[0] Prodigiorum Libellus 
  
[1] I. Romulo regnante. 
 Parens conditorque Urbis Romulus, quum iam Fidenas oppidum cepisset, coloniamque 
 Romanorum fecisset, guttae sanguinis e coelo magna omnium admiratione 
 ceciderunt. Statim pestis Urbem inuasit, quae hominibus absque ulla aegrotatione 
 mortem inferret subitam; sterilitas quoque agrorum et frumentorum omnium, 
 praecipue tamen annonae summa inopia sequuta est. In quae mala posteaquam 
 Laurentes incidissent, omnino uisum est, Tatii et legatorum caede uiolato iure 
 gentium, utrique ciuitati iram numinis expiandam esse. Quare, deditis caedis 
 auctoribus et ab utrisque supplicio affectis, ab iis malis manifeste se 
 receperunt. Romulus expiationibus ciuitates expurgauit, quas longo deinceps 
 tempore ad portam Ferentinam obseruatas, memoriae traditum est. Verum editis iam 
 immortalibus operibus, quum ad Capream paludem concionem ad milites haberet, 
 subita coorta tempestas cum magno fragore, tonitribusque, tam denso regem 
 operuit nimbo, ut conspectum eius concioni abstulerit, nec deinceps unquam in 
 terris apparuerit. Romani autem milites a Iulio Proculo edocti, ad deos regem 
 raptum esse, diuinos statim illi honores exhibuerunt. 

[2] II. Numa Pompilio regnante. 
 Annum iam octauum regnante Numa, morbus pestifer Italiam occupans, Romam quoque 
 inuasit; moerentibus uero cunctis, peltam aeneam e coelo in Numae manus 
 decidisse, memoriae proditum est; quae in Urbis salutem a superis missa 
 credebatur. Ad cuius figuram quum Numae instinctu undecim a Veturio Mamurio 
 insigni artifice fabricatae essent, Salii Martis sacerdotes ad earum custodiam a 
 rege instituti sunt. 

[3] III. Tullo Hostilio regnante. 
 In monte Albano lapidibus pluit, quod quum credi uix posset, missis ad id 
 uisendum prodigium, in conspectu haud aliter, quam quum grandinem uenti 
 glomeratam in terras agunt, crebri cecidere de coelo lapides. Vox ex summi 
 cacuminis luco audita est, quae monebat, ut patrio ritu sacra Albani facerent. 
 Nouemdiale igitur sacrum publice susceptum est, et solemne mansit, ut 
 quandocunque idem prodigium nuntiaretur, feriae per nouem dies agerentur. Haud 
 ita multo post graui pestilentia laboratum est. Hostilius dum Numam sacrificiis 
 imitatur, Ioui litare non potuit, sed fulmine ictus, cum regia conflagrauit. 

[4] IV. Anco Martio regnante. 
 Lucumo Graeci Demarati filius, ac Aruntis frater, generosus adolescens, quum 
 parente apud Tarquinios defuncto, diuenditis bonis omnibus Romam migraret, 
 Ianiculoque iam appropinquaret, in carpento cum uxore sedenti, aquila e sublimi 
 dimissa pileum sustulit; atque mox super carpentum cum magno clangore uolitans, 
 rursus uelut ministerio diuinitus missa, capiti apte reposuit. Quo uiso, 
 Tanaquil auguriorum perita, eo prodigio regnum ei portendi intellexit. Pecunia 
 igitur et industria dignitatem, atque etiam Anci regis familiaritatem 
 consequutus, atque ab eodem tutor liberis relictus, dum Tarquinii Prisci nomen 
 sibi uindicaret, post Anci mortem regnum intercepit, atque ita administrauit, 
 quasi iure adeptus fuisset. 

[5] V. Tarquinio Prisco regnante. 
 Finito bello Sabino, quum Tarquinius Priscus in monte Tarpeio aedem Iouis, quam 
 in eodem bello uouerat, aedificare uellet, et iam exaugurare fana sacellaque 
 alia iuberet, ut libera a ceteris religionibus area esset, iamque omnium 
 sacellorum exaugurationes admitterent aues, in Termini tantum fano nequaquam 
 addixere. Quod prodigium firma stabiliaque cuncta portendere, Romanis uisum est. 
 Sequutum est et aliud prodigium, magnitudinem imperii portendens. Nam posteaquam 
 futuri aedificii fundamenta aperiret, caput hominis integra facie, recenti tamen 
 tabo et sanguine aspersum, in imo repertum est. Cuius prodigii gratia aruspices 
 interrogati, responderunt, hunc locum non imperii tantum Romani, sed totius 
 etiam mundi caput fore. 

[6] VI. Seruio Tullio regnante. 
 Bos in Sabinis, Androno Coratio Latino, miranda magnitudine ac specie nata est: 
 cuius gratia quum aruspices interrogarentur, responsum est, eum populum summam 
 imperii habiturum, qui prius bouem illam immolasset. Latinus igitur bouem in 
 Auentinum egit, et causam sacerdoti Romano exposuit. Ille uero astutus, dixit 
 prius eum uiuo flumine manus purgare debere. At Latinus dum ad Tyberis 
 profluenta descendit, Romanus illo absente bouem immolauit, et sic imperium 
 ciuibus, sibi uero gloriam facto consilioque uindicauit. 

[7] VII. Tarquinio Superbo regnante. 
 Tarquinius quum iam Signiam, Cerceiosque colonos misisset, praesidia Urbi terra 
 marique futura, prodigium horribile uisum est. Anguis enim ex columna lignea 
 elapsus, non tantum terrorem fugamque in regia fecit, sed ipsius etiam regis 
 animum subito pauore perculit, anxiisque curis uniuersos impleuit. Aquilae enim, 
 quae regiae incumbebant, nidum fecerunt, in quo pulli subito uulturum incursu 
 discerpti sunt: quod mali imminentis prodigium esse putabant. Mox cum Rutulis 
 bellatum, Ardea obsessa; et post nefandum Tarquinii cum Lucretia facinus, reges 
 sunt exacti. Tarquinius autem dum Gabios, tanquam in regnum suum 
 proficisceretur, canis et serpens etiam uerbis expressis sunt loquutae. 

[8] VIII. L- Iunio Bruto, L- Tarquinio Collatino, coss-. 
 Silentio noctis, ex sylua Arsia, ingens uox audita est, quae Syluani credia est 
 fuisse. Proclamauit autem, in acie Romanorum contra Veientes, uno plus 
 Hetruscorum cecidisse, et uicisse bello Romanum. 

[9] IX. P- Posthumio Tuberto II, Agrippa Menenio Lanato, coss-. 
 Hastae militares ad multam noctem in coelo ardentes uisae. Sequuta est tertia 
 Sabinorum in Romanorum agros irruptio, qua Posthumius consul magnam accepit ex 
 sua indiligentia cladem; quam eius collega nisi mox uindicasset, male de 
 republica Romana actum esset. Duae Romanorum coloniae, Pometia et Cora, ad 
 Aruncos defecerunt, et contra Aruncos bellatum. 

[10] X. T- Ebutio, C- Vetusio, coss-. 
 Aulus Posthumius dictator, quum contra Latinos, qui in Romanos coniurauerant, ad 
 lacum Regillum pugnaret, ac uictoria iam nutaret, duo iuuenes candidis equis 
 insigni uirtute apparuerunt, pro Romanorum salute fortissime dimicantes; quos 
 dictator post uictoriam quaesitos, ut dignis muneribus honoraret, non inuenit, 
 Castorem et Pollucem ratus. 

[11] XI. M- Fabio Vibulano, L- Valerio Potito, coss-. 
 Quotidie coelestia prodigia in Urbe et agris uisa sunt, minas ostentantia. Mox 
 Oppia, uirgo uestalis, quam tamen alii Popiniam, alii Popiliam uocant, incesti 
 damnata, poenas dedit. Anno sequenti, non segnior discordia domi et bellum foris 
 atrocius fuit: ab Aequis arma sumpta, et Veientes in agros Romanorum incursiones 
 fecerunt. 

[12] XII. M- Fabio II, Cn- Manlio Cincinnato, coss-. 
 In bello contra Veientes, Manlii praetorium de coelo tactum, laceratum fulmine 
 tentorium, euersus foculus, arma foedata, ambusta, ac in totum contrita; occisus 
 eximius equus, quo in proeliis uti consueuerat. Interrogati igitur interpretes 
 prodigiorum, responderunt, significare castrorum oppugnationem, et clarissimorum 
 uirorum interitum. Cum Hetruscis cruento proelio pugnatum. Q- Fabius, Marci 
 frater, bis consul, et tunc legatus, lancea per pectus ictus interiit. Manlius 
 consul in clade occubuit, et uallum Romanorum captum est. 

[13] XIII. Q- Seruilio Prisco II, Sp- Posthumio Lauinio Regillensi, coss-. 
 Coelum ardere uisum, et annus tam hominibus, quam pecori longe fuit 
 pestilentissimus. Aequi Antiatum suscipientes exsules, contra foedera cum 
 Romanis facta, excursiones in Lationrum agros fecerunt. Contra quos anno 
 sequenti missus Q- Fabius Vibulanus, qui prius pacem cum iis fecerat, strenue 
 pugnauit. Verum quum se ad Volscos attraxissent, et fides Antiatum laboraret, 
 cum ingenti exercitu iterum in Romanorum agros populandi gratia ingressi, a 
 Posthumio uicti atque fugati sunt. 

[14] XIV. A. Posthumio ALbino Regillensi, Sp- Furio Medullino Fusco, coss-. 
 Coelum iterum ardere uisum plurimo igni, portentaque alia aut obseruata oculis, 
 aut uanas exterritis ostentauere species. Quibus auertendis terroribus, in 
 triduum feriae indictae: per quas omnia delubra, pacem Deum exposcentium 
 uirorum, mulierumque turba implebantur. Bellum gestum est cum Aequis, contra 
 quos Furius primum parum feliciter, Posthumius uero prospere pugnauit. Antiates 
 milites, propter serum auxilium, cum ignominia sunt dimissi. Anno uero sequenti, 
 pestis crudelissima Romae grassata est. 

[15] XV. T- Lucretio Tricipitino, T- Veturio Gemino, coss-. 
 Iterum coelum ardere uisum, et bos loquuta. Aequi omissis Latinis, Hernicisque, 
 properato itinere Romam properarunt, ut ob iuuentutis absentiam urbem caperent, 
 qui tamen a Lucretio mox circumuenti, ac magna strage fugati sunt. Volscorum 
 agri a Veturio uastati sunt, quorum etm nomen fere eo anno deletum est. 

[16] XVI. P- Volumnio Amentino, Seruio Sulpitio Camerino, coss-. 
 Terra ingenti motu concussa, bos loquuta, et coelum iterum ardere uisum, cui rei 
 priore anno fides non fuerat data. Variae spectrorum facies, horrendaeque uoces 
 oculis et auribus hominum obseruatae sunt. Carne pluit, quae niuis instar e 
 coelo, frustis maioribus et minoribus demissa, ab omni genere auium 
 interuolantium direpta, priusquam terram attingeret; reliquum uero quod 
 intercidit, in Urbe agrisque sparsum iacuit multo tempore, nec colore mutato, 
 nec odore, contra morem ueterascentium carnium. Id uates indigenae interpretari 
 non potuerunt. Libri autem Sibyllini monuerunt, cauendum ab externo hoste, et 
 ciuium seditionibus. Hoc autem anno lex Ternetilla maximo conatu, de decemuiris 
 creandis tentata est, maximaeque subortae inter patricios et plebeios 
 dissensiones. Proximo autem anno exsules Romani ac serui numero MMMM, duce Appio 
 Herdonio Sabino, Capitolium occuparunt, unde non absque magna ciuium strage sunt expulsi. 

[17] XVII. L- Minutio Carbeto, C- Nautio Rutilio, coss-. 
 Lupi in Capitolio uisi, qui a canibus fugati sunt. Cuius prodigii causa totum 
 Capitolium est lustratum. Aequi, quibus superiore anno pax data erat, fracto 
 foedere, duce Graccho Choelio Latinum agrum ac Tusculanum poplati, in Algido 
 castra locarunt: contra quos L- Minutius profectus, infeliciter in castris 
 obsessus, ac demum a Quintio Cincinnato liberatus est. Aequi uicti, ac sub iugum 
 missi sunt. 

[18] XVIII. L- Val- Potito, M- Furio Camillo, etc-, trib- il- cons- pot. 
 Lacus in Albano nemore sine ullis coelestibus aquis, causaue alia, quae rem 
 miraculo eximeret, in altitudinem insolitam creuit. Quum autem ab oraculo 
 sciscitaretur, quid ea res portenderet? responsum est, ut aquam eius lacus 
 emissam per agros diffunderent sic enim Veios, quos acri ac diutino bello 
 uexabant, in potestatem populi Romani uenturos. Quod ubi factum est, hostium 
 urbe potiti sunt. Tarquinienses noui hostes exorti, Romanorum agros, quos multis 
 simul bellis, Volscorum ad Anxur, Aequorum ad Lauicos, et ad hoc Veienti quoque, 
 Falisco, Capenatique bello occupatos uidebant, depopulabantur: contra quos tamen 
 Aulus Posthumiius, et L- Iulius uoluntariorum manu profecti, turpitur fugarunt. 

