http://www.hs-augsburg.de/~harsch/Chronologia/Lspost12/Gualterus/gua_alpr.html

Incipit Argumentum.

Primus Aristoteles imbutum nectare sacro
Scribit Alexandrum: scaeptrisque insignit et armis.
Cecropidas regi rursus confoederat arces, 
Diruit aonias: numerosa classe profundum 
Intrat  et appellens Asiam de naue fatigat 
Parcendumque ratus: hostem sine marte triumphat 
Elatusque animo sub sole iacentia regna 
Iam sibi parta putat, Asiam de uertice montis 
Inspicit et patrias partitur ciuibus urbes 
Pergama miratur et somnia uisa retractat.

Liber primus.

Gesta ducis Macedum totum uulgata per orbem
Quae large dispersit opes, quo milite Porum 
Vicerit et Darium, quo principe graecia uictrix 
Risit et a Persis rediere tributa Chorinthum 
Musa refer: qui si senio non fractus inermi 
Pollice fatorum nostros uixisset in annos 
Caesareos nunquam loqueretur fama triumphos 
Totaque Romuleae squaleret gloria gentis 
Praeradiaret enim meriti fulgore caminus 
Igniculos solisque sui palleret in ortu 
Lucifer et tardi languerent plaustra Boaete.
At tu cui maior genuissc britannia reges
Gaudet auos. Senonum quo prefule non minor urbi 
Nupsit honos que cum romam senonibus armis 
Fregit adepturus, tarpeiam Brennius arcem.