persoluat, quatenus trinae illationis moderamine
custodito debitam rei publicae inferat functionem. tempora exactionum statuta
seruentur, ita tamen, ut nullus sub immaturae compulsionis iniuria se ingemiscat
exactum nec iterum sub turpi uenalitate indutiarum largitas damnosa praebeatur.
dilatio enim tributi maioris fit causa dispendii, quando irrite suspenditur quod
nullis protractionibus euitatur. <6> Expensarum quoque fidelem notitiam
quaternis mensibus comprehensam consuetudine custodita ad scrinia nostra
dirigere maturabis, ut totius erroris detersa caligine publici ratiocinii possit
claritas apparere. nam si aliter facias, te damna respiciunt, quae per neglectum
tuum publicis utilitatibus ingeruntur. et ut facilius possis deo auxiliante quae
sunt statuta perficere, illum atque illum sedis nostrae milites tibi officioque
tuo consuetudinarie praecipimus imminere, quatinus ordinatio nostra
inculpabiliter sortiatur effectum. caue ergo, ne te imparem praestes nostris
ammonitis, quia nimis foedum est ut a quo laudanda reposcimus, resecanda potius
approbemus.
III. UNIVERSIS SAIONIBUS QUI SUNT CANCELLARIIS DEPUTATI SENATOR PPO.
<1> Oportet quidem cuncta sub tranquillitate peragi, quemadmodum pote sit bonis
moribus conuenire. sed tanta est in re publica de morum uarietate diuersitas, ut
nemo ualeat leges defendere, nisi terror uideatur aliqua temperare. aegris non
una causa salutis est: alter cibis reficitur, alter per abstinentiae beneficia
tenuatur: hic lauacra mollia, ille ferrum quaerit ad uulnera: et uarium poscit
remedium diuersa qualitas passionum. sic qui populis praeesse cognoscitur, non
uno consilio praeditus inuenitur. feroces districtione premendi sunt, mansueti
ciuiliter ammonendi: dolosi caute, simplices sub lenitate tractandi sunt. et
ideo ubique probatur necessaria esse prudentia, quoniam rebus omnibus adhibere
uidetur accommoda. <2> Quapropter deuotionem tuam solaciis illius uiri
clarissimi cancellarii nostri sollemni more deputamus, ut contra nullum alium
erigaris, nisi qui legibus parere despexerit. ad forum trahe qui iusta non
recipit: sub continentia irascere, sub maturitate distringe. timeri te amplius
uolumus quam probari, quia maxime illud uigori tuo reputabitur, si nullius
praesumptione peccetur. <3> Cogitetur prae omnibus pecuniae publicae fidelis
exactio. sit tuum commodum contemptus alienus. coactus faciat, quod sponte
complere neglexerit. causis tantum te delegatis impende. si praecepta sequeris,
deuia non requiris. caret culpa, qui imperata perfecerit. in executore illud est
pessimum, si iudicis relinquat arbitrium. non inde iacteris, quod tibi non
potest obuiari, nec assumere superbiam uelis, quia te multorum humilitas
pertimescit. uiri fortes semper in pace modesti sunt et iustitiam nimis
diligunt, qui frequenter proelia tractauerunt. <4> Quam gratum est, si inter
parentes reuersus querellarum non reportes opprobrium, sed ita te cognoscant
egisse, quemadmodum diligentes probantur optare! nos etiam gratanter excipimus
cum laude uenientem et otio uacare non sinimus, quem probabiliter egisse
sentimus. his etiam et rerum dominus maiora credit, quos bona conscientia
utilitates suas gessisse probauerit. quanta sunt, quae possunt tollere
sapientes! nemo amplius adquirit quam qui se bona conuersatione tractauerit.
IIII. CANONICARIO VENETIARUM SENATOR PPO.
<1> Mensae regalis apparatus ditissimus non paruus rei publicae probatur
ornatus, quia tanta dominus possidere creditur, quantis nouitatibus epulatur.
priuati est habere quod locus continet: in principali conuiuio hoc profecto
decet exquiri, quod uisum debeat ammirari. destinet carpam Danuuius, a Rheno
ueniat anchorago, exormiston Sicula quibuslibet laboribus offeratur: Bruttiorum
mare dulces mittat acernias: sapori pisces de diuersis finibus afferantur. sic
decet regem pascere, ut a legatis gentium credatur paene omnia possidere. <2> Et
ideo procuranda sunt uina, quae singulariter fecunda nutrit Italia, ne qui
externa debemus appetere, uideamur propria non quaesisse. comitis itaque
patrimonii relatione declaratum est acinaticium, cui nomen ex acino est,
enthecis aulicis fuisse tenuatum. <3> Et quia cunctae dignitates inuicem sibi
debent necessaria ministrare, quae probantur ad rerum dominos pertinere, ad
possessores Veronenses, ubi eius rei cura praecipua est, uos iubemus accedere,
quatenus accepto pretio competenti nullus tardet uendere quod principali gratiae
deberet offerre. digna plane species, de qua se iactet Italia. nam licet
ingeniosa Graecia multifaria se diligentiae subtilitate commendet et uina sua
aut odoribus condiat aut marinis permixtionibus insaporet, sub tanta tamen
exquisitione reperitur simile nil habere. <4> Hoc est enim merum et colore
regium et sapore praecipuum, ut blattam aut ipsius putes fontibus tingi aut
liquores eius a purpura credantur expressi. dulcedo illic ineffabili suauitate
sentitur: stipsis nescio qua firmitate roboratur: tactus eius densitate
pinguescit, ut dicas esse aut carneum liquorem aut edibilem potionem. libet
referre quam singularis eius uideatur esse collectio. autumno lecta de uineis in
pergulis domesticis uua resupina suspenditur, seruatur in uasis suis, thecis
naturalibus custoditur. rugescit, non liquescit ex senio: tunc fatuos humores
exsudans magna suauitate dulcescit. <5> Trahitur ad mensem Decembrem, donec
fluxum eius hiemis tempus aperiat, miroque modo incipit esse nouum, quando
cellis omnibus reperitur antiquum. hiemale mustum, uuarum frigidus sanguis, in
rigore uindemia, cruentus liquor, purpura potabilis, uioleum nectar deferuet
primum in origine sua et cum potuerit adulescere, perpetuam incipit habere
nouitatem. non calcibus iniuriose tunditur nec aliqua sordium ammixtione
fuscatur, sed, quemadmodum decet, nobilitas tanta prouocatur. defluit, dum aqua
durescit: fecunda est, cum omnis agrorum fructus abscedit. distillat gemmis
comparem liquorem: iucundum nescio quid illacrimat et praeter quod eius delectat
dulcedo, in aspectu singularis eius est pulchritudo. <6> Hoc quantocius
perquisitum et competentibus pretiis adgregatum chartariis qui in rem directi
sunt tradite deferendum nec illud neglegendum putetis, quod lacteo poculo
relucescit, quando plus est mirabile quod potueritis difficilius inuenire.
albedo ibi decora est et serena puritas, ut illud de rosis, hoc credatur natum
esse de liliis. colore quidem extraneum, sed sapore germanum est: aspectus
dispar et similis in utroque suauitas. nam quod acute sapit, quod cito reficit,
commune illis intellegitur, sed magna est distantia quae uidetur. istud intueris
rubore laetum, illud conspicis candore festiuum. et ideo procuratio eorum debet
esse celerrima, quando ambobus inesse cognoscitur quod pariter expetatur.
V. VALERIANO V. S. SENATOR PPO.
<1> Generaliter quidem amplissimum cognitorem decet beneficia dilatare, quoniam
qui omnibus praeesse cognoscitur, cunctis impendere profutura censetur. sed
gratificante natura illis amplius debemus, qui nobis aliqua proximitate
iunguntur, dum quoddam genus recti uideatur esse propositi ab aequalitate
discedi. <2> Nam modestiam collegis impendimus, reuerentiam patribus exhibemus,
ciuibus debemus gratiam communem, sed affectum filiis singularem: et tanta
necessitudinum uis est, ut nullus se contemptum esse diiudicet, si sibi aliena
pignora praelata esse cognoscit. et ideo non est aliquid iniustum de patria plus
esse sollicitum eo praesertim tempore, cum eius uideamur periculis subuenire.
plus enim eos diligere credimur, quos eripere festinamus. <3> Veniens itaque
numerosus exercitus, qui ad defensionem rei publicae noscitur destinatus,
Lucaniae Bruttiorumque dicitur culta uastasse et abundantiam regionum studio
tenuasse rapinarum. sed quoniam et illis dare et istis sumere pro temporis
qualitate necesse est, pretia quae antiquus ordo constituit ex iussione rerum
domini cognoscite temperata, ut multo artius quam uendere solebatis in assem
publicum praebita debeant imputari, quatenus nec possessor dispendia nec
exercitus laborans sustinere possit inopiam. <4> Nolite igitur esse solliciti.
euasistis exigentium manus, tributa uobis praesens adimit apparatus. sed quo
facilius instrueretur uestra notitia, imputationum summas infra scriptis
breuibus credidimus exprimendas, ut nemo uobis uendat beneficium quod publica
noscitis largitate collatum. continete ergo possessorum intemperantes motus.
ament quieta, quos nullus ad incerta praecipitat. dum belligerat Gothorum
exercitus, sit in pace Romanus. felicium uotum est quod iubetur, ne rustici,
agreste hominum genus, dum laborandi taedia fugiunt, illicitis ausibus
efferentur et contra uos incipiant erigi, quos uix poteratis in pace moderari.