[19] XIX. P- Licinio, L- Ticinio, P- Menenio, Cn- Genutio, trib- mil-. 
 Veiis iam post longam obsidionem expugnatis, quum Romani milites in urbis 
 direptione, deorum etiam statuas Romam transferre conarentur, ac quidam, seu 
 spiritu diuino tactus, seu iuuenili ioco ad statuam Iunonis diceret, Visne 
 Romam, ire Iuno? posteaquam capite annuisset, se libenter ituram, magna omnium 
 admiratione respondit. Unde rrn in Auentinum aeternam sedem suam ducta est, quo 
 uota dictatoris uocauerant, templumque ei a Camillo dedicatum est. 

[20] XX. Q- Seruilio Hala, L- Genutio II, coss-. 
 Romae in medio foro, siue motu terrae, siue qua ui alia, terra specu uastissimo 
 collapsa est, quam terrae uoraginem nemo neque terrae coniectu, neque ulla 
 quauis alia materia explere potuit. Inficiebantur autem ex editis inde uaporibus 
 pestilentissimis multorum hominum corpora: quae quum remedia omnia respuerent, 
 rebus iam desperatis, deorum monitu, Marci Curtii strenui demum equitis animoso 
 facinore liberati sunt. Posteaquam enim se pro salute patriae in specum armatus 
 praecipitasset, pestis statim post multorum funera sedata est. 

[21] XXI. L- Furio Camillo, Appio Claudio Crasso, coss-. 
 In eo bello, quod Romani, due Camillo, contra Gallos gesserunt, Valerio tribuno 
 militum aduersus Gallum prouocatorem pugnanti, coruus galeae insedit: qui non tu 
 sedem seml captam tenuit, sed quotiescunque certamen initum est, leuans sese 
 alis, os oculosque hostis rostro et unguibus appetiit, donec territum prodigio 
 Gallorum, ac oculis simul et mente turbatis, Valerius obtruncasset. 

[22] XXII. C- Martio III, T- Manlio Torquato II, coss-. 
 Quum Iunoni Monetae in eo Urbis loco, ubi Manlii domus fuit, aedes dedicaretur, 
 prodigium extemplo dedicationem sequutum, simile uetusto montis Albani prodigio. 
 Lapidibus enim pluit, et nox interdum uisa est intendi. Feriae proinde sunt 
 indictae, nec tantum a Romanis tribubus supplicatum, sed a finitimis etiam 
 populis. Iudicia eo anno populi in foeneratores facta, quibus est ab aedilibus 
 dicta dies. Proximo uero anno bellum cum Samnitibus ortum est, gente tum opibus 
 et armis ualidissima: quod bellum mox aliud cum Pyrrho rege et cum Poenis 
 grauissimum peperit. 

[23] XXIII. Q- Fabio Maximo Rutiliano V, P- Decio Mure IV, coss-. 
 Terra de coelo pluit, et in exercitu Appii Claudii plerique fulminibus icti 
 sunt. Infestis eo anno armis cum Samnitibus pugnatum est. Pestis mirum in modum 
 per totam Italiam, et in urbe potissimum, grassata est. galli a Fabio uicti ac 
 in fugam uersi sunt. Fuluius in Hetruria feliciter contra Thuscos pugnauit. 

[24] XXIV. M- Curio Dentato II, L- Cornelio Lentulo, coss-. 
 Inter alia prodigia, fulmine est etiam deiectum Iouis in Capitolio signum, cuius 
 caput per aruspices inuentum est. Pyrrhus contra Romanos bellum suscepit, qui a 
 Curio uictus, et Tarentum fugatus est. Mox Tarentini iterum noua aduersus 
 Romanos arma mouerunt, Carthaginiensium auxilia per legatos poscentes: quos 
 tamen iterum uicerunt Romani. 

[25] XXV. Q- Fabio Maximo Pictore, L- Quintio Gulone, coss-. 
 Obscena prodigia, et dira Romae uisa sunt. Aedes enim Salutis ictu fulminis 
 dissoluta, ars muri sub eodem loco de coelo tacta. Lupi tres ante lucem ingreei 
 Urbem, semesum cadauer intulerunt: sparsumque membratim in foro, ipsi strepitu 
 hominum exterriti, reliquerunt. Apud Formias multis ictibus fulminum moenia 
 undique ambusta et dissoluta sunt. Apud agrum Calenum repente flamma, scisso 
 hiatu terrae eructa, tribus diebus et tribus noctibus exaestuants, quinque agri 
 iugera, exhausto penitus succo ubertatis, in cinerem extorruit, ita ut non 
 fruges solum, sed etiam arbores cum imis stipitibus absumpserit. Hoc anno 
 Picentes, noui hostes facti, Romana in se arma exciuere. 

[26] XXVI. P- Sempronio Sopho, Appio Claudio Rufo, coss-. 
 Sempronius consul quum aduersus Picentes exercitum duxisset, et iam directe 
 intra iactum teli utraq acies consisteret, repente cum horrendo fragore terra 
 ita contremuit, ut stupore miraculi utrumque pauefactum agmen hebesceret. Verum 
 mox in certamen progressi, bellum adeo atrox fuit, ut merito dicatur, humanum 
 tantorum hominum sanguinem suscepturam, etiam cum gemitu horrisono tunc terram 
 tremuisse: in quo tamen proelio Romani, quorum pauci euaserant, uicerunt. 

[27] XXVII. M- Valerio Maximo, Q- Mamilio Vitulo, coss-. 
 Inter multa alia prodigia, sanguis e terra, et lac de coelo manare uisum est: 
 nam et pluribus locis scaturiens e fontibus cruor fluxit, et de nubibus guttatim in 
 speciem pluuiae lacte demisso, diri terram imbres irrigauerunt. Eo tempore 
 Carthaginienes, dato aduersum Romanos auxilio Tarentinis, quum a senatu per 
 legatos arguerentur, turpissimam rupti foederis labem praesumptam, accumulauere 
 periurio. Sequutum est quoque libertinorum Volsciensium aduersus dominos 
 conspirantium, nefandum scleus, qui tamen mox duce Fabio Gurgite poenas 
 dederunt. Pestilentia etiam crudelissima hoc anno Urbem inuasit. 

[28] XXVIII. L- Valerio Flacco, L- Octacilio Crasso, coss-. 
 Romae columna ante Iouis aedem, ui turbinis est decussa, cum aureo signo. Quo 
 uiso, ex aruspicum responso omnes magistratus se primo quoque die autoritate 
 abdicarunt. Eo anno exercitus Romanorum ingens in Siciliam missus, multos ad 
 defectionem compulit. Vastata est interea et Italiae ora ab altera 
 Carthaginiensium classe, quum interim Africa ab omni hostili iniuria immunis 
 esset. 

[29] XXIX. M- Attilio Regulo Serrano II, Cn- Corneio Bleso, coss-. 
 Serpens in Africa portentosae magnitudinis apparuit, quem Attilius Regulus cum 
 maxima militum clade difficulter catapultis et balistis, ueluti molem quamdam 
 expugnauit: qui quum aliquoties iam aduersus Carthaginienses pugnasset, eo anno 
 ab hostibus captus est. Huius autem serpentis exuuiae centum uiginti pedum 
 longitudine fuisse feruntur, et eius maxillae usque ad Numantinum bellum in 
 publico pependisse dicuntur. 

[30] XXX. C- Quintio Flaminio, P- Furio Philone, coss-. 
 In Piceno flumen sanguine affluxit; apud Thuscos colum ardere uisum; Arimini 
 nocte multa lux clara effulsit, tres lunae distantibus coeli regionibus exortae; 
 magno terrae motu Caria et Rhodus insula adeo concussae sunt, ut labentibus 
 uulgo tectis, ingens quoque Colossus coruerit. Eodem anno Flaminius aduersus 
 Gallos conflixit, et uicit; anno uero proximo Claudius Marcellus iterum 
 profligauit, capto Viridomaro rege; et inter multa Insubrium, quos ad deditionem 
 coegerat oppida, Mediolanum quoque urbem florentissimam cepit. 

[31] XXXI. Cn- Seruilio Gemino. C- Quintio Flaminio II, coss-. 
 Romae, in foro Olitorio, infans semestris triumphum exclamauit; in foro Boario 
 bos in tertiam contignationem sua sponte ascendit, atque inde habitatorum 
 tumultu territus, sese deiicit. Nauium species in coelo uisa; Spei templum in 
 foro Olitorio fulmine ictum; Lanuuii hasta se commouit; coruus in aedem Iunonis 
 deuolauit, atque in ipso puluinario consedit; in agro Amiternino multis locis 
 hominum specis procul candida ueste uisae; in Piceno lapidibus pluit; in 
 Sardinia, in muro circumeunti uigilias equiti, scipio, quem manu tenebat, et in 
 Sicilia aliquot militibus spicula arserunt, litora crebris fulserunt ignibus; 
 milites fulminibus citi; solis circulus minui uisus est; Praeneste ardentes 
 lampades de coelo ceciderunt; Arpis parma in coelo; luna cum sole certare, et 
 interdum etiam duae lunae uisae; Caerete aquae sanguine mixtae fluerunt; fons 
 Herculis sparsis hinc inde maculis cruentis manauit; Antii metentibus cruentae 
 in corbem spicae ceciderunt. Faleriis coelum findi uisum; sortes sua sponte 
 attenuatae; Mauors telum suum quassauit; signum Martis in Appia uia ad simulacra 
 luporum sudauit; Capuae coelum ardere uisum, nauium species in coelo uisae; Spei 
 templum de coelo tactum, terra horrendo motu concussa est, caprae lanatae 
 quibusdam factae, galina in marem, gallus uero in gallinam uersus. Eodem anno 
 Hannibal Hetruriam inuasit, Romani ad Thrasimenum lacum cruente proelio uicti sunt. 

[32] XXXII. C- Terentio Varrone, L- Aemilio Paulo II, coss-. 
 In Auentino Romae, et Ariciae, simul lapidibus pluit, et multo cruore ex 
 frigidissimo fonte calidae aquae manarunt; in uia Fornicata, quae ad templum 
 erat, homines aliquot de coelo tacti, atque exanimati. Sequuta est momorabilis 
 illa clades ad Cannas, Apuliae uicum, in qua Paulus Aemilius occisus est, et 
 quadraginta millia peditum, cum duobus millibus equitum et septingentis, et plus 
 quam tria Romanorum millia capta, et Hannibal Campaniam occupauit. 

[33] XXXIII. L- Posthumio Albino III, P- Sempronio Graccho, coss-. 
 Mare arsit, ad Sinuessam Bessus equuleum peperit; signa Lanuuii Iunonis Sospitae 
 cruore manauere, lapidibus circa id templum pluit; ob quem imbrem, nouemdiale 
 sacrum fuit, ceteraque prodigia cum cura expiata. Eo anno in Galliis Posthumius 
 cum omni exercitu deletus est. Bellum Macedonicum inchoatum; res in Hispania 
 feliciter a Romanis gestae. In Italia Campani caesi ad Cumas; Poeni in Lucania 
 fusi ac fugati, caedes Poenorum quoque ad Nolam facta est; Sardi a Manlio caesi. 


[34] XXXIV. Q- Fabio Maximo Verrucoso IV, M- Claudio Marcelo III, coss-. 
 Lanuuii in aede Iunonis Sospitae, corui nidum fecerunt; in Apulia palma uiridis 
 arsti; Mantuae stagnum effusum Mincio amni, cruentum uisum; Calibus creta, et 
 Romae in foro Boario sanguine pluit; in uico Istrico fons sub terra, tanta ui 
 aquarum fluxit, ut serias doliaque, quae in eo loco erant, prouoluta, uelut 
 impetus torrentis tulerit. Tacta de coelo, atrium publicum in Capitolio, templum 
 in campo Vulcani, nux in Sabinis, publicaque uia, murus ac porta Gabiis; hasta 
 Martis in Praeneste sua sponte mota; bos in Sicilia loquutus; infans in utero 
 matris, in Marrucinis, Io triumphe clamauit; ex muliere Spoleti uir factus; 
 Hadriae ara in coelo, speciesque hominum ca eam candida ueste uisae; quin et 
 Romae quoque in ipsa urbe secundum apum examen in foro uisum; legiones armatae 
 in Ianiculo uisae etiam, quae tamen mox, quum ad arma concursum est, euanuerunt. 
 Eodem anno Hannibal, magna militum copia, ad Nolam profectus est; a cuius 
 expugnatione a Marcello prohibitus, magnam suorum stragem uidit, et ex Campania 
 fugatus est; Cassilinum oppidum captum; Fabius Samnium depopulatus est, et multa 
 oppida ui cepit; Syracusae obsessae; contra Philippum bel susceptum, qui ad 
 Apolloniam castris exutus est; res in Hispania prospere a Scipionibus gestae, et 
 Saguntum recuperatum. 

