[14,0] Liber XIV. [14,1] I. Synthesibus dum gaudet eques dominusque senator Dumque decent nostrum pillea sumpta Iouem; Nec timet aedilem moto spectare fritillo, Cum uideat gelidos tam prope uerna lacus: Diuitis alternas et pauperis accipe sortes: Praemia conuiuae dent sua quisque suo. 'Sunt apinae tricaeque et si quid uilius istis.' Quis nescit? uel quis tam manifesta negat? Sed quid agam potius madidis, Saturne, diebus, Quos tibi pro caelo filius ipse dedit? Vis scribam Thebas Troiamue malasue Mycenas? 'Lude,' inquis, 'nucibus'. Perdere nolo nuces. [14,2] II. Quo uis cumque loco potes hunc finire libellum: Versibus explicitumst omne duobus opus. Lemmata si quaeris cur sint adscripta, docebo: Ut, si malueris, lemmata sola legas. [14,3] III. Pugillares citrei. Secta nisi in tenues essemus ligna tabellas, Essemus Libyci nobile dentis onus. [14,4] IV. Quinquiplices. Caede iuuencorum domini calet area felix, Quinquiplici cera cum datur altus honos. [14,5] V. Pugillares eborei. Languida ne tristes obscurent lumina cerae, Nigra tibi niueum littera pingat ebur. [14,6] VI. Triplices. Tunc triplices nostros non uilia dona putabis, Cum se uenturam scribet amica tibi. [14,7] VII. Pugillares membranei. Esse puta ceras, licet haec membrana uocetur: Delebis, quotiens scripta nouare uoles. [14,8] VIII. Vitelliani. Nondum legerit hos licet puella, Nouit quid cupiant Vitelliani. [14,9] IX. Idem. Quod minimos cernis, mitti nos credis amicae. Falleris: et nummos ista tabella rogat. [14,10] X. Chartae maiores. Non est, munera quod putes pusilla, Cum donat uacuas poeta chartas. [14,11] XI. Chartae epistulares. Seu leuiter noto, seu caro missa sodali Omnes ista solet charta uocare suos. [14,12] XII. Loculi eborei. Hos nisi de flaua loculos implere moneta Non decet: argentum uilia ligna ferant. [14,13] XIII. Loculi lignei. Si quid adhuc superest in nostri faece locelli, Munus erit. Nihil est: ipse locellus erit. [14,14] XIV. Tali eborei. Cum steterit nullus uultu tibi talus eodem, Munera me dices magna dedisse tibi. [14,15] XV. Tesserae. Non sim talorum numero par tessera, dum sit Maior, quam talis, alea saepe mihi. [14,16] XVI. Turricula. Quae scit compositos manus improba mittere talos, Si per me misit, nil nisi uota feret. [14,17] XVII. Tabula lusoria. Hac mihi bis seno numeratur tessera puncto; Calculus hac gemino discolor hoste perit. [14,18] XVIII. Calculi. Insidiosorum si ludis bella latronum, Gemmeus iste tibi miles et hostis erit. [14,19] XIX. Nuces. Alea parua nuces et non damnosa uidetur; Saepe tamen pueris abstulit illa natis. [14,20] XX. Theca libraria. Sortitus thecam calamis armare memento: Cetera nos dedimus, tu leuiora para. [14,21] XXI. Graphiarium. Haec tibi erunt armata suo graphiaria ferro: Si puero dones, non leue munus erit. [14,22] XXII. Dentiscalpium. Lentiscum melius: sed si tibi frondea cuspis Defuerit, dentes pinna leuare potest. [14,23] XXIII. Auriscalpium. Si tibi morosa prurigine uerminat auris, Arma damus tantis apta libidinibus. [14,24] XXIV. Acus aurea. Splendida ne madidi uiolent bombycina crines, Figat acus tortas sustineatque comas. [14,25] XXV. Pectines. Quid faciet nullos hic