<5> Quapropter ex regia iussione singulos conductores massarum et possessores
ualidos ammonete, ut nullam contrahant in concertatione barbariem, ne non tantum
festinent bellis prodesse, quantum quieta confundere. arripiant ferrum, sed unde
agros excolant: sumant cuspides boum stimulos, non furoris. defensorum maxima
laus est, si, cum illi uideantur praedictas regiones protegere, isti non
desinant patrioticas possessiones excolere. <6> Sit iudicibus uigor ex legibus:
subsellia non desinant iura malis moribus intonare: timeat latro iudicium quod
semper expauit: adulter gremium iudicis intremiscat: falsarius uocem praeconis
exhorreat: fur fora non rideat, quia tunc libertas gaudet, si talia non
laetentur. sic enim prosperrime geri non sentiebitis bellum, si uobis sit
communiter de ciuilitate consilium. nullus opprimat indigentem: inuadite
peruasores, insequimini persequentes. est uobis competens pugna ciuilis. omnia
pacata uos redditis, si duces scelerum comprimatis. in annonis uero reputandis
esto sollicitus, ne aliquem cuiusquam possit fraudare uersutia. <7> Rectoribus
autem exercitus a rerum dominis sub mea praesentia cognoscite delegatum, ut, dum
a uobis necessario fuerint commoniti, grauatis per iniuriam debeat subueniri.
custodiant nihilominus disciplinam, unde robustius armatur semper exercitus.
additum est etiam beneficii genus, ut a praesenti deuotione praeceptis regiis
nec diuina domus uideatur excepta, sed totum communiter sustineatur, quod pro
generalitate censetur. <8> Nunc ergo cum fratribus uestris studiose consurgite
et sub omni cautela necessaria prouidete, ut prosit re uera nobilissimae patriae
talia uolumina praetulisse. quieta enim regere et ex usu administrare prouincias
homines uel mediocris intellegentiae possunt: sed hoc opus, hic labor est illud
magis regere, quod se relictum non potest continere. cessat enim nautarum in
tranquillitate peritia nec nomen praestat artifici, nisi fuerit uis magna
periculi. <9> Habetis ergo tempus, ubi et famam sapientum possitis adquirere et
in omni parte uos laudabiliter iuuante domino custodire. meos autem ultra
ceteros minime commendo, quia omnibus hoc cupimus accidere, quod nostris
desideramus laribus euenire. mihi enim propria cura dilapsa est, postquam
generalem coepi cogitare custodiam. opto meis bene, sed quod possit esse
commune, quia magnae iniustitiae genus est aliud sibi iudicem uelle quam potest
generalitas sustinere.
VI. UNIVERSIS PRAEFECTURAE TITULOS ADMINISTRANTIBUS SENATOR PPO.
<1> Quamuis abunde sufficiant quae rerum domini ingenita pietate praeceperunt,
interminationes tamen importunis et fatuis adhibita districtione geminamus, ut
qui nequeunt erubescere, saltem se contineant per timorem. quis enim de sua
praesumptione gratuletur, quando famam perditurus est qui interdicta
temptauerit? retundatur ambitio caeca cupientum: proterua refrenetur audacia:
qui lucrum de malo quaerit, poena proposita terreatur: qui honorem per nefanda
desiderat, amissa potius opinione turbetur. <2> Additur etiam quod nostris
temporibus sceleratae pecuniae non ualebunt nec culpam suam redimit, qui se reum
esse cognoscit. iniquis fraudibus non patebit occasio: persequimur, non uendimus
excedentes. ubi iam, male capientes, spem habebitis, quando uobis et rerum
domini et uestri iudices comminantur? uos tamen, quos ad publicas
amministrationes peruenire nostra fecit electio, de actionum honestate
confidite, quia uos nulla uenalitas excludit, si probitas continuerit actionis.
<3> Publicis utilitatibus seruite fixi, quando uos nulla priuata damna
concutient. reddite hanc uicissitudinem iudicio meo, ut qui uos nullo proprio
suffragio grauari feci, studeatis in uobis mea facta laudari. praefixum itaque
tempus a rerum dominis noueritis esse seruandum, ita tamen, ut ea, quae uobis
pro publica utilitate decreta sunt, prouidere ac soluere debeatis.
VII. CANONICARIO VENETIARUM SENATOR PPO.
<1> Sub clementia boni principis nihil constat licere fortuitis, quando
sinistros casus corrigunt, qui praestare prosperrime censuerunt. nam quemadmodum
ferret nudus saeuam barbariem et districtum principem, quando spoliatus iure
negat quod affluens inferre didicerat? atque ideo illi uel illi Sueborum
incursione uastatis fiscum quintae decimae indictionis serenitas regalis
indulsit, sicut te poterit instruere relecta praeceptio. <2> Unde oboedientiam
commendantes a supradictis possessoribus de praediis, quae tamen cognoueris esse
uastata, praesentis indictionis tributa non exigas: reliqua uero sollemni
compulsione procura, ut constitutis temporibus arcario nostro residuam compleas
quantitatem. caue ergo, ne grauior fias hostibus, si adhuc nudare uelis exutos:
chlamydes non pauescant, qui arma timuerunt: rapinas non sentiant post
praedones. ualidas contra te apochas inuenerunt: inuictas securitates illis
dedit calamitas sua: uiolentus abstulit quod quaerebas. cui nihil uidetur
relictum, a tributis constat esse liberatum.
VIII. CONSULARI PROVINCIAE LIGURIAE SENATOR PPO.
<1> Nouum genus uidetur esse compendii postulantes adquirere et praestantes
nulla damna sentire. nam sic accipitur ab uno, ut perire non possit ab altero:
donatur sine dispendio: ceditur sine imminutione et nomen habet munificentiae
quod iura domini nescit exire. <2> Quapropter ille casarum suarum fiscum in illa
prouincia constitutarum, quas breuis subter conscriptus eloquitur, exactorum
suggerit enormitate uexari, desiderans sine aliqua imminutione publicae
utilitatis inferre se debere nostris arcariis debitam functionem. quod nos, qui
nullorum damnis studere cognoscimur, dummodo fisco competentia rationabili
satisfactione soluantur, libenter annuimus, quia hoc est bona desideria
suspendere quod illicita perpetrare. <3> Qua de re spectabilitas tua commonitis
curialibus uel compulsoribus nec non et his, quorum interesse cognoscit, ab illa
indictione praedictis casis exactionem facies sub hac condicione remoueri, ut,
si intra illas kalendas summa quae competit non fuerit arcario persoluta, intra
prouinciam sollemnis exactio peragatur, minus ne, si fidem suae promissionis
arcariorum apochis probauerit esse completam, ab omni inquietudine compulsorum
designata praedia liberentur, quia illa magis debent eligi, quae sine suspicione
damni libenti animo probantur offerri. grata enim nobis est sine instantia
compulsoris exactio et hoc deuotum facere, quod uix poterat coactus implere.
atque utinam possessor ultroneus et nobis necessitatem morarum tolleret et sibi
damna competentibus illationibus abrogaret! ipse enim imminentem necessarium
facit, qui sollemnia praebere distulerit.