[35] XXXV. Q- Fabio Maximo, T- Sempronio Graccho II, coss-. 
 Murus ac portae tactae; Ariciae Iouis edes de coelo icto fulmine; nauium 
 longarum species in flumine Tarracinae, quae tamen nullae erant, uisae; in Iouis 
 Vicillinio templo, quod in Cossano agro est, arma concrepuerunt, et flumen 
 Amiterni cruentum fluxit. Syphax, Numidarum rex, contra Masinissam regem pro 
 Karthaginiensibus pugnans, uictus est; in Brutiis ex duodecim populis, qui anno 
 priore ad Poenos desciuerant, Consentini et Thurini, in fidem populi Romani 
 redierunt; Sempronius consul, in Lucanis aliquot oppida expugnauit; is quum in 
 Lucanis sacrficasset, angues duo, ex occulto prolapsi, repente hostiae, quam 
 immolauerat, adeso iocinore, in easdem latebras se retulerunt: ob id deinde 
 factum instaurato sacrificio, idem prodigii euenit; tertia quoque caesa uictima, 
 diligentiusque asseruatis extis, neque allapsus serpentum arceri, neque fuga 
 impediri potuit: quod quamuis aruspices ad salutem imperatoris pertinere 
 dixissent, Gracchus tamen uitare non potuit, quin Flauii Lucani hospitis sui 
 insidiis seductus, intermis a Poenorum militibus occideretur. 

[36] XXXVI. Appio Claudio Pulchro, Q- Fuluio Flacco III, coss-. 
 Tempestates foedae exortae; in Albano monte biduum continenter lapidibus pluit; 
 tacta de caelo municipia, duae in Capitolio aedes, uallum in castris, multisque 
 locis supra Suessulam, et duo uigiles exanimati; murus turresque, et quaedam 
 alia, Cumis fulminibus icta, et penitus decussa; Reate saxum ingens uolitare 
 uisum: sol rubere solito magis, sanguineoque colore similis apparuit. Hannibal 
 proditioen Tarentum cepit, excepta race; Samniorum agri a Romanis depopulati 
 sunt; Romani bis cruentas clades acceperunt ab Hannibale; Capua a Romanis 
 obsessa, et capta; Publius et Cneus Scipiones in Hispania ab hostibus 
 circumuenti, et occisi sunt. L- Martius, eques Romanus, quum in Hispania 
 militaret, orationemque ad milites haberet, felicis euentus flamma concionanti a 
 capite, sine ipsius sensu, cum magno circumstantium pauore, fusa est; cuius 
 aspectu milites pristinam hostium millibus caesis, magnoque numero in potestatem 
 redacto, bina castra, Punicis opibus referta, ceperunt; Hispania aliquandiu 
 quieta reddita; Marcellus, captis Syracusis, magna cum gloria Romam reuersus est. 

[37] XXXVII. M- Valerio Leuino II, M- Claudio Marcello IV, coss-. 
 In aede Concordiae Victoria quae in culmine erat, fulmine icta, decussaque ad 
 Victorias, quae in aede fixae erant, haesit, neq inde procidit; Anagniae et 
 Fregellis murus portaeque urbis de coelo tactae; in foro Sudernato sanguinis 
 riui per totum diem fluxere; Ereti lapidibus pluit; Reate mula peperit; eodem 
 anno incendium perniciosum Romae, Campanorum malitia ortum. Marcellus in 
 Campania Salapiam recuperauit; Romana classis ad Sacriportum infeliciter 
 pugnauit; Scipio in Hispania Nouam Karthaginem expugnauit; Marcellus Hannibalis 
 exercitum fudit, et magna pars Siciliae capta est. Tusculi agnus cum ubere 
 lactanti natus; Iouis aedis culmen fulmine ictum, ac prope omni tecto nudatum; 
 iisdem ferme diebus Anagniae terra ante portam icta, diem noctemque sine ullo 
 ignis alimento arsit; aues ad compitum Anagninum in luco Dianae nidos in 
 arboribus reliquerunt; Tarracinae in mari, haud procul portu, angues mirae 
 magnitudinis, lasciuientium piscium more exsultarunt. Tarquiniis porcus cum ore 
 humano genitus; in agro Capenate, ad lucum Feroniae, quatuor signa sanguine 
 multo diem ac noctem sudarunt. Mox Valerius Messala agrum Uticensem depopulatus 
 est; et lex, post longas contentiones, de reficiendis consulibus lata est. 

[38] XXXVIII. Q- Fabio Maximo Verrucoso V, Q- Fuluio Flacco IV, coss-. 
 In Albano monte tacta de coelo sunt, signum Iouis, arborque templo propinqua; 
 Hostiae lacus, Capuae murus, Fortunae aedes, et Sinuessae murus cum porta; 
 Albana aqua cruore fluxit. Romae intra cellam aedis Fortis Fortunae de capite 
 signum, quod in corno erat, in manus sponte sua prolapsum; Priuerno bos 
 loquutus, uultur frequenti foro in tabernam deuolauit; Sinuessae natus infans 
 ambiguo inter marem ac feminam sexu; lacte pluit; puer cum elephanti capite 
 natus. Marcellus cum Hannibale congressus, primo infeliciter, dehinc secunda 
 pugna dimicauit, hostemque in fugam uertit; Fabius Tarentum recuperauit; Scipio 
 in Hispania res prospere gessit. 

[39] XXXIX. M- Claudio Marcello V, T- Quintio Crispino, coss-. 
 Capuae duae aedes, Fortunae scilicet et Martis, sepulcraque aliquot de caelo 
 tacta; mures in aede Iouis aurum roserunt; Cassini examen apum ingens in foro 
 consedit; Hostiae murus, portaque de coelo icta; Caere uultur in aedem Iouis 
 uolauit; Vulsiniis sanguine lacus manauit. Pestilentia grauis incidit Urbem, 
 agrosque; quae tamen magis in longos morbos quam in perniciales euasit Marcellus 
 quum studio niteretur, ut Poenorum exercitum aut in Italia pelleret, in solemni 
 sacrificio, quo uoluntates deorum explorare cupiebat, in prima hostia, quae ante 
 foculum decidit, iecur sine capite inuentum est: proxima iocinoris duplex caput 
 habuit: quibus inspectis, aruspex non placere sibi exta respondit, quoniam prima 
 trunca, secunda nimis laeta apparuissent. Ita monitus Marcellus, ne quid temere 
 niteretur, insequenti nocte speculandi gratia cum paucis ingressus, ab hostibus 
 in Brutiis circumuentus, dum improuide contra Hannibalem pugnaret, lancea 
 transfixus occubuit; Crispinus grauiter uulneratus, etiam interiit: id quod 
 nunquam antea acciderat, ut duo consules, sine memorando proelio interfecti, 
 uelut orbam rempublicam reliquerint. 

 [40] XL. C- Claudio Nerone, M- Liuio Salinatore II, coss-. 
 Veiis de coelo lapidauit; Minturnis sanguinis riuus in porta fluxit; Iouis 
 templum et lucus Maricae, item Atellae murus, et porta de coelo tacta; Capuae 
 lupus nocte, portam ingressus uigilem laniauit; in Armilustro lapidibus pluit; 
 Frusinone infans natus quadrimo par; in Auentino Iunonis Reginae aedes de coelo 
 tacta. Apud Metaurum fluuium Hasdrubal cum omni exercitu a Romanis deletus est, 
 in qua clade quinquaginta sex hostium millia a Romanis caesa sunt, capta quinque 
 millia et quadringenti; ciuium Romanorum, qui capti erant apud hostes, quatuor 
 millia recepta. 

[41] XLI. L- Veturio Philone, Q- Caecilio Metello, coss-. 
 Tarracinae Iouis, et Satrici matris Matutae templum de coelo tactum; in aede 
 Iouis ex foribus duo angues prolapsi; spicae cruentae a metentibus uisae; Caere 
 porcus biceps, et agnus mas, idemque femina natus; Albae duo soles uisi; 
 Fregellis nocturno tempore lux oborta; bos in agro Romano loquutus; in circo 
 Flaminio ara Neptuni multo sudore manauit; aedes Cereris, Salutis et Quirini, de 
 coelo tactae. Lucani, in ditionem populi Romani, sine certamine redierunt; 
 Brutiorum urbes sese Romanis dediderunt; Masinissa rex a Romanis in amicitiam 
 recpetus est; Astapa urbis a Romanis oppugnata; Scipio rebellantes Hispanos in 
 deditionem coegit. 

[42] XLII. P- Cornelio Scipione, P- Licinio Crasso, coss-. 
 Crebro de coelo lapidatum est: lectis igitur Sibyllinis, inuentum est, tunc 
 demum hostem alienigenam, qui terrae Italiae bellum intulisset, pelli Italia 
 posse, si Idaea mater ex Pessinunte Romam adueheretur. Eodem anno cum Hannibale 
 in Brutiis frustra bellatum est, pestilentia utrumque exercitum molestante; in 
 Hispania noui motus exorti; in Italia Locri a Romanis recipiuntur. 

[43] XLIII. M- Cornelio Cethego, P- Sempronio Tuditano, coss-. 
 Duo soles uisi, et nocte interluxit; fax Setiae ab ortu solis in occidentem 
 porrigi uisa; Tarracinae porta, Anagniae uero porta et murus multis locis de 
 coelo tactus; in aede Iunonis Sospitae Lanuuii, cum horrendo fragore strepitus 
 editus. Scipio ex Sicilia in Africam traiecit, et euastatis agris Hannonem 
 iuniorem occidit; Sempronius aduersus Hannibalem, primo infeliciter, deinde uero 
 prospere pugnauit, caesis quatuor Poenorum millibus. 

[44] XLIV. Gn- Seruilio Cepione, Gn- Seruilio Gemino, coss-. 
 Aurum in Capitolio corui non rostris tantum lacerunt, sed comederunt etiam; 
 mures Antii coronam auream arroserunt; circa Capuam locustarum uis ingens omnem 
 agrum compleuit; equuleus Reate quinque pedibus natus; Anagniae sparsi primum 
 ignes in coelo, deinde fax ardens in coelo uisa; Frusinone arcus solem tenui 
 linea amplexus est; Arpini terra campestri agro in ingentem sinum consedit; 
 consulum alteri primam hostiam immolanti, caput iocinori deuit. In Africa per 
 Scipionem iuxta Uticam Poenorum castra sunt combusta; Romani multas in Brutiis 
 ad se deficientes ciuitates receperunt, Hannibalemque in agro Crotoniensi 
 ceciderunt; Magonem, Hannibalis fratrem, cruento proelio uicerunt; Syphacis 
 regis foedifragi castra; incendio ac flammis expugnarunt, ipsumque regem 
 ceperunt; Cirta, regia urbs, a Masinissa rege capta est. 

[45] XLV. M- Seruilio Gemino, T- Claudio Nerone, coss-. 
 Cumis solis minui uisus, lapidibus pluit; in Veliterno agro terra ingentibus 
 cauernis consedit, arboresque in profundum haustae; Ariciae forum, et circa 
 tabernae, Frusinone item murus aliquot locis, et porta urbis de coelo tacta; in 
 Palatio lapidibus pluit; magna Tyberis facta inundatio. Claudius eo anno consul, 
 perniciosa tempestate ingruente naufragium passus est; insignis fuit hic quoque 
 annus incendio ingenti, annonae uilitate, et morte Q- Fabii Maximi, qui XXII 
 annos augur fuit: Hannibal magno exercitu Africam ingressus; Vermina, Syphacis 
 regis filius, clade a Romanis profligatus est. 

[46] XLVI. Seru. Sulpicio Galba, C- Aurelio Cotta, coss-. 
 In Lucanis coelum ardere uisum; Priuerni sereno per diem sol sanguineus fuit; 
 Lanuuii in templo Iunonis Ssospitae, nocte strepitus ingens exortus; animalium 
 obsceni foetus pluribus locis nuntiati; in Sabinis incertus infans natus, 
 masculus an femina esset; alter sexdecim annorum iam, item ambiguo sexu 
 inuentus; Frusinone agnus cum suillo capite; Sinuessae porcus cum cpn humano; in 
 Lucanis, in agro publico equuleus cum quinque pedibus: foeda omnia, et deformia, 
 errantisque in alienos foetus naturae uisa: ante omnia tamen abominati 
 semimares, iussique in mare extemplo deportari. Bellum Macedonicum cum Philippo 
 exortum; Galli, Insubres, Cenomani et Boii, duce Hamilcare Poeno, irruptiones in 
 agros proximos fecerunt, et oppida flammis ac incendio diripuerunt. 

