[18,0] DE ROSIS NASCENTIBUS.

1 Ver erat et blando mordenti a frigore sensu 
Spirabat croceo mane reuecta dies
Strictior eoos praecesserat aura iugales 
Aestiferum suadens anticipare diem.
5 Errabam riguis per quadrua compita in hortis 
Maturo cupiens me uegetare die
Vidi concretas per gramina flexa pruinas 
Pendere aut holerum stare cacuminibus 
Caulibus et teretes patulis concludere guttas
10 ---
Vidi Paestano gaudere rosaria cultu
Exoriente nouo roscida lucifero.
Rara pruinosis canebat gemma frutectis 
Ad primi radios interitura die.
15 Ambigeres, raperetne rosis Aurora ruborem
An daret et flores tingueret orta dies.
Ros unus, color unus et unum mane duorum;
Sideris et floris nam domina una Venus. 
Forsan et unus odor; sed celsior ille per auras 
20 Diffluit; exspirat proximus iste magis. 
Communis Paphie dea sideris et dea floris
Praecipit unius muricis esse habitum. 
Momentum intererat quo se nascentia florum
Germina comparibus diuiderent spatiis.
25 Haec uiret augusto foliorum tecta galero,
Hanc tenui folio purpurea rubra notat. 
Haec aperit primi fastigia cella obelisci
Mucronem absoluens purpurei capitis.
Vertice collectos illa exsinuabat amictus, 
30 Iam meditans foliis se numerare suis.
Nec mora : ridentis calathi patefecit honorem
Prodens inclusi semina densa croci.
Haec modo quae toto rutilauerat igne comarum 
Pallida collapsis deseritur foliis.
35 Mirabar celerem fugitiua aetate rapinam
Et dum nascuntur consenuisse rosas :
Ecce et defluxit rutili coma punica floris
Dum loquor, et tellus tecta rubore micat. 
Tot species tantosque ortus uariosque nouatus 
40 Una dies aperit, conficit ipsa dies.
Conquerimur, natura, breuis quod gratia talis; 
Ostentata oculis illico dona rapis.
Quam longa una dies aetas tam longa rosarum;
Cum pubescenti iuncta senecta breuis.
45 Quam modo nascentem rutilus conspexit Eous
Hanc rediens sero uespere uidit anum. 
Sed bene, quod paucis licet interitura diebus
Succedens aeuum prorogat ipsa suum.
Collige, uirgo, rosas, dum flos nouus et noua pubes, 
50 Et memor esto aeuum sic properare tuum.