VIIII. PASCHASIO PRAEFECTO ANNONAE SENATOR PPO.
<1> Pietate plenum est peregrinam gentem publicis beneficiis obligare et non
tantum consanguineos ad substantiae lucra permittere quantum ipsos quoque
aduenas inuitare: hereditas quae est sine proximis, absque parentela successio
solaque fides generis est patrios sonare sermones. Afer enim sic expetit
beneficia, ut sibi olim doceat fuisse concessa: donum sine accipientis nomine,
praeter personam largitas, quia primum collatum est genti, ut postea petentium
uocabulum potuisset affigi. <2> Hinc est quod iure quodam postulant hereditates
alienas et illis tantum uidetur competere, quod Romanus non potest in causis
similibus optinere. beneficium tale non habuerunt in patria sua, sed hic omnes
sub hac condicione parentes sunt: uniuersa natio, quantum ad successionis
beneficium, una familia est. <3> Quocirca experientia tua preces illius
diligenti examinatione discutiat et si re uera ille, quem suggerit de hac luce
transisse, filios non reliquit nec ab alio constat rationabiliter possideri,
introductionem memoratae rei officium uestrum celebrato ex more, quatinus
antiqua pietas regnantum praesentium reparet beneficia dominorum et possit pro
illis supplicare, sub quibus se magis intellegit uotiua meruisse. resumat
facultatem, quam se suspirauerat amisisse. peregrinum se ultra dicere non
potuit, qui optata rura conquirit. habeat possessorum similem dignitatem et iam
tributa reparatus inferat, qui opem ab alienis manibus expetebat. <4> Gaudeat se
ad hoc perductum, ut daret quod utique nisi habenti non probatur emergere,
ceteris dominis in hac tantum sorte deterior, quoniam alienare nequit quod
possidere praeualuit. sed et hoc quoque magna credimus aequitate repertum, ut
qui loco succedit pignoris, substantiam suam affectu patris iure seruet
extraneis. miseratione pastus nunc pascat et alios: felix illi contigit et
praedicanda captiuitas Romana ciuitate perfrui et Afrorum priuilegiis potuisse
misceri.
X. DIVERSIS CANCELLARIIS PROVINCIARUM SENATOR PPO.
<1> Rationum publicarum reliquiae infaustae sunt aegritudini comparandae, quae
grauant, debilitant, nisi sub celeritate discedant. reatus quidam est esse sub
debito nec liber potest ueraciter dici, qui probatur obnoxius reperiri. prudens
se ipse compellit: minus cautus est, qui urgetur ab altero. nam quid egit totius
anni suscepta compulsio? summa futurae indictionis et quantitas exigatur. <2>
Parcendo non parcitis: exonerando praegrauatis et dum uenales moras quaeritis,
tributi onera duplicatis. relinquite tandem crudelem misericordiam, beneficia
tota detestatione fellita. grauius percutit qui blandiendo grassatur et sub
indulgentia laedit, qui consuetis temporibus exigere tributa distulerit. et ideo
desinite aliquando possessorum damna mercari, quia totum constricti per
incommoda redditis quod iniquis dilationibus abstulistis. post ista enim non uos
credatis uerbis iterum commoneri, sed inremissibili exactione compelli. <3>
Quapropter si ad illum diem arcario nostro, quae de prouinciis sollemniter
postulantur, dispunctis rationibus non aut per te intuleris aut destinaueris
quantitatem, degeniatus in prouincia uelociter reddis quae te male distulisse
cognoscis, quia nimis iniquum est, ut assis publicus sub tua neglegentia iaceat
et arcarius mutuatam pecuniam publicis utilitatibus incessanter expendat.
XI. PETRO V. C. EROGATORI OPSONIORUM SENATOR PPO.
<1> Probatae debet esse conscientiae, qui principalia beneficia praeponitur
erogare, ne aliqua cupiditatis sorde desiccetur quod a tanta liberalitate
profunditur. mutant enim quaslibet largitates rapientium manus et sicut fontis
puritas per limosa corrumpitur, sic affluentia boni regis auaris distributoribus
immutatur. aurum ipsum cum soluitur in liquorem, nisi mundissimo caliculo
suscipiatur, inficitur, quando puritatem sui illa sola custodiunt, quae nulla
sordium ammixtione fuscantur. quam gratum per niueos calculos riuulos uidere
currentes et ipsam quodammodo naturae liberam ridere puritatem, quando nullis
maculis iniuriata turpatur! sic dona rerum domini nulla debent pollutione
fuscari, sed sicut ab ipso exeunt copiosa, ita debent ad Romanos peruenire
purissima. <2> Nam licet omnis fraus grauis esse uideatur, illa tamen
importabilis redditur, quae in Romulea plebe grassatur: turba quae uiuit quieta:
populus qui nescitur, nisi cum laetus est: clamor sine seditione: strepitus
furoris nescius, quibus sola contentio est paupertatem fugere et diuitias non
amare. nesciunt enim esse lucripetes nec aliqua se negotiationis calliditate
discruciant: uiuunt fortuna mediocrium et conscientia diuitum. nonne piaculum
est talibus rapere, qui nesciunt aliena fraudare? <3> Quapropter opsonia Romano
populo distribuenda ab illa indictione propitia tibi diuinitate concedimus, ut
sine aliqua imminutione percipere possit quod regia largitate promeruit. caue ne
quod illi meruerunt, alter accipiat et tu a gratia nostra peregrinus reddaris,
si a ciuico amore discesseris. non fiat Latialis pretio, qui ciuitatis illius
non habet iura nascendo. honorandum semper est quod nomen gentibus dedit, quando
potior in humanis rebus redditur, de cuius aliquid claritate praestatur. munera
ista Quiritium sunt. non subripiat locum liberi fortuna seruilis. in maiestatem
populi Romani peccat, qui sanguinis illius puritatem famulorum societate
commaculat.
XII. ANASTASIO CANCELLARIO LUCANIAE ET BRUTTIORUM SENATOR PPO.
<1> Cum apud dominum rerum sollemni munere pranderemus et diuersae prouinciae de
suis deliciis laudarentur, ad uina Bruttiorum et Silani casei suauitatem
currente, ut assolet, sermone peruentum est: quod herbarum beneficio tanta ibi
naturae iucunditate conficitur, ut non credas deesse mellis gustum, quem nulla
conspicis qualitate permixtum. manat illic leuiter prouocatum lac uberibus
fistulosis et quasi in alios uentres naturae ubertate collectum non guttis
impluit, sed quibusdam repentinis torrentibus influescit. redolet suauis et
uarius odor herbarum: naribus agnoscitur pecudum pastus, qui fragrans uirtute
diuersa thuris sentitur inspirare similia. <2> Huic tanta pinguedo sociatur, ut
arbitreris simul decurrere Palladium liquorem, nisi quod ab illa prasina
uiriditate niueo candore discernitur. tunc cadis late patentibus copia illa
mirabilis laeto nimium pastore suscepta cum ammixtione coaguli in callosam
coeperit teneritudinem condurari, ad pulcherrimum orbem forma perducitur, quae
subterraneis horreis aliquantulum congregata diuturnam casei facit esse
substantiam. hoc quantocius superimpositum nauigiis destinabis, ut desideriis
regalibus paruo munere satisfecisse uideamur. <3> Vinum quoque, quod laudare
cupiens Palmatianum nominauit antiquitas, nos stipsim, asperum, sed gratum
suauitate perquire. nam licet inter uina Bruttia uideatur extremum, factum tamen
est paene generali opinione praecipuum. ibi enim reperitur et Gazeto par et
Sabino simile et magnis odoribus singulare. <4> Sed quia illud famam sibi
nobilissimam uindicauit, hoc et in suo genere nimis elegans perquiratur, ne
prudentia maiorum aliquid appellasse uideatur inproprium. est enim suaui
pinguedine molliter crassum, uiuacitate firmissimum, nare uiolentum, candore
quoque perspicuum, quod ita redolet ore ructatum, ut merito illi a palma nomen
uideatur impositum. <5> Viscera defecta constringit, uulnera madida desiccat,
lassum reficit pectus et quod uix praeualet implere potus arte compositus, hic
naturaliter praestat infectus. sed prouide ut supra dictas species exactas
debeas destinare, quia falli non possumus, qui hoc patriotica ueritate
retinemus: ad praesens enim de cellariis nostris quae desiderabantur optulimus.
tu autem tuo periculo dissimilia facis, quorum iam indicia teneri posse
cognoscis.