[47] XLVII. L- Cornelio Lentulo, P- Villio Tappulo, coss-. 
 Suessae duae portae, quodque inter eas muri erat, de coelo tactum; Formiani 
 Iouis, apud Ostienses Iouis, Veliterni uero Apollinis et Sangi templa fulmine 
 tacta; in Herculis aede capillus enatus, in Brutiis equuleus cum quinque 
 pedibus, pulli gallinacei cum ternis pedibus nati; in Macedonia laurea in puppi 
 nauis longae enata. Orta est hoc anno in Macedonia atrox militum Romanorum 
 seditio; C- Bebius Pamphilus apud Gallos et Insubres infeliciter pugnauit; 
 Karthaginienses argentum in stipendium impositum, primum Romam aduexerunt. 

[48] XLVIII. Sex. Aelio Paeto, T- Quintio Flaminio, coss-. 
 De coelo tacta sunt uia publica Veiis, forum et aedes Iouis Lanuuii, Herculis 
 Ardeae, Capuae murus, turres, et aedes, quae Alba dicitur; coelum Aretii ardere 
 uisum; terra Velitris trium iugerum spatio cauerna ingenti desedit; Suessae 
 agnus cum duobus capitibus natus; Sinuessae porcus cum humano capite; solis 
 orbis diminui uisus: quorum prodigiorum causa supplicatio unum diem habita, et 
 consules rebus diuinis operam dederunt. Eo autem anno Flaminius feliciter, in 
 faucibus Epiri contra Philippum Macedoniae regem pugnauit; Thessalia, quae est 
 uicina Macedoniae, sociis Aetolis et Athamanibus, a Romanis uexata est; L- 
 Quiintius Flaminius, consulis frater, nauali proelio Euboeam ac maritimam oram 
 omnem cepit; Achaei a Romanis in amicitiam recepti sunt; et coniuratio seruorum 
 de soluendis Karthaginiensibus obsidibus, detecta atque oppressa est. 

[49] XLIX. Cn- Cornelio Cethego, Q- Minutio Rufo, coss-. 
 Aedes Vulcani Summanique Romae, et Fregellis murus ac porta de coelo icta; 
 Frusinone inter noctem lux orta; Asculi agnus biceps cum quinque pedibus natus; 
 Formiis duo lupi oppidum ingressi, obuios aliquot laniauerunt; Romae non in 
 urbem modo, sed in Capitolium penetauit lupus. In Galliis pospere est pugnatum; 
 Insubres, qui in armis contra Romanos erant, a Cornelio sunt debellati; 
 Minutius, Genuam exercitu abducto, ab Liguribus orsus bellum, oppida Clastidium, 
 Litubium, item Celelates, Cerdiceatesque in deditionem accepit, atque omnia cis 
 Padum, praeter Gallorum Boios, Iluates Ligurum, Romano imperio adiecit. 

[50]L. L- Furio Purpureone, M- Claudio Marcello, coss-. 
 L- Iulius equestris in Sabinos proficiscens, fulmine una cum equo exanimatus 
 est; aedes Feroniae in Capenate de coelo tacta; ad Monetae templum duarum 
 hastarum spicula arserunt; lupus Esquilina porta ingressus, frequentissima parte 
 Urbis, quum in forum decurrisset, Thusco uico, atque inde Melio per portam 
 Capenam prope intactus euasit: haec prodigia maioribus hostiis sunt procurata. 
 Hannibal frustra in Africa bellum molitus, ob metum Romanorum profugus, ad 
 Antiochum Syriae regem, bellum contra Romanos gerentem fugit. Marcellus in 
 Hetruria a Boiis est oppressus. Boii et Insubres a Romanis igni ferroque 
 uastati; Philippus in Thessalia fusus et fugatus est. 

[51] LI. P- Cornelio Scipione Africano II, T- Sempronio Longo, coss-. 
 Romae in foro, comitio, et Capitolio, snaguinis guttae uisae sunt; terra 
 aliquoties pluit; caput Vulcani arsit; Interamnae lac fluxit; pueri ingenui 
 Arimini sine oculis et naso nati; in Piceno infans absque manibus ac pedibus 
 natus; in Adrianorum agro lapidibus pluit: ea prodigia ex pontificum decreto 
 procurata, et sacrificium nouemdiale factum. In Gallia Lucius Valerius Flaccus 
 proconsul, circa Mediolanum, cum Gallis, Insubribus et Boiis, qui Dorulaco duce 
 ad concitandos Insubres Padum transgressi erant, signis collatis depugnauit; 
 Marcus Porcius Cato ex Hispania triumphauit; T- Sempronius Boios primum ancipiti 
 Marte, tandem uero insigni strage cecidit; in Macedonia T- Quintus Romanorum 
 praesidia e Graecia Brundusium deduxit. 

[52] LII. L- Cornelio Merula, Q- Minutio Thermo, coss-. 
 Maximi et grauissimi terrae motus fuerunt, et aquae ingentes; unde et Tyberis 
 loca Urbis plana inundauit; circa portam Flumentanam quaedam ruinis sunt 
 collapsa; porta Caelimontana fulmine icta, murusque cca multis locis de coelo 
 tactus; Ariciae, Lanuuii, et in Auentino lapidibus pluit; Capuae uesparum ingens 
 multitudo in forum aduolauit, et in Martis aede consedit; quae cum cura 
 collecta, et igni cremata est: horum prodigiorum causa nouemdiale sacrum factum, 
 et urbs lustrata est. Minutius a Liguribus in extremum periculi adductus, uix 
 Numidarum industria liberatus est; Antiochus Hannibale sollicitante, bellum 
 contra Romanos suscepit, et in Hispania res feliciter gestae sunt. 

[53] LIII. L- Quintio Flaminio, Gn- Domitio Aenobarbo, coss-. 
 Capra sex hoedos uno foetu edidit in Piceno; Aretii puer natus unimanus; 
 Amiterni terra pluit; Formis porta murusque de coelo tacta; bos loquutus, "Roma 
 tibi caue;" ceterorum prodigiorum supplicatum est, bouem autem cum cura seruari, 
 alique aruspices iusserunt; Tyberis infestiore quam prius impetu illatus Urbi, 
 duos pontes, aedificia multa, et maxime circa portam Flumentanam euertit; saxum 
 ingens siue imbribus, siue terrae motu leuiore, quam alioqui sentiretur, 
 labefactatum, in uicum Iugarium ex Capitolio procidit, et multos oppressit; in 
 agris passim inundatis pecua ablata, uillarum strages facta est. Q- Minutius in 
 agro Pisano signum Liguribus signis collatis pugnauit, et nouem hostium milia 
 occidit, ceteros fusos fugatosque in castra compulit; Boiorum regio longe 
 lateque a Romanis uastata est; in utraque Hispania res feliciter gestae; contra 
 Vectones et Toletanos prospere pugnatum. Antiochus rex in Hellespontum cum magno 
 exercitu irrupit. 

[54] LIV. P- Cornelio Scipione Nasica, M- Attilio Glabrione, coss-. 
 Boues duo domiti in Carinis per scalas peruenerunt in tegulas aedificii, quos 
 aruspices uiuos comburi, cineremque eorum in Tyberim deiici iusserunt; 
 Tarracinae et Amiterni aliquoties lapidibus pluit; Minturnis Iouis templum et 
 tabernae circa forum de coelo tactae; Vulturni in ostio fluminis, duae naues 
 fulmine ictae conflagrarunt: eorum prodigiorum causa ieiunium Cereri est 
 institutum, item nouemdiale sacrum, et in unum diem supplicatio facta. Eo anno 
 contra Ligures, acerrimos hostes, prospere a Q- Minutio est pugnatum, 
 interfectis aliquot hostium millibus; duobus fere post mensibus, P- Cornelius 
 cum Boiorum exercitu signis collatis, duodetriginta hostium illia occidit, III 
 millia et quadraginta cepit, signa militaria CXXIV, equos MCCXXX; Attilius 
 Naupactum expugnauit; nauali proelio cum Eumene et Antiochi regis praefectis 
 prospere est pugnatum. 

[55] LV. L- Scipione, C- Laelio, coss-. 
 Iunonis Lucinae templum fulmine ictum, ita ut fastigium, ualuaeque 
 deformarentur; in finitimis pleraque de coelo icta; Nursiae sereno nimbi orti, 
 et homines duo exanimati; Tusculi terra pluit; mula Reate peperit: supplicatio 
 per decem pueros patrimos matrimos, totidemque uirgines habita. Aemilius 
 Regillus eo anno feliciter contra Antiochum pugnauit, et Antiochus ipse a 
 Scipione captus est. 

[56] LVI. M- Messala, C- Liuio, coss-. 
 Luce, inter horam tertiam et quartam, tenebrae ortae; in Auentino lapidum 
 pluuiae nouemdiali expiatae. In Hispania prospere militatum. Sacrum nouemdiale 
 factum, quod in Piceno lapidibus pluit; ignesque coelestes multifariam orti, 
 leui afflatu complurium uestimenta adusserunt; aedes Iouis in Capitolio fulmine 
 icta; in Umbria semimas duodecim ferme annorum natus, aruspicumque iussu 
 necatus. Galli, qui Alpes transierunt in Italiam, sine proelio eiecti. Foedus 
 est cum Antiocho conscriptum, et a Thracibus Romani uexati sunt. 

[57] LVII. M- Aemilio Lepido, C- Quintio Flaminio, coss-. 
 In Sicilia Vulcani insula saxosa, deserta, quae ex ternis crateribus flammas 
 eructabat, magna hominum admiratione nata est. Eodem anno Q- Fuluius Flaccus 
 praetor in Citeriore Hispania XXIII millia hominum fudit: Gracchus in Hispania 
 Ulteriore infinita oppida in deditionem accepit; Posthumius in Citeriore 
 Hispania feliciter etiam contra hostes pugnauit, ibidemque multa oppida 
 expugnauit etiam Gracchus. 

[58] LVIII. Sp- Posthumio Albino, Q- Martio Philippo, coss-. 
 Ludis Romanis quos P- Cornelius Cethegus et A. Posthumius Albinus faciebant, 
 malus in Circo instabilis in signum Pollentiae procidit, atque id deiecit: qua 
 religione moti patres, et diem unum adiiciendum ludorum celebritati, et signa 
 duo pro uno reponenda, nouumque auratum faciendum censuerunt. Gn- Manlius de 
 Gallograecis triumphauit, Asiaticas illecebras inuexit; in Hispania Lusitanorum 
 et Celtiberorum caedes sub idem fere tempus facta est. 

[59] LIX. M- Claudio, Q- Fabio Labeone, coss-. 
 In area Vulcani per biduum, in area Concordiae totidem diebus sanguinem pluit; 
 in Sicilia, insula noua maritima. Hannibal in Bithynia ueneno periit; Celtiberi 
 subiecti. Obierunt clarissimi imperatores, Scipio et Philippemenes. 

[60] LX. L- Aemilio Paulo, Cn- Bebio Pamphilo, coss-. 
 Procellosa tempestate strages in Urbe facta: signa aenea in Capitolio deiecit; 
 signa in Circo maximo cum columnis euertit; fastigia templorum aliquot a culmine 
 abrupta dissipauit: mulus tripes Reate natus; aedes Apollinis Caietae fulmine 
 ictae; in area Vulcani et Concordiae sanguinem pluit; hastae Martis motae; 
 Lanuuii simulacrum Iunonis Sospitae lacrymauit; pestilentiae Libitina non 
 sufficit: ex Sibyllinis supplicatum, quum sex mensibus non pluisset. Ligures 
 proelio uicti, deletique. Pestis Urbem et uillas inuasit, quae adeo urbem 
 exhausit, ut uix in Sardiniam contra defectionem Corsorum exercitus conscribi 
 potuerit. Sex mensibus nunquam pluit. 

[61] LXI. Q- Fuluio, Cn- Manlio, coss-. 
 Nimbis continuis in Capitolio signa aliquot deiecta; fulmine Romae et circa 
 plurima decussa. In lectisternio Iouis, terrae motu deorum capita se 
 conuerterunt; lana cum integumentis, quae Ioui erant apposita, decidit; de mensa 
 oleas mures praeroserunt. De Celtiberis triumphatum; res in Hispania feliciter 
 gestae; et cum Liguribus prospere pugnatum. 

[62] LXII. M- Iunio, Gn- Manlio, coss-. 
 Incendio circa forum quum plurima essent deusta, aedes Veneris sine ullo 
 uestigio cremata; Vestae penetralis ignis exstinctus; uirgo, iussu M- Aemilii 
 pontificiis maximi flagro caesa, negauit ulterius interiturum. Supplicationibus 
 habitis, in Hispania et Histria bella prospere administrata. 