inuentura capillos Multifido buxus quae tibi dente datur? [14,26] XXVI. Crines. Chattica Teutonicos accendit spuma capillos: Captiuis poteris cultior esse comis. [14,27] XXVII. Sapo. Si mutare paras longaeuos cana capillos, Accipe Mattiacas - quo tibi calua? - pilas. [14,28] XXVIII. Umbella. Accipe quae nimios uincant umbracula soles: Sit licet et uentus, te tua uela tegent. [14,29] XXIX. Causea. In Pompeiano tecum spectabo theatro: Mandatus populo uela negare solet. [14,30] XXX. Venabula. Excipient apros expectabuntque leones, Intrabunt ursos, sit modo firma manus. [14,31] XXXI. Culter uenatorius. Si deiecta gemas longo uenabula rostro, Hic breuis ingentem comminus ibit aprum. [14,32] XXXII. Parazonium. Militiae decus hoc gratique erit omen honoris, Arma tribunicium cingere digna latus. [14,33] XXXIII. Pugio. Pugio, quem curua signat breuis orbita uena. Stridentem gelidis hunc Salo tinxit aquis. [14,34] XXXIV. Falx. Pax me certa ducis placidos curuauit in usus. Agricolae nunc sum, militis ante fui. [14,35] XXXV. Securicula. Cum fieret tristis soluendis auctio nummis, Haec quadringentis milibus empta fuit. [14,36] XXXVI. Ferramenta tonsoria. Tondendis haec arma tibi sunt apta capillis; Unguibus hic longis utilis, illa genis. [14,37] XXXVII. Scrinium. Selectos nisi das mihi libellos, Admittam tineas trucesque blattas. [14,38] XXXVIII. Fasces calamorum. Dat chartis habiles calamos Memphitica tellus; Texantur reliqua tecta palude tibi. [14,39] XXXIX. Lucerna cubicularis. Dulcis conscia lectuli lucerna, Quidquid uis facias licet, tacebo. [14,40] XL. Cicindela Ancillam tibi sors dedit lucernae, Totas quae uigil exigit tenebras. [14,41] XLI. Lucerna polymyxos Inlustrem cum tota meis conuiuia flammis Totque geram myxos, una lucerna uocor. [14,42] XLII. Cereus. Hic tibi nocturnos praestabit cereus ignes: Subducta est puero namque lucerna tuo. [14,43] XLIII. Candelabrum Corinthium. Nomina candelae nobis antiqua dederunt: Non norat parcos uncta lucerna patres. [14,44] XLIV. Candelabrum ligneum. Esse uides lignum; seruas nisi lumina, fiet De candelabro magna lucerna tibi. [14,45] XLV. Pila paganica. Haec quae difficili turget paganica pluma, Folle minus laxast et minus arta pila. [14,46] XLVI. Pila trigonalis. Si me nobilibus scis expulsare sinistris, Sum tua. Tu nescis? rustice, redde pilam. [14,47] XLVII. Follis Ite procul, iuuenes: mitis mihi conuenit aetas: Folle decet pueros ludere, folle senes. [14,48] XLVIII. Harpasta Haec rapit Antaei uelox in puluere draucus, Grandia qui uano colla labore facit. [14,49] XLIX. Halteres Quid pereunt stulto fortes haltere lacerti? Exercet melius uinea fossa uiros. [14,50] L. Galericulum Ne lutet inmundum nitidos ceroma capillos, Hac poteris madidas condere pelle comas. [14,51] LI. Strigiles Pergamon has misit. Curuo destringere ferro: Non tam saepe teret lintea fullo tibi. [14,52] LII. Gutus corneus Gestauit modo fronte me iuuencus: Verum rhinocerota me putabas. [14,53] LIII. Rhinoceros Nuper in Ausonia domini spectatus harena Hic erit ille tibi, cui pila taurus erat. [14,54] LIV. Crepitacillum. Si quis plorator collo tibi uernula pendet, Haec quatiat tenera garrula sistra