XIII. EDICTUM.
<1> Nisu contineri debet omnium largitas impensa dominorum, quando necesse est
uniuersis proficere, quod illos impulsu diuinitatis probatum fuerit effecisse.
pietas siquidem principum totum custodit imperium et dum illis uicissitudo digna
redditur, incolumia rei publicae membra seruantur. dudum siquidem imperialia
constituta per Bruttios atque Lucaniam sacrosanctas ecclesias aliqua munerum
deuotione iuuerunt. sed ut est sacrilegis mentibus familiare et in ipsa quoque
diuina reuerentia peccare, nonnullam exinde partem numerariorum nomine
canonicarii subtrahebant, facientes laicum commodum substantiam clericorum. <2>
Quod sedis nostrae numerarii execratione detestabili respuentes numquam sibi
illatum fuisse suggerunt, quod de tali scelere manus impiae fraudauerunt. quid
adhuc, minime humana audacia, temptabis, si et ibi furta porrigis, ubi te minime
latere posse cognoscis? ut inludas oculis fortasse mortalibus, quamuis iniqua,
tamen aliqua uidetur esse praesumptio: quanta uero caecitate damnatus est, qui
se aestimat perpetrare quod diuinitas non possit aduertere! <3> Sed ne ulterius
similis grassetur forte praesumptio aut diuinam patientiam frequens prouocare
possit excessus, edictali programmate definimus, ut qui in hac fuerit ulterius
fraude uersatus, et militia careat et compendium propriae facultatis amittat.
grauiore siquidem poena plectendus est, qui usque ad iniuriam diuinam suam
nihilominus tetendit audaciam. habeant pauperes dona regnantum: possideant
aliquid quibus nulla facultas est. <4> Cur aliena substantia in regali posita
largitate peruaditur? possessio eius principis munus est. quemadmodum praesumat
subiectus contingere quod deo respicit humilitatem dominantis offerre? additur
quod talibus non dare tulisse est, et merito: quando qui potest esurientibus
subuenire, si non pascit, extinguit. pudeat illis tollere, quibus iubemur
offerre. ultra omnes crudelitates est diuitem uelle fieri de exiguitate mendici.
amentur honesta lucra, horreantur damnosa compendia: nullus audeat inde tollere
quod possit collecta dispergere. addendo perdit, qui retinendo collegerit et
paupertatem potius ad se trahit, si egentium pecunias non repellit.
XIIII. ANASTASIO CANCELLARIO LUCANIAE ET BRUTTIORUM SENATOR PPO.
<1> Regenses ciues ultimi Bruttiorum, quos a Siciliae corpore uiolenti quondam
maris impetus segregauit, unde ciuitas eorum nomen accepit diuisio enim 'region'
Graeca lingua uocitatur, iniqua suggerunt exactorum se praesumptione fatigari,
implorantes non aurium, sed oculorum nostrorum nota remedia, qui possumus scire
territorium eorum quod petitur non habere. est enim montanis lapillis terra
rarissima, arida pascuis, sed undosa uindemiis: segetibus aduersa, sed oliuis
accommoda: et ideo cultura eius omnis in sarculis est, quia superficies ipsius
sicca nutrire non ualet superne nascentia. tergore illic ager nudus industria
potius quam natura uestitur. <2> Nam Palladiae siluae uiriditate contegitur qui
in solo aridissimus approbatur. talibus enim locis illa proficiunt, quae
radicibus proceris ad humi penetrale descendunt. segetes rigantur, ut uiuant et
condicione mutata hoc aristis impenditur, quod oleribus exhibetur. quanta seges
est, quae manu colitur? raro illic ab area uenit umeris grauatus agricola, ut
non messes in horreis colligere, sed uix possit aliquos cophinos de summa
ubertate complere. <3> In hortis autem rusticorum agmen habetur operosum, quia
holus illic omne saporum est dum marina inroratione respersum: quod humana
industria fieri consueuit, hoc cum nutriretur accepit. contra Maronis autem
sententiam intiborum illic fibrae dulcissimae sunt, quae praecinctae foliis
tortuosis callosa teneritudine conglobantur: unde in morem uitri aliquid
decerptum frangitur, dum a fecundo cespite segregatur. <4> His uictualibus, si
uis nosse, regio illa fecunda est: nam et marinis deliciis copiosa iucunditate
perfruitur, quia ibi mare supernum atque infernum, insertis frontibus adunatum,
delicias utriusque pelagi in unam congregationem sinus sui uolubilitate
perducit. necesse est enim illic et pisces properare, ubi constat et undam posse
defluere. <5> Exormiston quoque, inter pisces regium genus, compar murenis
corpore, sed colore distans, naribus setosis, colostrea delicatitudine
praeditum, oleoso ac suaui liquore coagulatum, appetibilis grataque pinguedo,
cum spumis fluctuantibus inter aeris confinia coeperit enatare, nescit ad
cubilia redire quae deserit: credo aut immemor reuersionis aut teneritudine
summa mollitus nequit undis eleuantibus contraria obluctatione demergere. fertur
uelut corpus exanime, nullis nisibus periculum, nulla arte deuitans et hinc
uiribus destitutus redire non creditur, quia nec fugere posse sentitur. hic
plane tantae dulcedinis esse dinoscitur, ut ei nemo piscium comparetur. <6> Haec
sunt in litore Regino quae diximus, quod non alio referente cognouimus, etsi
uisuali probatione retinemus. quapropter laridi atque tritici species nullis
temporibus coemptionis nomine inde decernimus postulari, quia nimis calumniose
petitur, quod loci beneficio non habetur. deinde sufficere debet defensio
ueritatis et testimonium iudicis, quia nimis execrabile malum est, si, cum aliud
nouerit conscientia, aliud lingua decernat. additur etiam quod tantis
commeantium fatigatur aduentibus, tanta excurrentium laceratione deteritur, ut
rationabiliter illi remitti debuisset uel quod apud ipsam nasci posse constaret.
XV. MAXIMO V. C. CANCELLARIO LUCANIAE ET BRUTTIORUM SENATOR PPO.
<1> Scyllaceum prima urbium Bruttiorum, quam Troiae destructor Ulixes legitur
condidisse, inrationabiliter dicitur praesumentium nimietate uexari, quod nobis
praesidentibus non oportuisset assumi: quia laesiones eius cogimur plus dolere,
dum patriotica nos probatur affectione contingere. ciuitas supra sinum
Hadriaticum constituta in modum botryonis pendet in collibus, non quod difficili
ascensione turgescat, sed ut uoluptuose campos uirentes et caerula maris terga
respiciat. <2> Haec nascentem solem ab ipsis cunabulis intuetur, ubi uentura
dies non praemittit auroram, sed mox ut oriri coeperit, lampadem suam uibrans
fulgor ostendit. gaudentem respicit Phoebum: propria illic luminis claritate
resplendet, ut ipsa magis solis putetur esse patria Rhodi opinione superata.
fruitur luce perspicua: aeris quoque temperatione donata apricas hiemes,
refrigeratas sentit aestates et sine aliquo maerore transigitur, ubi infesta
tempora non timentur. hinc et homo sensu liberior est, quia temperies cuncta
moderatur. <3> Patria siquidem feruens leues efficit et acutos, frigida tardos
et subdolos: sola temperata est, quae mores hominum sua qualitate componit. hinc
est quod antiqui Athenas sedem sapientium esse dixerunt, quae aeris puritate
peruncta lucidissimos sensus ad contemplatiuam partem felici largitate
praeparauit. numquid enim tale est corpori aquas caenosas sorbere, quale
perspicuitatem dulcissimi fontis haurire? sic animae uigor oneratur, dum spiritu
grauiore comprimitur. subiacemus enim necessario talibus rebus, quando nubilo
tristes efficimur et iterum naturaliter ad serena gaudemus, quia caelestis
animae substantia ad infecta *** et purissima quaeque laetatur. <4> Fruitur
marinis quoque copiosa deliciis, dum possidet uicina quae nos fecimus claustra
Neptunia: ad pedem siquidem Moscii montis saxorum uisceribus excauatis fluenta
Nerei gurgitis decenter immisimus, ubi agmen piscium sub libera captiuitate
ludentium et delectatione reficit animos et ammiratione mulcet optutus. currunt
auidi ad manus hominum et antequam cibi fiant, escas expetunt. pascit homo
delicias suas et dum habet in potestate quod capiat, frequenter euenit, ut
repletus omnia derelinquat. <5> Spectaculum quoque pulchre laborantium non
adimitur in ciuitate sedentibus. cernuntur affatim copiosae uindemiae, arearum
pinguis tritura conspicitur, oliuarum quoque uirentium uultus aperitur. non eget
aliquis agrorum amoenitate, cui datum est de urbe cuncta conspicere. hoc quia
modo non habet muros, ciuitatem credis ruralem, uillam iudicare possis urbanam
et inter utrumque posita, copiosa noscitur laude ditata. <6> Hanc dum frequenter
inuisere desiderant commeantes, dum taedia laboris refugere cupiunt, amoenitate
ciuitatis in paraueredorum et annonarum praebitione proprii ciues fatigantur
expensis. quapropter ne laedat urbem amoenitas sua aut res praeconii fiat causa
dispendii, paraueredorum et annonarum praebitionem secundum euectiones concessas
in assem publicum constituimus imputari. <7> Pulueratica quoque iudicis funditus
amputantes trium tantum etiam dierum praesulibus annonas praeberi secundum
uetera constituta decernimus, suis expensis facta tarditate uecturis. leges enim
administrantes remedio, non oneri esse uoluerunt. qua de re aequitatis intuitu
ciuitas nostra *** releuare iudiciarium est, quod tibi referimus, non remissum.
uiue iuuante deo iustitia saeculi et securitatis gaudio singulari. alii dicant
insulas, ego habitationes tuas appellem potius Fortunatas.