[63] LXIII. C- Claudio Pulchro, T- Sempronio Graccho, coss-. 
 Lapis ingens in agro Crustumino in lacum Martis de coelo cecidit; puer trucis 
 corporis in agro Romano natus; anguis quadrupes uisus; Capuae multa in foro 
 aedificia de coelo tacta. Puteolis duae naues fulminis ictu concrematae; lupus 
 Romae interdum quum Collina porta intrasset, per Esquilinam magno consectantium 
 tumultu euasit; eorum prodigiorum causa, consules maiores hostias immolarunt, et 
 diem unum circa omnia puluinaria supplicatio fuit. Histrorum agri a Romanis 
 depopulati sunt; Nesatium oppidum a Iunio et Manlio oppugnatum; Mutila et 
 Faueria ui captae, et deletae; in Sardinia res prospere gestae; Ilienses et 
 Ligures sunt deuicti. In Crustumino auis, quam sanqualem uocant, sacrum lapidem 
 rostro portauit; bos in Campania loquutus; uacca aenea Syracusis ab agresti 
 tauro inita, ac semine aspersa: in Crustumino diem unum in ipso loco supplicatio 
 fuit, et in Campania bos alenda publice data; Syracusanumque prodigium expiatum, 
 editis ab aruspicibus diis, quibus supplicaretur; pontifex eo anno etiam mortuus est. 

[64] LXIV. C- Claudio, L- Petilio, coss-. 
 Quum immolassent uictimas consules, iecur extabuit; Cornelius ex monte Albano 
 rediens, membris captus ad aquas Cumanas mortuus; Petellius contra Ligures 
 dimicans occisus est. Fax in coelo uisa; Gabiis Apollinis templum et priuata 
 aedificia plura, Grauiscis murus portaque de coelo tacta; ea patres procurari, 
 uti pontifices censuissent, iusserunt. Ligures uicti, et Sempronius Sardos perdomuit. 

[65] LXV. M- Lepido, Q- Mucio, coss-. 
 Graui pestilentia hominum, boumque cadauera, non sufficiente Libitina, quum 
 iacerent, uulturius non apparuit. Celtiberi deleti. Et Basternarum genus 
 ferocissima, auctore Persa Philippi filio, sine ulla pugna, uel aliquo hoste, 
 euersa est. 

[66] LXVI. Sp- Posthumio Paulo, P- Mutio Sceuola, coss-. 
 In Veienti agro biceps puer natus, et Sinuessae unimanus. Oxini puella cum 
 dentibus; arcus interdum sereno coelo super aedem Saturni in foro Romano 
 intentus: tres simul soles effulserunt; faces eadem nocte plures per coelum 
 lapsae sunt in Lanuuino; apud Caerites anguis in oppido iubatus, aureis maculis 
 sparsus apparuit; in agro Campano bos loquutus, et in Sabinis terrae motus 
 ingens factus est. Karthaginienses eodem anno cum Graeciae urbibus aduersus 
 Romanos, Perseo sollicitante, conspirauerunt. 

[67] LXVII. L- Posthumio Albino, M- Popilio Lenate, coss-. 
 Lanuuii classis magnae species in coelo uisae; Priuerni lana pulla terra enata; 
 in Veienti apud Rementem lapidatum; Pomptinum omne uelut nubibus locustarum 
 cooperturm; in Gallico agro, qua induceretur aratrum, sub existentibus glebis 
 pisces emerserunt: ob haec prodigia libri fatales inspecti, et supplicatio 
 prodigiis expiandis facta. In Aetolia perniciosae seditiones propter ingentem 
 aeris alieni uim ortae. Perseus bellum in Romanos parauit; in Liguribus, in agro 
 Stellati pugnatum, ad oppidum Carystum, ubi decem millia hominum caesa sunt, 
 uincentibus Romanis. 

[68] LXVIII. C- Popilio Lenate, P- Aelio Ligo, coss-. 
 Saturniae sanguine per triduum in oppido pluit; Calatiae asinus tripes natus; 
 taurus cum quinque uaccis uno ictu fulminis exanimati; Oxini terra pluit: horum 
 prodigiorum causa supplicatio in unum diem instituta, et habitae feriae sunt. 
 Issensium agri hoc anno misere depopulati sunt: ac nihil memoratu dignum apud 
 Romanos eo tempore gestum est. 

[69] LXIX. Q- Martio Philippo II, Q- Seruilio Caepione, coss-. 
 Anagniae fax in coelo conspecta; bos femina loquuta; Minturnis per eos dies coeli 
 ardentis species affulsae; Reate pluit lapidibus; Cumis in arce Apollo triduum 
 ac tres noctes integras lacrymauit. Romae in aede Fortunae anguis iubatus a 
 compluribus uisus; palma in area enata; sanguine interdum pluit: Fregillis in 
 domo L- Atrei, hasta, quam filio militi emerat, interdum plus horas duas arsit, 
 ita tamen, ut nihil eius ambureret ignis: horum prodigiorum causa, post 
 supplicationem, uictimis maioribus circa omnia puluinaria facta sacrificia. 
 Perseus rex in Thracia feliciter pugnauit, uictis Dardanis, et subactis Illyriis. 

[70] LXX. Q- Aemilio Peto, M- Iulio, coss-. 
 Romae aliquot loca sacra, profanaque coelo tacta. Anagniae terra pluit; Lauinii 
 fax ardens in coelo uisa; Calatiae in agro publico per triduum et duas noctes 
 sanguis manauit. Rex Illyrici Gentius, et Macedoniae Perses, deuicti. 

[71] LXXI. M- Marcello, P- Sulpitio, coss-. 
 In Campania multis locis terra pluit; in Praenestino cruenti ceciderunt imbres; 
 Veienti lana ex arboribus nata; Terracinae in aede Mineruae mulieres tres, quae 
 operatae sedebant, fulmine exanimatae. Ad lucum Libitinae in statua equestri 
 aenea, ex ore et pede aqua manauit diu. Galli Ligures deleti. Comitia quum 
 ambitiosissime fierent, et ob hoc senatus in Capitolio haberetur, miluus uolans, 
 mustelam raptam de cella Iouis, in medio consessu patrum misit; sub idem tempus, 
 aedes Salutis de coelo tacta; in colle Quirinali sanguis terra manauit; Lanuuii 
 fax in coelo nocte conspecta; fulmine pleraque discussa; Cassini et sol per 
 aliquot horas noctis uisus. Theani Sidicini puer cum quatuor manibus, et totidem 
 pedibus natus. Urbe lustrata, pax domi forisque fuit. 

[72] LXXII. Cn- Octauio, T- Manlio, coss-. 
 Pestilentia fameque ita laboratum, ut ex Sibyllinis populus circa compita, 
 sacellaque operaturus sederit; in aede Penatium ualuae nocte sua sponte 
 adapertae, et lupi Exquiliis, et in Colle Quirinali meridie apparuerunt, 
 exagitatique fuerunt: Urbe lustrata, nihil triste accidit. 

[73] LXXIII. T- Graccho, M- Iuuentio, coss-. 
 Capuae noctae sol uisus; in agro Stellati fulgure ueruecum de grege pars 
 exanimata; Terracinae pueri trigemini nati; Formiis duo soles interdiu uisi; 
 coelum arsit; Concii homo ex speculo acie orta combustus; Gabiis lacte pluit; 
 fulmine pleraque decussa in Palatio; in templum Victoriae cygnus illapsus, per 
 manus capientium effugit; Priuerni puella sine manu nata; in Cephalenia turba in 
 coelo cantare uisa; terra pluit; procellosa tempestate tecta diruta, stragesque 
 agrorum facta; crebro fulminauit; nocte species solis Pisauri adfulsit; Caere 
 porcus humanis manibus et pedibus natus; et pueri quadrupedes, et quadrumanes 
 nati; ad forum Esii bouem flamma ex ipsius ore nata non laesit. 

[74] LXXIV. P- Scipione Nasica, Gn- Martio, coss-. 
 Anagniae coelum nocte arsit; fulmine pleraque decussa. Frusinone bos loquutus; 
 Reate mulus tripes natus. Gn- Octauius legatus in Syria per Lysiam, tutorem 
 Antiochi pueri, in gymnasio occisus. 

[75] LXXV. L- Lentulo, Q- Martio, coss-. 
 Procellosa tempestate in Capitolio aedes Iouis, et circa quassata; pontis maximi 
 tectum cum columnis in Tyberim deiectum; in circo Flaminio porticus inter aedem 
 Iunonis Reginae, et Fortunae tacta, et circa aedificia pleraque dissipata; 
 taurus ad immolationem quum duceretur, ob haec ipsa corruit. Dalmatae Scordis 
 superati. 

[76] LXXVI. L- Opimio, Q- Posthumio, coss-. 
 In prouinciam proficiscens Posthumius consul, quum immolaret, in plurimis 
 uictimis caput in iocinore non inuenit, profectusque, post diem septimum aeger 
 Romam relatus, exspirauit; Consae arma in coelo uolare uisa; fulmine pleraque 
 decussa. A Gallis, et a Lusitanis Romani per arma grauiter uexati. 

[77] LXXVII. M- Cl. Marcello, L- Valerio Flacco, coss-. 
 Turbinis ui in Campo columna ante aedem Iouis decussa, cum signo aurato; quumque 
 aruspices respondissent, magistratuum et sacerdotum interitum fore, omnes 
 magistratus se protinus abdicauerunt. Quod Ariciae lapidibus pluerat, ita 
 supplicatio habita; quod Romae multis locis species togarum uisae, 
 appropinquantium oculos eludebant. In Lusitania uarie, in Gallia prospere pugnatum. 

[78] LXXVIII. Spurio Posthumio, L- Pisone, coss-. 
 Vasto incendio Romae quum regia quoque ureretur, sacrarium, et ex duabus altera 
 laurus, ex medis ignibus inuiolatae steterunt. Pseudophilippus deuictus. 

[79] LXXIX. P- Africano, et Laelio, coss-. 
 Amiterni puer tribus pedibus, una manu natus; Romae et circa fulmine plerique 
 icta; Caere sanguinis riui terra fluxerunt, et nocte coelum ac terra ardere 
 uisum; Frusinone aurum sacrum mures adroserunt; Lanuuii inter horam tertiam et 
 quintam duo discolores circuli solem cinxerunt, rubente alter, alter candida 
 linea; stella arsit per dies triginta duos. Et quum Carthago obsideretur, in 
 captiuos Romanorum per Hasdrubalem barbaro more saeuitum. Mox Carthago per 
 Aemilianum diruta. 

[80] LXXX. Appio Claudio, P- Metello, coss-. 
 Amiterni puer tribus pedibus natus; Caurae sanguinis riui e terra fluxerunt. 
 Quum a Salassis illata clades esset Romanis, decemuiri pronuntiauerunt, se 
 inuenisse in Sibyllinis, quoties bellum Gallis illaturi essent, sacrificari in 
 eorum finibus oportere. 

[81] LXXXI. L- Metello, Q- Fabio Maximo, coss-. 
 Fames et pestilentia quum essent, per decemuiros supplicatum; Lunae androgynus 
 natus, praecepto aruspicum in mare deportatus; tanta fuit Lunensibus 
 pestilentia, ut iacentibus in publicum passim cadaueribus, qui funerarent, 
 defuerint. In Macedonia exercitus Romanus proelio uexatus; aduersus Viriatum 
 dubie dimicauit. 

[82] LXXXII. Gn- Caepione, C- Laelio, coss-. 
 Praeneste et in Cephalenia signa de coelo cecidisse uisa; mons Aetna ignibus 
 abundauit; prodigium maioribus hostiis quadraginta expiatum. Annus pacatus fuit, 
 Viriato uicto. 

[83] LXXXIII. M- Aemilio, C- Hostilio Mancino, coss-. 
 Quum Lanuii auspicarentur, pulli e cauea in siluam Laurentinam euolarunt, neque 
 inuenti sunt. Praeneste fax ardens in coelo uisa. Sereno intonuit. Tarracinae 
 M- Claudius praetor in naue fulmine conflagrauit. Lacus Fucinus per millia 
 passuum quinque quoquouersum inundauit. In Graecostasi, et comitio, sanguine 
 fluxit. Exquiliis equuleus cum quinque pedibus natus. Fulmine pleraque decussa. 
 Hostiliius Mancinus consul in portu Herculis quum conscenderet nauem, petens 
 Numantiam, uox improuiso audita: "Mane Mancine." Quumque egressus, postea nauem 
 Genuae conscendisset, anguis in naui inuentus, e manibus effugit; ipse consul 
 deuictus, mox Numantinis deditus. 