manu. [14,55] LV. Flagellum. Proficies nihil hoc, caedas licet usque, flagello, Si tibi purpureo de grege currit equus. [14,56] LVI. Dentifricium. Quid mecum est tibi? me puella sumat: Emptos non soleo polire dentes. [14,57] LVII. Myrobalanum. Quod nec Vergilius nec carmine dicit Homerus, Hoc ex unguento constat et ex balano. [14,58] LVIII. Aphronitrum. Rusticus es? nescis, quid Graeco nomine dicar: Spuma uocor nitri. Graecus es? aphronitrum. [14,59] LIX. Opobalsama. Balsama me capiunt, haec sunt unguenta uirorum: Delicias Cosmi uos redolete, nurus. [14,60] LX. Lomentum. Gratum munus erit scisso nec inutile uentri, Si clara Stephani balnea luce petes. [14,61] LXI. Lanterna cornea. Dux lanterna uiae clusis feror aurea flammis, Et tuta est gremio parua lucerna meo. [14,62] LXII. Lanterna de uesica. Cornea si non sum, numquid sum fuscior? aut me Vesicam, contra qui uenit, esse putat? [14,63] LXIII. Tibiae. Ebria nos madidis rumpit tibicina buccis: Saepe duas pariter, saepe monaulon habet. [14,64] LXIV. Fistula. Quid me conpactam ceris et harundine rides? Quae primum structa est fistula talis erat. [14,65] LXV. Soleae lanatae. Defuerit si forte puer soleasque libebit Sumere, pro puero pes erit ipse sibi. [14,66] LXVI. Mamillare. Taurino poteras pectus constringere tergo: Nam pellis mammas non capit ista tuas. [14,67] LXVII. Muscarium pauoninum. Lambere quae turpes prohibet tua prandia muscas, Alitis eximiae cauda superba fuit. [14,68] LXVIII. Muscarium bubulum. Sordida si flauo fuerit tibi puluere uestis, Colligat hunc tenui uerbere cauda leuis. [14,69] LXIX. Copta Rhodiaca. Peccantis famuli pugno ne percute dentes: Clara Rhodos coptam quam tibi misit edat. [14,70] LXX. Priapus siligineus. Si uis esse satur, nostrum potes esse Priapum: Ipsa licet rodas inguina, purus eris. [14,71] LXXI. Porcus. Iste tibi faciet bona Saturnalia porcus, Inter spumantes ilice pastus apros. [14,72] LXXII. Botulus. Qui uenit botulus mediae tibi tempore brumae, Saturni septem uenerat ante dies. [14,73] LXXIII. Psittacus Psittacus a uobis aliorum nomina discam: Hoc didici per me dicere CAESAR HAVE. [14,74] LXXIV. Coruus Corue salutator, quare fellator haberis? In caput intrauit mentula nulla tuum. [14,75] LXXV. Luscinia Flet Philomela nefas incesti Tereos, et quae Muta puella fuit, garrula fertur auis. [14,76] LXXVI. Pica. Pica loquax certa dominum te uoce saluto: Si me non uideas, esse negabis auem. [14,77] LXXVII. Cauea eborea. Si tibi talis erit, qualem dilecta Catullo Lesbia plorabat, hic habitare potest. [14,78] LXXVIII. Narthecium. Artis ebur medicae narthecia cernis: habebis Munera, quae cuperet Paccius esse sua. [14,79] LXXIX. Flagra. Ludite lasciui, sed tantum ludite, serui: Haec signata mihi quinque diebus erunt. [14,80] LXXX. Ferulae. Inuisae nimium pueris grataeque magistris, Clara Prometheo munere ligna sumus. [14,81] LXXXI. Pera. Ne mendica ferat barbati prandia nudi Dormiat et tetrico cum cane, pera rogat. [14,82] LXXXII. Scopae. In pretio scopas testatur palma fuisse. Otia sed scopis nunc analecta dedit. [14,83] LXXXIII. Scalptorium eboreum. Defendet manus haec scapulas mordente molesto Pulice, uel si quid