XVI. CANONICARIA.
<1> Tempus ammonet humanis rebus indesinenter accommodum, dum res nobis etiam
asperas captata semper opportunitate conciliat, ut illationum fiscalium curam
annua festiuitate reparemus, quando rei publicae ordo tali consistere cernitur
instituto. et merito uotiuum, quod pro cunctorum utilitate praestatur. diligenda
sunt ista, unde res publica uidetur esse firmissima, quae dum redeunte censu
reficitur, status sui firmissimo robore continetur. <2> Quapropter magna est
quolibet tempore monstrata deuotio, sed tunc acceptior redditur, quando
necessaria plus habetur. praebeant igitur possessores stipendia suae gratiae
profutura. debitum siquidem quod non potest euitari, prona debet mente semper
offerri, ut fiat beneficium, quod sine compulsione constat illatum. <3> Atque
ideo, quod feliciter dictum sit, per indictionem primam in dioecesi tua
possessorem te praecipimus ammonere, ut trina illatione seruata assem
tributarium deuotus exsoluat, quatinus nec aliquis se sub immatura compulsione
ingemiscat exactum nec iterum remissione protelata quisquam se dicat esse
praeteritum. nullus quantitatem iustae ponderationis excedat sitque libra
iustissima: modus non erit rapiendi, si pondera fas sit excedi. <4> Expensarum
quoque fidelem notitiam per quaternos menses ad scrinia nostra sollemniter
destinabis, ut totius erroris obscuritate detersa rationibus publicis ueritas
elucescat. sed quo facilius possis iuuante deo quae sunt statuta complere, illum
atque illum sedis nostrae milites tibi officioque tuo periculorum suorum memores
praecipimus imminere, quatinus quod agnoscis iussum, inculpabiliter sortiatur
effectum. caue ergo ne te aut improbae redemptionis aut torpentis desidiae culpa
respiciat et quod expedire neglexeris, tuis inferat damna fortunis.
XVII. IOHANNI LIQUATARIO RAVENNATI ATHALARICUS REX.
<1> Munitio ciuitatum spes est certa cunctorum, quando in pace ab exteris
gentibus discitur, quod ueraciter in certamine timeatur. plena est enim diuersis
generibus hominum habitatio urbium singularum. quis nouit cum qua gente
confligat? ideoque omnes debent agnoscere quod futuris hostibus gratum non sit
audire. quapropter ex nostra iussione possessores ammonere curabis, ut iuxta
montem Caprarium et loca circumiecta muris fouearum ingentia ora pandantur
talisque ibi pateat hiatus, ut nullus ibi relinquatur introitus. cur, nefandi
homines, perscrutamini accessus inlicitos, quibus portarum permittitur licenter
ingressus? nescio quid uidemini tegere, qui palam non desideratis intrare. <2>
Conscientia recta uias publicas tenet, obuiorum collocutione gratulatur et cum
diuersos gratanter inquirit, laboris taedio non grauatur. amicum est autem
crimini uelle nesciri et qui uias suas occulit, conscientiam prodit. proinde in
usus generales itinera prisca reuocentur, ne, dum compendium laboris quaerunt,
uitae dispendia patiantur. ille enim iure habendus est hostis, qui munimina
nititur uiolare ciuitatis.
XVIII. CONSTANTINIANO VIRO EXPERIENTISSIMO SENATOR PPO.
<1> Regius apparatus sicut neglegentibus affert periculum, sic strenue
laborantibus praestat ornatum, quia praemium est uitae domino uidente seruire,
cui nec culpa celari nec bonum possit abscondi. quam gratum est sine offensione
aliqua iter agere destinatum, uidere indicia diligentiae, dubia sine timore
transire, gressu facili montuosa conscendere, in pontibus cum trabium mobilitate
non tremere uiamque sic conficere, ut omnia probentur animo conuenisse! militiam
uestram transcenditis, si rerum domino placere possitis. nam cui nos parere
contendimus, magnus prouectus est si mereamini ad eius placidos uenire
conspectus. <2> Quocirca iter Flaminiae riuis sulcantibus exaratum, hiantes
ripas latissima pontium interiectione coniungite, oppressas margines platearum
asperrimis siluis enudate. paraueredorum adscriptus numerus procuretur cum
electa qualitate membrorum: annonarum designatarum copia sine aliquo possessorum
dispendio congregetur, quia sic omnia grata redditis, si in nulla parte
peccetis. res una subtracta cuncta deformat et totum deesse creditur, ubi uel
minima querela asperitas commouetur. <3> Species praeterea, quae mensis regiis
apparantur, exactas tota sedulitate perquirite. nam quid proderit exercitui
satisfacere, si uos contigerit in ipsa dominorum pastione peccare? pareant
prouinciales ammoniti: ciuitates singulae declarata breuibus subministrent. nam
quotiens laeto principi occurritur, efficaciter beneficia postulantur. cogitate
etiam, quod praesens facta uestra diiudico: aut gratias uobis domini gaudens
reddo aut commotionem principis iratus attribuo. agite ergo, ne mihi imputetur
uester excessus, quia cunctis de uobis satisfacio, quos culpis uestris
offendero. persoluat mihi potius gratiam uniuersus exercitus. magna uobis erit
gloria et me securum reddere et tantorum bona iudicia meruisse.
XVIIII. MAXIMO VICARIO URBIS ROMAE SENATOR PPO.
<1> Aduentum quidem regium ex ipsa potestis cognoscere frequentia commeantum,
quia necesse est ut res magna competentia praemittat semper indicia. uenturum
diem Lucifer demonstrat exortus: serena secutura fauens uentus ostendit:
imminentia bona quadam animi praesagatione dinoscimus et difficile magna res
geritur, quae signorum praecursione minime declaretur. <2> Verumtamen et nos
necessario commonemus, ut pontis iunctione Tiberinos fluctus sollemniter
uestiatis, quatenus transitum praebeat intremulum fixum concatenatione nauigium
et de suo situ celerem nobis praestet excursum. non moueatur pigris funibus, ut
solebat: non manibus trahentium moles tanta torpescat: celeritatem potius fixa
conferat, quam se mouens antea non praebebat. ambulent commeantium greges
profecto, non nauigent: incisa nos unda deportet. sic decet dominum suscipi, ut
aliqua debeat nouitate gratulari. <3> Tabularum fortiter iunctura constricta
soliditatem debet praebere necessariam, ut pauorem undas dubitantium terrena
similitudine possit auferre. optetur quin immo longior fuisse, cum transitur
innocue. cancellorum tutamen dextra laeuaque decenter aptetur: prosper datur
transitus, cum fuerit casus asper exclusus. uide quemadmodum reliqua ad te
pertinentia praepares, qui te occursurum esse cognoscis. quale est enim in tanta
frequentia non potuisse culpari! uniuersos affligit, qui regi aliquid
necessarium subtrahit, quia, dum laetus optatur ab omnibus, cunctos contristat,
si probetur offensus. <4> Adde quod sic praeclarum est sub tanta senatorum
occursione laudari, principem sic suscipere, ut omnes intellegant nil deesse,
ante ipsum quoque dominum uenire laetum quam aliqua trepidatione confusum.
insperatum bonum est, si is ad quem deceptionis pertinet periculum sibi gratiae
procuret augmentum. in quam rem illum sedis nostrae militem nos direxisse
cognosce, qui tibi officioque tuo debeat imminere, quatenus nobis omnia parata
renuntiet, quia committi non potest casui, quod nostro periculo constat
adscribi.
