87. Orista.
Orista, pastor Oenëi regis, quum uideret caprum a 
grege saepius discedentem, eum secutus, uuam depascentem
inuenit in ripa Acheloi fluminis: quam statim expressit, ac 
de aqua Acheloi fluminis, iuxta quam fuerat inuenta, commiscuit, 
obtulitque regi, qui suo nomine Graeco sermone 
g-oinon, id est uinum, appellauit.

88. Liber, Silenus, Midas rex et Pactolus fluuius.
Liber, Thracia digressus, quum in Tmolo monte iter 
ageret, Silenus, nutritor eius, a Phrygibus captus, ad 
Midam regem ductus est. Silenus autem, agnitus ab eo, 
acceptus est, et Libero aduenienti redditus. Et ob beneficium 
optanti deus arbitrium ei dedit, si quid uellet, a se petere.
Ille uero petit, ut, quae contigisset, aurum fierent. Quod 
inutile fuit. Nam coepit sui uoti affectu torqueri; quia 
quicquid tetigerat, aurum statim efficiebatur. Cui petenti,
ut restitueretur sibi, fecit. Iussit enim, ut ad flumen
Pactolum perueniret, cui se supponeret, et sic rediret in
pristinum statum. Quo facto, Pactolus deinceps arenas 
aureas trahere dicitur.

89. De ortu Panis.
Post mortem Ulixis Mercurius cum uxore eius Penelope 
concubuit; quae sibi iuxta oppidum Tegeam peperit fihium, 
Pan nomine. Unde et Tegeeus dicitur.

90. Pan.
Pan quum Tmolum , montem Lydiae, frequentans, 
fistula se oblectaret, Apollinem in certamen euocauit, iudice 
Tmolo. Itaque quum Apollini uictoria esset adiudicata, Midae
regi adsidenti soli displicuit. Quam ob causam deus iratus 
aures eius asininas fecit. Ille criminis sui notam tonsori 
tantum ostendit, praecipiens ei, ut, si crimen eius celaret, 
participem eum regni efficeret. Ille terram fodit, et secretum 
domini sui in defosso terrae dixit, et operuit. In
eodem loco calamus est natus, unde sibi pastor tibiam fecit, 
quae, quum percutiebatur, dicebat: Mida rex aures asininas 
habet. Quidam tradunt, non Panem, sed Marsyam cum 
Apolline certasse.

91. Arachne et Minerua.
Arachne Lydia, Idmonis et Hippopes filia, studio lanificü 
famam quaesierat; quumque materna industria cunctas 
praecessisset in opere faciendo, festis diebus insolentius 
gIoriata est, quam mortalem decuerat. Nam Mineruam in 
certamen prouocauit, quae, in anum uersa, inter hoc ad eam 
uenit, ut eius audaciam compesceret. Quam quum uidisset 
in certamine permanentem, reuersa in suam speciem, opere 
proposito in certamen descendit. Sic uicta Arachne quum 
contumeliose a Minerua pulsa esset, suspendio se affecit. 
Propter studium autem, quod a Minerua acceperat, in araneam 
uersa est, ut opere inutili nullum suum effectum capere posset.

92. Alceste.
Admetus, rex Graeciae, Alcesten in coniugio petiit, cuius 
pater edictum proposuerat, ut si quis duas feras sibi dispares 
suo curru iungeret, ipse illam in coniugio acciperet. 
Is Admetus Apollinem atque Herculem petiit, qui ei ad 
currum leonem et aprum iunxerunt. Itaque Alcesten in coniugium 
accepit. Quum in infirmitatem cecidisset Admetus,
et mori se comperisset, Apollinem deprecatus est. Ille uero 
dixit, se ei aliquid non posse praestare, nisi si quis se de 
eius propinquis ad mortem pro eo uoluntarie obtulisset; 
quod uxor effecit. Itaque Hercules dum ad Tricerberum 
canem abstrahendum descenderet, etiam ipsam de inf'eris 
leuat, Admetum posuerunt in modum mentis; Alcesten 
pro praesumtione.

93. Neptunus et Amycus.
Neptunus quum incideret in amorem Meropes Nymphae, 
habuit ex ea filium Amycum, Bebryciorum regem, qui effracta 
lege solitus erat uenientes hospites ad se recipere, et cogebat 
eos cestibus secum dimicare, uictorque existens interficiebat eos. 
Hanc eius feritatem quum multi essent perpessi, 
nouissime in eodem certamine superatus, morte multatus 
est a Polluce, qui cum Argonautis pellem auream 
Colchis petebat.