[27,0] XXVII. ICARUS VOLANS ; ITEM SCYLLA ET CHARYBDIS, SIVE VIA MEDIA.

[27,1] Mediocritas, siue uia media, in moralibus laudatissimum 
est ; in intellectualibus minus celebrata, sed non 
minus utilis et bona ; in politicis tantum suspecta, et cum 
iudicio adhibenda. Morum autem mediocritates per uiam 
Icaro praescriptam intellectualium autem per uiam inter 
Scyllam et Charybdim, ob difficultatem et periculum, 
decantatam ab antiquis notantur. Icaro praecepit pater, 
cum mare esset praeteruolandum, ut uiam aut nimis sublimem, 
aut nimis humilem caueret. Cum enim alae cera 
essent conglutinatae, periculum erat si altius efferretur, 
ne cera ex solis ardore liquefieret ; sin ad uaporem maris 
propius se submitteret, ne ab humore cera minus tenax 
efficeretur. Ille uero ausu iuuenili in celsiora contendit,
atque in praeceps lapsus est.

[27,2] Parabola facilis et uulgata est : uirtutis enim uia inter 
excessum et defectum recto tramite aperitur. Neque 
mirum erat si Icarum, iuuenili alacritate gestientem, excessus 
perdiderit. Excessus enim fere inuenum ; defectus 
senum, uitia esse solent. Ex semitis tamen malis et nociuis 
elegit Icarus (si plane pereundum erat) meliorem. 
Defectus enim recte aestimantur excessibus prauiores. 
Quandoquidem excessui nonnihil magnanimitatis subsit, 
et cognationis cum coelo, ad instar uolucris : defectus uero 
humi serpat, instar reptilis. Praeclare Heraclitus : "Lumen 
siccum, optima anima". Nam si ex humo humorem 
contrahat anima, prorsus deprimitur et degenerat : interim 
tamen modus adhibendus est, ut ab illa siccitate 
laudata lumen reddatur subtilius, non corripiatur incendium. 
Atque haec cuiuis fere nota sunt. At uia illa in 
intellectualibus inter Scyllam et Charybdim certe et peritiam 
nauigandi et felicitatem desiderat. Si enim in 
Scyllam incidant naues, illiduntur cautibus : sin in Charybdim, 
absorbentur. Cuius parabolae ea uidetur esse uis 
(quam nos breuiter perstringemus, tametsi infinitam trahat 
contemplationem), ut in omni doctrina et scientia, earumque 
regulis et axiomatibus, modus teneatur inter distinctionum 
scopulos, et uniuersalium uoragines. Haec enim 
duo naufragiis ingeniorum et artium famosa sunt.