[84] LXXXIV. L- Furio, Atilio Serrano, coss-. 
 Rhegium paene totum incendio consumptum sine ullo humanae fraudis, aut 
 negligentiae uestigio. Puer ex ancilla quatuor pedibus, manibus, oculis, 
 auribus, et duplici obsceno natus. Puteolis in aquis calidis riui manarunt 
 sanguine. Fulmine pleraque deiecta. Puer aruspicum iussu crematus, cinisque eius 
 in mare deiectus. Ab Achaeis exercitus Romanus caesus. 

[85] LXXXV. Seruio Flacco, Q- Calpurnius, coss-. 
 Mons Aetna maioribus solito arsit ignibus. Romae puer solidus posteriore naturae 
 parte genitus. Bononiae fruges in arboribus natae. Bubonis uox primum in 
 Capitolio, dein circa urbem audita. Quae auis, praemio posito, ab aucupe capta, 
 combustaque; cinis eius in Tyberim dispersus. Bos loquutus. In Numantia res male 
 gestae; exercitus Romanus oppressus. 

[86] LXXXVI. P- Africano, C- Fuluio, coss-. 
 In Amiterno sol noctu uisus, eiusque lux aliquanditerum fuit uisa. Bos loquutus, 
 et nutritus publice. Sanguine pluit. Anagniae suo tunica arsit, et intermortuo 
 igne, nullum flammae apparuit uestigium. In Capitolio nocte auis gemitus similes 
 hominis dedit. In aede Iunonis Reginae scutum Ligusticum fulmine tactum. 
 Fugitiuorum bellum in Sicilia exortum. Coniuratione seruorum Italia oppressa. 
 Tiberius Gracchus legibus ferendis occisus. Proditum est memoriae, Tiberium 
 Gracchum, quo die periit, tristia neglexisse omina, quum domi, et in Capitolio 
 sacrificanti dira portenderetur, domoque exiens, sinistro ad limen offenso pede, 
 decusserit pollicem, et corui fragmentum tegulae ante pedes eius proiecerunt ex 
 stillicido. In lacu Romano lacte riui manarunt. Lunae terra quatuor iugerum 
 spatio in profundum abiit, et mox de cauerna lacum reddidit. Ardeae terra pluit. 
 Minturnis lupus uigilem laniauit, et inter tumultum effugit. Romae bubo et alia 
 auis ignota uisa. In aede Iunonis Reginae, clausis per biduum ualuis, infantis 
 uox audita. Scuta nouo sanguine maculata. Puella quadrupes nata. In agro 
 Ferentino androgynus natus, et in flumen deiectus. Virgines ter nouenae 
 canentes, Urbem lustrauerunt. In Italia multa millia seruorum, quae 
 coniurauerunt, aegre comprehensa, et supplicio consumpta. In Sicilia fugitiui 
 Romanos exercitus necauerunt. Numantia diruta. 

[87] LXXXVII. Appio Claudio, M- Perpenna, coss-. 
 Reate mulus cum quinque pedibus natus. Romae in Graecostasi lacte pluit. Lupus 
 et canis Ostiae pugnantes, fulmine exanimati. Grex ouium in Apulia; praetor 
 populi Romani uno ictu fulmine exanimatus. Terracinae sereno nauis uelum fulmine 
 tactum, in aquas deiectum; et impensas omnes, quae ibi erant, ignis absumpsit. 
 Publius Crassus aduersus Aristonicum dimicans, occisus. Apollinis simulacrum 
 lacrymauit per quatriduum. Vates portenderunt, Graeciae fore exitium, unde 
 deductum esset. Sacrificatum tum a Romanis, donaque in templo posita. Phrygia 
 recepta. Asia Attali testamento legata Romanis. Antiocho, regi Syriae, ingenti 
 exercitu dimicanti, hirundines in tabernaculo nidum fecerunt: quo prodigio 
 neglecto, proelium commisit, et a Parthis occisus est. M- Fuluii Flacci 
 triumuiri dissensione in legibus ferendis, angues duo nigri in cella Mineruae 
 allapsi, ciuilem cladem portenderunt. 

[88] LXXXVIII. Cn- Octauio, T- Annio Rufo, coss-. 
 Multa intra et extra Urbem de coelo tacta. Reate mula peperit. Frusinone ex 
 ancilla puer biceps natus, fax ardens in coelo uisa, et bubonis uox in urbe 
 audita. Caere sanguine pluit, ac gallus gallinaceus quinque pedibus inuentus. 
 Bella inter Antiochum, Syriae regem, et Phraartem, Parthorum regem, gesta sunt. Et 
 res turbidae Aegypitorum: Ptolemaeus enim Euergetes, ob nimiam crudelitatem suis 
 inuisus, incensa a populo Rom. regia, clam in Cyprum profugit. Et, quum sorori 
 eius Cleopatrae, quam eius filia uirgine per uim compressa, et in matrimonium 
 ducta, repudiauerat, regnum a populo datum esset, infensus, filium, quem ex ea 
 habebat, in Cypro occidit, caputque eius, manus item et pedes, matri misit. 

[89]  LXXXIX. M- Aemilio, Lucio Aurelio, coss-. 
 Nocturna tempestate in Capitolio aliquot templa concussa sunt. Romae et circa, 
 fulmine pleraque deiecta sunt. Aetna mons terrae motu ignes super uerticem late 
 diffudit, et ad insulam Liparas mare efferbuit, et quibusdam adustis nauibus 
 uapore plerosque nauales exanimauit: piscium uim magnam exanimem dispersit, quos 
 Liparenses auidius epulis appetentes, contaminatione uentris consumpti, ita ut 
 noua pestilentia uastarentur insulae. Quod prodigium aruspicum responso, 
 seditionem, quae post tempora patuit, portendit. 

[90] XC. P- Plautio, M- Fuluio, coss-. 
 In arboribus fruges natae sunt. Oleo et lacte in Veiente pluit. Bubo in 
 Capitolio uisus. Arpis lapideus imber triduo apparuit. Locustarum ingentia 
 agmina in Africa, quae a uento in mare deiectae, fluctibusque eiectae, odore 
 intolerabili Cyrenis mortifero uapore grauem pestilentiam fecerunt pecori; 
 hominumque DCCC millia consumpta tabe, proditum est. Fregellae, quae aduersus 
 Romanos coniurauerunt, dirutae. Ligures Sallyes trucidati. 

[91] XCI. C- Cassio Longino, C- Sextilio, coss-. 
 In Graecostasi lacte pluit; fulmine Crotonae grex ouium cum cane, et tribus 
 pastoribus exanimatus; Saturae uitulus biceps natus. Tumultus in Urbe fuit, 
 Graccho leges ferente. 

[92] XCII. Cn- Domitio, C- Fannio, coss-. 
 In foro Vessano androgynus natus, in mare delatus est; in Gallia tres soles, et 
 tres lunae uisae; uitulus biceps natus; bubo in Capitolio uisus, et ex 
 incendio catena consumpta. Sallyes et Allobroges deuicit. 

[93] XCIII. L- Opimio, Q- Fabio Maximo, coss-. 
 Grex luporum limites, qui in agrorum diuisione per C- Gracchum depositi erant, 
 dissipauit. Ipse Gracchus in Auentino occisus. 

[94] XCIV. L- Aurelio, et L- Caecilio, coss-. 
 Androgynus in agro Romano annorum octo inuentus, et in mare deportatus; uirgines 
 ter nouenae in Urbe cantarunt. 

[95] XCV. M- Catone, Q- Martio, coss-. 
 Catone consule immolante exta tabuerunt; caput iocinoris inuentum non est; lacte 
 pluit; terra cum mugitu tremuit; examen apum in foro consedit. Sacrificium ex Sibyllinis. 

[96] XCVI. L- Caecilio, L- Aurelio, coss-. 
 Fulmine Romae et circa pleraque tacta; Praeneste lacte pluit; hastae Martis in 
 regia motae; Priuerni terra septem iugerum spatio in cauerna desedit; Saturniae 
 androgynus annorum decem inuentus, et mari demersus: uirgines uiginti septem 
 urbem carmine lustrauerunt. Reliquum anni in pace fuit. 

[97] XCVII. M- Acilio, C- Portio, coss-. 
 Pompeius Eluius, eques Romanus, a ludis Romanis, quum in Apulia reuerteretur, in 
 agro Stellati filia eius uirgo, equo insidens, fulmine icta, exanimataque. 
 Vestimento deducto, in inguinibus exerta lingua per inferiores locos, ut ignis 
 ad os emicuerit: responsum, infamiam uirginibus et equestri ordini portendi, 
 quia equi ornamenta dispersa erant: tres uno tempore uirgines uestales 
 nobilissimae cum aliquot equitibus Romanis incesti poenas subierunt: aedes 
 Veneri Verticordiae facta. 

[98] XCVIII. C- Caecilio, Gn- Papyrio, coss-. 
 Albanus mons nocte ardere uisus; aedicula et signum de coelo tacta; ara Salutis 
 interrupta; terra in Lucanis et Priuernati late hiauit; in Gallia coelum ardere 
 uisum. Cimbri, Teutonique Alpes transgressi, foedam stragem Romanorum 
 sociorumque fecerunt. 

[99] XCIX. P- Scipione, L- Calpurnio, coss-. 
 Maxima pars Urbis exusta cum aede Matris Magnae; lacte per triduum pluit, 
 hostiisque expiatum maioribus. Iugurthinum bellum exortum. 

[100] C. C- Sergio Galba, M- Scauro, coss-. 
 Auis incendiaria, et bubo, in Urbe uisae; in latomiis homo ab homine adesus; ex 
 Sibyllinis in insula Cimolia sacrificatum per triginta ingenuos patrimos et 
 matrimos, totidemque uirgines; multa millia hominum, intumescente Pado, et 
 stagno Arretino obruta; bis lacte pluit; Nursiae gemini ex muliere ingenua nati, 
 puella integris omnibus membris, puer a parte priore, aluo aperto, ita ut nudum 
 intestinum conspiceretur, idem posteriore natura solidus natus, qui uoce missa 
 exspirauit. Contra Iugurtham prospere dimicatum. 

[101] CI. Q- Seruilio Caepione, Atilio Serrano, coss-. 
 Amiterni quum ex ancilla puer nasceretur, Aue dixit. In agro Perusino, et Romae 
 locis aliquot, lacte pluit; inter multa fulmine icta, Atellis digiti hominis 
 quatuor tanquam ferro praecisi; argentum signatum afflatu fulminis diffluxit; in 
 agro Trebulano mulier nupta ciui Romano, fulmine icta, nec exanimata; fremitus 
 coelestis auditus, et pila coelo cadere uisa; sanguine pluit; Romae interdum fax 
 sublime uolans conspecta; in aede Larum flamma a fastigio ad summum columen 
 penetrauit innoxia. Per Caepionem consulem senatorum et equitum iudicia 
 communicata. Cetera in pace fuerunt. 

[102] CII. P- Atilio, et Corn. Manlio, coss-. 
 Trebulae Mutuscae ante quam ludi committerentur, canente tibicine, angues nigri 
 aram circumdederunt; desinente cantare, dilapsi; postero die exorti, a populo 
 lapidibus enecati; foribus templi adapertis, simulacrum Martis ligneum 
 capite stans inuentum. A Lusitanis exercitus Romanus caesus. 

[103] CIII. C- Mario, C- Flacco, coss-. 
 Bubo extra Urbem uisus; bos loquuta: Trebulae Mutuscae simulacrum in templo, quod 
 capite adoperto fuit, opertum inuentum; Nuceriae ulmus uento euersa, sua sponte 
 erecta in radicem, conualuit; in Lucanis lacte, Lunae sanguine pluit; Arimini 
 canis loquutus; arma coelestia, tempore utroque ab ortu et occasu uisa pugnare, 
 et ab occasu uinci; aruspicum responso, populus stipem Cereri et Proserpinae 
 tulit: uirgines uiginti septem dona canentes tulerunt; luna interdum cum stella, 
 ab hora tertia usque horam septimam, apparuit. A fugitiuis et desertoribus in 
 Thurinis regiones uastatae; Cimbri Alpes transgressi per Hispaniam uastatam, 
 iunxerunt se Teutonis. Lupus Urbem intrauit; fulminis ictu uultures super turrem 
 exanimati; hora diei tertia, solis defectus lucem obscurauit; examen apum ante 
 aedem Salutis consedit; in Comitio lacte pluit; in Piceno tres soles uisi; in 
 agro flamma e terra orta, coelumque uisa contingere; in Lucanis duo agni equinis 
 pedibus nati, alter siminino capite; in tarquiniensi lactis riui terra 
 scaturienti exorta: aruspicum responso signa oleaginea duo armata statuta; 
 supplicatumque. In Macedonia Thraces subacti. 

