[0] IMAGO CIVILIS AUGUSTI CAESARIS.
AUGUSTO CAESARI, Si cui mortalium, magnitudo animi
inerat inturbida, serena, et ordinata : idque indicant res 
illae omnium maximae, quas ab ineunte adolescentia 
gessit. Nam qui ingenio commotiores sunt, ii fere adolescentias 
per uarios errores transigunt, ac sub mediam 
aetatem demum se ostendunt : quibus autem natura est 
composita et placida, ii prima etiam aetate florere possunt. 
Atque cum animi dotes, sicut et bona corporis, 
sanitate quadam, pulchritudine, et uiribus contineantur 
et absoluantur, fuit certe auunculo Iulio uiribus animi 
impar, pulchritudine et sanitate superior. Ille enim 
inquietus et incompositus (ut sunt fere ii qui comitiali 
morbo tentantur), se ad fines suos nihilominus summa 
ratione expediebat ; sed ipsos fines minime ordinauerat, 
sed impetu infinito, et ultra mortale appetens, ferebatur
ad ulteriora : hic autem sobrius, et mortalitatis memor 
etiam fines suos ordine admirabili descriptos et libratos 
habuisse uisus est. Primum enim, rerum potiri uolebat ; 
deinde, id assequi, ut dignus eo fastigio existimaretur : 
dein etiam frui summa fortuna humanum esse ducebat : 
ad extremum, addere se rebus, et imaginem et uirtutem 
sui principatus seculis post se futuris imprimere et inferre 
meditabatur. Itaque prima aetate potentiæ, media dignitati, 
uergente uoluptatibus, senectute memoriæ et posteritati, seruiebat.