XX. THOMATI ET PETRO VV. CC. ARCARIIS SENATOR PPO.
<1> Retinetis mecum, fidelissimi uiri, sanctum Agapitum urbis Romae papam, cum
ad Orientis principem legationis gratia mitteretur iussione regia, datis
pignoribus a uobis tot libras auri facto pittacio sollemniter accepisse, ut cui
prouidus dominator iussit, ad subitum eius etiam urgeret egressum. primum quidem
benigne praestitit qui in necessitate mutuas pecunias dedit: sed quanto
gloriosius fecit etiam illud largiri, quod cum gratiarum actione potuisset
offerri! <2> Victa est sine damno necessitas: manus papae dabat quod eius
substantia non habebat et iter illud est indemne redditum, quod donis constat
expletum. quale, rogo, uidebatur antistitem petentibus profundere et ecclesiam
nulla detrimenta sentire? distributor fuit potius quam donator, quia necesse est
illi applicari, de cuius facultatibus uidebatur expendi. quid non agat apud pium
principem talis legatio, quam destinatam singulari constat exemplo? <3>
Quapropter nostra praeceptione commoniti et regia iussione securi sanctorum uasa
cum obligatione chirographi actoribus sancti Petri apostoli sine aliqua
dilatione refundite, ut lucrose reddita celeriter impetrare uideantur optata:
referantur manibus leuitarum ministeria toto orbe narranda: donetur quod
proprium fuit, quando iuste per largitatem recipit quod sacerdos legibus
obligauit. <4> Superatum est exemplum quod in historia nostra magna intentione
retulimus. nam cum rex Alaricus urbis Romae depraedatione satiatus apostoli
Petri uasa suis deferentibus excepisset, mox ut rei causam habita interrogatione
cognouit, sacris liminibus deportari diripientium manibus imperauit, ut
cupiditas, quae depraedationis ambitu admiserat scelus, deuotione largissima
deleret excessum. sed quid mirum, si reuerenda sanctorum diripere noluit, qui
tanta se urbis uastatione ditauit? <5> Rex autem noster religioso proposito
reddidit uasa, quae iure pignoris propria uidebantur effecta. et ideo talibus
factis frequens praestetur oratio, quando laeta concedi posse credimus, cum
retributionem bonis actibus postulamus.
XXI. DEUSDEDIT SCRIBAE RAVENNATI SENATOR PPO.
<1> Scribarum officium securitas solet esse cunctorum, quando ius omnium eius
sollicitudine custoditur. alios enim depopulantur incendia: alios nudat furtiua
subreptio: nonnullis neglegentia perit quod diligens auctor adquirit: sed de
fide publica robustissime reparatur quicquid a priuatis amittitur. <2>
Diligentior est in alienis quam potest esse cura de propriis: non admonitus
facit quod uix rogatus impleret et requisitus non potest negare quod is cuius
interest se fatetur amisisse. armarium ipsius fortuna cunctorum est et merito
refugium omnium dicitur, ubi uniuersorum securitas inuenitur. ad paterna transit
officia, si incorrupte sit ueritas custodita. nam sicut diligens genitor seruat
quod otiosus successor inueniat, sic arbiter partium nullum patitur propria
utilitate fraudari. <3> Et ideo tantae rei iugiter praecipimus esse custodem, ut
qui hactenus de integritate placuisti, nulla debeas uarietate fuscari. uide quid
tibi committitur antiqua fides et cotidiana diligentia. dirimis iurgantium
litem: apud cunctos praesules de tua cura litigatur et tu potius iudicas, qui
causarum uincla dissoluis. hoc honorabile decus, indisputabile testimonium: uox
antiqua chartarum cum de tuis adytis incorrupta processerit, cognitores
reuerenter excipiunt: litigantes quamuis improbi coacti tamen oboediunt. et cum
fas sit promulgatam sententiam suspendi, tibi non licet obuiari. <4> Quocirca
non habeas uenale propositum. tinea documentorum est oblatio maligna redimentis,
dum quaerunt consumere quod se cognouerint impedire. pascat te editio decora
ueritatis: facultas tua habeatur integritas. da petentibus quae olim facta sunt.
translator esto, non conditor antiquorum gestorum. exemplar uelut anulum ceris
imprime, ut sicut uultus expressa non possunt signa refugere, ita manus tua ab
authentico nequeat discrepare. <5> Quod si te aliquis iniqua subreptione
traduxerit, quemadmodum in alia causa tibi adquiescat credi quem scit potuisse
corrumpi? inpugnat te fraude sua et facile conuincit, quem in una parte
deceperit. ama iustitiam, de qua nemo queritur, ut etiam iratus testimonium
salubre possit dicere, qui te in cassum uoluit deuiare. publicum est omne quod
feceris, dum aut laudatus gratiam aut accusatus inuenire possis offensam.
XXII. PROVINCIALIBUS HISTRIAE SENATOR PPO.
<1> Expensae publicae diuersa temporum uarietate titubantes hac ratione se
poterunt continere, si prouentum locorum sequatur salubritas iussionum. illic
enim facilis est procuratio, ubi fuerit fructus uberior. nam si indicatur quod
sterilitas ieiuna denegauit, tunc et prouincia laeditur et effectus optabilis
non habetur. commeantium igitur attestatione didicimus Histriam prouinciam a
tribus egregiis fructibus sub laude nominatam, diuino munere grauidam uini, olei
uel tritici, praesenti anno fecunditate gratulari. et ideo memoratae species in
tot solidos datae pro tributaria functione uobis de praesenti prima indictione
reputentur: reliqua uero propter sollemnes expensas relinquimus deuotae
prouinciae. <2> Sed quoniam nobis in maiore summa sunt quaerenda quae diximus,
tot solidos etiam de arca nostra transmisimus, ut res necessariae sine uestro
dispendio uberrime debeant congregari. frequenter enim, dum extraneis urgemini
uendere, soletis damna sentire, eo praesertim tempore, cum uobis peregrinus
emptor ereptus est et rarum est aurum capere, quando mercatores cognoscitis non
adesse. quanto uero melius est parere dominis quam praestare longinquis et
debita fructibus soluere quam ementum fastidia sustinere! <3> Prodimus etiam
amore iustitiae quod nobis suggerere poteratis, quia in pretio laedere non
debemus, unde naulorum praebitionibus non grauamur. est enim proxima nobis regio
supra sinum maris Ionii constituta, oliuis referta, segetibus ornata, uite
copiosa, ubi quasi tribus uberibus egregia ubertate largatis omnis fructus
optabili fecunditate profluxit. quae non immerito dicitur Rauennae Campania,
urbis regiae cella penaria, uoluptuosa nimis et deliciosa digressio. fruitur in
septentrione progressa caeli admiranda temperie. <4> Habet et quasdam, non
absurde dixerim, Baias suas, ubi undosum mare terrenas concauitates ingrediens
in faciem decoram stagni aequalitate deponitur. haec loca et garismatia plura
nutriunt et piscium ubertate gloriantur. Auernus ibi non unus est. numerosae
conspiciuntur piscinae Neptuniae, quibus etiam cessante industria passim ostrea
nascuntur iniussa. sic nec studium in nutriendis nec dubietas in capiendis
probatur esse deliciis. <5> Praetoria longe lateque lucentia in margaritarum
speciem putes esse disposita, ut hinc appareat, qualia fuerint illius prouinciae
maiorum iudicia, quam tantis fabricis constat ornatam. additur etiam illi litori
ordo pulcherrimus insularum, qui amabili utilitate dispositus et a periculis
uindicat naues, et ditat magna ubertate cultores. reficit plane comitatenses
excubias, Italiae ornat imperium, primates deliciis, mediocres uictualium pascit
expensis et quod illic nascitur, paene totum in urbe regia possidetur. praestet
nunc copias suas sponte magis deuota prouincia: amplius pareat, dum speratur,
quando gratissime faciebat, dum minime quaereretur. <6> Sed ne aliqua
iussionibus nostris dubietas nasceretur, Laurentium uirum experientissimum et
magnis nobis in re publica laboribus comprobatum cum praesenti auctoritate
direximus, ut secundum breues subter annexos incunctanter expediat quod sibi pro
expensis publicis iniunctum esse cognoscit. nunc procurate quae iussa sunt. uos
enim facitis deuotum militem, cum libenter suscipitis iussionem. <7> Pretia uero
uobis moderata sequenti occasione declaramus, cum nobis praesentium gerulus
natiuitatis modum missa relatione suggesserit. taxari enim aliquid non potest
iuste, nisi copia rei euidenter potuerit indagari. inaequalis est quippe
arbiter, qui sententiam mittit in cassum, et male sibi probatur conscius, qui
est indeliberata dicturus.
XXIII. LAURENTIO VIRO EXPERIENTISSIMO SENATOR PPO.
<1> Deliberatio iudicis probatos uiros debet publicis actionibus adhibere, ut
facile possit impleri quod sub sterilitate temporis uidetur inquiri. in
abundantia rerum quaelibet se potest expedire persona: electis opus est
militibus, cum fuerit necessitatis impulsus. atque ideo experientiam tuam
frequentibus nobisque tali deuotione gratissimam ad Histriam prouinciam iubemus
excurrere, ut in tot solidos uini, olei uel tritici species de tributario solido
debeas procurare, in aliis uero tot solidis, quos a nostro arcario percepisti,
tam a negotiatoribus quam a possessoribus emere maturabis, sicut te a numerariis
instruxit porrecta notitia. <2> Quapropter erige nunc animos ad parendum, qui
tantis excubiis indiscreta sorte placuisti. ammoneat te prioris conuersationis
exemplum, quia nimis graue est emeritum delinquere, quem tironem nullatenus
constat errasse. qualis autem supra dictarum specierum ubertas se optata
laxauerit, ueraci nobis, ut de te credimus, relatione significa, ut nos habito
modo constituere debeamus quod nec prouinciales laedat nec publicas grauare
possit expensas.