pulice sordidius. [14,84] LXXXIV. Manuale. Ne toga barbatos faciat uel paenula libros, Haec abies chartis tempora longa dabit. [14,85] LXXXV. Lectus pauoninus. Nomina dat spondae pictis pulcherrima pinnis Nunc Iunonis auis, sed prius Argus erat. [14,86] LXXXVI. Ephippium. Stragula succincti uenator sume ueredi: Nam solet a nudo surgere ficus equo. [14,87] LXXXVII. Stibadia. Accipe lunata scriptum testudine sigma. Octo capit; ueniat quisquis amicus erit. [14,88] LXXXVIII. Gustatorium. Femineam nobis cherson si credis inesse, Deciperis: pelagi mascula praeda sumus. [14,89] LXXXIX. Mensa citrea. Accipe felices, Atlantica munera, siluas: Aurea qui dederit dona, minora dabit. [14,90] XC. Mensa acerna. Non sum crispa quidem nec siluae filia Maurae, Sed norunt lautas et mea ligna dapes. [14,91] XCI. Dentes eborei Grandia taurorum portant qui corpora, quaeris, An Libycas possint sustinuisse trabes? [14,92] XCII. Quinquepedal. Puncta notis ilex et acuta cuspide clusa Saepe redemptoris prodere furta solet. [14,93] XCIII. Pocula archetypa. Non est ista recens nec nostri gloria caeli: Primus in his Mentor, dum facit illa, bibit. [14,94] XCIV. Calices audaces. Nos sumus audacis plebeia toreumata uitri, Nostra neque ardenti gemma feritur aqua. [14,95] XCV. Phiala aurea caelata. Quamuis Calla•co rubeam generosa metallo, Glorior arte magis: nam Myos iste labor. [14,96] XCVI. Calices Vatinii. Vilia sutoris calicem monimenta Vatini Accipe; sed nasus longior ille fuit. [14,97] XCVII. Lances chrysendetae. Grandia ne uiola paruo chrysendeta mullo: Ut minimum, libras debet habere duas. [14,98] XCVIII. Vasa Arretina. Arretina nimis ne spernas uasa monemus: Lautus erat Tuscis Porsena fictilibus. [14,99] XCIX. Bascauda. Barbara de pictis ueni bascauda Britannis; Sed me iam mauolt dicere Roma suam. [14,100] C. Panaca. Si non ignotast docti tibi terra Catulli, Potasti testa Raetica uina mea. [14,101] CI. Boletaria. Cum mihi boleti dederint tam nobile nomen, Prototomis - pudet heu! - seruio coliculis. [14,102] CII. Calices Surrentini. Accipe non uili calices de puluere natos, Sed Surrentinae leue toreuma rotae. [14,103] CIII. Colum niuarium. Setinos, moneo, nostra niue frange trientes: Pauperiore mero tingere lina potes. [14,104] CIV. Saccus niuarius. Attenuare niues norunt et lintea nostra: Frigidior colo non salit unda tuo. [14,105] CV. Urceoli ministratorii. Frigida non deerit, non deerit calda petenti. Sed tu morosa ludere parce siti. [14,106] CVI. Urceus fictilis. Hic tibi donatur pansa ruber urceus ansa. Stoicus hoc gelidam Fronto petebat aquam. [14,107] CVII. Calathi. Nos Satyri, nos Bacchus amat, nos ebria tigris, Perfusos domini lambere docta pedes. [14,108] CVIII. Calices Saguntini. Quae non sollicitus teneat seruetque minister, Sume Saguntino pocula facta luto. [14,109] CIX. Calices gemmati. Gemmatum Scythicis ut luceat ignibus aurum, Aspice. Quot digitos exuit iste calix! [14,110] CX. Ampulla potoria. Hac licet in gemma, seruat quae nomina Cosmi, Luxuriose, bibas, si foliata sitis. [14,111] CXI. Crystallina. Frangere dum metuis, franges crystallina: peccant Securae nimium sollicitaeque manus. [14,112] CXII. Nimbus