[104] CIV. C- Mario. Q- Luctatio, coss-. 
 Nouemdiale sacrum fuit, quod in Thuscis lapidibus pluerat; Urbs aruspicum iussu 
 lustrata; hostiarum cinis per decemuiros in mare dispersus, et per dies nouem 
 circa omnia templa per magistratus, et municipia, pompa ducta supplicatum; 
 hastae Martis in regia, sua sponte motae sanguine circa amnem Anienem pluit; 
 examen apum in foro Boario, in sacello consedit; in Gallia, in castris lux nocte 
 fulsit; puer ingenuus Ariciae flamma comprehensus, nec ambustus; aedes Iouis 
 clausa fulmine icta, cuius expiationem, quia prius monstrauerat Aemilius 
 Potensis aruspex, praemium tulit, ceteris celantibus, quod ipsis liberisque 
 exitium portenderetur. Piratae in Sicilia a Romanis deleti; Teutoni a Mario 
 trucidati. Ancilia cum crepitu sua sponte mota, seruusque Seruilii Caepionis 
 Matri Idaeae se praecidit, et trans mare exportatus, ne unquam Romae 
 reuerteretur. Urbs lustrata, capra cornibus ardentibus per urbem ducta, porta 
 Naeuia emissa, relictaque; in Auentino luto pluit. Lusitanis deuictis, Hispania 
 Ulterior pacata; Cimbri deleti. 

[105] CV. C- Mario, L- Valerio, coss-. 
 Fax ardens Tarquiniis late uisa, subito lapsu cadens; sub occasu solis, orbis 
 clypei similis ab occidente ad orientem uisus praeferri; in Piceno terrae motu 
 domicilia ruinis prostrata; quaedam conuulsa sede sua, inclinata manserunt; 
 fremitus armorum ex inferno auditus; quadrigae auratae in foro a pedibus 
 sudauerunt. Fugitiui in Sicilia proeliis trucidati. 

[106] CVI. M- Antonio, A. Posthumio, coss-. 
 Bubone in urbe uiso, Urbs lustrata: nimbis et procella plurima dissipata, 
 fulmine pleraque tacta; Lanuuii in aede Iunonis Sospitae, in cubiculo deae 
 sanguinis guttae uisae; Nursiae aedes sacra terrae motu disiecta. Lusitani 
 rebellantes subacti. Sextius, tribunus plebis, de agris diuidendis populo quum, 
 repugnantibus collegis, pertinaciter legem ferret, corui duo numero in alto 
 uolantes, ita pugnauerunt supra concionem, ut rostris unguibusque lacerarentur. 
 Aruspices sacra Apollinis litanda, et de lege, quae ferebatur, supersedendum, 
 pronuntiarunt. Fremitus ab inferno ad coelum ferri uisus inopiam famemque 
 portendit; populus stipem, matronae thesaurum et uirgines dona Cereri et 
 Proserpinae tulerunt; per uirgines uiginti septem cantiatum. Signa cupressea duo 
 Iunoni Reginae posita. In Lusitania prospere a Romanis pugnatum. 

[107] CVII. Q- Metello, Tullio Didio, coss-. 
 Bubone in Capitolio supra deorum simulacra uiso, quum piaretur, taurus uictima 
 exanimis concidit. Fulmine pleraque decussa. Hastae Martis in regia motae. Ludis 
 in theatro, creta candida pluit: fruges et tempestates portendit bonas. Sereno 
 tonuit. Apud aedem Apollinis decemuiris immolantibus, caput iocinoris non fuit: 
 sacrificantibus anguis ad aram inuentus. Item androgynus in mare deportatus. In 
 Circo inter pila militum ignis fusus. Hispani pluribus proeliis deuicti. 

[108] CVIII. Cn- Cornelio Lentulo, P- Licinio, coss-. 
 Supplicatum in Urbe, quod androgynus inuentus, et in mare deportatus erat. 
 Pisauri terrae fremitus auditus. Muri pinnae sine terrae motu, passim deiectae, 
 ciuiles portendere discordias. Nursiae simulacrum Iouis in partem sinistram 
 conuersum. Cupressea simulacra Iunonis Reginae posita per uirgines uiginti 
 septem, quae Urbem lustrauerunt. Celtiberi, Medi, Dardani subacti. 

[109] CIX. Cneo Domitio, Caio Cassio, coss-. 
 Lupus Urbem ingressus, in domo priuata occisus. Bubo in Capitolio occisus. 
 Fulmine pleraque decussa. Signa aurata Iouis cum capite columnaque disiecta. 
 Faesulis sanguine terra manauit. Arretii mulieri e naso spica farris natae: 
 eadem farris grana uomuit. Urbe lustrata, Ptolemaeus, rex Aegypti, Cyrenis 
 mortuus, S. P- Q- Romanum haeredem reliquit. 

[110] CX. P- Crasso, Q- Scaeuola, coss-. 
 Caere lacte pluit. Lebadiae Eutychides in templum Iouis Trophonii digressus, 
 tabulam aeneam extulit, in qua scripta erant, quae ad res Romanas pertinerent. 
 Fulminis afflatu pleraque animalia exanimata. Venafri hiatu terra alte subsedit. 
 Vultures canem mortuum laniantes, occisi ab aliis et comesi uulturibus. Agnus 
 biceps, puer tribus manibus, totidemque pedibus natus; ac hastae Martis in regia 
 motae. Androgynus Urbino natus, in mare deportatus. Pax domi forisque fuit. 

[111] CXI. C- Laelio, L- Domitio, coss-. 
 Nouemdiale sacrum fuit, quod in Volsca gente lapidibus pluit. Vulsiniis luna 
 noua decidit, et non nisi postero die ora tertia comparuit. Puella biceps, 
 quadripes, quadrimana, gemina feminea natura, mortua nata. Auis incendiaria 
 uisa, occisaque. In Vestinis, in uilla lapidibus pluit. Fax in coelo apparuit, 
 et totum coelum ardere uisum. Terra sanguine manauit, et concreuit. Canes saxa, 
 tegulas uulgo roserunt. Faesulis ingens multitudo inter sepulcra lugubri ueste, 
 pallida facie, interdum ambulare gregatim uisa. Per Nasicam Hispaniae 
 principes, qui rebellabant, supplicio consumpti, urbibus dirutis. 

[112] CXII. C- Valerio, M- Herennio, coss-. 
 Romae et circa, fulmine pleraque decussa. Ancilla puerum unimanum peperit. 
 Fregellis aedes Neptuni nocte patefacta. Maris uituli quum exta demerentur, 
 gemini uitelli in aluo eius inuenti. Arretii signum aeneum Mercurii sudauit. In 
 Lucanis gregem ueruecum, quum pasceretur, et nocte in stabulo flamma circumdata 
 nihil adussit. Carseolis torrens sanguinis fluxit. Lupi urbem ingressi. 
 Praeneste lana uolitauit. In Apulia mula peperit. Miluus in aede Apollinis Romae 
 comprehensus. Herennio consuli bis immolanti, caput iocinoris defuit. In sacro 
 nouemdiali coena deae posita, a cane adesa ante quam delibaretur. Vulsiniis 
 prima luce flamma coelo emicare uisa, quum in unum coisset, os flammae 
 ferrugineum ostendit. Coelum uisum descendere, cuius hiatu uertices flammae 
 apparuerunt. Lustrationibus prospere expiatum: nam totus annus domi forisque 
 tranquillus fuit. 

[113] CXIII. C- Claudio, M- Perpenna, coss-. 
 Bubo in aede Fortunae equestris comprehensus, inter manus exspirauit. Faesulis 
 fremitus terrae auditus. Puer ex ancilla natus sine foramine naturae, qua humor 
 emittitur. Mulier duplici natura inuidia. Fax in coelo uisa. Bos loquuta. Examen 
 apum in culmine priuatae domus consedit. Volaterris sanguinis riuus manauit. 
 Romae lacte pluit. Arreti duo androgyni inuenti. Pullus gallinaceus quadripes 
 natus. Fulmine pleraque icta. Supplicatio fuit. Populus Cereri et Proserpinae 
 stipem tulit. Virgines uiginti septem carmen canentes Urbem lustrauerunt. 
 Medorum in Macedonia genus prouinciam cruente uastauit. 

[114] CXIV. L- Martio, Sexto Iulio, coss-. 
 Libius Troso, P- Tarquinius, leges ferentes, quum bellum Italicum consurgeret, 
 prodigia multa apparuerunt Urbi. Sub ortu solis, globus ignis a septentrionali 
 regione cum ingenti sono coeli emicuit. Arreti frangentibus panes cruor e mediis 
 fluxit. In Vestinis per dies septem lapidibus testisque pluit. Aenariae terrae 
 hiatu flamma exorta in coelum emicuit. Circa Rhegium terrae motu, pars urbis 
 murique diruta. In Spoletino colore aureo globus ignis ad terram deuolutus, 
 maiorque factus, e terra ad orientem ferri uisus, magnitudinem solis obtexit. 
 Cumis in arce simulacrum Apollinis sudauit. Aedes Pietatis in circo Flaminio 
 clausa fulmine icta. Asculo per ludos Romani trucidati. Quum ex agris in urbem 
 pecora, armentaque Latini agerent, strages hominum passim facta, armenta in 
 tantam rabiem concitata sunt, ut uastando suos hostile imaginarentur bellum; 
 lacrymantesque multis affectibus calamitatem praesagirent suis. 

[115] CXV. L- Iulio Caesare, P- Rutilio, coss-. 
 Metella Caecilia somnio Iunonem Sospitam profugientem, quod immunde sua templa 
 foedarentur, quum suis precibus aegre reuocatam diceret, gregem matronarum 
 sordidis obscenisque corporis coinquinatum ministeriis, in quo etiam sub 
 simulacro deae cubile canis confoetuerat, commundatum supplicationibus habitis, 
 pristino splendori restituit. A Picentibus Romani barbaro more excruciati: 
 ubique in Lati clades accensa. Lucilius Lupus, spretis religionibus, quum in 
 extis caput non inuenisset iocinoris, amisso exercitu in proelio occisus. 

[116] CXVI. L- Sulla, Q- Pompeio, coss-. 
 Pompeius Sylo in oppidum Bouianum, quod ceperat, triumphans inuectus, omen 
 uictoriae hostibus ostendit: quia triumphus in urbem uictricem, non uictam, 
 induci solet. Proximo proelio, amisso exercitu occisus. Mithridati, aduersus 
 socios bellum paranti, prodigia apparuerunt. Stratopedo, ubi senatus haberi 
 solet, corui uulturem tundendo rostris occiderunt. In eumdem locum sidus ingens 
 coelo demissum. Isidis species uia fulmine petere. Lucum Furiarum quum 
 Mithridates succenderet, risus exauditus ingens, sine auctore. Quum aruspicum 
 iussu uirginem Furiis immolaret, e iugulo puellae risus ortus turbauit 
 sacrificium. Classis Mithridatis in Thessalia a Romanis in proelio amissa. Cinna 
 et Mario per bella ciuilia crudeliter saeuientibus Romae, in castris Gnei 
 Pompeii coelum ruere uisum, arma signaque tacta, milites exanimati. Ipse 
 Pompeius afflatus sidere interiit. Lectum eius populus diripuit, corpus unco 
 traxit, quod discrimine ciuili perseuerasset periclitanti patria non succurrere; 
 quum et imperium et maximos haberet exercitus. Peiraeum Sulla quum oppugnaret, 
 unus miles eius aggerem ferens, exanimatus fulmine. Aruspex respondit, diuturno 
 labore, quod caput iacentis in oppidum uersum esset, introitum et uictoriam 
 Romanis significare. Post breue tempus Athenae et Peiraeum a Sulla capta. Ilio a 
 C- Fimbria incenso, quum aedes quoque Mineruae deflagrasset, inter ruinas 
 simulacrum antiquissimum inuiolatum stetit, spemque restitutionis oppido 
 portendit. In agro Mutinensi duo montes inter sese concurrerunt, crepitu maximo 
 assultantes, recedentesque, inter eos flamma fumoque in coelum exeunte. Eo 
 concursu uillae omnes elisae, animaliaque multis, quae intra fuerant, exanimata 
 sunt. Exarsit eo anno sociale bellum, quod haud scio an funestius terrae Italiae 
 fuerit, quam ciuile. In eo autem bello L- Cornelius Sulla quum in agro Nolano 
 ante praetorium immolaret, subito ab una parte arae anguis prospexit: qua uisa, 
 Posthumi aruspicis hortatu, continuo exercitum in expeditionem eduxit, ac 
 fortissima Samnitum castra cepit, quae uictoria futurae eius amplissimae 
 potentia exstitit. 

[117] CXVII. Cn- Octauio, L- Cornelio Cinna, coss-. 
 Simulacro Apollinis caput sine ulla euidenti causa decidit: quod inuentum est 
 humi adeo infixum, ut summis etiam uiribus auelli non potuerit. Quod uidens 
 Octauius, licet exitium suum significari intellexit, uitare tamen non potuit. 
 Quo tamen crudeliter interfecto, dei caput immobile terra demum refigi potuit. 