XXIIII. TRIBUNIS MARITIMORUM SENATOR PPO.
<1> Data pridem iussione censuimus ut Histria uini, olei uel tritici species,
quarum praesenti anno copia indulta perfruitur, ad Rauennatem feliciter
dirigeret mansionem. sed uos, qui numerosa nauigia in eius confinio possidetis,
pari deuotionis gratia prouidete, ut quod illa parata est tradere, uos studeatis
sub celeritate portare. similis erit quippe utrisque gratia perfectionis, quando
unum ex his dissociatum impleri non permittit effectum. estote ergo promptissimi
ad uicina, qui saepe spatia transmittitis infinita. <2> Per hospitia quodammodo
uestra discurritis, qui per patriam nauigatis. accedit etiam commodis uestris,
quod uobis aliud iter aperitur perpetua securitate tranquillum. nam cum uentis
saeuientibus mare fuerit clausum, uia uobis panditur per amoenissima fluuiorum.
carinae uestrae flatus asperos non pauescunt: terram cum summa felicitate
contingunt et perire nesciunt, quae frequenter inpingunt. putantur eminus quasi
per prata ferri, cum eorum contingit alueum non uideri. tractae funibus
ambulant, quae stare rudentibus consuerunt, et condicione mutata pedibus iuuant
homines naues suas: uectrices sine labore trahunt, et pro pauore uelorum utuntur
passu prosperiore nautarum. <3> Iuuat referre quemadmodum habitationes uestras
sitas esse perspeximus. Venetiae praedicabiles quondam plenae nobilibus ab
austro Rauennam Padumque contingunt, ab oriente iucunditate Ionii litoris
perfruuntur: ubi alternus aestus egrediens modo claudit, modo aperit faciem
reciproca inundatione camporum. hic uobis aquatilium auium more domus est. nam
qui nunc terrestris, modo cernitur insularis, ut illic magis aestimes esse
Cycladas, ubi subito locorum facies respicis immutatas. <4> Earum quippe
similitudine per aequora longe patentia domicilia uidentur sparsa, quae natura
protulit, sed hominum cura fundauit. uiminibus enim flexibilibus illigatis
terrena illic soliditas aggregatur et marino fluctui tam fragilis munitio non
dubitatur opponi, scilicet quando uadosum litus moles eicere nescit undarum et
sine uiribus fertur quod altitudinis auxilio non iuuatur. <5> Habitatoribus
igitur una copia est, ut solis piscibus expleantur. paupertas ibi cum diuitibus
sub aequalitate conuiuit. unus cibus omnes reficit, habitatio similis uniuersa
concludit, nesciunt de penatibus inuidere et sub hac mensura degentes euadunt
uitium, cui mundum esse constat obnoxium. <6> In salinis autem exercendis tota
contentio est: pro aratris, pro falcibus cylindros uoluitis: inde uobis fructus
omnis enascitur, quando in ipsis et quae non facitis possidetis. moneta illic
quodammodo percutitur uictualis. arti uestrae omnis fluctus addictus est. potest
aurum aliquis minus quaerere, nemo est qui salem non desideret inuenire, merito,
quando isti debet omnis cibus quod potest esse gratissimus. <7> Proinde naues,
quas more animalium uestris parietibus illigatis, diligenti cura reficite, ut,
cum uos uir experientissimus Laurentius, qui ad procurandas species directus
est, commonere temptauerit, festinetis excurrere, quatenus expensas necessarias
nulla difficultate tardetis, qui pro qualitate aeris compendium uobis eligere
potestis itineris.
XXV. AMBROSIO V. I. AGENTI VICES SENATOR PPO.
<1> Plerumque solliciti fiunt, qui mutatos rerum ordines intuentur, quia saepe
portendunt aliqua, quae consuetudini probantur aduersa. nihil enim sine causa
geritur nec mundus fortuitis casibus implicatur, sed quicquid uenire uidemus ad
terminum, diuinum constat esse consilium. suspenduntur homines, cum sua reges
constituta mutauerint, si aliter induti procedant quam eorum usus inoleuerat.
quis autem de talibus non magna curiositate turbetur, si uersa uice
consuetudinum a sideribus aliquid uenire uideatur obscurum? nam sicut certa
securitas est suis uicibus tempora notare currentia, sic magna curiositate
complemur, cum mutari talia sentiuntur. <2> Quale est, rogo, stellarum primarium
conspicere et eius solita lumina non uidere? lunam noctis decus intueri orbe suo
plenam et naturali splendore uacuatam? cernimus adhuc cuncti quasi uenetum
solem: miramur media die umbras corpora non habere et uigorem illum fortissimi
caloris usque ad extremi teporis inertiam peruenisse, quod non eclipsis
momentaneo defectu, sed totius paene anni agi nihilominus constat excursu. <3>
Qualis ergo timor est diutius sustinere quod uel in summa solet populos
celeritate terrere? habuimus itaque sine procellis hiemem, sine temperie uernum,
sine ardoribus aestatem. unde iam speretur posse uenire temperiem, quando menses
qui fructus decoquere poterant boreis flatibus uehementer algebant? quid enim
fertilitatem producat, si terra aestiuis mensibus non calescat? quid germen
aperiat, si matrix pluuiam non resumat? duo haec elementis omnibus probamus
aduersa rigorem perpetuum et contrariam siccitatem. mutauerunt se tempora non
mutando et quod mixtis imbribus solebat effici, ex ariditate sola non potest
optineri. <4> Atque ideo de ueteribus frugibus prudentia tua futuram uincat
inopiam, quia tanta fuit anni praeteriti felix ubertas, ut et uenturis mensibus
prouisa sufficiant. reponatur omne quod ad uictum quaeritur. facile priuatus
necessaria reperit, cum se publicus apparatus expleuerit. <5> Sed ne te praesens
causa magna haesitatione discruciet, ad considerationem reuertere naturalium
rerum et fit ratione certum, quod stupenti uulgo uidetur ambiguum. sic enim
constat diuina ordinatione dispositum, sic astra praesentis anni in domiciliis
suis mutuis amministrationibus conuenerunt, ut supra solitum hiems sicca
redderetur et frigida. hinc aer niuibus nimio rigore densatus ardore solis in
nulla raritate perductus est, sed in assumpta crassitate perdurans et caloribus
eius obstitit et aspectum humanae fragilitatis elusit. media enim quae sunt,
nostris dominantur obtutibus et per ipsa tantum uidere possumus, quantum nobis
sui corporis tenuitate concedunt. <6> Hoc enim inane magnum, quod inter caelum
terramque elementi more liquidissimi peruagatur, dum contigerit esse purum et
solis claritate respersum, nostros ueraciter pandit aspectus: si uero aliqua
fuerit permixtione congregatum, tunc tenso quasi quodam corio nec colores
proprios nec calores peruenire facit astrorum. quod etiam aliis saeculis aere
nubilo pro tempore frequenter efficitur. hinc est quod diutius radii siderum
insolito colore fuscati sunt, quod nouum frigus messor expauit, quod accessu
temporis poma duruerunt, quod uuarum senectus acerba est. <7> Sed si hoc diuinae
prouidentiae tradatur, satagere non debemus, quando ipsius imperio prodigia
quaerere prohibemur. illud tamen sine dubio terrenis fructibus aduersarium esse
cognoscimus, ubi alimonia consueta nutriri lege propria non uidemus. proinde
agat sollicitudo uestra, ne nos unius anni sterilitas turbare uideatur, dum sic
ab illo primo amministratore dignitatis nostrae prouisum est, ut praecedens
copia sequentem ualuisset mitigare penuriam.
XXVI. PAULO VIRO STRENUO SENATOR PPO.
<1> Frequenter utilitas publica compendiosa pietate seruatur, quando illud magis
adquirit, quod bonorum intercessione remiserit. ueniens itaque uir uenerabilis
Augustinus uita clarus et nomine Venetum nobis necessitates flebili allegatione
declarauit, non uini, non tritici, non panici species apud ipsos fuisse
procreatas, asserens ad tantam penuriam prouincialium peruenisse fortunas, ut
uitae pericula sustinere non possint, nisi eis pietas regalis solita humanitate
prospexerit. quod nobis crudele uisum est aliquid a petentibus postulare et
illud sperare, quod prouincia cognoscitur indigere. a talibus enim solas
lacrimas exigit qui quod non inuenitur imponit. <2> Et ideo tanti uiri
allegatione permoti uinum et triticum, quod uos in apparatum exercitus ex
Concordiense, Aquileiense et Foroiuliense ciuitatibus colligere feceramus,
praesenti auctoritate remittimus, carnes tantum, sicut breuis uobis datus
continet, exinde prouidentes. hinc enim, cum necesse fuerit, sufficientem
tritici speciem destinamus. <3> Et quoniam in Histria uinum abunde natum esse
comperimus, exinde, quantum de supra dictis ciuitatibus speratum est, postulate,
sicut in foro rerum uenalium reperitur, quatenus nec ipsi laedi possint, cum eis
pretia iusta seruantur. quapropter praesentem indulgentiam nulla credatis
uenalitate taxandam, ut, dum fuerit remedium gratuitum, possit existere
nihilominus gloriosum. noueritis enim graui uos subici posse uindictae, si quod
interdictum est dari, a uobis uideatur acceptum.
