[0] Dictatus Papae.
1. Quod Romana ecclesia a solo Domino sit fundata.
2. Quod solus Romanus pontifex iure dicatur uniuersalis.
3. Quod ille solus possit deponere episcopos uel reconciliare.
4. Quod legatus eius omnibus episcopis presit in concilio etiam inferioris gradus et aduersus eos sententia depositionis possit dare.
5. Quod absentes papa possit deponere.
6. Quod cum excomminicatis ab illo inter caetera nec in eadem domo debemus manere.
7. Quod illi soli licet pro temporis necessitate nouas leges condere, nouas plebes congregare, de canonica abbatiam facere et e contra, diuitem episcopatum diuidere et inopes unire.
8. Quod solus possit uti imperialibus insigniis.
9. Quod solius papae pedes omnes principes deosculentur.
10. Quod illius solius nomen in ecclesiis recitetur.
11. Quod hoc unicum est nomen in mundo.
12. Quod illi liceat imperatores deponere.
13. Quod illi liceat de sede ad sedem, necessitate cogente, episcopos transmutare.
14. Quod de omni ecclesia quocunque uoluerit clericum ualeat ordinare.
15. Quod ab illo ordinatus alii ecclesie preesse potest, sed non militare ; et quod ab aliquo episcopo non debet superiorem gradum accipere.
16. Quod nulla synodus absque praecepto eius debet generalis uocari.
17. Quod nullum capitulum nullusque liber canonicus habeatur absque illius auctoritate.
18. Quod sententiea illius a nullo debeat retractatari, et ipse omnium solus retractare possit.
19. Quod a nemine ipse iudicari debeat.
20. Quod nullus audeat condemnare apostolicam sedem appellantem.
21. Quod maiores causae cuiuscumque ecclesiae ad eam referri debeant.
22. Quod Romana ecclesia nunquam errauit nec in perpetuum, scriptura testante, errabit.
23. Quod Romanus pontifex, si canonice fuerit ordinatus, meritis Beati Petri, indubitanter efficitur sanctus, testante sancto Ennodio Papiensi episcopo, ei multis sanctis patribus fauentibus, sicut in decretis beati Symmachi continetur.
24. Quod illius precepto et licentia subiectis liceat accusare.
25. Quod absque synodali conuentu possit episcopos deponere et reconciliare.
26. Quod catholicus non habeatur, qui non concordat Romane ecclesie.
27. Quod a fidelitate iniquorum subiectos potest absoluere.