84. Tiresias.
Tiresias, Eueris filius, genere Thebanus, in monte Cyllene 
dracones concubitu haerentes uirga quum percussisset, 
in mulierem uersus est. Et post temporis seriem iterum eos
concumbentes uidens, percussis rursus uirga in eodem loco, 
in figuram rediit pristinam. Quo tempore inter Iouem et 
Iunonem iocosa fuit disceptatio, utrum mas an femina maiorem 
sentiret rei coniugalis uoluptatem; introductus iudex 
Tiresias, qui utramque naturam expertus fuerat, sensum mulieris 
ad comparationem uiri triplicem fore asseuerauerat. Ob 
hoc Iuno irata manus eius praecidit, et eum excaecauit. 
Iuppiter autem ob id ei concessit, ut VII aetates uiueret, 
uatesque ueracissimus haberetur. Tiresiam, quem diximus, 
intelligi uolunt tempus, quod in uere dicitur masculum, quia
tunc soliditas et clausura est germinum. Ergo dum uernum
tempus coeuntia sibi effectu animalia uiderit, eaque uirga, id est 
feruoris aestu, percusserit; in femineum sexum conuertitur, 
dum in aestatis feruorem mutatur. Aestatem namque in 
modum feminae ponunt, quia omnia patefacta suis folliculis
emergunt. Cuius genitura dum ueniente autumno prohibetur, 
iterum in priorem concipiendi et stringendi imaginem conuertitur. 
Denique quum duobus diis, id est duobus elementis, 
igni et aëri, iudicandi causa adhibetur, iustam de eius 
iudicio rationem profitetur. Ad fructificandum enim germina,
tripla aëri prae igne suppetit materia. Aër enim et maritat 
in glebis, et perdurat in foliis, et grauidat in folliculis. Sol 
autem maturare tantum nouit in granis. A Iunone caecatur, 
quia hiemis tempus nubilosa aeris caligine obducitur. Iuppiter 
uero et uaporibus occultis praescientiam, id est conceptionem, 
futuri subministrat germinis.