uitreus. A Ioue qui ueniet, miscenda ad pocula largas Fundet nimbus aquas: hic tibi uina dabit. [14,113] CXIII. Murrina. Si caldum potas, ardenti murra Falerno Conuenit et melior fit sapor inde mero. [14,114] CXIV. Patella Cumana. Hanc tibi Cumano rubicundam puluere testam Municipem misit casta Sibylla suam. [14,115] CXV. Calices uitrei. Aspicis ingenium Nili: quibus addere plura Dum cupit, a quotiens perdidit auctor opus! [14,116] CXVI. Lagona niuaria. Spoletina bibis uel Marsis condita cellis: Quo tibi decoctae nobile frigus aquae? [14,117] CXVII. Idem. Non potare niuem, sed aquam potare recentem De niue commenta est ingeniosa sitis. [14,118] CXVIII. Idem. Massiliae fumos miscere niualibus undis Parce, puer, constet ne tibi pluris aqua. [14,119] CXIX. Matella fictilis Dum poscor crepitu digitorum et uerna moratur, O quotiens paelex culcita facta mea est! [14,120] CXX. Ligula argentea Quamuis me ligulam dicant equitesque patresque, Dicor ab indoctis lingula grammaticis. [14,121] CXXI. Coclearia Sum cocleis habilis, sed nec minus utilis ouis. Numquid scis, potius cur cocleare uocer? [14,122] CXXII. Anuli Ante frequens, sed nunc rarus nos donat amicus. Felix, cui comes est non alienus eques. [14,123] CXXIII. Dactyliotheca Saepe grauis digitis elabitur anulus unctis, Tuta mea fiet sed tua gemma fide. [14,124] CXXIV. Toga. Romanos rerum dominos gentemque togatam Ille facit, magno qui dedit astra patri. [14,125] CXXV. Idem. Si matutinos facilest tibi perdere somnos, Attrita ueniet sportula saepe toga. [14,126] CXXVI. Endromis. Pauperis est munus, sed non est pauperis usus: Hanc tibi pro laena mittimus endromida. [14,127] CXXVII. Canusinae fuscae. Haec tibi turbato Canusina simillima mulso Munus erit. Gaude: non cito fiet anus. [14,128] CXXVIII. Bardocucullus. Gallia Santonico uestit te bardocucullo. Cercopithecorum paenula nuper erat. [14,129] CXXIX. Canusinae rufae Roma magis fuscis uestitur, Gallia rufis, Et placet hic pueris militibusque colos. [14,130] CXXX. Paenula scortea Ingrediare uiam caelo licet usque sereno, Ad subitas numquam scortea desit aquas. [14,131] CXXXI. Lacernae coccineae Si ueneto prasinoue faues, quid coccina sumes? Ne fias ista transfuga sorte, uide. [14,132] CXXXII. Pilleum Si possem, totas cuperem misisse lacernas: Nunc tantum capiti munera mitto tuo. [14,133] CXXXIII. Lacernae Baeticae Non est lana mihi mendax, nec mutor aheno. Sic placeant Tyriae: me mea tinxit ouis. [14,134] CXXXIV. Fascia pectoralis Fascia, crescentes dominae compesce papillas, Ut sit quod capiat nostra tegatque manus. [14,135] CXXXV. Lacernae albae Amphitheatrali nos commendamus ab usu, Cum teget algentes alba lacerna togas. [14,136] CXXXVI. Cenatoria Nec fora sunt nobis nec sunt uadimonia nota: Hoc opus est, pictis accubuisse toris. [14,137] CXXXVII. Focale Si recitaturus dedero tibi forte libellum, Hoc focale tuas adserat auriculas. [14,138] CXXXVIII. Laena Tempore brumali non multum leuia prosunt: Calfaciunt uilli pallia uestra mei. [14,139] CXXXIX. Mantele Nobilius uillosa tegant tibi lintea citrum: Orbibus in nostris circulus esse potest. [14,140] CXL. Cuculli Liburnici Iungere nescisti nobis, o