Quae, malum, igitur ratio est, nobilitatem istam nati
modo hominis, corpusque et animum bene ingeniatis primordiis
inchoatum insitivo degenerique alimento lactis
alieni corrumpere? Praesertim si ista, quam ad praebendum
lactem tunc adhibebitis, ant serva ant servilis est, et
ut plerumque solet, externae et barbarae nationis, si improba,
si informis, si impudica, si temulenta est; nam
plerumque sine discrimine, quaecunque id temporis lactans
est, adhiberi solet. Patiemurne igitur, infantem hunc nostrum
pernicioso contagio infici, et spiritum ducere in
animum atque in corpus suum ex corpore et animo deterrimo?
ld hercle ipsum est, quod saepenumero miramur,
quosdam pudicarum mulierum liberos parentum
suorum neque corporibus neque animis similes exsistere.

Scite igitur et perite noster Maro, quod, cum versus
illos Homeri consectaretur:
g-ouk g-ara g-soi g-ge g-pate|r g-e|n g-hippota g-Pe|leus,
g-oude g-Thetis g-me|te|r, g-glauke| g-de g-s' g-etikte g-thalassa,
g-Petrai g-t' g-e|libatoi, g-hoti g-toi g-noos g-estin g-ape|ne|s;
non partionem solam, tanquam ille quem sequebatur,
sed alituram quoque feram et saevam criminatus est: addidit
enim hoc de suo:
Hyrcanaeque admorunt ubera tigres;
quoniam videlicet in moribus inolescendis magnam fere

artem ingenium altricis et natura lactis tenet: quae jam
a principio imbuta paterni seminis concretione ex matris
etiam corpore et animo recentem indolem configurat. Et
praeter haec autem, quis illud etiam negligere aspernarique
possit, quod, quae partus suos deserunt ablegantque
a sese, et aliis nutriendos dedunt, vinculum illud
coagulumque animi atque amoris, quo parentes cum
filiis natura consociat, interscindunt, ant certe quidem
diluunt deteruntque. Nam ubi infantis aliorsum dati facta
ex oculis amolitio est, vigor ille maternae flagrantiae sensim
atque paulatim restinguitur, omnisque impatientissimae
sollicitudinis strepitus consilescit. Neque multo minor
commendati ad nutricem aliam filii, quam morte
amissi, oblivio est. Ipsius quoque infantis affectio animi,
amoris, consuetudinis, in ea sola, unde alitur, occupatur,
et proinde, ut in expositis usu venit, matris, quae
genuit, neque sensum ullum neque desiderium capit. Ac
propterea, obliteratis et abolitis nativae pietatis elementis,
quidquid ita educati liberi amare patrem et matrem videntur,
magnam fere partem non naturalis ille amor est,
sed civilis et opinabilis. Haec Favorinum dicentem audivi
graeca oratione: cujus sententias, communis utilitatis
gratia, quantum meminisse potui, retuli; amoenitates
vero et copias ubertatesque verborum latina omnis
facundia vix quidem indipisci potuerit; mea tenuitas nequaquam.