XXVII. DATIO EPISCOPO MEDIOLANENSI SENATOR PPO.
<1> Minus prodest bonum iubere, nisi hoc per uiros sanctissimos uelimus
efficere. auget enim beneficium uoluntas recta iustorum et quicquid sine fraude
geritur, hoc uere donantis meritis applicatur. decet enim, ut munificentiam
principalem sacerdotalis puritas exequatur. nam cui est studium bonum de proprio
facere, laudabiliter potest aliena uota complere. <2> Et ideo sanctitatem
uestram petimus, cuius propositi est diuinis inseruire mandatis, ut de horreis
Ticinensibus et Dertonensibus panici speciem, sicut a principe iussum est,
tertiam portionem esurienti populo ad uiginti quinque modios per solidum
distrahi sub uestra ordinatione faciatis, ne cuiusquam uenalitate ad illos
perueniat, qui se de proprio uidentur posse transigere. accipiat minus habens
indulgentiam principalem. egentibus iussum est, non diuitibus, subueniri. fundit
potius, qui mittit in plenum, nam illud potius reconditur, quod uasis uacuis
congregatur. <3> Quapropter sanctitas uestra miserationis officia non putet
iniuriam: quia totum uobis dignum est, ubi pietas inuenitur, siquidem aliena
desideria fideliter gerere hoc est bona propria perfecisse. ad quam rem deo
iuuante procurandam illum atque illum curauimus destinare, qui sanctitatis
uestrae ordinationibus obsecuti nihil ex se faciant, sed tantummodo uobis
oboedire contendant. solidi uero, quanti ex supra dicta quantitate panici
potuerint congregari, uestra nobis relatione declarate, ut apud arcarium
reconditi ad supra memoratam speciem reparandam futuris reseruentur deo
auxiliante temporibus: more uestis rediuiuae, cuius adunatio per fila
resoluitur, ut in nouam faciem splendido potius decore texatur.
XXVIII. EDICTUM.
<1> Quis nesciat prouidentiam diuinam usibus nostris aliqua uelle subducere, ut
humanum possit animum comprobare? nam si nullum penitus indigere contingeret,
locum proinde largitas non haberet. data est prouinciis in regis nostri laudem
penuria: steriles facti sunt agri, ut ubertas domini possit agnosci. minus esset
acceptissimum donum, nisi praecessisset incommodum. gaudete, prouinciae,
malisque uestris potius gratiam referte, quando talem probatis animum principis,
ut nullis cedat aduersis. en pietas mirabilis, quae ubique nostris repugnat
incommodis. <2> Nam cum se feritas gentilis prioris temporis animasset, Aemilia
et Liguria uestra, sicut uos retinere necesse est, Burgundionum incursione
quateretur gereretque bellum de uicinitate furtiuum, subito praesentis imperii
tamquam solis ortus fama radiauit. expugnatum se hostis sua praesumptione
congemuit, quando illum cognouit nominatae gentis esse rectorem, quem sub
militis nomine probauerat singularem. quotiens se optauit de suis finibus non
exire Burgundio, ne principe nostro pugnaret aduerso, cuius licet praesentiam
releuatus euaserit, felicitatem tamen praecipitatus incurrit? <3> Nam mox ut
Gothi ad belli studium genuina se fortitudine contulerunt, ita prospera
concertatione caesa est rebellium manus, quasi inde nudos, hinc stare
contigisset armatos: diuini aequitate iudicii, ut in ipsis campis praedo
corrueret, quos uastare praesumpsit. exulta, aduersariorum cadaueribus ornata
prouincia: aceruum ride funerum, quem inimicorum exitio constat effectum. nunc
melius culta Liguria, cui negato fructu segetis messis prouenit hostilis: nam
etsi tributa tua minus potuerunt accipi, triumphos in te natos feliciter
optulisti. <4> His additur Alamannorum nuper fugata subreptio, quae in primis
conatibus suis sic probatur oppressa, ut simul aduentum suum iunxisset et exitum
quasi salutaris ferri execatione purgata, quatenus et male praesumentium
uindicaretur excessus et subiectorum non omnino grassaretur interitus. possem
quidem uobis dinumerare, quanta in aliis locis hostium turba ceciderit: sed more
humani animi ad uestra felicia festinantes illud nos tantum dicere cupitis, quod
ad uos specialiter pertinere sentitis. <5> Redeamus ergo ad suaue principium,
quando qui uos defendit a belli clade, nec inopiae patitur pericula sustinere:
nam qui perculit hostem prouinciae, et famem iussit exire. o certamen toto orbe
praedicandum! contra indigentiam saeuam gloriosi principis pugnat humanitas,
cuius uere castra sunt horrea referta, quae si claudere uoluisset, tunc
importabilis intrasset inimica, sed quia magis aperuit, saeuientem aduersariam
mox fugauit. <6> Nescio quae principis nostri bella mundus potius ammiretur: ego
tamen dicam quod sentio. in usum est uiris fortibus feliciter egisse pugnas, sed
supra humanam uirtutem esse constat uicisse penuriam. uerum cum his tantis ac
talibus bonis nulla potuissent supplicum uota sufficere, adhuc et dimidiam
relaxare pertulit fiscalis calculi functionem, ne tristes in aliqua parte
faceret, quibus tot felicia praestitisset. <7> Ioseph legimus contra famem
funestam emendi quidem tritici dedisse licentiam, sed tale posuisse pretium, ut
suae subuentionis auidus se potius uenderet alimonia mercaturus. quale fuit,
rogo, tunc miseris uiuere, quibus acerba subuentio libertatem suam uidebatur
adimere: ubi non minus ingemuit liberatus quam potuit flere captiuus! credo
uirum sanctum hac necessitate constrictum, ut et auaro principi satisfaceret et
periclitanti populo subueniret. pace tanti patris dixerim: quanto praestantius
est libertate salua frumenta uendere et propter indigentiam tributa laxare! <8>
Gratis constat ista uenalitas, quando et unde ematis cessit et pretium quod uos
oblectet imposuit. uendit itaque largitas publica uicenos quinos modios, dum
possessor inuenire non possit ad denos. ordinem rerum saeculi mutauit humanitas:
nos iubemur uile distrahere, cum esuriens paratus sit carius comparare. o nouum
praedicationis euentum! affectu damni negotiatio prouenit et uotum est uendenti
magis perdere, ut quaestum comparans debeat inuenire. talia profecto regem decet
tractare commercia: talem conuenit nundinationem exercere pietatem, ut tunc
minus adquiescat accipere, quando emptor plurima praecipitatur offerre. <9>
Libet referre, qualis in uobis sit dominantis affectus, quia et primo cessit
quantum sufficere credidit et nunc iterum postulata geminauit. uerecundum uobis
erat aliquid sperare post dona, cum se adhuc ad beneficia principis reseruaret
humanitas: non audita despexit, quando ipse uisa testatus est. felix illa
calamitas, quae prius miserantem reperit testem, ut post districtum iudicem non
haberet. gaude igitur, assuete iam bono Ligur: in usu tuo secunda uenerunt: nam
collatos tibi Aegyptios magna prosperitate uicisti: euadis tempora necessitatis
et libertatis praemia non amittis: immo illo tempore securus es ab hoste
redditus, quando et de famis periculo cognosceris esse liberatus. <10> Adhuc te
praedictum ornat exemplum: adhuc est in qua parte superetur. legitur enim Ioseph
fratribus suis tantum saccis occulta pretia reddidisse. quid mirum, si natura
compellente proximis suis humanior uisus est extitisse? hic autem cunctis large
uendidit, functionem debitam reliquit et plus iste generaliter contulit
tributariis quam ille solis uisus est praestitisse germanis. breuiter dicantur
effusa: hinc bona sua discat uniuersitas, quando non regibus comparantur nostra
saecula, sed prophetis. sed ne diutius beneficiorum regalium cupidos occupemus,
praecepta nostra ad eos quorum interest manasse cognoscite, ut secundum tenorem
iussionis ad uos perueniat munificentia principalis.