stulte, lacernas: Indueras albas, exue calla•nas. [14,141] CXLI. Udones Cilicii Non hos lana dedit, sed olentis barba mariti: Cinyphio poterit planta latere sinu. [14,142] CXLII. Synthesis Dum toga per quinas gaudet requiescere luces, Hos poteris cultus sumere iure tuo. [14,143] CXLIII. Tunicae Patauinae. Vellera consumunt Patauinae multa trilices, Et pingues tunicas serra secare potest. [14,144] CXLIV. Spongia. Haec tibi sorte datur tergendis spongia mensis Utilis, expresso cum leuis imbre tumet. [14,145] CXLV. Paenula gausapina. Is mihi candor inest, uillorum gratia tanta, Ut me uel media sumere messe uelis. [14,146] CXLVI. Ceruical. Tingue caput Cosmi folio, ceruical olebit: Perdidit unguentum cum coma, pluma tenet. [14,147] CXLVII. Cubicularia gausapina. Stragula purpureis lucent uillosa tapetis. Quid prodest, si te congelat uxor anus? [14,148] CXLVIII. Lodices Nudo stragula ne toro paterent, Iunctae nos tibi uenimus sorores. [14,149] CXLIX. Amictorium Mammosas metuo; tenerae me trade puellae, Ut possint niueo pectore lina frui. [14,150] CL. Cubicularia polymita Haec tibi Memphitis tellus dat munera: uicta est Pectine Niliaco iam Babylonos acus. [14,151] CLI. Zona Longa satis nunc sum; dulci sed pondere uenter Si tumeat, fiam tunc tibi zona breuis. [14,152] CLII. Gausapum quadratum Lodices mittet docti tibi terra Catulli: Nos Helicaonia de regione sumus. [14,153] CLIII. Semicinctium Det tunicam locuples: ego te praecingere possum. Essem si locuples, munus utrumque darem. [14,154] CLIV. Lanae amethystinae Ebria Sidoniae cum sim de sanguine conchae, Non uideo, quare sobria lana uocer. [14,155] CLV. Lanae albae Velleribus primis Apulia, Parma secundis Nobilis; Altinum tertia laudat ouis. [14,156] CLVI. Lanae Tyriae. Nos Lacedaemoniae pastor donauit amicae: Deterior Ledae purpura matris erat. [14,157] CLVII. Lanae Pollentinae. Non tantum pullo lugentes uellere lanas, Sed solet et calices haec dare terra suos. [14,158] CLVIII. Idem. Lana quidem tristis, sed tonsis nata ministris, Quales non primo de grege mensa citat. [14,159] CLIX. Tomentum Leuconicum. Oppressae nimium uicina est fascia plumae? Vellera Leuconicis accipe rasa sagis. [14,160] CLX. Tomentum Circense. Tomentum concisa palus Circense uocatur. Haec pro Leuconico stramina pauper emit. [14,161] CLXI. Pluma. Lassus Amyclaea poteris requiescere pluma, Interior cycni quam tibi lana dedit. [14,162] CLXII. Faenum. Fraudata tumeat fragilis tibi culcita mula. Non uenit ad duros pallida cura toros. [14,163] CLXIII. Tintinabulum. Redde pilam: sonat aes thermarum. Ludere pergis? Virgine uis sola lotus abire domum. [14,164] CLXIV. Discus. Splendida cum uolitant Spartani pondera disci, Este procul, pueri: sit semel ille nocens. [14,165] CLXV. Cithara. Reddidit Eurydicen uati: sed perdidit ipse, Dum sibi non credit nec patienter amat. [14,166] CLXVI. Idem. De Pompeiano saepe est eiecta theatro Quae duxit siluas detinuitque feras. [14,167] CLXVII. Plectrum. Feruida ne trito tibi pollice pusula surgat, Exornent docilem candida plectra lyram. [14,168] CLXVIII. Trochus. Inducenda rota est: das nobis utile munus: Iste trochus pueris, at mihi cantus