[118] CXVIII. L- Scipione, C- Norbano, coss-. 
 Per Sullana tempora, inter Capuam et Vulturnum, ingens signorum sonus armorumque 
 horrendo clamore auditus, ita ut uiderentur duae acies concurrere per plures 
 dies. Rei miraculo intus considerantibus, uestigia equorum hominumque, et 
 recentes protritae herbae, et uirgulta uisa molem ingentis belli portendere. In 
 Hetruria Clusii, mater familiae uiuum serpentem peperit, qui iussu aruspicum in 
 profluentem deiectus, auersa aqua natauit. Lucius Sulla, post quintum annum 
 uictor in Italiam reuersus, magno terrori fuit inimicis. Aeditui Capitolium una 
 nocte conflagrauit. Sullae crudelitate foeda proscriptio principum fuit. Centena 
 millia hominum consumpta Italico ciuilique bello relata sunt. 

[119] CXIX. M- Aemilio, De. Bruto, coss-. 
 Didius Laelius, legatus Pompeii (cui prodigium Romae erat factum, in lecto 
 uxoris duo angues conspecti, in diuersumque lapsi: proxime Pompeio in castris 
 sedenti, accipiter super caput accesserat), in Hispania aduersus Sertorium, 
 inter pabulatores, occisus. 

[120] CXX. Cneo Octauio, C- Scribonio, coss-. 
 Reate terrae motu aedes sacrae in oppido, agrisque commotae. Saxa, quibus forum 
 stratum erat, discussa. Pontes interrupti. Ripae labentis fluminis in aquam 
 prouolutae. Fremitus inferni exauditi. Et post paucos dies, quae concussa erant, 
 corruerunt. Saxum uiuum quum prouolueretur, in praecipiti rupe immobile stetit. 
 A Sertorio in Hispania exercitus Romani caesi. Aduersum Medos uarie dimicatum. 

[121] CXXI. L- Aurelio, L- Octauio, coss-. 
 Sertorio in Hispania exercitum ducenti tale prodigium est factum. Scuta equitum 
 parte exteriore, iaculaque, et pectora equorum cruenta uisa: quod prosperum sibi 
 interpretatus est Sertorius, quia exteriora hostili sanguine maculari solent. 
 Continua ei proelia cum successu fuerunt. Cyzicum Mithridates quum oppugnaret, 
 Aristagorae, qui in summo magistratu erat, Proserpina in quiete uisa est dicere, 
 aduersus tibicines, se tibicinem comparasse. Postero die turres hostium uento 
 disiectae sunt. Ad immolandum bos sacra iniussa de montibus per hostium classem 
 adnatauit, seque ad aras percutiendam obtulit. 

[122] CXXII. M- Cesone, Gaio Antonio, coss-. 
 Fulmine pleraque decussa. Sereno Vargunteius Pompeius de coelo exanimatus. 
 Trabes ardens ab occasu ad coelum extenta. Terrae motu Spoletum totum concussum, 
 et quaedam corruerunt. Inter alia relatum, biennio ante in Capitolio lupam Remi 
 et Romuli fulmine ictam, signumque Iouis cum columna disiectum, aruspicum 
 responso in foro repositum. Tabulae legum aeneae litteris liquefactis. Ab his 
 prodigiis Catilinae nefaria conspiratio coepta. 

[123] CXXIII. Quinto Metello, L- Afranio, coss-. 
 Die toto ante sereno, circa horam undecimam nox se intendit, deinde restitutus 
 fulgor. Turbinis ui tecta deiecta: ponte sublapso, homines in Tiberim 
 praecipitati. In agris pleraeque arbores euersae radicitus. Lusitani, Gallaeque 
 deuicti. 
 M- Cicerone, Gaio Antonio, coss-. 
 Quum in agro Pistoriensi Catilinam deuicisset, laureatos fasces in prouinciam 
 tulit: ibi a Dardanes oppressus, amisso exercitu profugit. Apparuit eum hostibus 
 portendisse uictoriam, quum ad eos laurum uictricem tulerit, quam in Capitolio 
 debuerat deponere. Lupi in Urbe uisi; nocturni ululatus flebiles canum auditi; 
 simulacrum Martis sudauit; fulmen tota Urbe peruagatum, pleraque deorum 
 simulacra decussit, homines exanimauit. Urbs lustrata. Propter dictaturam 
 Pompeii ingens seditio in Urbe fuit. 

[124] CXXIV. Gn- Domitio, Appio Claudio, coss-. 
 M- Crassus ad Parthos profectus, quum Euphratem transiret, multa prodigia 
 neglexit. Quum etiam coorta tempestas, signifero signum arreptum mersisset 
 gurgiti, et offendente nimborum caligine prohiberentur transire, pertinaciter 
 perseuerans, cum filio et exercitu interiit. 

[125] CXXV. L- Paulo, C- Marcello, coss-. 
 Mula pariens, discordiam ciuium, bonorum interitum, mutationem legum, turpes 
 matronarum partus significauit. Incendium, quo maxima pars Urbis deleta est, 
 prodigii loco habitum. Inter Caesarem et Pompeium bella ciuilia exorta. Aduersus 
 Caesarem Pompeius Macedonia quum inuitatis gentibus amicis instrueret aciem, a 
 Dyrrachio uenientibus, aduersa fuerunt fulmina; examen apum in signis portendit. 
 Nocturni terrores in exercitu fuere. Ipse Pompeius pridie pugnae die uisus in 
 theatro suo ingenti plausu excipi; mox acies uictus, in Aegypto occisus. Eo ipso 
 die plerisque locis signa sua sponte conuersa. Clamorem crepitumque armorum 
 Antiochiae bis, ut curreretur in muros, auditum, indeque sonum tympanorum 
 Pergami. Palma uiridis Trallibus in aede Victoriae, sub Caesaris statua inter 
 coagmenta lapidum magnitudine mature enata. C- Cornelius augur Patauii eo die, 
 quum aues admitterent, proclamauit, rem geri, et uincere Caesarem. 

[126] CXXVI. C- Caesare, M- Lepido, coss-. 
 Decimae legionis aquilae, Gn- Pompeii filio, quae fulmina tenebant, uisae 
 dimittere, et in sublime auolare: ipse adolescens Pompeius uictus, et fugiens occisus. 

[127] CXXVII. C- Caesare, M- Antonio, coss-. 
 Caesari dictatori exta sine corde inuenta. Calpurnia uxor somniauit, fastigium 
 domus, quod sicut erat adiectum, ruisse. Nocte, quum ualuae cubili clausae 
 essent, sua sponte apertae sunt, ita ut lunae fulgore, qui introuenerat, 
 Calpurniae excitaretur. Ipse Caesar uiginti tribus uulneribus in curia Pompeiana 
 a coniuratis confossus. 

[128] CXXVIII. M- Antonio, P- Dolabella, coss-. 
 C- Octauius testamento Caesaris patris Brundusii se in Iuliam gentem adsciuit: 
 quumque hora diei tertia ingenti circumfusa multitudine Romam intraret, sol puri 
 ac sereni coeli orbe modico inclusus, extremae lineae circulo, qualis tendi 
 arcus in nubibus solet, eum circumscripsit. Ludis Veneris Genetricis, quos pro 
 collegio fecit, stella, hora undecima, crinita, sub septentrionis sidere exorta, 
 conuertit omnium oculos. Quod sidus quia ludis Veneris apparuit, diuo Iulio 
 insigne capitis consecrari placuit. Ipsi Caesari monstrosa malignitate Antonii 
 consulis multa perpesso, generosa fuit ad resistendum constantia. Terrae motus 
 crebri fuerunt, fulmine naualia pleraque tacta. Turbinis ui simulacrum, quod M- 
 Cicero plebiscito ante cellam Mineruae pridie, quam in exsilium iret, posuerat, 
 dissipatum membris pronum iacuit, fractis humeris, brachiis, capite, dirum ipsi 
 Ciceroni portendit. Tabulae aeneae ex aede Fidei turbine euulsae. Aedis Opis 
 ualuae fractae. Arbores radicitus, et pleraque tecta euersa. Fax coelo ad 
 occidentem uisa ferri. Stella per dies septem insignis arsit. Soles tres 
 fulserunt, circaque solem imum corona spiceae similis in orbem emicuit; et 
 postea in unum circulum sole redacto, multis mensibus languida lux fuit. In aede 
 Castoris nominum litterae quaedam Antonii et Dolabellae consulum excussae sunt, 
 quibus utrisque alienatio a patria significata. Canum ululatus nocte ante 
 pontifici maximi domum Lepidi auditi: ex his maximus a ceteris laniatus, turpem 
 infamiam Lepido portendit. Hostiae grex piscium in sicco reciproco maris fluxu 
 relictus. Padus inundauit, et intra ripam refluens, ingentem uiperarum uim 
 reliquit. Inter Caesarem et Antonium ciuilia bella exorta. 

[129] CXXIX. Caio Pansa, Hirtio, coss-. 
 Caesari quum honores decreti essent, et imperium aduersus Antonium, immolanti 
 duplicia exta apparuerunt. Sequutae sunt eum res prosperae. C- Pansa consule statua 
 equestris Antonii domi corruit. Equus phaleratus in ipsius conspectu festinans 
 concidit. Quidam e populus sanguine uictimarum prolapsus, respersam cruore 
 palmam proficiscenti dedit. Funesta haec ipsi prodigia fuerunt. Qui mox aduersus 
 Antonium dimicans, in mortem uulneratus est. Armorum telorumque species a terra 
 uisa cum fragore ad coelum ferri. Signa legionis, quae relicta a Pansa ad Urbis 
 praesidium erat, ueluti longo situ inductis araneis uenire uisa. Fulmine 
 pleraque icta. In castris Caesaris luce prima, in culmine praetorii super 
 linteum consedit aquila: inde circumuolantibus minoribus auibus excita, de 
 conspectu abiit. Oraculo Apollinis uox audita. Lupis rabies hieme, aestate 
 frumentum non demessum. Veteranis Caesari consulatum flagitantibus, terribilis 
 tumultus Romae fuit. Caesar quum in campum Martium exercitum deduceret, sex 
 uultures apparuerunt. Conscendenti deinde rostra creato consuli, iterum sex 
 uultures conspecti, ueluti Romuli auspiciis nouam Urbem condituro signum dederunt. 
 reconciliatione inter Caesarem, Antonium, Lepidum facta, foeda principum fuit 
 proscriptio. 

[130] CXXX. M- Lepido, Munatio Planco, coss-. 
 Mula Romae ad duodecim portas peperit. Canis aeditui mortua a cane tracta. Lux 
 ita fulsit, ut, tanquam die orto, ad opus surgeretur. In Mutinensi Victoriae 
 Marianae signum meridiem spectans, sua sponte conuersum in septentrionem hora 
 quarta. Quum haec uictimis expiarentur, soles tres circiter hora tertia diei 
 uisi, mox in unum orbem contracti. Latinis in Albano monte quum sacrificaretur, 
 ex humero et pollice Iouis cruor manauit. Per Cassium et Brutum in prouinciis, 
 direptionibus sociorum, bella gesta. Notatum est prodigii loco fuisse, quod P- 
 Titius praetor propter dissensiones, collegae magistratum abrogauit, et ante 
 annum est mortuus. Constat neminem, qui magistratum collegae abstulerat, annum 
 uixisse. Abrogauerunt autem hi: Lucius Iunius Brutus consul, Tarquinio 
 Collatino: Tib. Gracchus, M- Octauio Caecinnae; P- Tarquinius, P- Marullo: 
 Tullius, Bruto et Cassio, pugnam aduersus Caesarem et Antonium molientibus. In 
 castris Cassii examen apum consedit. Locus aruspicum iussu interclusus, interius 
 ducto uallo. Vulturum, et aliarum alitum, quibus strages cadauerum pabulo est, 
 ingens uis exercitum aduolauit. Puer in pompa Victoriae cultu quum ferretur, 
 ferculo decidit. Lustratione lictor peruersis fascibus lauream imposuit. 
 Brutianis in proelium egredientibus, Aethiops in porta occurrit, et a militibus 
 confossus: Cassius et Brutus interierunt. 

[131] CXXXI. Caio Furnio, Caio Syllano, coss-. 
 Sub Apennino, in uilla Liuiae, uxoris Caesaris, ingenti motu terra intremuit. 
 Fax coelestis a meridiano ad septentrionem extenta, luci diurnae similem in 
 nocte fecit. Turris hortorum Caesaris ad portam Collinam de coelo tacta. 
 Insidiis Romanorum Germani circumuenti, sub M- Lollio legato grauiter uexati.  

[132] CXXXII. Paulo Fabio, Quinto Aelio, coss-. 
 In Germania, in castris Drusi examen apum in tabernaculo Hostilii Rutilii, 
 praefecti castrorum, consedit, ita ut funem praetendentem, praefixamque tentorio 
 lanceam amplecteretur. Multitudo Romanorum per insidias subiecta est.