erit. [14,169] CLXIX. Idem. Garrulus in laxo cur anulus orbe uagatur? Cedat ut argutis obuia turba trochis. [14,170] CLXX. Signum Victoriae aureum. Haec illi sine sorte datur, cui nomina Rhenus Vera dedit. Deciens adde Falerna, puer. [14,171] CLXXI. g-BROYTOY g-PAIDION fictile. Gloria tam parui non est obscura sigilli: Istius pueri Brutus amator erat. [14,172] CLXXII. Sauroctonos Corinthius. Ad te reptanti, puer insidiose, lacertae Parce: cupit digitis illa perire tuis. [14,173] CLXXIII. Hyacinthus in tabula pictus. Flectit ab inuiso morientia lumina disco Oebalius, Phoebi culpa dolorque, puer. [14,174] CLXXIV. Hermaphroditus marmoreus. Masculus intrauit fontis, emersit utrumque: Pars est una patris, cetera matris habet. [14,175] CLXXV. Danae picta. Cur a te pretium Danae, regnator Olympi, Accepit, gratis si tibi Leda dedit? [14,176] CLXXVI. Persona Germana. Sum figuli lusus russi persona Bataui. Quae tu derides, haec timet ora puer. [14,177] CLXXVII. Hercules Corinthius. Elidit geminos infans nec respicit anguis. Iam poterat teneras hydra timere manus. [14,178] CLXXVIII. Hercules fictilis. Sum fragilis: sed tu, moneo, ne sperne sigillum: Non pudet Alciden nomen habere meum. [14,179] CLXXIX. Minerua argentea. Dic mihi, uirgo ferox, cum sit tibi cassis et hasta, Quare non habeas aegida. 'Caesar habet.' [14,180] CLXXX. Europe picta. Mutari melius tauro, pater optime diuum, Tunc poteras, Io cum tibi uacca fuit. [14,181] CLXXXI. Leandros marmoreus. Clamabat tumidis audax Leandros in undis: 'Mergite me, fluctus, cum rediturus ero.' [14,182] CLXXXII. Sigillum gibberi fictile. Ebrius haec fecit terris, puto, monstra Prometheus: Saturnalicio lusit et ipse luto. [14,183] CLXXXIII. Homeri Batrachomachia. Perlege Maeonio cantatas carmine ranas Et frontem nugis soluere disce meis. [14,184] CLXXXIV. Homerus in pugillaribus membraneis. Ilias et Priami regnis inimicus Ulixes Multiplici pariter condita pelle latent. [14,185] CLXXXV. Vergili Culex. Accipe facundi Culicem, studiose, Maronis, Ne nucibus positis ARMA VIRUMQUE legas. [14,186] CLXXXVI. Vergilius in membranis. Quam breuis inmensum cepit membrana Maronem! Ipsius uultus prima tabella gerit. [14,187] CLXXXVII. MENANDROY THAIS Hac primum iuuenum lasciuos lusit amores; Nec Glycera pueri, Thais amica fuit. [14,188] CLXXXVIII. Cicero in membranis. Si comes ista tibi fuerit membrana, putato Carpere te longas cum Cicerone uias. [14,189] CLXXXIX. Monobyblos Properti. Cynthia - facundi carmen iuuenale Properti - Accepit famam, non minus ipsa dedit. [14,190] CXC. Titus Liuius in membranis. Pellibus exiguis artatur Liuius ingens, Quem mea non totum bibliotheca capit. [14,191] CXCI. Sallustius. Hic erit, ut perhibent doctorum corda uirorum, Primus Romana Crispus in historia. [14,192] CXCII. Ouidi Metamorphosis in membranis. Haec tibi, multiplici quae structa est massa tabella, Carmina Nasonis quinque decemque gerit. [14,193] CXCIII. Tibullus. Ussit amatorem Nemesis lasciua Tibullum, In tota iuuit quem nihil esse domo. [14,194] CXCIV. Lucanus. Sunt quidam, qui me dicant non esse poetam: Sed qui me uendit bybliopola putat. [14,195] CXCV. Catullus. Tantum magna suo debet Verona Catullo, Quantum parua suo Mantua Vergilio. [14,196] CXCVI. Calui de aquae frigidae usu. Haec tibi quae fontes et aquarum nomina dicit, Ipsa suas melius charta natabat aquas. [14,197] CXCVII. Mulae pumilae. His tibi de mulis non est metuenda ruina: Altius in terra paene sedere soles. [14,198] CXCVIII. Catella Gallicana. Delicias paruae si uis audire catellae, Narranti breuis est pagina tota mihi. [14,199] CXCIX. Asturco. Hic breuis ad numeros rapidum qui colligit unguem, Venit ab auriferis gentibus Astur equus. [14,200] CC. Canis uertragus. Non sibi, sed domino uenatur uertragus acer, Inlaesum leporem qui tibi dente feret. [14,201] CCI. Palaestrita. Non amo quod uincat, sed quod succumbere nouit Et didicit melius g-tehn g-anaklinopalehn. [14,202] CCII. Simius. Callidus emissas eludere simius hastas, Si mihi cauda foret, cercopithecus eram. [14,203] CCIII. Puella Gaditana. Tam tremulum crisat, tam blandum prurit, ut ipsum Masturbatorem fecerit Hippolytum. [14,204] CCIV. Cymbala. Aera Celaenaeos lugentia matris amores Esuriens Gallus uendere saepe solet. [14,205] CCV. Puer. Sit nobis aetate puer, non pumice leuis, Propter quem placeat nulla puella mihi. [14,206] CCVI. Cestos. Collo necte, puer, meros amores, Ceston de Veneris sinu calentem. [14,207] CCVII. Idem. Sume Cytheriaco medicatum nectare ceston: Ussit amatorem balteus iste Iouem. [14,208] CCVIII. Notarius. Currant uerba licet, manus est uelocior illis: Nondum lingua suum, dextra peregit opus. [14,209] CCIX. Concha. Leuis ab aequorea cortex Mareotica concha Fiat: inoffensa curret harundo uia. [14,210] CCX. Morio. Non mendax stupor est, nec fingitur arte dolosa. Quisquis plus iusto non sapit, ille sapit. [14,211] CCXI. Caput ueruecinum. Mollia Phrixei secuisti colla mariti. Hoc meruit tunicam qui tibi, saeue, dedit? [14,212] CCXII. Pumilus. Si solum spectes hominis caput, Hectora credas: Si stantem uideas, Astyanacta putes. [14,213] CCXIII. Parma. Haec, quae saepe solet uinci, quae uincere raro, Parma tibi, scutum pumilionis erit. [14,214] CCXIV. Comoedi pueri. Non erit in turba quisquam MISOYMENOS ista: Sed poterit quiuis esse DIS EXAPATWN. [14,215] CCXV. Fibula. Dic mihi simpliciter, comoedis et citharoedis, Fibula, quid praestas? 'Carius ut futuant.' [14,216] CCXVI. Auceps. Non tantum calamis, sed cantu fallitur ales, Callida dum tacita crescit harundo manu. [14,217] CCXVII. Accipiter. Praedo fuit uolucrum: famulus nunc aucupis idem Decipit et captas non sibi maeret aues. [14,218] CCXVIII. Obsonator. Dic quotus et quanti cupias cenare, nec unum Addideris uerbum: cena parata tibi est. [14,219] CCXIX. Cor bubulum. Pauper causidicus nullos referentia nummos Carmina cum scribas, accipe cor, quod habes. [14,220] CCXX. Cocus. Non satis est ars sola coco: seruire palatum Nolo: cocus domini debet habere gulam. [14,221] CCXXI. Craticula cum ueribus. Rara tibi curua craticula sudet ofella; Spumeus in longa cuspide fumet aper. [14,222] CCXXII. Pistor dulciarius. Mille tibi dulces operum manus ista figuras Extruet: huic uni parca laborat apis. [14,223] CCXXIII Adipata. Surgite: iam uendit pueris ientacula pistor Cristataeque sonant undique lucis aues.